شاعیر: بێسارانی کتێب: دیوانی بێسارانی سەرناو: ئاخ پەی مناڵی سەبارەت: هێنانە سەر ڕێنووسی هۆرامی: ئاکۆ مارانی ئاخ پەی مناڵی... ئاخ وا درېغا پەرێ مناڵی گۊشەی خاترم جە خەم بی خاڵی لاقەید بیم جە تان، جە وەشی و تاڵی هەر بازیم مەکەرد من چەنی یاران مەشیم وە باوەش نازک نازاران نازاران جەمین لېم نمەپۊشان مەکەردم سەیران زوڵفی وەشبۊشان ئیسە جە شوومی زەمانەی باتڵ نازاران یەک یەک لېم مەکەران سڵ ++++++++++++++++++++++ سەرناو: ئارۊ خەزانێ دوور جە پای نەمام سەبارەت: هێنانە سەر ڕێنووسی هۆرامی: ئاکۆ مارانی ئارۊ خەزانێ دوور جە پای نەمام زایف و زەبوون هیجران سەرئەنجام ئەویچ بە جەستەم مەناڵا بە زار بە جەفای هیجران مەکەردش ئیقرار پەرسام هەی زەدەی گەردوونی بۍ ڕام زیندەیی سەر شووم، دوور جە پای نەمام چ بەدبەختیتەن پېسە پېت ئامان؟ مەرنە خاوت دی دووریی نەمامان؟ واتش هەی بۍ دەرد دەروون پڕ جە خار سەرگەشتەی هیجران، زەدەی ڕۊزگار یە هیجران کەردەن، جە دیدە کۊر بام نە تەرز مەوینوون، نە باڵای نەمام ++++++++++++++++++++++ سەرناو: ئارۊ خەزانێ زەردبامم وینا سەبارەت: هێنانە سەر ڕێنووسی هۆرامی: ئاکۆ مارانی ئارۊ خەزانێ زەردبامم وینا کەفتەبۍ نە گول، تافی لاڵ مینا عەکسش دیار بی، نە گول ئەو تاف چمان من مدېیام، نە ڕووی جامی ساف شیام هۊرمگرت دېیام پېشدا چمان چەمم دان وە سەری نېشدا ++++++++++++++++++++++ سەرناو: ئارۊ خەمانم چۇن دەماوەند بۍ سەبارەت: هێنانە سەر ڕێنووسی هۆرامی: ئاکۊ مارانی ئارۊ خەمانم چۇن دەماوەند بۍ دیدەی قیبلەی وېم بەندی شەوبەند بۍ واتم ئەی قیبلەم ئیمان و دینم من بە دیدەی تۊ دنیا مەوینم مەر نەئیشەڵا ئېشێ هاتېشدا پەوکەی شەوبەندت ئاورەردەن پېشدا واتش بۍ ڕامەن، وە شەڕ شەریکەن هۇنینی، دەردین، ڕاوېیار پەیکەن ئەر مەرەخەس بۊ چۇن هەردەجاران دەییار نمازۊ جە ڕاوېیاران منیچ جەو بۊنە مەحبۇسم کەردەن هۇنی ناحەقم نەیۊ وە گەردەن سازانام تاقی حەقش بە دەستەن ڕاوېیار کۊشەن، ئەنقەسش بەستەن ++++++++++++++++++++++ سەرناو: ئارۊ دیم بە چەم، نازک ئەندامێ سەبارەت: هێنانە سەر ڕێنووسی هۆرامی: ئاکۊ مارانی ئارۊ دیم بە چەم، نازک ئەندامێ ساوای تەن تەڕاو، تۇڵە نەمامێ عەرعەر باڵایێ، شای جەمین جامێ زوڵفان چۇن کەمەند خەیاتەی خامێ گرتەبېش وە دەس تۇڵێ جە عەرعەر ساوای نازک تەن، سافی ناز پەروەر گاه بە دیڎەی ناز مەڎېیا پېشەدا گا مەگېرت وە بەژن، باڵای وېشەدا هەر وەخت پەیش مەڎېیا وە نازی چەمان چەفت مەبی جە تاو موژەش، چۇن کەمان ئەوسا مەگېرتش ڕاست چەنی باڵا مەلەرزا و مەکەفت نە پاش مەلاڵا یانی جە هەر کۊ نەمامێ باخ بۊ یا ئەو وە باڵای وېش بە دەماخ بۊ هەنی وە باڵای وېشان نەنازان ئاوات وە سایەی، باڵاش بوازان ++++++++++++++++++++++ سەرناو: ئارۊ شېیام دیم ڕەنگی خەزانان سەبارەت: هێنانە سەر ڕێنووسی هۆرامی: ئاکۊ مارانی ئارۊ شېیام دیم ڕەنگی خەزانان حاڵېشان نېیەن، ئېمە نەزانان دیم بە تەرزەوە خەزانێ بەی تەرز تەمام حاڵی وېش پەرېم کەردش عەرز پەرسام یە چېشەن ئی زەردی خەزان؟ وات مەیۊم نە خاو جېیایی تەرزان واتم من و تۊ هەر دوو جەستەمان ئېش مەکەران زام ماران گەستەمان تۊ جېیا جە تەرز، من جە باڵایێ تەڕتەر جە نەرگس، سەوڵی ئاڵایێ داخی جېیایی نەو تووڵ نەمامان تۊ نە خاوت دی، من پەنەم ئامان ++++++++++++++++++++++ سەرناو: ئارۊ وېنەی وېم، دیم خەزانێ زار سەبارەت: هێنانە سەر ڕێنووسی هۆرامی: ئاکۊ مارانی ئارۊ وېنەی وېم، دیم خەزانێ زار بەند بی بە زامەت، جەور و جەفای خار ئەو جە دەردی وېش بۍ مدارا بی خار چەنگی زامەت لېش وېیارا بی بە زارزارەوە هەر وېش مەشانا جە زامەتی خار دۇریش مەنمانا خار شەرمش نەکەرد جە ڕەنگی زەردش تا بە جەفا و جەور سەد پارە کەردش فەرزەن جە هەر کۊ دەردەدارێ بۊ زەدەی زامی سەخت نېشی خارێ بۊ ئەویچ چۇن جەستەی من دەردەدار بۊ یا بەی تەور زەدەی زامەتی خار بۊ ++++++++++++++++++++++ سەرناو: ئارۊ ڕاگەم کەفت شیم وە چەمەندا سەبارەت: هێنانە سەر ڕێنووسی هۆرامی: ئاکۊ مارانی ئارۊ ڕاگەم کەفت شیم وە چەمەندا دیم بوڵبوڵ نە سەحن باخی گوڵشەندا مەدۊ وەسەردا پەی ئەندۇهی دڵ ماچۊ کۊن ڕەونەق بازاڕی بوڵبوڵ؟ جە جەستەی پەشېو، ئەو پەشېو جەستە منیچ جە هېجران تەمام بیم خەستە دەردی دۇریی، وەنەم دېوېیان شادیم، جە شیوەن بوڵبوڵ شېوېیان ئەسرینان سەردان جە دەرۇنەوە موژەم دان بە دام دەریای هۇنەوە ++++++++++++++++++++++ سەرناو: ئافتاو پېوار بی سەبارەت: هێنانە سەر ڕێنووسی هۆرامی: ئاکۊ مارانی ئافتاو پېوار بی... وەختێ جە مەغریب، ئافتاو پېوار بی جەمینش جە بورج تەشاو دېیار بی پەیوەست گەرمی وەخت سەبا و ئېوار بی بە نۇری جەمین شەوق ئارای تەمام یاوناش وە هەم وەختی سوبح و شام پرشنگی نۇرش پەی پەی مەشانا من دەرسات وە ڕۇش لا فتىٰم وانا سپەردم بە نۇر بارگەی ئیمامان چەندێ نۇر بەخش بۊ پەی سوبح و شامان ++++++++++++++++++++++ سەرناو: ئاما و شېیانی سەبارەت: هێنانە سەر ڕێنووسی هۆرامی: ئاکۊ مارانی ئاما و شېیانی... چەند ڕا، وە بۍ ڕا، ئاما و شېیانی تا کەفتا نە دام ناواک نېیانی نېیانش بەردان بە یەک دېیانی سەوگەندم وەردەن، سینە چاک چاکان فرەم ئاوەردەن زامی ناواکان بەی تەور جە نیگای نە بان کېشانم هیچ ناواک نەدان، جەفا، ئېشانم ++++++++++++++++++++++ سەرناو: ئاهۇی خوتەن خېز، دیدە تیر خەتا سەبارەت: هێنانە سەر ڕێنووسی هۆرامی: ئاکۊ مارانی ئاهۇی خوتەن خېز، دیدە تیر خەتا تاتاری ڕەوېڵ، نافە موشک مەتا وەقت نیمە شەو، خاو مەیۊ نەزد ئەو تومەز دیدەی وېش مەوینۊ نە خەو جە سامی موژەی وېش بېدار مەبۊ دەرسات بێ پەروا جە ڕەم تار مەبۊ بەڵۍ چېش مەبۊ، ڕەوان، خاتر شاد جە وەشی دەوران، سافی سەر ئازاد ئەحیاوان پڕگوڵ، ناڵەی بولبولان دایەرەی زنجیر زوڵف سونبلان مەبۊ بە پابەند ئەی خوتەن خېزە ئەی ئاهۇی ڕەوېڵ، موشک ناف بېزە بۊی خوتەن مەیۊ، ئاهۇی تافەوە تاف پېچان بە بۊی موشک نافەوە ئیسە کەردەنش بە زێد، هەم ماوا ئاوا بۊ شەڵڵا، پېش نېیەن ئاوا؟ یا شا بەشقی وېت خاتر ئازادان نەڕېشان نە دام ناشی سەیادان ++++++++++++++++++++++ سەرناو: ئاهۇی وەحش تار سەبارەت: هێنانە سەر ڕێنووسی هۆرامی: ئاکۊ مارانی ئاهۇی وەحش تار... جەیرانی سوب خېز ئاهۇی وەحش تار شۊخی لارە و لەنج دیدە پڕ خومار سپەردیم وە دین ڕەسولی نازدار ڕۊیێ هۊرېزا عەزمی سەحرا کەرد پەی جەلای جەمین، دەست پەرێ جام بەرد بە پېشی ئاوەرد دېیا نە پېشدا دەست ئاوەرد وەبان زوڵفانی وېشدا دەست ئاوەرد وەبان زوڵفی خامدا لېڵایش ئاوەرد وە ڕۇی جامدا ئەو دېیا وە جام ڕەنگ زەرد و زگار جام دا وە سەنگدا گرەوا بە زار واتش ئەرۍ جام تۊ چە جامێنی وېران بۊ ئەو شار تۊ لېش ئامێنی جام ئاما زوان فراوان لاڵا واتش تەقسیرم بۍ عەیبەن وەڵڵا تەقسیرم چېشەن مدەریم وە سەنگ شۊڵەی جەمینت من گېلان جە ڕەنگ؟ تەمام سەڕافان جە ڕۇی سەرزەمین بەیان بوینان ئایېنەی جەمین ئەر تۊ ئایېنەت نەگېڵان جە ڕەنگ من بېجام واتەن، سەرم دان وە سەنگ ++++++++++++++++++++++ سەرناو: ئېم شەو ئایرێ گڕ بەست نە دەرۇن سەبارەت: هێنانە سەر ڕێنووسی هۆرامی: ئاکۆ مارانی ئېم شەو ئایرێ گڕ بەست نە دەرۇن بڵېسەش یاوا بە سەقفی گەردۇن جە کۇرەی ئایر، جە بڵېسەی نار ستېزام چۇن بەرق، ئاو کەردم هاوار جە هاوار هاوار شەفا و لاڵەی من جە هەی ئاو هەی ئاو، شین و ناڵەی من تمەز مەژنەوۊ یەک خوداتەرسێ موسڵمان سیفەت ڕاگەی حەق پەرسێ ماوەرۊ گۊزەی نەفتی بەیتولماڵ مەشانۊ وە ڕۇی گڕ بەستەی شەماڵ پېسە مەزانو یە گۊزەی ئاوان نمەز خۊ یە نەفت تەوەن پۍ تاوەن گۊزەی نەفتش کەرد وە بڵېسەمدا قرچەی گۊزەی نەفت وە ستېزەمدا هەر تا سەحەر بی، هەر سۊزام بە سۊز سەحەر سفتە کۊم با بەردش چۇن تۊز هەر کەس وېنەی من ئیقباڵش چەفتەن نەواچۊ هەی ئاو، نەسیبش نەفتەن ++++++++++++++++++++++ سەرناو: ئیم شەو جە خاودا زوڵف دېزێ دیم سەبارەت: هێنانە سەر ڕێنووسی هۆرامی: ئاکۊ مارانی ئیم شەو جە خاودا زوڵف دېزێ دیم چۇن سېیاماران سەراوېزێ دیم شېیام، هۊرمگېرت من بە نەزانی تومەز ئەو قاتڵ دەوای گەزانی تیژتەر جە ئەڵماس قولابش سازا یەک زەڕەی تەنم ناستش بە ئازا ڕۊح جە تاوېیای زامی گیر و گاز پەرێ ئاسایېش ئاما وە پەرواز واتش مەر بشۇن، دۇر گنۊن لېشان زامی گازی مار مەتاوۊ کېشان ئەو دی هەم بەردش سەر نە دەهانم ڕا گیر بی، پەرێ ڕۊحی ڕەوانم ئەو جە ئېشی زام هایلەی قاتڵ وېش جە پەروازی ئەو کەردەن باتڵ بەی گشت زامەوە شی وەتەنمدا بە تەنی پڕ دەرد، خەم وەتەنم دا ++++++++++++++++++++++ سەرناو: ئېم شەو جەستەی من سەبارەت: هێنانە سەر ڕێنووسی هۆرامی: ئاکۆ مارانی ئېم شەو جەستەی من... ئېم شەو ئەر مەدیش کەسێ جەستەی من حاڵی پەشېویای جەستەی خەستەی من نائومېد مەبی، پەرێ جەستەی من دەرۇن جە دۇریی، مەگریا بە تاو جە چەم مەتکېیا پەیاپەی هۇناو ناڵەی ناڵینم وە پای عەرش یاوا ڕوخسارم نەڕۇی زەمین مەساوا نە گاهێ ڕاحەت، نە لادێ ئاوام تا سوب سپی بی، بەو تەور، ویارام کەسێ پەی قیبلەش یە ژیانش بۊ پەیش کەمەن بەی تەور، ئەر سەد گیانش بۊ ++++++++++++++++++++++ سەرناو: ئېم شەو خاری یاو، زەمانەی ویساڵ سەبارەت: هێنانە سەر ڕێنووسی هۆرامی: ئاکۆ مارانی ئېم شەو خاری یاو، زەمانەی وېساڵ بەردش بە دڵدا جە دەستی خەیاڵ وەختێ خار نە تەخت دڵ گېرتش قەرار شکوفتەن نە ڕۇم، گوڵ هەزار هەزار جە پەی زامی خار، دەستنیشانی دڵ خەم بی وە گوڵزار، من بیم وە بڵبڵ ناڵەی بڵبڵییم بڵند پایە بی جە پەی شۇم بەختیم ئایر مایە بی جەستەم هەر گریان تا سوب بەیاندا سوب باڵام نیشان سفتە دڵان دا ++++++++++++++++++++++ سەرناو: ئېم شەو دڵ جە دەرد سەبارەت: هێنانە سەر ڕێنووسی هۆرامی: ئاکۆ مارانی ئېم شەو دڵ جە دەرد... تا سوب سپی بی، هەر ناڵا جە دەرد پەیوەست مەکېشاش هەناسانی سەرد هەر سەنگ و ئاهەن، پەیش مەبی وە گەرد واتم هەی دڵە، وەسەن وەس ناڵە خەڵکان جە ناڵەی تۊشان شی زاڵە واتش بۍ مروەت جە مەیل سەردەنی چەنی نەناڵۇ، مەر بۍ دەردەنی؟ جەی وەرتەر قیبلەم، هەر شام، هەر سەحەر مەنماناش باڵای نەمامی نەوبەر ئیسە لېڵاوی ئەو نەدینمەن جەو پەی ئاهی سەرد، زاری و شینمەن ئیسە پەی دۇری قیبلەم مەناڵۇ گەردی پا و پاڵاش وە مژە ماڵۇ یە خەیلێ وەختەن لېم نادیارەن نە شەو خاوم هەن، نە ڕۊم قەرارەن کەسێ کە دۊستش نە پېوارش بۊ چەنی بە شەو خاو، ڕۊ قەرارش بۊ؟ چۇن بېسارانی هەر کەس بۍ دڵ بۊ چۇن باخچەی بۍ ئاو، دایم بۍ گوڵ بۊ ++++++++++++++++++++++ سەرناو: ئېم شەو من گریام، خەرۇس کەرد ناڵین سەبارەت: هێنانە سەر ڕێنووسی هۆرامی: ئاکۆ مارانی ئېم شەو من گریام، خەرۇس کەرد ناڵین سوب ئەو بۍ نیشان من زوخ جە باڵین گریەی من جە داخ دۇریی کەسێ بۍ ئەو جە دەرد بۍ، باک وەش نەفەسێ بۍ نە سۊزا بە سۊز نە بە دەمەوە ناما نەپەرساش ئەو بە خەمەوە وېنەی بۍ دەردان سەر وە خاک خەیاڵ تا سوب من گریام نەزاناش بە حاڵ بۍ دەرد بۍ دەردیش ئەو سا دیار دا ناڵەش بۍ پەروا ئاما بە شار دا ++++++++++++++++++++++ سەرناو: ئەجەل داوم بۊ سەبارەت: هێنانە سەر ڕێنووسی هۆرامی: ئاکۆ مارانی ئەجەل داوم بۊ... تا کەی من چەنی دەوران داوم بۊ؟ تا کەی شەو بۍ یار، شیرین خاوم بۊ؟ بۊ با پات وەبان هەر دۇ چاوم بۊ ئەر سەد پەژاران گیانم مەستانان وەس نېیەن بە نام زیندەم مەوانان سپای غەم بەی تەور زۊر گرتەن وەنەم هەر ساتێ مەرگێ مەنمانۊ پەنەم سەندەن نیمەیێ، ئەویچ هیجرانان گەرەکشان بە زۊر چەنەم بستانان نەواچی پەی چېش من چیم نەزانان ئیسە مواچۇ ئەجەل ها هانان؟ گیانێ کە بەرشی بە یەک دیانێ جە کۊ باوەرۇن پەرېت، گیانێ؟ شەماڵ شۊ واچە، بەو ئایرناکە بەو دڵ سفتەی خەم، سینە چاک چاکە ئەر سەد ساڵ سۊچۊ وەن دار جە شاخان چی پەروا دارۊ عەرعەر جە باخان ++++++++++++++++++++++ سەرناو: ئەرۍ بیناییم سەبارەت: هێنانە سەر ڕێنووسی هۆرامی: ئاکۆ مارانی ئەرۍ بیناییم... ئەری خاتردار، مایەی بیناییم هامڕازی شەوان، بیدی تەنیاییم ڕەفیقی ناڵەی سوب سەحەرگاییم گوشادی خاتر، پەشېویی جەستەم ڕۊشنیی دیدە، ئەی ئاوات وەستەم سەوگەند بە ڕېزەی خاڵانی ئاڵات نېیەن زیندەگیم، نەوینۇ باڵات ئومېدم ئیدەن، خاتر پەڕەی گوڵ حەرفی بەدکاران نەگیری نە دڵ ++++++++++++++++++++++ سەرناو: بای شەماڵ تای زوڵف سەبارەت: هێنانە سەر ڕێنووسی هۆرامی: ئاکۆ مارانی بای شەماڵ تای زوڵف... دەستم دامانت تایێ جە تای زوڵف قەترانی شەوڕەنگ، وەردەی سەر کوڵف ستەم زەدەی دەست ناخۇن کەندەی توڵف وەختێ مەگېرۊ توڵف وە سینەوە سا توڵف مەکېشۊ، زوڵف بە قینەوە ئەوسا مە گېرۊ کڵافەی کوڵفش لازم مەدەرو بە دەستی، زوڵفش ساکە مەگېرۊ مەکېشۊش بە قەست حازر بە نەوجا بستانش جە دەست باوەرەش پەرېم، چۇن تەیری تیژ باڵ هېمای دڵ یەکسەر نەبېیەن بە زوخاڵ ++++++++++++++++++++++ سەرناو: بورچینی سەر سەوز سەبارەت: هێنانە سەر ڕێنووسی هۆرامی: ئاکۆ مارانی بورچینی سەر سەوز... نە سەر سەراوان بورچینی سەر سەوز شیرین شېوە ناز، قامەت تۇڵی سەوز سایەی زوڵفی وېش سەیر مەکەرد بە حەوز ++++++++++++++++++++++ سەرناو: بینایی دیدە سەبارەت: هێنانە سەر ڕێنووسی هۆرامی: ئاکۆ مارانی بینایی دیدە... ڕۊشنی نۇربەخش، بینایی دیدە باڵا سپی سەوڵ، شا پەسەندیدە فریشتەی شەریف، حەق ئافەریدە دیدە ئاهۇی وەحش بېیابان وەتەن سونبول چەریدەی ڕەوېڵەی خوتەن دەلیلەی سەرکەش دەیریانی دەیر پەرەندەی بۍ باڵ، باڵدار وېنەی تەیر لەب جامی یاقۇت پڕ جە مرواری ڕەنگ ڕېزەی شەربەت شیفای بیماری هەر وەتەن لادێ مەگېڵیش پېدا بۊی موشکی نافەش پەخش مەبۊ تېدا چمان جە سارای خوتەن چەردەنی ئەو زێد ئاوا بۊ تۊش پەروەردەنی ++++++++++++++++++++++ سەرناو: بە بەرزانەوە سەبارەت: هێنانە سەر ڕێنووسی هۆرامی: ئاکۆ مارانی بە بەرزانەوە... سایە شېوەی کېن، بە بەرزانەوە؟ ئا بەڕێزەی ڕاز، لێو گەزانەوە من بە ڕەنگی زەرد چۇن خەزانەوە ئەو پەری ڕوخسار پەریان شېوە من دڵ هەزار زام ئەو پەرۍ پېوە ئەو سلېمان تەخت، دەماخ چۇن دارا من تەن مات نە خاک چۇن سەنگی سارا تاکە ئەو یەکجار پەروازی ناز بی من سەد جار نە تەن گیانم پەرواز بی دەلیل شۊ واچە بەو حاڵ نەزانە گونامان چېشەن؛ ئەی لەب گەزانە ++++++++++++++++++++++ سەرناو: بە دامانت بۊ سەبارەت: هێنانە سەر ڕێنووسی هۆرامی: ئاکۆ مارانی بە دامانت بۊ... سا سوەیل دەستم بە دامانت بۊ ئەو سا جە یەمەن بەر ئامانت بۊ ئەوەڵ ڕەشتەی سەوڵ خەرامانت بۊ سا سوەیل سەرم نە ڕات توفەیل بۊ ئانە مڕژەی، با باڵای لەیل بۊ خەزان زەرد مەبۊ، زۇ مەڕېزییۊ لەیل نمەڕېزۊ، نمەبېزییۊ ++++++++++++++++++++++ سەرناو: بە کەم کەم کەردم سەبارەت: هێنانە سەر ڕێنووسی هۆرامی: ئاکۆ مارانی بە کەم کەم کەردم... کۊ کۊ کۊی خەمان، بە کەم کەم کەردم پەی پەی مەنامەن، داخ وە گڵ بەردم مەن مەن مەنامەن، داخ وە دڵ بەردم سەد مەردەم مەردەن سەد کۊسم کەفتەن هیچ کەس ئاخ و داخ، جە من نەشنەفتەن ئاخ ئاخ و داخ داخ، وەی وەی و ڕۊ ڕۊ هەر هەشت بە غەزەب لېم بېیەن بە کۊ قیبلەم جە دۇریت یەندە داخ وەردم خەیاڵ بە داخی خەمان شاد کەردم ++++++++++++++++++++++ سەرناو: بەڕەزایێ هەن جە سای کەمەردا سەبارەت: هێنانە سەر ڕێنووسی هۆرامی: ئاکۆ مارانی بەڕەزایێ هەن جە سای کەمەردا پەخش و پەڕ کەندەن، بەو سەران دەردا چۇن زوڵفی یاران سافی سەراوېز مەگېڵۈ نە دەور تۊفانی سوب خېز گا گرژ و لۇلەن، چۇن زوڵفی نەمناک گا با مەکەرۊش تاتا جە هەم تاک بەرمەیۊ نە پای بەرزە مەغاران شەماڵ مەشانۊش، چۇن زوڵفی یاران شېوەی بەڕەزا ها بەو زوڵفەوە بەو زنجیرەی زوڵف دەستی توڵفەوە ++++++++++++++++++++++ سەرناو: بەی گشت دەردەوە سەبارەت: هێنانە سەر ڕێنووسی هۆرامی: ئاکۆ مارانی بەی گشت دەردەوە... بەی گشت زامەوە، بەی گشت دەردەوە بەی جەستەی خەمین ڕەنگی زەردەوە ها جە نەو قەبرم ئاوا کەردەوە ئامانەن ئەو سا وە قەبرم بەران نیشانەی جەستەی خەستەم بکەران بە وەڵگی خەزان بپۊشان سەنگم تا نیشانە بۊ جە زەردیی ڕەنگم کۊنە کەمانان باوەران وە بەر هەر یۊ خەمتەرەن بنیانیم وەسەر بنیانیم وەسەر کۊنە کەمانێ ئەو جە قامەتم دارۊ نیشانێ تا وینان یاران چەفتی کەمانم بزانان کوشتەی دەردی خەمانم ++++++++++++++++++++++ سەرناو: تا بە کەی نۊشۇ سەبارەت: هێنانە سەر ڕێنووسی هۆرامی: ئاکۆ مارانی تا بە کەی نۊشۇ... یا ڕەب جامی خەم، تا بە کەی نۊشۇ؟ تا کەی بە خەمین لۊنگی خەم پۊشۇ؟ تا کەی چۇن کۇرەی ئایر بجۊشۇ؟ تا کەی هەناسەم چۇن سېیا تەم بۊ؟ تا کەی کونجی دڵ خەزېنەی خەم بۊ؟ تا کەی کزەی دڵ بە ستېزە بۊ؟ تا کەی بەندی جەرگ، ڕېزە ڕېزە بۊ؟ تا کەی چەنی بەخت، بە دان بسازۇ؟ تا کەی وە مەرگم ئاوات بوازۇ؟ تا کەی بسۊچۇن، نەبۇن بە زۊخاڵ؟ تا کەی بېدېیان بکەرۇن بە ماڵ؟ ئینسافەن وەسەن، نیازمەندی دڵ مازە وە حەسرەت، سەر بەرۇن وە گڵ ++++++++++++++++++++++ سەرناو: تا بەسەر یار بۊ سەبارەت: هێنانە سەر ڕێنووسی هۆرامی: ئاکۆ مارانی تا بەسەر یار بۊ... یار ئەو یار خاسەن، تا بە سەر یار بۊ مەیلش بە وېنەی سەیلی وەهار بۊ دۇری یار پەرېش، زامەتی خار بۊ چۇن کۇرەی ئایر بجۊشۊ بە تاو بە بۍ یار نەشۊ، شەو نە دیدەش خاو ئاهی سەرد کېشۊ شەوان نە جېدا بېزار بۊ نەوجا، یار نەبۊش تېدا ++++++++++++++++++++++ سەرناو: تاسەی زەرۇری سەبارەت: هێنانە سەر ڕێنووسی هۆرامی: ئاکۆ مارانی تاسەی زەرۇری... دەردی بۍ هامدەرد، تاسەی زەرۇری نېشی گېیان کېشی، ژاراوی دۇری لېم سەندەن ئارام، سەبر و سەبۇری کەس پېم نەواچۊ نۇریش نە دیدەن من نۇری دیدەم، ئەو بەرگوزیدەن سا کە نۇری ئەو، جە دیدەم دۇرەن دنیا لېڵاوەن، دیدەم بۍ نۇرەن ++++++++++++++++++++++ سەرناو: تافی دېۋەزناۋ سەبارەت: هێنانە سەر ڕێنووسی هۆرامی: ئاکۆ مارانی تافی دېۋەزناۋ... بولعەجەب تافەن، تافی دېۋەزناۋ پەرېشان، عاشق، دەوەندەن بە تاو بۍ سەبر و ئارام، بۍ خورد و بۍ خاو نە لادۍ قەرار، جە ئاما و لوان نە دەمی ساکن، جە دەنگ و دەوان مودام بە سەد ڕەنگ نەغمە پەردازەن مرواری غەڵتان پەی نسار سازەن نەنیشۊ لەحزەی نەدارۊ درەنگ موغەنی نەواز بە سەد هەزار ڕەنگ من مودام حەیران جە پەشېو حاڵیش جە بۍ خاوی و شەوق، جە لائوباڵیش پەرسام ئەر هەی تاف دېۋەزناۋ مەکان جە شېوەی دېۋان گېرتەنت نیشان! دائیما سەرسام عاشق شېوەنی جە عیشقی کېیەن بەی تەور لېوەنی؟ واتش هەی ئەبلە، کەم فامی سەرشېت گۊش دەرە پەنەم تا بواچۇن پېت ئەی سۊز و سەودا، ئەی بۍ قەراری ئەی چەرخ و قسە، ئەی بۍ موداری ئەی گەوهەر پاشی و ئەی دوڕ ئەفشانی مرواری سازی و نقېم نیشانی جە شەوقی ئانەن، منیش کەرد پەیدا هەر جە عەشقی وېش شېتم کەرد شەیدا بەی گشت شېوەوە بۍ قەرانەنان پەی نساری ئەو منەت بارەنان هەر کەس جەی دنیا عاشق سادق بۊ سەرباز وېنەی باز، دڵ موافق بۊ ++++++++++++++++++++++ سەرناو: تافی دێۋەزناۋ (٢) سەبارەت: هێنانە سەر ڕێنووسی هۆرامی: ئاکۆ مارانی تافی دێۋەزناۋ... تافی شەیدای عەشق، تافی دێۋەزناۋ بە سۊزی سەدای سازی تەرانە مەشانۊ کۊکۊ مرواری دانە جۊشش زەریفەن، شیرینەن، دڵبەر بۍ حەد مەدەرۊ مرواری وە بەر شۊر و نەغمەی سۇزانی پېشەن داخۊم ئەی سەودا جە عیشقی کېشەن؟ هەر کەس عاشقەن پېسە جەستەش بۊ پېسە جۊیای وەسڵ ئاوات وەستەش بۊ ++++++++++++++++++++++ سەرناو: تەرز خەزان دیم جە فەسڵی هامن سەبارەت: هێنانە سەر ڕێنووسی هۆرامی: ئاکۆ مارانی تەرز خەزان دیم جە فەسڵی هامن یەکسەر سۊچېیان، بەڎتەر تەر جە من واتم ئەی خەزان یە فەسڵ تۊ بۍ ئەی گڕەی ئاهیر، پەی تۊ جە کۊ بۍ؟ واتش تۊ حاڵزان تەرزی خەزانی چ خېرەن بەی تەور، ئەحوال نەزانی؟ هەر خەزان ڕەشتەی فەسڵی سوەیلەن ئەو بۊ نېیازیش ئەندەکێ مەیلەن ++++++++++++++++++++++ سەرناو: تەرزی بید بە تار سەبارەت: هێنانە سەر ڕێنووسی هۆرامی: ئاکۆ مارانی تەرزی بید بە تار... تەرزی بید چۇن زوڵف مەلەرزۊ بە تار بە هەوای پرشنگ تافی بۍ قەرار نە پای با لۇل کۊ سەخت وەرنسار وەڵگ بید زایف، تەرز تۇڵ زەبۇن زەبۇنتەر جە تەرز تای کڵافی تۇن مەلەرزۇ بە باد سەردی سەبایی نە ڕۇی گوڵی سەوز سافی مینایی پەرسام ئەر هەی بید، دەست نیشانی دەست تورک تەڕ ئەندام، سای سەهەند پەیوەست چېشەن درەختان ڕۇشان نە باڵان تۊ سەر سەراوېز، ڕۇی زەمین ماڵان؟ بید ئاما جەواب بە زوبانی حاڵ چۇن پەرسات حاڵم، بواچۇن هەواڵ منیچ نەونەمام نازک بەر ئاو بیم سەرتەرزی لەرزان تافی سەراو بیم ناگا پەی تەقدیر دیدە سیاوێ خاو ئالۇد سوبح خېزا جە خاوێ ئامانە سایەم مەخسەڵ دا خاڵان کۊکۊی خەرمەنی خەمان دا تاڵان جەو ساوە جۊیای ئەو نەو تارەنان چۊ بی سەراوېز بۍ قەرارەنان بۊ بدیە وە بەرگ، بېخ باڵامان من دڵ سفتەنان، ئادیشان دامان ئەوان پەرێ دۊست بەرگشان ڕېزیان من بەرگی بېخم پەی ئەو بېزیان فیدای شەوقی دۊست، گەرمی ڕۊی هامن بۍ ئېختېیار سەند، ئېختېیار جە من هەر کەس بۍ تاوەن جە شەوقی ئازیز کەی قەرار گېرۊ، تا فەسڵی پاییز؟ مەولام هەر کەسێ دەرۇن پڕ دەردەن جە هەر وەختەدا زایف و زەردەن ++++++++++++++++++++++ سەرناو: تەرسا بەردەنم سەبارەت: هێنانە سەر ڕێنووسی هۆرامی: ئاکۆ مارانی تەرسا بەردەنم... ڕاسەن سوجدەی دەیر، تەرسا بەردەنم مەی نە پای مینبەر مەسجد وەردەنم تەجدیدی مەزهەب عیسا کەردەنم فتوای بەرەهمەن گېرتەنم نە گۊش دینم دان جە لای دینی مەی فرۊش کەردەنم نە دۊش خەرقەی ڕەهبانان کېشانم جاڕۇی دەوری بتخانان ئانە گشت جە وەخت نادانیم بېیەن فەسڵی سەرمەستی و جەوانیم بېیەن ئیسە ها جە گشت پەشیمانیم بەرد فەسڵی پیریمەن، جەوانیم وېیەرد وادەی پیریمەن، یاوانم نۊبە نۊبەی تۊبەمەن کەرەم دار، تۊبە ئومېدم بە تۊن وەنەم نەگیری بویەری جە جورم وادەی کەم ویری ++++++++++++++++++++++ سەرناو: تەشریف ناوەردی سەبارەت: هێنانە سەر ڕێنووسی هۆرامی: ئاکۆ مارانی تەشریف ناوەردی... بای شەماڵ چېش بی، تەشریف ناوەردی؟ عەرزو حاڵی من پەی یار نەکەردی مەر شەربەتی دەست بۍ شەرتان وەردی؟ یەقین هەرزەگەرد بۍ مەتامەنی چۇن سارائیان خەیاڵ خامەنی سەرسامی، سادار، سارا گېڵەنی چۊڵ گەردی کەم فام، تەمام وېڵەنی مەر هەر کەس دەلیل دەردەدارانەن قاسیدی نامەی کەفتە کارانەن چۇن تۊ بۍ بەینەن ئەحواڵ ناوەرەن سەودایی سیفەت، خەیاڵ نە سەرەن؟ ئومېد هەن دەرگېڵ سەرزەمینان بای ئاوارەی وەتەن جام جەمینان بای تا بە جەستەی من هەنی هەژاران نەکەری خەریک چەمەڕای یاران ++++++++++++++++++++++ سەرناو: جارێ بۊ جارێ سەبارەت: هێنانە سەر ڕێنووسی هۆرامی: ئاکۆ مارانی جارێ بۊ جارێ... قیبلەم تو خوڎا، جارێ بۊ جارێ ئەگەر خۊفت هەن تۊ جە ئەغیارێ وېیانەگېرە، بۊرێ پەی کارێ ئېمە یانەمان جەو بۊنە کەردەن جارێ تۊ بینە وە حاجەت بەردەن سەد جار بە وەڵڵا دەردم پېت دەوان حاجەتی یانەم، گشت بە تۊ ڕەوان ++++++++++++++++++++++ سەرناو: جامی خاترم گەردئالۇد بېیەن سەبارەت: هێنانە سەر ڕێنووسی هۆرامی: ئاکۆ مارانی جامی خاترم گەردئالۇد بېیەن بازاڕی سەودام بە بۍ سۇد شېیەن سۊزی هەناسەم نمانا سەردی گېڵا ڕەنگی باخ شادیم، بە زەردی خەمی دنیای دۇن جە نەزانیی وېم هەر شەو سەد نەشتەر فېشتەر مەدۊ لېم چندێ دڵ پەشېو ناڵەی شەوان بیم جەلابەخشی دەرد، گشت بۍ خەوان بیم سەرمایەی دیدەم غەیر جە هۇن نەبی هیچ کارێم چەنی دنیای دۇن نەبی ئیسە بە وېنەی دنیاپەرەستان دنیاپەرەستم بە هەزار دەستان ++++++++++++++++++++++ سەرناو: جە کۊشان بی دەرد؟ سەبارەت: هێنانە سەر ڕێنووسی هۆرامی: ئاکۆ مارانی جە کۊشان بی دەرد؟ ... فەرهاد و مەجنۇن جە کۊشان بی دەرد؟ فەرهاد نەتاواش بېستۇن ساکەرد مەجنۇن جە ئاهش سەنگ مەبی وە گەرد فەرهاد هەر سەنگش تاشا بە تیشە مەجنۇن کۈ گەردیش کەردەبی پیشە فەرهاد هەرسەنگش مەتاشا جە تاش مەجنۇن جە ئاهش سەنگ مەبی خاش خاش مەگەر دەردەدار چۇن ئەوان مەبۊ دایم ڕەنگ زەبۇن، ناتەوان مەبۊ ++++++++++++++++++++++ سەرناو: جەمینش سافەن سەبارەت: هێنانە سەر ڕێنووسی هۆرامی: ئاکۆ مارانی جەمینش سافەن... شەخسێ چۇن ئافتاب، جەمینش سافەن سەرتاپای باڵاش موشکین کڵافەن جە بۍ ئینسافی نامش ئینسافەن ئەر مەبېش زەڕڕە ئینساف نە دڵدا نمەداش دەستەی سونبوڵ وە گڵدا مەودای موژانش مېڵ ساو نمەکەرد پېشان عالەمێ بۍ خاو نمەکەرد هېشتای بە شەراب غەمزە و نازفرۊش پەی چېش مەبەرۊش دیدەی وېش جە هۊش؟ ئەڵڵا بە حاجەت دیدەی پېغەمبەر بە موعجیزەی دەست درازی حەیدەر ئەو شۊخی زەریف سافی سیم ئەندام نەدارۊ ئینساف پەنەش نېیەن ڕام زەڕېو ئینسافش دەری نە دەرۇن تا دەردینانش سەر نەنیان وە هۇن دەردەدار کەسێن دەردش بۊ نەسەر دۇدش کۊی بېستۇن بگېرۊ نەوەر من زەڕېو دەردم هانە دەرۇندا وەختەن نەجد بدۊ وە بېستۇندا ++++++++++++++++++++++ سەرناو: جەو بەیانەوە سەبارەت: هێنانە سەر ڕێنووسی هۆرامی: ئاکۆ مارانی جەو بەیانەوە... حاڵێ پېم یاوان جەو بەیانەوە خاڵێ دیم جە بەین دوو ---- وەبانی --- مەشنیانەوە حەکاکانی ڕۊ گرد بەیانەوە کۍ دېیەن مەغریب جە بەیانەوە؟ هەتا موستەفا سەر مەنیانەوە هەر وا بە حەسرەت ئەو ---- ++++++++++++++++++++++ سەرناو: حافظ باحیسی شاخی نەباتت سەبارەت: هێنانە سەر ڕێنووسی هۆرامی: ئاکۆ مارانی حافظ باحیسی شاخی نەباتت بە نۊشیدەی جام جورعەی مەماتت بە هەوای گوڵگەشت، سەیری موصەڵات بە ئاب رُکن‌آباد سەرچەشمەی حەیات بە لسان الغیب سینەی پڕ جە دوڕ مایەی دڵ جە گەنج، بەحری مەعنا پوڕ جەو ساوە قیبلەم جە من دۇر کەفتەن سەرتاپای باڵام ئالۇدەی نەفتەن فاڵی وەصف الحال ماوەرە پەرېم موناسیب بە حاڵ جەستەی خەستەی وېم هەر شەو جە ئاسمان قەبرت پڕ نۇر بۊ دیدەی بەد جە شاخ نەباتت دۇر بۊ ++++++++++++++++++++++ سەرناو: حاڵداران حاڵەن سەبارەت: هێنانە سەر ڕێنووسی هۆرامی: ئاکۆ مارانی حاڵداران حاڵەن... حاڵێ پېم یاوان نمەز چە حاڵەن سەرم داخ کەران یە کەم خەیاڵەن؟ سپی سەنگێ دیم واتم یە لاڵەن لاڵان، خەسرەوان نە کەمەر مەبۊ سەنگ، هەر گەدایێ پاش نە سەر مەبۊ فرە کەس چۇن من، خام خەیاڵ مەبۊ کەی سەنگ بە دانەی دوڕ و لاڵ مەبۊ؟ خەیاڵم بەد بی ئەسڵش نەبی ساف نیشانەی لاڵیش بەرشی بە خیلاف سپی سەنگێ دیم بە لاڵم زانا لاڵ بام ئەر هەنۍ بە لاڵش وانا ++++++++++++++++++++++ سەرناو: خاری خەم خەیاڵ نەڕېزەی جەرگم سەبارەت: هێنانە سەر ڕێنووسی هۆرامی: ئاکۆ مارانی خاری خەم خەیاڵ، نەڕېزەی جەرگم سەرهۈردان، مەدۊ نیشانەی مەرگم تا نە پەردەش، خار خەمان پېوار بی نیشانەی مەردەی من نادیار بی ئیسە پەردەی دڵ مەشکاوناوە کۊی سەبر و ئارام، تەن مەتاوناوە وەختی مەرگمەن شادم وە مەردەن مەردەن پەیم خاسەن سەخت جەفام بەردەن ++++++++++++++++++++++ سەرناو: خاو جە دیدەم دۇر سەبارەت: هێنانە سەر ڕێنووسی هۆرامی: ئاکۆ مارانی خاو جە دیدەم دۇر... خەیاڵت کەردەن، خاو جە دیدەم دۇر هەر ئەسر هۇنش مەیۊ بە زەرۇر تېدا نەمەندەن زەڕېو مایەی نۇر وېنەی تازە زام، سەر تېخی مەودا هۇناو لاو بەستەن، مەشۊ بە ئەودا هەر موژە قەترەی هۇنش کەردەن چاک بە وېنەی ئەڵماس لاڵی سیم حەکاک دیدە کە قەترەی هۇن جېش نەوارۊ شەرتەن پېش واچان، مایەی نۇر دارۊ خەیاڵم خاڵی نېیەن جە خاڵت فیدای خاڵت بام چەنی خەیاڵت ++++++++++++++++++++++ سەرناو: خوداوەند جەستەم سەبارەت: هێنانە سەر ڕێنووسی هۆرامی: ئاکۆ مارانی خوداوەند جەستەم... مەعلوم بۊ جە لات پەشېوی جەستەم ئی ڕەنگ زەردییە و زوانی بەستەم ئی دۇر کەفتەی یار، وە ئاوات وەستەم ئی دیدەی بۍ نۇر، نەم تېدا بڕیا ئی دڵەی پڕ زوخ بە ئایر گڕیا ئی تەن سفتەی دەرد سەد داخان پېوە ئی جەرگی کەباب هانە دلېوە ئی جەستەی مەجنۇن جە زێد ئاوارەم ئی پەڵاس-پۊشی و مەنزڵ مەغارەم بە دوعای شەریف شەو سوب بېداران یا تاقەت، یا مەرگ، یا وەسڵی یاران ++++++++++++++++++++++ سەرناو: خونچەگوڵ جە گڵ سەبارەت: هێنانە سەر ڕێنووسی هۆرامی: ئاکۆ مارانی خونچەگوڵ جە گڵ... زیاوە جە پەی نەو-وەهار جە گڵ جە دلېو چەمەنان وەندەوە بوڵبوڵ ئاخ پەی هام دەردێ چۇن من داخ نە دڵ بە دیدەی زوخین، بە دڵەی پڕ داخ بشیامێ وە سەیر گوڵخونچانی باخ ناڵەمان کەردا چەنی بوڵبوڵان ئېمە پەی یاران، ئەوان پەی گوڵان تا وادەی فەسڵ نەو-وەهار شېیا دەنگی ناڵەمان نە چەمەن بېیا مدیۊ کەس نېیەن، غەیر جە من فېشتەر هەر دەم دەردی یار، لېم مدۊ نېشتەر هەر من دەردینم، منیچ سا جارێ مدیە جە ناکا جەوەر مەغارێ بەی گشت دەردەوە، بەی دیدەی نمناک گیانم تەسلیم بی، خەڵتان بیم نە خاک ++++++++++++++++++++++ سەرناو: خەزانی بە چاخ سەبارەت: هێنانە سەر ڕێنووسی هۆرامی: ئاکۆ مارانی خەزانی بە چاخ... ئارۊ دیم بە چەم خەزانی بە چاخ کۍ بۍ پێش نەبی جە دەرۇنش داخ؟ من دەرلاد جە دڵ کېشام داخ و ئاخ پەرسام ئەی خەزان ڕەنگ بە قەم وېنە زەردی داخ و دەرد جەفای من وینە سا بواچە پېم تۊ نە چ کاری؟ بەی تەور ڕەنگی ساف بۍ دەردان داری واتش هەی لېوەی دڵ بە خەم پارە من هۇنی جەرگم کەفتەن نە چارە تۊ ماچی بۍ دەرد، هەر کەس بۍ دەرد بۊ شەڵڵا چەنی سەنگ، بە زوخاڵ، گەرد بۊ ++++++++++++++++++++++ سەرناو: خەمناکم خەمناک سەبارەت: هێنانە سەر ڕێنووسی هۆرامی: ئاکۆ مارانی خەمناکم خەمناک... جە جەوری گەردۇن، خەمناکم خەمناک هەر یەندە کەردم جامەی تەن چاک چاک پەی دۇری یاران، خاک وە سەرم خاک مەنیشۇ وە عەرش، دۇدی ئاهی سەرد وەختەن هەناسەم سەنگ کەرۊ وە گەرد مەگەر خوداوەند کەرەم بکەرۊ تەفرەقەی یاران وەهەم باوەرۊ وەرنە جە دەرۇن پڕ دەردی زامەت ئایر وارانەن تا ڕۊی قیامەت ++++++++++++++++++++++ سەرناو: خەیاڵم خاڵی نېیەن جە خاڵت سەبارەت: هێنانە سەر ڕێنووسی هۆرامی: ئاکۆ مارانی خەیاڵم خاڵی نېیەن جە خاڵت فیدای خاڵت بام چەنی خەیاڵت زوڵفت بە ئامان، ئامان نە دامان جە دمای چېشەن؟ پېت نېیەن ئامان ئەرچی دەهانش، نامشەن دەهان هیچ دیار نېیەن، من دانم گېیان ++++++++++++++++++++++ سەرناو: دارای خەمانم سەبارەت: هێنانە سەر ڕێنووسی هۆرامی: ئاکۆ مارانی دارای خەمانم... سەرقەیتۇلەی خەم، دارای خەمانم خەم بېیەن بە مار پەی ڕیشەی گېیانم نېشی خەم شېیەن نە ئیستېخوانم خەم ماڵ، خەم میرات، خەم جېهانمەن خەم بەختی دەوڵەت جاویدانمەن مەتای خەم دارۇن کاڵا سەد وېنە سەرمایەم خەمەن، خەمم خەزېنە پادشام خەمەن، خم بېساتمەن جە بارگەی گەردۇن خەم خەڵاتمەن سککەی خەمناکیم بە خەمناک کنیا تەپڵی کۊسی خەم، خەمناکیم ژنیا ++++++++++++++++++++++ سەرناو: دنیای پڕ خەتەر سەبارەت: هێنانە سەر ڕێنووسی هۆرامی: ئاکۆ مارانی دنیای پڕ خەتەر... پەرسام جە دنیای دایم پڕ خەتەر واتم سفڵەی شۇم بەد جە بەد بەدتەر چېشەن چەنی کەس نمەدی وەسەر؟ یە چېشەن ئەر شان ئەر کەمتەر گەدان جە بۍ وەفاییت سەر وە سەنگ مەدان؟ هەر کەس مەوینی پەنەت نېیەن شاد گشت جە داخی جەور جەفای تۊشەن داد بۍ وەفا و شرەنگ جەفاکارەنی دایم پەی یاران دڵ ئازارەنی هەردەم نەردی جەور جەفا مەشانی بە یاران جەفای دۇری مەنمانی چېش مەبۊ سۇدت شای بۍ قەراران دۇر مەوزی جە هەم دیداری یاران ++++++++++++++++++++++ سەرناو: دۇر نمای ڕەزان سەبارەت: هێنانە سەر ڕێنووسی هۆرامی: ئاکۆ مارانی دۇر نمای ڕەزان... ڕەنگی سەوز و زەرد دۇر نمای ڕەزان قەترەی خوردە ڕېز دەوری ڕۇی خەزان پەردەی دڵ چۇن گاز ماران مەگەزان یانۍ های خەزان ڕەنگین مەنمانۊ ڕەنگش بە وېنەی دەردین مەنمانۊ وەی من پەرێ ڕەنگ جەستەی خەزانان مەیۊ پېشان دا دیدەی نەزانان ++++++++++++++++++++++ سەرناو: دوڕڕەن مەرجانەن سەبارەت: هێنانە سەر ڕێنووسی هۆرامی: ئاکۆ مارانی دوڕڕەن، مەرجانەن... لاڵەن، یاقۇتەن، دوڕڕەن، مەرجانەن چە دوڕ، چە مەرجان، تەمام مەرجانەن گەنجی پڕ مایەی نابۇد خەرجانەن دیدەش جە دیدەی ئاهۇوانی بەڕ مەر نەزان هاڵان بۇزانش وە گەڕ قولاپی ئەڵماس موژەش یەند گیران مەستانۊ ئیمان جە دەستی پیران چېش واچۇ زوڵفش موشکەن یا عەنبەر؟ موشک و عەنبەرش وستەن نە چەنبەر بەڵۍ شەرت ئېدەن یەکێش مەجنۇن بۊ یەکێ پەی دینش دەرۇن پڕ هۇن بۊ پېسەن ڕا و ڕەوشت پەی لەیلی دینان تا کە مەجنۇنێ بە چەم بوینان ++++++++++++++++++++++ سەرناو: دڵ زەبۇنە وېم سەبارەت: هێنانە سەر ڕێنووسی هۆرامی: ئاکۆ مارانی دڵ زەبۇنە وېم... ڕەنگ زەرد و زایف، دڵ زەبۇنە وېم نە چای بۍ ئامان، سەرنگۇنە وېم ئاوارەی وڵات تەنجە و تۇنە وېم تەن خەمیدەی بار، مەلامەتە وېم شەرمەندەی ڕۊی حەشر قیامەتە وېم یانەی دڵ سەیلات خەمان ڕەفتە وېم کزەی جەرگ وە گۊش وۍ شنەفتە وېم بە کۇرەی هیجران، دڵ جۊشیای وېم بە باڵا کاڵای خەم پۊشیای وېم گۊش کەڕ، زوان لاڵ، چەم بۍ نۇرە وېم چۇن مەجنوون شەیدا جە لەیل دوورە وێم یە گشت جە نەدین، دوور وڵاتە وېم دۇریش، ڕەستاخېز عەرەساتە وېم ++++++++++++++++++++++ سەرناو: دڵ زەمینەوە سەبارەت: هێنانە سەر ڕێنووسی هۆرامی: ئاکۆ مارانی دڵ زەمینەوە... مەفڕیۊ مەدۊ وېش زەمینەوە چۇن تیفلان ماچۊ، بەو گرینەوە ئەو خاڵەم مەبۊ، بەو جەمینەوە خاکی ڕۇی زەمین مەکەرۊ بە کۊ مەکەرۊش بە سەر هەتا مەتاوۊ بە زار مەناڵۊ، مەناڵۊ بە زار زار زار وېنەی مورغ زەدەی هیجران بار من واتم دڵە قنجە قنجە بای بە نیشی ئەڵماس ژاراو ڕەنجە بای خاڵی بە ڕوخسار زڵېخا چارەن مانگی ڕۇی زەمین، نەقشی ستارەن کۍ مەدۊ وە دەست چۇن تۊ گەدایێ؟ جە گەدا بەدتەر بۍ ڕەویە و ڕایێ ئەبلە، مەکەرە خەیاڵانی خام نمەیۊت وە دەست خاڵی دڵئارام وېت مەدەر وە دەست خوردە خەت و خاڵ خەیاڵ مەکەرۊت بە کۊگای زوخاڵ ++++++++++++++++++++++ سەرناو: دڵبەر نەداوە سەبارەت: هێنانە سەر ڕێنووسی هۆرامی: ئاکۆ مارانی دڵبەر نەداوە... دەلیل شی پەی دڵ، دڵبەر نەداوە ئاما بە ئاهی سەردی سېیاوە ئایر نە تۊی دڵ سفتەم وەرداوە ئەر مەشۊ پەی دڵ، دڵ وېش نە ساغەن وەرنە دەرۇنم پڕ درد و داغەن ئەر ئارۊ تاوام ئاوێ مەڕېزۇن ئایر نە پای بەخت سېیا مەخېزۇن وە گەر نەتاوام، نەبی، نەکریا سەد کەس تاڵان شی، منیش دڵ بېیا ++++++++++++++++++++++ سەرناو: دڵە ئەر ناڵەت سەبارەت: هێنانە سەر ڕێنووسی هۆرامی: ئاکۆ مارانی دڵە ئەر ناڵەت... واچمۍ جە گەردۇن، بوېیەرۊ ناڵەت جە ئەزەل بەی تەور نوسیان تاڵەت چ سۇد مەدۊ پېت، ئەی شیفا و لاڵەت؟ گەردۇن کەی بە قەید ئاهی سەردەوەن؟ داخم، ئای چەند داخ، نە تۊی پەردەوەن ئەر وە ناڵە و دەرد کەس خەلاس مەکەرد مەجنۇن جە کۊی نەجد کەی مەبی وە گەرد؟ بۍ سۇدەن دەعوای خەلاسی کەردەن خاس ئېدەن ئاوات وازی وە مەردەن بۍ ڕای، چۇن چەرخ غەزەب گرتەن لېت کەی سۇد مەوینی تۊ جە مایەی وېت؟ ++++++++++++++++++++++ سەرناو: دڵە بۍ نازەن سەبارەت: هێنانە سەر ڕێنووسی هۆرامی: ئاکۆ مارانی دڵە بۍ نازەن... نازپەروەر بېیەن، ئیسە بېنازەن کەفتەی بۍ قیمەت بېزیای ڕازەن ئاوارە مەبۊ، هەر نە پەروازەن مەیۊ نە پەرواز من گرتەن باڵش نازپەروەر بېیەن پەشېوەن حالش ئەر من نازم هەن، ئەر نازم نېیەن جە خاک پای دۊس، پەروازم نېیەن من ڕازیم بە جەور جەفای بېنازی دڵ ئازار بېیەن پېش نېیەن ڕازی ++++++++++++++++++++++ سەرناو: دڵە بەزەیش ئاما بە وېشدا سەبارەت: هێنانە سەر ڕێنووسی هۆرامی: ئاکۆ مارانی دڵە بەزەیش ئاما بە وېشدا شەوان مەناڵۊ چۇن نەی نە جېشدا وەڵڵا حەقش هەن سەخت جەفاش بەردەن بە جەفا چەند ساڵ، وەفاش پەروەردەن دۇر کەفتەن جە زێد قەومان و خوېشان تا مەگەر جارێ نازش بکېشان ئاخر نازش کەرد جەلای نازارش نازش بۍ بەر بی، چۊن بۊ قەرارش؟ ++++++++++++++++++++++ سەرناو: دڵە بەشقی حەق مەبە سەرگەردان سەبارەت: هێنانە سەر ڕێنووسی هۆرامی: ئاکۆ مارانی دڵە بەشقی حەق مەبە سەرگەردان مەشۊ نە جامەی گرۊی بېدەردان بېدەردان داران دڵێ وېنەی سەنگ بە هیچ خاس و گەست، نمەیان وە تەنگ نە پەروای نەدین، دڵبەرشانەن نە سەودای کەسێ نە سەرشانەن شەوان تا بە ڕۊ، ڕۊوان تا بە شەو هیچ نمەزانان غەیر جە خورد و خەو بېزار بە جە دین ئەو ناجەستانە ئەو دڵ سەنگانە، بۍ دەرد خەستانە با مودام جە دۇد دەرۇنت پەڕ بۊ لېوت جە شەربەت شەوناڵین تەڕ بۊ با ناڵەش بەرز بۊ، ڕەنج بۍ بەر بېیەن بۍ قەدر و قیمەت دەربەدەر بېیەن ++++++++++++++++++++++ سەرناو: دڵە تۊ جە تەوق سەبارەت: هێنانە سەر ڕێنووسی هۆرامی: ئاکۆ مارانی دڵە تۊ جە تەوق... مەتەرس جە ئاهر، خەوف مەکەر جە تەوق پەروانە دەستۇر بسۊچە جە شەوق شەوقی ئەو ئایر لېت مەبۊ بە زەوق پەروانە جە پەی هەوای دۊسەوە پەی دۊس مەگېڵۊ وە کەڵپۊسەوە وېش مدۊ بە شەم، ئەو بە بۍ درەنگ مەبۊ بە زوخاڵ جېش نمەیۊ دەنگ دڵ ئەر عاشقی، چۊن پەروانە بە وەرنە شۊ ساکن، وېران یانە بە ++++++++++++++++++++++ سەرناو: دڵە تۊ وە تیر سەبارەت: هێنانە سەر ڕێنووسی هۆرامی: ئاکۆ مارانی دڵە تۊ وە تیر... ناشی کەماندار بپېکۊت وە تیر پەرێ بەینەتان شېت مەبی و زویر دۊسی بەینەتدار، نمەگنۊت نە ویر ئەگەر تۊ پېتەن زەڕەی عەقڵ و فام پەرێ بەینەتان، شېت مەبە سەر سام دۊسی بۍ بەینەت سزا مەدۊ پېت بە زبان ماچۊ سەرم ها نە ڕېت لەعنەت بۊ لېشان قەومی بېوەفا هەر ڕۊ بە ڕەنگێ مەنمانان جەفا ئەگەر بۍ بەینەت بېبان هەزارێ گشت بان بە قوربان یەک بەینەتدارێ ++++++++++++++++++++++ سەرناو: دڵە دەردی دۇن سەبارەت: هێنانە سەر ڕێنووسی هۆرامی: ئاکۆ مارانی دڵە دەردی دۇن... بۊ، مەبە وە تەنگ جەفای دەردی دۇن وېت مەکەر بە چنگ خاری خەم زەبۇن بۍ پەروا نیشە تا چۇن مەبۊ چۇن ئەر خەم و خەیاڵ، چۇن کۊ لېت بارەن ئەر شادیش مەبۊ، هەزار هەزارەن ئاخر هەر دۇشان بەبۍ مودارا مەویەران چۇن باد، بۍ سۇد وە سارا سا بە بی سۇدەن خەم و شادی دۇر بۊ تا پەی شادیش بنیەم بەندی جۇر گەردەن نیهادەی بەندی قەزاش بە بۍ پەروا جە بەند ڕشتەی ڕەزاش بە ++++++++++++++++++++++ سەرناو: دڵە زاریش کەرد سەبارەت: هێنانە سەر ڕێنووسی هۆرامی: ئاکۆ مارانی دڵە زاریش کەرد... وەختی مەرگش بۍ، ڕۊیۍ زاریش کەرد ناگا کەسێ لېش تکای زاریش کەرد بەو تکا جە مەرگ نیگاداریش کەرد جە پەی دیدەی بەد نیگاش نېیان بی نېیانش بەی تەور، بەستەی گېیان بی فیدای نیگاش بام بیم بە فەریادڕەس یاوام بە فەریاد جە ئاخەر نەفەس ++++++++++++++++++++++ سەرناو: دڵە زامی نۊ سەبارەت: هێنانە سەر ڕێنووسی هۆرامی: ئاکۆ مارانی دڵە زامی نۊ... زایف و زەبۇن، زەدەی زامی نۊ چەند تیری کاریت نە دڵ گرتەن کۊ ئاخ پەی بە ختی من، دڵە داخ پەی تۊ من زار و خەمناک، زەدەی تیری خار پېکیای پەیکان، تایفەی کوففار دەرۇن سېیا داخ سۊچیای خەمان بۍ زەوق و کەم چاخ خاری ستەمان کەردات وەسەر مەشق زەمانەی بۍ شۊ ئاخ پەی بەختی من، دڵە داخ پەی تۊ فرەم وات دڵە، مروەتەن ئامان بۊ، مەوزەم نە گېج بەحری بۍ سامان. هەر یەند تاوی عیشق نە دەرۇن خڕیای تا وە شۊڵەی، شەمع چراخان گڕیای تەن بی وە زوخاڵ سېیا سفتەی کۊ ئاخ پەی بەختی من، دڵە داخ پەی تۊ ئایری دۇریت سەر کەردەن نە دڵ جەرگەم چۇن کەباب پېکیان وە چڵ نازاران بە خەشم غەزەب گېرتەن لېم بۍ وەرمی شەوان، بېیەن وە خدېم جە تاوی زوڵفان سېیای عەنبەر بۊ ئاخ پەی بەختی من، دڵە داخ پەی تۊ حەکیمان مەیان مەوینان سزام شادەت ماوەران وە سفتەی سېیام دەیسە بگېرە دەست بە زامەوە بە زامی خەدەنگ نەونەمامەوە هەر یەند کېشە ئاه، شەوان تا بە ڕۊ ئاخ پەی بەختی من، دڵە داخ پەی تۊ ++++++++++++++++++++++ سەرناو: دڵە لاڵ خاسەن سەبارەت: هێنانە سەر ڕێنووسی هۆرامی: ئاکۆ مارانی دڵە لاڵ خاسەن... زوان بەستەی لەنگ و لاڵ خاسەن جە بۍ بەینەتان بەین بەتاڵ خاسەن جە لای دڵ خاران خەم خەیاڵ خاسەن جەستەی بېزاریت سەنگەسار خاسەن گڵکۊی نەدیەنت، نادیار خاسەن دیدەی نەمینت بەبۍ نۇر خاسەن جە وەقتی جەولان نۇر جەی دۇر خاسەن سا کە تۊ وېت دی بەی حاڵ و وېنە هیچ بە قەول و فېعل ئېقرار مەبینە ++++++++++++++++++++++ سەرناو: دڵە ناڵەتەن سەبارەت: هێنانە سەر ڕێنووسی هۆرامی: ئاکۆ مارانی دڵە ناڵەتەن... دیسە بناڵە چاخی ناڵەتەن سەرت داخ کەران، یە چە حاڵەتەن؟ مەر دنیای فانی نە قەباڵەتەن؟ دانگێ شەو مانۊ، بېدار بەر جە خەو دۊس مەدارۊ دۊس، ناڵەی نیمەشەو سوب سەحەرگاهان بە ئەو لاڵەوە بە ئەسرین گەرم، ئاه و ناڵەوە ئەگەر سۊزێ هەن جە ناڵەتەدا بەزەییش مەیۊ وە تاڵەتەدا ++++++++++++++++++++++ سەرناو: دڵە هۇناوان سەبارەت: هێنانە سەر ڕێنووسی هۆرامی: ئاکۆ مارانی دڵە هۇناوان... وەس دەرەم نە جەرگ بەی تەور هۇناوان وەس شەهیدم کەر، یەندە بۍ تاوان وەس ناوم کەم کەر جە ناوی ناوان وەس دەرەم نە جەرگ نېشی ئەڵماسان وەس چۇن قەسیم کەر جە زێد هەراسان با وەس بکېشۇن سزای اناالحق با وەس بسۊزۇن وە ئایر دۊزەق دڵە دیت فەرهاد تاشا بېستۇن دیت چېش ئاما پېش شایێ چۇن مەجنۇن؟ دیت بەهرام جە چین چۇن بی خاکنشین دیت چۇن وەیلان بی خەسرەو پەی شیرین؟ دیت پۊشا زوننار شېخی سەنعانی دیت چۇن کەفت یۊسف نە چای زوڵمانی؟ ئەوان گرد خەریک نەو وڵاتێ بین هەر یەک پادشای سەر بیساتێ بین بەو گشت ئەساسە و گەنج و ماڵەوە بەو گشت جەواهیر دانەی لاڵەوە بەو گشت شەوق و زەوق بەو جەمینەوە بەو نازەنینی دنیا و دینەوە نەکەردەن عیلاج دەردەداری دڵ تا مەنزڵ بەردەن بە سەرحەدی گڵ سا تۊ چە حاسڵ جەفا بەردەنت هەر ئاه بکېشە تا ڕۊی مەردەنت ++++++++++++++++++++++ سەرناو: دڵە هەزارەن سەبارەت: هێنانە سەر ڕێنووسی هۆرامی: ئاکۆ مارانی دڵە هەزارەن... ئەر سەد زامەتت هەزار هەزارەن ئەر سەد خەیاڵت شەوان چۇن خارەن بېوەفا، ئاخر جەفات بەی کارەن فرە کەس چۇن من نە دایەرەی دەور خەلق بېیەن پەرێ مەینەتان و جەور ئاخر جەفاشان بۍ بارە بېیەن بەین جە بەختشان ئاوارە بېیەن سا بېوەفایان، پەرێ ئەو یاران وەفا و مەیلشان، بەبۍ موداران ++++++++++++++++++++++ سەرناو: دڵەی دەردینم سەبارەت: هێنانە سەر ڕێنووسی هۆرامی: ئاکۆ مارانی دڵەی دەردینم... هەی دڵەی پڕ داخ، دایم دەردینم مەکانی کېشان ئاهی سەردینم بە بای ستېزەی، تەن کۊن نەفتینم تاکەی مەنمانی جەفا بە حاڵم؟ مەوینی چۇن کۇ جە لات زوخاڵم پەی چی مەوینۇن، بەختی سېیای تۊ ستارەی وە شۇم، بەختم زېیای تۊ منەت مەبەرۇن، ئەوەند زامەت لېت پاسە بەختی تۊن، هېمای کەمەن پېت ++++++++++++++++++++++ سەرناو: دڵەی من جە بېخ سەبارەت: هێنانە سەر ڕێنووسی هۆرامی: ئاکۆ مارانی دڵەی من جە بېخ... بەندی دڵەی من کەندشان جە بېخ بە گاز گرتشان، بڕاشان بە تېخ نمەکشان شانا پېکاشان وە سېخ کۇرەشان چنی جە بەرزە بایر سېخ چەنی کەباب داشان بە ئایر سېخ چەنی کەباب گڕگڕ مگڕیا هیجرانی قەلبەم جېش نمەبڕیا ++++++++++++++++++++++ سەرناو: دڵەی من پېتەن مەر نمەزانی؟ سەبارەت: هێنانە سەر ڕێنووسی هۆرامی: ئاکۆ مارانی دڵەی من پېتەن مەر نمەزانی؟ مەشی وە یانان، ئایر مەسانی ئایرێ چۇن دڵ من بە دەستت بۊ ئایر واستەنی، پەی چی قەستت بۊ؟ دڵەی من وەسەن جیۊتی ئایر پەنەش سۊچیۊ کەژ و کۊ و بایر بگېرەش وە دەست هەی ئاوات واستە بەرەش وە یانان ئایر جەی ئاستە بڵا بانە یۊ ڕۇ بە ڕۇی شەماڵ نەبا ئاڵەمێ پېش بۊ وە زوخاڵ ++++++++++++++++++++++ سەرناو: دڵەی کەمتەر ویر سەبارەت: هێنانە سەر ڕێنووسی هۆرامی: ئاکۆ مارانی دڵەی کەمتەر ویر... دڵەی کەم خەیاڵ، کەم فامی کەم ویر شۊ، جان فیدایی جە پەروانە گیر پەروانە دارۊ، جە شۊڵەی ئایر وېنەی پەروانە پڕ مەیل و وەفا پەرێ وەسڵی دۊس بکېشە جەفا تا بە ئایری عیشق دڵ یەند نەسۊزۊ کەی ساکن مەبۊ؟ هەر دۊس مەبېزۊ وېت دە بە ئایر وېنەی پەروانان تا جە تاییفەی مەجنۇنت وانان ++++++++++++++++++++++ سەرناو: دیدە بېخەوان سەبارەت: هێنانە سەر ڕێنووسی هۆرامی: ئاکۆ مارانی دیدە بېخەوان... هام دەنگی ناڵەی، دیدە بېخەوان کەس بېدار نېیەن جە نیمەشەوان مەربادی شەوخېز، یا تافی ڕەوان یەکێ جە ئەوان منەنان هاڵا پەیوەستەن ناڵەم هەم شەو وە باڵا غەیر جە بادی سوب تافی وەش نەفەس نمەگنۊم وە گۊش سەدای دەنگی کەس ئومېد هەن بە تۊ یا شای ساحېب نەرد یا هامڕاز، یا مەرگ، یا خۊ دەوای دەرد ++++++++++++++++++++++ سەرناو: دیدەم نەمین بی سەبارەت: هێنانە سەر ڕێنووسی هۆرامی: ئاکۆ مارانی دیدەم نەمین بی... بەسەر خەم، دایم، دیدەم نەمین بی قامەت چۇن کەمان چەفت چەمین بی موحتاج بە مەئوای ژېری زەمین بی خەیاڵی شادیم دۇر کەفتەن چەنە هەر سەیلی غەمەن مەوارۊم وەنە دڵ بە تیخی خەم پارە پارە بی هەر کۊ شادیم بی گرد ئاوارە بی مەر زەڕەی خەمم ئەوسا بشۊوە سەر بنیۊن وە قەبر تازە گڵکۊوە ++++++++++++++++++++++ سەرناو: دیدەم پەیامێ سەبارەت: هێنانە سەر ڕێنووسی هۆرامی: ئاکۆ مارانی دیدەم پەیامێ... چېش مەبۊ دیدەم جارێ پەیامێ؟ یا نام و نیشان دوعا و سڵامێ یا تایێ جە زوڵف خەیاتەی خامێ یا زەڕېو مەیلت بکېیانە پەرېم نەبا چۇن قەقنەس ئایر بشۊ لېم وەرنە بە ئایر گڕ سۊزانەوە یا هاوېل بېیان وە هۊزانەوە ++++++++++++++++++++++ سەرناو: دیم جەمین گوڵێ سەبارەت: هێنانە سەر ڕێنووسی هۆرامی: ئاکۆ مارانی دیم جەمین گوڵێ... بە قەتارەوە دیم جەمین گوڵێ دەهان پڕ سەدەف چۇن بۊتەی تەڵا زوڵف شەونم شانا بە شەونم جەڵا تەڵا سەدەفەن جە سەدەف خانە بەرز بېیەن چۇن لۇل جوقەی شاهانە تەبەق تەبەق گوڵ فەیرۇزەی ماوی مەدرەوشۊ چۇن باڵ سۇنەی سەراوی قامەتش باریک سېیای تورکی تەڕ شەیدای سەر بناو چۇن عەوداڵی بەڕ هەر یەند بادېشان مەکەرۊ گوزار هۇناو چۇن سەدەف مەتکیۊ بە وار دایم سەر بە شان، شەیدای، مەستەنی قاشۇنی سیفەت دەست بە دەستەنی ++++++++++++++++++++++ سەرناو: دەردی مەجنۇن پېم سەبارەت: هێنانە سەر ڕێنووسی هۆرامی: ئاکۆ مارانی دەردی مەجنۇن پېم... فەلەک داد، دۇچار دەردی مەجنۇن پېم هیجران دۇ دەستە ئایر وەردان جېم دیم بە عەرشەوە دۇدی ئاهی وېم ناڵەم نە ناڵەم، ئایر خېزنا ئەسرینم تۊفان نۇح ئەنگېزنا من وېنەی غەواس، سەر سەنگ ڕەسیدە غەرق بیم نە گېجاو تۊفانی دیدە چەنی ئاهی دەرد مەجنۇن جە خاودا هەر گېجم مەوەرد شەو نە گېجاودا ++++++++++++++++++++++ سەرناو: دەردین دڵ بە کام سەبارەت: هێنانە سەر ڕێنووسی هۆرامی: ئاکۆ مارانی دەردین دڵ بە کام... مەر ئەوسا وینی دڵەی وېت بە کام مەجنۇن ئاسا بای کۊ گەردی کەم فام بېزار بای جە تەنگ ڕیسوا بای نە عام بە ناخۇن کەنی بېستۇن بە چەنگ بدەی بەسەردا هەردەم پارەی سەنگ شەوان و ڕۊوان ئاه و ناڵەت بۊ وە دەرگای فەڵەک زاری و لاڵەت بۊ بە سۊزی ئاهت هەردەم کو تاوی بە ناخۇن هەردەم سینە بشکاوی تا مدیەی کەریم کارسازی بۍ چۇن زەڕیو مەیلی تۊش مەوزۆنە دەرۇن جە هەر دۇ لاوە مەیل مەبۊ حاسڵ ئەوسا مەوینی تۊ وېت بە واسڵ ++++++++++++++++++++++ سەرناو: دەلیل نەزانان سەبارەت: هێنانە سەر ڕێنووسی هۆرامی: ئاکۆ مارانی دەلیل نەزانان... عەرزم بەر وە لای شای حاڵ نەزانان ئەر پەرسۊ دەلیل یەکێ کېیانان تۊ هەر بېدەنگ بە چۇن بۍ زوانان بۊ بە زانۇدا تا تەوانات هەن بواچە پەندش هەر موددەعات هەن ئەر شی بە غەزەب لەنجە و لارە کەرد فەرما، تۊ جە تەخت وېش ئاوارە کەرد عەرزەی ناڕەواج، ڕەنج بە عەبەس وېم هەزاران بې کەس، منیچ بېکەس وېم ++++++++++++++++++++++ سەرناو: دەوای زەعفی دڵ سەبارەت: هێنانە سەر ڕێنووسی هۆرامی: ئاکۆ مارانی دەوای زەعفی دڵ... حەکیم نمانا، دەوای زەعفی دڵ ڕېزەی قەند بۊس خونچەی دەهەن گوڵ سایەی پەروەردەی زوڵف بۊ سونبوڵ جورعەی جە شەربەت مینای مەستی یار قەترەی جە عەرەق، گوڵی فام ڕوخسار عەننابی لەبان، شەربەتی لیمۊش بە شەمعی دیدار باوەری بە جۊش بە گەرمی ئەو شەمع بەیان نە قەوام هەم دەفعی زەعفەن، هەم دەوای سەرسام ماهیی سەقەنقور، سیم ساق ساف میسقاڵێ جە موشک ئاهۊی خوتەن ناف پەی دەردەداران هەر ئېدەن عیلاج چۇب چینیینەن پەی سەردی میزاج نوسخەی ئەی دەوا پەرێ ڕۊزگار نیگاش بداران هەم دڵ، هەم دڵدار ++++++++++++++++++++++ سەرناو: زامداری دەردان سەبارەت: هێنانە سەر ڕێنووسی هۆرامی: ئاکۆ مارانی زامداری دەردان... من گۊشەنشین، زامداری دەردان مەگېڵۇم چۇن چەرخ، وېڵ و سەرگەردان بەتەر خەزانان، سەر گەردان کەردان بەتەر جە خەزان، دەردم خېزیان جە دەردشان چۇن سەیل ئەسرم ڕېزیان خەزانان دېز ڕەنگ، ئالای گوڵ نە گڵ ئېشناشان زامی ناسۊر کەفتەی دڵ ئیسە وېڵی من وە جایێ یاوان ئەجەل پەی کوشتەم نەدارۊ تاوان ++++++++++++++++++++++ سەرناو: زامنان خاڵی سەبارەت: هێنانە سەر ڕێنووسی هۆرامی: ئاکۆ مارانی زامنان خاڵی... دەوری زامن دیم، جە یاران خاڵی دەرۇن جۊشش دا، بە دەرد مناڵی گەردی ڕۇی زەردم، بە زوخاڵ ماڵی بەو توڕڕە گڕەم من جە دەرۇنەن عەجەب ممانۊ سیڕڕم جە بۇنەن موازۇن ئەر دڵ بگڕیان بېیا بېیا بە کۊگای زوخاڵی سېیا ++++++++++++++++++++++ سەرناو: زڵېخام چەمەر سەبارەت: هێنانە سەر ڕێنووسی هۆرامی: ئاکۆ مارانی زڵېخام چەمەر... زوڵفش پەی شینم خاس بەستەن چەمەر پۊشا بەرگی ساف سېیای موشک پەروەر کەردەن بەسەردا پېیاڵەی عەنبەر زوڵفانش لۇل دان بە ماتەمەوە بەند بېیەن بە چەنگ خاری خەمەوە یانی دۇ دیدەش خوماری داران؟ وەرنە پېم دەران دەوای بیماران کەسێ زوڵفی ئەو پېش چەمەر گیرەن ماوای بەهەشتش جە کۊ جە ویرەن؟ ++++++++++++++++++++++ سەرناو: زڵېخام ئەسەر سەبارەت: هێنانە سەر ڕێنووسی هۆرامی: ئاکۆ مارانی زڵېخام ئەسەر... جەو ساوە دۇریت، لېم کەردەن ئەسەر چۇن ڕۊی مەردەگان، سفتە ڕۇی جگەر دەستېوەم خاکەن، یەک وەبانی سەر جە پەی نەدېیەنت بە نائومېدی وېڵ وېڵ مەگېڵۇ بېدی وە بېدی یا خوا بە وەسڵی تۊ شادم کەرو یا خۊ خێر وە مەرگ ئازادم کەرۊ ++++++++++++++++++++++ سەرناو: زڵېخام تەتار سەبارەت: هێنانە سەر ڕێنووسی هۆرامی: ئاکۆ مارانی زڵېخام تەتار... دۇ دیدەش وېنەی وەلەدەی تەتار جەیران دەودۊ، جېیا جە قەتار دۇر کەفتەی سارای، مەئوای خوتەن شار مېرغوزار ماوا، ڕەوېڵەی ڕەوېڵ وەڵگی گوڵ بە دەم نەپای هەردان گېڵ زامەن جە سەری، تەیب بەند موشکەو نە خەوفی سەیاد، شەو نەکەردە خەو دەیری بیدی گېڵ دەوەندەی دۇر پەڕ کڵاف بە شەونم خونچەی گوڵان تەڕ قنیات کەر وە گوڵ خونچەی سۊسەنان شەو خاو گەش نەپای بارگەی چل تەنان قودرەت بە کەرەم بۍ هەستایی وېت بە حەرفی ئەوەڵ ئەلف لامی وېت ئەو وەلەدەی شۊخ نە پای هەردان گېڵ حوققەی نافی موشک، زوڵف ماوا پېڵ پەی ساکنی دەرد بگېرەش نە دام تا چەندێ مەرهەم بەیۊ پەرۍ زام ++++++++++++++++++++++ سەرناو: زڵېخام تەیار سەبارەت: هێنانە سەر ڕێنووسی هۆرامی: ئاکۆ مارانی زڵېخام تەیار... سەحەر کەرد ئاخېز، خاڵان کەرد تەیار سا کە ڕۇی جام دی بە دیدەی خومار داش بە سەنگ دا مینای جام بە قار وات چە خێرتەن، لېڵاو بامەنی؟ جەی لېڵاوتەر بای، چە خاس جامەنی جام لاڵا بە زار بە زگارەوە بە مینای شکەست پارەپارەوە واتش یە چېشەن، چۇن بەی تەورەنی؟ پېسە بۍ ئنساف، چمان گەورەنی؟ جامان بە جەمین تۊ لېڵاو بامەن تۊ بۍ ئینسافی چېش گونای جامەن ++++++++++++++++++++++ سەرناو: زڵېخام خاودا سەبارەت: هێنانە سەر ڕێنووسی هۆرامی: ئاکۆ مارانی زڵېخام خاودا... بە پەنجەی نازک، ئاراستەی خاودا دەستە دەستە زوڵف ژەند بە گوڵاودا ئاوەرد بە ڕوخسار بۇمی ئافتاودا پەنجەی خاس خېزان، خەرامانی مەست پا نېیا بە ناز چارگۊشەی ڕەنگ بەست باڵا گیرداوە، شی بە ناودا کېشا باڵاپۊش بە ئافتاودا خاوی خێرش بۊ، ئەی گوڵ ئەندامە چۇنکە کەس نەدېیەن، بەندەی بەی تامە عەجایەبم دی بەی فریشتەوە ئافتاوێ بی، زېیا و نیشتەوە ++++++++++++++++++++++ سەرناو: زڵېخام دارۊ سەبارەت: هێنانە سەر ڕێنووسی هۆرامی: ئاکۆ مارانی زڵېخام دارۊ... شەستی تۊ مایەی زیندەگی دارۊ با بەیۊ فېشتەر، جە هېزی ئارۊ نەبا دڵ جە داخ گېیانش بسپارۊ پەی چېش بە پەیکان تۊ ژېیانمەن؟ وەرنە نەمەندەن وەختی گېیانمەن ئازیز با بەیان خەدەنگان خاس خاس پەیاپەی پەی پەی ژارالۇی ئەڵماس هەم بشان بشان بە ڕشتەی جەرگم هەر تاکە بەرشۊ خۊفی ڕۊی مەرگم شېیەنم نە دڵ چەندە پەیکانێ جەو بۊنە مەمەندەن نیمە جە گیانێ فیدات بام، جە شەست مودارات نەبۊ زیندەگی بەخشەن مەودای تیری تۊ ++++++++++++++++++++++ سەرناو: زڵېخام زوننار سەبارەت: هێنانە سەر ڕێنووسی هۆرامی: ئاکۆ مارانی زڵېخام زوننار... پەرێ دینی تۊ، بەستەنم زوننار بۍ خەوف جە تانەی ڕەقیب و ئەغیار ها شیم نە مەزهەب تایفەی کوففار چۇن شېخی سەنعان بەرشېیام جە دین پۊشام خەرقەی کوفر، تەرسای بۍ ئایین نەڕای دینی تۊ ها بەستم کەمەر بەرشېیام جە دین خودا و پېغەمبەر پەی چېش؟ پەی حەڵقەی زوڵفی پڕ چینت تاریکیی کوففار، دەوری جەمینت تا کە بواچان نەڕۇی سەرزەمین کەسێ پەی کەسێ بەرشېیەن جە دین هیچ نەدارۇن باک تۊم قبۇڵ کەردەن هەر تۊم خەیاڵەن، تا وە ڕۊی مەردەن وە گەر نە تۊ هیچ حاڵم نەزانی بە وېنەی مەجنۇن داخ پېم مەنمانی ئەوسا جەو دما وەسێتم خاکەن تا مەرگ سامان دیدەم نمناکەن تا ئەو ڕۊ خاکم بشۊ نە دیدە ئەراگېڵی تۊم، لەب بەرگوزیدە ++++++++++++++++++++++ سەرناو: زڵېخام ساوان سەبارەت: هێنانە سەر ڕێنووسی هۆرامی: ئاکۆ مارانی زڵېخام ساوان... دۇ دیدەش وېنەی وەلەدەی ساوان کام وەلەد؟ ئانە خەستەن، پەی ئاوان؟ هەر ئەو ناف مەوزۆ سوب نە سەراوان خەرامانی مەست، جقەی ناف بە دۊش قنیات وە سونبوڵ، چۇزەی نېرگز نۊش وەڵگی گوڵ جە بېخ، بە هەڕە کەندە سادار، سەرسام، سایەی وېش مەندە دەیری دیدەوان، ڕەوېڵەی خۇتەن بېزار جە زامەن، دۇرکەفتەی وەتەن زامەن نە جەبەل سەیادی توندخۇ کەمتەر وە گوریز، پاکېشی تیز دۇ سەرسام، بېهۊش، خاوېر و مەلۇل شەو خاوگەی مەکۊش پای بارگەی بالۇل قودرەت بە کەرەم، بەبۍ هەمتاییت بە دایەرەی چەرخ هەفتەم سەماییت ئەو وەلەدەی شۊخ، وەحشی خەیاڵ خام پەی ساکنی دڵ بگېرەش نە دام ++++++++++++++++++++++ سەرناو: زڵېخام ماران سەبارەت: هێنانە سەر ڕێنووسی هۆرامی: ئاکۆ مارانی زڵېخام ماران... دۇ عەقرەب چەنی دۇ دەستەی ماران چین چین سەف نە دەور کەعبە وناران بەردەنش نە بەند ڕای ڕاوېیاران جە کەعبە تا فەرق اسودالحجر دەوری دایرە جای زەمزەم یەکسەر بە دەستۇری جان دەستاخی خاین عەقرەب وەسەردا جەی گەردەن تاین پەی قەتڵ و تاراج حاجی یانی ساف کەردەنش نە بەند ڕای کەعبە تەواف وەختەن قیامەت پەی خەڵق ئەو پا بۊ ڕۊی ئاخر زەمان دەوری دنیا بۊ ئەر یە نیشانە و عەلامەت نەبۊ ڕۊزی ڕەستاخېز، قیامەت نەبۊ؟ کۍ دېیەن تەواف کەعبە باتڵ بۊ زەهرەن نە کوففار زەمزەم قاتڵ بۊ ++++++++++++++++++++++ سەرناو: زېنهار سەد زېنهار سەبارەت: هێنانە سەر ڕێنووسی هۆرامی: ئاکۆ مارانی زېنهار سەد زېنهار... دڵە واتم پېت، زېنهار سەد زېنهار بېوەفا هەرگیز مەگېرە بە یار جە بېوەفایان مەبینە قەرار کەسێ بگېرە تۊ بە یاری وېت ئەو جە تۊ فېشتەر بسۊچۊ پەرېت زېنهار با سەودای کەسێت نە سەر بۊ ئەو جۊیای عەشق بۊ، جە تۊ بەتەر بۊ بۍ بەینەت شېوەی شېویان دارۊ کەسێ سەر نە ڕای ئەوان نەسپارۊ ڕەفېقی ناحاڵ، دۊستی بۍ بەینەت مەگنەشان نە شۊن، مەینەتەن مەینەت ++++++++++++++++++++++ سەرناو: زەڕگۇن کەردەوە سەبارەت: هێنانە سەر ڕێنووسی هۆرامی: ئاکۆ مارانی زەڕگۇن کەردەوە... نەووەهار زەمین زەڕگۇن کەردەوە سۊزەی دار کېشا سەر جە پەردەوە شەو بە شەونم، خاو دیدەش بەردەوە خېزا بارخانەی بادی سەبایی کەردەوە بنەی تاقە گوشایی چەمەن بۍ مەجلیس گوڵانی وەش بۊ توند کەرد تەنافان، هۊردا چەتری نۊ داخڵ مەجلیسان مەستی جامی مەی فەرما بوڵبوڵان نەوای سازی، نەی کۊسار نمانا، ڕەنگێ زەڕگۇنی شەقایق مەی کەرد نە جامی هۇنی چنۇر دەماخ بەرز، سۊسەن خېمەکۊ ساقی شەقایق، شەو شیفای شەوبۊ بەڕەزایێ هەن بە ڕۇی تاوېران تاریان چۇن تاری زوڵف خاوېران بەڵۍ پەی کەسێ نە دڵ نەبۊش خار بوېیارۆ بە زەوق سەرمەستی وەهار نەک چۇن من خەریک دەردی بېدەرمان تەن تاویای، تاو ئایری زامان منیش جەفا و جەور جە دۇری یاران ڕېزا جە دیدەم ئەسرین چۇن واران ++++++++++++++++++++++ سەرناو: ساقی مەی داریم سەبارەت: هێنانە سەر ڕێنووسی هۆرامی: ئاکۆ مارانی ساقی مەی داریم... ئارەزۇی نۊشای جامێ مەی داریم هەر شەو تا سەحەر ناڵەی نەی داریم پەی نۊشای جامێ، ڕەنگ چۇن بەی داریم مەتەرس جە تانەی حەسۇدانی بەد جامێ مەی مەکەر، جە عاشقان ڕەد سەحەر سوراحی سوجدە وە جام بەر جەو پەی عارفان جە عەقڵ و فام بەر مەی ئاقیق ئاسا، نە جامی تەڵا پەی ئاوېنەی دڵ مەبۊ بە جەڵا ئەوسا دەور مدەی، ساقی جام وە جەم با جە زوڵفت دا، زەڕیۊ نەبۊ کەم پەی چېش ئەی مەجلیس شادیی نام دارۊ؟ هەر کەس خەمینەن، خەمش موېیارۊ ++++++++++++++++++++++ سەرناو: ساقی ناڵەی نەی سەبارەت: هێنانە سەر ڕێنووسی هۆرامی: ئاکۆ مارانی ساقی ناڵەی نەی... ناڵەم زگارەن، وېنەی ناڵەی نەی جەرگم کەبابەن، ڕەنگ زایف چۇن بەی پەی چېش؟ پەی نۊشای جورعەی جامی مەی با وەس بناڵۊ دڵ بە جەفای زام با سەرنگۇن بۊ سوراحی نە جام مەی گوڵ خونچە ڕەنگ، حەمرا چۇن شەفەق ساقی بۍ مەی مەست، جەمین پڕ عەرەق پېم دەرە جامێ وېنەی جامی مەی تا مەر ساکن بۊ دڵ جە باری خەم جامێ مەی بە دەست، نۊشانۊشم بۊ قەهقەهەی مینا با نە گۊشم بۊ بنۊشۇ جامێ پېم یاوۊ مەستی بېزار بۊ جە دین دنیاپەرەستی با پڕ بۊ جە مەی سوراحی و جامم چەندێ بگېڵۊ دنیا بە کامم ++++++++++++++++++++++ سەرناو: ساقی کەی بۊ کەی سەبارەت: هێنانە سەر ڕێنووسی هۆرامی: ئاکۆ مارانی ساقی کەی بۊ کەی... بەشق دیدەی وېت، سا کەی مەبو کەی؟ جەرگم بی کەباب، ڕەنگم بی وە بەی ئېنتېزارەنان، مەی ماوەری، مەی بامانەت هەر یەند مەکەرۊ ناڵە با مینا بنیۊ دەم نە پېیاڵە مەی یاقۇتی ڕەنگ، دۇر جەی ستادە ساقی شەربەتێ، گوڵاو ئوفتادە دەۇر بدە بە جەم، پېم دەرە جامێ تا مەر، جە دەرۇن بەر بیرۇن فامێ ++++++++++++++++++++++ سەرناو: سانی نەداری سەبارەت: هێنانە سەر ڕێنووسی هۆرامی: ئاکۆ مارانی سانی نەداری... وە باڵات قەسەم، سانی نەداری نامت مەرهەمەن پەی زامی کاری زیکرت هەر شېفان، پەرۍ بیماری هەر کەس وە ئیخلاس مەکەرۊت وە یاد هەر چېش ئارەزۇن، مەیا وە موراد ئومېد هەن قاپیت، جوملە موخلیسان بکەرېم حیساب، ڕۊی ئاخر زەمان نەبۊ بۍ نەسیب جە سایەی لیوات ئەرجۊم هەر ئیدەن قیبلەم جە دەرگات ++++++++++++++++++++++ سەرناو: سای سەهەند سەنگ سەبارەت: هێنانە سەر ڕێنووسی هۆرامی: ئاکۆ مارانی سای سەهەند سەنگ... سوبحدەم وەشەن سای سەهەند سەنگ بەڵام بە شەرتێ، ڕەقیبی بەد ڕەنگ نەگنۊنە وەنەت فرسەنگ بە فرسەنگ چەنی دۊس وېت، بنیشی بە شاد وېیەردەی ساڵان، باوەری وە یاد گا نېیاز جە تۊ، گا ناز جە دڵبەر تۊ پەی ئەو سۊزان، ئەو جە تۊ بەتەر هەر تاکە عومرت یاوۊ بە ئەنجام نە سای ئەو سەنگدا بوېیاری بە کام ئیدەن سەرمایەی ئەی دنیای فانی ماباقی پۊچەن، هەر چېو مەزانی ++++++++++++++++++++++ سەرناو: ستارېو مەبۊ وادەی سوب سەحەر سەبارەت: هێنانە سەر ڕێنووسی هۆرامی: ئاکۆ مارانی ستارېو مەبۊ وادەی سوب سەحەر بەرمەیۊ جە بورج بەرزی کەڵەدەر نۇرش پەخش مەبۊ نە ڕۇی سەرزەمین ڕەهنومان پەرۍ دیندارانی دین وەختێ کە دیدەم منمانۊ جەمین مەکەرۊ تەیار، سوپای زەنگی و چین ستارەی شەریف جەمین مایەی خوەر چۇن شەرم دارەن، سەرمەوزۊ نەوەر کەسېو ستارەی سەحەر نەوسەندەن فیداش بام عەجەب پایە بوڵەندەن ++++++++++++++++++++++ سەرناو: ستارەی سەحەر ستارەی سەحەر... ستارەی شەریف، وەقتی سوب سەحەر وەشڵە پێت هەر یەند جە بورج مەی وەبەر شۆڵەت ئاستانەی کەسێ مەدۆ سەر هەر ڕۆ تەمامەن وەقتی سوبح دەم ئەو زێد و ماوا مەوینی بە چەم نەک بە جەستەی من، ستارە سیا دوورکەفتەی زامەن، جە یاران جیا یە خەیلێ وەختەن شەڵڵا نمانوو زەدەی هیجرانم هیچ نمەزانوو وەشڵە پێت شەریف ڕەوشەن ستارە چوون من هیجرانت نیەن نە چارە ++++++++++++++++++++++ سەرناو: سۊز جە سۊزی من بېقەرار بېیەن سەبارەت: هێنانە سەر ڕێنووسی هۆرامی: ئاکۆ مارانی سۊز، جە سۊزی من، بېقەرار بېیەن دەرد جە پەی دەردم، دەردەدار بېیەن زامەت زویرەن، جە پەی زامەتم خەم خەجڵ مەندەن، جە خەم قامەتم وېڵ، جە وېڵیی من، تەمام وېڵ بېیەن چۇن من، کۊ بە کۊ ئاراگێڵ بېیەن سا کەسێ چۇن من، بەی تەور بۊ پەیدا زامەت و دەردش گشت دا بەوەیدا تا وەقتێ گەردۇن گەردم دۊ وە باد شەرتەن جەفای من، کەس نەگنۊش وە یاد ++++++++++++++++++++++ سەرناو: سۊسەن گوڵێ دیم بۊش چۇن عەنبەر بۍ سەبارەت: هێنانە سەر ڕێنووسی هۆرامی: ئاکۆ مارانی سۊسەن گوڵێ دیم، بۊش چۇن عەنبەر بۍ دەهەن شکەستەی، بادی سەحەر بۍ یەقین خۊ نەوخېز خونچەی ساوا بۍ جە وەش بۊش ماوای خوتەن ئاوا بۍ بەڵۍ سوب سەحەر پېکابۍ لافێ زوڵف لۇل لەولاو، موشکین کڵافێ واتش منیچ بۈم، وېنەی بۊی زوڵفەن وەلۍ ئەو چین چین سەرتاپا کوڵفەن نمەز بای شەماڵ، جە ڕۇی زوڵف دەستە چەنەش مژنەوۊ چەند لاف بەی جەستە بۍ حیساب قارێ نە دڵ مبەرۊ بۍ جا دەهانش شکەست مدەرۊ جە پېکای ئەو لاف بۍ مەوزۇنەوە هېمای دەهانش ها بەو خۇنەوە ++++++++++++++++++++++ سەرناو: سۊسەنێ مەبۊ سۊسەنی وەش وەخت سەبارەت: هێنانە سەر ڕێنووسی هۆرامی: ئاکۆ مارانی سۊسەنێ مەبۊ، سۊسەنی وەش وەخت بەرمەیۊ نە پای تەختەی وەفری سەخت گا لاشۆ وە شین مماڵۊ جەمین گا پەل مەکەرۊ بڵاو نە زەمین گا لۇلو و کرژەن چۇن زەڕین کڵاو گا باد مەکەرۊش پەل جە پەل بڵاو هەردان مەکەرۊ بە دەشتانی چین جە ڕەنگی دیدەی مەحبۇبی ماچین شېوەی ئەو سۊسەن ها بەو دیدەوە بەو گۊنای گوڵڕەنگ بەرگوزیدەوە ++++++++++++++++++++++ سەرناو: سېیای بۊ عەنبەر سەبارەت: هێنانە سەر ڕێنووسی هۆرامی: ئاکۆ مارانی سېیای بۊ عەنبەر... دۇ دەستە جە زوڵف، سېیای بۊ عەنبەر چەفت، چەمیدە، پڕ چینی، چەنبەر بەرئامان جە بېخ شەوبەندی دڵبەر وەختێ بای شەماڵ مەگنۊشان نەوەند دەور مەدان نە دەور دائیرەی شەوبەند جە تاوی هوجۇم بادی بۍ ئاهەنگ دامانی شەوبەند مەگېران بە چەنگ هەر وەخت جەوەندشان باد مەبۊ بەتاڵ ئەودی پەخش مەبان نە دەورانی خاڵ نەشیم وە گەردەن جەو زوڵفە تایێ هەر تایێ لېم بی بە سەد بەڵایێ ++++++++++++++++++++++ سەرناو: سەر زەمینانەن سەبارەت: هێنانە سەر ڕێنووسی هۆرامی: ئاکۆ مارانی سەر زەمینانەن... وەهار جەلابەخش، سەر زەمینانەن مەکانی گوڵ گەشت، جام جەمینانەن فەسڵی ئاخ و داخ دڵ خەمینانەن نازداران جە زەوق، گوڵانی ئاڵا شادی و زەوقشان، بەردەن وە باڵا دەردینان جە سەیر گوڵانی باخان ئاخشان مەبۊ بە دەخمای داخان هەر دڵێ بۍ ڕەنگ، وېنەی سەنگی خار بۍ بارەن، جە نەقش ڕشتەی نەوبەهار ++++++++++++++++++++++ سەرناو: سەیری نەمامان سەبارەت: هێنانە سەر ڕێنووسی هۆرامی: ئاکۆ مارانی سەیری نەمامان... ئارۊ شیم وە سەیر نەوتۇڵ نەمامان دیم بەدەن عوریان جە سەر تا دامان وەڵگی باڵاشان ڕېزان وە دامان بۍ زەوق و زویر وېنەی خەم کېشان زەلیل و زەبۇن، زار و پەرېشان پەرسام نەمامان خاتر جە خەم کەیل کۊن وەشیی دێرین ڕشتەی نەوسوەیل؟ واتشان پەنەم ئەر هەی بۍ خەبەر بە کەس نەمەندەن وەشی تا بە سەر ڕەشتەبۍ سوەیڵ وەڵگی باڵامان هەرزان کەردەبۍ ئاڵا و واڵامان ناگا بادێ سەرد، ستەم غەزەبناک وەڵگی باڵامان ڕېزنا نە خاک ئیسە نەمەندەن شادی و وەشیمان شادی فەسڵێ بۍ، دیمان، نەدیمان وەشی چە وەش بی، وەشی های وەشی وەشی وەش وەش بی، وەش جەدەس بەرشی ++++++++++++++++++++++ سەرناو: شای سۊسەن خاڵان سەبارەت: هێنانە سەر ڕێنووسی هۆرامی: ئاکۆ مارانی شای سۊسەن خاڵان... مایەی ڕېحانان، شای سۊسەن خاڵان کەردەنش وە زێد بورجی کۊساڵان دینش سەرمایەی دڵ کەردەن تاڵان دۇ زوڵفش دەستەی پەریزاد بەستەن دۇ دیدەش دیدەی نەرگسی مەستەن سوڵتانی سۊسەن، تەختی سوڵتانی شېیەن نە مەزهەب، خاڵی موڵتانی گوڵانی ڕەنگ ڕەنگ، نازاران دڵگیر وەفراوان نېیان، نە پاشان زنجیر نەبا جە ناگا دۇر گنان جە لاش بنان وەخت سەیر فەرشی قەدەمگاش گاهێ مەیلش هەن وە سەیرانی گوڵ پا نەنیۈ وە بۇم، بنیۊ وەبان گوڵ شیرین لەیلېوەن، سپەردەی وەیس بۊ چۇن لەیلۍ ڕ‌ەنگەن، با یەکېش قەیس بۊ ++++++++++++++++++++++ سەرناو: شکۊفیان گوڵ سەبارەت: هێنانە سەر ڕێنووسی هۆرامی: ئاکۆ مارانی شکۈفیان گوڵ... خاس ئاما وەهار، شکۊفیان گوڵ هەر یۊ بە ڕەنگێ بەرئامان جە گڵ بەڵێ مەخېزۊ جېشان دەردی دڵ وەلۍ بەبۍ یار مڎیۊنە پېشدا چمان چەم مەڎان بە سەری نېشدا یانی هەرپېسەن، دایم گەشتی گوڵ یار بۍ گوڵ وەشەن، نە گوڵ پەرێ دڵ ++++++++++++++++++++++ سەرناو: شیرین بەڵا کەرد سەبارەت: هێنانە سەر ڕێنووسی هۆرامی: ئاکۆ مارانی شیرین بەڵا کەرد... ڕۊی عەزم جەزم شۊر و بەڵا کەرد سوپای سام نە دەور دیدەش وەڵا کەرد نەبەردی یەزید ڕۊی کەربەلا کەرد پۊشا بەرگی ساف سېیای غەزەبناک دڵ جە ڕەحم و ڕای ڕەزای خوڎا پاک فەرمان دا بە قەتڵ دیدەی بۍ خەوان نەفەس ناڵینان، چەم چۇن سەراوان یەکېشان من بیم بە یەک دیانێ شېیەنم نە دڵ هەزار پەیکانێ کەسێ سوپای سام دیدەش بەی تەور بۊ ئەر زوڵفش پەخش بۊ، مەبۊ چ تەور بۊ؟ ++++++++++++++++++++++ سەرناو: شیرین بەینت بەست سەبارەت: هێنانە سەر ڕێنووسی هۆرامی: ئاکۆ مارانی شیرین بەینت بەست... مەر یادت مەیۊ، ئەو ڕۊ بەینت بەست؟ دەستی ڕاست نېیای بانی دیدەی مەست تەبەسومت کەرد، لیوی لەعلت گەست من بەو شەرت و بەین بەستەی هەر جاران تۊم کەرد وە سەنەم، وېم چۇن ڕەهبانان مەزهەبی میللەت مەسیحای مەریەم دەردم، دەر ساعەت، ئاوەردم بەهەم زاهیدان زانان، زاهیر بی نە عام شیرین بەندېوش سەندەن پەی غوڵام ئیسە یە چېشەن؟ موژەت شەڕ دارۊ جە چارەت غەزەب، عەزا مەوارۊ بېزاریت واستەن، جەی کەمتەر بەندە غوڵامی جە وېت کەردەن ڕەوەندە حەیفم هەر ئینەن، حۇری حۇرلەقا شەرتداران وانان تۊ وە بۍ بەقا ++++++++++++++++++++++ سەرناو: شیرین بەینی نۊ سەبارەت: هێنانە سەر ڕێنووسی هۆرامی: ئاکۆ مارانی شیرین بەینی نۊ... تۊ چەنی بەڎان، بەستت بەینی نۊ زوڵف ئەشەد کڵاف، خاڵان عەنبەر بۊ چۇن بۍ بەینەت پیت بېزیام جە تۊ ئەو ڕۊ ئیبتیدای عەهد و پەیمان بی پەیمانت بە عەهد لەیلای زەمان بی بە لەفزی شیرین ئیقرارت مەکەرد لافی بەین مەدای، سەوگەندت مەوەرد منیچ بەو گوفتار خەیلێ بەردم ڕەنج واتم مەر بە ڕەنج پەیدا ببۊ گەنج ئاخر نە گەنج دیم، نە سەوگەند، مایە ڕەقیب ناستانەت یاوا بە پایە حاشا، جە ئەلتاف لوتفی خوداوەند ڕەنجبەر بېبەش بی، ڕەقیب وایەمەند ++++++++++++++++++++++ سەرناو: شیرین تار کەردەن سەبارەت: هێنانە سەر ڕێنووسی هۆرامی: ئاکۆ مارانی شیرین تار کەردەن... یەک تایێ جە زوڵف سېیاش، تار کەردەن بە تارش عەقڵم تار و مار کەردەن بە پېچش کۊی خەم وەنەم بارکەردەن بە شەوبۊش، بۊ عەتر دەماخم کەردەن بە ڕەونەق ڕەنگ بەست ڕۇی داخم کەردەن بە باریکیش گەرد، تەنم بە ئاو دا ئاو داش بەڕۇی بەرگ بافتەی ساودا بە درازیش عومر کۊتام درازەن تا پەردەی حیجاب نە ڕۇی ڕاز بازەن ئەو بە تایێ زوڵف سېیای بۊ عەنبەر بەند کەردەن گېیانم تا بە ڕۊی مەحشەر ئەر ئەو دەستەی زوڵف شەماڵ بشانۊ گشت ئاڵەم زیندەی جاوید مەمانۊ ++++++++++++++++++++++ سەرناو: شیرین زوڵف لۇل سەبارەت: هێنانە سەر ڕێنووسی هۆرامی: ئاکۆ مارانی شیرین زوڵف لۇل... فیدای زوڵفت بام، گا کرژەن، گا لۇل گا چۇن سېیامار، پەشېوەن، مەلۇل گا وېنەی لاولاو، مەپېچیۆ نە تۇڵ گا گا پەشېوەن، گاهێ گرنجەن گا گا گرەبەند، مڵەمای زنجەن گاگا چەم وەردەن چۇن چەنبەرەی چین گا پەی جەمینت بېیەن وە پەڕچین گا تاتان جە تاو سەرڕشتەی شەماڵ گا خەفتەن ساکن نە دەورانی خاڵ دیدەم چېش مەبۊ، تایێ جەو زوڵفە؟ جەو زوڵفی وەش بۊی، لۇلی سەرکوڵفە شای شیرین پەیکەر، جەمین جامی ساف پەرێم بکېیانی تایێ جەو کڵاف بماڵۇن نە چەم ساکن بۊ جە دەرد دڵ بی بە زوخاڵ، با نەبۊ وە گەرد ++++++++++++++++++++++ سەرناو: شیرین موختەسەرەوە سەبارەت: هێنانە سەر ڕێنووسی هۆرامی: ئاکۆ مارانی شیرین موختەسەرەوە... بە شەدەی شیرین موختەسەرەوە ئاما عەزم سەیر سەحرا و دەرەوە دیاردا وېش گېرت وە ڕۇی خوەرەوە جەمینش چۇن جام، جیهان دا جەڵا پېکابۍ وە سەر دۇ حوققە تەڵا زوڵف تەڵا، تۊمار جوققەی کەیکاوس قەتران تەر جە پەڕ دېزی باڵ تاوس ++++++++++++++++++++++ سەرناو: شیرین شناسان سەبارەت: هێنانە سەر ڕێنووسی هۆرامی: ئاکۆ مارانی شیرین شناسان... یە چە ڕۊیێ بی، من تۊم شناسان؟ نە خوڎا مەرگێ مەڎۊ بە ئاسان نە دڵ جە لای تۊ مەبۊ هەراسان دەست و پا بەستە خەجاڵەتەنان چۇن شاهی شەترەنج کش و ماتەنان ++++++++++++++++++++++ سەرناو: شیرین شەرت و بەین سەبارەت: هێنانە سەر ڕێنووسی هۆرامی: ئاکۆ مارانی شیرین شەرت و بەین... قات بېیەن جە لات، ڕەویەی شەرت و بەین چۇن خۊفت نېیەن تۊ جە من و بەین قەتڵت واجېبەن، وە گەردەنم دەین پەی چېش کە جە لای شەرت و شۊن داران؟ ساحیب وەفا و بەین ڕۇی ڕۊزگاران هەر کەس بۍ شەرتەن جە بەینەت دۇرەن واجب القتلەن، ئەر سەد چۇن حۇرەن تۊ خوڎا خەیرت دۊ، ئازیزەی نەبات چمان شەرت و بەین قات بېیەن جە لات ئەگەر مەزانی زوڵفان عەنبەر بۊ بۍ شەرتی خاسەن، تۊ کەردەن بە خۊ تەقسیرێ مەگیر من بېزارم لېت چەنی بۍ شەرتی وېت مەزانی وېت ++++++++++++++++++++++ سەرناو: شیرین شەرم نېیەن سەبارەت: هێنانە سەر ڕێنووسی هۆرامی: ئاکۆ مارانی شیرین شەرم نېیەن... شیرین پەی خاسان، شەرت هەن، شەرم نېیەن پەی چېش مەواچان حیجاب خاس نېیەن؟ جە ئافتاو خاستەر کەسێ کۍ دېیەن؟ ئەگەر پەی خاسان حیجاب خاس مەڎی ئافتاب و مەهتاب هیچ کەس نمەڎی کەسێ وېنەی تۊ شەم بۊ جەمینش لازم پەروانان مەیان وە دینش ئېمەیچ پەروانەی شەم شوناسانیم پەڕ و باڵ سفتەی دینی خاسانیم میللەتی پاک دین پېغەمبەرانیم نەک جە تایفەی کەم نەزەرانیم بنمانە جەمین نۇری پاکتەن ئەر تۊ پاکەنی، جە کۍ باکتەن؟ ++++++++++++++++++++++ سەرناو: شیرین مەوانا سەبارەت: هێنانە سەر ڕێنووسی هۆرامی: ئاکۆ مارانی شیرین مەوانا... ئایەتی شەریف قورئان مەوانا گا گا جەمین چۇن قەمەر مەنمانا من بە فریشتەی پای عەرشم زانا تبارک الله ئەو ڕۊ جەو دەمدا زوڵف چۇن باڵی تەیر مەدا وە هەمدا دۇ دەستەی کڵاف وناران چۇن سەف پەخشکەرد وە بان بسم اللهی مەسحەف ئەر بە دەنگی نەرم ڕېزەی ڕازەوە بە لەحنی جەدید خۊش ئاوازەوە جە وەختی مەمات ئادەم نەناسین ئەر شیرین پەیمان بوانۊ یاسین سەدای دەنگی ئەو بژنەوی بە وېت ئیشەڵڵا ڕەوزەی باقی مەدان پېت ++++++++++++++++++++++ سەرناو: شیرین نېیاوە سەبارەت: هێنانە سەر ڕێنووسی هۆرامی: ئاکۆ مارانی شیرین نېیاوە... پەی سفتەی دڵان دامش نېیاوە پەردەی سېیاماڵ هۊردا و دېیاوە چۇن مانگ نە گۊشەی هەوری سېیاوە ئەر سەد مانگ دارۊ شۊڵەی شەوقی نۇر کەسێش پەی نېیەن پەروانە دەستۇر ئیڎ چەند پەروانەی گېیانفیدا دارۊ جە دۇر پەی دینش هەر گېیان مەسپارۊ یەکی جە ئەوان منەنان، هاڵا بڵېسەش بەردەن ناڵەم وە باڵا هەر شەمێ کەسێش پەی سۊزان نەبۊ با ئەو شەم هەرگیز فرۊزان نەبۊ ++++++++++++++++++++++ سەرناو: شیرین نیگایێ سەبارەت: هێنانە سەر ڕێنووسی هۆرامی: ئاکۆ مارانی شیرین نیگایێ... کەرەم کەم مەکەر، جە نیم نیگایێ جە پەی واتەی عام نە گشت جېگایێ جایێ بۍ ڕەقیب، ئەویچ گا گایێ تۊ تازە بەینی بەدکاران بۍ بەین مەتەرسۇ وزات دۇر جە وەفا و بەین نەکېشانت جەور بېکەسیی جارێ بېوەفا مەبی بە یەک ئازارێ جە بەڎ واتەشان خاتر گەرد مەبی وېنەی بېمەیلان، مەیلان سەرد مەبی فیدای نیگات بام با جە نېیان بۊ نەبا واتەشان پېمان زیان بۊ ++++++++++++++++++++++ سەرناو: شیرین نەشتەرەن سەبارەت: هێنانە سەر ڕێنووسی هۆرامی: ئاکۆ مارانی شیرین نەشتەرەن... نە دەوری دیدەش هەزار نەشتەرەن موژانش جە تېخ ئەڵماس تېژتەرەن زامەتش جە زام ئەفعی فېشتەرەن دەس دا نە دیدەی شۊخی شەڕئەنگېز ساوا بە سوان پەی داوای هۇن ڕېز دۇ هیلالی قەوس، سېیا کەرد پەیوەست فاقەی گیر و گاز، شەستی سەرپەل بەست پای چەپ وەست وە پېش، ڕاست نە جا مەحکەم چەپ کەرد وە ستۇن، ڕاست ئاورد وە هەم هەر ئەوسا زانام دڵ جە دەرۇندا پەخشا و پەخش بی ڕېزا بە هۇندا پېکیای پەیکان موژەی چەمیدەم شەهیدی پەیکان شابازی دیدەم ++++++++++++++++++++++ سەرناو: شیرین وە تاڵی سەبارەت: هێنانە سەر ڕێنووسی هۆرامی: ئاکۆ مارانی شیرین وە تاڵی... خەم، دڵ تەبدیل دا شیرین وە تاڵی تەختی دڵ جە گشت شادی کەرد خاڵی کەرد وەسەر عەسکەر تاڵییان تاڵی وەلا کەرد وە ناز شامارانی مەست سنعانی ئاسا سەڎ بار زوننار بەست قاپی دین شکەست، مەزهەب دا وە باد دنیا کافر کەرد شۊخی بۍ بونیاد شی نە ڕای مەزهەب عاریانی بەر پەرێ غەزای من خاس بەستەن کەمەر یا شا باجەتی ڕەسۇلی سەروەر باوەریش بە دین خوڎا و پېغەمبەر تا شاڎ بۇن بە شەوق شۊڵەی مەهـ جەمین کەس نەبۊ کافر، بەری بۊ جە دین ++++++++++++++++++++++ سەرناو: شیرین کەرد تاڵی سەبارەت: هێنانە سەر ڕێنووسی هۆرامی: ئاکۆ مارانی شیرین کەرد تاڵی... خەم ڕېزا نە دڵ، شیرین کەرد تاڵی تەختی دڵ جە گشت شاڎیان ماڵی کەردش پەی سوپای تاڵییان خاڵی هەر کۊ خەمێ بی گشت ئامان نە دڵ نزار و ماوای دڵ کەردش مەنزڵ دڵ موقەددەمەن جەفاش تاڵېیەن جەزای دڵ سزاش دەردی ناڵېیەن عەهد کەرۇ چەنی سوپای دڵ تاڵی تا دڵ بوینۊ جە تاڵی خاڵی ++++++++++++++++++++++ سەرناو: شیم نە خەیاڵان سەیری دنیام کەرد سەبارەت: هێنانە سەر ڕێنووسی هۆرامی: ئاکۆ مارانی شیم نە خەیاڵان سەیری دنیام کەرد واتم مەر وینۊ کەسېو ساحېب دەرد شار بە شار گېڵام، بېیام دەربەدەر پەرسام، کەس جە دەرد نەدارۊ خەبەر؟ هەر دام بەسەردا پەرێ جەستەی وېم پەرێ دەوای دەرد جەی نەڕەستەی وېم ++++++++++++++++++++++ سەرناو: شینم کەر وە نەرم سەبارەت: هێنانە سەر ڕێنووسی هۆرامی: ئاکۆ مارانی شینم کەر وە نەرم... واچدۍ بە قیبلەم، شینم کەر وە نەرم بە ڕشتەی چاوان، بە ئەسرینان گەرم بانگ هۊردۊ وە سەر بۍ پەروا بۍ شەرم زینهار چۊی تەرمم با نەونەمام بۊ وېنەی باڵای ئەو نازک ئەندام بۊ ئەی بەڵا باڵای ئەو پەی کەردەنان عەشقی دینی ئەو بە خاک بەردەنان ئەوسا دۇ چېوە تەرمم سوار کەن جەو درەنگەدا، یار خەبەردار کەن نیم نیگایێ ناز چەنیم بکېیانۊ غەمزەش وە باڵای قەبرم بشانۊ ++++++++++++++++++++++ سەرناو: شېوە لەولاوێ مەبۊنە چەمەن سەبارەت: هێنانە سەر ڕێنووسی هۆرامی: ئاکۆ مارانی شېوە لەولاوێ مەبۊنە چەمەن نە دەوری ڕېحان چۇزەی یاسەمەن دەست ڕەنجی شیرین جەمین قورسی خۆر خاس کەوت بە خاتر لەیلی خاتر تۆر مەخېزۊ نە خاک، مەنمانۊ باڵا مەبۊ بە پەشتان نەوتۇڵی ئاڵا شېوەی ئەو لەولاو ها بەو باڵاوە بەو باڵا شیرین سەرۇ ئاڵاوە ++++++++++++++++++++++ سەرناو: شەرابی گوڵڕەنگ سەبارەت: هێنانە سەر ڕێنووسی هۆرامی: ئاکۆ مارانی شەرابی گوڵڕەنگ... شەراب ئەرخەوان، یاقۇتی گوڵڕەنگ ئەگەر قەتروېش بتکیۊ وە سەنگ سەنگ دەردەدار بۊ لېش مەیۊ وە دەنگ نەک ئەو شەرابی جام بەسەر بەربۊ شەرابی دڵ پەیش مۇشکاف تەر بۊ ساقی ئەر سوبحێ بدەرۊ شەراب غەیر جە پارەی جەرگ، هیچ نەبۊش کەباب کۍ بۊ دەور بڎۊ، بەو شەراب جامێ؟ بدەرۊ جامێ بوینم کامێ؟ ++++++++++++++++++++++ سەرناو: شەماڵ مداران سەبارەت: هێنانە سەر ڕێنووسی هۆرامی: ئاکۆ مارانی شەماڵ مداران... شەماڵ بۍ مروەت، چۆنت مداران؟ بشۆ وە زامن وەلای گشت یاران واچە پەرێمان هیمەت بداران هەردەم بکەران دوعای خێرمان کۊتا نەکەران دڵ جە مێرمان جە دەستی ڕەقیب، بەڎانی بەڎگەست جەی زێد و زامن دەستۇرێمان وەست جە جەور و جەفای چەرخی بۍ بونیاد ڕۇمان کەرد بە چۊڵ هەر چە بادا باد چۇنکە نەگېڵا چەرخمان بە کام شەرتەن بنیێمۍ سەر وە موڵکی شام ++++++++++++++++++++++ سەرناو: شەوان بېداری سەبارەت: هێنانە سەر ڕێنووسی هۆرامی: ئاکۆ مارانی شەوان بېداری... دەردی بۍ هامدەرد، شەوان بېداری سەیل ئەسری هۇن دیدەم بەزاری مەنمانۊ نە ڕۇم ڕەنگی وەهاری هەناسەم چۇن باد وەختی سوبحدەم خېڵی گوڵخونچان ماوەرۊ وەهەم خەیاڵ گوڵخونچان ماوەرۇن نە دڵ چەمانم دەرۇن مەپېکان وە چڵ شکاونۊوە وە دیدەمەدا مەیان وە موژگان هۇن دیدەمەدا بە ڕوخسار مەدان پېکانان تەبەق چۇپەی مەشانان بە دامان وەرەق پڕ وەرەق دایم کەیلەن دەرۇنم گوڵچینی باخچەی دەردی مەجنۇنم ++++++++++++++++++++++ سەرناو: شەوقی شەم بە وېش پەروانە یۊزەن سەبارەت: هێنانە سەر ڕێنووسی هۆرامی: ئاکۆ مارانی شەوقی شەم بە وېش پەروانە یۊزەن چۇن بۍ پەروانە، هەر پڕ نە سۊزەن تا پەی پەروانە نمەسۊچۈ شەم پەروای پەروانە هیچ نمەبۊ کەم سۊزی شەم پەرێ پەروانە بۍ شۊن وەرنە پەروانەی بۍ شەم سۊز جە کۊن؟ دیش کە پەروانە ئاوېزانشەن بۍ پەروا پەرێ ئەو سۊزانشەن ++++++++++++++++++++++ سەرناو: شەوێ شەریف تەر جە سوبحی نەورۆز سەبارەت: هێنانە سەر ڕێنووسی هۆرامی: ئاکۆ مارانی شەوێ شەریف تەر جە سوبحی نەورۊز ڕەوشەنتەر جە زوڵف، ماهی دڵ ئەفرۊز ئاسمانان یەک یەک پرشنگ مەشانان مەلەکان جە عەرش لاحول مەوانان هەر جە وادەی شام، تا وە سوب سەڵات بوڵبوڵ مەوانا بانگی یا حی وات ستارە جە بورج بە جەولان کەرۍ زوهرە موقابیل بورجی موشتەری دڵ وە مەیل یار شیرین تەدارەک هەوا فەرەح بەخش، ساعەت موبارەک دڵ بەندی زنجیر زوڵفی گرنج بی دۇ لەب میوەچین نارنج نارنج بی درېغا ئەو شەو تا وە سوب سەحەر لەب وە بانی لەب تا یوم المحشر ++++++++++++++++++++++ سەرناو: غەریبانی دەرد سەبارەت: هێنانە سەر ڕێنووسی هۆرامی: ئاکۆ مارانی غەریبانی دەرد... کەسێ نەزانۊ، حاڵشان وە دەرد هەر یەند مەکېشان هەناسانی سەرد تا مەسۊچېیان پەی مەبان وە گەرد مەکەران وە یاڎ، قەومان و خوېشان ئاهی دەردناک نە دڵ مەکېشان ماوەران وە یاڎ زامی وېیاران ئەسرینان وە چەم چۇن سەیل مواران ++++++++++++++++++++++ سەرناو: قیبلەم بە جۊشەن سەبارەت: هێنانە سەر ڕێنووسی هۆرامی: ئاکۆ مارانی قیبلەم بە جۊشەن... جە دۇری باڵات، دەرۇن بە جۊشەن دیدەم ئەڵوەدای نەڎېیەی تۊشەن سەرتاپام پەی خاڵ تۊ سېیاپۊشەن جەرگم لەت لەتەن، دڵ پارە پارەن ڕۊحم جە قامەت، پەی تۊ ئاوارەن جە دېر دیدەنیت ئەی بەرگوزیدەم هۇناو سەرکەردەن وەبانی دیدەم ئەر باوەڕ داری سۊمای چەمانم مەڵهەمی زامان یاگەی خەمانم نە خاو، نە خۊراک، نە ئاراممەن جە دۇریی باڵات ناسۊر زاممەن یە خەیلێن جە گېیان شیرین بېزارم دەردم کارییەن، ساحېب ئازارم ++++++++++++++++++++++ سەرناو: قیبلەم تۊ نامای وە جامەی نېیان سەبارەت: هێنانە سەر ڕێنووسی هۆرامی: ئاکۆ مارانی قیبلەم تۊ نامای، وە جامەی نېیان ئامای عاشقان، بستانینە گېیان نە ڕېسمانەن، سەوڵی سەرئەفراز ڕیشەی گیانمەن، تۊ گېرتەن بە ناز چۇن گیری قولاب گازی تۊ بېیەن مەکېشەش مەیۊ، موداراش نېیەن نە ڕېسمانەن، ئا سپی تەنی ڕیشەی گېیانمەن، مەگېڵۊن چەنی ئازیز من فیدای جامە تەنیت بام ڕیشەی دڵ بە گاز جە بېخ کەنیت بام قیبلەم تۊ نامای، جامەی نۊتەنی ئامای مەزارێ پەرێ من کەنی ++++++++++++++++++++++ سەرناو: قیبلەم جەفای تۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم جەفای تۊ... داد، بېداد جە دەس جەور و جەفای تۊ ئامان جە پرشنگ ئاما و لوای تۊ فریاد جە خەدەنگ موژەی سېیای تۊ هاوار جە ئامای شەققەی شەستی تۊ داخ داخ جە قەتران دیڎەی مەستی تۊ واوەیلا جە بەژن سەوڵ ئەندامی تۊ سەرتاپا بۍ عەیب گوڵ ئەندامی تۊ قیبلەم ئەر مەیلت مەندەن جە لامان سا وەس پەردەی دڵ بڎە وە پامان بتەرسە جە ئاه وەخت و بۍ وەختم بکېیانە مەرهەم پەی زامی سەختم ++++++++++++++++++++++ سەرناو: قیبلەم جە لاتەن سەبارەت: هێنانە سەر ڕێنووسی هۆرامی: ئاکۆ مارانی قیبلەم جە لاتەن... قیبلەم، بە کەلام مەیلم جە لاتەن ئەر سەد قاڵبم دۇر جە وڵاتەن گېیانی شیرینم نە خاک پاتەن مەواچە قاڵب کەفتەن جە تۊ دۇر ڕۊح نە پەروازەن پەروانە دەستۇر مەگېڵۊ، مەڎۊ، دەور نە دەور یانەت هەر سوب مەماڵۊ سەر نە ئاستانەت قاڵب بۍ ئەرواح ئامان بەی ڕاوە بەی ڕای ناڕەزای قەستی قەزاوە هەم نېیاز بەو کەس بینای کارانەن باعېسی مۊبەت مەیلی یارانەن منیچ مەسۊزۇ دۇر جە زوڵف و خاڵ وەرنە وۍ پەی من وېرانمەن ماڵ ++++++++++++++++++++++ سەرناو: قیبلەم داخەوە سەبارەت: هێنانە سەر ڕێنووسی هۆرامی: ئاکۆ مارانی قیبلەم داخەوە... تۊ وەش بای، مەردم من بە داخەوە داخۊ بۊ تۊ بەی وە بەیداخەوە؟ مەیل کەی بە جەستەم بە دەماخەوە؟ بەیداخان پەخش کەی وەسەر باڵادا لەرزان بان وەبان باڵای ئاڵادا پەی چېش وە بۍ تۊ، بینایی دیدەم سوپای خەم نە دڵ وەنەم بېیەن جەم؟ سا بە فیدات بام جە بەیداخان بۊ با داخان ساڕېژ خەم پەی داخان بۊ ++++++++++++++++++++++ سەرناو: قیبلەم دڵگیرەن سەبارەت: هێنانە سەر ڕێنووسی هۆرامی: ئاکۆ مارانی قیبلەم دڵگیرەن... جە نازاری وېش، ئەوەند دڵگیرەن موژەش چۇن پەیکان، خەمزەش چۇن تیرەن جە دەرۇنمدا دایم دڵگیرەن دیدەش چۇن جەللاد، وازەن پەی قەتڵ هیچ ڕەحمش نېیەن مەعلۇمەن جە دڵ خوداوەند ڕەحمێ بدەرۊ پەنەش ئەی بۍ مروەتی بستانۊ چەنەش تۊ مەبە وە تەنگ جە واتەی بەڎان ئەر هەی بیناییم سەر وە سەنگ مەڎان بەد هەر بەد بیەن خاسی حیسابەن با مەیلت بەیۆ خەیلێ سەوابەن ++++++++++++++++++++++ سەرناو: قیبلەم دڵەی سەخت سەبارەت: هێنانە سەر ڕێنووسی هۆرامی: ئاکۆ مارانی قیبلەم دڵەی سەخت... یاوا وە گەردۇن ناڵەی دڵەی سەخت دۇدی دەرۇنم سېیا کەردەن سەخت جە قەڵوەزی هۇن گڵکۊن بېیەن ڕەخت فیراقی حەسرەت جە نەو خېزاوە دیدەی نابینام ئەسرین ڕېزاوە شەوقم تەوقی خەم شی نەگەردەنش لادێ نین قیبلەم شاڎی کەردەنش چەپ گەردی گەردۇن، بەڎبەخت، بۍ ئامان من وست ئەو تۊڕ دام نە ڕای بۍ سامان پەی دیدەن دیدەت لەیلی ڕۇ بۍ گەرد من دەستەپاچە و دڵ هەناسە سەرد نە سەور، نە ئارام، جە بەدیی تاڵەم هەراسان بېیەن ئاڵەم جە ناڵەم دەستم دامانت سەوڵی خەرامان بکېیانە مەڵهەم پەی شەفای زامان بەڵکەم ئەم جاریچ گەردەن جە گەرد پاک نەدیەنی باڵات نەبەرۇن بە خاک ++++++++++++++++++++++ سەرناو: قیبلەم دیدارت سەبارەت: هێنانە سەر ڕێنووسی هۆرامی: ئاکۆ مارانی قیبلەم دیدارت... ئەم شەو وەکارەن، جیلوەی دیدارت نیم نیگای وە ناز، جیلوەی دیدارت ئیشارەی ئەبرۆی سېیای تاتارت لادەر پەردەی شەرم جەڕۇی ڕوخسارت فەلەک نەشېونۊ گەرمیی بازاڕت تا یاران بەیان بوینان بە چەم سەرنۇکی ئەنگوشت بگیران نە دەم من ئاسا بنیان پا وە ئەخگەردا بۇڵی سفتەی من بکەن وە سەردا هەنی نەکەران مونای خەمبارت فەلەک نەشېونۊ گەرمیی بازاڕت ++++++++++++++++++++++ سەرناو: قیبلەم دیم نەدیم سەبارەت: هێنانە سەر ڕێنووسی هۆرامی: ئاکۆ مارانی قیبلەم دیم نەدیم... خاڵت خاوێ بی، جارێ دیم نەدیم بە ئېخلاس نە ڕای عېشقت، شیم نەشیم پەشتانی باڵات جاری بیم نەبیم شوکرانەی وەسڵت، وانام نەوانام تۊم بە دۊستی وېم، زانام نەزانام قیبلەم چۇن وەفات، بۍ وەفایی بی ڕەواییم جە لات، ناڕەوایی بی یا شا هەر کەسێ بېوەفا و بەین بۊ گیرۊدەی غەزەب ئیمام حسەین بۊ ++++++++++++++++++++++ سەرناو: قیبلەم سەفای تۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم سەفای تۊ... چېشەن نەیاوا، دڵ بە سەفای تۊ من چۇن لەیلێ دیم، مېهر و وەفای تۊ جەو پەی نەپېچام سەر جە جەفای تۊ وېنەی مەجنۇن دام، سەر بە جەفای تۊ قانېع بیم بە قەید بەستەی وەفای تۊ خۊ تۊ نمانای جەور و جەفا پېم من هەر جەفای تۊ شیرینتەرەن لېم سەوگەندم بە تۊن، شای ساحېب وەفا ئەر سەد جەی بەتەر، پېم مڎەی جەفا من هەر مەجنۇنم، جۊیای جەفانان جان فیدای لەیلی ساحېب وەفانان ++++++++++++++++++++++ سەرناو: قیبلەم نمانا سەبارەت: هێنانە سەر ڕێنووسی هۆرامی: ئاکۆ مارانی قیبلەم نمانا... تایێ جە گېسۇش، پەنەم نمانا دین جە دەستم سەند، زوننارم سانا وەشی ئەی دنیا هیچ پېم نەمانا هەی داد، هەی بېداد، هەی های، هەی هانا تایێ بی بەی تەور ستەم نمانا ئەر وەر دۇ زوڵفان، دۇ دەستەی کڵاف شېخانی کەبیر، سۊفیانی ساف مەشان نە مەزهەب تەمام بېدینان ئیمان موەرشان، زوننار مەبینان ++++++++++++++++++++++ سەرناو: قیبلەم نە خاوم سەبارەت: هێنانە سەر ڕێنووسی هۆرامی: ئاکۆ مارانی قیبلەم نە خاوم... قیبلەم چە خێرتەن، نمەی نە خاوم؟ یا شۇمی منەن، ڕەنج بەردەی لاوم؟ یا تۊ ڕەنجیدەی؟ سۊمای دۇ چاوم مەگەر خاترت جە من ڕەنجیدەن نە شەو مەی نە خاو، نە ڕۊ وە دیدەن؟ بەشق ڕەزای حەق شەوێ جە شەوان بۊرۍ نە خاوم چۇن پەیکی دەوان تا تېر تەماشای باڵات بکەرۇن نەوا داخانت وە قیامەت بەرۇن قیبلەم مەتەرسۇ، تۊرت یەکجار بۊ ئاهیری دۊزەخ لېم ئېختیار بۊ ++++++++++++++++++++++ سەرناو: قیبلەم نەکېشۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم نەکېشۊ... سەرێ کە سەودای خاڵت نەکېشۊ خاترێ بە غەم، تۊ، نەیەندېشۊ بە زامی ناواک، سوب سەحەر ئېشۊ سەرێ وە لای تۊ سەر نەڎۊ شەوان پایێ کە نەیۊ وە لات وە دەوان ئەو سەر سەرنگۇن گڵکۊی تازە بۊ ئەو پا گەستەی مار بۍ ئیجازە بۊ دیدەی نەوینۊ هەر سەحەر ڕەنگت زوانێ هەر شەو نەبۊ هام دەنگت ئەو دیدە ئەسرش بۍ مدارا بۊ ئەو زوان بە سەنگ سېیای سارا بۊ دەستیو نەکەرۊ سەیرانی باخت نەکەرۊ خزمەت بەرزی دەماخت ئەو دەستە بەستەی جەلادی گەور بۊ هەر ڕۊ جە نۊوە سزاش بەی تەور بۊ قیبلەم دۇری تۊ یەکجار منش کوشت بیللا بەی تەور بۊ بېزارم جە گشت ++++++++++++++++++++++ سەرناو: قیبلەم وانابۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم وانابۊ... وەر جە تۊ فېشتەر، کەسم وانابۊ وە هەر دۇ دیدەم، نەشتەر شانابۊ غەیر جە تۊ کەسم بە خاس زانابۊ ئەر من -- تۊم نە دەم زېیا بۊ ئاهیر وە مېحراب مزگیم نېیا بۊ ئەر باوەڕ داری، شای لاڵ جەمینان بدان وە تاڵەم، ناحەق مەوینان وەر نەسپەردیم وەبۍ ڕایی وېت هەناسەی سېیای سەردم گەرۊ پېت ++++++++++++++++++++++ سەرناو: قیبلەم وە شەو بۊ سەبارەت: هێنانە سەر ڕێنووسی هۆرامی: ئاکۆ مارانی قیبلەم وە شەو بۊ... مەیل کەر وە جەستەم، شەوێ وە شەو بۊ بڎەم نە دەماخ شەوبۊت چۇن شەوبۊ تا دڵم ساکن بە بۊی شەوبۊت بۊ مەواچان شەوبۊ جە سەر نساران شەوبۊش مەکېیانۊ پەی دیڎەی یاران قیبلەم تۊیچ بە ڕەنگ شەوبۊ بنمانە شەوێ بە شەماڵ شەوبۊت بکیانە شەماڵ بۊی شەوبۊ، بە دەوانی دەو باوەرۊ پەرێ دەردەداری شەو ++++++++++++++++++++++ سەرناو: قیبلەم گرفتار سەبارەت: هێنانە سەر ڕێنووسی هۆرامی: ئاکۆ مارانی قیبلەم گرفتار... دڵ بە جەفای تۊ، بېیەن گرفتار هېجرانت بەی تەور وەنەم کەردەن کار مات و بۍ دەنگم چۇن نەقشی دیوار نە زۇان یاران چەنیت کەرۊ ڕاز نە هەن دەلیلێ عەرز کەرۊ نېیاز نە گۊش، نە زۇان، مژنەوۊ دەنگت نە چەم نۇرش هەن بوینۊ ڕەنگت نە کۊتا مەبۊ هەناسەی سەردم نە تۊ مەزانی بە حاڵی دەردم خەریکم بەی دەرد جەفای سەختەوە بەی تاڵەی بەدبەخت مەجنۇن ڕەختەوە ++++++++++++++++++++++ سەرناو: قیبلەم ها مەردم قیبلەم ها مەردم... قیبلەم جە دووریت، بیللا ها مەردم هەر شەو تا بە سوب، هامڕازی دەردم هەی داد، هەی بێداد، هەی ڕۆی نەبەردم هیجرانت بەی تەور، کار کەردەن وەنەم هەرساتێ مەرگێ، مەنمانۆ پەنەم مەگەر خوداوەند بکەرۆ کارێ شاد بم بە دیدار، ئەو دڵبەر جارێ وەرنە من بێ تۆ یاری دوور وەتەن گیانی شیرینم بەر مشۆ جە تەن ++++++++++++++++++++++ سەرناو: لێت دیار مەبی لێت دیار مەبی... قیبلەم ئەر دەردم لێت دیار مەبی بیللا ئەر دڵت سەنگی خار مەبی سوفتەی دڵ مەدیت، بێ قەرار مەبی بەڵێ سوفتەی دڵ، نمەوینی وێت باوەڕ نەداری، من واچوون پەرێت جە دوور مدیەنە سفیدەن بەرگم بدیەنە دەروون لەت لەتەن جەرگم ++++++++++++++++++++++ سەرناو: من دڵێ سوفتە من دڵێ سوفتە... من دڵێ داروون، چوون زوخاڵ سوفتە بە سەنگی سزا، هاڕیاو، کەفتە گشت نەکوڵ و زووخ، دەروونم ڕەفتە ئەوەند سۆچیان چەنی ئاخ و ئووخ تێدا نەمەندەن زەڕیۆ نەم جە زووخ کەمتەر زووخاوی دەروونم دارۆ ئەویچ جە دیدەم چوون سەیل مەوارۆ من دەردێم پێوەن جە دووریی خەزان سەد جار جەفای دەرد ڕۆی مەرگش بێزان دەردی مەرگ ساتێ جەفاش مەنمانۆ ئێد هەر سات مەرگێم پەنە مەرمانۆ فیدای کەسێ بام دووریش دەردی مەرگ بێزان و کەردەن، ڕێزەڕێزەی جەرگ ++++++++++++++++++++++ سەرناو: من کۆی نەفتینم تۆ ئاهیر وە دەست من کۆی نەفتینم، تۆ ئاهیر وە دەست هەر کاتێت زانا گڕ بڵێسەش بەست گڕ بڵێسەش بەست، هانام کەرد وە شار دیم کە پەیدا بی هەزار گیاندار هەر یەک جەلایێ ئاو لێم مەشانا گڕ هەر چەند ئاما پرشنگ نمانا ناکا پەیدا بی، قیبلەی وێم جە دوور مەدا بەسەردا، غوڵام بی وە نوور سا کە پەیدا بی قیبلەم جە لاوە دەس دا بە ئاودا سوفتەم کوشناوە زوڵف کەرد وە مەرهەم، نیا نە زامم هانا هاناشەن، سوفتەن غوڵامم ++++++++++++++++++++++ سەرناو: موتریب نەوای چەنگ موتریب نەوای چەنگ... سەخت بێ، نەوانان، پەرێ نەوای چەنگ ساقی مروەتەن شەرابی گوڵرەنگ دەوران دوو ڕەنگەن مەکەرە درەنگ موتریب بکێشە ناڵەی نەوای نەی کەیکاوس، کۆ، شی، دارا، کەی بی کەی؟ کەمانچەی شادی بگێرە بە دەست مەست کەرە هۆشیار، هۆشیار کەرە مەست با بە قانوون بۆ، نەغمەی سازانت چوون یەک شەو چەنی ساقی سازانت تا ئەی مەجلیسە بویارمێ بە شاد شادی و ناشادی موویەران چوون باد ++++++++++++++++++++++ سەرناو: میرزام خێزانی میرزام خێزانی... بە کەمانەوە سەحەر خێزانی ئوستادیش سەعد وەقاس بێزانی پەڕ و باڵ بە تیر شەستش ڕێزانی هەر تیرێ یەک جار سەد زامم کەردە هەزاری چوون من، بەو زامە مەردە جگەر هوون، جەستەش تەمام هووناوەن هووناوش وە چەم جاگیری خاوەن ناوکی نیان ئەوەند پێکانان خەریک مەندەنان وە جای پەیکانان دادگەریمانەن چوون نەزان حاڵان جە زامی ناواک دڵبەر مەناڵان هەنیچ تازە بوون، دڵ مەدیۆ پێشدا پێکانی پەیکان، دڵ مەدۆ نێشدا ئەر سەد جەی بەتەر وە گیانم زامەن شیرینتەر جە گیان، شیرین جەلامەن ++++++++++++++++++++++ سەرناو: میرزام نەو وەهار میرزام نەو وەهار... هەنی نەیۆوە، ئیمساڵ نەو وەهار وەنەوشە شێوان، نە چەم نگوون سار بەرنەیان وەبەر سۆسەنان جە خار گوڵان بەرنەیان نە سەوز و نە زەرد خاتر خەمین بان، چەنی تۆز و گەرد ژەرەژ نەوانۆ جە سەر نساران شەماڵ نەشانۆ شەونم جە داران نە دەنگی ساز بۆ، نە عەیشی بوڵبوڵ نە ڕەنگی گوڵ بۆ، نە کارخانەی دڵ سیوەیل بەرنەیۆ، ئەمساڵ نە یەمەن ڕەنگ ڕەژ نەکەرۆ خەزان نە چەمەن پەی چێش بی قیبلەم نمەدۆ دیار؟ بێزارم جە سەیر گوڵانی وەهار مەولام بۆ ڕایێ بواچە تەدبیر زیندەگیم شیەن نە بەندی زنجیر ++++++++++++++++++++++ سەرناو: مەبۆ نەبۆش ژ‌ەنگ مەبۆ نەبۆش ژ‌ەنگ... ئاینەی عاشق مەبۆ نەبۆش ژ‌ەنگ هەم نەبۆ مایە، یەک ڕەنگیش، دوو ڕەنگ هەم نەبۆ جە جەور جەفای نەنگ، بە تەنگ بە وێنەی فەرهاد یەکتا بەندە بۆ نەقشی نێش جەڕووی سەنگ کەندەبۆ با ئەو شەو و ڕۆ، هەر ئێد بۆ کارش شەو بە زوڵف زانۆ، ڕۆ بە ڕووی یارش هەر کەس دەردی عەشق بەی تەور مەویارۆ شەرتەن پێش واچان، مایەی نوور دارۆ ++++++++++++++++++++++ سەرناو: مەخێزنۆ وەی مەخێزنۆ وەی... نیم نیگای نازش، مەخێزنۆ وەی دیدەش مەواچۆ بە مەستانی مەی موژەش مەکەرۆ ڕیشەی گیان پەی زوڵفش سونبوڵان جە یەک توڕڕەنان ڕەنگش ڕووی گوڵان تەمام شۆڕەنان مەنمانۆ وە ڕەنگ لاڵی بەدەخشان لە بانش جارێ ڕەنگش بی پەخشان ئەر پەرسۆ موژەش بە چە تارێوەن سا ماچان بە تار، گازی مارێوەن غەمزەی ئێد، بە گاز مار کەی مەنمانۆ؟ ئید گیان مەبەخشۆ، ئەو گیان مەستانۆ ++++++++++++++++++++++ سەرناو: مەولام بێ قەرار مەولام بێ قەرار... سپی تافێ دیم، بێ حەد بێ قەرار جەمای بەرزەوە، وێش مەوزۆ بەوار تەن پارەپارە مەبۆ سەد هەزار دیسان جە گوڵدا مەخرۆشێوەوە چەنی دەردەدار مەجۆشێوەوە پەرسام سپی تاف مودام خەرامان شێت و شەیدای عەشق، بێ سەر و سامان یە جە عەشقی کێن، پێسە ڕەوانی بێ خۆرد و بێ خاو نیمەشەوانی یە چوون جە گیانت گەوهەر مەسازی پەی نیساری کێ ئاوات مەوازی؟ تاف لالا بەزار، وێش دا بە کەمەر تەن پارەپارە دوود بەرشیش نە سەر واتش یە خەیلێن جە یار بڕیانان جەو پەی پەی وەسڵش بێ سەر و پانان یەندە مەسازوو جە تەن مرواری تا نەپای دۆسم، کەروو نیساری حەرفش ڕێزنا تەعجیل بە دەوان سەردا بە سەنگدا، ڕاهی بی ڕەوان مەولام هەرکەسێ تالیب بە یار بۆ شەرتەن وێنەی تاف بێ ئیختیار بۆ ++++++++++++++++++++++ سەرناو: مەولام جە سەحەر مەولام جە سەحەر... بادی نەمناکی مەیۆ جە سەحەر جەو پەی مەشانۆ زوڵف موشک پەروەر تا کەیلی موشک بۆ سارا و دەشت و دەر نە جەو پەی زوڵفش، مەکەرۆ لەرزان یانی موشک خام پێش مەبۆ ئەرزان ناگا هەر وەختێ مەیۆ نە کەمین زوڵفان مەویارۆ نە قورسی جەمین بادت ڕەنجنا تۆ بەبێ گونا کەردەت بکەرۆ پەروەردە بونا ئیسە سەبەب چێش جە کردگاران نماری بۆی زوڵف چوون هەردە جاران؟ ++++++++++++++++++++++ سەرناو: مەولام دەردشەن مەولام دەردشەن... تافی دێوەزناو، عەجەب دەردشەن پرشنگ مەشانۆ ڕۆی نەبەردشەن پەرێ وەسڵی دۆست ئاهی سەردشەن بەبێ دەست و پا، سافی بێ جەستە تەن پارەپارە، دەروون شکەستە جە تافی قەڵوەز، وێش مەوزۆ بەوار مەگنۆ وەڕووی سەنگ، قەترەی خۆشگەوار زارزار مەناڵۆ چوون زامەت داران جەو پەی ڕەوانیش بەبێ موداران مەشنۆ وە نەغمەی سازی ڕەزباری مەوزۆ وە کەنار سپی مرواری جێش مەیۆ سەدای دەنگی زەمانی مواچۆ جە فیراق، ڕازی نیهانی دایم نە سەیرەن وەقتی سوبح و شام ڕوو وە کەسێشەن، نەدارۆ ئارام سا مەگەر وەقتێ بگێرۆ قەرار غەڵتان بوو فانی واسڵ نەپای یار هیجری بێ پایان، مدران بە خدمەت مەکەرۆ تەسبیح قادری قودرەت عاشقێ چوون تاف، زەوق و شادیشەن مەعشووق پەرێ ئەو یا عیبادیشەن مەولام هەر کەسێ حاڵی تاف زانۆ دانا بۆ، عارف، هەستیش نمانۆ ++++++++++++++++++++++ سەرناو: مەولام گوڵ خونچەی ساوا نەشکوفتە مەولام گوڵ خونچەی، ساوا، نەشکوفتە سەودای چەند بوڵبوڵ تێدا نەهوفتە هێمای نەبریان نامش بە گوڵێ نەژنەوان بە گۆش، ناڵەی بوڵبوڵێ بە نیم نیگای وێش هیچ نمەزانۆ جە شێخی سەنعان، ئیمان مەسانۆ ئەر بوڵبوڵ نە ڕووش نەغمە بوانۆ دینی دینداران باتڵ ممانۆ ئانە گوڵێوەن نەشکوفتەی ساوا داخۆ یانەی کێ پێش مەبۆ ئاوا ++++++++++++++++++++++ سەرناو: ناڵەی دەردەدار بی ئاخ نمەبۆ ناڵەی دەردەدار، بی ئاخ نمەبۆ دەروونی عاشق، بێ داخ نمەبۆ عاشق تا دەمی جەفاش نمەبۆ بێ جەفا، هەرگیز سەفاش نمەبۆ گوڵ جە گوڵستان بێ خار نمەبۆ بوڵبوڵ جە عەشقش بێزار نمەبۆ هەر کەسێ عەشقش ڕەفیق نمەبۆ واسڵ بە تەریق حەقیق نمەبۆ مەحزوونی عاشق، بێ یار نمەبۆ عاشقان بێ یار، مودار نمەبۆ تا مەجاز نەبۆ، حەقیق نمەبۆ حەقیق بێ مەجاز، تەحقیق نمەبۆ شێوەی مەجنوونی، بێ لەیل نمەبۆ کۆکەنی فەرهاد، بێ مەیل نمەبۆ هەرکەسێ جە عەشق دڵشاد نمەبۆ دەری خەیر پەرێش، گوشاد نمەبۆ ++++++++++++++++++++++ سەرناو: نەداروو تانە نەداروو تانە... نەداروو تاقەت، توانای تانە بە وێنەی مەجنوون، وێڵی دێوانە مەشوون وە چۆڵدا، مەسازوو یانە بەرگی تەن، جە وەڵگ درەختانی چۆڵ پەی وێم مەورازوون، مەگێروو نە کۆڵ یەک سیا سەنگێ، مەنیۆ نە باڵین تەک مدەو پێوە، پەرێ شەو ناڵین پەی وێم مەگێڵوو سەروەش نە کاوان مەر مەلان مەردەن، بێدشان ماوان خاوم بە ڕاحەت، گەشتم بە دڵواز نە نەزان ڕەفیق، نە ڕەقیب هەمڕاز ++++++++++++++++++++++ سەرناو: نەرگسێ مەبۆ ساق سەوز و چەم زەرد نەرگسێ مەبۆ ساق سەوز و چەم زەرد شەو بە شەونم کەیل، پەل سپی و بێ گەرد شەوان بە شەونم، خاڵ مەدۆ جەڵا جامی زەڕ پێوەن، چوون حو‌ققەی تەڵا چەنی بادی سوبح باڵا مەنمانۆ شکۆفەش بە شەوق ئافتاو مەمانۆ تەن لەرزان بە جەور، بادی سوب تۆفان پێشرەوی قووشەن، شەوق شکۆفان شێوەی ئەو نەرگس بەو شەوبەندەوەن بەو شای شکۆفان شا پەسەندەوەن ++++++++++++++++++++++ سەرناو: نەورۆز گوڵی هەن نە پای سەراوان نەورۆز گوڵی هەن نە پای سەراوان بەرمەیۆ نە سای ڕێزەی وەفراوان سەرتاپا کەبوود، وێ بە خەم ڕەشتە بۆی موشک و عەنبەر، بە خاڵدا وەشتە پەل پەل نوختەی نوور، ڕێزەی مرواری بە نوختەی خاڵان، وێ کەرد دیاری دەستە بە دەستە چوون زوڵف وەشبۆ بەر ئامان، مدران، کۆ کۆ نەپای کۆ شێوەی نەورۆز گوڵ هابەو نەخشەوە بەو نەخشی خاڵان وەشبۆی پەخشەوە ++++++++++++++++++++++ سەرناو: نەوسیوەیل باخان نەوسیوەیل باخان... دیسان مایەی ڕەنگ ئاوەرد نە باخان فرووزان جە وەڵگ داران چراخان سۆچیان پێشان پەروانەی داخان وەڵگی وەن داران وەختی ئافتاو خێز کەردەن وێنەی لاڵ نگینی پەروێز جە عەکسی خەزان، جامی گوڵاوان چمان قورسی زەڕ، تەڵا پەی تاوان ڕەنگی بەست سەرتەرز باڵای بلەرمان چوون بەرگ زووخین زامی بێ دەرمان پەی کەسێ شێوەی سەوداش نە سەر بۆ جۆیای جانفیدای وەسڵی دڵبەر بۆ خەزان جەلابەخش، خەم خەیاڵشەن پاماڵ کۆی گەنج شادی و ماڵشەن ++++++++++++++++++++++ سەرناو: نەوسیوەیل بێ دەرد نەوسیوەیل بێ دەرد... ئێمە دەردەدار، نەوسیوەیل بێ دەرد بێ دەرد، بە وێنەی تۆفی هەوای سەرد تاراجی دووکان چەمەنانش کەرد چەند پارچە خەزان ڕەنگ ڕەنگی ئاڵا ڕەنگی ئاڵاشان نەڕووی خاک ماڵا دیبای فەرەنگی جە تەرزی خەزان کەردەن هەوای سەرد نەو پایز هەرزان ئێمە باری خەم، تەن خەستەی زویر شیەنمان جەڕەنگ خەزانان جە ویر ئەر سەد ڕەنگی خەم، مەپۆشان خەیاڵ مەخسەڵ ماڵ مەکەرد، خەزانانی ئاڵ هەوای نەوپایز جە هاڵ نەزانی خەزان ڕێزان کەرد، ڕەزان خەزانی ئیسە ئێمە و دەرد، جەفای ڕۆزگار دەست نە گەردەنیم، تا فەسڵی وەهار ++++++++++++++++++++++ سەرناو: نەووەهار خەمین نەووەهار خەمین عەجەب نەووەهار، دڵگیری خەمین هۆر مەگێرۆ بە دیدەی نەمین مەوارۆ بە تاو وە ڕووی سەرزەمین شەتاوان چوون مار پێچ مەدان وەهەم نەپای وەفراوان پێشان مەبۆ جەم سەرکۆوان تەمین، دەشتان گرد زەڕگوون بوڵبوڵ مژنەوۆ، سازی ئەرغەنوون جە مەعدەنی خار گوڵ بەرماوەرۆ هەریەک بە ڕەنگێ پەیدا مەکەرۆ مەژنەوۆ بە سۆز، مەگرەوا بە زار بە وێنەی عاشق دەروون پڕ جە خار گا شادەن بە سەیر، شکۆفەی گوڵان گاهێ زەلیلەن، چوون ڕەفتە دڵان ئەوسا کەم مەبۆ شەوقی شۆڵەی گوڵ وێنەی دەردەدار لەت لەت مەبۆ دڵ دەردەدار مەبۆ وێنەی بوڵبوڵ بۆ دایم ئینتیزار بە دیەن گوڵ بۆ ئاخ پەی حەکیمێ دانشمەندی دڵ مازە حەسرەتمەند، داخ بەرۆ وە گڵ ++++++++++++++++++++++ سەرناو: نەووەهار سیان نەووەهار سیان... ئیمساڵ وە دیدەم، نەووەهار سیان نووری بینایی جە دیدەم جیان بە هیچ ڕەنگێدا مەتاوو دیان من هەر یەند مەگنۆم، چەم بە دینی گوڵ چوون خونچەی نەوخێز لەت لەت مەبۆ دڵ هەر گوڵ نەشتەرێ، هەر سۆسەن خارێ هەر چەمەن زیندان، هەر شەتاو مارێ وە بەختم بدیە، چە تەور شێویان سوپای مەینەتان، وەنەم دێویان ++++++++++++++++++++++ سەرناو: ویاران جە بەی ویاران جە بەی... ڕوخسارم زەردیش، ویاران جە بەی پیاڵەی دیدەم پەڕ کەردەن جە مەی ناڵەی ئینتیزار، مەکێشوو چوون نەی ڕێزەی جەرگی وێم، کەردەن وە کەباب یە کەباب، یە سێخ، یە بەی، یە شەراب گەرمەن مەجلیسم، سەوڵی خەرامان قەدەم ڕەنجە کەر، مروەتەن ئامان سا باوەر تەشریف، بوورێ وە یانەم ئاوا کەر یانەی سەدساڵ وێرانەم ئەر ناری تەشریف، سزام سەختەن سەخت ئەویچ دوور نیەن، جە بەدبەختی بەخت ++++++++++++++++++++++ سەرناو: وەبانی دیدەم وەبانی دیدەم... علیک السلام وەبانی دیدەم وەش ئامای بە خێر، ئەی بەرگوزیدەم جای جاڕووی پاتەن، موژەی چەمیدەم بەڵێ داوا چوون، چراغم دڵبەر تۆ مەعنای سەلام وێت وانەوە بەر سەلام یانی های ئەیمەن بە، جە من چەنی ئەیمەن بۆ موژەت متاش ون زوڵفت بە ناواک کوشندەی دیدە پا بەستەش کەردان، هەی بەرگوزیدە یا بە شەستی تیر، کەمانی ئەبرووت بیللا بیەنان زایفتەر جە مووت ئارۆ سا هەر پەی قۆرئانم بە قەست سا ئامای ئامان، سا بگێرەم دەست موشەڕڕەفت کەرد، هەی بەرگوزیدەم وەش ئامای بە خێر وەبانی دیدەم ++++++++++++++++++++++ سەرناو: وەشی ویەردەم وەشی ویەردەم... ئاخ پەی وەشیی وەخت، ساڵی ویەردەم کۆن دڵ؟ وە ئەسر ناوکان کەردەم کۆن هووناوی دڵ، چوون شەربەت وەردەم؟ کۆن ئەو ئەسر چەم وە سەیل مەمانا دڵ زووخاو مەدا، موژگان مەستانا کۆن ئەو سەودا و سەیر، ئەو ساڵ و ماهی قنیاتم مەکەرد، وە نیم نیگاهی بیەنان وە سەنگ کۆنە هەواران بە تەمای سایەی وەسڵی نازداران ++++++++++++++++++++++ سەرناو: وەنەوشێوە هەن جەوەڵ وەهاران وەنەوشێوە هەن جەوەڵ وەهاران بەرمەیۆ نەپای، چەتری چناران بە نیم خاوی نەرم، خام خام خەرامان مەبۆ بە بووم دۆز، فەرشی نەمامان وەنەوشەی وەش وەخت، خاویار، خاو نەرم سادار، سەرنەوەر، مەستی ناز، شەرم باد بۆش ماوەرۆ، وە سەرزەمیندا بۆ مازۆ وەبان، بۆی موشک چیندا شێوەی وەنەوشە، ها بەو خاڵەوە بەو گۆنای گوڵ ڕەنگ، بوومی لاڵەوە ++++++++++++++++++++++ سەرناو: وەڵگی گوڵ ڕێزەن وەڵگی گوڵ ڕێزەن... چەمەن بیەن ساف، وەڵگی گوڵ ڕێزەن زوڵفان وەنەوشەی بۆی عەنبەر بێزەن موژان مەی ئالوود، مەرگی دڵ خێزەن لەبی لاڵ وەی ڕەنگ شەفای زامان دەر دەهان سەدەفین، جە سەدەف خاستەر باڵا وێنەی سەوڵ، یاسەمەن دیدە تێخی باخەوان نەتەراشیدە سپەردەی وەیس بۆ، خاس مایە دارۆ مەجنوونی چوون من نە سایە دارۆ ++++++++++++++++++++++ سەرناو: وەهار نمانا وەهار نمانا... وەهاری ڕەنگ سەوز، زەڕگوون نمانا بوڵبوڵان نەغمەی ڕزگاری وانا عاشقان جە چەم، هووناوان شانا واراوە ڕێزەی هووناو وە زەمین پۆلی نازداران، جەلادا جەمین وەفراوان هۆرزا، شەتاوان ماڵا وەفر لانسار بەردەن وە باڵا سەیلات هۆرێزا، شەتاوان جۆشا عەرسەی سەرزەمین، بەرگی سەوز پۆشا داران ڕەنگی سەوز پەیدا کەردەوە ڕەنگی سیای تار، جەوێ بەردەوە سەنگەرچەی گوڵان، جە نەو پەیدا بی عاشقان بێ هۆش بەتەر شەیدا بی ئەوەڵ وەنەوشە جە خاک هۆردا سەر بۆی عەنبەر مەدۆ، چوون زوڵفی دڵبەر نەورۆز گوڵ کریاش تاسەی سەراوان بەڕەزا نەپای ڕێزەی وەفراوان چنوور کۆنە زێد لەیلاخان کەرد مەیل تۆق تۆق جەم بەستەن، وێنەی زوڵفی لەیل ++++++++++++++++++++++ سەرناو: وەهار یاواوە وەهار یاواوە... فەرشی سەوز نەڕووی چەمەن یاواوە باد پێچیا وە بەژن خونچەی ساواوە خونچەی ساوا، وێش پەل شکاواوە جەڵا دا جەمین، خاڵی نەورۆزان چوون ساحێب جەماڵ نیەن جە هۆزان وێنەی سپی لاڵ، قەترەی زەڕئەفشان جا بەردەن جە پێچ زوڵفی مەهوەشان سونبوڵان نەوەر زوڵف چەنبەر نیان دەور بەستەن نە دەور، خاڵ عەنبەر نیان فەسڵێوەن، ئێمەو بوڵبوڵان هەرشەو سەد فرسەخ دوور بیم، جە مەنزڵگای ئەو ئەوان بە ناڵین، من بە سۆزی زار کەردێمان جەستەی سیا سەنگ بێدار تا ئاخر چۆن بۆ سەرئەنجاممان مەردەن، یا وەسڵی دلبەر، کاممان؟ ++++++++++++++++++++++ سەرناو: وەی من دەردەدار وەی من دەردەدار... وەی من سا بیای کەسێو دەردەدار بدیای بە شێوەی نەقش نەووەهار هۆر گرتای مایەی دەرد و خەم هەزار جە زەردیی گوڵ ڕەنگ، جە نەورۆزان، داخ جە شەونم، ئەسرین، جە دوودی شەم، ئاخ جە وەنەوشە، خەم، جە نەرگس، خومار جە گوڵاڵان، هوون دیدەی شەو بێدار جە خونچە، پەیکان، جە سۆسەن، خارێ خارێ نە دڵ بۆ، جە زەخم، یارێ جە باڵای نەمام، تیری خاری جەرگ جە گوڵ گەز، هووناو، گوڵ گوڵ کەردەن بەرگ جە دەردەداران، هەر منەنان وەس مەدیوو مەوینوو، هەنی نیەن کەس ++++++++++++++++++++++ سەرناو: وەیسی سایە فەڕ وەیسی سایە فەڕ... وەیسی قەرەنی، سایەداری فەڕ ساحێب کەرامات، شاهی نیلووفەڕ دارووی گشت دەردان ئەشیای بەحر و بەڕ نوورت جە عالەم، حەق کەردەن، سابق ئاشکارا بیەن، چوون سوبحی سادق خەیاتە خاوان، فریشتە ڕەنگان ئەشەد --- خاتر بە تەنگان وەنەوشە بۆوان، عەنبەرین خاڵان گشت جە ئاستانەت بە سەری واڵان پەی وایەی موراد هەر بە تۆشان لاف جەو بۆنە مەیان، یەک یەک بە تەواف وایەشان تۆنی، تۆشان هیممەتەن دایم زوڵفشان، جاڕووی کۆمەتەن شەو بە موناجات بە میر دوعا کە مورادی گردین، بە خێر ڕەها کە بە فیدای مشکۆی بڵند پایەت بام خاکی ئاستانەی گران مایەت بام ++++++++++++++++++++++ سەرناو: پایز ئاماوە پایز ئاماوە... ئەودی نەو پایز جە نەو ئاماوە بلەریان سەرتەرز وەی ڕا ئاماوە عاشقان سەودای دەروون تاوناوە قافڵەی سوەیل، زیا جە یەمەن کەردەوە سێوەنگ تەمامی چەمەن تەبەق تەبەق هەور سیای دوودی تەم نەم دا سەرزەمین بە سێڵاتی خەم پەل پەل مەڕێزۆ، مەگنۆ نە ڕووی سەنگ بە ئەمری خالیق بێ دەوا و بێ دەنگ بەیان بوینان دەردەداری دەرد خەزانی زایف، زافەرانی زەرد وەشڵەم بە خەزان پەی وێش مەبۆ زەرد ئەو جە وادەی وێش، من جە تاوی دەرد ++++++++++++++++++++++ سەرناو: پڕ خومارشەن پڕ خومارشەن... شیرین دوو دیدەی پڕ خومارشەن جەو پەی دیدە و دڵ ئینتیزارشەن فێشتەر مەیلشەن، کەمتەر قارشەن گاگایێ بە سێخ دڵ مەدۆ بە تێغ شێوەش مەڵهەمەن جێم کەرۆ درێغ یانی ئە و زایف باری دەرد نیەن نیمەشەو کوشتەی ئاهی سەرد نیەن وەرنە زەڕیۆ مەیل ئەو سۆسەن خاڵە وەسەن پەی شیفای زامی سەد ساڵە ++++++++++++++++++++++ سەرناو: پەشیۆ جە پەیکان نازک ئەندازان پەشیۆ جە پەیکان نازک ئەندازان چە جای تۆ نەمن، دەروونم ئازان ئەر سەد بار ئێمە خاڵی خەیاڵیم جە سۆزی سەودای دەردین بە تاڵیم بەڵێ چوون زامدار کۆنە ساڵانیم پێکیای پەیکان سۆسەن خاڵانیم هەر وەختێ ناگا دیدە تەتارێ نیگا مەکەرۆ لێمان بە قارێ زامی کۆنە و نۆ، دیسان جە نۆوە چەنی دەردی مەرگ تازە مبۆوە [مەولام تۆ مەولای گشتین مەولانی هومێم هەر بە تۆن مەولای ئەولانی] سا تۆ چوون بەی تەور، هاڵێ پێت یاوان زامی نەو کەردەن دەروونت ئاوان شەرت نیەن جۆیای دارووی زامان بی خاس ئیدەن جەی زام، زوخین دامان بی جە وەش نەفەسی، چەنی ئێشی زام هەر شەو بیاوۆ، ساحێب زام بە کام ++++++++++++++++++++++ سەرناو: پەل پەل خەزانان مەڕێزان وە خاک پەل پەل خەزانان مەڕێزان وە خاک مەکەران بە نێش پەردەی دڵ چاک چاک دڵ جە زامی گاز پەردەی جەستەی وێش قەترە قەترە هوون، جیا مەبۆ لێش مەیۆ نە دەوران، دیدەی پڕ خومار مەوارۆ ڕووی زەرد خەزانی خەمبار هەر خەزان وەڵگێ زار مەڕێزییۆ دڵ دەرۆش بە دین ئەو مەخێزییۆ مەر پەرواز مەبۆ مەر سینەم بۆ چاک نەبا چوون خەزان غەڵتان بۆ نە خاک جە ئەزرەت ڕێزان بەرگان نە دەروون ئەو ڕێزیای خاکەن، من غەڵتانی هوون ++++++++++++++++++++++ سەرناو: پەنەش سەودای شەم پەنەش سەودای شەم... پەروانە کەمەن پەنەش سەودای شەم تا نەوینۆن شەوق شۆڵەی شەم بە چەم نمەنیۆ نە ڕای سۆزانی قەدەم دڵ سوزان مەبۆ، بێ پەروا جە دوور بسۆچۆ نە بۆش، مایەی شەوقی نوور هێمای جە دوور بۆ، نەژنەوۆ نامش بە غەیر جە سۆزان هیچ نەبۆ کامش کەی ئەو بە وێنەی منەن دەردەدار سەد بار زوخاڵ کۆن پەی دیدەنی یار پەروانە بە شەوق شەم مەبۆ واسڵ ئەودی سۆزانیش، باتڵەن باتڵ ++++++++++++++++++++++ سەرناو: چراغ ئەر ساتێ دوور گنون جە تۆ چراغ ئەر ساتێ دوور گنون جە تۆ نەمانون شەڵڵا بوینون ئەو ڕۆ خەیاڵ چوون نەشتەر، دڵ مەکاوونۆ دڵ، جە دیدەم سەیل. زوخ مەتاوونۆ دیدەم بینایی تێش نمەمانۆ پەڕ و باڵ نە دەور زوڵمات مەشانۆ بەشقی شای شاهان، هەی بەرگوزیدە بینایم تۆنی بۆ شۆم نە دیدە ++++++++++++++++++++++ سەرناو: چراغ ئەوداڵان چراغ ئەوداڵان... پەیم کەردی تەواف، بارگەی ئەوداڵان بێ حەد بە زاری، وەنەشان لاڵان پێشان سپەردم شای سۆسەن خاڵان بە موژە جاڕووی ماواشان کەردم بە زووانی، باڵاش پێشان سپەردم سوودشان چێشەن؟ قیبلەم جەی خاستەر دوعاگۆی تۆ بان هەر شام هەر سەحەر ++++++++++++++++++++++ سەرناو: چراغ بەدکاران چراغ بەدکاران... مەزانی چوونەن واتەی بەدکاران؟ بەو سەیل مەنمانۆ، جەوەڵ وەهاران مەوارۆ وە ساق سپی چناران نەمەتاوۆ ڕەنگ سپیش بەرۆوە نە باڵاش جەو تەرح کۆتا کەرۆوە هەر چەند فێشتەرەن، سەیلی وەهاران خاستەرەن ڕەونەق چەتری چناران ئازیز ئەر سەد بار بەدانی بەدگۆ وێنەی سەیل بەدیی من واچان بە تۆ تۆ هەر بەو چنار سپی بنمانە جە واتەی بەدان جەلا بستانە ++++++++++++++++++++++ سەرناو: چراغ بەینت بەست چراغ بەینت بەست... جە نۆ چەنی من، عەهد و بەینت بەست خۆ تۆ بە قورئان شەریف کێشان دەست ڕووم نیەن چەنی ڕەقیبانی پەست واتت تا ئەوڕۆ بەرمەشۆم نەفەس جە بەد بێزارم هەر تۆم هەنی کەس سەوگەندت مەوەرد بە دانای داوەر غەیر جە تۆ فێشتەر بە کەس نیم یاوەر ئیسە سەوگەندت پەی چی شی جە یاد؟ پەی چی شەرت و بەین وەرین دای وە باد؟ یانە وێرانی هەر وە من ئامان مەتاوو گێرتەی کەسێو تەر دامان ++++++++++++++++++++++ سەرناو: چراغ تا کەردم چراغ تا کەردم... یەک تایێ جە زوڵف سیات تا کەردم ڕۆح چەنی ئەو تا، جابەجا کەردم سەد نەفرین وە تەخت شاهیی شا کەردم ئیسە من گیانم ئەو تایێ وەش بۆن ئەو گیانە نە جای تایێ زوڵفی تۆن ++++++++++++++++++++++ سەرناو: چراغ جە خاودا چراغ جە خاودا... نیمەشەو ئامای جە وەختی خاودا ئایر دای نە دڵ، دەروونم تاو دا دیدەم بە موژگان، سەیلی زاخاو دا دەرسات جە خاودا ئوفتادەی پات بیم ڕوخسار گەرد ئالوود، خاکی پاڵات بیم واتم مەر بدیەی وە جەستەی حاڵم بزانی پەی چێش دەروون زوخاڵم تۆ جە تانەی بەد ڕەقیبان تەرسای هیچ حاڵی دەروون سفتەم نەپەرسای ڕوو لێم گەردنای، من سەرگەردان بیم وەی تەور پابەندی بەندی دەوران بیم فیدات بام واتەی بەدکاران چێشەن تۆ دڵت جێشان یەند بەد ئەندێشەن؟ ++++++++++++++++++++++ سەرناو: چراغ جەمینت چراغ جەمینت... من هەر یەند کەردم نیگای جەمینت ئەوندە فیکرم دا زوڵفی خەمینت دڵ بی پەروانەی شەمعی شیرینت بەو تەور پەرواز کەرد، ئاما بە هەم دا بووڵش شەندەوە وەیانەی خەم دا دەخیلم ئازیز بکەر مەرەخەس با بەیۆ خزمەت، جەستەی تەن قەقنەس واسڵ بۆ وەسڵ جەمینی لاڵت بۆ بنیۆ وە بۆی زوڵفی زوخاڵت مەواچی یاران وە دەروون سفتەن چەنی هیجرانان لادێ نەڕەفتەن ئینە گشت پەی من زوخاڵێ بیەن جە عەقڵ و جە فام، جە هۆش بەرشیەن ئەر سەد پێم ماچان تەعنەی بەدکاران غەیر نە تۆ وەشیم جە دڵ نەو یاران ئەر واتەی بەدان چوون سەنگی سارا مەبۆ وە باڵام بە بەد مودارا ++++++++++++++++++++++ سەرناو: چراغ جەی دنیا چراغ جەی دنیا... ئەوەند ئاواتم مەندەن جەی دنیا وەرتەر جە مەردەن بە دیدەم بدیا لەب وە بانی لەب لاڵی تۆم بنیا هەر دوو بنیامان سەر وە یەک سەرین کەردامان ڕازی ویەردەی وەرین بدیام دەستی تۆم شیەن نە گەردەن دەرسات مەواستم ئاوات وە مەردەن بۆ بنیام نەبۆی زوڵف مشکینت بکەردام تەواف کەعبەی جەمینت باڵای وێم پەشتان باڵات بکەردام حەسرەت نمەبی، ئەگەر بمەردام ++++++++++++++++++++++ سەرناو: چراغ حاڵی دەرد چراغ حاڵی دەرد... بێ خەبەر جە دەرد نەزان حاڵی دەرد جە ڕووی نازەوە ئەر من نازم کەرد خاس نیەن جەو ناز، خاتر گێرۆت گەرد کەردەی گوستاخیم جە ڕووی نازەوەن نازم هەر بەو ڕەنج بێ ئەندازەوەن ئەگەر نمەبی وە یاگەی نازم کەی ناز مەکەردم، هەی ئاواتوازم ئی سوخەن پەندەن جە قەدیم ئامان «خواجان مەکێشان نازی غوڵامان» ++++++++++++++++++++++ سەرناو: چراغ خاسەنی چراغ خاسەنی... ماچی خاسەنان، ڕاسەن خاسەنی چانە حەریف نیەن، حەقەن، پاسەنی وەلێ حەیف سەد حەیف حەق نەشناسەنی وەش ڕەنگ و وەش بۆ وەش ڕوخسارەنی پڕ جەفا و بێ مەیل دڵ ئازارەنی دوو ڕۆ بە یارێ یاوەر نیەنی خۆفناک جە قار داوەر نیەنی ++++++++++++++++++++++ سەرناو: چراغ دا جارێ، بۆ وە خاوم دا چراغ دا جارێ، بۆ وە خاوم دا پا بنیەر وەبان هەر دوو چاوم دا مەواچە موژەت تیژتەرەن جە خار پای گوڵ ئەندامم مەدەرۆ ئازار من پەی موژەی خار یە خەیلێ وەختەن بە جاڕوو کاری نە ڕای تۆم جەختەن شەو و ڕۆ نە ڕات پەرێ ئی سەودا یەک یەک بیەنی شکەستەی مەودا بۆ وە بێ ئەندێش پا بنیە لێشان بدیە بینایی هیچ مەندەن تێشان ئەگەر تێشان بۆ غەیر جە هوون فێشتەر هیجرانت فێشتەر لێش بدۆ نێشتەر سەحەر مەزانی، باڵا زەڕ ستوون پات وێنەی هەنار ژیابۆ بە هوون ++++++++++++++++++++++ سەرناو: چراغ زاریمەن چراغ زاریمەن... زگارییم پەی تۆن، پەی تۆ زاریمەن پەی تۆ جەفا و جەور دەردی کاریمەن پەی تۆ زامی سەخت نادیاریمەن پەی تۆ ڕەستەخێز ڕووی نەبەردمەن پەی تۆ پەیاپەی ئاهی سەردمەن پەی تۆ سەر تاپا دەروون زوخاڵم پەی تۆ ڕەجاڵ و وێرانەن ماڵم قیبلەم سا شەرتەن حاڵم بزانی بێزار بیەنان جەی زیندەگانی ++++++++++++++++++++++ سەرناو: چراغ زەروورەن چراغ زەروورەن... ئەوەند پەی دینت تاسەم زەروورەن هەر شەو نە عاڵەم ناڵەم مەشهوورەن ڕۆی ڕۆشن پەرێم شەوی دەیجوورەن پەی دیەن جەستەی، زوڵفی پڕ جە خەم قامەت چوون کەمان، سەر نیان وە هەم سا من یەند تاسەی زوڵفی یارم بۆ چەنی بە شەو خاو، ڕۆ قەرارم بۆ؟ ! ++++++++++++++++++++++ سەرناو: چراغ سیای تۆ چراغ سیای تۆ... بە هەردوو دیدەی مەستی سیای تۆ بە نیم نیگای ناز ناکاو دیای تۆ بە زوڵفی حەبەش پەشێویای تۆ بە تاقی ئەبرۆی قەڵەم کێشی تۆ بە موژەی ناواک ژار ئاوێژی تۆ بە ڕێزەی ڕازان شەکەرینی تۆ بە نافی ئاهووی عەنبەرینی تۆ بە باڵای چوون سەوڵ خەرامانی تۆ بە جەور و جەفای بێ سامانی تۆ یە گشت سەوگەند بان جەمین وێنەی جام دووریی تۆ کەردەن خەو وەنەم حەرام ++++++++++++++++++++++ سەرناو: چراغ سەردەنی چراغ سەردەنی... دییارەن بێ مەیل مۆبەت سەردەنی یا خەیاڵ نەجای هەنی بەردەنی یا دەست جە بەینەت کۆتا کەردەنی یا بەدیی بەدان نە ڕاگەت بەردەن یاخۆ بێ شەرتیت وە عادت کەردەن وەرنە یانی چێش بینایی چاوان وستەنت وە بێز بەندەی بێ تاوان قیبلەم ئەر وەفات ئیدەن چەنێمان مۆبەتی سەردی مەنمانی پێمان؟ پەس قەسەم وەرمێ بە دیدارتان هەنی نەوەرمێ ئاو جە شارتان گونای تۆ نیەن ستارەم چەفتەن ستارەم جە ناو ستاران کەفتەن ++++++++++++++++++++++ سەرناو: چراغ سەرسۆز مەبۆ سپی ساف چراغ سەرسۆز مەبۆ سپی ساف ئاینەی گوڵاو ماوای لێوی تاف گۆشش دان بە دەنگ تافی ساف نەفەس مەجیۆش ساحیب دڵ هەنی نیەن کەس وێش مەوزۆ نە کۆڵ گوڵ وێنەی سەدەف کۆکۆ مرواری پێش مەیۆ وە کەف تۆیچ بۆ چنار سپی بنمانە جە واتەی بەدان جەلا بستانە ++++++++++++++++++++++ سەرناو: چراغ سەودایێ چراغ سەودایێ... ئەر دڵ نەکێشۆ بێ تۆ سەودایێ نە پێکۆ بەئاه سوب سەحەرگایێ زامدار بۆ بە زام موژە مەودایێ سەرێ سەودای تۆش نەبۆ جە سەردا گۆشێ نەشنەوۆ دەنگت جەوەردا ئەو سەرە خەریک دەردی ستەم بۆ ئەو گۆشە پڕ دەرد بە باری خەم بۆ دیدەیە جە دوور نەوینۆ ڕەنگت زبانێ نەبۆ شەو بە هام دەنگت ئەو دیدە سزاش بێ مودارا بۆ ئەو زبان بە سەنگ سیای سارا بۆ ++++++++++++++++++++++ سەرناو: چراغ شکاوان چراغ شکاوان... فیدای دووریت بام دەروون شکاوان بڵێسەی ئاهم وە پای عەرش یاوان گەرمیش ستاران تاو تاو مەتاوان خەریک مەندەنان من چەنی زامەت دووریت مەنمانۆ پەنەم قیامەت فیدای دووریت بام چێشش کەردەن پێم بێزار بیەنان جە زیندەگیی وێم ++++++++++++++++++++++ سەرناو: چراغ قنیاتم بە خەیاڵتەن چراغ قنیاتم بە خەیاڵتەن بە خەیاڵی لاڵ، موشکین خاڵتەن دایم جە تەن دا خەیاڵ گیانمەن هەر بەو زیندەنان بەو ژیانمەن ئەر ناگا خاوێم مەشۆ نە دیدە نمازووت جە دەس، هەی بەرگوزیدە سەر منیۆ نە پا وێنەی حەلقەی دام تا مەر پابەند بۆ بەرنەشۆ جە لام بە فیدای خەیاڵ گران مایەت بام سەرگەردی تای زوڵف موشکین سایەت بام ++++++++++++++++++++++ سەرناو: چراغ قوربانەن چراغ قوربانەن... ئینە عیدی نۆ جەژنی قوربانەن زەمزەمەی تەوحید ڕای حاجیانەن قوربانی قوربان ئەمری سوبحانەن دارا و نەدارا مسکێن و دەروێش هەر کەس مەکەرۆ قوربانی پەی وێش تۆیچ ئەمن بەرە بۆ قوربانی گا قوربانیم کەرە چوون خلیل الله تیغی بێ درێغ بنیەم نە گەردەن تۆ ساحیب سەواب، من شاد وە مەردەن منیچ بەو قوربان منەتبارەنان قوربانی قوربان باڵای یارەنان ++++++++++++++++++++++ سەرناو: چراغ قوربانەن، قوربان نیەنان چراغ قوربانەن، قوربان نیەنان غەیر پەی تۆ پەی کەس قوربان نیەنان دیدەم نیگەران تێغی دەستی تۆن ئەڕواحم جۆیای کوشتەی قەستی تۆن پەی تیغت جە هوون، مەوجەن دەروونم بێ تیغت ڕەوان نمەبۆ هوونم سا دەس وە قەبزەی تیغی ئەلماس بەر قوربانی جە دەست قوربان خەلاس کەر ئەر سەد کە وینۆ دەستت ئازارێ سەوابتەر نیەن جەی کارە کارێ تیغ بە دەستی وێت بنیەم نە گەردەن تۆ ساحیب سەواب، من شاد وە مەردەن ++++++++++++++++++++++ سەرناو: چراغ لەنگم بی چراغ لەنگم بی... جە دووریت زووان لاڵ و لەنگم بی خاتر بە وێنەی سیا سەنگم بی شەو هەر چەنی بەخت قار و جەنگم بی نە توانام بی چەنی کەس دووان نە پام هەن بێ تۆ وە جایێ لوان وێنەی سەر سامان، نەزان هەواڵان زەدەی زامی سەخت تیری خەیاڵان وێڵ وێڵ مەگێڵوو بێزار جە ژیان خەمی فراوان کەم مەندەن جە گیان؟ یانی های دووریت نەکەردەن کارێ؟ وەرنە مەر گڵکۆم بوینی جارێ ++++++++++++++++++++++ سەرناو: چراغ من ئێشان چراغ من ئێشان... من خاتر تەنگ بوو بە دەرد و ئێشان من بوو چوون زوڵفت، تاتا پەرێشان پەنەم هەن تاقەت جەفای دەردکێشان تۆ هەر زوڵفت بۆ پەرێشان جەستە جییاتی باڵات من بوون دڵ خەستە ئەوسا من زامەت تەن کێشانم بۆ حاشا ئەر ئانە چێو ئێشانم بۆ ++++++++++++++++++++++ سەرناو: چراغ من زامەت چراغ من زامەت... من زامەت دار بوون بکێشون زامەت من دەروون هوونی باری مەڵامەت من مەینەتبار بوون، پەرێ ئەو قامەت شەوان و ڕۆوان، ماهێ یا ساڵێ ئەر بە تۆ یاوۆ کەمتەر مەڵاڵێ ئەمن جیاتیش سەر و ماڵ و مین ماڵ میراس بەرۆش، سەر خاکی زەمین ++++++++++++++++++++++ سەرناو: چراغ نۆش کەردەن چراغ نۆش کەردەن... جە ساوە دڵ جام، دووریت نۆش کەردەن هوونی دڵ نە چەم یەند خرۆش کەردەن سوەیل چەمەنان بەی ڕەنگ پۆش کەردەن جە زەردی ڕەنگم، جە پەی باری دەرد مایە هۆر گێرتەن خەزانانی زەرد وەختێ نەو سوەیل وە نەخشش مەیلەن موژانم مووی نەخش دەستی سوەیلەن فیدای باڵات بام وەی تەور کەردەن پێم سوەیل مایەی ڕەنگ هۆر مەگیرۆ جێم ++++++++++++++++++++++ سەرناو: چراغ نە دڵەن چراغ نە دڵەن... هەرکەس غەریبەن هەر داخ نە دڵەن دڵەی غەریبان چوون پەڕەی گوڵەن گوڵ خار تێش نیشۆ خەیلێ موشکڵەن گوڵ ئەر بنیشۆش خاڵێ نە ڕوخسار جە زەخمی ئەو خار، زایف مەبۆ، زار غەریب ئەر پەنەش بواچان سەردێ هەر سەردێ پەرێش مەبۆ وە دەردێ دڵەی غەریبان میسلی گوڵ دارۆ کافر ئەو کەسەن غەریب ئازارۆ موڵکی غەریبیم فراوان دیەن داخی غەریبیم جە حەد بەرشیەن هەرکەس مەکەرۆ غەریبنەوازی بێ شک خوداوەند لێش مبۆ ڕازی هەرکەس مە گێرۆ غەریبان عیززەت پەی وێش مەسازۆ جایێ جە جەننەت ++++++++++++++++++++++ سەرناو: چراغ نەزانان چراغ نەزانان... چێش کەروون جە دەست ئەحواڵ نەزانان بدیە بە چەند تەور جەفا مەنمانان گوڵێ وە سەحرا پەی گوڵ مەکیانان گۆڵێ پەروەردەی ڕیزوان ماوا بۆ چە لایەق بە ئەو یانە ئاوا بۆ؟ یانەو ماواشان بە کەلارە بۆ جەرگشان بە تێخ پارە پارە بۆ ساکەی بێ کێ دی جەی وەرتەر ڕۆیێ گوڵ ئاران بە کۆڵ گوڵ ئەشەد بۆیێ یا شا هەر کەسێ گوڵ بە گوڵ ئارۆ یا شا ئەو باڵاش سەنگ و گڵ وارۆ ++++++++++++++++++++++ سەرناو: چراغ وێنەی تۆ چراغ وێنەی تۆ... جە شام جە شیراز نەدیم وێنەی تۆ فیدای باڵات بام، شای فریشتە خۆ وێنەی تۆ نیەن، هەنیچ نمەبۆ خوداوەند ئەوسا، تەرکەش ئاراستەن باخی تۆش دیەن، پەی تۆش کیاستەن دەستش نەڕێزۆ، نەقشی نەققاشان چەنین زینەتێ ئەو بە تۆش نەخشان؟ سوورەی پەنج، ئەلحەمد، تەها، وە یاسین هەرسە نیگەهدار باڵات بۆ، ئامین هەرتا دەورانەن، دەور بە کامت بۆ هەزاری چوون من فیدای نامت بۆ ++++++++++++++++++++++ سەرناو: چراغ وەش بۆشەن چراغ وەش بۆشەن... پەی چی زوڵفی تۆ ئەوەند وەش بۆشەن؟ مەوینۆن چوون شەوق جەمینت ڕۆشەن موشک ناف پەرێش، زەنگی پۆس پۆشەن خەیلێ پەی زوڵفت وەردەن هوونی جەرگ جەو پەی پۆس پۆشان، سیا کەردەن بەرگ دڵ کەردەن چون زوڵف سیای تۆ، دارا قەیس ئاسا، مەنزڵ بەردەن وە سارا فیدای زوڵفت بام وەش بۆی وەش کڵاف دەردی مەجنونیت دا بە مشکی ناف ++++++++++++++++++++++ سەرناو: چراغ وەنەوشە چنوور چەنی گول چراغ وەنەوشە چنوور چەنی گول عەزم ڕای ویساڵ تۆشان ها نە دڵ چنوور جە سەرکۆ وەنەوشە جە چەم گوڵ جە گوڵستان وەهەم بیەن جەم واتشان بە من بەندەی فڵانی چوون حاڵ زانەنی بە حاڵ مەزانی بۆ نە ڕای ئەڵڵا بکەرە کارێ بیاومێ بە وەسڵ ئەو دڵبەر جارێ چراغ ها هەر سێم بەستەن بە دەستە چ دەستە؟ دەستەی زگاران بەستە هەر سێم ئاوەردەن چوون خاکساران هەر یەک وایەی وێ وە چەم مەداران چنوور پەی زوڵفت پەشێو حاڵشەن وەنەوشە سەودای خاڵ خەیاڵشەن گوڵ پەی جەمینت مەسۆچۆ چوون شەم جە دووریت نیشتەن نە پای خاری خەم ساحیب پایەنی، بڵند بۆ پایەت باوایە گێران هەر یۆ جە مایەت ++++++++++++++++++++++ سەرناو: چراغ وەڕەزان چراغ وەڕەزان... ئاڕۆ ڕاگەم کەفت شیام وە ڕەزان بە زووانی حاڵ پەرسام جە خەزان تەن بیەن مەجروح چوون ماران گەزان واتم هەی خەزان ڕەزیدەی چەمەن ئوستادی نەققاش بەلەرمی یەمەن سەبەب جە چێشەن، ڕەنگ زگارەنی سەرتاپا هوونین دڵ فگارەنی؟ واتش هەی بێ مەیل، جە ناکاجارێ دیم ئاماو و یەرد زوڵف ئەشەد بارێ خەرامان ویەرد بە سەد نازەوە بە دیدەی سێوەنگ سورمە سازەوە مەودای موژانش نیشتەن نە جەرگم بە هوونی ئەوەن یە ڕژیان بەرگم سا من زایفیم جە بۆنەی لەیلەن عامیان مەواچان ڕەشتەی سیوەیلەن ئێمەیچ چوون ئەوان هوونی دڵ وەردیم جە دووری یاران، داخ وە گڵ بەردیم ++++++++++++++++++++++ سەرناو: چراغ ڕەزان بۆ چراغ ڕەزان بۆ... خاس ئیدەن گڵکۆم نە پای ڕەزان بۆ نزیک وە پرشنگ پای قەڵوەزان بۆ ئامێتەی خاکم وەڵگی خەزان بۆ بادا وە گلکۆم خاکی نۆ نەبۆ با یەکجار کۆنەی سەد ساڵ کۆنە بۆ بەڵکە قیبلەی وێم جە ناکا جارێ بەیۆ وە سەیران، عەزمی شکارێ نابەڵەو بنیۆ پا وە گڵکۆم دا وە قەبری تازەی تەنیایی نۆم دا تا جە ژێری سەنگ ساکن بۆ دەردم نەبا سەنگ سۆچۆ بە ئاهی سەردم ++++++++++++++++++++++ سەرناو: چراغ کەی بۆ کەی چراغ کەی بۆ کەی... جە دووری زامەت، دینت کەی بۆ کەی؟ جە کۆی پڕ زامەت، سارای پڕ جەوەی جە گەردشی چەرخ، گەردوون کەردم تەی چەن چوڵی ئەربەت، بەڕی بێ سامان چەن گێجی گڵاو، دەریای بێ شامان چەن خار موغەیلان بە پایانم وەرد پەردەی تەن شکاف سەر نە دەروون بەرد چەن ڕۆوان جەفا، شەوان بێداری بێداری چەنی سەیلاتی زاری ئێمە بەبێ تۆ سالێوەی سەرسام خەیاڵ چەنی دەرد بێ خاوی بێ ڕام یانێ ئەندامم نەڕێزا نە خاک وەرنە دڵ چوون گوڵ سینە کەردەن چاک ++++++++++++++++++++++ سەرناو: چراغ یانی چێش چراغ یانی چێش... ئی چەم ئێشانە پەی تۆ یانی چێش؟ دیدەی من خاسەن پەرێ ئێش و نێش ئێشی دیدەی تۆ بەیۆ بشۆ تێش دیدەی من خاسەن پەرێ ئێشیان پەردەی لێڵاوی پێدا کێشیان باجەتی ڕەسوول دیدەی تۆ نێشۆ ئەخی جبرەئیل، باڵ سەرت کێشۆ دیدەی تۆ نەیشۆ پڕ بادەی کەیفەن دیدەی من بێشۆ کێ ماچۆ حەیفەن ++++++++++++++++++++++ سەرناو: چراغم ئامان چراغم ئامان... ئامانەت فەرزەن ئامان سەد ئامان وەسێتم ئیدەن دەستم بە دامان بەی وەسەر گڵکۆم سەوڵی خەرامان ئەسرین جە دیدەی خەرامانی تۆ جە سەر بتکێو بگنۆ وە گڵکۆ ئەر خەڵکان پەرسان لەیڵی چێش بیەن واچە هەی مەردم زۆر وەنەم شیەن ئینە غوڵامێن بە تازە مەردەن داخی دیدەی من، بە گڵکۆ بەردەن ئیسە هانە ژێر تەختەپۆشی سەنگ نە قەبری تاریک بێ داواو بێ دەنگ بە دەرگای فەڵەک زار زار بناڵە دوو گێسووی سیات وەڕووی خاک ماڵە واچە خوداوەند بویەر جە گوناش چونکە جەی دنیا فرەم دان سزاش ++++++++++++++++++++++ سەرناو: چراغم ئەر بەی چراغم ئەر بەی... ئەر بەی بوینی ئی ڕوخسار چوون بەی جەرگ مەبۆ کەباب مەی ماوەری مەی وەرنە مەویەرۆ زایەڵەم جە نەی هەر مەواچی هۆ دیدەم ئامانەن یە چەندێ وەختەن ئامان ئامانەن پەرسام جە گێسووت، ڕەنگی ڕۆزگار وات ئی سیابەخت، تارتارەن، تار تار پەی چێوێ بەو زوڵف بۆ وە یانەمان تا بەو بۆی زوڵفت بۆ وە یانەمان چین چین چەم وەردە تۆمار تۆمار بۆ پەی پای دڵ ڕازیم، زوڵفی تۆ، مار بۆ ++++++++++++++++++++++ سەرناو: چراغم بێ تۆ چراغم بێ تۆ... ئێوار تا سەحەر، بێ خاو بیم بێ تۆ ئەسرین جە دیدەم پەیاپەی مەشۆ چوون سەیلی وەهار، هەر شەو تا وە ڕۆ کزەی جەرگی وێم مەژنەوو بە گۆش دڵ لادێ جە خەم نیەن فەرامۆش ئیسە زەدەی زام پەشێو حاڵ جەستە ئینتیزار پەی دین شای ئاوات وەستە ++++++++++++++++++++++ سەرناو: چراغم بێ تۆ گوڵانی وەهار چراغم بێ تۆ گوڵانی وەهار مەیان وە دیدەم چوون نەشتەر هەزار هەر یەک چوون نەشتەر بەرگوزیدەی من پەی تۆ مەشکاوا پەردەی دیدەی من وەلێ بەبێ تۆ مەدیۆ دلێشان مەیان وە دیدەم تێژتەر جە نێشان غەیر جە تۆ نەدیەن چێش مەبۆ فێشتەر گوڵانی حەریر گرد ببان نێشتەر ++++++++++++++++++++++ سەرناو: چراغم بێ ڕام چراغم بێ ڕام... مەتەرسوون نە جەور گەردوونی بێ ڕام ماچوو نەک بێ مەیل ڕۆیێ جە ناکام وەنەم شۆ وەقین دوور وزۆت جە لام بە وێنەی مەجنوون ڕوو کەرۆ وە بەڕ زەمین بە هووناو، دێدەم کەرۆ تەڕ ئایری دووریت نە دڵ گێرون کۆ بناڵوو جە داخ دەردی دووریی تۆ قیبلەم ئەر گەردوون، ئێدش بۆ نە دڵ هێمای وەر جە گشت، من بەرۆ وە گڵ پەی چێش جای ئەلحەد تەنگنای گڵگۆ خاستەرەن جە داخ دەردی دووریی تۆ ++++++++++++++++++++++ سەرناو: چراغم بە وێم چراغم بە وێم... ئیمشەو دۆزەخ دیم، من بە دیدەی وێم بڵێسەی پڕ دوود بە گڕ خێزا جێم عەزاب ڕۆی حەشر، قیامەت دا پێم قرچەی ئیستیخوان، کزەی دەروونم بۆی کەبابی جەرگ جۆشییای هوونم عالەم گشت تەمام جێش ئاما بە تەنگ لوا بە سارا فرسەنگ بە فرسەنگ بەو حاڵە من بیم ئەمشەو تا بە ڕۆ هەر حاڵی بەدواز، دەوری دیدەت بۆ فیدای باڵات بام زوڵف بۆ عەنبەرین لەیلای سایەدار، زوڵف و خاڵ شیرین سا دۆزەخ چێشەن؟ عەزابش جە کۆن؟ دۆزەخ هەر دۆزەخ دووریی باڵای تۆن دەروونم ئایر توونی بێ ئاوەن ناڵەم سەداش چەرخ گەردوون شکاوەن ناڵەم جە ئاڵەم ئایر خێزنا ئەسرینم تۆفان نووح ئەنگێزنا من وێنەی غەواس غەرقی خەمیدە گێج بیم نە گێجاو تۆفانی دیدە چەنی ئاهی دەرد مەجنوون جە خاودا هەر گێجم مەوەرد شەو نە گێجاودا ++++++++++++++++++++++ سەرناو: چراغم بە چین چراغم بە چین... ئەر چینی زوڵفت بدەو بە ماچین ئەر یەک تای زوڵفت بدەو بە گرد چین کافر بو ئازیز بەر بشو جە دین ئەر قەوسی ئەبرۆت بدەو بە حیجاز ئەر موژەی دیدەت بدەو بە شیراز ئەر بەینت بدەو بە خەتا و خوتەن ئەر ڕێزەی ڕازت بدەو بە ئەرمەن ئەر لەبی لاڵت بدەو بە کشمیر ئەر بدەو بە هیند سیلسیلەی زنجیر ئەر سیبی زەنەخ گوڵ خونچەی دەهان بدەوش بە یەکسەر تەمامی جیهان ئەر پا و پوزت بدەو بە گە نجە ئەر بدەو بەمیسر ئەو دەست و پەنجە ئەر بەژنی باڵات بدەو بە ئێران سەد هەزار کەڕەت یانەم بۆ وێران سەراسەر عومرم گرد شۆ بە تاڵان جاگەم نەبەڕ بۆ نەپای ئەوداڵان پەی چێش جەلای من باڵا زەڕستوون تەنیا تۆ هەنی نە ڕووی دنیای دوون. ++++++++++++++++++++++ سەرناو: چراغم بە چەم چراغم بە چەم... بەینەتی دووریت بدارە بە چەم ئەوڕۆ بینایی دیدەم بیەن کەم فەڵەک جیاش کەرد ئێمە و تۆ جە هەم مینای خاترت جێم نەگێرۆ گەرد جە دوور وەتەنیت مەیلت نەبۆ سەرد هەر پاسە بیەن شەرتی دڵداران بەینەتی دووری بە چەم مەداران من ئەر سەد غەریب دوور جە زامەنم هێمای ئەو غوڵام دەست بە دامەنم ++++++++++++++++++++++ سەرناو: چراغم بەختەن چراغم بەختەن... بە وێم مزانوو بەختم بەدبەختەن جە دووری باڵات زامەتم سەختەن مزانوو بە حاڵ مەردەنیم وەختەن ئەڵماسی دووریت نە دڵ کار کەردەن بە سەد حەکیمان دەوا نەبەردەن شیم وەلای حەکیم ببەرۆ دەوام دەردی بێ زامەت هیجران سەرئەنجام واتم ئەی حەکیم هانا سەد هانا بکەرە دەوام حەکیمی دانا حەکیم وات فەقیر زامەت ناچارەن دەردت دەردێوەن زام نادیارەن زامەتی دووریت نە دڵ کەردەن کار سیوا جە مەردەن کەس نەبەردەن چار سازانام حەکیم دەواش نەبەردا دەسێو خۆڵ و خاک کەردم بە سەردا هەردام بە سەردا پەرێ جەستەی وێم پەرێ زامی سەخت جەی نەڕەستەی وێم هەر دام بە سەردا پەی زامی سەختم پەی ستارەی شووم بەدبەختی بەختم سا کە من حەکیم نەکەردش دەوام مەر ئەجەل بەیۆ بدەرۆ شەفام ++++++++++++++++++++++ سەرناو: چراغم تێژتەر چراغم تێژتەر... چەن موژەداری جە ئەڵماس تێژتەر هەر یەک هەزار زام مەکەران فێشتەر هەم جە پەی زامان تێژ مەبان تێژتەر هەر یەک بە موژەی سیای مەودایی مەشکاوان سینەی بەندەی سەودایی مەوداشان بەردەن سەر نیان نە دڵ جەو پەی ژاری نێش مەڕێزۆ نە گڵ ++++++++++++++++++++++ سەرناو: چراغم تەناف چراغم تەناف... بە تای بێ هەمتای ماڵ بەبێ تەناف جە دووریی باڵات سۆسەنی کڵاف بیەنان بە تووڵ تەن شکەستەی تاف گا خەریکی دەرد بەردی قەڵوەزان گا زەرد وێنەی ڕەنگ خەزانی ڕەزان گا عەزمی تەنجەی ماوای تۆنمەن گا تەمای وەسڵت نە دەروونمەن زەردیم نە هیجران ئاڵاو واڵاتەن کڵافەی موشکین، بەژنی باڵاتەن قیبلەم مەر ئەوسا ساکن بۆ جە خەم خاکی ئاستەنەت بماڵوون بە چەم ++++++++++++++++++++++ سەرناو: چراغم جامەن چراغم جامەن... تۆ ماچی جەمین، جە لاش بە جامەن جام ماچۆ، منیچ ئەو جەمین جامەن ئەر ئەو جام نەبۆ، من نامم کامەن؟ ئەر عەکسی ڕووی ئەو نەوینوو جە وێم هەرگیز نامی جام نمەواچان پێم مەواچان بەد ڕەنگ، شیشەی شکەستە دوور جە شار، نە خاک سارایی خەستە ئیسە سەرفراز کردەی شاهێ بیم ئازاد کەردەی شەوق شۆڵەی ماهێ بیم ++++++++++++++++++++++ سەرناو: چراغم جیا چراغم جیا... هەر کەسێ کەردش تۆ جە من جیا نائومێد نیشۆ وە بەختی سیا زیانش چێش بی ئەر من تۆم بدیا؟ هەر کۆس کەوتەبان کۆس وە کۆسەوە ئەڵڵا دۆس پێکان وە کەڵپۆسەوە ئەر لادێ باڵات نەوینوو بە چەم مەشۆ، نە مەزهەب مەسیحای مەریەم هەر کۆس کەوتەبان کەردشان کارێ نەوینوو باڵات وە سەد ڕۆ جارێ ++++++++++++++++++++++ سەرناو: چراغم جە لات چراغم جە لات... دڵ مەیل کەرد جەستەش بمانۆ جە لات دەروون ڕاش نەدا، نەبێش دەسەڵات بی بە هوونی چەم، ڕێزا، کەفت نە پات هەر قەترە هوونش جە دیدە جیان پەرێ داخ و دەرد، سەرتاپا سیان شەرتەن بپەرسی چێشەن حاڵشان چێشەن سیابەرگ، چوون زوخاڵشان ئەوسا مەزانی دڵ جەفاکێشان حاڵی دەرد و داخ مەپەرسی لێشان ++++++++++++++++++++++ سەرناو: چراغم جە ویر چراغم جە ویر... جە دمای مەردەن نمەشیم جە ویر ئەگەر وە گڵکۆم ڕات گنۆ تەقدیر سەنگی ئەڵحەدم مەبۆت دامان گیر زنهار نە گڵکۆم پا نەکەری کەم ڕۆحی ڕەوانم مەدارۆت بە چەم نەواچی مەردەن هانە ژێری گڵ هێمای داخی تۆم بەر نەشیەن جە دڵ ئەوڕۆ جە ئەڵحەد سەر مارۆ وە بەر وە مەیلی تۆوە مەشوون وە مەحشەر جە بۆنەی تۆوە بەهەشت مەدان پێم وەرنە چە کارەم؟ کێ زانۆ من کێم؟ ++++++++++++++++++++++ سەرناو: چراغم جەرگم چراغم جەرگم... چراغ سەد پارەن پەرێ تۆ جەرگم هەر یەند مەیۆ ئاه دڵ پارەکەرم پارەش مەویەرۆ جە بانی سەرم بە وێنەی پرشنگ کوورەی گڕ نەسەر هەناسەم ڕێزەی دڵ مارۆ وە بەر فیدای کەردەگار بەبێ تۆییت بام خەیاڵی کوشتەی ماوەرۆییت بام ++++++++++++++++++++++ سەرناو: چراغم جەزەل چراغم جەزەل... بەو کەلامانە نازڵ بین جەزەل ئەر مەشۆ نە خاک یاوانم جەدەل هیجران زەدەی تۆم نەواچان ئەجەل نەک هامسەرانم باوەران نە دڵ ئەجەل پێم ئامان منیش بەرد وە گڵ هەر ئێد بواچان ئامانەت فەرزەن یە هیجران کوشتەن، بێ ئەجەل مەردەن ئی ڕەنجی دەروون، دەردی بێ تاوان تەن زوخاڵ کەردەن، ئەعزام گرد کاوان ++++++++++++++++++++++ سەرناو: چراغم حاڵت چراغم حاڵت... بە بەد مەواچان، بەد وازان حاڵت مەواچان زوڵفان، موشکین زوخاڵت بێ ناز، پەشێوەن، وە بوومی لاڵت زوان بەستەبان یە چوون دڵداران پاسەو تۆ بازاڕ ستەم مەداران پەی چێش؟ بینایی هەر دوو دیدەنی بێ تای، بێ هامتای، بەرگوزیدەنی باڵا سپی سەوڵ، خاتر دارەنی نەمامی نەو خێز گەوهەربارەنی خاس ئێدەن نە دەور جەفای ڕۆزگار نەوینۆت ئازار، نەشێونۆت بازاڕ خودای پەی شیفات، جە سەیر نە سەیر بۆ ئازارت ئازار، عاقیبەت خەیر بۆ ++++++++++++++++++++++ سەرناو: چراغم خارێ چراغم خارێ... نە دووریت نیشتەن نە جەرگم خارێ نێشی ئەو خارە یاوان بە کارێ کزەش ئاوەردەن جە گۆشتە تارێ هەر کەسێ خارێ مەنیشۆش نە پا وە سووزەن فەهم مەبەرۆش دەوا سزا مەدۆ پێش جە سوب تا ئێوار جە نێشی ئەو خار زایف مەبۆ زار من خاری هیجران تۆم نە تۆی دڵەن بە وێت مەزانی خەیلێ موشکڵەن مەرهەم وەسڵ تۆش بکەرۆ چارە وەرنە تا مەحشەر خارم بەو خارە ++++++++++++++++++++++ سەرناو: چراغم دەردم چراغم دەردم... شەوێ جە هیجران دێویا دەردم خەیاڵ خەم ئاوەرد، پەژارە کەردم تا سوب سپی بی، شەوگەرد، من گەردم نەعرە دام، لاڵام تابە شەبەق زەرد زەڕەی خەو وەبان دیدەم مەیل نەکەرد هەرکەس گۆشش دان بە ئاه و ناڵەم لاحَول مەوانا پەی شوومی تاڵەم تا وە سوب هەر کەس وەنەم بی نەزاو جە شوومیم ئەو کەس هیچ نەکەردش خاو مەواتش یا ڕەب یەکام دەردینەن شەوان هەر نە فیکر زایەڵە و شینەن؟ سەد بار واتەن پێم جە زمان لەنگ بای ساتێ ساکن بە، بە سیا سەنگ بای ++++++++++++++++++++++ سەرناو: چراغم دەس ڕەس چراغم دەس ڕەس... دەست نەداروو بە وەسڵت دەس ڕەس بە چێوێ مەبۆ خاتر شاد هەر کەس شادی و زەوقی من، خەیاڵی تۆن بەس موفلیس مەنیشۆ، خەیاڵ مەکەرۆ بەو خەیاڵ گەنجێ بەهەم ماوەرۆ ئەوسا مەبەرۆش خەیاڵ وە جایێ نمەیۆش وە چەم چوون خەسرەو شایێ منیچ ئەو موفلیس، وەسڵی تۆن گەنجم هەرتا زیندەنان پەرێت نەڕەنجم لازم یا مەشوون، سەر بە ڕەنجدا یا ڕەنج مەبەرووم، پا بە گەنجدا ++++++++++++++++++++++ سەرناو: چراغم زامان چراغم زامان... ماچان مەنمانی مەرهەم پەی زامان زامێ لێم کریان دەستم بە دامان دڵ چەنی ئەو زام تا مەرگ سامان هوونی زام کەردەن گوڵ گوڵ دامانم ئەی زام بی ئاهیر پەی گشت زامانم لوقمان نەبەردش عیلاج نە جەستەم نەنمانان مەرهەم پەی زامی خەستەم ئەرستۆ دەوای دەردم نەزانا ئیفلاتون دوعای لاحَولش وانا فەرهاد جە ئاهم بێستوون بێزا مەجنوون جە ناڵەم جە نەجد گورێزا ئەو زامە وەسۆن تا وە ڕۆی مەردەن یە بێ مروەتێ ئی زام لێم کەردەن ++++++++++++++++++++++ سەرناو: چراغم زامێ چراغم زامێ... دڵ ئاوەرد ڕۆیێ، جە نەخشت زامێ زامێ ژار ئالوود، بێ دەوا و دامێ مەزانوون جەی زام، مەوینوون کامێ یە چەندێ وەختەن دڵ جەفاش بەردەن پەی زامێ بەی تەور گیانش سپەردەن بواچان کوشتەی زامی نەخشی تۆن پێکیای ناواک خەڵات نەخشی تۆن وایە و مورادی چەند ساڵ مەبی پێش شوکور هەم یاوا، ئەو بە وایەی وێش ++++++++++++++++++++++ سەرناو: چراغم زویر چراغم زویر... جە دووری باڵات، زامدارم، زویر هەر یەند بە خەیاڵ ماوەرووت بە ویر بەتەرتەر نیهان، داخت مەدۆم گیر مەگنۆ وە یادم گۆنای گوڵ بێزت دیدەی بێ مەی مەست، موژەی هوون ڕێزت ڕەفتاری شێوەی ئاما و لواییت ئاداب و دەستور، ساحێب وەفاییت یەک یەک لێم بیەن بە زامی خەتەر نیهانان فرەن، یەک جە یەک بەتەر مەر ئەوسا داخت بەر کەروون نە دڵ کۆ بۆ وەسەرم کۆگای سەنگ و گڵ ++++++++++++++++++++++ سەرناو: چراغم شەندی چراغم شەندی... تۆ توخمی هیجران وە بەختم شەندی تۆ وەشیی دنیا جە دەستم سەندی تۆ مایەی نیشات زندەگیم کەندی تۆ جامی زووخاو مەینەت پێم نۆشای تۆ سیا پەڵاس وە بەرگم پۆشای تۆ وە گەردەنم خەمان کەردی بار تۆ کەردی سۆمای نووری دیدەم تار تۆ وستات نە تەخت، مەرتەبەی شایی تۆ دات بە دەستم عەسای گەدایی تۆ لۆنگی مەجنوون وستی نە شانم تۆ دەستەی ئایر وەردای نە گیانم چراغم ئەر هەن جەفا جەی فێشتەر سزام دەر سزا ڕۆ جە ڕۆ بەدتەر ئەر سەد هیجرانت وە جەستەم بارەن دڵ وە مەیلی تۆ هەر گرفتارەن ++++++++++++++++++++++ سەرناو: چراغم شەهید چراغم شەهید... وەختێ وە نیگات مەکەریم شەهید بۆ بەشقی خودای حەمید و مەجید جە زوڵفی سیات یەک تایێ وەحید بوزەم نە گەردەن بە وێنەی زوننار بەو زوننارەوە بشوون وە مەزار تائەر مەلەکان بیانیم وەسەر وینان ئەو زوننار تۆم بەستەن کەمەر شەرمی زوڵفی دێز سیات کەرانێ عەزابی دۆزەخ پێم نەدەرانێ ++++++++++++++++++++++ سەرناو: چراغم مەیل کە چراغم مەیل کە... ڕۆیێ بۆ وە سەیر چەمەنان مەیل کە تەماشای ڕەنگ بەست ڕەشتەی سیوەیل کە دامانی هەردان جە عەنبەر کەیل کە وایەش هەر ئێدەن جە ناگا جارێ بکەری وە ڕەنگ ڕشتەش گوزارێ سیوەیل پەی شادەن، خەزان ڕەنگ و بۆ بگێران جە شەوق شۆڵەی ڕەنگی تۆ ++++++++++++++++++++++ سەرناو: چراغم نە جەرگ چراغم نە جەرگ... هیجرانی دووریت چنگ پێکان نە جەرگ سەرتاپا سیا قەڵاخیمەن بەرگ هەر ڕۆ مەوازوون سەد ئاوات وە مەرگ دیدەم بێ نوورەن جە تاوی ئەسرین هوون جێش مەتکیۆ چوون سفتەی برین جەو ساوە دیدەم دوور کەفتەن جە تۆ لێڵاویش لێڵەن، لێڵاوتەر مەبۆ ڕۆشنی بیسات لێم بیەن بە تار زیندەگیم تاڵەن وێنەی ژاری مار کەسێ کە بەی تەور حاڵوو جەستەش بۆ پێسە جۆیای وەسڵ ئاوات وەستەش بو خاسش هەر ئێدەن مەرگش مێمان بۆ مەگەر ئەو بە مەرگ دەردش دەرمان بۆ ++++++++++++++++++++++ سەرناو: چراغم نە دڵ چراغم نە دڵ... دڵ پڕ ئایرەن، بۆ وەس شۆ نە دڵ نازکتەرەنی تۆ جە پەڕەی گوڵ نەداری تاقەت، زوڵف بۆ سونبوڵ دڵ ئاه مکێشۆ، گڕ مەیۆ وەبەر نەبا نیشەڵڵا، پێت یاوا زەرەر تێدا مەنیشە هەی بەرگوزیدە بۆ با جات کەرۆ وەبانی دیدە موژەم هەم دەردەم کەرۆت وە پەرچین تا لێت نەیاوۆ ناواکی بەدبین ئەوسا تەماشای سەرجۆی ڕەوان کەر باڵات وێنەی نەی دەستەنیشان کەر عەجەب یاگەتەن نەمامی وایەم پایە بڵند بای پەرێ سەر سایەم ++++++++++++++++++++++ سەرناو: چراغم وازان چراغم وازان... من جە خواوەند تۆم ئاوات وازان بەو شاکە شاهان پەنەش مەنازان حەڵقە گۆشی تۆم، شای شەکەر ڕازان ئەگەر گشت عالەم شەکەر ڕازان بان ساحێب شەرت و بەین، زوڵف درازان بان غەیر جە تۆ فێشتەر قیبلەی جەمین جام پەرێ کەس نیەن خاو وەنەم حرام دڵ پابەندی تۆن، شای بەینەت داران بەو باباشێخە ماڵ جە بێساران ++++++++++++++++++++++ سەرناو: چراغم وەفات چراغم وەفات... بێ بەینەتەنی هیچ نیەن وەفات سێ ساڵ چوون یەک ڕۆ من کێشام جەفات جەو سێ ساڵ جارێ، هیچ نەدیم وەفات سی و شەش ماهەن من، جەفات مەکێشوو یانەی سەبرم سفت تاکەی مەنیشوو قیبلەم حیساب کەر ساعەتان چەندەن جە گرد سەعاتێ دڵ جە لات بەندەن بیست و پەنج هەزار نۆسەد و بیستەن دڵ مەیلش بە تۆن، هەر تۆش ئەویستەن هەزار و هەشتا ڕۆوان بی کامڵ ڕۆیێ مورادم لێت نەبی حاسڵ ئەر تۆیچ مەیلت هەن، ڕاس بواچە پێم وەرنە ساکن بوون با جە یانەی وێم ++++++++++++++++++++++ سەرناو: چراغم چوونم چراغم چوونم... چێش واچوون جەدەست هیجرانت چوونم گیرۆدەی ئافاق دەستی گەردوونم سەبرت سووچنان، یانەی دەروونم تۆ وێت مەزانی دڵ چەند سەبرش کەرد پەردەی سڕپۆشا و شکایەت نەکەرد ئیسە ها سەبرم جە تاقەت بڕیا یانەی سەبرم سفت، پەردەی دڵ دڕیا ئێدشان واتەن حەکیمانی حاڵ جە سەبر کەردەن، سەنگ مەبۆ بە لاڵ ++++++++++++++++++++++ سەرناو: چراغم چگیر دەست چین تۆ دیم چراغم چگیر دەست چین تۆ دیم سەنگ بە سەنگ گێڵام فیدای یەک یەک بیم پەرسام ئەی چگیر سەنگ جە سەنگ جیا یە دەستی کێ بی تۆش وە هەم نیا؟ واتی زڵێخای بوم خۆرە زەردەن بە پەنجەی سێوەنگ ئێمەش جەم کەردەن جەو بۆنە مەبوون بە فیدای سەنگش ئەڵبەت شنەفتەن ڕازێ جە دەنگش ئەو سەنگی چگیر ئازیز نیابێ فیداش بام فیدا، هێمای نەو جابێ من یەند سەبرم کەرد سەنگ نەبی وەلاڵ ها، من بیم وە سەنگ، سەنگ بی وە زوخاڵ ++++++++++++++++++++++ سەرناو: چراغم ڕۆیێ جە سوب سەحەردا چراغم ڕۆیێ جە سوب سەحەردا ناگا خەدەنگش بەرد وە جگەردا جگەر پەنهان کەرد، مەر دڵ نەزانۆ بێ ڕامەن، نەبا چەنەش بسانۆ دڵ دەرلاد، زانا، هۆرێزا بە جەنگ گرت بە دەستەوە سەر فاقەی خەدەنگ مەکێشۆش بە دۆش نە خەوفی جگەر جگەر سەخت گرتەن، نمەیۆ وە بەر چونکوو نیهانی دەروونشانەن دامانم گوڵگوون بە هوونشانەن فیدای شەستت بام، هەی خەدەنگ وە دەست خەدەنگیۆ هەنیت، با بەرشۆ جە دەست بەرە بە دڵدا بە وێنەی جگەر تا جەور و جەفام ناوەران وە سەر ++++++++++++++++++++++ سەرناو: چراغم ژیام چراغم ژیام... سامن وەبێ تۆ نەمەردم ژیام جە چەفتی چارەم، نە بەختی سیام قەدەمێ نە ڕای ئەجەل نەنیام پەی تۆ ئایرم مەخێزا نە دڵ نەبیم وە زوخاڵ نەڕێزام نە گڵ چێش واچوون بە جەور بێ وەفای بێ ڕام تۆشەی ڕان پەرێ سەرسامی سارام ++++++++++++++++++++++ سەرناو: چراغم کامەن چراغم کامەن... مابەینی دۆسیی من و تۆ کامەن؟ نە عەرزەت عەرزەن، نە نامەت نامەن مەر قاتیی کاغەز، دوعا و سڵامەن؟ مەر پەڕەی کاغەز بڕیان جە شاران سیاش بکەری پەی دەردەداران؟ یا کاغەز بڕیان، یا مەڵا مەردەن یاخۆ عارتەن، دۆس وەیاد کەردەن غەمگین مەنیشە غەم بدەر وە باد فەڵەک نمازۆ کەس وە خاتر شاد وەرنە یانی چێش بینایی چاوان وستەنت وە بێز، بەندەی بێ تاوان ++++++++++++++++++++++ سەرناو: چراغم کەردم چراغم کەردم... ئیمشەو وە خێر بۆ یادی تۆ کەردم جە دوور وەتەنیت گرانەن دەردم سەد پا نە پایەی مەردەن، ویەردم ئەوەند زایف بیم، جەو ناڵیندا دیم ئەجەل ئاما وە باڵیندا یەند پەیم گێڵا نەژنەوا دەنگم ئەو پێسەش زانا، من سیا سەنگم فیدات بام ئازیز، کوشتەی تۆنانی ئەجەل نەزاناش، من جە کۆنانی ++++++++++++++++++++++ سەرناو: چراغم کەرەم چراغم کەرەم... ئەگەر کەرەمدار بکەرۆ کەرەم شەوێ من و تۆش بیاونا بەهەم من چوون پەروانە تۆ بە وێنەی شەم تاسوب بنیامان سەر وە یەک سەرین کەردامان ڕازان ویەردەی وەرین ئەوسا جەو دما، ئەگەر مەمەردم پەی مەردەنی وێم شادی مەکەردم ++++++++++++++++++++++ سەرناو: چراغم گوڵان چراغم گوڵان... ئەر بێ تۆ بدیۆ من وەڕووی گوڵان بەری بوون جە سۆز ناڵەی بوڵبوڵان هام دەرد بوون چەنی دەردی بێ دڵان ئەر چەمەن بێ تۆ بووینوو بە چەم من جێم بە هووناو موژگان بدۆنەم چوون بێ دەردان بۆ، دڵ بە وێنەی سەنگ سەنگێ ڕوو بە ڕووی ئادەم بدۆ دەنگ ئاخر زیندەگیم بەبێ تۆ تاڵەن ئەر کەمتەری بۆ خاو و خەیاڵەن ++++++++++++++++++++++ سەرناو: چراغم گەردان چراغم گەردان... بدیە وە گەردش گەردوونی گەردان ئەمن هیجران کێش غەم زەدەی دەردان چۆنیش کەردەنان وێڵ و سەرگەردان نە بە جایێدا یەک سات مودارام نە خۆ یەکجار وێڵ گەڕیدەی سارام مەگەر خوداوەند، حەکیمی نەردباز نەردی خەیر نە بەخت من بکەرۆ ساز ئەودی بگێڵوو دەوران بە چاخم شاد کەرۆ بە شەوق شۆڵەی چراغم ++++++++++++++++++++++ سەرناو: چراغم یاران چراغم یاران... ئیمشەو جە خاودا شیم وە لای یاران ئیجازەم واستەن جە ئیجازداران مولەمما بیان شەو چەنی یاران جفتێ کاڵە بەی ها بەو دارەوە دوو شامار بەندەن، بەو چنارەوە ماران و بەیان هەر مەلەرزانی نمەز چ سیڕڕەن نمەگەزانی تبارک الله جەی چنار شاماران جفتێ، مار تووڵان هەزار سوب کە سپی دەستەی بی جە خاو بیم بێدار نە مار مەندەبی، نە بەی، نە چنار درێغ جەو خاودا شامار بگەسەتام چەنی بێ بەینەت، بەینەت نەوەستام ئەگەر بێ بەینەت، قەبرش پڕ نوور بۆ قەبرم جە قەبری بێ بەینەت دوور بۆ ++++++++++++++++++++++ سەرناو: چوون جەماڵشەن چوون جەماڵشەن... کەعبەی موعەززەم چوون جەماڵشەن حَجَرالاسوَد خەت و خاڵشەن سەرچەشمەی زەمزەم لەبی لاڵشەن چین چین جەمەرەی خەیاتانی خام حَجَرالاسوَد، مسجدالحَرام نەمەردام تەواف مسجدالحَرم عەرەفە و، مینا، بازاڕی زەمزەم بکەردام جارێ ئیحرام بپۆشام جامێ جە شەربەت زەمزەم بنۆشام ++++++++++++++++++++++ سەرناو: چڵێ جە پەنا چڵێ جە پەنا... چڵێ چوون ڕەقیب مدران جە پەنا هۆرئامان مدران نەڕووی تەمەنا مەر بادی قودرەت بدەرۆش فەنا وە بادی قودرەت لەتارلەتار بۆ نمازۆ باڵای قیبلەم دیار بۆ سۆچۆ بە ئایر بازەدەی سەحەر ڕیشەش جە زەمین بەربەیۆ وەبەر تاباڵای قیبلەم چوون شەمعی خانان بوینۆش بە چەم جە بەرزەبانان ++++++++++++++++++++++ سەرناو: ڕۆیێ سوپای کوفر دیم نە دەوری دین ڕۆیێ سوپای کوفر دیم نە دەوری دین دڵ دەر لاد کافر، پشت کەرد نە یەقین زوننار وست نە دۆش ناقووس گێرت بە دەست شی نە خاکپای پیری مەی پەرەست جامێ جە شەراب عەشقی بت نۆش کەرد حەرفی دین جە لەوح دڵ فەرامۆش کەرد ڕووم کەرد نە ڕووی دڵ خەیلێم کەرد مەنا کێ بەردەن وەسای بت پەرەست پەنا؟ پێسە بێ پەروا وێنەی پەروانە وێت مەدەی نە شەوق سەیری بتخانە؟ دڵ وات بەو کوفرە نە دین بەستەن دەور من بێزارەنان جە دینت بەی تەور سوب جە بتخانە دەروون پڕ جە جۆش شێوەی شیرینی بادەی بادە نۆش خاستەرەن جە دین ڕیا کەردەی تۆ ڕەنجی ئاخر، هیچ بەر نەوەردەی تۆ ++++++++++++++++++++++ سەرناو: ڕۆیێ کوفر دیم ئیمان مەپۆشا ڕۆیێ کوفر دیم، ئیمان مەپۆشا دڵ، ئیمان بە دەست کوففار فرۆشا دینی تەرسا گرت هورگێڵا جە گشت پشت بەست بە زوننار کلیسا و کەنشت واتم ئەی دڵە، فامت شۆ نەسەر کێ بەستەن بە دین کوففاران کەمەر؟ گرتەنت مەزهەب شێخی سەنعانی ئیمان مەورەشی زوننار مەسانی دڵە وات بە خودای کار سازی کەریم من جە دینی تۆ بێزارم، بەریم ئەڵقێوە جە زوڵف زونناری دڵبەر نمەدۆ بە موڵک دارا و ئەسکەندەر سوب سەدای ناقووس سەیری بتخانە دینی تەرسایان، کلیسا یانە خاستەرەن جە دین ناتەمامی تۆ سوجدەی ڕیایی، سوبح و شامی تۆ ++++++++++++++++++++++ سەرناو: ڕۆیێ کوفر دیم ڕووی ئیمان مەگێرت ڕۆیێ کوفر دیم، ڕووی ئیمان مەگێرت دڵ جە دین بەرشی، دینی تەرسا گێرت پشت کەرد نە مەزهەب، عالمانی دین ڕوو نە بتخانە زوننار بەست یەقین ناقووس گێرت بە دەست، سازی گەبریی ژەند ئیمان دا بە کوفر، دینی تەرسا سەند واتم هەی دڵە بێ پەروا جە گشت کێ جە دین بەرشی، ڕوو کەرد نە کەنشت گێرتەنت بە دەست سازی نەسرانی هەر سوب سوجدەی بت بە ناقووس وانی دڵ وات بە کەسێ دانا بە گشتەن بەرشیم جە دینت ڕوو نە کەنشتەن هەر سەحەر نۆشای بادەی سافی مەست حەڵقەی زوڵفی دۆس زوننار بەستەن قەست خاستەر جە سوجدەی ڕیا بەردەتەن ڕەنجی سەد ساڵەی جێ نەوەردەتەن ++++++++++++++++++++++ سەرناو: ڕێحانی بێ گەرد ڕێحانی بێ گەرد... ڕێحانی پەل دێز قەترانی بێ گەرد مەزانی بە وێت وەختی خۆرە زەرد مەبۆت وە میهمان، زڵێخای هام دەرد هۆرگێردت نە خاک، کەفتەی ڕووی زەمین مەپێچووت بە چین کڵافەی موشکین وێنەی زوڵفی وێش پێچنۆت بە دەستە بۆ مەنیۆ نەبۆت چوون ئاوات وەستە درێغا بدیات نە ڕووی سەر زەمین مەپێچای نە چین کڵافەی موشکین ڕێحان بەشقی حەق چێوی پەرسوو لێت بۆی لەیل وەشتەرەن، یا بۆی بەرگی وێت؟ ڕێحان وات جە من چوون پەرسات هەواڵ بە دانای داوەر بەرزی بێ میساڵ بەو شا بێگەردەن، نەزا و نەمەردەن منشان جە ئەزرەت زوڵفی لەیل کەردەن ++++++++++++++++++++++ سەرناو: ڕێحانێ مبۆ پەل دێزی بێ گەرد ڕێحانێ مبۆ پەل دێزی بێ گەرد چوون زوڵفی سیای لەیلی عەنبەر زەرد بەر مەیۆ نە خاک باڵا مەرمانۆ بوێ عەنبەر نە ڕووی زەمین مەشانۆ چوون باخچەی خانان قەیتوول و ناران دەستە بە دەستە چوون زوڵفی یاران هەر کۆ باخێ هەن ئانا تێش دا بۆی عەنبەر مودام مەیۆ پێش دا شێوەی ئەو ڕێحان بەو کڵافەوەن بەو کڵافی سۆز موشک نافەوەن ++++++++++++++++++++++ سەرناو: ڕێزنات جەرگم ڕێزنات جەرگم... ڕێزە ڕێزە بای، ڕێزنات جەرگم دوور نە دین دینت دێونا دەردم ویەرد جە گەردوون هەناسەی سەردم پارە پارەی جەرگ چوون شەرارەی نار چەنی زوخ جە چەم ڕێزیا بەوار هەر موژەم وێنەی کەلاغی کۆسار پارەی جە جەرگم گێرتەن بە مینقار ڕێزەی جەرگی وێم چنیم نە دامان هەر دام بە سەردا هەر تاکە سامان ++++++++++++++++++++++ سەرناو: ڕەقیب سیا بۆ ڕەقیب سیا بۆ... ڕووت بە وێنەی زوڵف قیبلەم سیا بۆ غەزەب جە ئاسمان پەرێت وارا بۆ بەند بەندت بە تیخ جەهەم جیا بۆ بە قاڵب مەردە، بە سەر زیندە بای خەریکی خەرکاو ئەرامەندە بای خودا تۆ نەکوشۆ پەرێ خەلاسی تا خاس خودای وێت بە حەق بشناسی بەی تەور بەیۆ پێت تۆ جە ناسازی هەردەم مەرگ وێت بە ئاوات وازی ساکە تۆ هیجران قیبلەم سەڵا دای کافری موتڵەق، گیری بەڵا بای ++++++++++++++++++++++ سەرناو: ڕەنگی زەردمەن ڕەنگی زەردمەن... زەعفەران وێنەی ڕەنگی زەردمەن جۆیای مەینەت بار، مەجنوون گەردمەن بێستوون سەنگێ جە کۆی دەردمەن چەنی باری خەم، خەم قامەتمەن قیامەت قامەت، پڕ زامەتمەن ئەو زامەت جەستەی من کەردەن بە خۆ پێش مەبۆ زوخاڵ ئەر بگنۆ بە کۆ ++++++++++++++++++++++ سەرناو: کۆی خەمبار وێم کۆی خەمبار وێم... زەلیل و زەبوون، کۆی خەمبار وێم ئەسیری خەستەی کەفتەکار وێم بە دەردی هیجران گرفتار وێم شەیدای خاکسار خەم خەیاڵ وێم پا جە دۆست بڕیان وێران ماڵ وێم ناڕەزای جەلای یاران بڕیای وێم جە زەخمی یاران نە سەر و پای وێم ئاشوفتە، ڕەنجوور، ڕەنج وە باد وێم بەکام نەیاوای ناموراد وێم شەڵڵا کەس نەبۆ، بەی تەورە جەستەش پێسە دوور نەبۆ جە ئاوات وەستەش ++++++++++++++++++++++ سەرناو: کەسم کەسان بە کەسم، کەسان بە... کەسم هەر تۆنی دوور جە کەسان بە بێزار جە هامسای خار و خەسان بە تیژتەر جە دیدەی بەد نەفەسان بە کەسی کەسانیم، تۆیچ بێ کەسەنی چێش کەروون بە کەس هەر تۆم وەسەنی سپەردەی بارگەی بێ کەس بۆ، کەست با هەر کەسێو بۆ، تۆ فەریادڕەست ++++++++++++++++++++++ سەرناو: کەم خزمەتیم چێش؟ کەم خزمەتیم چێش؟ درێغ بزانام، کەم خزمەتیم چێش؟ جە چێش خاترت جە من کەردەن ڕێش؟ ئەگەر دیدەم بۆ کۆر کەروون پەرێش درێغ بزانام عوزر و تەقسیرت حەقەن، یا ناحەق، خەشم و زویرت قیبلەم یە حەیفەن وێنەی تۆ شایێ بگێرۆ نە دڵ خەشمی گەدایێ ئەگەر گوناهێ وەنەم کەردی بار یە سەر، یە شمشێر، یە تەناف، یە دار وەگەرنە چوونەن بە واتەی بەدگۆ مانۆ نە پەردە ڕازی من و تۆ ++++++++++++++++++++++ سەرناو: گوڵ تەبەقێ هەن پێش ماچان شەست پەڕ گوڵ تەبەقێ هەن، پێش ماچان شەست پەڕ زەرد مەبۆ، بێ عەیب، جەمین قورسی خوەر بەرمەیۆ نە دەور، ڕێحانانی چەم گۆناش بە ئاوی سەحەر، مەدۆ نەم دەور مەدۆ نە دەور باخچەی ئەمیران وێنەی قەتاری قاشوونی، گیران سالاری سوپای گردین گوڵانەن مودام، جاش نەپای تیمی سۆڵانەن ++++++++++++++++++++++ سەرناو: گوڵ خونچێوەم دی وەرەق نەشکوفتە گوڵ خونچێوەم دی وەرەق نەشکوفتە جە نەشکوفتەگیش یانەی دڵ سوفتە نە ئەی گوڵ خونچە بە خار هەمسایە گوڵ خونچەی وەش بۆ موشک چین مایە هێمای بوڵبوڵێ وە ڕووش نەناڵان مەکەرۆ یانەی هەزار دڵ وێران ئەگەر بوڵبوڵێ نە ڕووش بوانۆ بیللا گیان جەدەس ئاڵەم مسانۆ ++++++++++++++++++++++ سەرناو: ها بیەن پەیدا ها، بیەن پەیدا... نیشانەی وەهار، ها، بیەن پەیدا بوڵبوڵ مەوانۆ باوازی شەیدا دڵەی عاشقان مەدۆ بە وەیدا هەر مورغی سەحەر نەغمەسازێوەن پەی دەردەداران، دڵنەوازێوەن جە سازی مینقار، سەدای دەروون جۆش خەفتەی بێ دەردان ماوەرۆ بە هۆش ژەرەژ مەوانۆ نەوای بێ خەمی ئارەزووش یارەن، پەرێ هامدەمی گوڵان بە سەد ڕەنگ، بەر ئامان جە خاک عەتر عەنبەرین خونچەی دەهەن چاک هەر یەک مایەی عەتر عەتارێ دارۆ نیشانەی گۆنای تەتارێ دارۆ عەجەب فەسڵێوەن، فەسڵی وەهاران پەی ڕەونەقی سەیر، تەماشای یاران ++++++++++++++++++++++ سەرناو: هامسەران سەندەن هامسەران سەندەن... یەک شەخس یەکجار دڵم لێم سەندەن شابازەن، تەڕلان، زەریفەن، ڕەندەن پەی خەمزە و نازش فامم نەمەندەن گوڵەن، گوڵ خونچەن، --- تەمام هێمای ---، نەیاوان بەکام سۆسەنەن سۆسەن، تەمام نەشکوفتەن هەزار دڵ پەرێش یانەی دڵ سوفتەن سەوڵەن، بەر ئامان نە دلێو چەمەن خەزێنەی شاهان، بەهای ئەو کەمەن زوڵفان لوول وەردەن، وستەن بە وەردا من کەردەن بە قەیس، مدەو بە سەردا وێڵ وێڵ مەگێڵوو هەر ڕۆ جە هەردان ساکن نمەبوو ساتێ جە دەردان پەرێ ئاهووی وەحش، جە دەست کەردەن ڕەم ئەرواح لێم سەندەن، نەمەندەن پەنەم جەیرانەن جەیران، جە ماچین ئامان نەسیب بەند کەردەن جەی موڵک دامان یاڵا بەند ببۆ جەی ئاوەدانی با یەعقووب نەبۆ یەک جار هیجرانی ++++++++++++++++++++++ سەرناو: هووناو وەشتانەن هووناو وەشتانەن... پەی تۆ، جە دیدەم هووناو وەشتانەن باڵام وە کاڵای خەمان پەشتانەن نە ئینە وادەی سەرگوزەشتانەن ئەوەند نەمەردام، حەسرەتا جارێ گەردەنای گەردوون بکەرداش کارێ ئێمە و تۆ هەمڕاز، شەوێ تا بەڕۆ جە شەودا نەدیام، خاوێ غەیر جە تۆ گاهێ سەرگوزەشت، گاهێ شیرین ڕاز گاگا جە تۆ ناز، گا جە من نیاز ئەوسا ئەر مەرگم باما جەو دەمدا بووڵم مەشانا، بە یانەی خەمدا ++++++++++++++++++++++ سەرناو: هیجران بارە وێم هیجران بارە وێم... دایم تەن زوخاڵ، هیجران بارە وێم ڕەنگ زەرد و زەبوون، دڵ ئازارە وێم چوون زامەت داران، زەدەی مارە وێم بە نێشی نەشتەر، دەروون ڕێشە وێم تا بەڕۆی مەردەن جەفا کێشە وێم بە زووخی زامان، دەروون کەیلە وێم سۆزان چوون مەجنوون پەرێ لەیلە وێم وێڵی ئەربەت گێڵ، مەنزڵ بەڕە وێم با سەر خەم دایم دیدە تەڕە وێم ++++++++++++++++++++++ سەرناو: هیجران زام کەردەن هیجران زام کەردەن... هیجران وە گیانم، هەزار زام کەردەن ڕەنگم چوون خەزان، زایف و زەردەن هەردەم جە نۆوە، ڕۆم ڕۆی نەبەردەن جە دوودی ئاهم، عاڵەم تەمینەن با سەر خەم دایم، دیدەم نەمینەن چوون هیجرانیان، خەمیدە بەژنم شادیم هەر شینەن، بەتاڵەن جەژنم چونکە بەی تەورەن جەفا کێشانم یا مەرگ، یا مەرهەم پەری ئێشانم ++++++++++++++++++++++ سەرناو: هیجران نێشش دا هیجران نێشش دا... هیجران وە گیانم، هەزار نێشش دا نێشی زامەتش ئەوەند ئیشش دا ئێش وەختی مەرگ جەفا کێشش دا هیجرانش بەی تەور، نە تەن جا گرتەن وەختەن کە گیانم بەر بشۆ جە تەن من هەم پەی ڕازیم گیانم شۆ وەباد گیانی هیجران کێش کێ پێش مەبۆ شاد؟ ++++++++++++++++++++++ سەرناو: هەوری نەو ئامان هەوری نەو ئامان... باجەتی، ڕەسووڵ، ئامان سەد ئامان وەس دەرە ڕێزەی سەیلات وە دامان ها جە گەشتەدا، سەوڵی خەرامان لادێ جە سەیلات با بۆت مودارا تاکە بەیەوە قیبلەم جە سارا باجەتی پیران، شای سەرەواڵا بە سەیل تەڕ نەکەی ئەو بەژن و باڵا ++++++++++++++++++++++ سەرناو: هەوری نەو ئامان خەم پۆش و خەمین هەوری نەو ئامان، خەم پۆش و خەمین من دوورین وڵات، دەروون ماتەمین هەوری نەوپایز، خەم هیجرانی بەخت مەکەران بە گەرد جەستەی سەنگی سەخت تا جەو هەور مەیۆ یەک قەترە ڕێزان من جە دیدە سەیل هووناو هۆرێزان ++++++++++++++++++++++ سەرناو: یا شای سەبووری یا شای سەبووری... مەر تۆ بدەری سەبری سەبووری تۆ کەری عیلاج دەردی مەهجووری وەرنە کێ دارۆ تاقەتی دووری عەزاب کێشی دەرد، زامنی دووریم پەشێو حاڵ پەی دین، ئەو جەمین نووریم دوور کەفتەی وەتەن، دوور وڵاتەنان خەم کێش و خەمناک، خەم خەڵاتەنان ++++++++++++++++++++++ سەرناو: یاران بەختمەن ئەر سەنگم بار بۆ یاران بەختمەن، ئەر سەنگم بار بۆ شەرتەن ئەو جە مەیل وەفام بێزار بۆ واچمێ هەزار ساڵ، نازپەروەرم بۆ چەنی گیان دایم وە یاوەرم بۆ مەکانی تەختش بانی دیدەم بۆ جە گیان ئازیزتەر بەرگوزیدەم بۆ ئاخر هەر ئێدەن جەفا مەنمانۆ فێشتەر سەردیم - نە دڵ مەشانۆ ++++++++++++++++++++++ سەرناو: یاران دل بە کام یاران دل بە کام... کێ بۆ بیاوۆ، ئەمساڵ دڵ بە کام؟ کەفتەنم وەسەر هەوای موڵکی شام تەکیەگای ڕەسوول علیه السلام درێغ پەی باڵێ بشیام بە ئەو جا بکەفتام نە زێد زامەنی بَطحا مَکّهی موبارەک، بدیام وە چەم تێدا بنیشتام، بێ پەروا و بێ خەم مسجدالحرام تەواف بکەردام حەسرەت نەمەندا ئەوسا بمەردام یا موشکیڵ گوشای کوللی موشکیڵان مراد حاسڵ کەر، پەی زەوقی دڵان ++++++++++++++++++++++ سەرناو: یاران دیم ماهێ یاران دیم ماهێ... ئارۆ دیم بە چەم، موبارەک ماهێ دیا بە لاوە بە وێنەی شاهێ دین جە دەستم سەند بە نیم نیگاهێ من سۆفی مەزهەب، تەرکی دڵ کەردە سۆفی تۆبەکار جە گشت ویەردە مەشغووڵ بە تەسبیح حەیی تەوانا ناگا ئەو جەمین پەنەم نمانا تەسبیح لێم سەندش، تۆبەم دا شکەست دەرلاد کافر بیم، ڕووم کەرد نە کەنەشت قیبلەم چوون تۆبە و تەسبیحت بەردا سا نیم نیگایث، ئەگەر نەمەردا ++++++++++++++++++++++ سەرناو: یاران دێوانە یاران دێوانە... من خۆ ئاهیرناک، وێل و دێوانە کەردەنم بە زێد، چۆڵ و وێرانە سازانم چەنی بایەقوش لانە ئەو بە ناڵەی وێش، من جە تاوی دەرد بێداریش هەر شەو تا وە شەوەق زەرد بەڵێ من هەر دەم، هەرسات جە نۆوە جە دوودی ئاهم، ئاهیر مەبۆوە متەرسوون ناکا بایەقوش باڵش سووچیۆ بە ئاهم، پەشێو بۆ حاڵش واچدێ بایەقوش، ئەر فامێ هەن پێش ئەو جە هامسایەی، گڕ بە دەستش چێش؟ بشۆ وێش بدۆ بە ئاوای یانە من بە ئەو چەنی، چۆڵ و وێرانە ++++++++++++++++++++++ سەرناو: یاران سەرسامم یاران سەرسامم... سەودایی، کۆگەرد، وێڵ و سەرسامم بیابان مەنزڵ، وێڵ و کەم فامم قەیس ئاسا سەرسام، شای گوڵ ئەندامم مەجنوون کەی چوون من، باری دەرد تاوان؟ کەی دووی هەناسەش بە گەردوون یاوان؟ شیشەی بەدنامیش مەپێکا وە سەنگ وێش ڕیسوا نەکەرد، بە لەیل مەدا نەنگ شاباش جەی تاقەت، بەی گشت دەردەوە وەی سۆزی دەروون، سیڕ جە پەردەوە غەیر جە سوبحدەم، شنۆی بادی سەرد کەس جێم نەشنەفتەن، ناڵەی داخ و دەرد ++++++++++++++++++++++ سەرناو: یاران شکاف کەرد یاران شکاف کەرد... نێشی چەم، پەردەی دەروون شکاف کەرد دەروونم سەرڕێژ هووناوان ساف کەرد دوو دیدەم جە هوون، چوون چەمەی تاف کەرد درەختی شادیم جە بێخدا پەی کەرد وە جاش دەست نیشان نەمامی وەی کەرد وە سەنگی بەڵا، لێم ستێزە بی مینای ئەرواحم، ڕێزەڕێزە بی هەر یەند بەڵای خەم، وەنەم بیەن بار گشت نەپێوارەن، یەکێ نادیار ئەر زەڕڕەی خەمم ئاشکارا بی سا ئاڵەم تەمام، ڕووش نە سارا بی ++++++++++++++++++++++ سەرناو: یاران لاڵێ دیم یاران لاڵێ دیم... ئارۆ جە لاڵان عەجەب لاڵێ دیم وە لاڵان لاڵان هۆرێزام و شیم جە پەی ئەو لاڵە چوون لاڵان لاڵ بیم کەندەبی ئەو لاڵ حەکاکان جە سەنگ لاڵ جە ناوی لاڵ لەعل لالەڕەنگ هەر چەند کەنیشتم بە مەلاڵەوە چوون لاڵان لاڵ بیم وەلای لاڵەوە وە لاڵان لاڵان لاڵیام لاڵام ڕۆخسارم وەگەرد خاک پاش ماڵام ++++++++++++++++++++++ سەرناو: یاران من نەفەس یاران من نەفەس... پەی دیەن شەخسێ، پێم مەندەن نەفەس ئەر ڕۆیێ سەد جار، بوینوو ئەو کەس نە چەم مەبۆ تێر، نە دڵ ماچۆ وەس ئەوسا کە ملۆ، مەشۆ گیانم مەیەوە بەتەن، مەدۆ ژیانم سا با دوور نەبۆ، جە دیدەم ساتێ نەبا بە ئاهم، سۆچۆ وڵاتێ ++++++++++++++++++++++ سەرناو: یاران وە دیدەم ئەمساڵ نەووەهار یاران وە دیدەم ئەمساڵ نەووەهار چوون دەروونمەن، سیا سفتەی تار ئەو کەسێ واچۆ، ئینا خونچەی گوڵ من دوودی ئاهم، بەر مشۆ نە دڵ یانێ های جە خەم، تەمام دارانان نێشی خار بە جەور جەرگش خارانان وەی من سا ئەجەل، بەردەنش گیانم سا نەبیا بەی تەور، چەندێ ژیانم ++++++++++++++++++++++ سەرناو: یاران پەی ڕووی من بویندێ ڕەزان یاران پەی ڕووی من، بویندێ ڕەزان ڕەنگوو من زەردە، یا ڕەنگوو خەزان؟ خەزان کەی چوون من، زەعفەرانیشەن؟ کەی چوون من خەریک زیندەگانیشەن؟ ئەر سەد کەلێش باد، خەزان مەخێزۆ وەس نیەن نەپای نەمام مەڕێزۆ نەک بە وێنەی من، بە ئاه ئاهیرناک دوور جە باڵای تۆ، سەر مەنیۆ نە خاک ++++++++++++++++++++++ سەرناو: یاران ڕای تەواف یاران ڕای تەواف... ڕۆیێ دڵ کەردش، عەزمی ڕای تەواف نۆشا جامی عەیش، گیڵا قاف تا قاف پەی کەعبەی مەقسوود، ڕەوزەی نووری ساف چەند گیڵا وە کۆ، هەر شەو بێ یاوەر بارکێشی مەینەت، پڕ جە سەودا سەر چەند جە کلیسا، چەند جە خانەقاه چەند جە مەیخانەی مەستانی مەی خاه وێش موجەڕڕەد کەرد، پەی مەقسوودی خەیر تا هەفت تەبەقەی زەمین کەردش سەیر چەند بە فیکر وێنەی هەیئەتی پەروەر گێڵا هەفت گەردوون، گەردان سەراسەر هەرچی مەوجوود بێ نە کانی عەدەم دڵەی مرادجۆ، لێش نیا قەدەم ئاخر یەند گێڵا، نەدیش جە جایێ پەیدا بۆ پەی دین، مەقسوودش ڕایێ هانا بە جەستەی خەستەی کەفتەی وێش شەو تا ڕۆ جە عیشق، تەن نەسرەفتەی وێش بە سینەی پڕ دەرد، بە دڵەی پڕ هوون بە فکری تەمام، سەر بەرد نە دەروون سا کە دڵ زاناش، مایەش جە چێشەن جۆیای جانفیدای قیبلەگای وێشەن ++++++++++++++++++++++ سەرناو: یاران کێ دیەن یاران کێ دیەن... سەرڕشتەی خەمان، چوون من کێ دیەن؟ قامەتم وە خەم، ڕێزەی خەم بیەن ڕۆحم وە خەمناک، نە قاڵب شیەن ئوستادم خەمەن جە مەدرەسەی خەم دەرسی خەم وانان، جەلام بیەن جەم دەرسم هەر خەمەن، هەر خەم مەوانوو ‌‌غەیر جە خەم فێشتەر، هیچ نمەزانوو ئەسڵی من خەمەن، جە خەم بیەنان بابۆی من خەمەن، خەمان دیەنان هەر کەس خەمبارەن، بەیۆ جەلای من خەم چەنی خەمان زوو مبۆ ساکن ++++++++++++++++++++++ سەرناو: یووسف تۆ داری یووسف تۆ داری... جە خەزانەی خەم، تەمام تۆ داری پەردەی دڵ بە گاز ستەمی خاری پەی چێش؟ پەی دیدە خەمینی ساری سارایی سەرسام، سارایت کەردەن داخی دەردی مەرگ، نە پێوار بەردەن؟ نەگوفتەن بە کەس بە هیچ زمانێ حاڵ زان مزانۆ بە حاڵی زانێ بێ دەرد چێش زانۆ، چێش پەرێت ئامان؟ چوون بەردەن جەلات، سارایی، سامان ++++++++++++++++++++++ سەرناو: یووسف کەم نییەن یووسف کەم نییەن... جە بارگەی بابا، هیممەت کەم نیەن نە زەدەی دێوەن، نە سای پەرییەن لەیلێ جە جامدا زوڵفی وێش دیەن زوڵفی وێش بیەن، شنیان وەڕووی خاڵ جە سای زوڵفی وێش، پێش یاوان مەلاڵ جاڕ دام بە دێوان تەمام سەرزەمین یە سای گیانەن، یاوان بەو جەمین؟ دێوان گشت حاشا ئێمە بێ تاوان جێمە زەرەرێ، بەو خاڵ نەیاوان لەیلێ ساداریش جە زوڵف وێشەن گونای باباشێخ بێساران چێشەن؟ هیممەتت بەو کەس بیناکارانەن سەرمایەی سەودای دەردەکارانەن ++++++++++++++++++++++ سەرناو: یەک ڕەنگ زەنگی یەک ڕەنگ زەنگی... موژان هەزار زام، یەک ڕەنگ زەنگی هەر یەک هەزار زام، بە داوا و جەنگی مەکێشۆ، مارۆ، نە ڕووم دوو ڕەنگی میحرابی ئەبرۆی دووتاش تاق بەستەن پشتی چەند میحراب مزگی شکەستەن هەر کۆ میحرابێ جە سەر جەمینەن گشت پشت نە قیبلە، ڕوو نە جەمینەن بە دیدەی بیمار، شەفا پەیمانە تاقی ئەبرۆ کەرد وە بیمارخانە زوڵفانش بەیداخ، هەر یەند مەنەخشان عومری مەستانان، جە نەو مەبەخشان ++++++++++++++++++++++ سەرناو: یەک گوڵ دەستەیە یەک گوڵ دەستەیە... ئامان جە بەهەشت، یەک گوڵ دەستەیە بە کڵافی سەوز نەمناک، بەستەیە بیەن وە جەمین، ئاوات وەستەیە ئاڵەم ڕۆشەن کەرد، شەوقی ڕووی گوڵش مەدا بە هەوا، دەستەی سونبوڵش جە عەکسی شەوقش، جە هەوای نەمین دوو قەوس و قەزاش، کەفتەن نە جەمین گوڵ دەستە، دووتەڵ نەرگس ها تێدا قەوس و قەزاشان گرتەن بە وێدا یا شا، گوڵ دەستەی بەهەشتی وایە سابا هامڕازیش بۆ بە سەرمایە ++++++++++++++++++++++