شاعیر: ناری
کتێب: دیوانی ناری
سەرناو: بۆ غەزەل ئیمڕۆ بە من چاوم بە ناحەق گەڕ دەکەی
سەبارەت: بۆ ئەحمەد ئەفەندی

بۆ غەزەل ئیمڕۆ بە من چاوم بە ناحەق گەڕ دەکەی؟ 
من بە گزگل ئیحتیاج و تۆ بە لیمۆ شەڕ دەکەی! 


من لە بێلوودا بە بێ ئاو و بەبێ بوڕ کەوتووم
تۆ لە بەغدادا هەمیشە سەیری بەحر و بەڕ دەکەی


هەمدەمی بازی تەواری بووی لەبۆ سەیر و سەفا
ڕاوەکەو بۆ چی عەزیزی من بە واشەی گەڕ دەکەی؟ 


دڵ لە غەمدا وشکە هەر وەک پووشی وشکی شارەزوور
تۆ لە من تەکلیفی شیعری شۆخ و تازە و تەڕ دەکەی


مشتەری چونکە نەماوە بۆ مەتاعی نەزمی من
چۆڵە بازاڕی خەیاڵی ناری گەر باوەڕ دەکەی!

++++++++++++++++++++++