شاعیر: موختار
کتێب: دیوانی ئەحمەد موختار جاف
سەرناو: بەهارە ئەمڕۆ وا کێو و بیابان گشتی ڕەنگینە

بەهارە ئەمڕۆ، وا کێو و بیابان گشتی ڕەنگینە
هەموو فەڕشی چەمەن ئێستە لە دیبائی ڕەیاحینە


گوڵە، گوڵباغە، سەوڵە، نێرگسە، شمشادی بوستانە
وەنەوشە و شەستپەڕ و گوڵ ئاتەشین و سەرو و نەسرینە


هەموو کەس دەستی یاری خۆی لەناو دەستا لە گوڵزارا
بە دەنگی بەربوت و چەنگۆ خەریکی بادەنۆشینە


بەغەیرەز من نەبێ ئەمڕۆ لە گۆشەی حوجرەیی تاریک
هەمیشە دەستەئەژنۆم و بەشم گریان و هەم شینە


گرفتارم بە دەردی عیشقی دڵدارێ کە وا ئەمڕۆ
بە خوێنی عاشقان دایم بەری پێی سوور و ڕەنگینە


لە عیشقی یاری غەدداری دڵئازارم هەموو ئانێ
ڕوخم زەرد و سەرم گێژ و دڵیشم مات و غەمگینە


دڵم بۆ باغی ڕووی ئەو بولبولئاسا زۆر پەشێو حاڵە
ڕەهی مەسدوودە چونکە زوڵفەکانی میسلی پەرژینە


لەبۆ سەیدی دڵی عاشق هەمیشە ڕشتەیی زوڵفی
شکەنج و پێچ و تاب و حەڵقەحەڵقە و پڕ خەم و چینە


ئەمن ئەمڕۆ لە عیشقا جێنشینی تەختی فەرهادم
نیگاری نازەنینیشم لەسەر ڕەفتاری شیرینە


ئەگەرچی تۆ نەخۆش و زار و بیماری ئەما ئەحمەد
لە لەعلی لێوی یار ماچێ لەبۆ ئەم دەردە تەسکینە

++++++++++++++++++++++