شاعیر: مەلای جەباری کتێب: دیوانی مەلای جەباری سەرناو: ئیلتجا بەردم وە تەکیە دارێ سەبارەت: سمێڵەکەی کابرای کاکەیی ئیلتیجا بەردم وە تەکیە دارێ لە خالق نەترس لە حەق بێزارێ هەروام پەروا کەرد چوومە تاسەوە دیم دەستێ ئاماو وە مەقاسەوە کەلیمەی تەوحید وە زۆر پێم واچان وە زۆر سمێڵیان تەمام وەرقاچام ئەگەر بوینی زەڕە ئیشەکەم گردەوە بکەم چنگە پوشەکەم لەی شەرمناکی لە خەجاڵەتە هەرگیز نەنیوەم کەس لەم وڵاتە شەرت بۆ من لە داخ ئەی سمێڵەوە سەر بنێم وە زێد ڕای سەر خێڵەوە ++++++++++++++++++++++ سەرناو: ئیمساڵ بەختەیەکمان گردبووە دان سەبارەت: شانامەی بەختە ئیمساڵ بەختەیەکمان گردبووە دان سەری ببڕین بۆ مناڵەکان وە سمکۆڵ چون ئەسپ زەوی ئەدڕی دەنک کا و جوی لە ماڵم بڕی دیم پەیا بوو یەک کولە بوری دیزەی ناپەسەن دەم چاو نەشوری واتش شێخ ئەوڵا وتهاش فەرمابێ تەشریف باوەری بی وەسەر شایێ خۆ منیش وە قوڕ گیراوی ماڵم دەسم کەوتوی وە دەس زاڵم هەرچەنێ گەڕام بۆ سورانەی شێخ ناعیلاج بەختم کردەوە لە مێخ کوڕ وە باوکەڕۆ، کچ وە ئای ئای کەفتەن وە شوێنم تا قەرقەچایی یەکێکیان وتی بۆ ناپرسی ئەحواڵمان لەی زاری و شیوەن لەی ناڵە ناڵمان وتم ڕۆڵە گیان ئەحواڵتان چییە؟ ئەم زیڕەزیڕتان لەبەری چییە؟ وتیان باوە هەناسەمان سەرد بی ڕۆن و گۆشتمان هە بەختە زەرد بی ئەوقەرە گریان لە زووان بوون لاڵ من بەختم هاورد ئەوان چون بۆ ماڵ من بەختم هێنا هەتاکوو باوە ئەوە ڕەنجم دا لەگەڵ مناڵا هەر چەندێ ئێمە ڕەنجمان لەگەڵ برد ئەومانیش بەگون ستارا خەرج کرد ئینە شانامەی بەختەی مرواری یاران بوواناش پەی یادگاری ++++++++++++++++++++++ سەرناو: ئیمڕۆ ڕام کەفتەن من وەی کرماشان سەبارەت: چینی کۆن ئیمڕۆ ڕام کەفتەن من وەی کرماشان چینی کۆنێ دیم زەوی نەقاشان واتم چینی کۆن قەدیم زەمانە ئیمڕۆ ڕام کەفتەن وەی کۆنە خانە کوا قاوە و قلیان مەجلیس تلیاقی دیوخان پڕ سەیاد بەهەشتی باقی چەن وەسای دەساو خاس نەقاش وەنەن نیم هەزار بەگلەران باوش بەردەن لێم وە قاوە و قلیان وە جەزوەی پرری نەدەر هوبەتو چون میر ئەیخورری هاشا وەی تاریخ ساڵ من چەنە هەوام وە هەوای هوبەتو بەنە ++++++++++++++++++++++ سەرناو: ئەو شێخەکەی خەم پی وەردەمان سەبارەت: یا میرە میرە ئەو شێخەکەی خەم پی وەردەمان دوشمنم مەزار کوپە و مەرمان لە باتەی چاکەی بول نیانەمان مزگەفتش کەردەن جل گوڕ خانەمان یا میرە میرە هوێت و نامووست مردە و زندەمان بەیۆ پابووست چەنی خەلیفە نەردێ بشانی ئیلتیفات وە تول داود بیانی هەر ڕۆژ بەیان قووش بوانۆ تێش دا ئاساری دەروێش نەمانۆ لێشدا ++++++++++++++++++++++ سەرناو: بادی لەیلا خان بادی لەیلا خان... بادی عەنبەر باد بورجی لەیلا خان مشنیای تای دێز بەڕەزای شاخان مەشاتەی گێسووی بڵند دەماخان نەسیمی مەحرەم مابەینی یاران شارەزای شوقەی شەوبۆ نەوهاڵان نامەیەک نە شەرح دڵەی پەڕ دەردم شەرحێ نە سەودای هەناسەی سەردم بێ خەیلێ وەختەن دوور کەفتەی زێدم غەیر جە تۆ وە کەس نییەن ئومێدم نووسانم وە زۆخ زامانی کاری برەش وە زامن تون وە دیاری نامەم بگێڵان وە هۆزانەوە بدەرۆش وە دەس دڵسۆزانەوە وە سۆزی سینەی دڵ خەراشەوە هامسەران یەک یەک بواناشەوە هەر کەس دڵسۆز بۆ سۆزێش نە دڵ بۆ دیگی دەروونش پەی من وە کوڵ بۆ بگرەوان باچان لێڵاییم لێڵەن بە نامەی مەلان نەزانی وێڵەن شەماڵ دەخیلەن تۆ وە دڵشادی باوەر نامەیەک گەردن ئازادی ئەوە من ڕۆییم وەلای ڕۆمەوە مەر دۆعای خوێشان باوەرۆمەوە سەر نیام وە پای موڵکی ڕۆمەوە مەر دۆعای خاسان باوەرۆمەوە ++++++++++++++++++++++ سەرناو: برا گەورەکەی شان و مل قەویم سەبارەت: بۆ سەیید قادری برای برا گەورەکەی شان و مل قەویم شەوال عمامەی شەو گرد شەویم چەرخی پدەرتە قررانی براتە فلسێ لە باتی گشت ئەقرەباتە ئاو هەواسان سەدای باوکەڕۆ ئینەم خاستەرەن لە برایەتی تۆ هەوای هەواسان ناسازی سەرتاف خاستەرەن لە حوکم ڕەئیس بێ ئینساف ++++++++++++++++++++++ سەرناو: خانی خاس خەیاڵ شای کەمەر لاڵان سەبارەت: بۆ شەریف چەلەوی هەمەوەندی خانی خاس خەیاڵ شای کەمەر لاڵان سەرداری سوپای گشت سیاه ماڵان سینەی کانە گەنج گەوهەر دانەی لاڵ فەرخوندەی فەڕبەخش سەحرای چەمچەماڵ ئومێدەن دەوڵەت سولێمانیش بۆ تەڵای دەس ئەفشار خوسرەوانیش بۆ ئەژنەفتم نوسخەی کورەی کاسەدەم یاوان وە خزمەت خانی خاتەر جەم پرساوی ئەحواڵ لەیلەکەی موڵڵا لەیل کەس چون لەیل من نیەن وەڵڵا بەڵام چی کەرین پەی جوان مەردی حاسڵ کومراز هەناسە سەردی دەردی عشق ویردەی خاتر غەمگین بۆ زەدەی زام وەدەس مەتار جەمین بۆ جورعەیە نە جام نەو ویردە بۆ لەیلی شیوەش کاریش کەردە بۆ ژەهری ماری دەرد دووریش نۆشا بۆ بەهرام پەی دوست نمەد پۆشا بۆ ڕویەوەی سەمەن شەو دێز نماوە وەو کول کمەیت جیهان پەیماوە وەو شەوقی شکار غەزاڵانەوە وەو سەودای سنوور نەوهاڵانەوە وەو شەعشەعەی ئەسپ خۆش ئاوازەوە تەشریف باوەردای جە ناسازەوە بدیای ئەی جەستەی خەستەی هەستیمە ئەی پەرێشانی ئەی سەرمەستیمە بپرسای پەی کێن ئەی عەبداڵیمە ئەی سەرگەردانی و وێران ماڵیمە ئانە قەیس پەی لەیل من پەی کێ وێڵم پەی کێ وێران ماڵ کەڵپۆس وە پێڵم وێنەی بایەقوش وە کەژ و کۆوە پەی کێ هۆهۆمەن تارو مەبۆوە وەلحاسڵ تۆمار دڵەی پەڕ دەردم شەرحی ماجەرای هەناسەی سەردم بنووسای وزەوخ یەکاویەک فەرد فەرد باوەڕ داش دڵەش پەی دەردەم وەدەرد داد لە ڕای بیمون خانی خاس خەیاڵ یا بە زەبر هوێت بە زەبر گەنج ماڵ مەلاش شاد کەردای وە دیین مولا خاستەرەن لە حەج بەینی و بینەڵڵا مەلا شاد کردای دیسان هەم و هەم خاستەرەن لە حەج کەعبەی موعەزەم ++++++++++++++++++++++ سەرناو: ساقی سادەی شی وەهار ئاماوە ساقی سادەی شی وەهار ئاماوە گوڵان سەرکێشان نە تۆی سەحراوە هەوای دڵگوشاد ئەردی بەهەشتەن فەروەروی سەحرای گەرمەسێر وەشتەن وادەی بادەی ناب سەیری وەهارەن سەر زەمین مەزهەر لەقای دڵدارەن زەمزەمەی مەزاق دڵ ئەفگارانەن