شاعیر: وەفایی کتێب: دیوانی وەفایی سەرناو: دڵم پڕ خوێن و خوێنبارە بە غەمزەی نازی چاومەستان دڵم پڕ خوێن و خوێنبارە بە غەمزەی نازی چاومەستان هەتا نەمرم ڕەها نابم لە مەکر و سیحری چاوبەستان ئەتۆ سەروێکی نازداری ئەتۆ شۆخێکی گوڵزاری بە دڵ وا چاکە بتگێڕم لەسەر چاوان لەسەر دەستان ++++++++++++++++++++++ سەرناو: بە بێباکی دەمێکی هات و داغی کردم و ڕۆیی بە بێباکی دەمێکی هات و داغی کردم و ڕۆیی دەبێ حاڵی چ بێ بولبول، بەهار زۆر پێنەچوو ڕۆیی؟ نیگار هات دایە خەندە، کەوتە دونیا ئاه و ناڵەی من بەهار هات غونچە پشکووت، دەنگی بولبول سوو بە سوو ڕۆیی فەراقم کرد لە پاش تۆ، هیچ حەیاتم پێنەما، قوربان حەیاتی من کە تۆی، مەعلوومە نامێنم، کە تۆ ڕۆیی لەسەر ماچێکی زاری خۆت کە نەتدا ڕەنگ نەبوو زیز بی عەزیزم بێ وەفاییت کرد لە سەر هیچی نەبوو ڕۆیی خەرامان هات و چوو دڵبەر، وەفایی ما بە ناکامی درێغا عومری شیرینم چ زوو هات و چ زوو ڕۆیی؟ ++++++++++++++++++++++ سەرناو: بە خۆڕایی نییە سووتاوی ڕووتە عاشقی شەیدا بە خۆڕایی نییە سووتاوی ڕووتە عاشقی شەیدا لە ڕووتی دیوە جیلوەی ئاتەشی سینا لە سینەیدا کوتم: عەقدی سورەییا ماهی من تونگی شەکەرنەی بوو کەچی بۆ ڕاستی ئیعجازی خۆی یارم لە خەندەی دا عەسای فەتحی مووسا کول بوو بە موعجیزە شکافی کرد کە فیرعەونی خەتی هات و ئیحاتەی تووری کوڵمەی دا درۆت فەرموو حەزم بێ نایەڵم، گەر ڕاست دەڵێی سادەی! فەرەنگی قەومی دەججال ـ ئەی مەسیحا ـ دەوری کەعبەی دا لە سینەمدا چ شیرین دڵ دەناڵێنێ بە مەحزوونی وەرن لەو شیوە گوێ بگرن بە شین و شیوەنی نەیدا مەکەن مەنعی وەفایی چونکە سەرگەردانی جانانە لە سەر دینی کە شێخی خانەقا بردی کە تۆبەی دا ++++++++++++++++++++++ سەرناو: هەر کە دی جەننەت بە ڕوودا زولفی پڕتابی شکا هەر کە دی جەننەت بە ڕوودا زولفی پڕتابی شکا تاری سونبول، حورمەتی گوڵ، بەرگی سیرابی شکا ماهی شەوئارام بە خەندە هات نیقابی کردەوە ئاسمان نەزمی سورەییا، شەوقی مەهتابی شکا کارگا خاکی بە سەر، وەستا بە ڕوو و سینە و برۆت! نرخی قاقوم، قەدری خەز، بازاڕی سنجابی شکا دەوری تووری کوڵمی دا فیرعەونی خەت چارەی نەهات ئەی درێغا! سەد کەڕەت مووسا بە بێ تابی شکا تاقی پەیوەستی برۆت وا بوو بە قیبلەی خاس و عام کەعبە گەر بۆ خۆی بزانێ پشتی میحرابی شکا کەس نییە لەو نوکتە حاڵیم کا وەفایی! دڵبەرم خۆی دەمی هێنا، ئەمن گەستم، دڵی بابی شکا! ++++++++++++++++++++++ سەرناو: یار هاتە تەبەسسوم بە هەناسەی منی مەبهووت یار هاتە تەبەسسوم بە هەناسەی منی مەبهووت گوڵ گوڵ بە نەسیمی سەحەری غونچە دەپشکووت وا زولفی لەسەر گەردەنی لاچوو بە هەناسەم شەو فەجری بەیان بوو کە نەسیمی سەحەر ئەنگووت هاڕووتی دڵم هات و لە چاهی زەنەخت کەوت سەرگەشتە لە دووی غەمزە بە دوو نێرگسی جادووت ئەبرۆت مەدەدی زولفە بە کێشانی دڵاندا بۆیێکی وەها خەم بووە شاهێن و تەرازووت سەف بەستە هەموو مونتەزیری ئەمرو نیگاهن: قوللابی موژەت، زولفی ڕەشت، گۆشەیی ئەبرووت هەریێکی لەلایێ بە تەمای قەتڵی «وەفایی»ن: تابووری حەبەش، لەشکری چین، عەسکەری هیندووت ++++++++++++++++++++++ سەرناو: پەنجەی لە حەنا بەستووە ئایا گوڵم ئەمڕۆ؟ پەنجەی لە حەنا بەستووە ئایا گوڵم ئەمڕۆ؟ دەستی لە دڵی کوشتەیی خۆی خستووە یا خۆ؟ باکم دڵ و ڕۆحم نییە تۆ زیز مەبە قوربان! ئەو ڕۆحە بە سەرگەردی سەرت بێ وەرەوە تۆ پەیوەستە غەریقی ئەسەری ئاتەش و ئابم بۆ ئابی ڕوخت سینەمە وەک مەجمەری پشکۆ تۆ بی و سەری خۆت مەمخەرە زیندانی جودایی خوێنم نییە، ها! بمکوژە بەم خەنجەری ئەبرۆ بولبول سیفەت هەر لەحزە لە دەوری گوڵی زارت ناڵینمە هەی ڕۆ! گوڵەکەم ڕۆ! دڵەکەم ڕۆ! بۆچی نەگریم هەر دەمە بۆ حاڵی وەفایی جان خەستە و دڵ عاشق و دڵدار جەفاجۆ ++++++++++++++++++++++ سەرناو: ئەی سەبا! تێک مەدە تۆ پەرچەم و کاکۆڵی گوڵە ئەی سەبا! تێک مەدە تۆ پەرچەم و کاکۆڵی گوڵە زولف و کاکۆڵی گوڵە مەسکەنی سەد پارە دڵە ڕامی دامم نەبوو هەرگیز بە فسوون دڵ بووە خوێن گوڵە سەرمەستە غەزاڵێکی عەجەب وەحش و سڵە چییە ئەم نوقتە کەوا بۆتە نیشانەی دەمی تۆ؟ نوقتەیی هیچە کەچی نوکتەیی سەد ئاهی دڵە! دەمی خەندە و قسەیی ماچی دەم هەرزانە بە ڕۆح دەم و خەندەی نوقوڵستانە قسەی وی نوقوڵە وەرە بڕوانە دڵم ئەی گوڵە! بۆ زاری گوڵت بولبولێکە چ حەزینە، چ لە گریان بە کوڵە؟ ! قەت بە دڵ یاری وەفایی نەبوو، حەیرانم ئەمن دڵ کە مەعلوومە یەکە بەس گوڵە بۆچی دوو دڵە؟ ! ++++++++++++++++++++++ سەرناو: سەرگەشتە و شێواوە وەکوو سایە لە دووتە سەرگەشتە و شێواوە وەکوو سایە لە دووتە گۆیا سەری زولفت وەکوو من عاشقی ڕووتە زەنگی و فەڕەنگی سەفی کێشاوە بە قەتڵم غەمزە و موژە دێن بۆ دڵی دێوانە بە جووتە یاقووتی لەبانت بە کەرەم بێنە تەبەسسوم بۆ تەن ئەوەیە قووەت و بۆ دڵ ئەوە قووتە نوورانییە عالەم کە لە سایەی سەری زولفت سایەی سەری تۆ سایەیی مولک و مەلەکووتە هەرچی هەیە جەننەت بە گوڵ و نافە نەنازێ! عەکسی ڕوخ و عەتری شکەن و تایەکی مووتە غافڵ مەبە بۆ ڕابیتەیی گەردەن و چاوی مەی بگرە وەفایی کە ئەمە جام و سەبووتە ++++++++++++++++++++++ سەرناو: تابی سەری کوڵمت بوو کەوا زولفی بە با دا تابی سەری کوڵمت بوو کەوا زولفی بە با دا یا ڕۆژی ویسالت شەوی هیجرانی وەلا دا؟ خاڵی دەمتە یا مەگەسی حوققەیی شەککەر یاخۆ حەبەشی‏زادە لەنێو ئابی بەقادا؟ خوێنین جگەرن تالیبی ئەو زارە دوو عالەم ئەو جەوهەرە بۆ هیچێ بە دوو عالەمی نادا هەر تارە کەوا مەسکەنی بارێ دڵ و ڕۆحە سەد ڕۆحی بە با دا کە بە داو پەرچەمی بادا بازاڕی شکا وەک دڵی زارم گوڵ و نافە تا تای سەری زولفی کە بەسەر عاریزیدا دا ئەو زارە کەوا هەر بە تەبەسسوم هەیە حاڵی پیرێکە دەڵێی گا لە بەقا گا لە فەنادا حەیرەتزەدەیی نێرگس و ئەبرۆتە وەفایی کافر نییە وا مەست و لە میحرابی دوعادا ++++++++++++++++++++++ سەرناو: سەری کوڵمت لە نێو زولفی سیادا سەری کوڵمت لە نێو زولفی سیادا ئیشارێکە لە نووری شەوچرادا سجوودی بردە ئەبرۆت ڕۆژ لە سەر ڕوو شەوی دوێنێ کە تۆ زولفت وەلادا ئەمن چاوم لە ڕۆژ وا پڕ لە خوێن بوو کە ئاوێنەی جەمالی خۆی جەلا دا شەو و ڕۆژ هەر لە فیکری زاری تۆ دام بە هیچێ عومری شیرینم بە با دا ئەرێ ڕۆحم بە لێوی پڕ لە خەندەت ئەرێ هۆشم بە چاوی سورمەسا دا لەبەر تاقی برۆت بمرم چ نابێ کە من شا بم لە بن باڵی هومادا مورادی ڕۆحمە بۆیە وەفایی! بە دڵ ماچێ لە غونچەی لێوی نادا ++++++++++++++++++++++ سەرناو: لێوەکەی ئاڵت دەڵێن عاشق لە سووتان بەردەدا لێوەکەی ئاڵت دەڵێن عاشق لە سووتان بەردەدا زەڕڕەیەک نوورە بەڵێ ئاگر لە ئینسان بەر دەدا من لە سیڕڕی حیکمەتی چاوت عەجەب ماوم، عەجەب! ئەو نەخۆشە خوێنی قەلبی من بە موژگان بەر دەدا ئەژدەهای زولفت تەلیسمێکە لە سیحری بابلی میهری ئاگر شوعلە دەگرێ، ماهی تابان بەر دەدا هیندوویی خاڵت وەنێو باغی جەماڵت کەوتووە باغەبان خانەخەرا بێ! بۆچ گوڵستان بەر دەدا؟ لێوی یاقووتت ئەگەر قووتی ڕەوانی عاشقە پێم بڵێ وەجهی چییە ئاگر لە ئینسان بەر دەدا زاری تۆ گوڵزارە خۆ، بۆچ ئابی حەیوانی هەیە؟ سەروی تۆ ئازادە، بۆچ نارنج و ڕوممان بەر دەدا؟ لێوی ئاڵت چاوی کاڵت بوونە فیتنەی دین و دڵ حەقیەتی ـ بالله ـ وەفایی دەست لە ئیمان بەر دەدا! ++++++++++++++++++++++ سەرناو: هەرچی لە سەر تۆ گەڕا شاد بوو بە دەوڵەتی ڕووت هەرچی لە سەر تۆ گەڕا شاد بوو بە دەوڵەتی ڕووت زولفی شکستە بۆیێ دەستی لە دامەنت دا سەد ڕۆح ئەگەر فیدا کەم ناگەم بە خەتت و خاڵت من نائومێد و مەحرووم هیندوو لە گوڵشەنتدا زولفت لە پێ کەوت و خەت هات بە تەمای قەتڵی دڵ ئاخر بە دەستخەتی خۆت گرتت بە کوشتنت دا ئەی نەوبەهاری خووبی ڕوحمێ بە حاڵی بولبول نەوەک سەرمای هەناسەی لە گوڵ و یاسەمەنت دا ئەی خەت بە زولفی دولبەر تۆ بوویە فیتنەیی دڵ دڵ بێغەم و خەیاڵ بوو هاتی بە گرتنت دا وا تێمەگە عەزیزم کوشتمت و نائومێد بووم دەستم ئەگەر نەگەییێ خوێنم لە گەردەنت دا بە قسەم بکە وەفایی بمرە هەتاکوو ماوی وەسڵی بەقا بە ئایات ئەوا لە مردنت دا ++++++++++++++++++++++ سەرناو: لە داغی زولفی یار و عاریزی وەک لالە سووتاوم لە داغی زولفی یار و عاریزی وەک لالە سووتاوم بە ڕەنگی لالە بۆیێ داغدار و غەرقی خوێناوم دوو چاوی مەستە بێبادە، مەلایک ڕوو، پەری‏زادە پەری دێوانەیی کردووم، مەلایک دەستی لێداوم لە سەودای خەتتی یاقووتی لەب و کاکۆڵی ڕێحانی وەکوو زولفی شکستە تێکشکاو و خاو و شێواوم لەبەر چاوت کە ڕەمزی نوکتەبازی مەکتەبی حوسنە وەها مەستم لە ڕەنگی حەرفی مەعنا لەوحی شۆراوم لە نێو سەیلی سوروشک و سۆزی دڵ حەیران و مەبهووتم لە دووریی تۆ عەجەب ماوم! نە خنکاوم، نە سووتاوم! عیزار و زولفی تۆ ـ بێشک ـ شەو و ڕۆژ پێکەوەن ئەمما شەو و ڕۆژ پێکەوە؟ لەو وەجهە من حەیران و داماوم تەلیسمی بابلە، سیحری حەڵاڵە ـ قەد ڕەها نابم ـ وەفایی! یا بە داوی زولف و ڕەمزی چاوە گیراوم؟ ++++++++++++++++++++++ سەرناو: ئەی لە سایەی سەری زولفت بە نیگا و خەت و ڕوو ئەی لە سایەی سەری زولفت بە نیگا و خەت و ڕوو بەستەیی داوە، چ تاووسە، چ شەهبازە، چ قوو مەستی ئەو نێرگسە کاڵەم دەگریم بۆ لەبی تۆ شیشە بۆ جامی شەرابم، کوڵی گریەم لە گەروو مەمدە بەر حەڵقەیی ئەو زولفە لەسەر ماچی دەمت لە تەنافم مەدە مەمکوژە لە سەر هیچ و نەبوو تێک نەچوو قەت سەری زولفت لە هەناسەی دڵی من دووکەڵی ئەو شەمە هەرگیز بە نەفەس واوە نەچوو لە دوو زولف و سەری کوڵمانی عەجەب ماوم ئەمن! ڕاستە ئەو نوورە بەڵام نوور نییە دوو سایە لە ڕوو وەرە بەو نێرگسە ساقی بە فیدای گەردشتم نەفەسێ بێنەوە گەردش بە وەفای جام و سەبوو عاریز و زولفی بە خەندە بە وەفایی دەفرۆت گوڵ بە تا، نافە بە خەرمەن، دوڕڕ و شەکەر بە قوتوو ++++++++++++++++++++++ سەرناو: دڵی دێوانە ویساڵی لەبی جانانی دەوێ دڵی دێوانە ویساڵی لەبی جانانی دەوێ بولبولی شیفتە خەندەی گوڵی باغانی دەوێ دڵ لەسەر پەرچەمی شێواوە ئەسیری زەنەخە ئارێ ئارێ ئەوە دێوانەیە زیندانی دەوێ بە کوڵی گریەیی من بۆیە گوڵم پێدەکەنێ شەکەر و گوڵ دەفرۆشێ دوڕ و مەرجانی دەوێ بەستەیی زولفییە، بۆ زاری دەناڵێ گوڵەکەم تووتیی گوڵشەنی هیندە شەکەرستانی دەوێ دڵ بە سەد جێگە لە نێو زولفی دەسووتێ بە عیزار پادشای حوسنە بە شەو حوکمە چراغانی دەوێ غەزەلی تورفەیی من قەت نییە بەو ناسکییە بۆ لەبەر کردنی دانایێ قەدرزانی دەوێ خەستەیی چاوتە سووتاوە وەفایی ساقی سەرخۆشی بادەیی سادێکە غەزەلخوانی دەوێ ++++++++++++++++++++++ سەرناو: هەتا ڕۆژی قیامەت دێت و نایێ هەتا ڕۆژی قیامەت دێت و نایێ لە دووری نامە شەرحی ماجەرایێ لە ئاه و ناڵەیی پەروانە خەوفێ کە تۆ بگرێ خودا ئەی شەم بە بایێ دەمت دەرمان، تەبیب تۆ، من بریندار دەسا بۆ حاڵی من تەدبیر و ڕایێ لەسەر گەنجی ڕوخت ڕەشماری زولفت لەبۆم هاتن بە دەو هەر یەک لە لایێ برینداری هەوای جیلوەت شەهیدە ئەمان ساقی بە مەرگی من سەمایێ هەموو دەم ڕوو لە میحرابی برۆتم ئیلاهی کەی ئیجابەت کەی دوعایێ؟ بە یادی تاقی میحرابی برۆی تۆ وەفایی چوو لە گۆشەی خانەقایێ ++++++++++++++++++++++ سەرناو: بە ماچێ جان دەبەخشێ، ئەم مەسیحای عەسرە، بیستوومە بە ماچێ جان دەبەخشێ، ئەم مەسیحای عەسرە، بیستوومە ئەوا من عاشقی ڕووتم دەخیل دڵ زار و مەزلوومە ئیشارەم کردە زولفی ڕوو بە ئەبرۆ بۆ چییە؟ فەرمووی: بە قیبلەم نۆ موسوڵمانێکە زەنگی زادەیی ڕوومە دڵم تیفلی دەبستانی غەمە وا مەیدە بەر غەمزە هەتاکەی تیرە باران؟ ئاخر ئەو مەزلوومە مەعسوومە لەبەر تاقی برۆت گریانی دڵ بۆ زولفە بەرپا بوو عەجەب ماوم دەڵێن: شەو ڕوو بە قیبلە ناڵە مەحکوومە لە سیڕڕی حیکمەتی زارت کە نوقتەی جەدوەلی ڕووحە عەجەب ماوم! چ نیکتێکە؟ نە مەوجوودە نە مەعدوومە! سیەه ڕۆژ و نەخۆشی تۆم گوڵم ئاشفتە بوو، یەعنی: بە داوی توڕڕە وایە چی لە دووی دوو چاوی جادوومە وەفایی وا لە کوڵ دەگری، بە دڵ بۆ گوڵ دەناڵێنێ بە سەد غولغول دەڵێ بولبول لە باغی قیبلە مەحروومە ++++++++++++++++++++++ سەرناو: تا بە تا لەو ڕۆژە تۆ زولفت بە ڕوودا خستەوە تا بە تا لەو ڕۆژە تۆ زولفت بە ڕوودا خستەوە من لە سایەی زولف و ڕووی تۆ ڕۆژی ڕووناکم شەوە دا بزانن خەت لە دەوری عاریزی هات و کوتی: «هەرچی نەیدیوە شەو و ڕۆژ نوور و زولمەت پێکەوە!» دڵ لەسەر تاقی برۆی خۆی خستە داوی زولفی خاو قیبلەکەم گۆڕاوە بۆیە پێم بە داوی کوفرەوە ڕۆحی شیرینم بە چاوان وا بە زاری دەمکوژێ قەد نەڵێ: داخۆ ئەوە فەرهادە یاخۆ خەسرەوە؟ چونکە دڵ عاشق بە ئەبرۆی بوو بە داوی زولفی بەست حەقیە زنجیری بکا دێوانەیی ماهی نەوە من وەها زوو مەستی مەی نابم بە نەشئەی چاوەکەت مەرگی من ساقی لەگەڵ ئەو جامە لێوت بێنەوە تۆ وەفاییت کوشتووە ئیسباتی کوڵمی سوورتە ڕۆژ کە گیرابێ نیشانەی قەتڵی مەزڵوومان ئەوە ++++++++++++++++++++++ سەرناو: چ تەلیسمێکە؟ چ سیحرێکە؟ چ سەودایێکە؟ چ تەلیسمێکە؟ چ سیحرێکە؟ چ سەودایێکە؟ سەری زولفت کە دوسەد چینی بە هەودایێکە ناڵەناڵی دڵی سەودازەدە لەو پەرچەمەدا ئەوە نیشانەیە دێوانەیی سەودایێکە وەرە مەنواڕە بە سووکی لە نیساری قەدەمت ئەشکی دیدەی تەڕی من گەوهەری دەریایێکە ئەی شەکەرلەب کەمەری تۆ چییە بەو مەحکەمییە کە هەزاری وەکوو من بەستەیی هەودایێکە نێرگسە غارەتی دین، پەرچەمە شێواویی دڵ هەر یەکە ئافەت و فیتنەی سەری مەولایێکە کوشتەیی تیغی غەمی، کافییە ماچێکی دەمی بەڵێ ئەو دولبەرە لەو عەسرە مەسیحایێکە مەنعی ناڵینی وەفایی مەکە مەجنوون سیفەتە ئاخر ئەو غەمزەدە پابەستەیی لەیلایێکە ++++++++++++++++++++++ سەرناو: چین چین و تاتا گرێی زولفی حەریری بکەوە چین چین و تاتا گرێی زولفی حەریری بکەوە دین و دڵان مەسکە ڕیێ میسک و عەبیری بکەوە چەند خۆشە بۆسە کردن، پێکەوە دەست و گەردن ئیدی هەتاکوو مردن بە شەهد و شیری بکەوە هیلاکی غەمزە و برۆی، شاد و شەهیدە بۆ خۆی ئەی دڵی ڕەنجەڕۆ بۆی، شیر و تیری بکەوە گەر وەکوو زولفی سیای، حەلقە ببەستن سەفای بمرە لەبەر خاکی پای، هەر بە ئەسیری بکەوە لە مێژە بێحاسڵم، تاکەی بناڵێ دڵم؟ بولبولی خۆتە گوڵم، جارێکی بیری بکەوە دڵ کە لە تۆ زیز بووە، خوێن وە سەری کەوتووە تیفلە گڕووی گرتووە، بەو مەمە ژیری بکەوە چاو مەستە ڕوو گوڵدەستە زاری خۆت کردە پستە فەرمووی وەفایی هەستە بەس بە زویری بکەوە! ++++++++++++++++++++++ سەرناو: دوور لە تۆ بۆ و زولفە دڵ حەققی بەڵا و وەرهەمە دوور لە تۆ بۆ و زولفە دڵ حەققی بەڵا و وەرهەمە بۆ عەزیزی خۆی هەموو کەس وا بە شین و ماتەمە خاڵی سەرچاهی زەنەخدانت چ شیرینە؟ دەڵێی هیندوێکی تەشنەیی جۆیایی ئابی زەمزەمە زولفەکەت گرتمی، بەیازی گەردەنت سووتاندمی خوێنی پەروانە بە دەستەی شەو لەسەر ئەستۆی شەمە شەمعی مەجلیس دەرمەکە پەروانەکەی سووتاوتە هەر ئەوە سەر تا قەدەم بۆت ئاتەشین و مەحرەمە عوشرەت و عەیشی جیهان خەتمە لەسەر ماچی دەمت هەر سولەیمانە ئەوی دەستی بگا بەو خاتەمە ساعیدی ئیمدادی پەنجەی دا بە فەتحی دڵ کوتی: سەفشکێنی قۆڵی گورجستانە، فەوجی پێنجەمە زولف و خاڵی تۆ کەوا شاد بوون بە تۆ عەیبی نییە ئەمڕۆ هەرچی ڕووڕەشە باڵانشین و مەحرەمە من دڵم بۆ ماچێکی چاوی بە زولفی دا کوتی ئەی پەشیمانم! وەفایی! مەستە سەودای بەرهەمە ++++++++++++++++++++++ سەرناو: لەو شارە خەدەنگی سەنەمێکم لە جگەر دا لەو شارە خەدەنگی سەنەمێکم لە جگەر دا شۆخێکە غەمی ئایینەداری بە قەمەر دا خەمڵیوە وەکوو گوڵ بە سەر و بەرگی بەهاری خۆی گوڵ، دەمی گوڵ، چەپکەنی گوڵناری لەبەردا بۆ زەوقی تەکەللوم کە دەمی هاتە تەبەسسوم خەندەی لە دەمی غونچە و تەعنەی لە شەکەر دا شەڕیانە لەسەر موڵکی دڵم غەمزە و نازی بۆیێکی بە جووت دێن وەکوو نەشتەر لە جگەردا گەنجینە تەلیسمی هەیە بەو چاوە لەسەر هیچ وەجهی چییە ئاشوفتەیە زولفت لە کەمەردا؟ تیرت کە قەراری جگەرم بوو وە دڵم کەوت تا ڕۆژی حەشر داغی خەدەنگت لە جگەردا ماڵێکە هەموو وەقفە لە شەوقی سەری کوڵمت عومرێکە هەموو سەرفە لە ناڵینی سەحەردا هەر لەحزە وەفایی وەکوو بولبول کە دەناڵێ کەس مەنعی نەکا عەشقی گوڵەندامی لەسەردا ++++++++++++++++++++++ سەرناو: مەششاتە کە شانەی لەسەری زولفی سەنەم دا مەششاتە کە شانەی لەسەری زولفی سەنەم دا ئاشوفتەگیی حاڵی وەفایی لە قەڵەم دا قوربان وەرە سەیرێکی دڵ و عالەمی دڵ کە هەر زەوقە بە دڵ، شەوقە لە سەر، ئاهە لە دەمدا ئاوێنەیی دڵ وا لە جەلادا بە تەجەللا دێوانەیی ڕووت کەی لە هەوای شەوکەتی جەمدا؟ بۆ خاتری خەندێکی بە ڕەنگی گوڵ و باران عاشق ئەوەتا هەر کوڵی گریانی لە دەمدا خەندەی گوڵی زارت کە نەبوو باعیسی مەستیم بۆچی دڵی من دەستی لە گوڵزاری ئیرەم دا؟ ئاخر سەگی خاکی دەری تۆ بووم بە جودایی مروەت نەبوو تیغت لە سەری سەیدی حەرەم دا ڕۆحم بە نیساری قەدەمت! بۆچی دەڕەنجێی؟ ڕۆحم کە بە من بایە، وەکوو دڵ، چییە؟ دەمدا! وا عاشقی زار و کەمەری تۆیە وەفایی لەو نێوە وجوودێکە لە بەینی دوو عەدەمدا ++++++++++++++++++++++ سەرناو: گەردشی چاوت قەراری عاشقی مسکین دەبا گەردشی چاوت قەراری عاشقی مسکین دەبا ساحیری چاوبەستە، ئارێ، دڵ دەکێشێ دین دەبا! قیبلەکەم بەو زاری هەر وەک غونچە بۆیە پێکەنی تا بڵێن خەندێ لە گوڵ بێ ئابڕووی پەروین دەبا من کوتم: گرتی حەبەش کەعبەی جەماڵت؟ ئەو دەڵێ: کاروانی میشکە بۆ شاری گوڵ و نەسرین دەبا گەر ببینێ تاقی پەیوەستی برۆت فەرهادی چین ڕۆحی شیرینی بە قوربانی، بە سەد ناڵین دەبا پێچ و تابی زولفی خاو و ڕەمز و غەمزەی سیحری چاو ئەو لە لایێ رۆح دەکێشێ ئەم لە لایێ دین دەبا نەشتەری چاوی حەبیبم دێ بە سینەمدا دەچێ مەرهەمی نازی تەبیبم بۆ دڵی خوێنین دەبا من وەها مەستی گوڵەندامم کە نازانم ئەبەد هۆشی من دوگمەی تەڵا، یا ساعیدی سیمین دەبا؟ تا وەفایی لەو دەرە بێت و بچێ مەنعی مەکە سورمەیی خاکی دەرت بۆ چاوی پڕ ئەسرین دەبا ++++++++++++++++++++++ سەرناو: بۆ لەبی جانان بە چاوت من ئەوا بوومە کەباب بۆ لەبی جانان – بە چاوت – من ئەوا بوومە کەباب دوستان ساقی کجا تا دردهد جام شراب؟ شەو بە ڕۆژ ئاڵاوە یا سونبول لە دەوری بەرگی گوڵ؟ یا پریشان گشتە بر روی تو زلف پر ز تاب؟ تا بزانن ڕۆژ و شەو هەردوو لە لایەک دێنە دەر زلف و روی خود عیان کن بر فکن بند نقاب زەوقی خەندە و شەوقی جیلوەی تۆیە حەیرانم دەکەن شهد و شکر بین کە ریزد از تکلم ئافتاب ماچی لێوت ئەو دەمەی خۆشە کە بێیە پێکەنین خوش بود گل بشکفد بلبل شود زو کامیاب مەوجی گریانم گەیشتە ڕووی و چاوی لێ نەکرد سیل بر گلشن زد و نرگس نمی‏خیزد ز خواب لەو دەرە مەمکوژە چونکە شێتی زولف و ڕوویی تۆم عاشقم صید حرم، سودایی و مست و خراب قەت بە مفتی دامەنێ ئیدی وەفایی فرسەتە گوشەی گلزار و، جام بادە و، بانگ رباب ++++++++++++++++++++++ سەرناو: نیگارا ئەی بە غەمزە ئافەتی دڵ، چاوی بیمارت نیگارا ئەی بە غەمزە ئافەتی دڵ، چاوی بیمارت ئەمان سەر تا قەدەم سووتام لە دووریی نووری دیدارت دەسا ڕوحمێ وەفادارم! بە حاڵی داد و هاوارم کە وەک بولبول دڵی زارم دەناڵێ بۆ گوڵی زارت سەرم ناوێ ئەگەر نەیخەم بە حەڵقەی پەرچەم و چاوت دڵم ناوێ ئەگەر نەیکەم بە فیدیەی چاوی عەییارت ئەسیری زولفی خاوی تۆم، شەهیدی ڕەمزی چاوی تۆم ئەمن گیراوی داوی تۆم، لە سەد جێ دڵ بریندارت شەهیدی نازی تۆم و داغداری باغەبان ئەی گوڵ لە دووری تۆ بناڵم؟ یا لەسەر بێدادی ئەغیارت؟ ئەمن نەمدیوە هیندوو باغەبانی باغی جەننەت بێ بە شیرینی چ دڵکێشە؟ بنازم خاڵی ڕوخسارت لەلایێ شەککەرستانە، لەلایێ ئابی حەیوانە ئەگەر گوڵ بێ ئەگەر غونچە، لەب و زاری شەکەربارت «وەفایی»، دوور لە وەسڵی تۆوە پابەندی تەلیسمێکە لەسەر گەنجی جەماڵت کەوتە داوی زولفی ڕەشمارت ++++++++++++++++++++++ سەرناو: ئەگەر بێ یادی زولف و چاوەکەت یەک لەحزە سابیر بم ئەگەر بێ یادی زولف و چاوەکەت یەک لەحزە سابیر بم ئەسیری بەندی کافر کوشتەیی بێدادی ساحیر بم ویساڵی خاڵەکەی لێوت حەیاتی عاشقە ئەمڕۆ بە حەققی ساقیی کەوسەر بڵا لەو بەزمە حازر بم نیگاهی گەرمی تاراجی هەموو دەرد و غەمە وەک مەی کوشندەی میحنەتە قوربانی نەشئەی دەوری ساغر بم بە جەزبەی خاڵی ڕووت بەڵکوو بە باغی حوسنی تۆ شاد بم دەبێ من هەر لەسەر ئایینی ئیبراهیمی ئازەر بم کەمەندی زولفەکەی تۆ بمگرێ من عاشقی ڕووتم موراد و مەتلەبێکی دیم نییە، «غیر از» تو، کافر بم! وەکوو پەروانە دەگریم و دەسووتێم دوور لە زولفی تۆ هەتا کەی من لە داغی تۆ حەریقی ئاو و ئاور بم؟ بە خەندێکی دڵی بیماری ئەو چاوانە مەشکێنە لە ئەم گوڵقەندە مەحروومم مەفەرموو بەڵکوو چاتر بم «وەفایی»! گەر بە هەویای وەسڵی زاری دڵ مەدە زولفی مەحاڵی عەقڵە جەمعییەت کە من ئاشوفتەخاتر بم ++++++++++++++++++++++ سەرناو: نیگارا! دڵبەرا! نامیهرەبان! یاری جەفاکارم نیگارا! دڵبەرا! نامیهرەبان! یاری جەفاکارم بە زاری کوشتمت! تاکەی دەفەرمووی من وەفادارم؟ دەڵێی مورغی شەباهەنگە لە دەوری سوبحی دیدارت لە حەلقەی زولفی تۆ دێ دەم بەدەم ناڵەی دڵی زارم بە دەردێ موبتەلا بووم جاهیل و دانا کە حەیرانن مەگەر چاوی نەخۆشی تۆم نە مەخموورم نە هۆشیارم؟ گەهێ سووتاوی ئەبرووتم، گەهێ پابەندی گیسووتم لە لایەک ڕوو لە میحرابم، لەلایەک ڕوو بە زوننارم نیشانەی قاتیلی نامیهرەبانم زاهیرە یەعنی: فەرەنگی خەت و زەنگی زولف و هیندوو خاڵ و دڵدارم بە تای زولفی و چینی توڕڕە دین و دڵ دەبا چاوی دەڵێی من خانەوادەی ئاهوانی چین و تاتارم وەسییەت بێ کە مردم تەخت و تابووتم لە عەرعەر کەن هەتا عالەم بزانێ من شەهیدی قامەتی یارم «وەفایی» دوور لە تۆ پەیوەستە حاڵی شین و گریانە لەبەر چاوت بە سەد جێ وەک نیشانەی دڵبریندارم ++++++++++++++++++++++ سەرناو: ئەی مایەیی سەد فیتنە بە دوو نێرگسی جادوو ئەی مایەیی سەد فیتنە بە دوو نێرگسی جادوو ئەی حەڵقەیی زولفت ڕەسەنی گەردەنی ئاهوو ئەی دەستەگوڵی باغی بەهەشتی بە مەلاحەت ئەی پستەدەم و سەروقەد و سیلسیلەگێسوو خەت سەرشکەنی زولفی لە ئازاری دڵان کرد گەر تەربیەتی داوە فەڕەنگ چین بە خەتا چوو ڕۆژ بۆوە کزەی با لە خەیابانی گوڵاندا زولفی بە هەناسەم کە لەسەر عاریزی لاچوو فەرمووی: وەڕەزەم لەو غەرەزی پڕ مەرەزی ئەو ڕازی مەرەزی چاوی کە پرسیم لە ئەرەستوو خەندەی دەمی تۆ بۆیە شیفای دەردی دڵانە پەروەردە لەگەڵ گوڵشەکەرە گەوهەر و لوئلوو ئەو خاڵە چ شیرینە لە نێو حەڵقەیی زولفت نەمدیوە سوهەیلی یەمەنی بێتە تەرازوو تۆ ڕەنجە مەبە کوشتنی ئاسانە وەفایی بەو غەمزە ئیشارەت بکە، بەو چاوە بفەرموو ++++++++++++++++++++++ سەرناو: ئەی بە هەر ئاوێنە حوسنێک و تەجەللایێکی دی ئەی بە هەر ئاوێنە حوسنێک و تەجەللایێکی دی ئەی بە هەر چاوی دڵی عاشق دڵارایێکی دی بۆ خیتابێکی شەو و ڕۆژ ئەو دڵەی سووتاوی من تووری ڕۆحم تالیبی دیداری مووسایێکی دی چونکە ئاوێنەی جەماڵی شاهی خووبانە دڵم دیتە ئاه و ناڵە هەر دی ڕوویی زیبایێکی دی غارەتی هۆشم دەکا هەردەم پەرێکی شۆخ و شەنگ بۆیە وا هەردەم لە دڵما شۆر و غەوغایێکی دی هیجری تۆ ڕۆحان دەکێشێ، وەسڵی تۆ ڕۆحان دەدا ئەی فیدای زولف و ڕوخت بم! تۆ مەسیحایێکی دی من بە چاو و گەردنی تۆ تەشنە و خوێنین دڵم ئاوری من دانامرێنێ جام و مینایێکی دی قیبلەگاهی عاریفان کەس وەک عوبەیدیللا نەبوو عالمێکی وا دەبێ بۆ غەوسی بەغدایێکی دی؟ هەر لە تەقدیری وەفایی بوو شەوی دی مەیفرۆش حەیفە بۆ تۆ هەر دەمە دەیر و کلیسایێکی دی ++++++++++++++++++++++ سەرناو: تا نەرگسی تۆ نازی هەبێ غەمزە نومابێ تا نەرگسی تۆ نازی هەبێ غەمزە نومابێ شەرمەندە ئەبێ چینییە ئاهوویی خەتابێ ئەی خوسرەوی خووبان بە دوو لێوی شەکەرینت شیرین نییە فەرهاد بکوژی تۆ بە عیتابێ سەبزەی دەمتە داویە شکەست خەتتی ڕێحانی خەتتێکە غوباری کە بە یاقووت کشابێ حەیرانی دەم و سەبزەیی نەوخێزی لەبی تۆم بێ نوکتە نییە قەت خەتی ئایاتی خودابێ سووتاوە دەروونم لە غەمی غەمزەیی جانان موتریب بڵێ، ساقی بە کەرەم بێنە شەرابێ خوێنی دڵی ڕشتم لە هەوا دڵ نەبوو خاڵی عاشق بە خودا وایە وەکوو من بە وەفابێ حوسنت بە لەتیفی قەد و شیرینیی زارت قەد باغی ئیرەم دارە گوڵێکە گوڵی نابێ تۆ هەر بە جەفا مەیلی وەفاییتە عەزیزم مەعشووقە دەبێ هەم بە وەفا هەم بە جەفا بێ ++++++++++++++++++++++ سەرناو: ئەرێ ئەی زولفەکەت سەر تا قەدەم هەر حەلقە و بەندە ئەرێ ئەی زولفەکەت سەر تا قەدەم هەر حەلقە و بەندە چ داوێکە کە هەر داوێکی بەندی سەد خیرەدمەندە؟ کە تۆ هاتی بە گوڵشەندا لە شەرمی زولف و ڕووی تۆ بوون وەنەوشە و گوڵ سەراسەر غەرقی خوێن، مات و سەر ئەفگەندە خودایا ئەو جەمال و قامەتەی دوورکەی لە چاوی بەد درەختی گوڵ لە نارنج و گوڵ و بادامی پەیوەندە کوتم: قوربان زەدەی چاوم! شیفای دەردم چییە بیدە؟ دەمی خۆی کردە غونچە و پێکەنی فەرمووی: کە گوڵقەندە بە خەتتێکی شکستەی زولفی ڕێحانی لە سەر عاریز لە مەعنای ئاتەش ئەم تۆمارە شەرحی زەند و پازەندە لە عیشقی تۆ هیلاکی ئەو دڵەی دێوانە دوو چت بوون: وەک ئاهوو چاوڕەش و وەک غونچە زاری پڕ شەکەرخەندە لە ژێر باری غەمی زولفی خەتی هات و ڕەهای کردم ئیلاهی قەت جەوانمەردان نەکەی داماو و دەرمەندە وەفایی هەرچی بێ، ئاخر، هیلاکی چاوەکەی خۆتە بە چاوی سووکی مەنواڕێ، مەڵێ: مەیخوارە و ڕەندە ++++++++++++++++++++++ سەرناو: بە لێوی تۆ و بە چاوی تۆ کەوا هەر مەست و سەرمەستە بە لێوی تۆ و بە چاوی تۆ کەوا هەر مەست و سەرمەستە عەزیزم تا بەکەی ئەم خەستەیە هەر مەست و سەربەستە؟ لە قوببەی سینە سووتاوە دڵم بەو نارە پڕ نارە برۆی پەیوەستی خستوومی منی وا خەستە پەیوەستە بە ئاه و گریەیی من پێکەنی، وەک بەرق و باران بێ! بەهاران پستە خەندان بێ بە ناز ئاهێستە ئاهێستە! هەتا زنجیری زولفی تۆم هەبێ هەر شاد و ئازادم سەرم هەر داوە بەو داوە، دڵم پابەستە بەو بەستە بەڵێنم ڕاستە من گەردەن کەچم بێڕستی دەستی وی قەلادە و ڕستە بۆ من پەرچەمی ئەو سەروە نەوڕەستە قەد و قامەت قیامەت، قد قیامت تا بڵێن قامەت بڕۆ ئەی تازە گوڵدەستە، دەمێکی هەستە ڕاوەستە ببارێنە گوڵ و نافە بە خەندە داغی باغانە سەری زولفت کە دەم بەستە لە دەم بەستە ئەمە بەستە وەفایی مەجلیسێ گەرمە چ خۆشە بێی و ساقی بێ وەکوو گوڵدەستە بتگێڕێ بە دڵ لەو دەستە بەو دەستە ++++++++++++++++++++++ سەرناو: بەم ڕوخ و لەب مەیلی گوڵستان مەکە بەم ڕوخ و لەب مەیلی گوڵستان مەکە هەتکی گوڵ و غونچەیی خەندان مەکە جانی عەزیزم بەسەری زولفی خاو! یووسفی دڵ چی دی لە زیندان مەکە بمکوژە بۆ خۆ نە بە دوو چاوی مەست قەتڵی منی خەستە بە مەستان مەکە دڵ مەدە زولفت بە تەمای کوشتنم یاریی کافر لە موسوڵمان مەکە گوڵشەکەری زار و عیزاری دەوێ تیفلی دڵم حەیفە لە گریان مەکە حەیفە لەسەر خاڵی دەمی ئەی خزر ئارەزوویی چەشمەیی حەیوان مەکە تووتیی دڵ زاری قسەی زارتە مەنعی لە قووتی شەکەرستان مەکە حاڵی وەفایی، گوڵە باتێک نەچێ سونبولی ژوولیدە پەرێشان مەکە ++++++++++++++++++++++ سەرناو: دڵی دێوانە لەسەر زولفی لە عالەم بەرییە دڵی دێوانە لەسەر زولفی لە عالەم بەرییە قەد ڕەهایی نییە لەو داوە کە بەستەی پەرییە بە وەفا بە کە دەشمکوژی بە میهرم وەرە سەر دا نەڵێن عاشقی بێمیهر و وەفا سەرسەرییە چت لە دڵ داوە عەزیزم وەرە نێو دیدەیی من دڵ هەموو ئاورە، چاو مەنزەرەیی دوودەرییە چاوی بیماری تەبیبی هەموو دەردی دڵمە غەمزە دەرمانییە، پەیکانی موژە نەشتەرییە قامەتی تۆ کە گوڵ و بەی بەری بێ، بێ بەری بێ بۆچ دەڵێن ئیدی سنەوبەر بەری بێ بێبەرییە؟ بۆیە سووتاوم ئەمن عاشقی بەدناوم ئەمن دڵەکەم غەمزەدەیی غەمزە و نازی پەرییە ڕوو بە ئەبرۆتە ئەگەر بۆچی دڵ ئازارە موژەت؟ ئەهلی قیبلە عەجەبا وا ڕەوشی کافەرییە سەروی گوڵزاری وەفایییە کە گوڵزاری جەمال خەندەگوڵ، گوڵ بەرییە، هەم گوڵە هەم گوڵپەرییە ++++++++++++++++++++++ سەرناو: قەد گوڵ و ڕوو گوڵ و دەرمانی گوڵە قەد گوڵ و ڕوو گوڵ و دەرمانی گوڵە ڕاستە ئەمڕۆ گوڵە خەرمانی گوڵە تا بە تای زولفی کە شێواوە بە ڕوو سونبوڵستانی گوڵستانی گوڵە ڕۆژ بەدەرناکەوێ تا سوبحی عیزار هەڵنەیێ شەو کە لە گریانی گوڵە بۆ دڵی شیفتە بۆچی بگریم؟ بەستەیی چاو و زەنەخدانی گوڵە زولفی تورکانە لەسەر عاریزی یار ئەوە چەتری سەری سوڵتانی گوڵە ڕوو بە میحرابی برۆ پەرچەمی خاو کافری تازەموسوڵمانی گوڵە عەتری خەندەی گوڵی باغانە کە دێ، یا هەناسەی دەمی خەندانی گوڵە؟ غولغولەی شۆری وەفایی کە دەڵێی بولبولی گۆشەیی بوستانی گوڵە ++++++++++++++++++++++ سەرناو: کار و پیشەی ئەم دڵەم چ بکەم خودا هەر زارییە؟ کار و پیشەی ئەم دڵەم چ بکەم خودا هەر زارییە؟ سەیلی فرمێسکم وەکوو جۆگە لە چاوم جارییە سەروە یا شمشادە؟ یاخۆ عەرعەرە، یا نارەوەن؟ یا چنارە یا کە تووبای قامەتی دڵدارییە؟ نوختەیی ئایاتی قورئان، یا نە هیندووی خەتتی تۆ یا سەوادی عەینە، یاخۆ خاڵی سەر ڕوخسارییە؟ بێ قسە وەختی تەبەسسوم سەد هەزارانی دەکوشت یا نە غیلمان، یا پەری، یا حوورە، یا گوڵزارییە؟ مات و حەیرانم کە بۆچ ئەمڕۆ دەمی هێنا ئەمە یا نە تەئسیری فوغانە، یا نە وەعدەی پارییە؟ زەخمی ناسۆری قەرارە، یا نە ئێشی خەنجەرە؟ یا خەدەنگی چاوی بیمارت لە جەرگم کارییە؟ دەنگی قووقووی قومرییە، یاخۆ سەڵایی شیوەنە؟ دەنگ و نەغمەی بولبولە یا ناڵەناڵی تارییە؟ ئەشکی دوو چاوی وەفایی سوورە جارێ ئاوییە چونکی لێوی لەعلە گەردەنبەندەکەی مروارییە ++++++++++++++++++++++ سەرناو: بیا ای جان من ساقی فدای ساغرت بادا بیا ای جان من ساقی فدای ساغرت بادا ئەمان سووتام ئەمان جامێ لە نۆبەی دەورە بەم لادا هوا خود نافە می‏ریزد صبا مشک ختن بیزد مەگەر دیسا بە دەم بادا حەبیبم پەرچەمی بادا؟ گدا و بزم شاهان؟ ما و وصل دوستان، هیهات! لەبەر وەی ئارەقی کوڵمی لە باتی مەی بە مەی نادا پریشان کرد چون بر چهرە دو زلف عنبرین گفتی: بەهارێک سونبولی تاتای بە بارێ یاسەمەندا دا عرق بر گردن و خط بر عذار و خندە در لعلش دەڵێی شەککەر لەمەڕ عەنبەر لەگەڵ ئارەق لە مینادا بە چشم اشکبارم عکس روی و موی جانان بین شەو و ڕۆژ ڕۆژ و شەو هەردوو لەنێو عەقدی سورەییادا بهای بوسەی ناکردە جان باشد بە چشم اما دەمت وا بێنە ـ چاوم ـ قەد بووە گەوهەر لە دەریادا؟ ! فغان و گریەی دل از غم روی تو در زلفت دەڵێی بۆ گوڵ دەناڵێ شەو لە نێو بولبول لە سەحرادا وفایی! تا منم گریان و سوزان در پی یارم تەمەننام هەر لە یارە گەر بە ئاو و ئاورمدا دا ++++++++++++++++++++++ سەرناو: ئەی حوققەیی شەهد و شەکەرت ئابی حەیاتم ئەی حوققەیی شەهد و شەکەرت ئابی حەیاتم مردم، بە بەدەن بێنەوە بەو ئابە، حەیاتم ئاهوو کە دەکا جیلوە چ شیرینە نیگاهی! یەعنی بە فیدای غەمزەیی دوو چاوی سیاتم سەودائیی زولفی سیەهت نیم بە هەوایی تا ڕۆژی وەفاتم بە تەمای میهر و وەفاتم بڕوانە چلۆن عەکسی عیزارت لە دڵی دام پەروانە بە دڵ سووختەیی شەوقی چراتم هەر چاوەنواڕم کە کوتت دێم و نەهاتی یاڕەب مەدەدێ! سالیکی ڕێی هات و نەهاتم دڵ جیلوەگەه و جێ قەدەمی تۆ بووە دیدەم هەرچەندە کە دوورم بە دڵ و دیدە لە لاتم سەرگەشتەیی سیڕڕی دەمی تۆم بەم ڕوخە دایم گۆیا کە دەقیقەشومەری ڕۆژ و سەعاتم بەو ڕەنگە دڵم داوە بە سیحری سەری زولفت تا دڵ هەیە مومکین نییە لەو داوە نەجاتم گرتوومی قولابی موژە بۆ خدمەتی ئەبرۆ یەعنی کە وەفایی وەرە من قیبلەنوماتم ++++++++++++++++++++++ سەرناو: ئەی پەڕتەوی حوسنت هەموو ڕەنگی گوڵەباغان ئەی پەڕتەوی حوسنت هەموو ڕەنگی گوڵەباغان نەشئەی نەزەرت زەوقی دڵ و شەوقی دەماغان ئەسما و سیفاتن بە تەجەللی لە وجوودت یا شەو بوو ئەتۆ هاتی لەمەت کردە چراغان تۆ هاتییە گوڵشەن بە سەر و زولفی بڵاوت زۆر پێنەچوو ڕۆیی لە چەمەن لالە لە داغان زولفت بە هەناسەم گەیییە سینەیی بازت زستانە گوڵستان بووە پابەستەیی زاغان ئەو کوڵمە کە ئارایشی سەد دایرە زولفە گوڵ شەوقی بە شەو داوە چراغانە لە باغان لەو ڕاستەیی بازاڕە چ نادەن بە دڵی من هەر مەرحەمەتی تۆیە خڕیداری ئەیاغان سەد نەشتەری غەمزەت لە دڵم دا، کەرەمت کرد قانوونی تەبیبانە بپرسن لە نەساغان سووتاوە دەروونم، وەرن ئەی موتریب و ساقی تۆ لێدە لە تەنبوور و ئەتۆ پڕکە ئەیاغان چارەی نییە دێوانەیی ڕووی تۆیە وەفایی سەد ساڵ ئەگەر بیبەنە سەر پیر و وەجاغان ++++++++++++++++++++++ سەرناو: بە چاوان غەمزە و ئیما مەفەرموو بە چاوان غەمزە و ئیما مەفەرموو بە قەتڵی عاشقی شەیدا مەفەرموو کە من کوشتەی جەمالی تۆم عەزیزم لە باغی جنة المأوی مەفەرموو ئەتۆ مووسونبوڵ و ڕووئافتابی لە حوسنی تەلعەتی لەیلا مەفەرموو دەڵێن: فەرمووتە بمکوژێ بە ناحەق کە تۆ سوڵتانی حوسنی وا مەفەرموو دوو چاوم، دوور لە تۆ، تۆفانی خوێنە لە مەوج و جۆششی دەریا مەفەرموو دەمت وا بێنە، قیبلەم، تۆی تەبیبم بە تەشریفی دەمی عیسا مەفەرموو من و یەک لەحزە شەوئارام و تاقەت؟ ! لە دووری ماهی شەوئارا؟ مەفەرموو بە خۆت بمکوژە نەک بەو چاوە بازە بە جەللادانی بێپەروا مەفەرموو وەفایی عاشقی ئەندامی تۆیە شەهیدی قامەتی تووبا مەفەرموو ++++++++++++++++++++++ سەرناو: شەهیدی خەنجەرت ئەو ڕۆژە عومری جاویدانی بوو شەهیدی خەنجەرت ئەو ڕۆژە عومری جاویدانی بوو مەڵێ پەروانە خۆ سووتاوە، مەرگی زیندەگانی بوو بە تیرێ خۆ لە عالەم بۆوە چاوت، ئەی شەهیدی بم لە کن خۆ ئەو فەڕەنگی زادە عەینی ناتەوانی بوو؟ ! سەر و ماڵی بە بێدادی حەبەش پاماڵە، ئەی سەد حەیف! شەهی حوسنت کە دایم چەتری سونبول سایەبانی بوو لەبەر تەئسیری خەندەت من کە سووتام ئەودەمە زانیم بەڵایی خەرمەنی من هەرچی بوو بەرقی نیهانی بوو بەخۆڕایی وەکوو پەروانە من سووتام و نەمزانی ئەوەی ئێمەی لە داو خست، ئیلتیفاتی سەر زمانی بوو بە بەدمەستی دەترسێم بێتە دیوانی خودا فەریاد! کەسێ وەک من شەهیدی چاوەکانی نیکتەزانی بوو ئەمن ئەو ڕۆژە لێم مەعلووم بوو کەعبەی دین و دڵ گیرا کە وەک تابووری هیندوو لەشکری ئەگریجە، سانی بوو لەبی گوڵ، زاری گوڵ، ئەندامی گوڵ، ڕوخساری گوڵ، بەر گوڵ هەتا کەی من بڵێم سەربەستە جەللادم فڵانی بوو؟ بە هەر سیحرێکی بوو هەر وەک وەفایی کوشتمت، ئاخر ئەگەر ئەندازەیی نازت، ئەگەر نامیهرەبانی بوو ++++++++++++++++++++++ سەرناو: سەرابستان خەرابستانە ئیمڕۆ سەرابستان خەرابستانە ئیمڕۆ بەهاری عەیشی مە زستانە ئیمڕۆ بە زەردی پاییزی ڕەنگم دیارە بە خاڵی ڕووتە تابوستانە ئیمڕۆ ژیانی عومرەکەم بێتۆ زیانە گوڵستان بۆم بە خارستانە ئیمڕۆ تەواوی زیندەگانیت بێ وجوودت سەراپا وەک قومارستانە ئیمڕۆ کە نارستانی عیشقت بۆ تەجەممول ئەوێستا نەوعی شارستانە ئیمڕۆ هەتاوی خاکی گەرمێنت بە من چی؟ ! لە بۆ من هەر وەکوو کوێستانە ئیمڕۆ گوڵی من بێنەزیرە، تۆ تەماشا ویلایەت پاکی باغستانە ئیمڕۆ خەدەنگت کاری ئەژماری بە میقیاس هەموو مێشە و چنارستانە ئیمڕۆ وەفا مەزلوومی بەیرووتە بە ڕووتی هەتیوی شاری کوردستانە ئیمڕۆ ++++++++++++++++++++++ سەرناو: ئەرێ حەبیبی ڕەوانم تەبیبی دەردی جودایی ئەرێ حەبیبی ڕەوانم تەبیبی دەردی جودایی چنین تو عهد شکن یار شوخ دیده چرایی؟ دڵێکە داومە بە زولفت فیدای غەمزەیی تۆ بێ کە در کمند تو خوشتر عزیز من که رهایی لە تاوی دەردی فیراقت نەماوە ڕۆح لە بەدەندا طمع بریدەام از جان مگر تو باز بیایی هەمیشە بۆیە دەناڵم بە ئاه و ناڵەیی بولبول دمی چو غنچه بخندی و همچو گل به در ئایی نەسیمی باغی گوڵە یا عەبیر و عەترە دەبارێ تویی شکر شکنی یا ز زلف نافه گشایی؟ بە چیهرە باغی گوڵانی، بە خەندە زەوقی دڵانی مگر تو شاخ نباتی، گل بهشت خدایی؟ ! بڵا بە جیلوە نەنازن غوڵام و حۆری بەهەشتی خدای را چه شود گر جمال خود بنمایی؟ بە غەمزە کوشتمی چاوت عیلاجی دەردی نەفەرموو بیا که صد گله دارم ز ئاهوان خطایی دڵت شکاوە چ قەوما خیلافی عەهدی مەحەببەت خدانکردە چه دیدی ز دوستی وفایی؟ ++++++++++++++++++++++ سەرناو: ئەی غەزاڵانی خەتا، ئاهوویی چین، کەبکی دەری ئەی غەزاڵانی خەتا، ئاهوویی چین، کەبکی دەری بەندەیی تۆن بە نیگاه و بە ڕەم و جیلوەگەری جیلوە لەو سەروە چ مەوزوونە دەڵێی نارەوەنە خەندە بەو زارە چ شیرینە مەگەر گوڵشەکەری؟ عاشقی قامەتی تۆم کوشتەیی خەندەی دەمی تۆ بەری باغی ئیرەمی یا گوڵی نەخلی شەجەری؟ غایب و حازری هەر لەحزە دەڵێی چاوی منی ڕەوشەنی مەردوومی، یا عەینی سەوادی بەسەری؟ گوڵ بە خەندە پەرییە، قیبلە بە جیلوەی مەلەکە شێت و دێوانەیی کردووم، چ مەلایک، چ پەری! بە تەلیسمی حەبەشیزادەوە سەرگەردانم عاشقی خاڵم و دڵبەستەیی داوی کەمەری وا دەگریێم بە زەلیلی لە غەمی گەردنی تۆ ئاگری خستە دڵم ناڵەیی مورغی سەحەری دەوری دوون هەر بە دڵی مونعیمی دوون دێ و دەگەڕێ مەسەلی تورکییە: حیز حیزە تاپارسون، چغری خەندەیی گوڵ سەبەبی جۆششی بارانە بەڵێ چونکە تۆ پێدەکەنی بۆیە وەفایی دەگری ++++++++++++++++++++++ سەرناو: فەڕەنگی میللەتێ، کافر دڵێ، ئەگریجە تەرسایێ فەڕەنگی میللەتێ، کافر دڵێ، ئەگریجە تەرسایێ مەلایک سوورەتێ، ئاھوو خەرامێ، ماھ سیمایێ پەری پەیکەر بوتێ، گوڵ پەرچەمێ، زنجیر گیسوویێ شەکەر لەب، نازەنینێ، عیشوەسازێ، سەرو باڵایێ نیگارێ، توندخوویێ، سەرکەشێ، عاشق کوشێ، شۆخێ گوڵەندامێ، دڵئارامێ، سەمەنبەر، دیدە شەھلایێ بە دوو زولفان ڕەسەن بازی، بە دوو ئەگریجە تەننازی بە دوو چاوان سیحرسازی، بە دوو لێوان مەسیحایێ کەمان ئەبرۆی پەیوەستێ، لە عیشوەی نێرگسی مەستێ کە سەھمی خستە نێو شەستی نران ھەریەک لەسەر لایێ ھەڵیدا دای لە جەرگم، خستمی قەسدی سەری کردم شەھیدی "کەربەلا" من بووم، ئەسیری دەستی تەرسایێ شکاندی سەددی ئیمان، پشتی دین دەستی تەوانایێ حیجابی ئابڕوو، تۆبەی وەفایی سیدقی مەولایێ دەخیل ئەی ھەم جەلیسان، ئەی ڕەفیقان، خزمە تا ماوم بە ھەر نەوعێکی بۆ خۆتان دەزانن بۆم بکەن ڕایێ ھەموو عومری عەزیزم سەرفی دەردی ئینتیزاری بوو بەسەر وەختی وەفایی داخۆ دێ ئەم شۆخە یا نایێ ++++++++++++++++++++++ سەرناو: یارم کە قەدی بەرزی سەد نەخلی شەجەر دێنێ یارم کە قەدی بەرزی سەد نەخلی شەجەر دێنێ پەروینی شەکەربەندی سەد ڕشتە گوهەر دێنێ دڵ بەستەیی یارێکم کوژراوی نیگارێکم زاری لە تەبەسسومدا خەندەی بە شەکەر دێنێ ئەم ئاهوویی تاتارە، بەو نەخلی شەجەر دارە هەر نار و بەیە باری، هەر شەمس و قەمەر دێنێ گەر خەستە و دێوانەم بۆو نێرگسە کاڵانەم ڕەمزێکە بە تاڵانم، ئەگریجە بە شەڕ دێنێ ناچێتە دڵم غەمزەی پەیوەستە کەچی دەمخا ئەو لەشکرە بەرگەشتە هەر فەتح و زەفەر دێنێ دڵسۆزی منە ئەشکم دایم لە کەناری دام مەیلی پدەری نانێ ئەو حوببی پسەر دێنێ ئەی مەردومی بینایی، ئیدی بەسە ڕیسوایی گریانی بەخۆڕایی، هەر قەتعی نەزەر دێنێ چی ڕووڕەشییە کاری، هەر سوبحە شەبی تاری زولفێکی بە عەییاری دەستی لە کەمەر دێنێ سووتاوی جودایی بە، هەمدەردی وەفایی بە بڕوانە کە ئەم دەردە هەر ئەهلی نەزەر دێنێ ++++++++++++++++++++++ سەرناو: ئەو زولفە دوتایە چ تەلیسمێکە چ دامە؟ ئەو زولفە دوتایە چ تەلیسمێکە چ دامە؟ سووتاوە ئەوی پوختەیە بەو عەنبەرە خامە دڵ کەوتە سەری زولفی لەبەر جەزبەیی خاڵی وەحشی سەبەبی دانەیە پابەستەیی دامە دەستم بگری تۆ کە بە جامێکی سەبووحی بەو چاوە، ئەگەر پادشەهی شامە، گەدامە شەیداییی من غەمزەیی ئەو چاوەیە باعیس سەرمەستیی من جوملە لەبەر نەشئەیی جامە بۆ قەتڵی دڵم بوونە دوو سەف لەشکری موژگان ئەو نێرگسە فەرماندەری سوڵتانی نیزامە لەو زولفە بڵاو و سەفی موژگانە دەلەرزم مەعلوومە کە شەو لەشکری بەرگەشتە بە سامە بۆ ماچی دەمی کوڵمە لە نێو پەرچەمی خاوی لەو زوڵمەتە بۆ ئابی بەقا نووری چرامە عومرێکە دەناڵم بە دڵ، ئەو قەدگوڵە نەیکوت: ئەو بولبولە - ئاخر - بە تەمای میهر و وەفامە بۆ کوشتن ئەتۆ دەست مەدە خەنجەر لە وەفایی لەو غونچەگوڵەی وەک دەمە یەک خەندە تەمامە ++++++++++++++++++++++ سەرناو: بریندارە دڵم سەودازەدەی زولفی دڵارامە بریندارە دڵم سەودازەدەی زولفی دڵارامە مەکەن مەنعی دڵی زارم کەوا بێسەبر و ئارامە بە ناز هات بۆ تەماشای شیوەنی دڵ، پێکەنی فەرمووی: لەگەڵ گریەی سوراحی، نەشئەیی مەی، خەندەیی جامە موفەسسیر غەمزەکەی ڕێزە و شکستەی زولفی مەعنا کرد دەڵێ: چی کەوتە بەرپێم کافریش بێ سەر بە ئیسلامە خەتی هات و بەسەرچوو ڕەونەقی زولفی دڵئاوێزی لە تازیەی ئەهلی دڵ گیرانی ڕۆژ مەشهووری ئەییامە بە مەرگی من هەتا ماوم سەرت وابێنە بیزانم: ڕوخە یا بەرگی نەسرینە؟ لەبە یا شەککەری خامە؟ بە مەحزی ڕوئیەتی زولفت سەرم دانا، دەبێ چ بکەم لەئەم بازاڕە تەرکی سەر کە ئەووەڵ سوود و سەودامە بە غەمزەی چاو و لوتفی ئەو دەمە ڕۆحم وەبەر بێنە دەمی تۆ ڕۆحی شیرین، چاوەکەی مەستت مەسیحامە لەشەوقی ڕووت دەناڵێنم لە سایەی گەردەن و زولفت گوڵستان بێسەدای بولبول نییە، گەر سوبحە، گەر شامە بە تاتا زولف و ڕووی کردە وەفایی پێکەنی یەعنی: شەکەر هەمڕاز و عەنبەر هەمسەر و گوڵ باغی باڵامە ++++++++++++++++++++++ سەرناو: دڵی پڕ ئێشی من بۆیە وەها خوونابی گریانە دڵی پڕ ئێشی من بۆیە وەها خوونابی گریانە هەموو سینەم وەکوو نیشانە جێگا نێشی موژگانە بە زاری پێم کوت: ئاخر بوردەباری تابەکەی؟ فەرمووی: دەسا بیکوژن، ئەی یاران، کە ڕۆژی بەردەبارانە بەڵاگەردانی تۆم، ئەی من بنازم خاڵی ڕوخسارت خەلیلی ئاتەشی نەمروودە، خەتتی سەبزی ڕێحانە کە تۆ سوڵتانی حوسنی بۆ لە حەزرەت ئەبرووت ڕێت دا لەبەر چاوت کە هیندوو ماڵی کەعبەی کردە مەیخانە تەبیبی میهرەبان بێهوودە تاکەی دڵنەوازی من؟ وەکوو بۆ خۆم دەزانم هەستە - بیللا - ڕۆژی گریانە دەڵێ حاڵت لە سەیلی دیدە، سۆزی دڵ چییە؟ قوربان لە دووری تۆ بڵێم چی؟ حاڵی من خنکان و سووتانە ئەمن لەو شارە کوژراوی خەدەنگی نازەنینێکم فەڕەنگی تینەتە، کافر دڵە، زاهیر موسوڵمانە بە هیچ وەجهێکی ناوێرم کە نێزیکت ببم، قوربان بعەینە هەر لە من ڕوویداوە حاڵی شەمع و پەروانە دەخیل ئەی مەحرەمی دەردی وەفایی! خزمە تەدبیرێ ئەوا مەحبووبە چارەی نایێ خۆ کوژرانم ئاسانە ++++++++++++++++++++++ سەرناو: سەروە یا عەرعەرە یا تازە نیهالی چەمەنە؟ سەروە یا عەرعەرە یا تازە نیهالی چەمەنە؟ یا ئەوە گوڵبونی باڵای گوڵی گوڵزاری مەنە؟ عاشقی زولف و ڕوخی سەرسەری یارێکم ئەمن چاوی بیمارە، گوڵی زارە، قەدی نارەوەنە قەدی سەروە بەری هێناوە کە میوەی دەمی وی ناری پستانە، گوڵی نەوڕەسە، سیبی زەقەنە بە هەوای باغی گوڵانی کە دەنازێ حەقیە گوڵی من گوڵ دەمە، گوڵ چەپکەنە، گوڵ پیرەهەنە دڵ کە کوشتەی ڕوخیە بەستەیی زولفە دەگری شەوی هیجرانە دەڵێی ناڵەیی مورغی چەمەنە شەوی هیجرانە دەڵێی ناڵەیی مورغی چەمەنە ڕەنگی گوڵنارییە مرواریی خاکی یەمەنە زولفی لەرزانی بە سەر چاوی بە دەم بادی وەزان میشکی تەڕ، عەنبەری تەڕ، چەتری غەزاڵی خوتەنە کوشتنی بولبولی مسکین چییە؟ پشکووتنی گوڵ مەتڵەبت کوشتنی عاشق نییە، تۆ پێمەکەنە دڵ و دینم لە بەهای ماچی دەمی داوە دەڵێ: لە وەفایی مەگرن عاشق و مەجنوونی مەنە ++++++++++++++++++++++ سەرناو: غەمزەدەی زولفم بە غەمزەی چاوی حەیرانم دەکا غەمزەدەی زولفم بە غەمزەی چاوی حەیرانم دەکا بەستەیی داوم خەدەنگی تیرەبارانم دەکا عاشقی زارم لەسەر هیچ ئەو نیگارە دەمکوژێ تیفلی نادانم لەسەر ماچێ لە گریانم دەکا داعیەی ئاوێنە دینی کوفرە نەک ڕوحمێکی بێ حەقیەتی بەو چاوە کاڵانە کە تاڵانم دەکا یاری من هەرگیز لە قەتڵی عاشقی پەروای نییە چونکە ڕوومەت شەمعە بۆیە حەز بە سووتانم دەکا ئاو لە چاوانم لەبەر زولف و عیزارت دێنە خوار دووکەڵی ئەو مەجمەرە هەردەم لە گریانم دەکا من دەڵێم: یاقووت و ڕەیحان خەتتی کامیان خۆشترە؟ ئەو بە عەییاری ئیشارەی لەعلی خەندانم دەکا قامەتی تۆ نەخلی توورە تەلعەتی تۆ نووری توور دەم بە دەم وا وەجهی جیلوەت مەست و حەیرانم دەکا فیکری زولفت عیللەتە، وەسفی دەمت ناکەم بە دڵ نیکتەگۆیی پیشەمە هەودای پەرێشانم دەکا ڕوو لە ئەبرۆی تۆم دەکا چاوت بە موژگانی کەچی قیبلە نیشانم دەدا، کافر موسوڵمانم دەکا! پێم دەڵێ: بگری وەفایی گەر ئەسیری لێومی یەعنی مرواریم دەوێ، چی نرخی مەرجانم دەکا؟ ! ++++++++++++++++++++++ سەرناو: کاکۆڵی بەدەم باوە کە بادا بە بەدەندا کاکۆڵی بەدەم باوە کە بادا بە بەدەندا بازاڕی شکا نافە بەسەر چین و خوتەندا تورکانە گوڵم پەرچەمی کەوتۆتە عیزاری وەک سونبولی ئاشوفتە لەبەر بەرگی سەمەندا تا هەوری بەهاری نەبزووت غونچە نەپشکووت بۆیە دەگرێ خەندە بەسەر گریەیی مندا گۆیا وەکوو من بەو قەدە سەودایییە زولفت سەرگەشتەیە وا تا بەری پێت چین و شکەندا من کوشتە ئەتۆ بەو دەمە شیرینە مەسیحی من تەشنە ئەتۆ ئابی حەیاتت لە زەقەندا هێشتا دڵەکەم سەرخۆشە نایێتەوە سەرخۆ ساقی بە کەرەم دوێنێ کە جامێکی بە مەن دا ماچێکی دەمت خوێنی شەهیدی سەری زولفە سا ئەو دەمە وا بێنە ئەمن خۆم لە ڕەسەن دا زولف و ڕوخ و لەب، عاریز و خەت، زایقەبەخشن وەک زوهرە لە شەو، مەی لە قەدەح، گوڵ لە چەمەندا کەی بەستەیی زەڕڕێکە دوسەد بەرقی لوئالی ئەو خەندە مەگەر موعجیزە وا دێ بە دەهەندا بۆ ڕۆژی نیساری قەدەمت ئەشکی وەفایی مروارییە، پەروەردە لەنێو کانی یەمەندا ++++++++++++++++++++++ سەرناو: ئارەق ڕووی داگرتی لەبەر پێکەنینت ئارەق ڕووی داگرتی لەبەر پێکەنینت شەبنم لە گوڵ باری ڕۆژی گرت پەروینت توخودا زولفت لابە تا تێر کوڵمت ماچ‏ کەم ڕێی بولبول با نەگرێ لەو باغە پەرژینت زولفت خەتاکار بوو چاوت برۆی داخست با بچین ماچ ‏کەین دەستی شای چین و ماچینت چاوبازەی چاو مەستە، لەو بادەی ئەلەستە دەستم بگرە هەستە، تۆ و دین و ئایینت کەوتوومە نێو زولفت بۆ خۆت بگرە دەستم کافر بووم بێ ئیمان، تا بێمە سەر دینت شەو تا سەحەر وەک گوڵ دڵ پڕ لە خوێناوم یا خودا شەماڵ بێنێ، بێنی عەرەق‏چینت قوربانی ئەو ڕەنگەم دونیای ڕەنگاند ڕەنگ ڕەنگ بەو ڕەنگە بێ ڕەنگەی ڕوخسارەی ڕەنگینت زولفت ڕووی داپۆشی، ئەبرۆت عەرەقناکە ڕۆژیان لێ کردمە شەو بەو ماه و پەروینت ڕوحمت پێمدا نەهات شیرین خوداگیر بی ڕۆحی بۆ تۆ دانا فەرهادی میسکینت بۆچ هەر وەفایی بوو شێت بوو وە کێوان کەوت؟ سەد خوسرەو فەرهادە بۆ لێوی شیرینت ++++++++++++++++++++++ سەرناو: خۆشا ڕۆژێ لە عالەم دەربەدەر بم خۆشا ڕۆژێ لە عالەم دەربەدەر بم لە نێو ئەوزاعی دونیا بێخەبەر بم لەبەر بێتاقەتی دێوانە ئاسا لە غەوواسانی دەریا بێخەتەر بم شەو و ڕۆژێ لە چۆڵی هەر بە ناڵە حەریفی شەوڕەوی بادی سەحەر بم نەزانێ هیچ کەس ناو و نیشانم ئەگەر عاقڵ ئەگەر ئاشفتە سەر بم لە هەرلا با بسووڕێنێ غوبارم لە هەر جێگایێ پێویستە سوپەر بم چرا بێ هەڵکرێ، جانا، لە نێو دڵ لە ڕووناکیی دڵی یارم خەبەر بم لەبەر چاوی تەڕم سۆرانی بڕزێ گەهێ بێدایک و گاهێ بێپدەر بم خودا خۆم چۆن بسووتێنم بە جارێ لە دەرد و داخی ئەحواڵم بە دەر بم شەوێ هەر تاکوو ڕۆژێ هەر بناڵم بە گریان دەست و دامانی سەحەر بم چ ڕێگەی چارە نابینم «وەفایی» مەگەر سەر تا قەدەم غەرقی نەزەر بم ++++++++++++++++++++++ سەرناو: یار هاتەوە دەست و دڵی خۆم گرت و بەسەر چووم یار هاتەوە دەست و دڵی خۆم گرت و بەسەر چووم جان قابیلی جانان نەبوو نەمزانی بەسەر چووم فەرمووی: چ کەسی؟ کەوتمە بەرپێی کە وەفاییم قوربان چ بوو عومرێکە لەلەت بووم و لەلات بووم؟ ! دەستی لەسەری دام و دڵی دامەوە فەرمووی: خۆش هاتی! بەخێر هاتی! وەلێ ڕۆحە بەهای ڕووم! وا خستمی چاوی کە بە داو زولفی وەلادا شەو ڕۆیی، بەیان بەربوو، ئەمن هەر لە خەوا بووم! یارایی موژە و تابی برۆی تۆی نییە جەرگم بەو تیر و کەمانە نە فەرامەرز و نە بورزووم ماچی دەمی، خەندەی دەمەکەی سیڕڕی بەیان کرد ئەو جەوهەرە وا فەردە نە مەوجوودە نە مەعدووم زەڕڕێکی لە سیڕڕی دەمی تۆم برد و نەزانی حەیرانی کەماڵاتی فەلاتوون و ئەرەستووم مومکین نییە بەو نێرگسە من بێمەوە سەرحاڵ من دەربەدەری ڕووتم و سەوداسەری گیسووم لەو زولفە - بە غەمزەی نیگەهت - نیمە ڕەهایی من بەستەیی نێو داوی پەریزادەیی جادووم فەرمووی: لە کوفر لادە موسوڵمان بە وەفایی دێوانە مەبە، دەست مەدە زولفم، ئەوەتا ڕووم ++++++++++++++++++++++ سەرناو: لەو ڕۆژەوە دوور بۆتەوە سایەت لەسەری من لەو ڕۆژەوە دوور بۆتەوە سایەت لەسەری من سووتاوە لەتاوت هەموو جان و جگەری من جەرگم هەموو لەت لەت بوو بە سێڵاوی سروشکم چ بکەم کە بە دەریا چووە لەعل و گوهەری من دەیفەرموو لەسەر خاکی دەری خۆی کە منی کوشت: جەننەت بەسە بۆ خوێنی شەهیدی نەزەری من قەد وا دەبێ خاکی دەری تۆ تاجی سەرم بێ؟ ئەو دەوڵەتە بۆ من نییە، هەی خاک بە سەری من! زولفت کە وەکوو شامی غەریبانە لەوێدا حاڵی چییە داخۆ دڵەکەی دەربەدەری من؟ ! وەک بولبولی شەیدا بە هەزار نەغمە دەناڵێم جارێکی گوڵم گوێ بدە ناڵەی سەحەری من دیم هاتە عەیادەت دەمی پڕ خەندە بوو یەعنی ڕۆح و دڵی بیمارە دەوای گوڵشەکەری من بێ نۆرە دڵم هێندە لەسەر یەک مەشکێنە ڕوو وا بکە شەوقێکی بدا تا فەنەری من زولفت سەبەبی جەزبی دڵم بوو، بە برۆی تۆ کافر بووە بۆ قیبلەیی من ڕاهبەری من خۆش بەو دەمە ساقی لە دەری مەیکەدە فەرمووی: ئەو جامە لە من بگرە وەفایی بەسەری من ++++++++++++++++++++++ سەرناو: بە یادی زولفتە ئارامی ڕۆح و ڕاحەتی جانی بە یادی زولفتە ئارامی ڕۆح و ڕاحەتی جانی عەجەب عاشق وەها جەمعە لەگەڵ عەینی پەرێشانی لە باتی بمکوژێ دەمخاتە داوی زولفی شێواوی لەباتی بێ کە ئازادم بکا دەمکاتە زیندانی بە سەر نەیدا مەگەر زنجیرە، یا زوننارە، یا مارە لە نەخلی قامەتت ئاڵاوە یاخۆ زولفی ڕێحانی بە شیرینی کە جان بەخشی، بە مەحبووبی کە دڵکێشی ئەتۆ هەر ئابی حەیوانی، ئەتۆ هەر ماهی کەنعانی زەمانێ قیبلەم ئەبرۆتە، دەمێ زوننار گیسووتە بە دەردی بێدەوا ماوم لەگەڵ کوفر و موسوڵمانی بە دوو گیسوویی ڕەشماری ئەگەر زنجیری داوودی بە دوو لەعلی شەکەرباری ئەگەر موهری سولەیمانی عەجەب ماوم بە بووسێ لەو دەمە هەر جانە بەخشینت بە ئیعجازت قەسەم! ئاتەش پەرەستم گەر موسوڵمانی لەسەر چاکی یەخەی زولفی لە قوببەی سینە ئاڵاوە لە گۆشەی دوو ئوفوق نەمدیوە شەو دوو ماهی نوورانی قسەی خاکی بەری پێت شوهرەیە بۆ چاوی نابینا هەتا نەمدی بە چاوی خۆم بە سورمەی دیدە نەمزانی لەبەر شۆراوی ئەشکی خۆم و سۆز و تاوی عەشقی تۆ سەراپا عاقیبەت هەر وەک وەفایی بوومە بریانی ++++++++++++++++++++++ سەرناو: تا خەندەیی گوڵ کاشیفی ئەسراری نیهانە تا خەندەیی گوڵ کاشیفی ئەسراری نیهانە زارت لە تەبەسسوم نەکەوێ قەت لە زەمانە! زولفت چییە وا تا بەری پێ حەلقە بە حەلقە یا نە شەوی هیجرانە کە زیندانی دڵانە؟ تۆی پێدەکەنی زەوقی دڵانی بە هەناسە؟ یا عەترە دەبارێ؟ ئەسەری باغی گوڵانە قوللابی موژەت گرتمی ڕووی کردمە ئەبرۆت یەعنی کە ئەوە قیبلەنومای ئەهلی دڵانە تۆ ڕۆژی درەخشان و ئەمن شەو وەکوو زولفت سەرگەشتە لە دووی تۆ دەگەڕێم: خانە بە خانە گریانی دڵانە لەسەر ئەو زولفە بە ڕوودا یا ناڵەیی مورغانی شەب ئاوێزی بەیانە؟ باعیس بە جودایی لە بەهاری گوڵی ڕووتە بێ ڕەنگیی ڕەنگم کە وەکوو ڕەنگی خەزانە هێشتا دڵی من نادەیەوە هەر لە جەفادای بۆ تیری هەموو دەرد و غەمت بوومە نیشانە بولبول لە زبان کەوت و بووە خوێن پەڕی گوڵ، گوڵ جارێکی نەپرسی: کە چ فریاد و فوغانە؟ حەیرانی برۆ و خاڵی لە ڕووی تۆیە وەفایی بۆچی حەرەم ئاتەشکەدەیی پیری موغانە؟ ++++++++++++++++++++++ سەرناو: تۆ سەری زولفی بڵاوت زولفی خاوت بامەدە تۆ سەری زولفی بڵاوت زولفی خاوت بامەدە جێی دڵی سەودایییە، چی دی دڵم جەزیا مەدە من کە بێت ناژیم وەرە ڕوحمت هەبێ نەشکێ دڵم با بینای کەعبە نەڕووخێ، چاوەکەم لێم لا مەدە عاشقی زولفم بە ڕۆح و دڵ ئەمن جۆیایی تۆم خێری خۆتە دەست لە سینەی مەردی خۆش سەودا مەدە هەر دەمەی من خاڵی گۆشەی لێوی تەعلیمی دەدام عەیش و نۆش و کونجی تەنهایی بە ڕووی دونیا مەدە شەو قەرارت دا لەسەر زولفت بە دڵ شادبم بەتۆ لامەدە زولفت وەفات بێ! وەعدەیی فەردا مەدە با قیامەت ڕا نەبێ، با ڕۆژ نەگیرێ چاوەکەم! توند مەبە! هەڵمەستە پێ، سونبول بە ڕووی گوڵدا مەدە! چت لە زەوقی دینی دڵبەر داوە! تۆ بی و دینی خۆت! تا بمێنی دەم لە وەسڵی ئاتەشی سینا مەدە مەرگی من ساقی دڵم بگرە دەمت وا بێنەوە یا کەرەم کە جامی لەب ڕێز، یا شەرابی وا مەدە نیوە سووتاوم ئەمان، بێ بەس مەکە ئەی تارزەن یا وەفات بێ، یا جەفایی عاشقی شەیدا مەدە ئەی وەفایی هێندە خوێن مەگری لە ڕووی ئارامی دڵ گەوهەری تۆ وا لە کن تۆ، خۆت بە دەم دەریا مەدە ++++++++++++++++++++++ سەرناو: دڵبەرا! تۆ بی و سەری زولفت بە عاریزدا وەرە دڵبەرا! تۆ بی و سەری زولفت بە عاریزدا وەرە کێ دەڵێ ئاخر کە شەو بێڕۆژە، ڕۆژ بێسێبەرە! تا بە دڵ نووری عیزاری تۆم نەدی زارم نەدی زەڕڕە مەعلوومە کە شەو هەڵبێ لە گۆشەی پەنجەرە عاشقی بەرگی گوڵم، ئەو مارە بگرە باغەبان ڕۆحەکەم! یەعنی کە کوڵمت بێنە زولفت لابەرە حەڵقەیی زولفی بە بارێ خستە بەردەم دولبەرم یەعنی عەینی عەنبەرم بەو نوقتە ئەمڕۆ غەم بەرە هەردوو زولفی خستە [سەر] دەم شاهیدی ڕوو، دا بڵێن میمی بسم الله لە جەننەت عەینی شەهد و شەککەرە خەتتی بەر زولفی پەرێشانی بە موژگانی دەڵێ: پادشای حوسنی شکا، تۆزی شکستەی لەشکەرە تاقە ئەبرۆی تۆ بە خوێنڕێژی بە دوو زولفی سیاه خەنجەری زیجەوشەنە عیشوە و ئیشارەی جەوهەرە تۆ کە ئاوێنەی دڵم دەشکێنی بنوێنە ویسال با هەناسەم نەتگرێ ڕووت واوە بێنی چاترە چاوەکەت وا تەشنەیی خوێنە بە موژگانی سیات بۆ هیلاکی من دەڵێی مەستێکە دەستەوخەنجەرە قیبلە گۆڕاوی وەفایی عاشقی سادق نەبی بێ سەفای دڵ، عومرەکەم، ئەو سەعیە هەر دەردیسەرە ++++++++++++++++++++++ سەرناو: ما رأیتُ اللیلَ إن من لحظة صار الغدا ما رأیتُ اللیلَ إن من لحظة صار الغدا فی الذوایب وجهک أم فی الدجی شمس بدا؟ قەت نەهاتە دەست و جارێ نەبوە ئارامی دڵم تا قیامەت داغی زولفانت لە جەرگی ئێمەدا بمکوژی، سەد جار دەرم کەی، ڕووی من و خاکی دەرت کیف یحْرَم سائڵ مِن بابِک حاز الندی؟ ئاگری عیشقت لە ڕۆحم بەربووە سەر تا قەدەم وەک نەیستان هەر دەسووتێم مات و خامۆش بێسەدا دڵ بە مەحزی ڕوئیەتی زولفت بە ڕوودا کەوت و مرد مرد و نەمزانی: نە گەنج خستی نە ماری پێوەدا؟ چەند بە ناز دێی و دەچی سەرخۆش و شۆخ و شەنگ و مەست ئەی گوڵی نازدار، ئیلاهی، بای خەزانت لێ نەدا باغ دەبێ هەر گوڵفرۆش بێ، یار کە دێتە پێکەنین «با» دەبێ عەنبەر بە با دا، ئەو کە زولفان با دەدا دین و دڵ سەبر و قەرارم چۆتە ڕێگای یەک نەزەر تۆ بڵێی ئەو شۆخە وا سەرمەستە قەت بێتە ڕەدا؟ بۆچ برۆم لێ تێکدەنێی ڕووت وەردەگێڕی چاوەکەم؟ کابە کەچ بوو؟ قیبلە گۆڕا؟ ماچێکم لەو لێوە دا! دەست و دامان زولفەکەت کەوتۆتە بەر پێت و دەڵێ: تۆ غەنی من بێنەوا، تۆ پادشاه و من گەدا خەندە بەم شیرینییە، دەم بەم نموونەی حیکمەتە قەت وەفایی نەبوە وا خۆش بێ، خەبەر بێموبتەدا! ++++++++++++++++++++++ سەرناو: ئەلئەمان سەر تا قەدەم سووتام و جانانم نەهات ئەلئەمان سەر تا قەدەم سووتام و جانانم نەهات چاو لە سورمەی خاکی ڕێ بووم، ڕاحەتی جانم نەهات خاڵ و خەت گوڵزار و ڕەنگی شۆخی بێباکم نەدی زولف و ڕوو هیندوو فەڕەنگی شاهی خووبانم نەهات ئەی عەجەب گریام وەکوو هەوری بەهاران و کەچی پێکەنینی ئەو گوڵەی کاکۆڵ پەرێشانم نەهات چاوی خوێنین غەرقی پەروین بوو لە بێمیهریی گوڵم مات و حەیرانم لەسەرچی ماهی تابانم نەهات؟ حەڵقەیی زونناری زولفی بوو بە میحرابی دوعام تورکی کافرکێش و یاری ناموسوڵمانم نەهات تەشنە لەب دێوانە بووم، سەرگەشتەیی زوڵماتی غەم دڵبەری باڵا بڵندم، ئابی حەیوانم نەهات کەعبەیی ڕۆحم، حەبیبی من، عەجەب پەیدا نەبوو قیبلەکەی دینم، تەبیبی دەردی پەنهانم نەهات نەی سیفەت ناڵینمە، بولبول تەریقەت شینمە شای شەکەر لێوان گوڵ و ئەگریجە لەرزانم نەهات بوو بە خوێن غونچەی دڵم، نەمدی هەوای خەندەی گوڵم سووت دەر و ژوورم، سەدای بەرقی بەهارانم نەهات چەند بە چەند گریام هەوای عیشقم لەسەر خاڵی نەبوو غەرقی تۆفان بووم کەچی تەسکینی سووتانم نەهات! وەک «وەفایی» تا بەکەی بگریم بناڵێنم بڵێم: ئەلئەمان سەر تا قەدەم سووتام و جانانم نەهات ++++++++++++++++++++++ سەرناو: بەس بێ جیلوەی زولف و خاڵان! عاشقی ڕوخساری خۆت بەس بێ جیلوەی زولف و خاڵان! عاشقی ڕوخساری خۆت ئاڵ و واڵای خولدی ناوێ تالیبی دیداری خۆت نامەوێ عەیشی جیهان حاشا لە فیردەوسی بەرین تۆی مورادی دین و دونیام، ناری خۆت، ئەنواری خۆت گاه بە یاری، گاه بە دیدار، دڵ دەکێشی، دین دەبەی هەر دەمەی نەوعێ ڕەواجی پێ دەدەی بازاڕی خۆت گاهێ موتریب گاهێ ساقی، من فیدای زولف و ڕوخت کوفر و ئیمان لێکدەدەی سەرخۆش بە نەغمە و تاری خۆت زولفەکان دێنی و دەبەی بێغەم لە کوشتەی چاوەکان شەو دەچێ ڕۆژ دێ دەمێکی نایێ سەر بیماری خۆت هەر ڕەگێکم دەنگ و ئاوازێکی لێ دێ پڕ خورۆش ئاورت بەرداوەتە عالەم بە مۆسیقاری خۆت با بەجارێک تێک‏نەچێ کاری دڵ و دین، ڕۆحەکەم، وا پەرێشانی مەفەرموو زولفی عەنبەرباری خۆت پایبەندی زولفی تۆم، مەحروومی ڕووی خۆتم مەکە با بە داغی تۆوە نەمرێ بولبولی گوڵزاری خۆت دڵ بە تیغ، جان بەندەفرمان، لەشکری ناز بۆچی بێ؟ پادشاهم! بێخەتا وێران مەفەرموو شاری خۆت دەستی خۆم دا زولفەکەت مەمکوژە خۆ کافر نەبووم قیبلەکەم هەر تۆی بە دڵ، بمبەخشە بەو زونناری خۆت دەم بە دەم ناڵەی «وەفایی» دێ لە حەلقەی زولفەکەت جارێکی نابێ بپرسی حاڵی شەوبێداری خۆت؟ ! ++++++++++++++++++++++ سەرناو: کە هەستا زولفی ڕووی داپۆشی من لەو داغە سووتاوم کە هەستا زولفی ڕووی داپۆشی من لەو داغە سووتاوم ئیلاهی! ئەی ڕەقیب، ڕۆژی قیامەت بێیە پێناوم! قەراری دا بە ڕۆحم تیری نازی چوو لە قەلبم‏ڕا مەپرسن چەند ئەمن لەو حەسرەتەی دڵ پڕ لە زووخاوم دەمێکە هەر لەتوێی ئاوری دەروون و ئاوی چاوم دام لە دووری تۆ عەجەب ماوم؛ نەسووتاوم؛ نەخنکاوم تەبیبێکم نییە دەردی دەروونم بێ موداوا کا هەتا ماوم بە ئوممێدی شیفا هەر چاوەڕێی ماوم دڵم بۆ تۆ دەسووتێ، دیدەکەم بۆ تۆ دەبارێنێ دەمێک وابێ، ئەمان! ئەی جێت لەنێو دڵ، پێت لەسەر چاوم ئەتۆ ڕۆحت دەوێ ئەمنیش ئەدەب هەر تالیبی وەسڵم مەکە مەنعم، بە دووری چاوەکانت! پیر و خەرفاوم بە ڕۆح جۆیایی وەسڵە ڕەمزی چاوی، باوەڕیم نایێ لە مەردوم هێند خیلافی وەعدە من دیتوومە ترساوم لەلایێ بارشی چاوم، لەلایێ سۆزشی جەرگم نە پێی دەمرم، نە پێی دەگرم، کەبابی نیوە برژاوم لە سۆزی گریە جەرگم ڕەش بووە، چارم چییە چ‏بکەم؟ وەکوو ماسی بە نێو ماوم نە سووتاوم نە خنکاوم بە بێ تۆ قەت نەژیم، شادیم نەمێنێ، دیدە بێ نوور بم! دەمێک ئارامی ڕۆحم بە، حەیاتم، عومرەکەم، چاوم! لە دەست ئەو شۆخە وا زولفان بە ناز دێنێ و دەبا، هاوار! وەفایی ڕۆژی لێ کردوومە شەو، عومری بە با داوم ++++++++++++++++++++++ سەرناو: ئەی ڕەفیقان وەرنە یاریم زۆر زەلیلم دڵشکاو ئەی ڕەفیقان وەرنە یاریم زۆر زەلیلم دڵشکاو جان و دڵ مەحرووقی نارم، ئاخ لە بۆ تێڕێک دراو! ئاخ لە بۆ تێڕێک دراوان، نووری دڵ، بینایی چاوان مەرهەمی دڵ کۆکراوان، مۆمیای پشتی شکاو کوا ڕەفیقێکی تەواو بێ، شێرمەرد و دەست بڵاو بێ؟ ساحیبی چایی و پڵاو بێ، حاتەمی دەوران بە ناو زێڕ و زیو فیکر و خەیاڵمە، دایک و باب و مام و خاڵمە دولبەری سەد ماه و ساڵمە، لازم و مەلزووم کراو زێڕ و زیو بابی هەتیوان، غەوس و قوتبی هیچ نەدیوان ئاخ کە لە منیش بۆتە میوان، دین و دڵ بۆی دانراو هەر کە پارێکی دەبینم، دێتە کوڵ جۆشی گرینم دادەنێم ئیمان و دینم، دێمە ئیکلام و سڵاو دێمە ئیکلام و سڵاوان، زێڕ و زیو بینایی چاوان ڕاحەتی جەرگ و هەناوان، گەر بە سیهابێ تەواو چا و زێڕم بۆ وەدەرنێن، سوێند و موسحافم لە بەرنێن خەنجەر و شیرم لەسەر نێن، عاشقم عاشقی دراو عاشقم عاشق بە زێڕم، ئەی خودا چاوان دەگێڕم پڕبکەی خورجین و تێڕم، دا منیش ببمە پیاو قەد کەست دی تەرزی من بێ! ساحیبی منداڵ و ژن بێ دەستمایەی کێر و گون بێ! ڕووت و قووت و کەس نەماو؟ غەرقی دەریایی ڕیا بێ، مەستی تۆبەی دوو هەوا بێ عاشقی میسکین وەفا بێ ئەی خودا بیخەی لە داو! ++++++++++++++++++++++ سەرناو: عەزیزم ڕۆحی شیرینم لە من بۆچی کەناری تۆ؟ عەزیزم ڕۆحی شیرینم لە من بۆچی کەناری تۆ؟ وەرە سەر هەردوو چاوی من کە سەروی جۆیباری تۆ لەسەر چاکی گریبانت سەبا شێت بوو وەکێوان کەوت کە ڕێی کەوتە خەیابانی گوڵ و باغی هەناری تۆ نەخۆشی چاوەکانت بووم و خەندەی تۆ سەبووری دام شیفای بیماری خۆت دا، گوڵشەکەر باری لە زاری تۆ لەلایێ تارە داوی دڵ، لەلایێ مارە قەسدی سەر چ سیحرێکە؟ عەجەب ماوم لە زولفی تار و ماری تۆ خەتت هێنا جەمالت پێ نوما، کوا ڕەونەقی خاڵت؟ فەڕەنگی هات و کەعبەی گرت و مەندی چوو لە شاری تۆ ڕەگ و ڕیشەی دڵم هەر دەنگ و ناڵەی عیشقی تۆی لێ دێ بڵێ موتریب، وەرە ساقی، سەراپا بوومە تاری تۆ بە چاوت کەوتووم، بۆ زاری تۆ ئاگر لە من بەر بوو سپەندم هەر بسووتێم چاکە من بۆ چاوەزاری تۆ کوتم: شێواوی زولفم چاوەکەت بەڵکوو عیلاجم کا! ئیشارەی دایە خاڵ و یانی وایە داغداری تۆ نەخۆشی چاوی تۆم بێهوودەیە دڵداریی خاڵت بە ئیفلاتوون عیلاجی نایە بیللا دەردەداری تۆ جەماڵت ئاهی من گرتی خەتی سەبزت بەسەردا کەوت چەمەن ڕابرد و سەرما هات و تێک چوو نەوبەهاری تۆ نیگاهی کردە من هەستاوە زولفی خستە ڕوو فەرمووی: قیامەت هات و ڕۆژ گیرا، وەفایی هەر خوماری تۆ؟ ! ++++++++++++++++++++++ سەرناو: بە نازێکی کوشندەی سەد هەزار جان و دڵ ئیفتادەی بە نازێکی کوشندەی سەد هەزار جان و دڵ ئیفتادەی مەلەک یا حۆری عەینی تۆ؟ فریشتە یا پەری زادەی؟ بە دڵ خەندێکی بنوێنە، بلوورین ساعیدت بێنە یەدی بەیزات هەیە تۆ دەم لە ئیعجازی مەسیحا دەی! نە قەند تامی هەیە قوربان، نە گوڵڕێز و نە عەنبەر بۆ ئەگەر جارێک بە خەندەی بێی، سەری زولفت بە دەم بادەی کوتت: ها زولف و کافر بووم، کوتت: ها ڕووم و چاتر بووم کە من هەر بێمە سەر ڕێی تۆ، دەبێ تۆ بۆچ لە من لادەی؟ دەمت وابێنە دەستم بگرە، با بمرم لەبەر چاوت بە جامێکی خەلاسم کە لە دەست ئەو تورکە جەللادەی بە چاوی مەستی تۆ کەوتووم، بە ناری زولفی تۆ شەیدام نەخۆشی تۆم دەناڵێنم، حەیاتم! بۆچ بەرم نادەی؟ کە تۆ سوڵتانی، ڕوحمت بێ بە زولفان بەس دڵم تێک دە دەبێ تا کەنگێ بەیتوڵڵا بە دەست کافر بە یەغما دەی؟ دەمت بێنە بە دڵ بگرم، لەبەر جامی لەبت بمرم دەمادەم ڕۆح بەخشی تۆ لەبالەب ساغیر و بادەی چرای قەندیلە، شەمسی ئاسمانە، ڕووی درەخشانت ئەگەر سەدجار بە زوهرە و موشتەری ڕووبەندی پێدادەی وەکوو ماسی و سەمەندەر تەشنەگیم ناچێ ئەگەر سەد جار بە ئاب و ڕەنگ و ڕووت سینەم وەبەر تیری تەجەللا دەی لەبەر چاوی وەکوو زولفی پەرێشان کەوتم و فەرمووی: وەفایی چت لە مەیخانان کە تۆ واپیر و ئیفتادەی؟ ! ++++++++++++++++++++++ سەرناو: حەریفان ئەلئەمان کوشتوومی یارم، چاوی بیماری حەریفان ئەلئەمان کوشتوومی یارم، چاوی بیماری دەسا بێن دەست بە شینم کەن! بە یەکجاری، بە یەکجاری گرفتاری کەسێکم، دڵ برینداری جوانێکم جەفاجوو، توندخوو، زنجیر موو، خەییاتییە کاری چ دڵکێشە ئیلاهی سەبزەیی نەورستەیی کوڵمی لە دەوری بەرگی گوڵ شیرینە ئارێ خەتتی ژەنگاری بە خەندە هات نیگاهی کردە من وا مەست و شەیدا بووم کە نەمدی غەیری وی، هەر غونچە بوو پشکووت و گوڵ باری خودا تۆبە لە دەست ئەو چاوە بیمارە چ سەححارە بە عەینی دڵ دەکێشێ گا بە یاری گا بە عەییاری لە خەندەی زار و جیلوەی تار و کاکۆڵی پەرێشانی شکا بازاڕی قەننادی و نرخی میشکی تاتاری بەهاری حوسنی خەمڵیوە بە باری گوڵبونی باڵا شکۆفە دەمیە، ڕەیحان خەتیە، نێرگس چاوی بیماری عەجەب ماوم بە چاوت وا بە بیماری دڵئازارە چ کافر میللەتە - یاڕەب - لە مەستیدایە هۆشیاری! ئەمن تەشبیهی ڕوخسارت بە میهر و مەه بکەم! حاشا کە تۆ ماهی سنەوبەر قامەت و خورشیدی گوڵزاری چ خوا بەردارە دایم غەرقی خوێن بێ مەردومی چاوم لە خوا خۆش نایە، ئاخر کاکە، حەیفە مەردوم ئازاری بە خۆڕایی نییە وا خاو و وا شێواوی، ئەی سونبول مەگەر تۆش وەک وەفایی غەمزەدەی کاکۆڵی ڕەشماری! ++++++++++++++++++++++ سەرناو: کە شانەی دا لە زولفی تار و ماری کە شانەی دا لە زولفی تار و ماری لە هەر تایێکی بارێ نافە باری بە داو هەر تارێ بۆ من بۆتە مارێک لە پێم ئاڵاوە زولفی تار و ماری مەگەر تۆ بووی بە گریەم هاتیە خەندە کە گوڵ پشکووت بە دەم هەوری بەهاری وەرە سەر هەردوو چاوم تا بزانن کەوا شیرینە سەروی جۆیباری بە بەردا زولفی بەرداوە کە تاتا شەوی گێڕا بە ڕۆژ باغی هەناری لەبەر ئاوری دەروونمدا دەگریێم بە بەرق ئەنگووتووە هەوری بەهاری کوتم: ئەی تازە غونچەی باغی جەننەت کوتم: ئەی سەروی چین، ماهی حەساری لەبەر شەوقی فیراق و ئیشتیاقت فەراقی کرد دڵم تۆقی بە زاری بە جارێ بمکوژە، خوێنم بڕێژە خەلاسم کە لە دەردی ئینتیزاری برۆی تێکنا بە ڕوودا ئارەقی ڕشت لە ماهی قەوسدا شەبنم دەباری وەها شێوا وەفایی، دوور لە زولفت لە داغی تۆ کە هەر گریانە کاری ++++++++++++++++++++++ سەرناو: ئەگەرچی بادی نەورۆزی نەویدی وەسڵی گوڵ دێنێ ئەگەرچی بادی نەورۆزی نەویدی وەسڵی گوڵ دێنێ هەتا گوڵ دێ بەناز بولبول بە سەد یەک عومری نامێنێ بە ئوممێدێکە جارێ بێتە خەندەی گوڵ، بەڵا بولبول وەکوو هەوری بەهاری هەر بناڵێ هەر ببارێنێ هەوای جیلوەی گوڵانە، بولبول ئاوری گرتوە، نازانم بەهار هات یا ئەیار هات، شەوقی ڕووی وا من دەسووتێنێ؟ بەهارێکی چ شۆخی، هیچ لە فیکری بای خەزاندا نیت؟ دەترسم ئاهی ڕەنگ زەردان وەکوو زولفت بشێوێنێ بە شینی عاشقان ڕەسمی قەدیمە شایی مەعشووقان بە لەیلێ نەغمەیی عوششاقە گەر مەجنوون دەناڵێنێ دەزانێ تاوی بارانە شەرابی پێکەنینی گوڵدەمێک نابێ لەسەر خەندێکی سەد جارم بەگریێنێ کوتی: ڕووم وا دەکەم تێرم ببینی، چاوەڕێم داخۆ لەلای قیبلەم کە کەی بای وەعدە بێنی نەستەرەن بێنێ؟ لە جەرگم طرفة العینێ هەزار نەشتەر چوو نەمزانی نە تیر و تەرکەشی تورکە، نە ئەو چاوانە هەڵدێنێ؟ غەمی ئەو زولفە ناهێڵێ دڵم یەک بێ لەگەڵ باڵات بە ژەنگی کەسرەت ئەو ئاوێنە وەحدەت دوورە بنوێنێ بە هەر شێوێکی بێ عاشق مورادی هەر ڕەزای یارە بڵا شیرین بە خوێنی کۆهکەن پەنجەی بڕەنگێنێ قەزای چاوت لە ڕۆحی من کەوێ، دەمرم ئەتۆ خۆش بی وەفایی بۆ چییە گەر خۆی لەبەر ئەو چاوە نەمرێنێ ++++++++++++++++++++++ سەرناو: شەرحی دەردی ئارەزوومەندی لە کەس تەئسیری نابێ شەرحی دەردی ئارەزوومەندی لە کەس تەئسیری نابێ ئەو کەسەی دەردم دەزانێ گەر لە یاری خۆی جودابێ ئەی برادەر خانەوێرانی جودایی بوو وەفایی وەک وەفایی ئەی جودایی یاخودا خانەت خرابێ! غەیری دڵبەر دەردی دڵ ناڵێم بە هیچ کەس تا بمێنم دەردی دڵ بۆ وەی بڵێم چاکە بە دەردم ئاشنابێ ئاخر ئەی سوڵتانی خووبان تا بەکەی نامیهرەبانی؟ چاکە مەحروومم نەفەرمووی: یا خیتابێ یا عیتابێ ڕۆژ و شەو تۆ بوویتە قوربان شیوەن و شینی دڵی من کاری بولبول فەسڵی گوڵ ناڵینە تا ئاهێکی مابێ مەنعی سووتانم مەفەرموو با وجوودی ئەو جەماڵە پیشەیی پەروانە هەر سووتانە تا شەوقی چرا بێ هەرکەسێکی گوڵفرۆشە باغی پڕ جۆش و خرۆشە یا دەری گوڵزاری بگرێ، یا لە بولبول بێ سەدابێ هەرچی تۆ پێت خۆشە مەحزی ڕەحمەت و مەقسوودی دڵمە گەر عیتابی لن ترانی یا خیتابی أو دنابێ بۆیێ سەرتاپا گوناهم، بۆیێ عاسی و ڕووسیاهم تا گەدا شایانی ڕوحم و ئیلتیفاتی پادشابێ دوور لە ئەغیار و ڕەقیبان عومری دوسەد ساڵە دێنێ دەست لە دەستی یار و سەحنی باغ و گۆشەی ماهتابێ ڕەنگ زەرد و لێوبەبار و ئەشکبار و بێ قەرارە زۆر پەرێشانە وەفایی، وەک لە یاران هەڵبڕابێ! ++++++++++++++++++++++ سەرناو: خەرامان بەو سەری زولفی پەرێشان چیهرە بنوێنە خەرامان بەو سەری زولفی پەرێشان چیهرە بنوێنە لە گوڵ ڕەنگ و لە سونبول بۆ، لە سەروان جیلوە بستێنە شەهیدی تاقی ئەبرۆی تۆ بە جەننەت شادە، ئازادە ئەتۆ قیبلەی مورادانی دەمێکی ڕووت وەها بێنە زەکاتی خاڵی لێوت بووسەیێ لەو چاوە کافیمە ئەتۆ بی و ساقیی کەوسەر دڵم بەو جامە مەشکێنە! بە زولف و ڕووی گوشاد جارێک بپرسە حاڵی شێواوم دەمێک شەککەر بدە، سونبول بە بادە، گوڵ ببارێنە دڵم هێناوە بۆ لێوت بڵا زولفت ڕەزای لێ بێ وەکوو قەننادی خۆش سەودا بە، زوو زوو بیدە بستێنە زەدەی چاوم، لە لێوی خۆت شیفام دە، بەس بە ڕقدا چۆ بە قەترێک ئابی حەیوانت نەخۆشی خۆت مەسووتێنە ئەگەر سەد ڕۆح و دڵ بێنم مورادی من ڕەوا نابێ لەبی لەعلی بە من نادا دەزانێ ڕۆح چ شیرینە لە ئەنفاسی سەحەرگاهی بترسێ، ئەی چرا، جارێک هەناسەی عاشقان تیرە، مەڵێ پەروانە بێخوێنە دەلیلی چاک و پاکی پێ دەوێ وەسڵی ڕوخ و زولفی خودا شادی بە شانەی دا و سەفای جەننەت بە ئاوێنە لەسەر میحرابی ئەبرۆی کەوتمە زولفی دامیە بەر غەمزە بە جەللادی دەکوت: مورتەدد! حەڵاڵە خوێنی بڕژێنە سەری دانا لەسەر ڕووی تۆ، بە شوێنی زولفی تۆدا چوو وەفایی ئاخری خێر بێ، دەمێکە بێسەر و شوێنە ++++++++++++++++++++++ سەرناو: دەمێکی هەستە پێ، قوربان، جەماڵت عالەم ئاراکە دەمێکی هەستە پێ، قوربان، جەماڵت عالەم ئاراکە بزانن نەخلی تووبا، باغی جەننەت، خار و خاشاکە ئەگەر ڕەنجیدە بووی، قوربان، لە وێرانەی دڵی تەنگم وەرە سەر مەنزەرەی چاوم تەماشای مەوجی دەریاکە بە ئەمری چاوی بیمارت کە هەر خوێنخوارییە کاری مەگەر تاری سەری زونناری زولفت ماری زەححاکە؟ لە عەینی ئاه و سۆز و گریە زولفت هاتە تاراجم شەوی پڕ بەرق و بارش ڕۆژی هیندووی دوزدی ناپاکە شەهیدی چاوی بازی پڕ لە نازی شاسوارێکم کە گۆی چەوگانی زولفی دائیرەی خورشیدی ئەفلاکە دڵم شێواوی چاو و زولفتە بەو زارە چارەی کە کە ئەو بیمارە مارانگەستەیە دەرمانی تریاکە لە ڕووی تۆ دانەما، پەروای شەهیدانی نەبوو چاوت لە ڕۆژی حەشرێ ناترسێ، عەجەب تورکێکی بێباکە! بە یادی ڕووم دەڵێ بگری، بڵا چاوم لە گریەت بێ بەهاران نم نمی باران بە مەیخواران تەرەبناکە لە فەهمی جەوهەری خەندەی دەمت عومرم چوو نەمزانی کە سیڕڕی حاڵی ویجدانی وەرایی فەهم و ئیدراکە لە قەتڵی عالەمی دڵ بۆوە خاڵی ڕووت، بڵا بەس بێ سوهەیلی کارەوانکوژ چی دەوێ بەو ڕۆژە ڕووناکە؟ دەمی هێنا، دڵم کردە نیساری پێکەنی و فەرمووی کە زەڕڕێکیش بێ ون نابێ وەفایی! چاکە هەر چاکە ++++++++++++++++++++++ سەرناو: غەمزەدەی خۆتم نیشانەی تیری موژگانم مەکە غەمزەدەی خۆتم نیشانەی تیری موژگانم مەکە عاشقی ڕووتم، عەزیزم، تیرەبارانم مەکە بەس دڵم بشکێنە بەو ئەبرۆیە بۆ ماچی دەمت مەمدە بەر تیغ و لەسەر هیچێ لە گریانم مەکە چیم لە ئەبرۆ داوە من پابەندی زولفم لێم گەڕێ کافری عیشقم، بە قیبلەی خۆت موسوڵمانم مەکە عاشقی خەندێکی تۆم با بەس بە ئاه و ناڵە بم بولبولم پەروانە نیم و حەز بە سووتانم مەکە دڵ بە من ناکا لەبەر ئاوری دەروونم دێتە جۆش تۆ کە سووتانت نەدیوە مەنعی گریانم مەکە مەمدە بەر تابووری موژگانت هەتاکوو غەمزە بێ ها بەجارێک بمکوژە، یەخسیری تورکانم مەکە سەد کەڕەت کوژراوی یار بم لێم مەپرسە ئەی تەبیب دەردی یارم خۆشترە بێهوودە دەرمانم مەکە عەرزەچی نی تۆ، بەقوربان، پادشاهی عالەمی دادی مەزڵوومان بپرسە، حەیفە بێلانم مەکە پێم بڵێ: یاقووت و ڕێحان خەتتی کامیان خۆشترە؟ وا عەیارە چاوەکانی، لەعلی خەندانم مەکە حەقیەتی بەو چاوە کاڵانە کە تاڵانم دەکا تیفلی نادانم لەسەر ماچێک لە گریانم مەکە پەنجەکەی پاکی لەسەر خوێنی وەفایی بۆتە گوڵ دەمکوژێ و پێشم دەڵێ: ئالوودەدامانم مەکە ++++++++++++++++++++++ سەرناو: لەسەر ڕووت کازیبەی زولفت وەلابە لەسەر ڕووت کازیبەی زولفت وەلابە کە سادیق بێ تلووعی ئافتابە دڵ و دین هەرچی بوو قوربانی تۆ بوون هەتاکەی ئیدی ئەم ناز و عیتابە؟ بڵا بەو ڕۆژە نیلووفەڕ نەسووتێ بە مەرگی من سەری زولفت وەلابە لە عەکسی عاریزت فرمێسکی چاوم گوڵاوی ڕووتە هەم خوونابی نابە وەرە بنوێنە خۆت بمکووژە قوربان بە دینێک کوشتنی عاشق سەوابە وەرە بنواڕە بەزمی عالەمی دڵ چ خۆش دەورێکە هۆشیاری خەرابە ئەگەرچی ناڵەیە هەر زەوق و شەوقە ئەگەرچی گریەیە عەینی سەوابە بە ناڵینی دڵی سووتاوی عاشق هەموو هەر نەغمەیی چەنگ و ڕەبابە بە چاو و گەردەن و ڕوخساری ساقی هەموو هەر شاهید و شەمع و شەڕابە کوتم: با قیمەتی وەسلت بە دڵ بێ بە ماچێکیش لە زاری خۆت ڕەزا بە کەچی فەرمووی: دڵت نەشکێ وەفایی ئەوە سەودایە، زەڕڕێکیش حیسابە ++++++++++++++++++++++ سەرناو: ڕۆژی تەرەب و وەختی گوڵ و فەسڵی بەهارە ڕۆژی تەرەب و وەختی گوڵ و فەسڵی بەهارە یاران گوڵەکەم کوا کە دەمی بووس و کەنارە گوڵزاری ئیرەم، سووڕەتی غیلمان، قەدی تووبا گۆشەی چەمەن و ڕوویی گوڵ و پایی چنارە بنواڕە لە نێو حەڵقەیی زولفی سەری کوڵمی دوو ڕۆژی درەخشانە لە نێو دوو شەوی تارە هەر لەحزە کە دێ پێدەکەنێ حەقمە کە بگریم پشکووتنی گوڵ مایەیی بارانی بەهارە بۆچی نەگریم کوشتەیی سەد غەمزە خەدەنگم؟ من یێک و نیزامی حەبەشیزادە هەزارە بەو زولف و موژە مەمکوژە هەردەم بە جەفایێ جارێ لە تەنافم مەدە جارێ لە قەنارە بەو قامەتە حەیرانی شکۆفەی قەد و باڵام قەد نارەوەنە و باغی گوڵان باغی هەنارە سووتاوم و شێواوم و سەودایی و مەستم بەو عاریزە بەو پەرچەمە بەو چاوە خومارە گوڵدەستە، نیگەه مەستە، دەهەن پستە، گوڵئەندام زولفی کە هەموو داوی دڵی عاشقی زارە بەو دوو مەمە زولف و ڕوخی تۆ نۆبەری سەرون هەر عەترە بە تا هەر گوڵ و نارنجە بە بارە پرسیم: چییە؟ تەبخاڵە لەسەر ئەو لەبە؟ فەرمووی: جێی ماچی وەفایی ئەوە نیشانەیی پارە ++++++++++++++++++++++ سەرناو: گوڵەندام ئەی تەنافی گەردەنم زولفی پەرێشانت گوڵەندام ئەی تەنافی گەردەنم زولفی پەرێشانت عیلاجێ! چارەیێ! ڕوحمێ! ئەمان دەستم بە دامانت غەریبی تۆم، نەخۆشی تۆم، بە گۆشەی چاوی بیمارت ئەسیری تۆم، شەهیدی تۆم، بە نووکی تیری موژگانت ئیشارەت ئافەتی ڕۆحم، کەلامت غارەتی دینم تەبەسسوم سیحری لێوانت، تەکەللوم ڕەمزی چاوانت مەگەر سەر تا قەدەم زولفت وەکوو من خاو و شێواوە کە سەرگەردان و سەودایە لە سەر چاکی گەریبانت؟ دەڵێی شەککەرفرۆشی شاری میسرە وا بە شیرینی بنازم! خاڵی وەک هیندوو لە گۆشەی لێوی خەندانت ئەگەر دڵ بوو ئەگەر دین دام بە سورمەی چاوەکان، ئیدی بەسم سەودازەدە و ڕیسوا کە، تۆبی و دین و ئیمانت تەلیسمی بابلە، سیحری حەڵاڵە، ڕەنگی ڕێحانە شکەنج و بەندە، یاخۆ جێ دڵانە زولفی سەرشانت؟ بە ئازادی لە کن خۆی شوهرەیە، من مات و حەیرانم گوڵ و نارنجی بەر هێناوە خۆ سەروی خەرامانت لەبەر چاوت بگریێم، یا لە دەست تۆ داد و هاوار کەم؟ لەبەر نەیڕەنگی مەستان؟ یا لە سیحری ڕەنگی دەستانت؟ دڵم سەودازەدەی باڵاتە، خۆم دڵدادەیی ئەبرۆت بە باڵا دڵ بەڵاگێڕت، بە ئەبرۆ خۆم بە قوربانت لە دادی من بپرسە جارێ ئەی سوڵتانی عیشوە و ناز بە ناحەق بۆچی بمکوژێ ئیشارەی چاوی فەتتانت؟ «وەفایی» کەوتە حەڵقەی زولفت، ئیدی مەیدە بەر موژگان کە من کوشتەی تەنافت بووم، چ لازم تیرەبارانت؟ ++++++++++++++++++++++ سەرناو: ئەی چرای زوڵمەتکەدەی دڵ، ئەی جەلای نووری بەسەر ئەی چرای زوڵمەتکەدەی دڵ، ئەی جەلای نووری بەسەر تۆ و جەماڵی باکەماڵت، ئافتابی یا قەمەر؟ شەو ئەگەر تۆ ماهتابی، ئینتیزاری تا بەکەی؟ رۆژ ئەگەر تۆ ئافتابی، بۆچ لە هەوران نایە دەر؟ جیلوەیێکت پڕ بە عالەم بۆ شەهیدان عومری نەو خەندەیێکت پڕ بە دونیا بۆ نەخۆشان گوڵشەکەر ئاب و تابی ڕووتە مایەی سۆزش و گریانی من گا غەریق و گا حەریقی میهری ڕووت وەک نیلووفەر ئاوی چاوم بۆتە مایەی سۆزش و گریانی دڵ گا نەخۆش و مەست و حەیران، گا بەهۆش و باخەبەر وا فیگار و ڕەنجەڕۆم کافر بە حاڵی من نەبێ بێقەرار و ئەشکبار و، دوور لە یار و دەربەدەر هێند لەبەر ئاوری فیراق و ئیشتیاقت مامەوە بوو بە کۆی زووخاڵ دەروونم، بوو بە خوێن جان و جگەر دەستی من دامانی زولفت با لە ڕووت مەحرووم نەبم ڕەوشەنە موشکیل‏گوشای شەو زیندەدارانە سەحەر دوێنێ دەیفەرموو: بە هەویای وەسڵی ڕوخسارم مەبە تا وەکوو زولفم نەبی گەردەن‏کەچ و دەستە و نەزەر سەد شوکر هێنامیە بەر ئەبرۆ لە قەیدی زولفی خۆی پاشی عومرێکی درێژ باڵی هومای ئاویتمە سەر حۆری عین، ڕوحولقودوس، یاخۆ مەلایک، یا پەری؟ یا ئەتۆ بووی وا خەرامان هاتی ڕۆحم هاتەبەر؟ خۆش بە ناز فەرمووی: «وەفایی» عومری خۆی هیچ ڕابوارد یا بە قوربانی دەمم بوو یا بە سەرگەردی کەمەر ++++++++++++++++++++++ سەرناو: بە جارێکی تەماشای تۆ، فیدات بێ، هەم دڵ و دینم بە جارێکی تەماشای تۆ، فیدات بێ، هەم دڵ و دینم ئەگەر سەد جار قیامەت بێ دەمێکی هەستە بتبینم لە غەمزەی چاوەکەت دەتکێ لە جەرگم خوێن و نازانم نە خەستەی پەنجەیی بازم؟ نە بەستەی دەستی شاهینم! مەگەر زولف و ڕوخت وەک لالە حاڵی بێ کە من بۆچی جگەر سووتاو و سەرتاپا غەریقی مەوجی خوێنینم وەکوو نەی کون کونە جەرگم لە تاو هیجرانی تۆ بۆیە بە سۆزی نەی دەسووتێم و بە دەنگی نەی دەناڵێنم ئەتۆ سەروێکی ڕەنگینی، لەسەر چاوان بە شیرینی لەبەر چاوم نەڕۆی چاکە، حەیاتم، غارەتی دینم! ئەتۆ گوڵ، عەنبەرین ڕێی تۆ، ئەمن خاکی بەری پێی تۆ لە من تۆ زیز نەبی چاکە، عەزیزم، ڕۆحی شیرینم کوتم: دا ڕوومەتت وا بێنە بگرم زولفەکەت! فەرمووی: بڵا گوڵ تێک نەچێ، بولبول نەسووتێ، چت لە پەرژینم؟ بە باغم کوت: بە ڕەنگ و بۆت مەنازە، زەرد و سوور بووە ئەگەر بارم هەموو سونبول بێ تایێک زولفی ناهێنم کوشندەی من نەبوو هیچ‏کەس مەگەر سەر دایرەی حوسنی لە ڕۆژی حەشرێ خوێنی خۆم لە چاوی مەستی دەستێنم لە باتی خوێنی خۆم، وەک زولفی، تەسکینیم بە هیچ نایێ مەگەر دەستی شکستەی خۆم لە گەردنی زەردی وەربێنم شەکەر قەدری نییە، قوربان، ئەگەر شیرین نەبێ، یەعنی: دەبێ تۆش لێوەکەت بێنی ئەگەر من ڕۆحەکەم بێنم بە نازی چاوی بازت وەک وەفایی کەوتمە نێو زولفت ئەوێستاش مەست و مەخمووری شەرابی جامی دووشینم ++++++++++++++++++++++ سەرناو: نەخۆش و مەستی دوو چاوی کاڵم نەخۆش و مەستی دوو چاوی کاڵم حەقم بە دەستە ئەگەر بناڵم بە غەمزەی چاوت بە خەندەی زارت بردیان بە غارەت خەو و خەیاڵم فەرمووت: چلۆنی؟ چ‏بڵێم عەزیزم؟ دوور لە زولفی تۆ ـ کافر بە حاڵم بە یادی چاوت چوومە خەرابات لە ڕەهنی مەی دان خەرقە و بەرماڵم من مورغی قودسی لە لامەکان بووم ئیلاهی ڕوحمێ شکستە باڵم شەوێکە تاریک، ڕێیێکە باریک هەر بە ئومێدی چرای جەماڵم بە تیری نازت بڕاوە جەرگم بۆ چاوی بازت نەماوە حاڵم وەک من بە چاوت یەخسیری زولفم کەس وا نەگیرێ بە داوی زاڵم! خۆش بەو دەمانە گوڵ گوڵ دەپشکووت شەکر دەباری پرسی لە حاڵم سەبا دەخیلم هەر تاکوو ماوم بڵێ بە زاری، بە ڕوو بە خاڵم دەمێکی بابێ دەوای دڵم کا بە چاوەکانی گەلێ بێ حاڵم وەفایی چی دیت لەسەر بگێڕێ؟ نەما لەسەر تۆ نە سەر نە ماڵم ++++++++++++++++++++++ سەرناو: ئەی جەننەتی عەیشی ئەبەدم ڕێگوزەری تۆ ئەی جەننەتی عەیشی ئەبەدم ڕێگوزەری تۆ نووری نەزەرم، تاجی سەرم، خاکی دەری تۆ بەو قامەتە خاڵ و خەتی ڕووی تۆ کە دەبینم هەر گوڵشەنی فیردەوسە بە نەخلی شەجەری تۆ سەروی سەهی، قوربان! ئەگەر ئازادە ئەدی بۆچ بادام و گوڵ و سونبول و نەسرینە بەری تۆ؟ دەدرەوشێ لە نێو زولفی ڕەشت ئارەقی گەردەن خۆ هەر شەوە پەیدا بوو ستارەی سەحەری تۆ؟ نازانم ئەتۆ بۆچی بە لەب و قامەتی شیرین؟ غونچەی شەجەری، یا نە گوڵی نەیشەکەری تۆ؟ ئەو چاوە کەوا مەستە بە حوسنی ڕوخی زیبا داخۆ چ بکا فیتنەی دەوری قەمەری تۆ؟ توخودا دەمەکەت دەرخە لە نێو توڕڕە بزانم تامی چییە ئەو حوققەیی شیر و شەکەری تۆ خۆ سەیدی حەڕەم قەتڵی حەرامە! ئەدی زولفت کافر کە نەبوو بۆچی منی کوشت لە دەری تۆ؟ ئەو ڕۆژە بە زوننارەوە من چوومە خەرابات زولفت منی کێشا بە ئیشارەی نەزەری تۆ بۆ من کە نەبێ وەعدەیی دیداری جەماڵت چ بکەم لە بەهەشت و نەزەری حوور و پەری تۆ؟ قەت گوڵ بە ڕوخی تۆ نەبووە، سەرو بە باڵات سەروێکە ڕەوان بەخشە گوڵی سیمبەری تۆ بۆ قیبلەیی لای ڕووتە هەموو سەعیی وەفایی عومرەم بە خودا عەینی سەفا وا لە دەری تۆ ++++++++++++++++++++++ سەرناو: ئەی حوسنی ئەزەل، دا نەفەسێ خۆت بنوێنە ئەی حوسنی ئەزەل، دا نەفەسێ خۆت بنوێنە ئاوێنەیی ڕووی خۆتە دڵی من مەشکێنە کەوتوومە شکەنجی سەری زولفت بە تەمای ڕووت یاریم کە نەکەی چووم بە تەلیسماتی خەزێنە عالەم هەموو ڕەنگینە لەبەر عەکسی جەماڵت هەر ڕەنگە بە ڕەنگێکی هەزار ڕەنگە نوێنە چونکە سەبەبی دەوڵەتی خەندەی گوڵە باران ئەی دیده! هەتا هەی بگری، خوێن بڕژێنە چونکە شەرەفی قوربی بەقا وا لە فەنادا ئەی دڵ وەرە تا زیندووە بی، خۆت بمرێنە سووتاوە دەروونم، وەرە ئەی بادی بەهاری زیندووم کەوە بێنێکی لە غونچەی دەمی بێنە ڕاببرە بە دامان و خەیابانی یەخەیدا نەختێ لە گوڵ و سونبول و نەسرین بوەشێنە مومکین نییە لەو چاوە نەجاتی دڵی زارم ئەو مورغە بریندارە گرفتاری شەهێنە عەینی کەرەم و مەرحەمەتە هەرچی بفەرمووی لوتفت نییە جارێ بە جوێنم بدوێنە دەمکوت: کە خەتت بێ دڵی خۆم نادەمە چاوت نەمزانی کە مەی فەسڵی بەهار تۆبە شکێنە خۆی داوەتە زولفت لە دوو لا گۆشەیی ئەبرۆت میزان کە دڵان هێندە دەبا سووچی شەهێنە فەرموویه: وەفایی بە دڵی تۆیە ویسالم قوربان هەر ئەتۆ و دڵ؟ وەرە ڕۆحیش بستێنە! ++++++++++++++++++++++ سەرناو: لەمحەت بە سەفا نیوەیی ماهێکی تەمامە لەمحەت بە سەفا نیوەیی ماهێکی تەمامە دڵ عاشق و سەودائییە ماهێکی تەمامە حەڵقەی سەری زولفت لە دو لا چەتری عیزارن دەوری وەرەقی لالە و گوڵعەنبەری خامە بۆ قەتڵی دڵم بۆتە دو سەف لەشکری موژگان دوو نەرگسە فەرماندەری سوڵتانە نیزامە ئەو ڕۆژە کە دیم توڕڕە لەسەر عەنبەری خاڵی زانیم ئەوە بۆ سەیدی دڵم دانە و دامە پێم کوت: وەرە بۆ خۆت بە دەمت بمکوژە! فەرمووی: مومکین نییە ئەو ئەمرە لەسەر چاوی سیامە بەو پەنجە کە ڕەنگی دڵە ساقی کە ئەتۆبی پەیمانەیێ زەهرم بدەرێ عەینی شیفامە بۆ کوشتنی من دەست مەدە خەنجەر، بە فیداتم، لەو خونچەگوڵی وەک دەمە یەک ماچی تەمامە من تالیب و دڵ ڕەهڕەوی نێو زوڵمەتی زولفت خاڵت خدری زیندە، دەمت ئابی بەقامە قوربانییە ئەو ماهە تەمامە وەرە قوربان قوربانی سەرت بم بە دڵ ئەو ماهە تەمامە پێم کوت بە نەسیمی سەحەر ئەی پەیکی وەفایی مروەت نییە گوڵ هێندە لەسەر جەور و جەفامە گوڵ هاتە شەکەرخەندە بەدەم بادی سەباوە فەرمووی وەفایی کە جەفا عەینی وەفامە مەتڵەب نییە شیعر و غەزەل و بەیت و قەسیدە مەنزووری وەفایی کە لەگەڵ کاکە سەلامە ++++++++++++++++++++++ سەرناو: ڕۆحم بە فیدات ئەی گوڵی گوڵزاری مەدینە ڕۆحم بە فیدات ئەی گوڵی گوڵزاری مەدینە لوتفت هەبێ ڕوو وا بکە مەقسوودی مە، دینە بەو جێگە بوویتە شەرەف و قورب و مەقامت لوتفت ببێ بمبەخشە وەرە جورمێ مەبینە دەرمان مەکە، هاتوومە حەکیمی هەموو دەردان! دەرمان بکە جەرگم کە هەموو کۆنەبرینە عومرێکە دەناڵم بە ئومێدی گوڵی زارت جارێکی بفەرموو کە چ هاوارە؟ چ شینە؟ فەڕزەن هەموو دونیا من و عومری خزرم بوو بێ جەننەتی ڕووی تۆ چ حەیاتێکە؟ چ ژینە؟ ئیحسانی گوڵ و خاکی دەری پاکی لە چاودا بۆیێکە فەلەک تا هەیە چاوی لە زەمینە ڕەوشەن بکە چاوم بە کلی خاکی دەری خۆت بەو عیززەتە فەرشی قەدەمت عەرشی بەرینە زولفت لە دوولا شاد و گوشادن بە جەماڵت کوا ئەهلی شیمالی؟ هەموو ئەسحابی یەمینە مەوقووفی نیگاهێکە بفەرموو بە تەڕەححوم ژەنگاوییە ئاوی نییە ئاوێنەیی سینە پابەندی ئیشارێکە دەری کە لە دەروونم خودبینی و بوخل و حەسەد و نیخوەت و کینە بەو خاڵ و خەت و سووڕەتی گیسووی هەتە حەقیە مانی کە پەرێشانی سەنەمخانەیی چینە نایدەم بە هەموو دەوڵەتی دنیا و قیامەت جارێ بە وەفایی کە بڵێ کەلبی ئەمینە ++++++++++++++++++++++ سەرناو: غەمزە و نیگەه و ڕوو لە خەمی زولفی دو تا دا غەمزە و نیگەه و ڕوو لە خەمی زولفی دو تا دا وەک نەشئە لە مەی، زوهرە لە نێو شامی سیادا تۆی جیلوە دەکەی یانە مەلاییک لە سەمادا؟ خەندەی گوڵە وا عەتری لە شەبنم بە سەبا دا یاخود ز شکرخندە عرق کردە لبانت؟ ساقی بە سەری نەرگسی ئاهوویی تەتاری بەو چاوە خۆمارەت بدە جامێکی بە یاری تۆ خەندە ببارێنە ئەمن گریە بە زاری جامی مەی و خەندەی گوڵ و بارانی بەهاری زین هر سە توان گشت من پیر، جوانت ئەی زولفی ڕەشت قافڵەسالاری تەریدان بنواڕە! سەفی عاشقی غەمدیدە لە چیدان؟ هێندەت بە جەفا خەنجەری موژژەت لە دڵی دان خۆ وەختە بگاتە کەمەرت خوێنی شەهیدان کی باز کشی ئاخر از این عزم، عنانت؟ بەو چاوی سیاهت کە دەڵەی ئاهویی چینی قەد وا دەبێ تۆ خۆش دڵ و ئەمنیش بە حەزینی؟ ڕوومەت گوڵ و قەد سەروی ڕەوان زوهرەجەبینی مەه عاریز و سیمین کەمەری تۆ بە یەقینی بگذار در ئاغوش کشم سرو روانت بۆ قەتڵی وەفایی کە بە دڵ ئەو گوڵی خەندان فەرموویە بڕۆ نێرگسی سەرمەستی بە موژگان قوربانی نیگاهی بوو بە غەمزێکی دڵ و جان نەمدیوە دوو نیشانە بە تیرێکی لە ئینسان قربان شوم ای ترک به این تیر و کمانت ++++++++++++++++++++++ سەرناو: ڕۆژی تەرەب و کەیف و دەمی جۆیە کوتانە! ڕۆژی تەرەب و کەیف و دەمی جۆیە کوتانە! بەو دەستەیی جوانێ وە پەری بۆتە نیشانە دەستی بەمە توند گرتووە گەرمی قەوەتانە نێوکی نەکەوێ یاڕەبی بەم بارە گرانە جانی منە جۆ دەکوتێ بێ عوزر و بەهانە پەروانە سیفەت سووختەیی شەوقی چراغم وەک بولبولی شەیدا هەموو سووتاوە دەماغم دڵ پڕ لە غەم و داغی جەماڵی گوڵەباغم وەک نێرگسی مەخمووری پەری مەست و نەساغم جانی منە جۆ دەکوتێ بێ عوزر و بەهانە دولبەر کە بە خەندە سەری زولفان دەهەژێنێ بازاڕی شەکەر، قیمەتی عەنبەر دەشکێنێ ماندوو بووە ئارەق بە ڕواندا دەڕژێنێ بەرگی گوڵ و نەسرین بە گوڵاوێ دەڕشێنێ جانی منە جۆ دەکوتێ بێ عوزر و بەهانە ئەو شۆخە کە جیلوە و ڕەوشی کەبکی دەری بێ گێسووشەب و مەه عاریز و گەردەن سەحەری بێ چاوی ڕەش و زاری گوڵ و زولفی قەجەری بێ ئەو دڵبەرە بەو ڕەنگی جوان ڕەنگە پەری بێ جانی منە جۆ دەکوتێ بێ عوزر و بەهانە هەر لەحزە لە خەندەی دەمی وەک حوققەیی یاقووت شەککەر دەوەری، گوڵ دەڕژا، غونچە دەپشکووت سەر تا بە قەدەم ڕۆحی وەفایی لە غەمان سووت ناڵەی دڵی زاری گەیییە عالەمی لاهووت جانی منە جۆ دەکوتێ بێ عوزر و بەهانە ++++++++++++++++++++++ سەرناو: دەمێک ساقی دەمت بێنە دەخیلی چاوەکانت بم دەمێک ساقی دەمت بێنە دەخیلی چاوەکانت بم بە جامێک دەستی من بگرە فیدای پیری موغانت بم لە دوو لا مەست و حەیرانم، بە قووەی جەزبە نازانم نە سەرگەردی سەر و گەردەن، نە قوربانی لەبانت بم؟ چ خۆشە وەجدی سەرو و گوڵ، بە دینی قومریی و بولبول دەمێک شەیدای قەد و باڵات، دەمێک شێتی دەهانت بم لە نیشانەی پەڕەی جەرگم نەوەستا تا نەگەییە دڵ بە قوربانی خەدەنگی دەست و بازووی چاوەکانت بم شیفای دام غەمزەکەی چاوت کە وا خوێنی دڵی گرتم بە قوربانی موداوایی حەکیمی حاڵزانت بم بەبێ ئیمدادی خاڵی گەردنت دەردم شیفای نایە مەگەر بێم دەست و دامانی گەلاوێژی بەیانت بم لە وەسڵی ڕوویی تۆی کردم حیجابی پێچشی زولفت هەتا کەی دڵشکستەی دەرد و تەعنەی باغەبانت بم؟ موقیمی خاکی دەرکەی تۆ حەریمی جەننەتە جێگای بە لوتفی تۆ چ کەم نابێ منیش ڕیزەی سەگانت بم؟ بە زولفی پڕ لە هاواری دڵان کەوتووم، دەسا ڕوحمێ ئەمان سەرقافڵەچی قوربانی زەنگی کارەوانت بم لەوی ڕۆژێ کە ڕووت وا کرد و لێت پرسیم، هەتا دەمرم بە بۆی جەننەت دەبێ من هەر لەسەر ڕازی نیهانت بم برۆت تێکنا، دەمت وێکنا، لە دەریای لوتفی تۆ دوورە لە قوربی قابەقەوسەین و مەقامی لامەکانت بم ئەمن کورد و دڵ ئیفتادە، ئەتۆ شۆخ و عەرەب‏زادە مەگەر بمرم بە بەختی خۆم دەمێکی هەمزوبانت بم بە یادی زولف و ڕووی تۆ وەک «وەفایی» هەر دەناڵێنم دەبێ تا ڕۆژی مەحشەر تازیەدار و ڕەوزەخوانت بم ++++++++++++++++++++++ سەرناو: گا دەسووتێم گا دەگریێم غەرقی ئاو و ئاورم گا دەسووتێم گا دەگریێم غەرقی ئاو و ئاورم ئاخ لەبەر بەختی سیا! نازانم ئەز بۆچ نامرم؟ هەر کە دەتبینم دەڵێی تۆ شەم و منیش پەروانەتم تا سەراپا نەبمە کۆی زووخاڵ قەد ئارام ناگرم هەر ڕەگم تارێکە ناڵەی دێ لە شەوقی ڕوویی تۆ عەندەلیبم، موتریبم، خۆشخوانی گوڵ ڕامشگەرم زولف و ڕوو، باڵا و ئەبرۆ و خەتت و خاڵ و چاوی کاڵ لەو تەلیسمی حەوت‏خوان زۆر موشکیلە ڕۆح دەربەرم عەکسی زولف و ڕووتە مایەی جۆششی گریانی من چ بکەم ئاخر چاو پڕاوی دوودی عوودی مەجمەرم حەقمە خوێن بگریم لە بێدادی خەت و جەوری نیگا من کە گیرۆدەی فەڕەنگ، یەخسیری دەستی کافرم پێکەنینت جەزبی کردم بۆ سەر و زولفی سیاه تووتیی شیرین کەلام پابەندی داوی شەککەرم گاه پەرێشانی ڕوخ و گا دڵشکستەی قامەتم هەر وە زولفی تۆ دەچم سەرگەشتە و سەوداسەرم گەر بە ناز هەر دەمکوژی با تێر ببینم چاوەکەت لێم‏گەڕێ جارێ بە کووچەی مەیفرۆشان ڕابرم دوور لە تۆ زۆر بێقەرار بووم تا بە لوتفی چاوەکان زەحمەتت دا بەر تەبیبان هاتی ئەمڕۆ چاترم حاسڵی سەیر و سلووکم بوو بە خەندەی زاری تۆ گەه بەقا، گاهێ فەنا، گەه غائیب و گەه حازرم زاهید ئینسافت هەبێ، تۆ چت لە ڕەندی بادەخوار؟ تۆ و بەهەشت، تۆ و حوور و غیلمان، ئەمن و چاوی دڵبەرم وەک وەفایی دڵ بدە دین دانێ بۆ ساحەب دڵێک دا بزانی بۆچی من عاشق بە حوسنی مەزهەرم ++++++++++++++++++++++ سەرناو: ئەرێ خەندەی دەمت ئارامی دڵ، کانی حەیاتی من ئەرێ خەندەی دەمت ئارامی دڵ، کانی حەیاتی من لەسەرچی زیز دەبی؟ ڕۆحت دەوێ؟ هانێ حەیاتی من! کوتت: دێم و نەهاتیە سەر گرفتاری سەری زولفت لەگەڵ بەختی سیا چ بکەم؟ دیارە خۆ نەهاتی من! من و سەودای سەری زولفت لەسەر تاقی برۆت؟ ! حاشا عەزیزم ئەهلی قیبلەم! کافری دوورە لە زاتی من بە خەندەی زار و عەکسی زولف و ڕووت خۆش بوو دڵم، سەدحەیف دەقیقەشماری خۆشی چوو شەو و ڕۆژی سەعاتی من لەلایێ ڕۆح دەبا عیشوەت، لەلایێ دڵ دەدا خەندەت عەزیزم هەر بە دەست خۆتە حەیاتی من مەماتی من لە دووری تۆ بە دەفتەر نایێ شەرحی ماجەرای چاوم ئەگەر دەریای ئەعزەم بێ هەموو سورخی دەواتی من دەسووتێم تەرزی پەروانە، دەناڵێنم وەکوو بولبول سەراسەر بۆتە میجمەر، بۆتە گوڵشەم، شەش جیهاتی من چ خۆش ڕووی دادەهێنا زولفی ئەفشان کرد بە دڵداریم! ئیلاهی قەت نەکەی ڕۆژ بێ شەوی قەدر و بەراتی من ئەمن کەوتووم لەبەر گریان دەڵێ: دەستی من و دامان سەبا گەر بوویە خوێن دامانی یار، بگری لە باتی من دڵم جەزبی نیگاهت خستیە زولفان، ئەی خودا ڕوحمێ بە بەندی جادووان وا کەوت غەریبی دوور وڵاتی من بڵا مەعلووم ببێ کوژراوی کێم یاران وەسییەت بێ: چراغی توربەتم هەر دەستەگوڵ بێ پاش وەفاتی من ئەمن چی و زوهدی سۆفیانە! من و گۆشێکی مەیخانە بە قوربانی نیگاهێکت هەموو سەوم و سەلاتی من بە خەندە ڕووی لە زولفان خستە ڕوو فەرمووی: وەرە یەعنی وەفایی! شەوچراغی پێ دەوێ ئابی حەیاتی من ++++++++++++++++++++++ سەرناو: لە باغان ئاه و ناڵین دێ، دەڵێن شای نێو گوڵان ڕۆیی لە باغان ئاه و ناڵین دێ، دەڵێن شای نێو گوڵان ڕۆیی لە مەیخانان سەدای شین دێ کەوا پیری موغان ڕۆیی دەڵێی دەوری قەمەر، سەیری فەلەک، میزانی گۆڕاوە کەوا گوڵ زەرد بوو، سونبول تێک چوو، ڕەنگی ئەرغەوان ڕۆیی لەبەر چاوی جیهان بینم جیهان تاریک بوو نەمزانی نە نووری چاوەکانم چوو، نە خورشیدی جیهان ڕۆیی لە دووری تۆیە سوور بوو چاوەکەم بەو گریە مەعلوومە شەفەق دێ، کەوکەبیش هەڵدێ، کە میهری خاوەران ڕۆیی دەمێکی هات بە چاوی سورمەسا، یەعنی: وەفادارم کە جەرگی سورمەیی کردم بە سیحری جادوان ڕۆیی سەحەر مەستانە هات بولبول بە شادی بۆ تەوافی گوڵ کە دی باغ بێگوڵە، داغ بوو، بە سەد ئاه و فوغان ڕۆیی مەڵێن: بولبول مەناڵێنە کەوا گوڵ گوڵشەنی چۆڵ کرد دڵ ئارامی نەما چ بکا؟ کە ئارامی دڵان ڕۆیی قیامەت بۆ دڵان هەستا کە چاوی مەستی وەرگێڕا مەگەر ئازوردە بوو ساقی لە بەزمی مەیکەشان ڕۆیی چ شینێکە؟ چ هاوارە لە نێو حەڵقەی موریداندا؟ مەگەر خواجەی سەمەرقەندی لە نێو ساحێب دڵان ڕۆیی چ ئافەت کەوتە بەر چاوم کەوا چوو نووری بیناییم؟ مەگەر شاهی بوخارایی لە قەسری عاریفان ڕۆیی بە ناڵەی دڵ شیفام نایێ درێغ بۆ مەرهەمی جەرگم لە زەنگی کارەوان چ بکەم؟ دەلیلی کارەوان ڕۆیی خرابوو خانەقا، بێشێخ و شەوقی تالیبان سەد حەیف چەمەن وێران بوو، نەغمەی بولبولان چوو، باغەبان ڕۆیی بە ناڵەی بولبول و قومری وەفایی بۆیە هەر دەگریم گوڵێکی سەرو باڵام بوو بە تاراجی خەزان ڕۆیی ++++++++++++++++++++++ سەرناو: ئەلا ئەی ساقیی مەستان! بە حەققی پیری مەیخانە ئەلا ئەی ساقیی مەستان! بە حەققی پیری مەیخانە بە گەردش بێنە جامی مەی بە یادی چاوی جانانە ئەمان ئەی موتریبی مەجلیس بە حەققی تاری ڕۆحانی بڵا بێ نەغمەکەی سازت کە ئاوی ئاوری هیجرانە ئەتۆ ئەی ڕۆحەکەم ساقی، ئەتۆ ئەی عومرەکەم موتریب پەیاپەی لێدە چەنگ و نەی، دەمادەم بێنە پەیمانە بە تیری غەمزە بملاوێنەوە زولفم لە گەردەن کە بەسەر هاتوومە مەیدانت، بە دڵ بۆت بوومە نیشانە ئەگەر شەوقی جەماڵی تۆ نەبێ من مەست و حەیرانم لەبەرچی بۆتە بولبول گوڵ، چرا بۆچ بۆتە پەروانە لە شەوقی تۆیە سەرمەستە، بە زەوقی تۆیە پا بەستە ئەگەر عاریف لە کەعبەیدا، ئەگەر کافر لە بوتخانە لە شیرینی جەماڵی تۆیە ڕۆژی ڕوونی لەیلایە ئەگەر فەرهادی سەرگەردان، ئەگەر مەجنوونی دێوانە دەمێکی مەست و بیمارم، دەمێک بێهۆش و هۆشیارم چ کەس نازانی دەردی من، مەگەر ئەو چاوە کاڵانە دە هەر حەلقێکیدا سەد دڵ گرفتارە دەناڵێنێ سەری زولفی پەرێشانت مەگەر زنجیری شاهانە هەناسەی عاشقان با نەتگرێ بێمروەتی تاکەی؟ بترسێ ئەی گوڵی نازک بەدەن لەو بایی زریانە ئەگەر زولفت وەکوو من عاشقی ڕووی تۆ نییە بۆچی: سەراپا تێک چووە کەوتۆتە بەرپێت دەست و دامانە؟ ترازا دوگمەکەی سینەی، بە یاریی زولفی هات غەمزە بەیان بەربوو لەلای چین، باخەبەر بن تیرە بارانە وەفایی بۆ گوڵێکی سەروباڵا شێت و شەیدایە وەکوو قومری دەناڵێنێ وەکوو بولبول غەزەلخوانە ++++++++++++++++++++++ سەرناو: بە گوڵزاری ئیرەم قوربان دەپرسی گەر لە ئەحواڵم بە گوڵزاری ئیرەم قوربان دەپرسی گەر لە ئەحواڵم نەخۆش و سەرخۆش و مەست و خوماری چاوەکەی کاڵم پەرێشانم، بڵاوم، تێک‏شکاوم، خاو و شێواوم دەڵێی شاماری زولفی تۆم لە دووی تۆ شێت و عەبداڵم بە نازی چاوەکەی وەک بازی، بازی دام هەتا پیر بووم دەترسم هەر بە بازی بمکوژێ ئەو یاری منداڵم نە داغی جەرگی خۆم زانی، نە مایەی بەرگی خوێنینم شەهیدی دەشتی عیشقم، لالە ڕەنگم، من کەڕ و لاڵم دڵەی بێهۆش و گۆشم موددەتێکە هەر دەناڵێنێ خودا ڕوحمێ بکەی بەو مورغی حەپسی بێپەڕ و باڵم بفەرموو «با» پەرێشانم نەکا زولفت لەسەر ڕووی تۆ ئەمان یا کاشفی زوڵمەت، دەخیل ئەی شەوچرای ماڵم بە خۆت سەرمەشقی زولف و دەرسی باڵات داوم ئەز چ بکەم نیشانە و دەسخەتی خۆتە ئەگەر ئەلفم ئەگەر دالم ئەمن ئیفتادە بووم تۆ خۆت بە ڕەحمت دەست‏گیرم بووی پەشیمانی نە شێوەی تۆیە، ئەی خورشیدی ئیقباڵم ئیشارەی چاو و عیشوەی زولفەکەت بوون مورشیدی ڕێگام ئەگەر دەیری موغان قیبلەم، ئەگەر زوننارە بەرماڵم بە تیغی غەمزە ئەمن و تەرکی ڕووی تۆ؟ قەت مەڵێ قوربان ئەگەر قیمەم بکەن هەر ڕۆژ پەرستم، هەر بە یەک حاڵم ئەمن هەر تۆم دەوێ، من چم لە ڕۆح و چم لە دین داوە؟ ! بە قوربانی تەماشایێکی تۆ سەد جار سەر و ماڵم لە تاو دەردی دڵی دێوانە خوێن دەگریم و نازانم: نە خەستەی چاوەکەی مەستم، نە ڕەنجەی پەنجەکەی ئاڵم؟ بە مەرگی من بە ڕەمزێکی بڵێ بەو چاوە حاڵیم کا ئەتۆ نازدار و بیماری، ئەمن بۆچ زار و بێحاڵم؟ ! کوتی: بۆ کوێ دەبەی ڕۆحت «وەفایی»؟ دەوریان گرتی! نیزامی پەرچەم و سەربازی زولف و عەسکەری خاڵم ++++++++++++++++++++++ سەرناو: گوڵەکەم دەڵێن ئەوا دێ، هەموو وەختێ چاوەچاوم گوڵەکەم دەڵێن ئەوا دێ، هەموو وەختێ چاوەچاوم ئەی خودا تۆ بڵەی وەها بێ، بێتەوە ڕووناکی چاوم؟ ! سەبەبی زولفی شێواوە حوسنی ڕوو مەدەدی پێداوە من کەوا ڕۆژم بۆتە شەو کە بە ڕۆژی ڕەش داماوم تا بزانن تۆ گوڵزاری، ڕوستەیی سەری جۆباری بە خەندە هاتی بەخێر بێی، قەدەمت سەر هەردوو چاوم خوێنی من بە گەردنی زولفت بە ئیشارەی چاوەکانت من ئەگەر شکاوە پشتم، من ئەگەر جگەر بڕاوم بە سەری خەدەنگی نازت، جگەری بڕیم چاوی بازت بە ئومێدی نازێکی ویم، ئەگینا ئەمن نەماوم دڵی خۆم ئاوری تێ بەردا تا لە تای زولفان ڕووی دامێ شەو هەتا نەگەڕام بە چراوە، شەوچرا نەهاتە بەرچاوم ئەتۆی نووری شەوبێداران، ئەمن بۆ وەک شەم دایسیێم ئەتۆ گوڵی شای گوڵزاران، ئەمن بۆ غەرقی خوێناوم؟ کە دەڵێی شەیدای گێسوومی، چ دەکەی لەسەری سەوداییم؟ کە دەڵێی پەروانەی ڕوومی، چ دەکەی لە دڵی سووتاوم؟ شەو و ڕۆژ کە دەڵێن دوو بانن، هەر یەکن بۆ دوون یەک بانن من لە دوو لاوەی برۆی تۆ، حەیرانی دوو زولفی خاوم ئەی شەماڵ، ئەی شیفای نەساغان، وەرە تۆ بێ و خاڵی ڕووی یار بە گوڵ و وەنەوشەی باغان، بگەیێنە دوعا و سڵاوم گلەیی لە چاوی کاڵتە کە موعینی زولف و خاڵتە دڵی پڕ لە دەرد و داخم، سەری پڕ تەلیسم و داوم نە بە وەسڵی تۆ سروورم، نە بە دووری تۆ سەبوورم گێژ و سەرگەردان و حەیران، هەروەکوو ماسیی سەر ئاوم بە نیگای تۆ و عەرەقی ڕووت دڵ و دینم چوو نازانم نە خوماری شەرابی ساقیم، نە مەستی عەتری گوڵاوم؟ حەقە کە وەکوو وەفایی شێت و شەیدا و سەودایی مەلەکان خۆیان نیشان دام، پەرییان دەستیان لێداوم ++++++++++++++++++++++ سەرناو: خەتی ئازادی ئەو ڕۆژە بە من دا دڵستانی من خەتی ئازادی ئەو ڕۆژە بە من دا دڵستانی من کە سەروی قامەتی تەشریفی هێنا باغی جانی من ئەرێ ئەی وەسڵی گوڵزارت حەیاتی جاویدانی من ئەرێ ئەی چاوی بیمارت تەبیبی میهرەبانی من کە سەیری حیکمەتی زاری بە عەکسی زولف و چاوی کەوت چ زوو شێوا بە جامێک بادە، عەقڵی نوکتەزانی من؟ دوعای ڕەدد و قەبووڵ دەرحەق بە زولفی کرد و گیرا بوو ئیلاهی تێک نەچێ عومری درێژی باغەبانی من! بە عیشوەی زولفەکەی تۆم دا هەموو سەبر و قەراری خۆم بە نەشئەی چاوەکەی تۆ چوو هەموو تاب و تەوانی من سەری زولفت چییە؟ عومری درێژم، توولی ئامالم! قەدی بەرزت چییە؟ سەروی چەمەن، ڕۆحی ڕەوانی من! لە کن تۆ هات لە چەرخی هەفتەمین ڕابرد و نەتزانی عەجەب مام بۆچ نەگەییە عالەمی باڵا فوغانی من! ئەگەر مەجنوونی تۆ نیم لەیلەکەی بێمەیلەکەم بۆچی: لە هەر کووچێک و بازاڕێکیدایە داستانی من؟ لە سەر چاهی زەنەخدان دێ و دەچێ ڕوحمی نییە زولفت فەرەنگی ڕۆژپەرەستە، کافرە زیندانەوانی من بە داغی زولف و خاڵی تۆ قەتارەی بەسووە فرمێسکم خەیاڵی چین و ماچینی لەسەردا کاروانی من کوتم: کوا حوسنەکەت؟ عەنبەرفرۆشی زولفەکەی فەرمووی: حەبەش ئیسلامی داگرت، تێک چووە دەور و دوکانی من لەگەڵ ئابی حەیات چ بکەم؟ بە تۆیە زیندەگی ڕۆحم مەسیحا بۆچی بێ؟ قوربان ئەتۆی ئارامی جانی من! لە داغی خاڵی سەر لێوت دڵم پڕ خوێن و خوێناوە کە هیندووزادە بۆتە مەحرەمی ڕازی نیهانی من نەخۆشی چاوەکەت، خوێنی وەفایی بۆتە دەرمانی فیدات بم، زیز مەبە، ها بمکوژە دەردت لە گیانی من ++++++++++++++++++++++ سەرناو: زەدەی ڕووتم، بە چاوی تۆ، شیفام بێلێوەکەت نابێ زەدەی ڕووتم، بە چاوی تۆ، شیفام بێلێوەکەت نابێ بە حەققی ئابڕووی پیری موغان ساقی مەیی نابێ! ئەتۆش ئەی تارزەن سادەی سروودێکی بە نەغمەی نەی بڵا تەی بێ غەم و نۆبەی سرووری جامی مینابێ ئەتۆش دەم دەم بە نەغمەی نەی ئەتۆش خۆش خۆش بە جورعەی مەی کزەی بایێکی ڕۆحانی، نەشەی جامێکی یار بابێ بەقوربانی سەداتم ها بڵێ موتریب وەرە ساقی نەیستان ئاوری بەربۆتێ، بڵا تۆفان لەسەردا بێ لە شەوقی بادە داگیراوە ساقی ڕووی عەرەقناکی وەکوو شەبنەم لەسەر گوڵ کەوتبێ ڕۆژ عەکسی لێدابێ وەرە بنواڕە تاب و تابشی زولفی دڵاوێزی ئەگەر نەتدیوە عرش الله چرای دەیر و کلیسا بێ لە تاو ئاوری جەماڵت کەی دەزانێ حاڵی دڵسۆزان؟ کەسێکی تاوەکوو زولفت نە شێوابێ نە سووتابێ کەناری چاوی هەردەم شانشینی عاشقی ڕووتە بەڵێ وەک سوورمە وایە هەرچی سووتاوی تەجەللابێ ئەتۆ بەو چاوە سەرمەستە دەمێکی هەستە ڕاوەستە ببینم کەی قیامەت دێ؟ بزانم بۆچ مەسیحا بێ؟ دەڵێن غەم لەشکری کێشاوە، تۆش بەو زولف و خاڵانە بفەرموو تا شەبیخوونێ لەلای چین و حەبەش ڕابێ دەڵێن یار دێتەوە، خۆ من بە دەردێکی گران کەوتووم تەبیبی دەردەداران ئەی خودا بێ، ئەی خودا وابێ بە گۆشەی چاو و خاڵی لێو و خاکی کۆی یار نادەم ئەگەر سەد جامی جەم، ئابی خدر، ئەوڕەنگی دارا بێ لە ڕووم مەحرووم مەبە فەرمووی وەفایی عاشقی زارم! کەسێ زەڕڕێکی ئیمان بێ بەهەشتی لێ حەرام نابێ درێغا سەروی باڵای من گوڵێک بوو هات و با بردی گوڵێکی وا بەهار ناگرێ هەتا دونیا بە دونیابێ ++++++++++++++++++++++ سەرناو: موتریب وەرە دەستی من و دامانی وەفات بێ موتریب وەرە دەستی من و دامانی وەفات بێ سووتام بە مەستی مەیەوە دەنگی نەوات بێ ساقی وەرە مەجلیس بە سەر و گەردەنی جامت بێ نەغمەیی نەی نامەوێ گەر ئابی حەیات بێ تۆ گەنجی جەمالت هەیە، من عاشقی ڕووتم یەک بووسە چ نابێ کە بفەرمووی بە زەکات بێ نابێتەوە ڕۆژ ئیدی سەباحی ئەمەلی من بەو گەردنە، هەرتا شکەنی زولفی دوتات بێ دەگریم و لەگەڵ ئاهی دەروون سۆزی دڵم دێ وەک بەرقی بەهاری کە لە عەینی زوڵمات بێ قوربان! کوتم: ئاخر بەسە بەو زولفە ئەسیری فەرمووی: کە ئەتۆ مورغی شەباوێزی، سەدات بێ مەنعم مەکە مەستم کە بە تەفسیری جەماڵت عاشق ئەوەیە بێ سیفەت و پەڕتەوی زات بێ من ڕەند و قەلەندەرسیفەت و مەست و خەرابم تۆ پیری خەراباتی ئەگەر مەزهەبی وات بێ نەمزانی هەتا پێنەکەنی گوڵبەدەنی من فنجانی لە مەرجانی دەبێ پڕ لە نەبات بێ هەر چاوەڕوانی قەدەمی تۆم و ئەگەر دێی زوو بێ نەفەسی ئاخرە، ڕۆحم بەفیدات بێ هەستە وەرە لەو جامی ئەلەستە بدە دەستم بەستەی دەری گوڵزارە ئەوی مەستی سەفات بێ سەد جار بچم و بێم و بسووتێم حەقی تۆیە هەرچەندە بە شەرعی شەم و پەروانە خەتات بێ بۆ ماچێکی مەمکوژە، بە ڕوحم و بە وەفا بە هەرچەندە بە دینی گوڵ و بولبول حەسەنات بێ عەهدێکە لەگەڵ گوڵ کە بەبێ موتریب و ساقی تا ئێرە نەچی ئیدی وەفایی دە حەیات بێ ++++++++++++++++++++++ سەرناو: وەفایی بوت پەرستی تۆیە سەد جار کوفری زاهیر بێ وەفایی بوت پەرستی تۆیە سەد جار کوفری زاهیر بێ بە دینی بولبولان سەجدە حەڵاڵە گوڵ کە مەزهەر بێ دەمێک با دەست و گەردەن بم، دەمێک با هەمدەمت من بم نەخۆشی چاوی تۆم بەڵکوو شیفای من شیر و شەککەر بێ قەسەم بەو لێوی خەندان! هەر ئەتۆی بەو شکڵ و باڵایە لە جەننەتدا ئەگەر هیچ نەخلی تووبا، ئابی کەوسەر بێ لە تاوی تیرەبارانی نیگاهت بۆچ نەناڵێنم؟ دیارە حاڵی بیمارێکی جەرگی پڕ لە نەشتەر بێ ڕوخ و گەردنی پیشان دام پێم دەڵێ: تۆ هەر بناڵێنە کە خۆشە نەغمەیی بولبول بەهاران وەک بەیان بەربێ لە دوولا زولف و خاڵی عەنبەرین کەوتۆتە ڕوخساری وەکوو تابووری هیند و چین بە باغی دڵگوشا وەربێ کە ڕووی خۆی خستەدەر هەستا لە هەر گۆشێکی غەوغایێ جیهان پڕ بوو لە ناڵەی عاشقان وەک ڕۆژی مەحشەر بێ قەراری دا بە ڕۆح و دڵ بەری پێی ماچ بکەم تا سەر ئیلاهی عەهد و پەیمانی حەبیبی من هەتا سەر بێ! بە هەویای خاڵی لێوت کەوتمە داوی زوڵمەتی زولفت ئیلاهی ڕەهبەری ئابی بەقام خزری پەیەمبەر بێ لەوی ڕۆژێ کە دەستم دا لە ڕووی، سیڕڕی دەمیم زانی بە قورئان سوێند دەخۆم کەوسەر ئەگەر وەک لەعلی دولبەر بێ دەڵێ: بگری، ببارێنە، هەتا بێم دەست وگەردن بین نیساری شای شەکەر لێوان دەبێ هەر لەعل و گەوهەر بێ دەڵێ: بمرە و بسووتێ تا بە دڵ من بێمە سەر جێی تۆ سلووکی عاشقان وایە کە دڵ دەربێ بە دڵبەر بێ وەها مەحوی تەجەللای گەردەن و ڕوخساری تۆم قوربان لە خاکم، ڕەنگە تا مەحشەر کە هەر نەسرین و گوڵ دەر بێ خوشا بەو ڕۆژە گۆشەی چاوەکەی دامێ بە ناز فەرمووی: وەفایی بۆ درەنگ هات؟ ئەی خودا جەللادی کافر بێ! ++++++++++++++++++++++ سەرناو: شەو لە خەودا من چرا بووم دڵ چرا بوو جان چراغ شەو لە خەودا من چرا بووم دڵ چرا بوو جان چراغ ئەی لەبەر عەیشی شەوی دی جان چرا جانان چراغ گەه فریشتە، گەه پەری، گەه حۆری عین گاهێ مەلەک گەه قەمەر، گەه موشتەری، گەه ڕۆژ، گەهێ ڕەخشان چراغ ڕەنگ بە ڕەنگ زولفی درەوشان دەم بەدەم ڕووی خۆی نواند چل‏چرا یا شەو چرا بوو؟ یا بە سەد ڕەنگان چراغ؟ ڕووی لە تاتا زولفی دەرخست هاتە سەر ڕووی مەرحەمەت نەوبەهار بوو، شەو بەهار بوو، وا کە داییسان چراغ ڕوو لە حەلقەی تاری زولفان، دەم لە فرقەی پێکەنین وەک لە کن کانی حەیاتێ، شەو هەزار تابان چراغ ڕەونەقی حەوت ئاسمان و زینەتی ڕوویی زەمین هەر وەکوو بۆ شانشین و مەنزڵی شاهان چراغ تابی سونبوڵ، تابشی گوڵ، نیم نیگاهی چاو خومار نەشئە بەخشا، جان فەزا، وەک شەو لە مەیخانان چراغ عەکسی ڕووی ئارایشی زولف و خەت و خاڵان دەدا وەک لە گوڵشەن گوڵ چرا بێ، سونبول و ڕەیحان چراغ شەوقی دامێ ڕووی دە من کرد، دیم شەوم لێ بۆتە ڕۆژ من دەسووتام، من عەجەب مام! من چرا بووم یان چراغ؟ ! دڵ لە لایێ، تەن لە لایێ وەک نەیستان ئاوری گرت مەسجید و دەیر و کلیسا ماوە پڕ تابان چراغ دار و بەرد وەک من دەسووتا، دەر نەما، ئەیوان نەما زاهیر و باتین چرا بوو، دەر چرا ئەیوان چراغ زولفی تۆ و ڕوخساری تۆیە؟ یا شەوم ڕۆژی ویسال؟ ڕوویی تۆ و باڵایی تۆیە؟ یا لە سەروستان چراغ من ئەوا مەست و نەزان بووم، بۆ لە داغی باغی ڕووت: گوڵ وەکوو بولبول دەسووتا تەرزی پەروانان چراغ ناگەهان دڵبەر نەهان بوو، بوو بە ڕۆژی ڕەستەخێز کەف‏زەنان مەیخوارە، وێران مەیکەدە، گریان چراغ شەعشەعەی خورشید نیهان بوو، لاڵ و کەڕ بوو نیلوفەڕ مات و خامۆش ما وەفایی وەک سەحەرگاهان چراغ ++++++++++++++++++++++ سەرناو: تا بادی خەزان دایە گوڵ و بەرگی ڕەزانم تا بادی خەزان دایە گوڵ و بەرگی ڕەزانم سەد جێ وەکوو بولبول لە جگەر داغی خەزانم وەک بەرگی گوڵم دی کە بە با چوو بە ئەسیری کڕ کەوتم و شێت بووم، عەبەسام، لاڵ بوو زوبانم قومری وەرە هەرتا دەمرین پێکەوە بگرین تۆ سەروی ڕەوانت چووە من ڕۆحی ڕەوانم بولبول وەرە تا ڕۆحی من و تۆیە بناڵین تۆ باغی گوڵانت چوو ئەمن داغی دڵانم ئەی مەعدەنی شیر و شەکەر، ئەی گوڵبەر و دڵبەر ئەی تازە گوڵی دارە گوڵی باغی جینانم کەس سیڕڕی دەم و عیشقی میانی نەدەزانی ئەشکم بووە غەممازی هەموو ڕازی نیهانم تۆ چونکە لە لەیلا گەلێ شیرینتری بۆیە مەجنوونی دەر و دەشتم و فەرهادی زەمانم ئیشم هەموو ناڵینە لە ئێشی دڵی ڕێشم کارم هەموو گریانە لەبەر دەردی گرانم بۆ گەردەنی تۆ بوومە ئەسیری سەری زولفت من مورغی شەباوێزم و عاشق بە بەیانم جان بەخشە دەڵێن ماچی دەمت وەقتی تەبەسسوم تاکەی بمرم موعجیزەی ئەم سیڕڕە نەزانم! جەزبەی نیگەهت خۆشیی نەهێشتم. بە برۆی تۆ قیبلەم چووە تا مەستی مەیی پیری موغانم فەرمووی: کە لەگەڵ هاتم ئەتۆ ڕۆح بدە، چاوم! سا ساقی، دەجا جامێ کە هەروا نیگەرانم چاوت بە نیگەه کردن و زارت بە تەبەسسوم هاتن بە تەمای غارەتی عەقڵ و دڵ و جانم ئەو دەستە سوارێکە ئەمیش تازە بەهارێ ئەو ڕاو و شکارێکە منیش کاس و نەزانم کێو هاتە سەدا و ناڵە بە هاواری وەفایی جارێکی لە تۆ کاری نەکرد ئاه و فوغانم! ++++++++++++++++++++++ سەرناو: پێم بڵێ گوڵی بەهاریم لە تۆ تا بە کەی جودا بم پێم بڵێ گوڵی بەهاریم لە تۆ تا بە کەی جودا بم؟ وەرەوە، بە شەرتی جاران، ڕۆژی سەد جارت فیدا بم خاڵی چاو و گۆشەی ئەبرۆ، دوو دینیان کردم لەسەر تۆ یا بمکە پیری مەیخانە، یا موریدی خانەقا بم سەرەکەم فیدات عەزیزم، وەرە زیز مەبە لەسەر دڵ سەرە پایەبەندی تۆیە، دڵە ماڵی خۆتە تا بم شەو بە تای زولفت شێواندم، ڕۆژ لە تاوا دەتسووتاندم چ خودا لە تۆ هەڵدەگرێ بە شەو و بە ڕۆژ عەزابم؟ نەفەسێ مۆڵەتێ بدە عومرم، بدبینم زولفەکەت بگرم بە کەمەندی تۆوە بمرم خۆشترە تاوەکوو ڕەها بم لە نێو مەنزەرەی دوودەری خۆشە سەیری مەوجی بەحری وەرە سەر چاوم عەزیزم، چ دەکەی لە دڵەی کەبابم؟ غەمزەدەی نازی چاوت بم مەیلی ئەبرۆی تۆ قەت نانێم من کە هات و قیبلەم گۆڕی، یاخودا کافر بێ جەلابم! بوویە گوڵباغی گوڵەکەی من، سارێژ بوو داغی دڵەکەی من ڕەحمت کرد بە حاڵم گوڵەکەی من، بەندەی باڵاتم سەد شا بم داد لەبەر حوسنی فیتنەجۆ! دڵم دا زولف و ئەبرۆی تۆ لە لایێ زوننار بە دۆشم، لەلایێ ڕوو بە میحرابم سەگەکەی ڕێبازی لەیلێ وەرە سەر دوو چاوی مەجنوون چاوم ئەو ڕۆژە لێ ڕوونە خاکی بەرپێی ئاشنابم غەرەزم چونکە پەنهانە وەڕەزم لەو جیسم و جانە مەرەزم مەرگی دەرمانە، هەر ئەزم بۆ خۆم حیجابم خوێنی گرتم چاوی بازی، جگەری بڕیم تیری نازی دەڵێ: من مەستم سەرخۆشم، جگەرە مەزەی شەرابم دەمەکەت بە دڵ وا بێنە، تۆ خودا دڵم مەشکێنە جێ بەجێ ڕۆحم بستێنە، من کەوا عاشقێکی چا بم وەرە تووری سینە ئەی دڵ، با بە دڵ بێ دیداری گوڵ کە دڵ و دڵبەر بوونە یەک، چ بە ئارەزووی جەوابم؟ خۆش بەو دەمەی گوڵ پشکووت، شەکەر دەباری لە یاقووت لێم ‏لا دە «وەفایی» دەیکوت: تۆ گەدا من شا بۆت نابم ++++++++++++++++++++++ سەرناو: ئەی دڵ وەرە هۆشیار ببە هذا طریق العاشقین ئەی دڵ وەرە هۆشیار ببە هذا طریق العاشقین مەحوی جەماڵی یار ببە هذا طریق العاشقین لەم لاوە گریەی نای و نەی، لەولاوە خەندەی جامی مەی ئاگر لە عالەم بەربدەی، هذا طریق العاشقین جارێ لە چاوان بگرە خەو، بگری بە ناڵەی نیوەشەو تا بێتەدەر خورشیدی نەو، هذا طریق العاشقین شۆری دڵ و سۆزی دەروون، زووخاوی جەرگ و مەوجی خوون خوێنی گەش و فرمێسکی ڕوون، هذا طریق العاشقین تا دڵ نەسووتێ دەم بەدەم، فانی نەبێ سەر تا قەدەم پەروانە قەت ناگاتە شەم، هذا طریق العاشقین تا چاو و دڵ خوێن بار نەکەی، قەتعی هەموو ئەغیار نەکەی فکری ویساڵی یار نەکەی، هذا طریق العاشقین عاشق دەبێ مەستانە بێ، خاکی دەری مەیخانە بێ ساقی لە کن پەیمانە بێ، هذا طریق العاشقین گەر دڵگوشا بادی سەبا، شەرحی دڵم بۆ گوڵ نەبا عومری عەزیزم چوو بە با، هذا طریق العاشقین سووتا دەروونم سەربەسەر، خوێنین دڵە جان و جگەر جیسمێکە بێئیسم و ئەسەر، هذا طریق العاشقین دیسان لەسەر عەهدی ئەلەست، جامێ لە جانان بگرە دەست هەر تا ئەبەد مەخموور و مەست، هذا طریق العاشقین دێوانە و سەوداسەرم، کوژراوی غەمزەی دڵبەرم دڵ پڕ لە ئێشی نەشتەرم، هذا طریق العاشقین چاوم بە سۆزی دڵ تەڕە، دەریایی ئاو و ئاورە موتریب بڵێ ساقی وەرە، هذا طریق العاشقین پەروانە خۆی ئاویتە بەست، فەرمووی چرا مەخموور و مەست وەسڵم بە سووتان دێتە دەست، هذا طریق العاشقین بولبول دەناڵێنێ حەزین، گوڵ دێتە عیشوە و پێکەنین بگری بە سۆزی ئاتەشین، هذا طریق العاشقین چی وەک وەفایی بەندەیە؟ لەو باغی دڵ گوڵ خەندەیە؟ بەو جامە خزری زیندەیە؟ هذا طریق العاشقین ++++++++++++++++++++++ سەرناو: گوڵێکم بوو لە دونیادا شکۆفەی باغی ڕەعنایی گوڵێکم بوو لە دونیادا شکۆفەی باغی ڕەعنایی لە داغی پەرچەمی شێوام لەنێو بازاڕی ڕیسوایی وەکوو بولبول بە ڕووح و دڵ شەو و ڕۆژ بوومە سەودایی هەموو عومری عەزیزم چوو لە ڕێی خەندێک بەخۆڕایی بەجارێ ماڵی وێرانم ئەمیشم چوو ئەویشم چوو! ئەمن وەک پەرچەمی جانان، ئەمن وەک نەرگسی یارم لە لایێ خاو و سەرگەردان، لە لای مەست و بیمارم بڵا بگریم بناڵێنم، کە وا تێک چوو سەر و کارم دڵم دانا لە ڕێی دڵبەر: نە دڵبەر بوو نە دڵدارم بە جارێ ماڵی وێرانم ئەمیشم چوو ئەویشم چوو! گوڵێکم بوو لە باغی دولبەریدا ماهی کەنعانی دڵێکم بوو لە ڕیزەی عاشقان مەجنوون بە سووتانی دڵی بردم، فریوی دام بە ماچی لێوی مەرجانی ئەسیری ئیلتفاتی سەر زبانی بووم و نەمزانی بە جارێ ماڵی وێرانم ئەمیشم چوو ئەویشم چوو! بە ئاوی چاو و خوێنی دڵ، بە سەعیی ڕووحی شیرینم غەزاڵێکم لە داو خست ئافەتی دڵ غارەتی دینم هەتا چووم چاوەکانی ماچ بکەم لەحزێکی بیبینم لە دەستم چوو وەکوو دڵ، بوو بە مایەی شیوەن و شینم بەجارێ ماڵی وێرانم ئەمیشم چوو ئەویشم چوو! وەفایی من شەهێنی قۆڵی چاوبازانی شاهان بووم ئەسیری دەستی گوڵدەم، سەروباڵا، ماهڕوویان بووم گەهێ بولبول، گەهێ تووتی، گەهێ مورغی غەزەلخوان بووم بە ئوممێدی عەزیزێک –دوور لە چاوم- پیری کەنعان بووم بەجارێ ماڵی وێرانم ئەمیشم چوو ئەویشم چوو! خوداوەندا! خوداوەندا! پەشیمانم پەشیمانم بە کاری ئاخیرەت نایەم عەجەب ئالوودە دامانم بە باری مەعسییەت شەرمەندەم و چاو پڕ لە گریانم نە دینم بوو نە دونیا گەر نەکێشی خەت بە دیوانم بەجارێ ماڵی وێرانم ئەمیشم چوو ئەویشم چوو! ++++++++++++++++++++++ سەرناو: ئەی نەشئەخەندی زارت شیرین‏کەری حەیاتم ئەی نەشئەخەندی زارت شیرین‏کەری حەیاتم عیشوەی زولف و عیزارت موژدەی شەوی بەراتم فەرمووت: تۆم نەمری نایێم، ناژیم نەیێیتە سەر جێم وەعدەکانت بەخێر بێ، هەر چاوەڕێی وەفاتم خۆزگەم بەوەی لەدووی تۆ، هەر دەنواڕێتە ڕووی تۆ مردم بە ئارەزووی تۆ، قوربانی ئاشناتم بە تیرێک دوو نیشانە، شایانی شای تورکانە قوربانی دەست و بازووی ئەو چاوەی سورمەساتم ئەو تیرە دات لە جەرگم، دەرکەوت ئاساری مەرگم فەرمووت: کە دێ، بە سەر بێ، بەختم نەبوو نەهاتم چی عیشقی تۆی لە دڵدا، دەستی لە ئاب و گڵ دا داغی شێواوی ڕووتم، کوشتەی ڕەقس و سەماتم تیرت قەراری دڵ بوو، ئارامی دا بە جەرگم با دڵ دڵی نەمێنێ، ئەو جارەکەش فیداتم ئەی ساقی خەراباتی، قەترێک ئاوی حەیاتی ئامان دەستی منت دامان! سووتاوی نێو زوڵماتم ساقی چاوت بنوێنە، زوهد و تەقوام بستێنە قوربانی جامێک مەی بێ، هەموو سەوم و سەلاتم! موتریب! هادیی ڕۆحانی، لێدە تاری سوبحانی شاباشی سۆزەی نەی بێ، هەموو جومعە و جەماتم ڕیشێکی گێژ و وێژ بێ، بە ڕیا دوور و درێژ بێ موشکل ئەو پووشە ویشکە، بێتە مایەی نەجاتم دڵ پڕ خەو و خەیاڵات، دەم بە زیکر و موناجات زەحمەت بە ڕۆژی تاریک، خۆش بێ وەقت و سەعاتم دەمێکە دڵ بڵاوە، بەو زولفە پێ بە داوە یا خودا بە ڕووت گوشا بێ، غەریبی دوور وڵاتم نەمزانی گوڵ دەپشکووت، شیرین بە لێوی یاقووت یا تۆ بە خەندە فەرمووت حوققەی شەهد و نەباتم گوڵ عەتری خۆی بڵاو کرد، دونیای پڕ لە گوڵاو کرد لاڵ بوو زوبانی بولبول، کوشتەی زات و سیفاتم خۆش‏خوانی مەجلیسی گوڵ! بێنەوە جۆش ڕۆح و دڵ بێحاڵە زۆر «وەفایی» فیدای دەنگ و سەداتم ++++++++++++++++++++++ سەرناو: حەریقی ئاوری دووریم، داغداری زولفی جانانە حەریقی ئاوری دووریم، داغداری زولفی جانانە ئەگەر بایێ لە لای قیبلەم نەیێ حاڵم پەرێشانە نەسیمی سوبحدەم قوربانی نەشئەی تۆزی ڕێگاتم غەریبم، بێکەسم، ڕۆح و دڵم سووتاوی هیجرانە ئەمن وا لێرەکە و ڕۆحم لە خاکی پاکی بەتحادا حەیاتم بێنەوە ڕاببرە بەو باغ و گوڵستانە ئەگەر دەریایی ئاور بێ، ئەگەر تۆفانی خوێن هەستێ بە سۆز و گریەیی زارم، بڵێ بەو ماهە تابانە بە غەمزەی چاوەکەی مەستت هەموو جێی نەشتەرە جەرگم بە موژگانی سیات قەلبم سەراسەر جێگە پەیکانە بە تاری زولف و گوڵناری جەماڵی تۆ بە ڕۆژ و شەو سەرم دەربەندی سەودایە، دڵم سەرگەرمی سووتانە دڵم سەوداسەرە و جانم پر از غەوغایە نازانم نە داغی تاری زولفانە، نە دەردی وردە خاڵانە؟ نە خاڵت ڕوحمی پێمدا دێ، نە حەڵقەی دایرەی زولفت عەجەب ماوم! دەڵێی دەوری فەڕەنگی کافرستانە بە شەوقی ڕووت لە حەلقەی زولفەکەت دێ ئاه و ناڵەی دڵ لە سوبحی کازیبەی شەودا چریکەی مورغی خۆشخانە شەهیدی تیغی ئەبرۆتم بە جەزبەی خاڵەکەی چاوت مەقامم قابەقەوسەینە لە سایەی پیری مەیخانە هەموو عالەم بە دیدارێکی تۆ قوربانی ئەبرۆتن مەگەر تاقی برۆت، قوربان، هیلالی عیدی قوربانە؟ عیبادەتخانە بەرهەم بوو بە نەشئەی قیبلەکەی ئەبرۆت لە سایەی چاوەکانت ماڵی کەعبەش بۆتە مەیخانە بە ئاه و گریە بۆ سەیری جەماڵی چووم و پێی فەرمووم: تەماشای باغ و گوڵشەن بۆ چییە بەو با و بارانە؟ ! خەتی هات زولفەکەی لەرزی لەسەر خاڵی سیا، گۆیا! حەبەش بۆ چین لە تێلی دا کە ڕۆم و هیندە شەڕیانە بە ناز ڕووی کردە میحرابی برۆ موژگانی دەیفەرموو: کە تۆ لوتفت هەبێ، قوربان، خەراباتیش موسوڵمانە وەفایی دەردی بێدەرمانە بەو چاوانە نازانم هیلاکی تۆیە؟ یا نە خەستەجانی دەستی پەریانە؟ ++++++++++++++++++++++ سەرناو: بادی نەورۆزی ئەوا هات گوڵوەشان و عەتربار بادی نەورۆزی ئەوا هات، گوڵوەشان و عەتربار وەک شەمیمی ڕوویی دڵبەر، وەک نەسیمی زولفی یار گوڵ قەرارێکی بە بولبول دابوو دیسان بێتە باغ زۆر نەچوو، بای وەعدە بۆی هێنا نەویدی نەوبەهار وەک شەهیدی زولف و ڕووی دڵبەر لەسەر یەک کەوتوون تا قیامەت مات و بێدەنگ و خەمۆشن لالەزار بۆی وەنەوشە و سونبوڵە سەحرا سەراسەر تۆ دەڵێی بای سەبا عەنبەر دەبارێنێ لە دەشت و کۆهسار مەیلی کردە جۆیباران سەروی گوڵروخساری من جەننەتێکی دیکەیە ئەمڕۆ کەناری جۆیبار سەر بەسەر زیکر و حەدیسی گوڵشەن و سەرو و گوڵە نەغمەیی گوڵبانگی بولبول، دەنگی قومری، سەوتی سار بوو بە مایەی سۆزی جەرگ و دوودی ئاهی عاشقان گوڵ بە ڕوویی ئاتەشین، سونبول بە زولفی تابدار باغ دەڵێی مەیخانەیە، پیری موغان گوڵ، مەیفرۆش! لالە سەرخۆش، ئەرغەوان پەیمانەکەش، نێرگس خومار گوڵ بە ناز و عیشوە خەندان، بولبولی ئاشوفتە حاڵ نەغمە پەرداز، مەست و حەیران، دڵ فیدا و جان نیسار وەسڵ و گریان قورب و هیجرانە تەریقی عاشقی فەسڵی گوڵ بۆیە لە سەرچاوان وەها ئاو دێتەخوار هەر گوڵێ ڕەنگێکی بۆنی ڕەنگ و بۆی دڵبەر دەدا ڕەنگی بێڕەنگی تەماشاکەن! بە چاوی ئیعتیبار بۆ تەنی دڵموردەگان کاری مەسیحایی دەکا سەبز و خوڕڕەم، دڵگوشا، جانبەخشە، دەشت و کۆهسار عەتری بەردا غونچەدەم، نێرگس نیگاهی کردەوە دوودی عوودی مەجمەری باغ بوو بە دەفعی چاوەزار ئەشک و ئاهی من هەتا بێ زۆرترە ئاسوودەگیم ڕاحەتی ڕۆح و دڵە، ئاب و هەوایی سازگار دەم بە دەم سەرو و سنەوبەر وا کە هەر دێن و دەچن عاشقن سەوداسەرن مەجزووبی گوڵ بێئیختیار عوشرەتی هەردوو جیهان دێنێ «وەفایی» فرسەتە گۆشەیی گوڵزار و جامی بادە و ڕوخساری یار ++++++++++++++++++++++ سەرناو: دیسان بە هەوری نیسانی دونیا ڕەنگی ژەنگاری گرت دیسان بە هەوری نیسانی دونیا ڕەنگی ژەنگاری گرت گوڵ زەرد و سوور هاتە دەرێ دەشت و سەحرا و کۆهساری گرت دیسان بە نەغمەی زیر و بەم، بولبول دەڵێ بە دەرد و غەم لە تاوی غونچەی گوڵ بەدەم، ساز و سەمتوور و تاری گرت بەو خاترەی گوڵ دەرکەوێ، بە خەندە هەستێ لە خەوێ هەوری بەهاری ناسرەوێ، شێوەی عاشق و دڵداری گرت گوڵ لە باغاندا جۆشاوە، ڕەنگ ڕەنگ سەف سەفیان کێشاوە لالە دەڵێی دڵ ئێشاوە، کەناری جۆیباری گرت سەدای سێتا لەو خوارە دێ، ئاهەنگی تارە دیارە دێ یا سەوتی قومری و سارە دێ؟ ، بەزمیان ڕووی گوڵزاری گرت بولبول هاتبوە حاڵی مردن، بەرگی غونچەی وەلا بردن تا تێر دەبێ لە ماچ کردن، خار گەردەن و بازاڕی گرت لالە سەرتاپێی خوێناوە، جەرگی بە چەند جێ سووتاوە دڵی هەروەک من شێواوە، داغی زولف و ڕووی یاری گرت هەتا نەگریم نەڕوا سەبرم، دامانی یار کەنگێ بگرم لەبەر عەمری قومری بمرم، سەروی لە نێو کەناری گرت یاران نەکەن بازی نەزەر، بەردەنە سەیدی بازیکەر زۆرم دی بازی بێخەبەر، شابازی دەوڵەت یاری گرت ڕۆژێکی پیری مەیکەدە، فەرمووی: دڵت بە هیچ مەدە ئەو دڵە پڕ لە مەفسەدە، عەکسێکی ڕووی دڵداری گرت غافڵ بووم جارێ لە نەکاو، ڕەنگی غەیرێکم کەوتە چاو قەلبی سەلیمی ناتەواو، نەخۆش بوو لێم ئازاری گرت کاری دڵم چل ڕۆزە بوو، نەک بێکاری و دەرۆزە بوو مەقسوودی من پیرۆزە بوو، ئەو ڕۆیی بووتیماری گرت ئەو نەفسی بێهەوایی من، سەرکەش بوو بێڕەزایی من جامی جیهان‏نومایی من، سەرزەدە بوو غوباری گرت لەسەر تاقی برۆی جانانە، شەیدای زولفی پەرێشانە سەوداسەر ئەو دڵ دێوانە، قیبلەی بەردا زونناری گرت پیری من و دۆستی خودای، ڕۆحم فیدای شەرت و وەفای دیسان لەبەر نووری زیای، هەردوو دونیا ئەنواری گرت لەو سەهبایە ڕۆحی دڵە، ئارەقی ڕووی بەرگی گوڵە زانی دڵم بێحاسڵە، دەستی دڵی بیماری گرت لە سایەی ڕۆژی هیممەتی، «وەفایی» بوو بە جەننەتی نەخلی سنەوبەر سوورەتی، بار بار بەری گوڵناری گرت ++++++++++++++++++++++ سەرناو: ئەو چاوانەی وا خوماری نازن ئەو چاوانەی وا خوماری نازن بە ئیما ئیمانم لێ دەخوازن هاتەدەر وەک ڕۆژ شای شەکەر لێوان غەمزەکە و ڕەمزەی تورکی پێشتازن دەستی هێنادەر پێی لە سەما دا چاومەستی چاوبەستن یا سیحربازن؟ زوهرەی یەغما کرد موشتەری کێشا خرینگەی خڕخاڵ، جرینگەی بازن نەوبەهار نۆبەی شکۆفە و گوڵن یا غونچەی دوگمەی سینەکەی وازن؟ بە نەسیم دەپشکووت باغچۆڵەی سێوان یا بە ئاهی من دوگمە دەترازن نازانم بۆچ وا ڕۆح و دڵ کەوتوون غەرقی خوێناون جێی داغ و گازن؟ ! یا کوشتەی غەمزەی ئەو دوو چاوانەن یا ڕەنجەی پەنجەی شەهێن و بازن؟ سیڕڕی زاری تۆ من بە کەس ناڵێم ڕەنگی زەرد ئەشکی ئاڵ، هەردوو غەممازن ئەوانەی عاشقن بە چاو و زارت تا ئەبەد سەرخۆش مەحرەمی ڕازن موتریبان، موقریبان دەم بەدەم گۆیان بولبولان، قومرییان نەغمە پەردازن دڵ دەناڵێنێ ڕۆح لە شیوەندا قودسیان ئینسییان چەند خۆش ئاوازن؟ دەنگی من، سەوتی تۆ، بۆ بەزمی خوسرەو چەنگ و نەی، عوود و دەف، تار و شەهنازن ئەمن و تۆین بۆ ڕوخ و گەنجی پەنهانی تەلیسم و تەوق و گوڵبرین و بازن کەمەندی ئاسکان، هاتوچۆی بازان هەموو بۆ خاتر چاوەکەی بازن قەفەسی بەدەنم تەنگ و تاریکە بازی دڵ و مورغی جان، هەر دوو پەروازن وەفایی ناژی بە تاری زولفت سەرتا پای ئازای مارانگازن ++++++++++++++++++++++ سەرناو: هێند نەخۆشی دەردی دووریم وەختە گیان و دڵ دەرێ هێند نەخۆشی دەردی دووریم وەختە گیان و دڵ دەرێ ئاخ نەسیمی سوبحدەم کوا عەرز و حاڵی من بەرێ؟ ! دەردەدارم، بێزبانم، بێدڵم، سەوداسەرم ئاخ لە بۆ دڵ میهرەبانێ، هەم زبان و هەم سەرێ کەس لە حاڵی سۆز و گریانی من ئاگادار نییە ئاخ لە بۆ یەک حاڵزانێ دڵ پڕ ئاو و ئاورێ لەحزەیەک یادی خودا ناکا لەبەر عەیشی جیهان نەفسی کافر وا دەزانێ قەت جیهان ڕانابرێ من بە دڵ، زولفت بەسەر، کەوتووینە بەر پێی ڕەحمەتت ئەی ئومێدی موئمین و کافر بە حاڵم نەززەرێ بێشەکەرخەندەی دەمت وەسڵی ڕوخت مومکین نییە جەننەتم نابێ هەتا نەمشۆن بە ئاوی کەوسەرێ پێم بڵێ وەجهی چییە زولفت موقیمی ڕوومەتە؟ خۆ بە شەرعی موستەفا جەننەت بە کافر نادرێ! با ئەدی بەس بێ جەفا بەو چاوە بیمارەت بڵێ یا دەوای دەردم کەرەم کا، یا لە دەردم هەڵگرێ؟ کردمێ مەجنوونی دەر و دەشتان و فەرهادی زەمان شۆخ و سەلماڕەنگ، لەیلادەنگ و شیرین شەککەرێ کردمیە ئەفسانەی هەموو بازاڕ و شاران عاقیبەت ڕوو بە خاڵ، گەردەن مەراڵ، چاو کاڵ و گێسوو عەنبەرێ مەنعی ناڵینم مەکەن یاران لە دەست موژگانی یار زۆر بە ئێش و دەردە ڕێشی جێگە نێشی نەشتەرێ زەحمەتی بێهوودە تاکەی؟ ئەی تەبیبی میهرەبان دەردی من دەردێکە بێدەرمانە چارەی ناکرێ سۆزی جەرگی من بە گریان وا بە باڵای هەڵچووە گەر هەزار تۆفانی نووح بێ ئاوری من دانامرێ دەست و دامان بووم، گوڵێکی مەزهەری تۆم بوو کوتی: عیززەتی حوسن و جەماڵم شەوکەتێ هەڵناگرێ دوودی ئاهم سۆزی جەرگم وا کە هەر باڵا دەچێ شەو نییە ئاسمان کە نەگرێ چاکە ئاور ناگرێ ڕووی وەدەرنا تا بە تا زولفی دڵاوێزی بزووت ئاه و ناڵەی عاشقان هات بوو بە ڕۆژی مەحشەرێ ماچی سەر تاپای کە دای فەرمووی: وەفایی من دەڕۆم ئەو دەمەت ماوە لە عومرت هەستە با خۆش ڕابرێ ++++++++++++++++++++++ سەرناو: ئەی غارەتی هۆش و خیرەدم نەرگسی کاڵت ئەی غارەتی هۆش و خیرەدم نەرگسی کاڵت ڕۆشنگەری ئاوێنەیی دڵ عەکسی جەماڵت حاشا مەکە قوربان لە کوژاوی خەت و خاڵت ئیسباتی شەهیدیم ئەوەتا پەنجەیی ئاڵت دەستم کە نەگەییێ بەسە بەو گەردنە خینم وەک زولفی ڕەش و نەرگسەکەی فیتنەگەری تۆ سەرمەستم و سەوداسەرم و دەربەدەری تۆ گەر دین بووە گەر دڵ بووە قوربان بە سەری تۆ ئێستاکە لە سایەی سەری زولف و نەزەری تۆ گەردەنکەچی زوننارم و مەیخانەنشینم ڕۆژ عاریزی تۆ ئاگری بەردامە هەناوان شەو پەرچەمی تۆ دووکەڵی ئاویتمە چاوان بەندبەندی دەروونم هەموو سووتاوە لە تاوان ناڵەم وەکوو نەی دێ لە خەمی حەڵقە و داوان لەو شیوە وەرن گوێ بدەنە شیوەن و شینم زولفت کە لەسەر عاریزی تۆ خۆش حەرەکاتن گۆیا سەحەری عید و شەوی قەدر و بەراتن دایم دەگەڕێن تەشنەیی خوێنی شوهەداتن دوو سەف لە فەڕەنگی لە تەرەف ڕۆمەوە هاتن بردیان بە ئەسیری دڵەکەی زار و حەزینم وەک کافرێ تینوو بێ بە خوێنی سەری ئیسلام وەک تورکێ لە دین وەربگەڕێ مەست و مەی ئاشام چاوت بە کەمان مۆرەیی ئەبرۆیی سیەه فام تیرێکی وەها سەختی لە موهرەی جگەری دام تا ڕۆژی حەشر هەر دەتکێ خوێن لە برینم چ بکەم وەکوو قومری کە نەیێ ئاه و فوغانم پڕخوێنە وەکوو نافە دڵی بەستەزوبانم هەر لەحزە بە نازێکی دەکا غارەتی جانم ڕادەبرێ بە بای عیشوە، دەڵێ: سەروی ڕەوانم دەنواڕێ بە تای زولفی، دەڵێ ئاهووی چینم سینەم هەموو سووتاوە لە تاو ئاوری سینا دیدەم هەموو پڕخوێنە لەبەر چەشمەیی مینا ئەو دەردە وەفایی کە لە چاوی گوڵم هێنا موشکل کە شیفام بێ بە هەزار بووعەلی سینا جارێکی مەگەر بێ بە دڵی خۆمی ببینم ++++++++++++++++++++++ سەرناو: فەرمووتە کە من پادشەهی حوسنی دڵارام فەرمووتە کە من پادشەهی حوسنی دڵارام خورشید و مەهن ئایینەداری ڕوخی زیبام فیردەوسە جەمالم بە نیهالی قەدی تووبام یەعنی بە دوو لەب ساحەبی ئیعجازی مەسیحام ماچێکی دەمم کافییە بۆ کوشتەیی باڵام فنجانی دەمت ساغەرە یا قووتی ڕەوانە؟ وەک نەشئی حەیاتی دڵە یاقووتی ڕەوانە! ئەو چاوە تەبیب و بەڵەدی دەردی دڵانە عیللەت چییە بۆ من کە حەکیمێکی نەزانە؟ جێی نەشتەری وی ئاگری بەردا دڵ و سووتام ئەگریجە و پەرچەم مەدەدی نێرگسی کاڵن فەوجی حەبەشن، لەشکری سوڵتانی جەماڵن ئارایشی ڕوو و ڕەونەقی باغی خەت و خاڵن هەر یێکە لەلایێ بە ئومێدی سەر و ماڵن بەو داوی ئەوی بەستەیە خۆم و دڵی شەیدام من سایلی ئاشوفتەگیی زولفی دوتا بووم تێک چوو کە ئەمن عەنبەری تەڕ، میشکی خەتا بووم من هەم نەفەس و هەمدەمی شازادە و شا بووم تا دیم گوڵی تۆ عاشقی ئەندامی بەڵا بووم سەرگەشتە ئەوێستا کە لە دووی گوڵبونی باڵام ئەبرۆ و جەبین و ڕوخی بێ شیبه و میسالن تێکەڵ بە گوڵ و یاسەمەن و غەرقی لوئالن بۆ موڵکی جەماڵی کە شەهەنشاهی جەلالن یا شەمس و قەمەر، قەوس و قەزەح، بەدر و هیلالن وا جوملە هەڵاتوون لە گەریبانی گوڵەندام خەت هاتووە دەوری لەب و ڕووی داوە لە سەردا یاخۆ حەبەشی فایەقە داغی لە جگەر دا؟ گوڵزاری دەمی پوستە و باغی گوڵی بەردا یا لەشکری کێشاوە بە زێی شیر و شەکەردا؟ شەڕیانە لەسەر کەعبەیی ڕوو کافر و ئیسلام ئەی میشکی خەتایی خەت و خەت جەوهەری کوڵمت ئەی سونبولی تەڕ دووکەڵی سەر مەجمەری کوڵمت سووتاوە وەفایی لە هەوای ئاگری کوڵمت سا ئەو دەمە وا بێنە ئەتۆ بی و سەری کوڵمت غەیری ئەوە –بیللا– نییە لەو لێوە تەمەننام ++++++++++++++++++++++ سەرناو: لە ژێر زولفی سیا ڕووی خستە دەر چاوی لە دونیا کرد لە ژێر زولفی سیا ڕووی خستە دەر چاوی لە دونیا کرد شەوی دی، سوبحدەم گۆیا، دەری مەیخانەیان وا کرد بە ئاب و ڕەنگ و ڕوو حۆری، بە زولف و کاکوڵی غیلمان گوڵاویان دا لە مەیخانە، غوباریان عەنبەرئاسا کرد بە ڕەنگی چاوی خۆی ساقی لەبالەب جامی مەی گێڕا بە تەرزی زولفی خۆی موتریب دەمادەم چەنگ و نەی چاکرد خەرامان شاهی خووبان هات، هیلاکی دین و ئیمان هات بە زولف و ڕوویی تابان هات، کە کوفر و دینی یەغما کرد لە جیلوەی قامەتی بەرزی، لە عیشوەی زولفی سەد تەرزی زەمین و ئاسمان لەرزی، سوجوودی ڕووی دڵارا کرد شەکەرخەندەی گوڵی زاری، دڵی هێنامە هۆشیاری مەگەر گوڵقەندی لێ باری، کەوا بیماری ئیحیا کرد هەزار تا زولفی وەک سازێک، بە ناز بوو نەغمە پەردازێک کە هەر سازە بە ئاوازێک، دوو دونیای پڕ لە غەوغا کرد لە عەکسی شۆخ و شەنگێکە، جیهان گوڵ گوڵ بە چەنگێکە هەر ئەوراقی لە ڕەنگێکە، بەیانی حوسنی یەکتا کرد وەنەوشە و گوڵ لە باغان بوو، لە باغان شەو چراغان بوو مەگەر دارووی نەساغان بوو، بە ڕوودا زولفی تاتاکرد لە تاتا زولفی شەوکاری، درەخشا نووری ڕوخساری لە هەر حەڵقێکی سەد تاری، هەزار خورشیدی بەرپا کرد غورووری حوسنی خۆی وا بوو، دەمی پڕ خەندە کرد و چوو کە بۆ خۆی ڕازی خۆی فەرموو، «وەفایی» بۆچی ڕیسواکرد؟ هەوا بۆنێکی چینی پەرچەمی کرد و وەکێوان کەوت سەبا عەترێکی غونچەی زاری هێنا و ڕووی لە سەحرا کرد نیشانێکی لە ئەنواری جەماڵی خۆی بە شەم بەخشی سەراسەر جانی پەروانەی «پُر از» سووتان و سەودا کرد نەسیمێکی لە باغی حوسنی خۆی هێنا بە گوڵدا دا سەراپا بولبولی زاری «پر از» ناڵە و تەمەننا کرد کەمان ئەبرۆیی پەیوەستی، بە غەمزەی چاوەکەی مەستی کە دای تیرێکی سەردەستی، لە جیسم و جانی ئاوا کرد مەگەر موژگانی نەشتەر بوو، حەکیمی چاوی دڵبەر بوو کە خوێنی دڵمی پێ دەربوو، نەخۆشی خۆی موداوا کرد کوتم: ئەی شۆخی چاومەستم، خەراب و عاشق و مەستم بە ڕەحمەت بگرە ها دەستم، خوماری ئاشکارا کرد دڵی دا دڵ شکستی خۆی، هەڵستا هات بە دەستی خۆی بە جامێکی ئەلەستی خۆی، «وەفایی» شێت و شەیدا کرد ++++++++++++++++++++++ سەرناو: ئەی إمام المرسلین، شمس الهدی، بحر الهمم ئەی إمام المرسلین، شمس الهدی، بحر الهمم ئەی شفیع المذنبین، خیر الوری، مولی النعم ئەی نەسیمێکی گوڵی زار و شوعاعێکی ڕوخت شەوقی ڕۆژ و بەدری تابان عەتری گوڵزاری ئیرەم ئەی لە شەوقی جەننەتی ڕووت ئەنبیا و ئەولیا ڕۆح لەسەر لێون وەکوو پەروانە بۆ دیداری شەم ئەی دەم و خەندەت دەلیلی دەعویی بوون و نەبوون ئەی برۆ و باڵات بەیانی مەعنیی نوون و قەلەم ئاسمان پیر بوو لە داغی خەتی ڕووی تۆ ڕۆژ و شەو سەد چرای هەڵکرد و نەیبوو وا سەوادی یەک ڕەقەم تۆ بیی و تەشریفی لولا و سیڕڕی مازاغ البصر تۆ و مەقامی لی مع الله، تۆ بیی و نووری قیدەم بێنەوام هیچم نییە هاتووم و مەحروومم مەکە قەت لە دەرگای خۆی گەدا ناکاتەدەر ساحیب کەرەم هیچ تەبیبێ ڕێی نییە دەردی دەروونم کا دەوا ئەمڕۆ گەر چارەم نەکەی وا حسرتا یوم الندم هاتمە بەر ئەبرۆت و ناسووتێم لە سایەی خەتتی ڕووت ئایەتە: «چی داخڵی کەعبەی بوو نایبێ ترس و غەم» دەست و دامانی خەمی گێسوویی تۆم لەو عاریزە نائومێد نابم کە من دەستم لە حەلقەی کەعبە دەم من چلۆن مەحرووم ببم ئەی رحمة للعالمین دێ سەدای لا تقنطوا من رحمة الله دەم بە دەم هات نەسیمی خاکی دەرگات ئاوری دڵ دامرا ذقت من ماء الحیاة شابنی بعد الهرم چاوەکانت سەرخوشن، قوربان، کوتم: مایل بە چین؟ عەکسی زولفی خستە سەر حەرفی مودەووەر یانی: دەم کەوتمە خاکی دەرکی هاتن بمکوژن خۆش بەو دەمە قال رب البیت: هان! لا تقتلوا صید الحرم تەوقی ئەبرۆی، شەوقی ڕووی، خستمیە ناو زولف و کوتی: کەعبە و ڕۆژی موناجاتە و مەقامی مولتەزەم یا رسول الله دەزانی تۆ کە شەیتانە عەدووت هەم لە تۆ مەعلوومە ئەمنیش ئوممەتی تۆم هەرچی هەم کەی ڕەوایە و غیرەتە بۆ تۆ کە فەخرولئەنبیای دوژمنی خۆت شاد بفەرمووی، ئوممەتی خۆت دڵ بەغەم داغی تۆم هەر پێوەیە سەد جار دەرم کەی دێمەوە من غولامی تۆم وەفاییم ڕوو لە دەرگای کێ دەکەم؟ ++++++++++++++++++++++ سەرناو: لەبەر نازی چاوبازان خورد و خەوم خوێناوە لەبەر نازی چاوبازان خورد و خەوم خوێناوە بە تیری تیرەندازان چ بکەم جەرگم بڕاوە؟ ! شێت و شەیدا و سەحرایی، دەگریم هەروەک وەفایی چ بکەم لە دڵەی سەودایی، پەرییان دەستیان لێداوە؟ لە سەر تاقی دوو ئەبرۆت مەیلی زولفان دەمکێشێ خۆ وەختە من کافر بم، چ بکەم قیبلەم گۆڕاوە عیشوەی ڕووی تۆ هەر خۆش بێ، موشکل گوشا و سەرخۆش بێ بزووت بادی نەورۆزی، گرێی زولفت کراوە ئەی ئاوێنەی دڵبەری، زارت گوڵ زولفت زەڕی با هەناسەم نەتگرێ، ڕووی خۆت بێنە بەم لاوە زولفت جێی بێقەراران، ڕووت ڕۆژی شەوبێداران ئەمان ئەی شای گوڵزاران، ڕوحمێک تا ڕۆحم ماوە بەس عومری من بە بادە، ڕووت بێنە زولفت لادە دڵ بۆیە نامورادە، بەو شەوە ڕۆژ گیراوە با شەو بڕوا سەحەر بێ، باغی گوڵان وەبەر بێ گەر تۆ مەیلت لە سەر بێ، کافر ئیسلامی ناوە دەستم لە تای زولفت دا بەم باڵایە نەمزانی بۆچ دەمکوژی خۆ قوربان پردی قیامەت نەپساوە؟ لەبەر چاوت نەمزانی، بێ باغەبان گوڵچینم مەست بووم هۆشم لێ نەبوو، دەمم بۆ ڕووت هێناوە هاتم بە بۆنەی خاڵت، تووشی داوی زولفت بووم تەیرێکی نابەڵەد بووم نەمزانی دانە و داوە ئەمڕۆ سەبای مورادان کاسی کردم نەمزانی: نە عەتری نافەی چینە، نە بۆنی زولفی خاوە؟ لە سایەی چاوەکانت بوومە ڕەندی خەرابات لەلای پیری مەیخانە خەرقەم لە گرەو مەی ناوە تو خودا دڵم مەشکێنە، با بزانم ڕووت وا بێنە ڕووتە یان گوڵ هەنارە؟ لێوتە یان شەکری خاوە؟ وەقتێ ئارەق دەڕێژێ بۆ کوشتنی وەفایی بە گوڵی کوڵمی سوێند دەخۆم گەردن شووشەی گوڵاوە لە دەردی بێ دەرمانی، کەوتوومە سەرگەردانی بە جوابی لن ترانی چ بکەم ڕۆحم سووتاوە قەیتانی دوو لێوانت بەندی جەرگی پساندم کوفرت لەلام زاهیرە ڕوحمت لەلا نەماوە سڵاوم کرد لە یارم، بە دڵێکی غەمگینەوە بە لەفزێکی زۆر شیرین جوابی سڵاوی داوە ++++++++++++++++++++++ سەرناو: دڵ دەناڵێ دەم بەدەم سووتاوی تاوی فیرقەتە دڵ دەناڵێ دەم بەدەم سووتاوی تاوی فیرقەتە بولبولە بۆ ڕوویی گوڵ دڵ پڕ لە داخ و حەسرەتە چاو پڕ ئاو و دڵ پڕ ئاور، دڵ بە دولبەر چاوەڕێ ئەی خودا دەردی جودایی چەند گران و زەحمەتە ڕۆح لەسەر لێو چاوەڕێتم ئەی تەجەللای نووری توور هێندە جارێک خۆت بە دڵ بنوێنە، مەرگم حەسرەتە ڕەمز و غەمزەی یەک نیگاهت قەلبی کون کون کردووم بوومە جێی دەسڕێژی تورکان؛ بۆیە جەرگم لەت لەتە! داغداری ئەلفی باڵات با لە ڕووت مەحرووم نەبێ من کەفیلی وەسڵی جەننەت هەرچی ئەهلی وەحدەتە زولفی لەرزاند کەوتە سەر ڕوو شادمان فەوجی دڵان قەت لە دۆزەخدا ئەبەد نین، جەننەتین ئەو ئوممەتە قەت چ دەرگای وا نییە عالی بە شەرتێ بچمەوە با هەزار جورم و خەتا، باز یار! لەسەر ڕووی ڕەحمەتە چاوی بازی کوشتمی، خەندەی بە ناز هێنامیەوە سەد کە بیمار و نەخۆش بێ، پێکەنینم شەربەتە با حیجابێکم نەمێنێ لادە تاری زولفەکان تا بەکەی دڵ نامورادی وەحدەتە لەو کەسرەتە گوڵ بە دەم بادی سەباوە پێکەنی، خۆش بوو جیهان؟ یا لە تەئسیری هەناسەم عەتری بەرقی خەندەتە؟ چاوەکەت با این که خەت هات و بە من ڕوحمی نەکرد ئارێ ئارێ! مەردومی نەوکیسە هەر دوون هیممەتە من پەرێشانم لەبەر زولفت بە ڕوودا کەوتووم زولف و ڕووی تۆ سونبول و گوڵ، یا کە نوور و زوڵمەتە؟ ئەو بوتەی سەوداسەری کردووم بە زولفی بێمیسال چاو غەزال، باڵا نیهال، ئەبرۆ هیلال، گوڵ وەجنەتە ئەو گوڵەی شەیدا دڵی کردووم بە لێوی شەککەرین عەنبەرین موو، نەستەرەن بۆ، لالە ڕوو، مەه جەبهەتە بۆ ڕوخی تۆ ڕوو بە ئەبرۆ وەک موژەت دەستەو دوعام ئەی چرای میحرابی ئەهلی قیبلە ڕۆژی ڕەحمەتە بۆ جەمالی تۆ منیش وەک زولفی سەرگەردانی تۆم ئەی چرای ئیسلام و کافر وەقتی مەردی و مەروەتە مردم و نەمزانی ئەو ئاورەی منی سووتاند چ بوو حاسڵی سەیر و سلووکی عاشقان هەر حەیرەتە مردم و هەرگیز نەگەیمە قیبلەیی تاقی برۆت ئاخر ئەی قیبلەی مورادان تا بەکەی ئەم حەسرەتە؟ یار ئەوا بەیعی ویساڵی ڕووی لەگەڵ تۆ کردووە جەننەتی داوە بە ڕۆح، نامەرد وەفایی فورسەتە! ++++++++++++++++++++++ سەرناو: ئەرێ ئەی بە زولف و ڕوخسار سەنەمی چین ماهی تابم ئەرێ ئەی بە زولف و ڕوخسار سەنەمی چین ماهی تابم دەمەکە و خەندەکە و نیگاهت نمەک و مەزەی شەرابم من لەبەر نیگاهت بمرم، تۆ سەری غەمزەکەی جەلابم بڵێ پێم گوڵەکەی بەهاری لە تۆ تا بە کەی جودا بم؟ وەرەوە، بە شەرتی جاران، ڕۆژی سەد جارت فیدا بم لە وێرانەی دڵی شێواوم شیوەن و واوەیلایە و ڕۆڕۆ ئاورێک بەربۆتە هەناوم دێتە دەر لە هەناسەم بۆ سۆ بوومە ئەفسانەی وڵاتان: شار بە شار، ماڵ بە ماڵ، کۆ بە کۆ خاڵی چاوت، گۆشەی ئەبرۆ، دوو دینیان کردم لەسەر تۆ یا بمکە پیری مەیخانە، یا موریدی خانەقا بم تۆ مەلەک و فریشتە و پەری، گوڵدەم و گوڵبەر و دڵبەری لالەڕەنگ و فەڕەنگی چینی، شۆخ و شەنگی، خەتا و بەڕبەڕی نازک و نازەنین و شیرین، ئاوێنەڕۆژ، ڕەنگ ئاگری لەنێو مەنزەرەی دوودەری خۆشە سەیری مەوجی بەحری وەرە سەر چاوم عەزیزم، چی دەکەی لە دڵەی کەبابم؟ ئەو شۆخە بە تای زولفانی زنجیری کردم دێوانە ڕووحمە، ڕووحی کێشاوم! ڕووح نییە لە ڕووح بێگانە ئاشکار و دیار و مەخفی، دوور نییە، نەزدیکە جیرانە غەرەزم چونکە پەنهانە وەڕەزم لەو جیسم و جانە مەرەزم مەرگی دەرمانە، هەر ئەزم بۆ خۆم حیجابم عاشق وا دەبێ، بە هەموو دەم چاو پڕ ئاو، دڵ بڕاو و مەحزوون پێی هەوای بشکێ، پێی نەمێنێ غەیری هوو لە دەروون و بیروون خاکی ڕێی دڵبەری وە بزانێ سورمەیە بۆ چاوی پڕخوون سەگەکەی ڕێبازی لەیلێ وەرە سەر دوو چاوی مەجنوون دونیام ئەو ڕۆژە لێ ڕوونە خاکی بەرپێی ئاشنا بم ڕووحەکەم ڕووی خۆت بنوێنە، تا بە کەی کوشتەی نازت بم؟ دەمەکەت بە تەکەللوم بێنە، تا نەمردووم هەمڕازت بم جارێک بە کەرەم بمدوێنە من فدای دەنگ و ئاوازت بم مەیلی ئەبرۆی تۆ قەد نانێم غەمزەدەی چاوەکەی بازت بم من کە هات و قیبلەم گۆڕی، یا خوا کافر بێ جەلابم! بەزەییت ئەر هەبێ یا نەبێ بەندەی باڵاتم، سەد شا بم تۆ خودا دڵم مەشکێنە من کە وا عاشقێکی چا بم سەرەکەم فیدات عەزیزم وەرە زیز مەبە لە سەر دڵ سەرە پایەبەندی تۆیە، دڵە ماڵی خۆت هەتا بم بە کەمەندی تۆوە بمرم خۆشترە نەوەک ڕەها بم کوتم ئەی شای دڵنەوازان مانگ و ڕۆژن موشتەریی ڕووت دڵی چاکی پاکی بازان پێ بە داوی زولفی جادووت لە غەمی ویساڵی ڕووی تۆ جگەر و هەناوی من سووت خۆش بوو ئەو دەمەی گوڵ پشکووت شەکەر دەباری لە یاقووت لادە لێم وەفایی دەیکوت: تۆ گەدا من شا بۆت نابم ++++++++++++++++++++++ سەرناو: ئەو دڵبەرە وا بادە بە چاوان دەفرۆشێ ئەو دڵبەرە وا بادە بە چاوان دەفرۆشێ هەردەم بە تەبەسسوم لەبی خەندان دەفرۆشێ بۆ شەهد و شەکەر حوققەیی مەرجان دەفرۆشێ ئەو غەمزە کە چاوی بە شەهیدان دەفرۆشێ چی زاهیدە ئەو زوو دڵ و ئیمان دەفرۆشێ یاقووتی لەبی لەعلی کە وا قووتی ڕەوانە ڕوو باغی گوڵ و دەم گوڵ و قەد سەروی ڕەوانە موژگانی کەچی قاتیلی سەد قافڵە جانە تا پێنەکەنی زولفی نەدا بەردەمی شانە نەمزانی کە گوڵ شەککەر و ڕەیحان دەفرۆشێ قەترەی عەرەقی نافە لەسەر لەعلی درەخشان یا میشکە لە گۆشەی وەرەقی گوڵ بووە ئەفشان؟ داغی دڵە یاخۆ، بە سەری زولفە پەرێشان خاڵی دەمی تۆ زەنگییە کەوتۆتە بەدەخشان؟ یاخۆ خزرە چەشمەیی حەیوان دەفرۆشێ تاتا کە بە داو زولفی وەکوو سونبولی بادا گوڵدەستەیی شەوبۆ بوو بە بەرگی گوڵیدا دا شەوبۆیی گوڵ و نافە لە دەم بادی سەبادا شێخم بە هەوای زولف و دڵ و دینی بە با دا وەجهی چییە بەو کوفرە کە ئیمان دەفرۆشێ گەر تالیبی ماچێکی ئەتۆ لەو دەمە قەندەی بەو زولفە دەبێ هەر وەکوو من خۆت لە ڕەسەن دەی شاهەنشاهی میسر و حەبەشە کێ بووە بەندەی چاوێکی بە گریانی دەوێ تالیبی خەندەی مەعلوومە کە گوڵ خەندە بە باران دەفرۆشێ جیلوەی مەیی ئەو ساغیرە نەشئێکی نەدامێ ساقی وەرە لەو لێوە، بە چاوت، بدە جامێ کوشتەم بە خەت و خاڵ و ڕوخی تازە نەمامێ من تالیبم ئەی بادی سەبا بێنە پەیامێ لەو لێوە کە ماچی بە دڵ و جان دەفرۆشێ تا دوێنێ ئەمن وەسڵی ڕوخ و زولف و دەمم بوو باغی ئیرەم و عومری خزر، جامی جەمم بوو ئەمڕۆکە جوداییم لە غەزاڵەی حەرەمم بوو بەو سەعیە لەسەر قیبلە سەفا عەینی غەمم بوو چاوم بە دوو جێ زەمزەمی گریان دەفرۆشێ مەهڕوو بە خەتا نافەیی چین میشکی خەتایی دیم هاتە سەفی گوڵ بە هەوای عەترنومایی تەفزیلی گوڵم دا هەموو یەعنی بە ڕیایی بۆ ماچی دەمی شاهیدی دڵبەر بوو وەفایی شێخم کە بە هیچ و نەبوو ئیمان دەفرۆشێ ++++++++++++++++++++++ سەرناو: سەحەر مەستانە ڕابوردم بە بەر دەرکی کلیسایێ سەحەر مەستانە ڕابوردم بە بەر دەرکی کلیسایێ کەچی دەستی دڵی گرتم خەرامان بەچچە تەرسایێ ئیرەم بوو عەنبەری زولفی، ئەسیری چەنبەری زولفی کەراماتی سەری زولفی بە هەر تایێ مەسیحایێ بە دوو زولفی موژەی هەستان، لەسەر موڵکی دڵم وەستان نیزامی چین و تورکستان ڕژان بەربوونە یەغمایێ نیگاری دڵستانی من، خوماری دا بە جانی من تەبیبی حاڵزانی من، نەخۆش بوو، شەربەتی دایێ ئیشارێکی بە چاوان کرد، برۆی هەمباشی تورکان کرد دڵمیان تیرەباران کرد کەمانداران لە هەرلایێ سەبا زولفی پەرێشان کرد بە ڕوخساری عەرەقناکی چە شیرینە لەگەڵ یەکدی مەه و پەروین کە شەو دایێ! پەرێشان زولفی زونناری، درەخشان ڕوویی گوڵناری لە زاری گوڵ شەکەر باری، کە ئەی مەجنوونی لەیلایێ! وەرە بڕوانە مەیخانە، چ مەعموورە چ وێرانە! لە هەرلایێ دڵئارایێ، لە هەر گۆشێکی شەیدایێ! کە دەستم داوەری دڵ بوو، نە دڵ بوو گوڵشەنی گوڵ بوو هەموو نەسرین و سونبول بوو، قەرەنفول نەخلی تووبایێ لە جێگایی تەجەللا دەم بە دەم بێ لن ترانی بێ بە قوربانی دڵی عاشق هەزار وەک تووری سینایێ سروشکم هاتە خوارێ، دوور لە چاو و گەردنی ساقی بەسەر حەوز و فوارەی عاشقان ئاخ جام و مینایێ جەماڵی موتریبم کەوتۆتە یاد کوا نەغمەکەی تاری هەوای خورشید ئەوا سووتاندمی، ئاخ بۆ کزەی بایێ! موغەننی کوانێ ئاهەنگی حیجاز و بەربەت و چەنگی؟ سێتای موتریب سەدای بۆ کەوت؟ لەبەرچی دەنگی نەی نایێ؟ بە لەهجەی دەنگ و ئاوازت، بە شوعلەی زەخمەکەی سازت مەداری ئاو و ئاور بووم، ئەمان موتریب مودارایێ بە شەوقی ئاتەشی ڕووی تۆ، بە بادەی چاوی جادووی تۆ سەراپا بوومە کۆی ئاور، ئەمان ساقی سەراپایێ لەبەر تاوی جەماڵی عالەمی مومکین بوو ئارامم دەسووتام ئەز ئەگەر سایەی سەری زولفی نەبوویایێ بە گریانی دڵی من هاتە ڕەحم و پێکەنی فەرمووی مەحاڵ بوو خەندەیی ساغر ئەگەر مینا نەگریایێ ئەمان شۆخی خەراباتی! کە بۆ دین و دڵ ئافاتی بفەرموو بۆچ کەتۆ هاتی لە من دەنگ و سەدا نایێ! بە ئاب و تابی ڕوخسارت وەفایی وا مەسووتێنە خودا ڕا! ئەی چراغی دیدە! بۆ پەروانە پەروایێ وەفایی ماوە دەست بەردان، لە دەوری نوقتە سەرگەردان ئەمان یا قوتبی ڕەببانی، مەدەد یا شای بوخارایێ! ++++++++++++++++++++++ سەرناو: نەسیمی بادی نەورۆزی شەمیمی عەبهەری هێنا نەسیمی بادی نەورۆزی شەمیمی عەبهەری هێنا بەریدی عاشقان دیسان پەیامی دڵبەری هێنا نەوید، ئەی عاشقانی دڵفگار! یار هاتە سەر خەندە سەڵا، ئەی بولبولان! دیسان درەختی گوڵ بەری هێنا مەگەر ڕێی کەوتە زولف و ڕووی حەبیبم بادی نەورۆزی؟ حەیاتێکی بە دنیا دا و بۆی گوڵعەنبەری هێنا بە فەتحی دڵ دەڵێی یار زولف و سینە و ڕووی وەدەرناوە لە نەسرین و گوڵ و سونبوڵ بەهار هات لەشکەری هێنا دەڵێی چاوی منە هەوری بەهاری دەم بە دەم دەگری دەڵێی ئاهی منە بەرقی درەخشان ئاوری هێنا هەوا چوو پڕ بە دامانی دەر و دەشتان، گوڵی کێشا سەبا هات پڕ بە جەیبی کۆهساران، عەنبەری هێنا لە نێو بەزمی وەنەوشە و جۆکەناران، لالە پەیدا بوو بە تاریکی خزر بۆ چەشمە شای ئەسکەندەری هێنا کە ئیسلامی بەهار فتوای جیهادی کافری دەی دا سنەوبەر نێزە، گوڵبون گورز و سۆسەن خەنجەری هێنا نیسارئەفشان بە پایەندازی سوڵتانی بەهار هاتن سەمەن دیبا، شەقایق ئەتڵەس و گوڵ مەخمەری هێنا لە شایی دارە، گوڵ مەسنەدنشین بوو هاتە پشکووتن چەمەن تەختی زوموڕڕود، گوڵ لە یاقووت ئەفسەری هێنا لە بەزمی نێرگس و نەسرین بە دەفعی چاوەزاری گوڵ وەنەوشە دەستە دەستە عوود و، لالە مەجمەری هێنا لە مەیخانەی چەمەن بەزم و تەرەبیان گرت قەدەحنۆشان شەقایق بادە، زەنبەق شیشە، نێرگس ساغەری هێنا لە چەهچەی ساز و نەغمەی عەندەلیبان سووت هەموو دونیا سەدایی تارزەن، ئاوازی خۆشخوان، ئاوری هێنا حیکایاتی غەریبی پێیە بولبول جوملە خۆکردی دەڵێی چاپاری ئێران ڕۆژنامەی ئەختەری هێنا بە شەوقی ڕوویی لالە و گوڵ لە باغان وا چراغانە دەڵێی باغی جینان ئەمساڵ بەری حۆر و پەری هێنا لە گوڵشەندا ڕەیاحین مەست و شادابی هەوای خۆشن دەڵێی ڕیزوانە بۆ ئەهلی بەهەشتی کەوسەری هێنا شکۆفە و گوڵ بە خەندە و عیشوە ئارامی دەروونیان دا بەهار بۆ خەستەکانی خۆی چ شیر و شەککەری هێنا؟ بە زەرد و سوورەوە خەمڵیوە بۆ دامادی بولبول هات وەرەق میعجەر، ئەرز گوڵگوونە، شەونم زێوەری هێنا هەموو کەس چاوەڕوونی لێک ‏دەکەن وەک سورمەیان دیبێ مەگەر بادی سەبا خاکی گوزاری دڵبەری هێنا چ دڵبەر؟ ئافتابی ماهڕوویان و شەکەرلێوان! بە خەندێکی لە سەحرا گوڵ لە دەریا گەوهەری هێنا بە بێ شاباشی سەر، بە قسەی وەفایی گوڵچرا نابێ کە بولبول هەر زمانی هەن، وە پەروانەش سەری هێنا ++++++++++++++++++++++ سەرناو: یا ڕەسوولەڵڵا دەخیلەک ڕووم نییە بێمە حوزوور یا ڕەسوولەڵڵا دەخیلەک ڕووم نییە بێمە حوزوور وەک دزان گەردەنکەچ و شەرمەندە وێستاوم لە دوور گەرچی سەرمایەم نییە خۆ موستەحەققی ڕەحمەتە ڕەنگی زەرد و ڕوویی ڕەش، موویی سپی و فرمێسکی سوور وەک لە گۆشەی بێشەدا مەل بێتە تووشی دام و داو تووشی نەفس و تووشی شەیتان بووم غەریب و بێ شوعوور موستەحەققی ڕەحمەتم، ئەی مەستی حەق! ئەی دەستی حەق! دەستی من بگرە لە نار و بمخە نێو دەریایی نوور ڕۆح لەسەر لێوم نەفەسگیرە، لە نێو خەوف و ڕەجا چاوەڕێی فەرمانی تۆیە: چێتە دەر، یا بێتە ژوور تابی گێسووت وەقتی خەندە تابشی ڕووت بوو، وتم: نەردەبانی عەرشە پایەی لامەکان مایەی حوزوور تا خەس و خاشاکی بەر دەرگاهی تۆم بۆ دەست بدا چیم لە گوڵزاری بەهەشت و لەززەتی حوور و قوسوور یادی ڕووی تۆم کرد و ئارامی نەهێشتم نووری حەق ئاوری تێ بەردام شوعاعی ڕۆژ بە تەقریبی بلوور دەنگی بێ ڕەنگی سەدای هات ڕەنگ و دەنگم پێ نەما باغی ڕۆح‏ەفزا دەپشکووتن لە پووشی وشک و زوور ڕووی وەدەرنا، مووی پەرێشان کرد دڵی پێدامەوە یەعنی: هەر ئەمنم شەفیعی عاسییان ڕۆژی نوشوور تاقی ئەبرۆم دی، عەیان بوو سوجدەگای مولک و مەلەک تابشی ڕووم دی، وەدەرکەوت بارەگای نووری سودوور ئەی شەهەنشاهی سەریری عەرش و ڕۆحانی غولام! چل‏چرای عالەم‏فەراز و شانشینت ماه و هوور شانشینت عەرشی ئەعزەم، جیلوەگاهت فەرشی خاک مەزهەری وەعد و وەعیدت، سەوتی ڕیزوان نەفخی سوور ئەی گوڵی گوڵزاری وەحدەت، سەروی باغی ئیستیفا عاریزت وەقتی بەیانان، قامەتت وەقتی زوهوور ئەی جەماڵت باوەشێنی شاهباڵی جوبرەئیل جایڕووبی خاکی ڕێت کاکۆڵی غیلمان زولفی حوور بەندەگانی عاشقی ڕووتن ستارەی میهر و ماه زەڕخڕیدەی خاکی پێتن عەنبەر و میسک و بخوور خۆش‏نویسی موسحەفی ڕووت بۆ ڕەواجی حوسنی تۆ خۆش خەتی کێشا بەسەر ئایاتی تەوڕات و زەبوور گەر تەجەللای حەق مورادی جیلوەیی ڕووی تۆ نەبوو چاوی «مووسا» کەی دەبوو ڕوون بێ بە سورمەی کێوی توور تۆ و خەمی گیسووت کە تەشریحە لە سیڕڕی ڕۆژ و شەو تۆ و خوتووتی ڕووت کە تەفسیرە لەسەر ئایاتی «نوور» تۆ بی ‏و زاتی خودا ـ قوربان ـ وە هاوارم وەرە ئەو دەمەی بێکەس دەمێنم دەبمە لوقمەی مار و موور دەم بە خەندە یەک دەم ئەی کەششافی سیڕڕی لامەکان کافییە جارێک بفەرمووی بۆ وەفایی یا غەفوور ++++++++++++++++++++++ سەرناو: مەمکوژە تۆ گەردەنی خۆت ڕووت لە زولفان دەرخەوە مەمکوژە تۆ گەردەنی خۆت ڕووت لە زولفان دەرخەوە ئەی سەبای ساڵحان ئەتۆ بکەی ئەم شەوە ڕۆژ بێتەوە تاقەتم چوو ئارەقی گەردنت بە زولفان ون مەکە ئەی ستارەی سوبحدەم ئەوشۆکە زووتر دەرکەوە سووتبووم خۆم دا پەنای زولفت دەمێک ئاسوودە بم ڕووت نیشان دام باز لە سایەی تۆوە ئاورم گرتەوە زولفت ئەفشان کرد و پەنهان بووی و دونیات کردە تەم خۆت وەدەرنا عالەمت سووتاند و ئاورت کردەوە با بە هەویای پایبووسیت عومری من کۆتا نەبێ مەیخە پشت گوێ، مەرگی من، بێ زولفەکانت بەردەوە ئولفەتی زولفت چییە قوربان لەگەڵ ڕوخساری تۆ؟ خۆ بە هیچ دینێکی نابێ کوفر و ئیمان پێکەوە هاتە سەر خەندە کە من سوڵتانی حوسن و دڵبەرم غایەتی سووڕەت نومای ڕۆژی جەماڵی من شەوە بای سەبای بەرقەع گوشا بوو؟ یا ئەتۆ بووی خۆت نواند؟ یا نە ڕیزوان دەرکی گوڵزاری بەهەشتی کردەوە؟ من لەبەر عەکسی نیگاهت کەوتووم هۆشم نییە چاوەکەی تۆ هەر نەخۆشە یا نە سەرخۆشی خەوە؟ خارق العاداتی زولف و خاڵ و خەندەی زاری تۆ میشک و عەنبەر، شەهد و شەککەر، لەعل و گەوهەر پێکەوە زولفی لادا تا دیار بێ جاعیلی لەیل و نەهار ڕووی وەدەرنا تا بزانن خالق الأصباح ئەوە نەوڕەسیدەی نەخلی باڵای شەرحی حەرفی وەحدەتە نەور و نەکهەت، نوور و زوڵمەت، نار و جەننەت پێکەوە وەک سەری زولفت دەبێ کێ بێ حیسابی تێک نەچێ گەر بە ناز تۆ بێیە پەی مەحشەر بە چاوی مەستەوە؟ چم لە ئوممێدی بەهەشت و بیمی دۆزەخ داوە من؟ دۆزەخی من هەر فیراقە، جەننەتم وەسڵی ئەوە لێوەکەت عومرم بوو شەرتت کرد بە دڵ جارێکی دیش وەختە بوو بمرم وەرە عومری دوبارەم پێ بدەوە خۆش بە ناز ڕامەبرە، قوربان، ئیلتیفاتێکت هەبێ دادخواه زۆر کەوتوون نەختێ سەمەندت بگرەوە تاقی ئەبرۆت دەرخە شادم کا هەتا قوربانی بم عیدی قوربان چونکی شەرتی ڕوئیەتی ماهی نەوە داخۆ چ بکا پاش خەت و خاڵان سەفی موژگان بە ناز؟ لەشکری تورکان ئەوا هات و فەڕەنگی پێشڕەوە! ئاه و ناڵەی بێقەراریم عالەمی خستۆتە جۆش گوڵ بەناز پەروەردەیە ئەی دڵ دەمێکی بسرەوە من لە سەر خاکی دەری یاری سەفەرکەردە نەمام نامرم ئەهلی بەهەشتم گەر ژیانم بێتەوە تۆ هەڵستای بەو دەمە ڕۆحی وەفاییت زیندە کرد با قیامەت کەس نەڵێ هەر یێکە توخودا هەستەوە ++++++++++++++++++++++ سەرناو: چاوی پڕ خوێنم دەگێڕم قیبلەکەم پەیدا نییە چاوی پڕ خوێنم دەگێڕم قیبلەکەم پەیدا نییە نووری چاوم ڕۆییوە یا دیدەکەم بینا نییە؟ وەک نەیستان ئاورێ بەربۆتە دەروونم بەندبەند دڵ کە هەروەک نەی دەناڵێ دەم بە دەم بێجا نییە ئەی چرا لەحزێک مودارا تێر ببینێ ڕەنگ و ڕووت وەرنە پەروانەی غەریب جان و دڵی پەروا نییە بۆ نیساری مەقدەمت عومرێکە دەگریم ڕۆژ و شەو تا بەکەی گەوهەرفشانی، چاوەکەم دەریا نییە؟ چی دەکەم، دەگریم، دەسووتێم، ئاوری دڵ نامرێتەوە چ بکەم ئاخر نووری دیدەم، سینەکەم سینا نییە گەر هەزار جار بێ بە کۆی زووخاڵ بە نووری کێوی توور ئەو دڵە، جۆیایی یەک دیداری وەک مووسا نییە هات و ڕووی وا کرد و دونیای کردە ناڵەی عاشقان دا نەڵێن نایێ قیامەت، ڕۆژی واوەیلا نییە حەڵقە حەڵقە تاری زولفت خستە سەر ڕووی نازەنین دا نەڵێن ڕۆژ حەڵقەگۆشی ماهی شەوئارا نییە پێکەنی مەمنوونی کردم، زولفەکەی دامێ بە دڵ دا نەڵێن شەککەرفرۆشی ئێمە خۆشسەودا نییە خۆم بەسەر گێڕا کوتم: قوربان پەرێشانی بەسە! سوێندی خوارد بەو زولفە وەسڵم عەینی سەرگەردانییە مەنعی ناڵینم لە شەوقی گەردەن و ڕووی خۆت مەکە بولبولی سوبحی بەهار بێشین و واوەیلا نییە دڵ کە بەستەی زولفە لەو لێوانە مەحڕوومی مەکە بێشەکەر ئەم تووتییە ناژی کە هێندوستانییە گا بە ناز، گاهێ بە غەمزە مەمدە بەر تیغی برۆت کوشتنی عاشق بە هیچ دینێکی قوربان چا نییە با فریبی من نەدا واعیز بە گوڵزاری ئیرەم عاشقی ڕووی تۆ بە هەویای جنة المأوی نییە گەر هەموو عالەم بڵێن: مەجنوونە، تا دەمرم دەڵێم: هەردوو دونیا قیمەتی دیداری یەک لەیلا نییە داد لە دەست حوسنت کە زولفت نابێ بێ ناڵەی دڵان ئارێ ئارێ دائیرەی شاهانە بێغەوغا نییە؟ چت لە وەسڵی زولفی من؟ فەرموو وەفایی ها دەمم تالیبی عەیشی ئەبەد بە، عومری دونیا فانییە سەد هەزار دڵ پێکەنی وەک گوڵ بەدەم بادی بەهەشت یا هەناسەی جانفەزای گوڵزاری غەوسی سانییە؟ جانشینی حەزرەتی غوث الخلایق قوتبی حەق فەرعی تاها ئەسڵی یاسین نەوبەری گەیلانییە ڕەوشەنی چاو و قولووبی عاریفە عەکسی دڵی کێوی توورە، مەزهەری نوورە، کلی سوبحانییە پێی لەسەر شانی هەموو وەلیانە جەددی خۆی دەڵێ جێی لەسەر چاوانە شاه و شانشینی سانییە ++++++++++++++++++++++ سەرناو: بۆچی هەودای زولف و دڵ حاکم لە ڕووی جانانە بوو بۆچی هەودای زولف و دڵ حاکم لە ڕووی جانانە بوو ئەو پەرێشانییە هەموو تەقسیر و سووچی شانە بوو موددەتێک بوو نووری چاوم چوو بوو، ڕۆژم ببوە شەو ڕووی درەخشانی لەبەر زولفی پەرێشان وا نەبوو زولفی لادا هەر بە ئوممێد بووم کە ڕۆژ ئاوا ببێ ماڵی من وێران بوو عومری من چوو، ڕۆژ ئاوا نەبوو قەترە قەترە خوێنی چاوم یەک دەم ئارامی نییە ڕۆژێکی بۆ کاروانی عاشقان ئاوا نەبوو؟ وەک چرا سووتام و ڕوحمێکی بە حاڵی من نەکرد جارێکی لوتفێ لەلای ئەو یارە بێپەروا نەبوو زولفی لادا خاڵی ڕووی دەرکەوت و هیچ ڕووی پێ نەدام شەو چوو ئەستێرەی بەیان هات، ڕۆژی من پەیدا نەبوو لەوحی مەحفووزم لەبەر چاوی بە سەد دڵ خوێندەوە غەیری بیماری نەسیبی عاشقی شەیدا نەبوو بەستەیی زنجیری زولفی تۆم نیگاهێ! ڕەحمەتێ! ئەی تەبیبی میهرەبان! ئامان دڵم دێوانە بوو یا نەخۆشی چاوی تۆم یا بێقەراری زولفی تۆ عاشقی بێچارە قەت بێدەرد و واوەیلا نەبوو وا بە دەردی چاو و داغی زولفی تۆ حاڵم نییە وەک نەخۆشێکی پەرێشان چی کوتم هیچ وا نەبوو پەڕپەڕی ئەوراقی دڵ پڕ خوێنی وەک گوڵ کردووە دەفتەرێکە پڕ لە خوێن هەر ئەو بوو چی تێدا نەبوو قەت بە چاوی سووک تەماشای ڕەند و ڕووتێکی مەکە ئەی بەسا ئاوری نیهانی موهلیکی سەد خانە بوو هەر دەمێکی مەزهەری دیداری وادی أیمنە خۆ تەجەللا مونحەسیر بۆ سینەیی سینا نەبوو باغەبان بۆ خۆی کە هات ئارایشی گوڵزاری دا خاری میسکین تۆ بڵێی چ بکا گوڵی ڕەعنا نەبوو؟ ! ئەی فرووغی زوڵمەت و نوور! تۆ و چراغی دین و دڵ! ڕەحمەتێ، وەبزانە ئەم وێرانە هەر ئاوا نەبوو گوڵ بەبا سونبوول بە تاراجی خەزان چوو عاقیبەت هەچ گوڵێک لافی لە ڕەنگ و بۆت نەدا ڕیسوا نەبوو گەر ئەتۆ لوتفێک بفەرمووی بێزوبانی من بەسە مەیلی تۆ بوو وەرنە ئادەم عالمی ئەسما نەبوو تا بە ئاه و ناڵە نەگریت فەیزی ڕەحمەت زەحمەتە بێ نەسیمی بەرق و باران جۆششی دەریا نەبوو شای گوڵان، سولتانی خووبان، ئەوشۆ هات دامەنکەشان ڕۆژ و شەو، خورشید و زوڵمەت، گەنجی نێو وێرانە بوو بانگی نۆشانۆشی ساقی، دەنگی موتریب، سەوتی تار قووتی جان، ڕۆحی ڕەوان، ئارامی دڵ قەت وانەبوو دڵ بە دڵبەر، جان بە جانان، شاد و خوڕڕەم کەفزەنان وەسڵی بولبول، بەزمی گوڵ، شایی شەم و پەروانە بوو خاڵی گۆشەی چاوەکەی فەرمووی، وەفایی پێت بڵێم «تا نەبوومە خادیمی مەیخانە کارم چا نەبوو!» ++++++++++++++++++++++ سەرناو: لەسەر چی لێم زیزی چ بووە؟ چ قەوماوە؟ لەسەر چی لێم زیزی چ بووە؟ چ قەوماوە؟ دەمم لە ڕووی تۆ دا، کابە نەڕووخاوە چ کێوی توورێکە چ شوعلە نوورێکە دڵم لە تاوی ڕووی تۆ ئەگەر نەسووتاوە؟ ! چ بەرق و بارانە چ گوڵبەهارانە؟ چاوم لەبەر خەندەت ئەگەر نەگریاوە نە زولفی جادووتم نە خاڵی لای ڕووتم عەزیزەکەم بۆچی ئەمنت وەلا ناوە؟ چ بکەم کە هەر نەگریم لە دەست ئەو چاو کاڵە؟ شەهید بە هیچ وەختان خوێنی نەوەستاوە! لەبەر هەناسەی من زولفی لە ڕوو لاچوو مەگەر نەسیم ئەنگووت؟ بەیانی بەرداوە؟ بە زاری خۆی داخۆ پرسی لە من ئاخۆ گوڵ بوو وەها پشکووت؟ شەکەر بوو دەتواوە؟ ! بە تاری زولفانت ئەمن وەها شێواوم سەبر و قەراری من ڕۆیی نەگەڕاوە لەبەر شەکەرخەندەت ئاورم وەها کەوتێ سۆز و گودازی من نەی بوو نەشێراوە سۆراغی دێوانان، چراغی پەروانان شەڕابی مەیخانان، خوماری ئەو چاوە ئەتۆ و گوڵی بۆ خۆت کردت بە ئاوێنە ئەتۆ و دەمی فەرمووت بەو ئاوە کووژاوە ئەی ڕۆژی شەوگەردان، ڕووی تۆ لەنێو پەردان شیفای هەموو دەردان، بە خەندەت هێناوە تۆ و زولف و خاڵی خۆت، ئەتۆ و جەماڵی خۆت کە شەو بە تاریکی لەو ڕۆژە گیراوە بەو ئاڵ و واڵایە، بەو بەژن و باڵایە کە زاتی ئەسمایە، کە وەحدەتی ناوە یەخسیر و بەندی تۆم، لەدووی کەمەندی تۆم بە زولفەکان جارێ بفەرموو بەولاوە فەرمووت: دەبێ بگری، سەبر و قەرار نەگری ئەمرت لەسەر عومرم، حوکمت لەسەر چاوە بە تیری ئەو شۆخە چلۆن نەناڵێنم؟ برینی تیراوێ بە ئێش و زووخاوە فەڕزەن ئەمن شێت بووم ڕووم نەبوو نەمزانی هەمیشە خۆ پاشا ڕووی بە گەدا داوە بە غەمزە کوشتوومی، بە شێوە گرتوومی دەشڵێ: وەفا مەگری، شەهید نەشۆراوە دەمێکە ڕەنجوورم، لە یاری خۆم دوورم شەماڵ دەخیلت بم، وەعدەی دوعا و سڵاوە بڕۆ بە زاری من، بڵێ بە یاری من: دوور بێ لە حاڵی تۆ، ڕۆحم بە نێو ماوە ئەتۆ کە ڕێزانی چۆڵ و بیابانی دەستی من و دامانت وەفایی داماوە! ++++++++++++++++++++++ سەرناو: سوڵتانی هەموو سەروقەدان ماهی حەساری سوڵتانی هەموو سەروقەدان ماهی حەساری چاوی کە غەزاڵن دەگرن شێری شکاری بۆ هەتکی ڕیازی چەمەن و بادی بەهاری زولفی کە هەوا خستیە سەر غونچەیی زاری هەر لەحزە لە خەندێکی گوڵ و نافە دەباری گوڵ هاتە دەرێ لافی لە حوسنی بوتی ما دا لەرزی قەدی بەرزی لە ڕقان زولفی کە بادا عەترێکی لە دەم پەرچەم و ئەگریجە بە با دا چین و خوتەن و هیندی بە شاباشی سەبا دا یەکسەر هەموو عالەم کە بووە میشکی تەتاری لەعل و شەکەر و زاری کە وەک فیکری دەقیقە شوبهەی نییە ئەو مەرکەزە پەڕگاری عەقیقە ئەو سەبزە لەسەر ئەو لەبە وەک ڕاحی ڕەحیقە هەر جەوهەرە، جەوهەر خەتە، خەت موشکی عەبیقە یاقووتی گوڵم نەقشە لەگەڵ خەتتی غوباری بۆ هەتکی ڕیازی خوتەن و کانی بەدەخشان وەک لەشکری هیند و حەبەشن، گەرمی تەماشان تێکەڵ بوون زەڕڕە و خورشیدی درەخشان یا زولفییە بێ شانە لەسەر شانی پەرێشان وا دێن و دەچن هەردوو لەسەر زار و عیزاری پەرچەم حەبەشی زادە، فەڕەنگی بوتی زیبام سەرحەڵقەیی شۆخانی پەری چێهرە گوڵئەندام پێم کوت: چییە ئەم نوقتە لەنێو دوو لەب و یەک جام؟ فەرمووی ئەوە نوکتێکە بە دوو لێوی شەکەرخام تا ماچی نەکەی ناگەیە سەر حیکمەتی باری بادی سەحەری هات و دڵ و ڕووحی مەنی دا عەتری گوڵ و گوڵزاری خەتا و خوتەنی دا یان دەستی لە دوگمەی وەرەقی پیرەهەنی دا یەکسەر هەموو عالەم گوڵی جەننەت شکەنی دا باغی سەمەن و یاسەمەن و سێو و هەناری فەرموویە وەفایی کە دەبێ ئەهلی نەزەر بێ عاشق ئەوەتا هەمدەمی ئەنفاسی سەحەر بێ سێڵاوی سروشکی هەموو خوێناوی جگەر بێ بۆ تەوفی ڕیازی حەرەمی قیبلە لەبەر بێ ئەو سەعیە سەفای عومرە ئەگەر عاشقی یاری دەم غونچەیی نەشکوفتەیی گوڵزاری جەماڵە ئەبرۆ چییە میحرابی دوعای نێرگسی کاڵە قەدنارەوەنی نەوڕەسی باخی خەت و خاڵە نێرگس بە ڕوانین خەتەراتی سەر و ماڵە یەکسەر هەموو عالەم کە بووە میشکی تەتاری من عاشقی ڕووتم وەکوو پەروانە وەفایی بیماری نیگاهم بە غەزالانی خەتایی تۆ بی و سەری خۆت ئەی گوڵی سەرپەنجە حەنایی چیت دیوە خەتا مەمخەرە زیندانی جودایی بنوێنە ویسالت کە لەسەر وەعدەیی پاری ++++++++++++++++++++++ سەرناو: سووتام بە نازی فیرقەتێ، ساقی کەرەم کە شەربەتێ سووتام بە نازی فیرقەتێ، ساقی کەرەم کە شەربەتێ وەک قەقنەس ئاورم کەوتەتێ، یا غەوسی سانی هیممەتێ ڕیشەی دڵم بەس پارە کە، موتریب دەستێ بۆ تارەکە بەو یادی زولفی یارەکە، یا غەوسی سانی هیممەتێ تۆ مەزهەری نووری خودای، تۆ مەنبەعی سیدق و سەفای سەرداری کوللی ئەولیای، یا غەوسی سانی هیممەتێ من پەروانەی بێحاسڵم، من بولبولی خوێنین دڵم شەیدای چرای ڕوومەت گوڵم، یا غەوسی سانی هیممەتێ من تەشنەی چۆڵ و زوڵماتم، ئاخر تۆی کانی حەیاتم هەروا بە هەویای وەفاتم، یا غەوسی سانی هیممەتێ من خەرموهرەم تۆ یاقووتی، من ناسووتی تۆ لاهووتی تۆ ڕۆژ دێوانەیی ڕووتی، یا غەوسی سانی هیممەتێ دڵخەستەی یاری سەرسەریم، ماران گەستەی دێو و پەری مشایەد پەریم کەی ڕەهبەریم؟ ، یا غەوسی سانی هیممەتێ سەرگەشتەی چۆڵ و غوربەتم، شایانی ڕوحم و ڕەحمەتم هەر چاوەڕێی یەک هیممەتم، یا غەوسی سانی هیممەتێ نەفس و شەیتان دامەن کەشان، بۆ سەرکەشی ڕووی مەهوەشان دەمان کێشن بە باوەشان، یا غەوسی سانی هیممەتێ خاکی سەگانی دەرگەهم، خواهەندەی بێجێگا و ڕەهم چاو لە دەستی شاهەنشەهم، یا غەوسی سانی هیممەتێ تا نەبیە خاکی مەیخانە، نەبیە ڕووی دۆست و بێگانە حاشا تۆ و پیر و پەیمانە، یا غەوسی سانی هیممەتێ گرتووی کەنار دەریای فەنام، سەوداسەر و شێت و شەیدام هەر چاوەڕێی کەشتی بەقام، یا غەوسی سانی هیممەتێ سەدای یاهووی دەروێشان هات، ئاه و ناڵەی دڵڕێشان هات ڕەگ و ڕۆحم وەئێشان هات، یا غەوسی سانی هیممەتێ دەستی من و سەحرای دڵان، چاوی من و باغی گوڵان دڵ بێگوڵ بێ دەمرم بەڵان، یا غەوسی سانی هیممەتێ بەزمێکی وا ئامادە بێ، هەم بادە بێ هەم سادە بێ قەت بێوەفایی وادەبێ؟ یا غەوسی سانی هیممەتێ دوو حەرفی ئەمرە کاف و نوون، زەحمەت نییە ڕۆژەوە بوون ئەسبابی داناوە بێچوون، یا غەوسی سانی هیممەتێ موتریب تۆ و تاری ڕۆحانی، ساقی تۆ و جامی سوبحانی تۆ و بەربەتێ، تۆ و شەربەتێ، یا غەوسی سانی هیممەتێ وێڵی وڵاتی بێهۆشی، گێژی گێژاوی سەرخۆشی ماسی سەراوی ئاتەشی، یا غەوسی سانی هیممەتێ ئەمڕۆ دەمی سوبحی سەحەر، ڕاوەستە بووم دەستەونەزەر دڵبەر بە ناز دیم هاتە دەر، یا غەوسی سانی هیممەتێ زانی دڵم سەوداسەرە، ئاوێنەسا و سێبەرە ڕۆژ دایە گۆشەی پەنجەرە، یا غەوسی سانی هیممەتێ ڕۆژ دایە قەلبی مینایی، دێوانە بوو سووفەستایی موشکیل کارە ناپەنایی، یا غەوسی سانی هیممەتێ مەوجی دەریای بێجێ و سکوون، کێشامیە گێژاوی پڕخوون إنا إلیه راجعون، یا غەوسی سانی هیممەتێ بەدری سەنابەرقی نەبوو، غەربی نەبوو شەرقی نەبوو هەرچی هەبوو فەرقی نەبوو، یا غەوسی سانی هیممەتێ شەوقی سەمای زەڕڕاتی ڕۆژ، بوو بە گوڵی باغاتی ڕۆژ ڕۆژهاتی من نەهاتی ڕۆژ، یا غەوسی سانی هیممەتێ فەرمووی: لە چاو ببڕە خەوێ، من قەلبی سووتاوم دەوێ وەفایی بانەنوێ شەوێ، یا غەوسی سانی هیممەتێ ++++++++++++++++++++++ سەرناو: دیسان نەسیمی بەهار، نەرم نەرم هاتە خوار دیسان نەسیمی بەهار، نەرم نەرم هاتە خوار دونیای زیندوو کردەوە بە ئەمری پەروەردگار بە ئاه و گریان دیسان، هاتەوە هەوری نیسان جگەر پڕ ئاو و ئاور، وەک عاشقی بێقەرار هەوا لە بەرگی گوڵان، تەبەق تەبەق عەتری سوو سەبا لە بۆی یاسەمەن، چەمەن چەمەن موشکبار هاتەوە بادی وەزان، بوو بە بەزمی نێو ڕەزان کانی بە تاو هاتنە ژان، وەنەغمە کەوت ئابشار نمەکفرۆشی داغان، کردیانە شەوچراغان سوورەگوڵی ڕەز و باغان وەنەوشەیی جۆیبار سەمەن عەتری بە با دا لە نێو چەمەن گوڵ گوڵاو عەبیر عەنبەری هێنا وەنەوشە میشکی تەتار فریبی دین و دڵان لە پەردە بووکی گوڵان سەبر سەبر هاتەدەر بە ناز و مەست و خومار دێن و دەچن وەحش و سڵ دەست بەندیانە بە دڵ نارەوەن و سەرو و گوڵ لە شایی بووکی بەهار لە نێو بەزمی گوڵستان، بە سەر، بە پێ، بە دەستان هاتنە سەمایە مەستان، نەومەستەکانی گوڵزار لالە و گوڵ بێسەدان، شەهیدی عەشقی خودان ئەم بە تەنی پڕ لە خوێن ئەو بە دڵی داغدار گوڵ تار و زەرد و شینە، بەرگی زوموڕڕەدینە نەقش و نیگاری چینە، دەشت و دەمەن کۆهسار هەوای گوڵانیان بزووت، هاتنە باغێ تاق و جووت فاختە و عەندەلیب، بولبول و کەبک و هەزار هاتنە چەمەن کەف‏زەنان، خۆش نەفەس و نەغمەخوان قومریی و دوڕڕاج و سار، بە ساز و سەمتوور و تار بادی سەبا مەست و چوست، هەروەکوو شاهید پەرست دەستی لە ڕووی گوڵان خست، بەربووە بووس و کەنار زولفی ڕەشی سونبوڵان، خستیە سەر و ڕووی گوڵان ئایەتی نارد بۆ دڵان، حاجیبی لەیل و نەهار بۆ دەرسی ئەربابی دڵ، پەڕ پەڕی ئەوراقی گوڵ هەر دەرسی عیشقە حاسڵ، سەرمەشقی ئامووزگار وەنەوشە و گوڵ خەمڵیوە، عیبرەتە چی نەدیوە لە یاقووت و لە زیوە، فەزا بە خەتتی غوبار باغ نییە مەیخانەیە، پڕ مەی و پەیمانەیە هەر شەم و پەروانەیە، لەبەر چاوی هۆشیار غەیری ئاوی زۆر و کەم، بە زەمزەمەی زیر و بەم دەخوێنین بە هەموو دەم، مەعریفەتی کردگار «وەفایی» ئیدی بەسە، عیشق و هەوای مەدرەسە بینووسە ئەم هەندەسە، بێنە خەت و خاڵی یار بچۆ بەلای دڵڕوبای، بە سەر بە یادی بەقای هەتا ئەتۆ بێوەفای، بە خۆت مەکە ئیعتیبار دەمێک نەفس بگرەوە، وە دووی دڵی خۆت کەوە بزانە ڕۆژ یا شەوە، خەوت نەیە هەستە کار هەزار سەوم و سەلات بێ، چاوت لە دووی زەکات بێ خودات نییە حەیات بێ، قەت وانییە تۆبەکار تف لە ڕەنگ و ڕەوانت، دەگەڵ فیعل و ژیانت چی تێدایە دووکانت؟ چت لێبکڕێ خڕیدار؟ مومکینی سڕڕ و نەهان، هەم سوحوفن هەم بەیان هەم کیتابن هەم زوبان، بە وەسفی پەروەردگار قسە بیست و چوارە، هەر یەکێکیان بەکارە رێگای خودای دیارە، بمرە ببە ڕەستگار لە خەو لە خۆوە هەستە، حەیات بێ! هێندە بەستە «وەفایی» گێژ و مەستە، دەنگە لە شار و بازاڕ ++++++++++++++++++++++ سەرناو: ئەمان موتریب بێ ساقی وا بێ ئەمان موتریب بێ ساقی وا بێ ئەگەر مەی نابێ بۆ خۆی با بێ کەسێ بێهۆشی تەجەللا بێ خەیاڵی نەشئەی بادە نابێ هەتا نەبیە خاکی مەیخانە مەڵێ ساقی بێنە پەیمانە مەحاڵە بگاتە شەم پەروانە مەگەر سەر تا پێ ئەو سووتا بێ لە تاتای زولفان ڕووی تابانە دەڵێ شەو شەوقی گوڵباغانە وەک دەڵێن ئەمشەو چراغانە بەڵکوو شای گوڵزاران وا ڕابێ نەخۆشم کەوتووم بێ زوبانم دەناڵم لەبەر دەردی گرانم بەبێ ئەو شۆخە خۆم دەیزانم دەوای من نایێ سەد مەسیحا بێ نەخۆشم کەوتووم دەردەدارم وەک زولفی دولبەر بێقەرارم ڕۆح لەسەر لێو چاوەڕیی یارم یار دەڵێن: وا دێ، تۆ بڵێی وا بێ؟ تۆ و غەمزەی چاوی زوبانزانت تۆ و سەری زولفی پەرێشانت مەیێڵە بمرم لە هیجرانت بڵا مەجنوون بێ بە لەیل شا بێ گەر دەگرم زولفت، دەڵێی کافر بووی دەست بۆ دێنم، دەڵێی چاتر بووی بە هەر حاڵ بۆ من تۆ ئاور بووی فیدای مردن بێ ژیانێ وا بێ یاخودا بە ناڵەی دڵئێشان کەی! یاڕەب بە یاهووی دەروێشان کەی! غەمی جەرگی من پەرێشان کەی! ڕووت لەنێو زولفت بۆ بڵاو نابێ؟ ! دەمێکی وا بێ ئەی مایەی سەبرم بە دڵ دامانی زولفت بگرم هەتا کەی ئاخر هەر بۆت بمرم؟ ! تاوێک نا تاوێک سەڵام لێ ڕابێ ئەگەر یار بێتە گۆشەی قەسرێ دڵێکی دەم بە دەم ئاور نەگرێ بە دیدارێکی سەد جار نەمرێ دڵی وام ناوێ تووری سینا بێ نە زولفی تۆم، بۆچ بێقەرارم؟ ! نە چاوی تۆم، بۆچ وا بیمارم؟ ! عەجەب شێواوە سەر و کارم دیارە دەردێ بێدەوا بێ دەمێکی ڕووت بگرم زولفت لادەم بە خۆشیی هەردووک دونیات نادەم کە تۆم بێ چم لە ڕەوزەیی ئادەم؟ بەهەشت وا خۆشە تۆی تێدا بێ چەند خۆشە ئەمن و تۆ هەتا مردن وەک زولفی تۆ بین: دەست و گەردن لە تۆ گوڵ گوڵغونچەت وا کردن لە من قوربان بوون تا ڕووح مابێ مەگەر تۆ بووی و هاتیە خەندە کە وا دونیا پڕ لە کەلەقەندە بە مەرگی من بڵێ نرخی چەندە؟ دەڵێی دڵ؟ هانێ! دەڵێی ڕۆح؟ تا بێ! دەڵێ: گوڵزارم، گەردەن ئاسکم وەنەوشە بسکم، زیوین باسکم بڵا بزانێ چەند نەرم و ناسکم ئەگەر ڕووح دێنێ وەفایی با بێ! ++++++++++++++++++++++ سەرناو: ئەی خۆش خەبەر نەسیمی سەحەر پەیکی عاشقان ئەی خۆش خەبەر نەسیمی سەحەر پەیکی عاشقان ئەی قاسیدی نیازی هەر ئاوارە وا وەرە دیدەم ببینە هەروەکوو دوو چاوی پڕ لە خوێن سینەم ببینە هەروەکوو کوورەی پڕ ئاورە گەر ئاوی سەیلی دیدە نەبێ سینە سووتووە گەر تاو و جۆشی سینە نەبێ دیدە مضطرە سووتاوی تاوی سینەم و غەرقی نێو ئاوی چاو لوتفێ بفەرموو چارەیێ لەو ئاو و ئاورە وەک «نەهری» چاو و مەشعەلەیی دڵ بڕۆ بە تاو بۆ ئەو دڵبەرە کە گوڵبەرە پەیغامی دڵ بەرە «نەهری» کە جێگەیێکە هەموو خاکی سوورمەیە «نەهری» کە جەننەتی گوڵ و گوڵئاوی کەوسەرە «نەهری» غوباری عەترە بوخاری بوخووری ڕووت خاکی تەڕی کە وشکە هەموو میشکی ئەزفەڕە «نەهری» وەهایە «با» لە گوڵاو و گوڵئاتەشی عەنبەرفرۆشە خاکی لە کەوسەر موخەممەرە «نەهری» کە خولدە نەهری ڕەوان سەلسەبیلیە «نەهری» کە پاکی دار و دەوەن پاکی عەنبەرە «نەهری» کە خاکی قیبلەمە گوڵزاری گوڵبەرە «نەهری» کە شاری دیدەمە جێڕاوی دڵبەرە دڵبەر بە لوتفی حەزرەتی باری مەتیبە گوڵبەر بە نووری ڕەحمەتی داوەر مونەووەرە دڵبەر کە سەروی نەوڕەسی باغی سیادەتە گوڵبەر کە نەوشکۆفەیی ڕەوزەی پەیەمبەرە دڵبەر کەوا لە گوڵبونی یاسین شکۆفەیە گوڵبەر کەوا لە گوڵشەنی تاها سنەوبەرە ئەو تاقە نەسڵە ئەسڵی لە جووتێ فریشتەیە دوڕڕی یەتیمە زادەیی بەحری دوو گەوهەرە ئەو شەمعە زەینی مەحفەلی شەمزینە ڕەوشەنە ئەو شەمعە خۆ موبەرهەنە ئەو نوورە ئەزهەرە فەیزی جەسیمە، خولقی بەسیمە، عەتای عەمیم بۆ لوتفی جوود و مەرحەمەت ئەو سەدرە مەسدەرە بەحری دڵی کە وادی ڕووناکی ئەیمەنە جێگای زوهووری مەرحەمەت و نووری داوەرە نەوری حەدیقەیە کە لە عیرفان موتەییەبە نووری حەداقەیەکە بە ڕەحمەت مونەووەرە سەر تا قەدەم بە نووری خودا ڕۆشنە بەڵێ ئەو نەخلە بۆ تەجەللییە، ئەو نوورە مەزهەرە ئەبرۆی مەحەببەتی ئەوە میحرابی خانەقا توڕڕەی مەوەددەتی ئەوە میعماری مینبەرە کەعبێکە خانەدان کە هەموو خەلقی تائیفە قیبلێکە ئاستانی هەموو ئەهلی زایەرە بەیتی ئەوێ چ بەیتە؟ مەڵێ پاکە! جەننەتە خاکی ئەوێ چ خاکە؟ مەڵێ چاکە! عەنبەرە گەر سەر نە خاکی مەقدەمی ئەو ڕۆحە پاکەیە گەر دڵ نە تۆزی ڕێگەیی ئەم شەخسە تاهیرە سەر خاڵییە لە مەعریفەت و دڵ لە ئەهلییەت بیللا نە دڵ دڵی منە، حاشا نە سەر سەرە ئەی پەیکی شارەزا! بە ئەدەب ڕوو بکە حەزرەتی پەردەی عەرووسی عەرزی من ئاهێستە لا بەرە دەستێ بدە لە دامەنی بگری بە زاری من بۆیێ بکە لە مەقدەمی پاکی کە ئەنوەرە چاوم لە دووری نووری جەماڵی، بە خاڵی تۆ خاڵی لە نووری بینشە دایم موسەییەرە سینەم لە شەوقی میهری کەماڵی کەماڵی تۆ سینە چ سینە؟ نا، وەکوو سینا پڕ ئاورە یاخۆ گڵێ لە خاکی بەری پێت بە بابدە یاخۆ گوڵێ لە تووتنی خۆت، بیخە ئەم بەرە بۆ دیدە ئەو موفەڕڕیحە هەر عەینی سورمەیە بۆ سینە ئەو موفەڕڕیخە ئارامی دڵ دەرە ئەو تووتنە کە مەیلی وەکوو دڵ بە سووتنە ئەو تووتنە کە ڕەنگی وەکوو عاشق ئەسفەرە ئەو تووتنە کە زێڕی بەر دووکانی غەزنەیە ئەو تووتنە کە خۆشە لەتیفە و موعەتتەرە تا تووتنی لەتیفە دەگاتن لە هاتنێ دوو چاوی پڕ لە خوێنی وەفایی لەبەر دەرە تا شەو وەکوو ڕەواقی دڵم تەنگ و تیرەیە تا ڕۆژ وەکوو ویساڵی گوڵم هەر مونەووەرە زەڕڕێک لە میهری تالیعی تۆ بێ کە سەروەری نوقتێک لە بەختی دوژمنی تۆ بێ کە بەدفەڕە ++++++++++++++++++++++ سەرناو: جیلوەی سەبا لەنجەی شەماڵ، بۆی زولف و خاڵی یار دەدەن؟ جیلوەی سەبا لەنجەی شەماڵ، بۆی زولف و خاڵی یار دەدەن؟ یا نەوبەهار دێنێ بە بار، میشکی تەتار بۆی نەستەرەن؟ ڕەنگی وەنەوشەی دەشت و ڕاغ، عەکسی گوڵ و سەحرا و باغ عالەمیان کردە شەوچراغ، وەک زولف و ڕووی دڵداری مەن بە کەسک و سوور، باغ دەر و ژوور، پڕ بوو لە نوور، وەک کێوی توور لەبەر زوهوور کەوتە حوزوور، نزیک و دوور دەشت و دەمەن بورقەع بەسەر، ئەتڵەس لەبەر، گوڵ هاتەدەر، وەک بووکی تەڕ کاکۆڵ بە دۆش، عەنبەر فرۆش، پێم گوت: ئەتۆش؟ دیم غەفلەتەن گێسووبڵاو بە نازی چاو، هات لەنەکاو، بە قەسدی ڕاو ڕۆژ بوو بە شەو، ژین بوو بە خەو، بڕۆ بڕۆ کەوتە زەمەن جیلوێکی دا، هات لێکی دا، خۆش تێکی دا، ئارامی دڵ جوغد و هوما هۆشی نەما، کەوتنە سەما، چوونە عدەن زولفی وەشاند، ڕووی خۆی نواند، عەتری وەراند، پێمی نواند کەسی نەهێشت، بانگی دەهێشت: بۆ کێیە وا وەجهی حەسەن؟ ئەو زولف و ڕووی مانگەشەوە، خۆش دەیگوت و دەیبیستەوە وێم مەکەوە، دەتوێمەوە؛ ئاسک چاوم، ناسک بەدەن ئەو دولبەری مووعەنبەری، ئەو مشتەری هەروەک پەری خۆی پێم نواند، دڵمی ستاند، هۆشمی ڕفاند، بە مەکر و فەن ئەو خاڵوخەت هێندوو فەڕەنگ، وەسڵ و هیجران شەهد و شەرەنگ پڕشۆر و جەنگ، لێم هاتەدەنگ، غەمزەم خەدەنگ، زولفم ڕەسەن چین چین لەسەر ڕووی وەک شەکەر، زولفی عەنبەر بەستیان چەمەر تابووری چین، هاتن بە قین، خۆش داوەرین، باغی سەمەن زولف و نووری، ڕووی بلووری، بخووری شەمعی کافووری خاڵی سیای، چاوی شەهلای، نافەی خەتای، ئاهووی خوتەن خەندەی دەمی، بۆی پەرچەمی، چاوی بازی، نازی کەمی شەهد و شەکەر، میشک و عەنبەر، یەغمایی تین، تاراجی تەن بە غەمزەکان، بە ڕەمزەکان، بە قەوسی ئەبرۆی چاوەکان تیرو کەمانی تورکەمان، سەیدی دڵان بە جان دەکەن نرخ و بەهای میشکین هەودای، نافەی هەر تای زولفی سیای بازاڕی چین، موڵکی سەبا، خیتتەی خەتا، شاری دەکەن لەعلی لەبی خۆش مەشرەبی، زولفی شەبی، گۆی غەبغەبی قووتی ڕەوان، ئارامی جان، ئابی حەیاتی مەرد و زەن ئەبرۆی کەمان، گێسووی کەمەند، زاری بە خەند، باڵابڵەند هەم سایەبان، هەم سوورەجان، هەم نارەوان دوو نارەوەن ڕەقس و سەمای زولفی دوتای، لەبەر هەوای باڵای بەڵای هەروەک بولبول بە ڕۆح و دڵ، بۆ دارە گوڵ کەوتە شیوەن یەغما دەکەن وەک تورکەمان، دەرمان دەکەن وەک تەبیبان وەقتێ دەڕوا ئارامی جان، وەختێ کە دێ تەسکینی تەن حەڵقەی گێسوو تاتا لاچوو، لەسەر سینە و عاریز و ڕوو شەو چوو سەحەر، دیم هاتەدەر، شەمس و قەمەر، سەرو و سەمەن لە هەناسەی ئەو دڵبەندەی، فرقە خەندەی ئەو دەم قەندەی بە بای بەهار دەتگوت بە بار، گوڵ دێنەخوار بۆ نێو چەمەن گێسوودراز، وەک تێلی ساز، بە چاوی باز، دەیگوت بە ناز: چاوی پڕاو، جەرگی بڕاو، سینەی سووتاو پەیدا دەکەن ئەتۆ چ ڕەنگی ئاوری؟ دەمێکی گوڵ دەمێک شەمی هاوار لە یاری دەمدەمی! فەریاد لە دۆستی ڕیشەکەن! ئەتۆ نە نوور نە ئادەمی! دەمێک دێوی دەمێک پەری هاوار لە یاری سەرسەری! فەریاد لە دۆستی دڵشکەن! ئەی شەوچرای زیندوودڵان! ئەی ڕەنگ و بۆی باغی گوڵان! ناژیم تۆ خۆش، دەمرم، بەڵان، هێندەم بەسە تۆم بێیە کەن جارێک وەرە بەر پەنجەرە، ڕۆحم بەرە یا دڵ بەرە تۆ پادشای موشکل گوشا، من بێنەوا یا ذا المنن دڵ پارەیە، ئاوارەیە، بێچارەیە، مەیخوارەیە موتریب بڵێ: ساقی وەرە! جامێک بدەن، تارێک لێدەن خاکی دەری مەیخانەتم، تەشنەی دوو سێ پەیمانەتم جانانمی، پەروانەتم، تۆ شەوچراغی ئەنجومەن أنت الذی بجمالک، بکمالک، بجلالک کشف القدم، وصف العدم، نشف الوجود للوثن بێ موحتەسیب وەختێ خۆشە، بێ گفتوگۆیی بێغەشە لەو ساغیرە وا دڵکەشە، کامێ بە دڵ، جامێ بە مەن تاری دەمادەم خۆشترە، جامی پەیاپەی بێهتەرە کوا جامی جەم؟ کوا تاجی کەی؟ هەی مەی بدە، هەی نەی بزەن ئاخر زەمانی هیجرەتە، دەور و دوکانی فیترەتە وەقت و ئەییامی غیرەتە، تۆ دڵگوشا، من موحتەجەن خۆزگەم بەوەی بە نەشئەی مەی، بە بانگی دەف، بە دەنگی نەی دەگرێ هاموون، هەروەک مەجنوون، دڵ غەرقی خوون، ڕووت و ڕەبەن خۆزگەم بەوەی سەوداسەرە، سەرتاپا زەخمی خەنجەرە ئاو بێ ئاور، بێخەبەرە، فانی فی الله بێجێ و مەسکەن گریە و خەندەی زۆر و کەم بێ، سۆزی سینەی دەمادەم بێ شادیی شیوەن، خۆشیی غەم بێ، ساغ و کوێری سیڕڕ و عەلەن جەرگی هەموو جێی نەشتەر بێ، خوێنی جەرگی کە بێ دەربێ هەتا حەشرێ خوێنی هەر بێ، سەوداسەر و خوێنین کەفەن سەیری ئافاق و ئەنفوسی، بەحسی لە سەفحەی دڵ نووسی گا بەتحایی گا قوددووسی، ڕەهڕەو بێپێ، خۆش خوو بێتەن فی ضیقة أشباحنا سارت یهوی أرواحنا لا یفترق أجناحنا کالطیر یشوی للوطن خۆزگەم بەوەی سەودایییە، سەرخۆشی شین و شایییە پیر و شێخ و وەفایییە ساکن ساڵێک لەهەر وەتەن یاصاح فانظر حالک من مالک مما لک تقوی و إلا والک و أبی لک من العدن أفتحسنوا بمفاعل و فاعل بالظلمات؟ أفتۆمنوا بخوارق و خالق الفلق الألسن شێخێ کەوابێ ماسوی، مانعتوی لە ماغوی ما ینطق عن الهوی، فاغتنم بالقلب الحزن شێخێکی ئاشنایی بێ، خودایی بێ، وەفایی بێ توجه فأینما بێتە سەما دار و دەوەن ++++++++++++++++++++++ سەرناو: شیرین تەشی دەڕێسێ تایێکی ڕیشەیی دڵ بە نووکی غەمزەدا دا دەستێکی بۆ سەما برد ڕووبەندی ماهی لادا نافەی گوڵی بە دەرکەوت عەتری بە دەم سەبا دا باریک و لووس و ناسک وەک زولفی خاوی بادا وەک شاخی گوڵ بەلادا، شیرین تەشی دەڕێسێ نووکی تەشی بە گەردوش چەرخێکی قوتبی پێوە مەجەڕڕە بوو بە داوی کە چەرخی کەوتە نێوە وەک زوهرە دەستی کێشا کە بەندی قەوسی زێوە ئەستێرە ماهی داگرت سابت گەڕا بە پێوە عەرەق بە ڕوو بەڕێوە، شیرین تەشی دەڕێسێ لە بانی عارەقی ڕشت لە پێکەنینی زاری بە خەندە غونچە گوڵ بوو گوڵاوی لێ دەباری وتم: بفەرموو سەر دوو چاوی من بە یاری بە چاوی من ببینن تەلیسمی سیحرکاری کە سەروی جۆیباری، شیرین تەشی دەڕێسێ کە دەستی برد و هێنا بە دڵبەری بە تادا هێنایە چەرخ و گێڕای بە ڕانی سافیدا دا عەیان بوو پەنجەیی ڕۆژ بە خەتتی ئیستیوادا بە سوبحی سادق ئەنگووت زەنەب لەنێو سەمادا حیرەت لە ماسیوادا، شیرین تەشی دەڕێسێ کە هاتە چەرخ و بازی تەشی بە ڕانی لووسی دەکەوتە پایبووسی دوو زولفی ئابنووسی زەنەب لە مانگەشەودا دەهاتە چاپلووسی لەسەر بەیازی گەردەن بە خەتتی خۆشی نووسی مەهتابە پایبووسی، شیرین تەشی دەڕێسێ یەخەی کراسی لاچوو پشکووت بە هەردوو لێوان گوڵ و شەکەر دەباری لە کووچەباغی سێوان زولفی پەخشان بوو کوڵمی وە دەردەکەوت لەنێوان شەمس و قەمەر هەڵاتن دوێنێکە نوێژی شێوان وەفایی کەوتە کێوان، شیرین تەشی دەڕێسێ کە کەوتە چەرخ و گەردش تەشی بەدەستی ڕەنگین هەودای لە لێو و دەم دا خورشیدی سینە نەسرین سەمای بە زووزەنەب دا: کف الخضیبی شیرین گرتی خەتی مەداران شەفەق بە عیقدی پەروین سیحرێکە بۆ دڵ و دین، شیرین تەشی دەڕێسێ دوو زولفی چین بە چین کرد، کە نافەیی خەتایە دوو مەمکی خستە سەر لۆق هەناری دڵگوشایە بە خەندەی چەرخێکی دا کە شەوق و نەشئە وایە بە نوکتە پێی نیشان دام سەما لەسەر هەوایە هەموو ئیشارە وایە، شیرین تەشی دەڕێسێ بە عیشوە زولفی لادا لەسەر عیزار و زاری دوگمەی کراسی ترازا، بزووت هەوای بەهاری کە شەو بەیانی بەردا گوڵ و وەنەوشە باری سەڵای بە عاشقان دا باغی گوڵ و هەناری دونیا بە ئینتیزاری، شیرین تەشی دەڕێسێ کە زولفی کەوتە سەر ڕوو هەموو خەتای بە چین دا خەرامی تاووسانەی بە سەروی نازەنین دا سفیدەیی بەیانی بە باغی یاسەمین دا فەنایی پڕ بەقا بوو دەمی لە پێکەنین دا سەد ئافەتی لە دین دا، شیرین تەشی دەڕێسێ سمی غەزاڵەیی چین لە نافەدا عەیانە دەڵەی لە نیوەشەودا سفیدەیی بەیانە قەدی گوڵ و دەمی گوڵ ئەمەی کە قووتی جانە لە باغی یاسەمیندا شکۆفەیی گوڵانە بەهاری بێ خەزانە، شیرین تەشی دەڕێسێ شکۆفە وا هەڵستا لە زێڕ و زیو حوبابێ لە کەوسەری بەهەشتێ دەروونی پڕ کرابێ خڕ و لەتیف و نازک بلووری خودنوما بێ بە تەرزی درزی دەرزی لە خۆوە درزی دابێ دیارە سەروی وا بێ، شیرین تەشی دەڕێسێ شەوێ لە پیرەخەودا جەماڵی ویم بە دڵ دی دوو چاوی مەست و کاڵم وەکوو غەزاڵی سڵ دی ئەگەرچی نەوبەهارم بە ڕەنگی باغی گوڵ دی هەناری نەوڕەسیدەم شکاو و خاو و بڵ دی گوڵم لە خاک و گڵ دی، شیرین تەشی دەڕێسێ وتم: چ‌بوو نەمامم! بە خاڵ و خەت نەماوی؟ وەکوو بەیاری سونبول بڵاو و تێک‌شکاوی؟ وتی: گڵاوی سەگ بوو شکۆفە گوڵ، گوڵاوی بە کەرتەشی سماوە ستارەیی سەماوی بەسەر چوو چاو و ڕاوی، شیرین تەشی دەڕێسێ مەنعی مەکەن وەفایی کە خاوێ دڵ بڵاوە سەرێکە مەستی نازی، دڵێکە بۆی نەماوە بە داو و دڵ دڵی خۆی بە داوی زولفی داوە دڵم حەقی بە دەستە فتوایی سەری داوە کە ئەم غەزاڵە چاوە، شیرین تەشی دەڕێسێ قوتووی لوئالییانە لە زیوی داڕژاوە لەبالەبە لە حیکمەت لە شەهدی هەڵکراوە لەبەر نەزاکەتی ڕۆژ ڕەواقی دادڕاوە بە تەرزی درزی دەرزی لە خۆوە درزی داوە بە مەی عەیان کراوە، شیرین تەشی دەڕێسێ شیفای جەراحەتی دڵ تەشی نەبوو، کە ڕستی شەشپەڕی کاکی خۆیە پڕاوپڕە بە دەستی هەتیوێ کەللەشەق بوو بە داوی حیلە بەستی لە ناوی هاتوچۆدا بە لێوی غونچە گەستی بە ڕووح و دڵ بە قەستی، شیرین تەشی دەڕێسێ بە دڵ بە دیدە سووژن لە غونچەگوڵ یەرەق بوو شەشپەڕەکەی وەفایی کوڵوفت و تیژ و ڕەق بوو لە هاتوچۆی سەماوی گوڵ هەم وەرەق وەرەق بوو شەقایقێکە شەق بوو شەقایقێ کە شەق بوو بەڵێ چ موستەحەق بوو، شیرین تەشی دەڕێسێ ++++++++++++++++++++++ سەرناو: درێغا بای خەزان دایە بەهاری شۆخ و ڕەعناکەم درێغا بای خەزان دایە بەهاری شۆخ و ڕەعناکەم لە ئیزهاری عەمەل کەوت ئافتابی عالەم ئاراکەم وەرەق ڕێزان، خەزان کەوتە ڕەزان، وەزعی چەمەن گۆڕا بەسەرچوو فەسڵی گوڵگەشت و تەماشای باغ و سەحراکەم خەزان هات و چەمەن چۆڵ بوو لە نەغمەی بولبول و قومری درێغا! حەسرەتا! بۆ گوڵعیزارە سەروباڵاکەم لە گریان ئاسمان دامانی سوور بوو شینی گێڕاوە مەگەر گیراوە یا مایل بە شامە ڕۆژە ڕووناکەم؟ ئەدیمی بەختی من ڕەش بوو تەرازوو وا ترازاوە دەبێ مەیلی بە تائیف کردبێ تەئسیری شەعراکەم؟ لە من دوور بۆتەوە خورشیدی ئەوجی مەعریفەت، شایەد بە تیغی غەم سەری خۆم هەڵگرم هەمڕەنگی جەوزاکەم لە من وەحشی بووە ئاهووخەرامی لالەڕوخسارم مەکەن مەنعم کە هەروەک شێت و هاران ڕوو لە سەحراکەم بە مەحروومی لەگەڵ بەختی سیادا ماوە فرمێسکم لە تازیەی هیجرەتی خورشیدی عالەم واسورەییاکەم وەفایی پێت بڵێم: دونیا و دینت بۆچی بەرهەم بوو دەڵێن: ڕۆیی لەسەر دونیایێ قیبلەی دین و دونیاکەم نیشات و عوشرەتی دونیا بە نەشئە و قووەتی چاوە ئەمن چ بکەم لە دونیادا کە ڕۆیی نووری بیناکەم کە تۆ ڕۆیی، لەبەر چاوم کورەی خاکی بە ئاوا چوو! لە پاش تۆ، ئەی گوڵی نەوڕەستە، خاکی کوێ بەسەرداکەم؟ خۆشا بەو ڕۆژە عەکسی پڕتەوی حوسنت لە سینەم دا ئەوێستاش مەست و مەخمووری تەجەللای تووری سیناکەم خۆشا بەو وەقتە تۆ میرئاتی دولبەر بووی بە دڵدارم ئەوێستاش مەحوی دیداری جەمالی ڕۆژە حیرباکەم بە یادی پێکەنینی تۆ کە دەگریم و دەبارێنم دەبێتە مەنبەعی شیر و شەکەر شۆراوی دەریاکەم کە دەگریم بۆ جەمالی تۆ دیارە ئەشک و ئاهی من لە خورشیدی دەداتن دەم، ستارەی شامی یەلداکەم بە یادی تۆیە وا دەم دەم خورۆشی ئاه و ناڵەی دڵ لە تاو گوڵشەن دەناڵێ عەندەلیبە شێت و شەیداکەم فەلەک - خانە خەرابێ - بەزمی مەستانی وەها تێکدا نەما داری لە سەر بەردی، بە دەردی سەر چ ئاواکەم؟ لە ژێر باڵی هوما جێی بازی شاهی قەسری شاهان بووم درێغا! ئێستە وێرانەی، سیسار و جوغدە جێگاکەم لە ناڵێن کەوتووم بۆ دەستی یاری موتریب و مەجلیس وەکوو تاری گوسەستە تێک چووە بەند بەندی ئەعزاکەم دڵم بێهۆش و خوێنبارە لە دووریی نێرگسی ساقی سوراحی کەوتووە دەگری، دەڵێ: کوا بادە پەیماکەم؟ شکا پشت و دڵی من بۆ وەفاتی پیری مەیخانە بە چەرخێکی فەلەک وای کرد نە جامم ما نە میناکەم لەسەر حەوزی دەروونی، چی بەسەر هات هاتوچۆت قوربان؟ کوا دەم کەوسەر و خولد و خەرام و نەخلی تووباکەم؟ سەدای یاحەییی دەروێشان، نەوای یاهوویی دڵڕێشان لە دەوری خانەقادا بوو بە جیسم و ئیسمی عەنقاکەم هەتاکەی قەلبی من دەرهەم بێ ئەی ئیکسیری خاکی من؟ لە خاکی کوێ موقیمی پێم بڵێ؟ قوربانی ئەو خاکەم! لە سەر خاکی دەرت، قوربان، هەتا من بم هەتا سەر بێ ئەگەر تاجی سکەندەر بێ سەرم ناوێ لەسەر ناکەم هەتا ڕۆژی ئەبەد، قوربان، لە سەر عەهدی قەدیمی تۆم بەهەشتم لێ حەرام بێ گەر بەبێ ڕووی تۆی تەمەنناکەم ئەمن شاییم بە تۆ بوو؛ چونکە شاهی غەم ڕەوێنم بووی کە من شاییم لە دڵ ڕۆییوە، ئیدی دڵ بەکێ شاکەم جەنازەم دی سەری ڕاگرت و فەرمووی: گوێم لە ناڵەت بێ درێغا! جێبەجێ بوو، هاتەجێ تەعبیری ڕوئیاکەم خودا بۆ خۆی دەزانێ مەنبەعی نووری خودایی بووی درێغا! نەخلی ئەیمەن، مەزهەری نووری تەجەللاکەم نەسیمی فەیزی تۆ دین و دڵی دووبارە ئیحیا کرد درێغا! وەک مەسیحا باعیسی ئیحیایی مەوتاکەم دەلیلی تالیبان بووی، بۆ خودا، وەک ڕۆژ هوەیدایە درێغا! مورشیدی دەوران و خورشیدی هوەیداکەم لە سایەی تۆ گەلێ کەس بوونە عاریف، ڕێی خودایان گرت درێغا! عاریفی ڕێگەی خودا و ئەهلی تەقواکەم موریدانی دەری تۆم دی بە چاوی خۆم، لە ئینس و جان درێغا! بۆ ئیمامی ئینس و جان مەولایی ئەولاکەم بەڵایێک هات و پێی گیرا، بە بایێک نووری کووژاوە درێغا! شەمسی عیرفان و چرای تاریکە ڕێگاکەم لە حەڵقەی تالیبان وا هەر دەبارێ نوور لە تەشریفت درێغا! بۆ سەر و سەرحەڵقەیی ئەولادی تاهاکەم ئەمن نادان و نەمزانی، ئەرێ بۆچ عاریف و عامی وەکوو پەروانە سووتابوون لەبەر شەمعی شەب ئاراکەم؟ لەبەر چاوی نەزانان ساحیر و زەندیق و کافر بووی درێغا! پیری بەستام، قوتبی خەرقان، غەوسی بەغداکەم بە داوی دانە بۆ گیرا، بە دەریای عیلمی ئەسماوە لەبەرچی هاتەخوار ئادەم لەسەر فیردەوسی ئەعلاکەم؟ پەنای بۆچ بردە بەر دار ئەو کە دەیزانی دەبێ شەق بێ؟ نە ئاخیر ساحیبی ئایات و موعجیز بوو زەکەریاکەم؟ لە سیڕڕی نووری چاوانی عەجەب بێنوور و حیکمەت بوو بڵێ بۆچ پیری کەنعانی دەگریا، نووری عەیناکەم؟ سولەیمان خاتەمی ون بوو لە قودرەت ماوە نەیفەرموو بەڵا سەخرەی بە ئاودادام بەڵا ئاسەف لە دەریاکەم کەلیم ئێستا نەبووبوو چەند هەزار مەعسووم لەسەر وی چوو؟ دەبێ جوابی چ بێ ڕۆژی جەزا، گوستاخە مووساکەم لەبەر قەومی مونافیق بوو دەبێ هەڵبێ کە دەیزانی مەقامی خۆی وەکوو ڕۆژ ڕوونە روح اللهیی عیساکەم سەحابەی بۆچ شکا؟ بۆچی شەهید بوو گەوهەری پاکی؟ موحەممەد: باعیسی بوون، شاهی تاج و تەختی لەولاکەم شەهیدی دەستی کافر بوون کە ئەکسەر ئەولیایی دین جەوابی موددەعی چ بدەم؟ سکووتی بێحەد ئینشاکەم نە «ئاو» موختارە بڕوێنێ، نە «ئاور» تا بسووتێنێ نە «خاک» چی پێیە بینوێنێ، ئەگەر سەدجاری بەر «با»کەم عەدەم «باری» سەبەبکارە، وجودێکی حەقە دیارە بۆ خۆی فەععال و موختارە، خوداوەندی تەواناکەم بە مینهاجی خەلیلی حەق، بە میعراجی رسول الله دەبێ هەر بێتەجێ ئەمر و ئیرادەی حەق تەعالاکەم ئەتۆ چووی بۆ جیواری حەق ئەمن مام حەبس و زیندانی غەمی بەندەت هەبێ ئەی سەیید و سەردار و مەولاکەم بە سووڕەت گەرچی لێم دووری، بە مەعنا بەرقی مەستووری بەڵێ بەرچاو و مەنزووری دەڵێی تۆی نووری بیناکەم لە کوێ بتبینمەوە، شاد بم بە ڕووی تۆ، بێیە سەرچاوم؟ مەگەر چاوم لە دڵ بێ سینەکەم ئایینە سیماکەم دەمت بێنە دڵم مەشکێنە دەستم بگرە ئەو جارەش بە هۆشیاریم دەیێ ساقی، کە نەڕژێ جامی سەهباکەم غەریب و بێکەس و ئاوارە کەوتووم، دوور لە ڕۆحی خۆم بە دەردی بێدەوا ماوم، ڕەفیقان کوا مەسیحاکەم خوداوەندا! ڕەحیما! قادرا! ئامورزگاری خۆم کەریم و، حەییی و غەففار و، قەدیم و فەردە یەکتاکەم بە حەققی نووری وەجهی پاک و بێمانەند و بێمیسلت بە ئیسمی ئەعزەمی خۆت ئەی خودای سەتتار و داناکەم بە سەرمەستانی بادەی ساغیری عەهدی ئەلەستت کەی بە قەترێکی نەجاتم دەی لە دەست خۆم ڕوو لە دەریاکەم وەفایی بێکەس و داماوە پابەندی تەلیسمێکە مەدەد یا ڕۆحی غەوسی ئەعزەم و شاهی بوخاراکەم بە حەققی نووری موتڵەق، جەددی ئەمجەد، شاهی لەولاتان ئیمامی یەسریب و، قیبلەی مەلایک، ماهی بەتحاکەم بە حەققی چار یار و ئال و ئەولادی نبی الله بە ئەنسار و موهاجیر قائیدانی قیبلە گومڕاکەم بە ڕۆحی خواجەگانی نەقشبەند و قیبلەگاهی خۆم غەریب و جانسپاری کەعبە قوتبی دین و دونیاکەم بە قووەی جازیبەی دڵتان وەفایی دەست و دامانە چ نابێ گەر لە سایەی ئێوە قەتعی ماسوی الله کەم ++++++++++++++++++++++