شاعیر: سالم
کتێب: دیوانی سالم
سەرناو: بە ئەبەد جێگەیی من مەنزڵی جانانە نییە

بە ئەبەد جێگەیی من مەنزڵی جانانە نییە
ئاینەخانەیی شەه، مەسکەنی دێوانە نییە


ساقییا ساغەری من خومرەیە نەک ڕەتڵی سەبوک
دەرخوری مەستییی من شیشە و پەیمانە نییە


سەفەری هات و نەهاتە هەوەسی کۆیی حەبیب
گەردی ئەو شەمعە دڵا! تاقەتی پەروانە نییە


ئاشنای دوشمن و بێگانەیی خوێشن یاران
ئاشنای ئێمە شوکور مەیلی بە بێگانە نییە


دەستی قودرەتشکەنی خستە خەمی زوڵفی کەچت
هونەری ماشیتە و تەربییەتی شانە نییە


کوا کەریمێ بە کەرەم سوویی گەدا کا نیگەهێ؟ 
حەسرەتا لەم تەبەقە هیممەتی مەردانە نییە! 


بە حەیا بێرە حوزوور و بە ئەدەب سوجدە بەرە
خەڵوەتی دڵبەرە سالم ئەمە مەیخانە نییە

++++++++++++++++++++++