شاعیر: سالم
کتێب: دیوانی سالم
سەرناو: وەک دوڕڕ و عەقیق نەقشە دەندان و لەبی ئاڵت

وەک دوڕڕ و عەقیق نەقشە دەندان و لەبی ئاڵت
میسلی بەڕەزا پەخشە ئەگریجە لەسەر خاڵت


نارنجی زولەیخایە گۆی چاهی زەنەخدانت
تەوقی ملی شیرینە پاوانە و خڕخاڵت


پەنجەت لە حەنا مەگرە سوورێکی تەڵخڕەنگە
خوێنی دڵی من ئاڵە بۆ پەنجەیی شمشاڵت


بەخبەخ لە قەدی سەروت، چەند دڵبەر و مەوزوونە
سەیری کە چ شیرینە فێس و گوڵی دەسماڵت


گەر بێت و نیقاب لادەی فی الجمله دەبن دەردەم
مەحزوونی سیەه چەشمان مەجزووبی دیدەی کاڵت


بێ ڕەحم و جەفاکاری بۆ کۆهکەنی غەمگین
شیرینی زەمان ئامان! ڕەحمێ بە پەشێو حاڵت

++++++++++++++++++++++