شاعیر: مەولەوی کتێب: ئەو شیعرانەی دراونەتە پاڵی مەولەوی سەرناو: ئاخ فەڵەک جەدەس کەچ ڕەفتاریی تۆ ئاخ فەڵەک جە دەس کەچ ڕەفتاریی تۆ داد نە چەپگەردی و دڵ ئازاریی تۆ هەر سات ئەساسەی دەردێ مەسازی هەر ڕۆ بە ڕەنگێ نەردێ مەبازی من خۆ تاڵە شووم خەستەی زام خەتەر زەردەی خەدەنگان هیجران دڵبەر دیدە پڕ ئەسرین، دەروون پڕ جە تەم کەفتەن نە ڕووی تەوق بەندیخانەی خەم دڵ ئالوودەی هوون، تەن بارکێش دەرد زوان لەنگ و لاڵ، ڕەنگ خەزان زەرد تۆ بەو بێڕەحمی ئازیزیچ وەی مەیل دڵەی کۆس کەفتەی منیچ جە هوون کەیل سا با ڕەحمەت بۆ چەواشەی بەدخۆ تۆیچ چەرخت چون وەسڵ ئازیز کۆتا بۆ ++++++++++++++++++++++ سەرناو: ئازیز بێ مەیلیت زیندەگیم تاڵ کەرد ئازیز بێ مەیلیت زیندەگیم تاڵ کەرد بێمۆبەتیت حوکم شادیم بەتاڵ کەرد هیچ ئیلتیفاتێ نەدیم پێتەوە هیچ نەدیای وەلای کوشتەی وێتەوە دووی ئاخم جە داخ بێموبالاتیت قرچەی دڵ نە دەرد کەم ئیلتیفاتیت ئەو سەر وە سای چەرخ هەفتەمین ساوا ئێد سەداش وە گۆش مەلەکان یاوا هەر کاتێ زانای جە گشت ویەردم تۆمار یاریت نە دڵ تەی کەردم یا ها بیناییم، ئاواتە وەستەم جە سەردیی مەیلت گڕ کەفت وە جەستەم ئایرم نیا وە کۆی وەفاوە دام وە بێ ئەندێش تەن وە جەفاوە یەک جەستەی خەستەی عەلیلم مەندەن پارچەی ئیستخان زەلیلم مەندەن ++++++++++++++++++++++ سەرناو: ئازیز فیراقت دڵ کەردەن وە هوون ئازیز فیراقت دڵ کەردەن وە هوون سەر کەردەن نە چەم ئەسرم چون جەیحوون کەشتیی وجوودم تۆفانی کەردەن تەختەپارەی ڕۆح وە عەدەم بەردەن خول مدۆ نە گێج مەوج فەنادا ئەجەل مەکێشۆم وەی لا و وەولادا زیندەگیم پەی مەرگ هانە تەدارەک ئومێد حەیات قەتعەن، وەبێ شەک دەروازەی فەرەح یەکجار مەسدوودەن ماتیم وەش دەماخ، ئومێد نابوودەن هام وەسەر قوللەی خەوف و ڕجاوە نمەز ڕام ئەی لان یا خۆ ئەو لاوە؟ نەسیب بێنەسیب جە بەهرە و شەوقەن خەفەت نە بەزمەن، شادی بێ زەوقەن لێم تاقی نییەن ئا جەورە جە کۆن موغەننی دەوام لەرەی کزەی تۆن بەی ناڵەی حەزین لێوێ بەرەوە چون ئامای خەیاڵ مەحوم کەرەوە: غەمەن ڕەفێقم، غەمەن هام دەمم غەمەن هام مەجلیس عەزا و ماتەمم ++++++++++++++++++++++ سەرناو: ئامان هامسەران دەردم کارییەن ئامان هامسەران دەردم کارییەن دەرمان دەردم نادیارییەن دەردم مەزانی یا بواچوون پێت؟ وەر نمەزانی ئیزهار کەروو لێت وە تیر مەودای فەڵەک پێکیام وە دەرد دووریی ئازیز دڵ بڕیام فەناش کەردەوە دەست وە عەدەم دا فانی زانووی دەرد وە ڕووی ماتەم دا ئەو جە عەشق بەشق سەرزەدەی دەردان ئێد جە تاش وستەی سەیر سەرهەردان زڕیا و پێکیای دەرد چەنی ئەغیاران منیچ نە جوملەی مەزەننەی یاران ++++++++++++++++++++++ سەرناو: ئاینەی زهوور سیفات غەیبی ئاینەی زهوور سیفات غەیبی مەکان تلووع سیڕ «لاریب»ی بورهان قاتیع ئیسبات هەستی داروو پەی دەماغ خودبینی و مەستی وەی دیمەی حوسن، وەی نماناوە بوور دڵ دیسان ئایر ساناوە بەند بڵێسەی شەوق لێم کەردەن ئەسەر جە لوولەی پێشەم گڕ مەیۆ وەبەر تەمام ئەعزام نەڕووی پەردەی پۆس مەشغووڵەن وە زیکر ئیسبات یا دۆس غەیر جە حایلێ هیچ نییەن باقی وادەی دەورەتەن هانا هەی ساقی مەستم کەر وە جام بادەکەی سەرشار تا کەس نەزانۆ منەنان یا یار ++++++++++++++++++++++ سەرناو: ئیشارەی دیدەی نیگای پڕ هەیبەت ئیشارەی دیدەی نیگای پڕ هەیبەت دەنگ دەنگ سا دەور دەر، تا وادەی فرسەت بەو گرد چاوە دۆس شناسەوە بەو لیباس عەیش مودبرماسەوە ++++++++++++++++++++++ سەرناو: ئیمشەو دیارەن دەردم کارییەن ئیمشەو دیارەن دەردم کارییەن ھووناو جە زامم چون سەیل جارییەن ئاوازەی مەینەت نە دەروون سەد تەرز چون چلچەنگ وە چەنگ خەمان بیەن بەرز بێ ھۆشی جە ھۆش، کەم فامی جە فام وە ھەزار مەقام مەدەران جە فام سا نەیچی دەخیل، بێ دێر و درەنگ موتریب فیدات بام دەس بدەر وە چەنگ کەف بدەر ئەو دەف، پەنجەت نە ڕووی نەی بە وێنەی باربود جە بەزم ئارای کەی نەکیسا ئاسا دەس دەر وە سەمتوور دەف و نەی و چەنگ باوەر وە حوزوور چلچەنگ وە سەر چەنگ لێدەر دەرقەرار وە ھەزار دەستان بنوازەم ئەمجار وێت بە حەقیقەت مەست بکەر جە مەی سازان بسازە پەی واوەیلا و وەی کەف بدەر وە دەف، چنگ بدەر وە نەی ھیچ مەواچە کەی، تۆ خودا سا دەی بەو ئاواز بەرز خاس بکەر ڕازان بە عەشق ئازیز نازک ئەندازان جۆش دەر وە ناڵەم، کۆڵ دەر وە دەردم ھۆش دەر وە خەمان، گۆش دەر وە فەردم ئازیز بێ خەبەر، مەینەت با خەبەر چەنی ڕۆ مەیۆ الله اكبر ++++++++++++++++++++++ سەرناو: ئیمشەو وە کەردەش دڵ بێ پەردە بی ئیمشەو وە کەردەش دڵ بێ پەردە بی مەفهوم جە ناڵەش ئەی دوو فەردە بی ئەی خام بێ مەغز، هەر پۆسەکە وێم کۆس بەدنامی کۆس کۆسەکە وێم جە جەردەی هەوەس نە ڕەستەکە وێم نە هەردەی عەبەس دەست بەستەکە وێم هانام هەر وە تۆن ساقی جەمین جام ئیحیا کەر وە ناز، جە مەی، مەردەی خام چەنی خەفای چەم بدەر وە دەستش وەی وەی وە ئەو مەی یەکسەر کەر مەستش شێوەی دانەی خاڵ نە تۆی جام مەی نەشئەی مەزەی تۆم بدەوش پەیا پەی مەست بوون تا مەحشەر وەی ئارەزووی یار جە نەفخەی هاوار دڵان بۆ بێدار بەڵ خامی و عەبەس، بەدنامی و هەوەس هەنی نە ئاڵەم نەزڕناش جەرەس ++++++++++++++++++++++ سەرناو: ئەر سەد نامت نەقش تۆی زەمیرمەن ئەر سەد نامت نەقش تۆی زەمیرمەن بەڵام چ حاجەت وە تەقریرمەن ئەڵبەت نە سایەی موژەی نازاران سەبحەسان دڵان ڕا وە هەم داران ++++++++++++++++++++++ سەرناو: ئەڵعەجەب دیدەم عەجەب یە چێشەن ئەڵعەجەب دیدەم عەجەب یە چێشەن چەن ساڵەن وە تیر موژەت دڵ ڕیشەن قەترە قەترەی زووخ سەنگ نە بەر تاوان هێمای پزیسکش وە لات نەیاوان ++++++++++++++++++++++ سەرناو: ئەڵماس ناوەک مەودای حەجەرسوم ئەڵماس ناوەک مەودای حەجەرسوم تا پەڕ نە ڕیشەی جەرگم بییەن گوم نە جای پەیکانان زەهراڵووی فەڕەنگ تک تک مەتکیۆ زووخاو وە سەد ڕەنگ حەکیم مەوینۆ سەرسام مەمانۆ لاحەول نە ڕووی زام سەختم مەوانۆ ماچان زەدەی دەس پەری سەرئاوەن زەخم خەدەنگەن وە مەرگ نزاوەن سەر نیام وە ئێش من چەنی زامەت کەفتەن ئەو دیوان سارای قیامەت ++++++++++++++++++++++ سەرناو: ئەی هۆ چەن سەر چنگ چەرخ چەپ وەردم ئەی هۆ چەن سەر چنگ چەرخ چەپ وەردم چەرخ چەن چەرخیا من مام نەمەردم یە گەردوون مودام گەردەلوولەشەن دڵداران، دڵ دەن، های چەند توولشەن ئاڵەم بەرکەنار، وێم بە حاڵ وێم ئای چەن گیان سەخت بیم چەن چەرخش دا پێم ئەوەڵ بارخانەی بەدبەختیش ئاوەرد هەر وێم مەزانوو چۆن باربەندیش کەرد مجری میهرش کەرد نە شادی پڕ وە بار ئیبلیس پەردەی حەیا دڕ ئاوەرد پارچەی بەد پۆشا نە وەرم ڕوو سیا، ڕەنگ زەرد سەر تا کەمەرم نزوول کێشا دەست بەختم ئەو ڕای بەد پای ئەدەب نە ئەرک عادەت کەردم ڕەد ڕێزە کەرد شیشەی بەزم بیساتم زرنگیا زەنگ، بەرد نەهاتم پارەی پەرەند کەرد مینام وە مەینەت بادا لە تەرەی بەینەت جە مەینەت ئەی سەر تا ئەو سەر خول ئاوەردەوە هەودای هەم و غەم مەحکەم کەردەوە ئیسە نە عەیشەن، نە سروور، نە ڕاز نە دائیرە و دەف، نە چلچەنگ نە ساز یەکسەر پەردەی چەرخ چون ئەهل کارەن ماڵاو بەرد، هەر عەکس تاپۆم دیارەن باز هەم کڵافەم چون بەدڵەی دەروێش هەر چەرخم مەدۆ چەنی چەرخ وێش هەی چەرخ وە بەدی وێت گرفتار بی هەر چەرخ بدەری هەر تا دیار بی شەرت بۆ چون چەنی یووسف بەدکاری تۆ ئەو چەپگەردی، من ئەو بێعاری ++++++++++++++++++++++ سەرناو: با «قُلتُ» نەوێ لە کەلامتا سەبارەت: ڕەخنەیەک لە شێخ قادری سنە، کە ڕاڤەی کتێبی «تهذیب الکلام»ی تەفتازانیی کردبوو و تێیدا «قلت» (واتە «وتم»)ی زۆر بە کار هێنابوو. با «قُلتُ» نەوێ لە کەلامتا نەک نەدامەتی بێ وە شانتا سەد ساڵ بیوڕی و کلکی هەڵپاچی لە دەس ساحێو ماڵ هەرگیز دەرناچی ++++++++++++++++++++++ سەرناو: بڵێسەی ئاهیر نە دەروون خێزان بڵێسەی ئاهیر نە دەروون خێزان ناڵەم «الفراق» یەعقووبی بێزان تەریدەی هیجران بەیدی جیایی گرتەن گەردەنەی ڕای ئاشنایی تەم خەم یانەی دڵ تاریک کەردەن ڕای ئامان لای تۆ جە یادم بەردەن مەگێڵوون نە