سەدای تەپڵی تیپ دەردەدارانەن وەقتی نۆشاونۆش سەبووی قەرقەفەن دەنگی زەلەی زیل دائیرە و دەفەن درەختەن سەوزەن شنۆی شەتاوەن نەورۆزەن سەوزەن هەوای پای کاوەن مەیەن مەعشووقەن موحبەتەن مەیلەن خەمان لەبریزەن پیاڵان کەیلەن شەڕەن شۆڕشەن غەوغان غەریوەن مەر جلوەی جەمال دڵان فریوەن نە گشت دیارێ تەجەلای توورەن فیتنەی گیرودار قەتڵی مەنسوورەن فنا فی اللهان مەست دڵەفگا بێباک مەواچان إنّی أنا الله ڕەندانی سەرمەست جان فیدای جانان أنا الحَق چون زیکر زاهید مەوانان بۆ تا بگێڕین خەسرەوی بەزمێ چەنی هەستییە بکەرین ڕەزمێ بەزمی چون مەجلیس بەهمەن وەکام بۆ گا حەدیسی جەم گا باسی جام بۆ گا گۆش نە سەدای چەقانە و چەنگ بۆ چەم نە تەماشای ساقیی گوڵ ڕەنگ بۆ ئەی ساقی دەخیل من وەی زامەوە ئیلتیفاتێ کەر! بۆ وە لامەوە! عیلاجێ پێم دەر سوودەمەندم بۆ باعیسی حەیات قەیدی بەندم بۆ ڕەستگارم کە لەی بەند و دامە قەدەم ڕەنجان کەر! وەعدەم تەمامە تەشریف باوەرە وەو سەبووتەوە وەو پیاڵەی گوڵ ڕەنگ چون یاقووتەوە وەو سینەی سیمین زەرفی زەڕەوە وەو جامی گوڵ فام بۆی عەنبەرەوە هەر کەس بگێڵۆ جامێ پەی کامێ دەرمان پەی ئێشی هەر دەرد و زامێ موتریب تۆیش وە چەنگ دڵنەوازەوە وەو سۆزی سەمتوور سەدای سازەوە وەو موزیقەی مەشق سەد قانوونەوە دەم وە سەدای ساز ئەرغەنوونەوە مەرباچان مەلایش نە هەستی هویش ڕەست بی وە کاسە لێس مەستانی ئەلەست ++++++++++++++++++++++ سەرناو: سینەش وە باخچەی لیمۆ و بەیەوە سینەش وە باخچەی لیمۆ و «بەی»ەوە مەوقووفەن وە سام «حەی»ی «نەی»ەوە حەی و بەی و نەی تەسریفەن وەهەم حەییان مەگێڵیان گوڵ باخچەی وەدەم مەر بادی شەماڵ بەیۆ پەیان پەی نە هەم جیا کۆ حەی و بەی و نەی ++++++++++++++++++++++ سەرناو: سەییدی دین خاس سەییدی دین خاس... میرزای پاک مەزەب سەییدی دین خاس پەروەردەی وەچاخ بارگەی سەید هەواس کولین حەرەم دایە ڕێزوار ناس دەی سا بۆ وە عەشق خوکان پای داغ بوز قدیم ساڵ جە ناساز یاتاغ بەشق خەزنەکەی خەلیفە باپیر جای زیارەتگای بەر سمیل نەگیر بەشق موقەسەم شەروال شیرداخ جەم جەم یاران پف پف چراخ بەشق تول سەوز پەروەردەی داود ئێستا نەشکستەی ڕای باوەڵ باود هەر کەسێ یارێ مەکێشۆ پەی وێش باجەتی ئەو شەو قەوم و کار و خوێش هەتا کارخانەی شەفەق مەبۆ شەق زەراقی شانەن بێ پەروا جە حەق نامەیەک کیانای شیرین نامەیەک مەرقووم وە تەحریر شیرین خامەیەک فەرماویت گوایا عەلی کوڕەی من قورمەش بەردەن جە زێد و زامن چەنی ئیمامان قوبەی نوور گومەت کیانا ویت شفیع پەرێ قورەمەت قەسەم وە نووزە نووزەی پارکولە بەستە بۆم حەزرەت گا حول نە هولە توول سەوز نەگڕ ئاهر نیابام خەنجەر نە کەللەی خان ئەحمەد دابام دایە ڕێزوار خەراپ کەردە بۆم دوکان داود پڕ ئاو کەردە بۆم کەردە بۆم نماز، گردە بۆم ڕۆزە پەی عەزمی وزوو سەندەبۆم گۆزە ڕوو ڕەش بام وە تۆز ڕای مەدینەوە شایەم بەردەبۆ وە کولینەوە کەلیمەی تەوحید بە دڵ واچابام بەر سمێڵ وێم تەمام قاچابام خەڵکان بوینام نە پای میمبەردا بکێشام پەردەی خجڵەت وە سەردا ئەمانەم یەک یەک ئامابۆ وەسەر قورەمەت ناماوی بیم و وەی بەر مادام بردەبێت نام گا حول چەم سیە ئیتر بقیەی ئیمامان پەی چییە؟ ++++++++++++++++++++++ سەرناو: شیرین بەستەوە شیرین بەستەوە... شیرین ئەساسەی سەروین بەستەوە دەس هاورد وە زوڵف دەستە دەستەوە پەخش کەرد وە دوران دییەی مەستەوە پەخش نە خور ئێوارەوە چون توڕڕەی تەیموور نە تۆمارەوە خاڵ نە حاشییەی زنج و دەمدا چون هندی نە دەور چای زەمزەمدا چەم نەشئەی دییەی دەلیلەی ڕەمدا خەسرەو خەڵتان کەرد نە دەخمەی دەمدا نمەز چی باچین وەی زەنج و دەمدا ڕائحەی نفس عیسای مەریەمدا مەسقەل وەی خاڵان ماه دوو هەفتەمدا سەنەم خانەی چین گشتدام وەهەمدا سانع «شیرین» یش سەر تا قەدەمدا تەوعیز وە ئایەی ئیسمی ئەعزەمدا خەرامان خێزیا وەڕای حەرەمدا پەی قەتڵی مەلا وا حاتەم دا ++++++++++++++++++++++ سەرناو: شیرین تاتا کرد شیرین تاتا کرد... تای توغرای تومار ڕێزش تاتا کرد کو کو کوی کەڵاف عەنبەر وەلا کرد خەرمەن خەرمەن میسک خوتەن وە با کرد پەنجە برد پەرچین نە هەم جیا کرد تەختی پیشانیش بەدەر دو جا کرد حاجیان دوو قەوس پایەی سەما کرد موژان تەورتیر توشنەی غەزا کرد گیسووی سەراوێز چون بەڕەزا کرد سەر نەتۆی جامە و دووگمە و قەبا کرد ساقی ستوون سیم تازە جەلا کرد خڕەی خڕخاڵش خەلای باڵا کرد دەم نوکتەی مەدهۆش لایَجزا کرد لە لوولەی گەوهەر لوءلوی لالا کرد خەم چەشمەی حەیات کەس نەنۆشا کرد چەن کەس چون یووسف خەریکی چا کرد غەبغەب چون تورنەج کەس نەبوسا کرد گەردن سورای ساف سەبووی سەبا کرد وەو شنۆی شەوبۆ شەماڵ شنیا کرد نە سایەی سەمەر لیمۆش جیا کرد ناف وە عەتری ناف عالەم عەتا کرد هەر با چون وە میسک خوتەن خەتا کرد یان وە عەسای دەست کَلیمُ الله کرد یان وە تەلیسم کۆی گەنج کجا کرد قامەت تەرزی تول سەوڵی ساوا کرد ئەوسا وا مەئوای جەننەت ئاوا کرد سورین چون شیرین بانووی کەسرا کرد ڕژگ ئەفزای ئاهوو، سوب نە سەحرا کرد نمەز پەنجەی پا ی حومرەی حەنا کرد یان وە هوونی سورخ جەرگ مەلا کرد ++++++++++++++++++++++ سەرناو: شیرین جە لاتەن شیرین جە لاتەن... ماچان دەوای دەرد دییەم جە لاتەن دییەم وە دییەت حەکیمان واتەن دەرمانی دییەم گەرد لای پاتەن چەن حەکیمان دەوای دەردم نەوەردەن ماچان دووری تۆن تەئسیرش کەردەن جەلای دینی دۆست نییەن تیشەیا دەردی دووری تۆن شییەن پیشەیا بەڵام وەفات بام جای غەم کوراسان دەوا بەخشی دەرد دییەی تێش داران مەر نەژنەفتەنی یەعقووبی چون بی لە دووری یووسف دییەش چون من بی ناگا نەسیمێ نە جامەی دڵسواز داش نە دەماغش دییەش کرد وە باز تۆیش بە عشق ئەو شا شکلت نایافتەن ئەو کەسەیش تەسنیف هەستیش تۆ سافتەن بادەتی زوڵفان سیای سەر خەمت بەعشقی دوو دییەی دەلیلەی ڕەمت گەردی تووتیا تۆزی نەعلەینت پێکیان پەی مەلا پڕ وەفا و مەیلت بماڵم لە چەم، ساکن بم