شاعیر: سالم
کتێب: دیوانی سالم
سەرناو: ئەو کەسە دایم لە دڵدا مەیلی بۆ ئازارمە

ئەو کەسە دایم لە دڵدا مەیلی بۆ ئازارمە
ڕۆژ و شەب بۆ تەندروستیی ئەو، دوعا ئیشعارمە


جۆشی گریەم ئەشکی ئاڵی وا بە دامەن ڕیتووە
دەشتی ڕەی تا دێتە بەرچاوم هەموو گوڵزارمە


سەتحی قەزبین و کەرەج تا بەندی جولگەی ئیشتیهار
شۆرەزاری هەر چی بێ فرمێسکی دیدەی تارمە


تا لە گەیلان بارش و تا تەم دەماوەند داگرێ
ڕێزشی ئەشک و هەناسەی سینەیی ئەفگارمە


موڵکی ڕەی، نەجد و منم مەجنوون و لەیلا دڵبەرم
بێستوون، ئەلبورز و من فەرهاد و شیرین یارمە


سیدقی پاکی بێتە ڕێم با موددەعی بگرێ کەمین
بۆ تەوافی کەعبەیی کۆی تۆ خودا سەتتارمە


یاری سالم کوا لە هیجرا ڕۆژ و شەو جوز یادی یار
مەیلی تەنهایی دەکەم تا یادی دڵبەر یارمە

++++++++++++++++++++++