نە دەرد پەڕی سۆمای سەیر خاڵانی بێ گەرد مەلا سەودای سەیر خاڵی تۆ پێشەن دوور با تۆ نەوی، دییەم پەی چێشەن ++++++++++++++++++++++ سەرناو: شیرین سەرزەمین شیرین سەرزەمین... خێزیا پەی سەیران سەحرا و سەرزەمین دەس بەر پەی زوڵف و حاشیە و جەبین وەڵاو کەرد لە ڕووی مای دوو هەفتەمین دەس بەرد عەرەقچین توهمەی تاقەچین قەرار دا جە فەرق کڵافچەی موشکین قەتارەی قوڵەنگ تورمەی سورمەی زەڕ ئاوێزان نە دەور چەفیەی خورشید فەڕ سەوزە کڵافان دێز وە پیلەوە دەماغ وەی هەواو گەشت گێلەوە لەیلیم وەی ڕەفتار وەی گوڵ گەشتەوە وەی عەزم سەیران سەحرا و دەشتەوە وەی دەستەی گوڵان لای سەروێنەوە وەی نیم نیگای ناز ئاهووی چینەوە وەی تورمەی تاقەی کەچ کڵاوەوە ........................ . وەی سەر و سەروێن سیا ساتەوە وەی ئەگریجەی مرخ قەی چیفاتەوە وەی گیسووی تەمەن بەهرام گیرەوە وەی سلسلەی زوڵف چون زنجیرەوە وەی زەڕڕەی گەوهەر گۆشەوارەوە وەی زەنگۆڵەی زێڕ پای قەتارەوە وەی تۆپ تەڵای زنجی زەردەوە وەی مینای گەردەن ماول مەردەوە وەی سینەی سفید سەرجی سافەوە وەی دوو لیمۆی پڕ شەفافەوە وەی جامی جەبین نوور پێ وەشتەوە وەی چەشمەی حەیات کەس نەچەشتەوە وەی ساقی نەسیب سونعەت ژەنەوە وەی خڕەی خڕخاڵ تەڵا بەنەوە ڕیشەی جەرگەکەم پێکاوە پاوە سەر پەنجەش وە هوون جەرگی مەلاوە ++++++++++++++++++++++ سەرناو: فەلەک زەیارەن فەلەک زەیارەن... خەلایق پەشێو زار و زەیارەن دارا و نەدارا یەکسەر خەمبارەن چەمەڕای ڕەحمەت فەزڵی جەببارەن موحتاجی موفلس، گەدا و فەقیر غەنی و بێنەوا، نەبینا و ئەسیر ئینس و وحووش و تەیر و موور و مار زومرەی حەیوانات سەغیر و کوبار جە نامەی ئەمتار وەعدەش ویەردەن ڕووشان جە قاپی ئەعلای تۆ کەردەن کەردەنت ئیجاد سەحرا و سەرزەمین ڕەزاق و ذی روح رَبّ العالَمین پادشاهی- عەزیم و جەبار ستار و سەرپۆش واحد القَهّار بە یەکتایی هویت فەردی بێ هەمتا بە ڕۆحی شەریف ڕەوزەی مستەفا بە پێغەمبەران، ئادەم چەنی ڕووح بە شیس و ئیدریس، هوودی پڕ فتووح بە زەکەرییا، بە سەبری ئەیووب بە حوسنی یووسف، بە نەوحەی یاقووب بە مووسای کەلیم، وەو عیسای مەریەم بە گشت موڕسەڵان نامان وە قەڵەم بە گشت شەهیدان دەشتی کەربەلا یەکاویەک تەسلیم لە ڕا جانفیدا وەو ئەولیایان ساف و بێ ڕیا خالس و موخلس فناءُ فی الله جاری بۆ ئەمتار، ڕەحمەتی واران کەرەم ڕێزان کەی چون هەردەیی جاران دیسان سەر جە نۆ، جاری بۆ سەیلات خوزرا بۆ کەژ و سەحرا و سەر بیسات زومرەی حەیوانات وە تۆ مەنازان ڕەزاق هەر تۆنی ڕزقیش مەوازان ڕەحم کەری پەی عام، ڕەحمان و ڕەحیم عادل و مەعدەل، ڕەزاق و قەسیم وە کەردەی مەخلووق نەحس و بەدکردار عاسی و عوسیانبار، شووم و شەرمەزار نەیەری جەزای عەبدی ڕووسیاه مەردوود و موزنب، مەلعوونی گومڕاه غَفّار الذنوب هەر تۆی پەنامان غەیر جە قاپی تۆ نیەن ڕجامان ++++++++++++++++++++++ سەرناو: لەرەی لەرزانە دڵ هاورد وە لەرز سەبارەت: نێرگەلە لەرەی لەرزانە دڵ هاورد وە لەرز قەهقەهەی شیشەی نەمام عەرعەر تەرز قەهقەهەی شیشەی ئاو ستێزاوە دیسان دور نە فرق مەجلس خێزاوە ++++++++++++++++++++++ سەرناو: لەو بەیانەوە لەو بەیانەوە... حاڵێ پێم یاوا لەو بەیانەوە کێ دییەن ڕەوشەن وە زۆڵماتەوە تاریکی وەڕووی خۆرهەڵاتەوە؟ دەس و پا ڕەنگین وێنەی کەوەنی تەڵای دەسەوشار کەیخەسرەوەنی مەجلیس نشستەن وە دەورانەوە ساقی مەگێڵان وە فنجانەوە ساقی پێم بدەر جامێ پەیمانە با خاڵی نەبۆ گۆشەی مەیخانە ++++++++++++++++++++++ سەرناو: میرزام دادی من میرزام دادی من... هیچ نامان جواب، نامەی دادی من داد لە دەس بەختی مادەرزادی من نەیاوان وەگۆش کەس فریادی من هوێم کەردە مەجنوون تۆم وە نەوفڵ کەرد پەی خەیلی دۆعام خێر وەدڵ کەرد تومار تەعریف دڵەی ڕەنج وەباد کیانان پەی خان خاس خاتر شاد وتم بەل تۆش چون کەیخەسرەوان یەلغار مەکەری جەنی مەشەوان سەر تۆ خەیل مەکەی ماڵ مەدی خەیلی مەلا شاد مەکەی وە دین لەیلی خۆ من نەزانام شێواوە زەینم عالەم گشت وەعام مەکەران مەیلم بیمە سەرزەنشت هامسەران هوێم بەدان گشت تەعنەی بەد مەواچان پێم ئینجارە وەشبای وەو ئەساسەوە وەو ئەساس خاس زەرین تاسەوە وەو تەپڵ منیر تەڵا و بەختەوە وەو خڕەی خڕخاڵ تەڵا و ڕەختەوە وەو گشت نازداران ماوی خاڵەوە وەو سەیر سەحرای چەمچەماڵەوە منیش هام وەی دەرد چار نەوەردەوە شەماڵ سفتە سوم بەرد وەهەردەوە وەی نزگرەی نەزع وەی گیان هەڵاوە سەر بنەم وە سەنگ سیای ساراوە شەرت بۆ ڕووی دیوان وەرنە گشت باسێ بەر نەگەشت حساب خاس و ناخاسێ لە دەس یەقەی هوێم وە پارەکەم هەڵقم هەڵفاو ویز پای قەنارەکەم تا مەحشەریان وە قەتارەوە بەیان بوینان وە سێدارەوە باچان یە مەلای دەروون پڕ نەفتەن دادش وە دیوان قیامەت کەفتەن ++++++++++++++++++++++ سەرناو: میرزام یە وەعدەی نەو وەهارانەن میرزام یە وەعدەی نەو وەهارانەن سەرەتای تەلمیت خاتر دارانەن فەسڵ وەسڵ دۆست سەیر هەردانەن لەڕەی لەڕزانەی زەنەخ دارانەن زەمزەمەی بوڵبوڵ، دەبدەبەی گوڵەن نە زارەی هوزار دەروون پەڕ چڵەن نە پرشەی شەونم نە ڕووی پەردەوە نەرگز مەست چەم وەلاو کەردەوە نەقارەی منقار تەیرانی سوب خێز بێزەنان نەغمەی نەکیسای پەروێز چریکەی چەکاوس چون حەنجەرەی عود مەر دەنگی چل چەنگ پەنجەی بارەبود هۆ هۆی بایەقوش شەو وە هەردەوە زامی دەردینان تازە کەردەوە دەنگی قیڕەی قاز سوب نە سەحرای سووس مەر موزیقەی مەشق شەهەنشای عەرووس تیپ تیپ قوڵنگان قەتارەی قازان میرزام تا وە ژوور ئاوات مەوازان جەرەس وە ئاهەنگ خۆش قانوونەوە دەنگ وە سەدای ساز ئەرغەنوونەوە قومری وە قووقووی نەغمەی هوێشەوە مل وە تەوقی زەڕ وەفا ڕیشەوە قوقوشەن وە فەرق شاخی سەروەوە مەر حاجی وەرای سەفا و مەروەوە قەواقوی قەتار قوڵەنگی تیژ پەڕ کەردەن هۆش و گۆش کەڕڕووبییان کەڕ فەرشی فەرەح بەخش سەوزەی قەدەم خێر فەرشەنەن وە مڵک سەحرای گەرمەسێر دەی ساجەی دەمدا هەر کەس دڵێش بۆ چوین بوڵبوڵ هەوای سەودای گوڵێش بۆ یا خود چوین فەرهاد دڵ ئاهەرین بۆ مەزەی مەزاقش نامی شیرین بۆ یا خود جە دەروون مایە مەیلش بۆ چون مەجنوون هەوای خاڵی لەیلش بۆ مەبۆ ئەزمی سەیر سەوزە و سارا کۆ دامانش نە هوون دەروون دارا کۆ نەو فەیزی فتووح نەو وەهارەوە نەو بەیزای ئەنوار کۆی دڵدارەوە سەیری سەحرا و دەشت سەری دیارانەن ناڵەی مورغەزار... مێرغوزارانەن دۆست لە بەهانەی دڵستانی بۆ لا قەید نە جەواب «لَن تَرانی» بۆ شەو سەرگەردانان سەر ئازاد کەرۆ شیان وە وادی أیمَن شاد کەرۆ مەر مەلایش نیشۆ شەو نە دەیجووردا نە تیرەی تاریک سیای بێ نووردا ئەر ستارەم بێ نەوا و بەرگ بۆ وە دینی دڵدار هویت شاد مەرگ بۆ ++++++++++++++++++++++ سەرناو: مەحموودی پڕ جوود غەزنەوی تەرزم سەبارەت: لە جوابی فەرەنجییە دیارییەکەی مەحموود پاشای جافدا مەحموودی پڕ جوود غەزنەوی تەرزم کیانابێت جلێ پەی دەفعی لەرزم ئەو شاهەنشا نەرد نیک و بەد شانا پەی تۆ تەوقی زەڕ پەی من جل کیانا ڕەزام وە قەزای ئەو سوبحانەوە ئەر سەد مەجرووح بام وەی پاڵانەوە تۆیش وەش بای وە تەوق ساف تەڵاوە حەق ڕووت نەکەرۆ وەلای بەڵاوە ئافەرین میرزام خوات لێ بۆ ڕازی تەکزیبت نەکەرد خواجەی شیرازی ++++++++++++++++++++++ سەرناو: مەلا تاڵەی من سەبارەت: خەوەکەی پوورە ڕێحان مەلا تاڵەی من... بنوور وە کتێب پەرێ تاڵەی من عالەم ڕەم کەردەن شەو لە ناڵەی من ---------- هورمیکت دییەن بە هویتەوە ئەر خێر، ئەر شەڕ، هاتە ڕێتەوە دیت خشە خشێ لە لای جێتەوە هێواش هۆرزیا نیای پێتەوە وەی ئیشارەی دەس تالعت شەڕ بێ لە نیوەشەوا ناوگەڵت تەڕ بێ تومەز شەیتان بوی ئەغوەی برد وەنەت پڕ وە پڕ وە زۆر حەربەی دا لە نەت قایمی بگرە جڵەو زووانت یە چوون خەوێ بوو قوڕ وە باوانت خەوی تۆ فیتنەی عەینی عەیانە تاریک و ڕۆشن بەری بەیانە ئیزهاری مەکە سڕڕی پەنهانە ---------- ئی قسە من زانام با نەزانۆ کەس خۆت مەکە غەڵتان ماتلی وەدەس دەرمانی هەنەن لە لای مەلای هوێت گۆش ڕاگرە من واچیم پەرێت مشتی لە چوغان هی جەوەل ناساز پەنج دەنک بیبەر لەگەڵ شەش لەق پیاز یەک گوێلی نمەک لەنی زەنجەفیل بکەش بە یەکدا مەبۆ بە فتیل هورد هورد بکوتەش وە دەسکی هاوان بیتەپێنە گەڵ ئەی خوشکە ڕێحان ئێشی زامەکەت ئەکزێتەوە ئیتر کەس وە شەو نانێ پێتەوە ئیتر خۆ شوومی پیسی قەساوەت نابینی بە چەم تا وە قیامەت ++++++++++++++++++++++ سەرناو: نازار نەزانی نازار نەزانی... حەرفێ مەپەرسام لە ڕای نەزانی جە کۆت هاوەردەن فەیرۆزەی کانی نیانت وە تەخت لەعلی ڕۆمانی قەدیم لە وێتەن یا ئیساسەنەن یا لە نەقشی چین فەخفوورت کەنەن ئەوسا من تۆم دی نەیوەر نەوڕەس وێت ناشییە شکار دوور نە هەوەس وێت ئەوسا مارانت یەشتا مار توول وێ داوت کلف نەوێ، لوولت مەلوول وێ ئێستا مارانت سام لە «حەی» سەنەن لەی ئەنازی گاز وازی وەزەنەن شای ماران وە حوکم مۆرە ڕا کەردەن دەس پەی قفڵی باخ کاف و لام بەردەن چون شەماڵەی شەمع گڕ گڕانمەن پەی پاسی ماران زەنگ زڕانمەن هانای من یەکی ماری تۆ گەستەن تەروالەم نەدور ئاوەدانی بەسەن حەی وەچان چیەشەن لەولای دامەوە بوسەشان کەردەن نە پەنامەوە بی کی بۆ نەی عومر ووێش ویردە بۆ شاه مۆرەی جمهوور پەیدا کەردە بۆ ++++++++++++++++++++++ سەرناو: پاشام گا مارۆ سەبارەت: دیارییەکەی مەحموود پاشای جاف پاشام گا مارۆ... بۆت بکەم تەعریف هوێت گا مارۆ سەت کەڕەت هوێتەن ئیزرە و ئارۆ وە سەرت قەسەم خوێ خاس نەدارۆ گایەکم مەبۆ جوانە گا بۆ مل کوڵ، سینە پان، پیاڵە چا بۆ گەڵباخی زگ زل ناف لە زەوی بۆ سم سیاو، دەم شۆڕ، چوار پەل قەوی بۆ نەک لاشەی بێ ڕۆح هەنامش گا بۆ لە جفت بێزار بۆ خەنیم وەکا بۆ نەک خەتێ بلۆ و دوو خەت بخەفۆ هەنگامێ بلۆ چینێ بکەفۆ نەک بێ پەروا ڕۆحش جەمەهانە بۆ پۆستش وە سەودای دەبەخانە بۆ نەک پیر سەد ساڵەی ڕزیای مەعدووم بۆ گووسالەی ئەیام میری مەرحووم بۆ ++++++++++++++++++++++ سەرناو: گەر مەیلت نەوێ لەی گریانەت چەس گەر مەیلت نەوێ لەی گریانەت چەس هامشۆی گەرماوگەرم، ماڵی مەلات چەس وێنەی ئاهوو بەڕ نەیگردە هەراس پاسی دوور ئەکات لە خۆفی ئەڵماس ئەی هاوار هاوار ئەی مەلا دەخیل فڕەی فەوارەی هوون لە زخی میل ++++++++++++++++++++++ سەرناو: هەر چەند نێرەکەر گل و گومییە سەبارەت: بۆ هاجەر خانی براژنی هەر چەند نێرەکەر گل و گومییە هەر چەند ئەسپ بەن ئاغای ڕۆمییە سی باتمان تورش، دوو باتمان پیاز لە گەڵ ئاوە گەڕەکەی پای جەوەل ناساز هورد هورد بیکوتی لە هاوانا بیساویتە قنگ هاجەر خانا بیدەی لە دەفتەر دارا و نەدارا هەر چەندی حوشتر جربە و هاوارا شیر خوشیلک دۆشاو مار گیر ئاڵەت و بیبەر زەنجەفێڵ و سیر دووبارە بیکوتی ناو هاوانا بیساویتە قنگ هاجەر خانا نەوەک ئەی زامە تەشەنە کەرۆ دوا جار دەرمان فرە بوەرۆ ++++++++++++++++++++++ سەرناو: یەک ڕۆ ڕاویار ئەزمی کارێ بیم سەبارەت: دیمەنی دڵدار یەک ڕۆ ڕاویار ئەزمی کارێ بیم لە گوزەرگای عێڵ چەم خومارێ بیم جەبین ڕشتەی سنع لقای ئیلاهی تەن وەتۆی تافدەی سفیدی شادی سەر جە سای سەیوان شەدەی سنجاق ڕێز هوونی فەرهاد بی شیروو و پەروێز دەینی سی هوونش شییەن نە گەردەن کەم تەرواهی جە قاقان کەردەن هیچ کەس نەمەنەن لە نەسڵ نەوشیروان دەور هوونی خەسرەو بسانۆ لێش وە جەور تاڵاڵ وەبان ئافیق قرمز باوەرۆ جە هوون فرزەندی هورمز ++++++++++++++++++++++ سەرناو: ئایا ئەو شوێنە وادی ئەیمەنە ئایا ئەو شوێنە وادی ئەیمەنە؟ یا دەشتی کوردە پڕ لە دیمەنە ++++++++++++++++++++++ سەرناو: پەی یەکێ بمرە پەرێت مەردە بۆ پەی یەکێ بمرە پەرێت مەردە بۆ ئەو لە تۆ زیاتر ئیمان هەردە بۆ ++++++++++++++++++++++ سەرناو: گەردوونای گەردوون کەردەنش مەیلان گەردوونای گەردوون کەردەنش مەیلان منیش وەک ئەختیار تەپەلو لەیلان ++++++++++++++++++++++ سەرناو: هەرچی لە نەوەی قەومی جافییەن هەرچی لە نەوەی قەومی جافییەن سەناشان مەکەن جافی کافییەن ++++++++++++++++++++++