گێج بەحر ماتەمدا هەر خەمەن مەیۆ وە بان خەمدا خەمەن ڕەفێقم خەمەن هامدەمم خەمەن هەمسوحبەت عەزا و ماتەمم خەم زۆرش گرتەن بە وێش مەنازۆ ساقی بۆ وە عەشق ئایەی وەمتازوو پڕ کەر جامەکەت پەیاپەی جە مەی پێم دەر تا ڕیشەی هەستیم کەرۆ پەی سوڵحێ دۆ نەبەین هەستی و فەنادا وەس خەیاڵ بەرووم بەی لا و بەو لادا ++++++++++++++++++++++ سەرناو: بەهەشت باقی دین دڵبەرەن بەهەشت باقی دین دڵبەرەن جە قیسمەتخانەی ئەمن ئەو دەرەن سا کە وەی دینەن بەهشت باقی ئیسە من بەی دین، دۆزەخیم تاقی ++++++++++++++++++++++ سەرناو: تاقی خانەقای دڵ پڕ وەلوەلەن تاقی خانەقای دڵ پڕ وەلوەلەن تاس کەللەی سەر پڕ نە هەلهەلەن فیکرم نە تەزهیب نەفس و ئیسباتەن خەیاڵم مەشغووڵ شەرح سیفاتەن عەکس تەجەللای مەشعەل ڕووی دۆس شەوق مەدۆ چون شەم نە فانۆس پۆس توور تەن شۆڵەی جەزبەی حەقیقەت کەردەن وە سورمەی دیدەی مەعریفەت تا خاس عەقیدەی ئەحواڵ موکحەل بۆ نەوا قورس نوور ئیخلاسم کەل بۆ دووبینی ڕای ڕاس وەرنەدەی جە دەس مەبۆ وە باعیس توغیان هەوەس یەک ڕەنگی مایەی ڕستگارییەن ساقی دەی جامێ دەردم کارییەن دەمێ قەوی کەر زەعیفی تاڵەم بەڵ دەمێ کەم بۆ ناڵەم جە ئاڵەم ++++++++++++++++++++++ سەرناو: تۆی دەروون وە نێش زامان خەتەر تۆی دەروون وە نێش زامان خەتەر کەیلەن جە هووناو مەوجش وست نە سەر هاژە وست وە سەر، گشت کۆنە زامان کولیانۆ جە نۆ سەر کەرد نە دامان کزیان و چزیان قرچەش دا نە جەرگ قەڵوەزەی زووخاو ڕەنگین کەردش بەرگ وەشتەرەن ئازیز مەرگ جەی ژیانە هەر ساتێ سەد ڕەنگ مەگری بەهانە جۆی زووخ جاریەن شەو جە زامانم تەڕەن وە ئەسرین ڕۆوان دامانم ئازیز سا وەسەن ئاخر نەفەسەن چکەی زووخ جەرگ، هەرس چەم وسەن ++++++++++++++++++++++ سەرناو: تەسکین دڵەی پڕ جە خارەکەم تەسکین دڵەی پڕ جە خارەکەم دەرمان زامان بێ قەرارەکەم نامەکەت کیاست وە لای من یاوا پەیاپەی نە ڕووی دوو دیدەم ساوا دەروونت وە کوڵ جۆش ئاوەردە بێ کزەی دووریی وێت ئیزهار کەردەبێ دێوناتەوە دەرد، کوورەی دەروونم کولناتەوە زام، دڵەی پڕ هوونم نمازی ساتێ ڕاحەت بوون پەی وێم دەک بێبەڵا بای چێش مەکەری پێم من خۆ کەم زووخاو هیجرانم وەردەن ئەمجار کزەی تۆیچ تەمامم کەردەن ++++++++++++++++++++++ سەرناو: تەڵاکەی جەمین قاڵ بۆتەی عەشق تەڵاکەی جەمین قاڵ بۆتەی عەشق پەی ئوستادەکەی ئەکسیر سەرمەشق کەردەن وە مەفرەغ بۆق سەفرای دەرد خەریدارەکەم مەیلش کەردەن سەرد سەر تەرکیبەکەی مەجرای میهر و مەیل سەوداش لادۆ شەو نە جەستەی کەیل تا ئەشرەفی ڕەنگ سککەی زەرب جەور چەنی مروارید سەدەف کاسەی سەور وەخت عەرز حوسن ئەر ڕێزۆ سەروەش لێم قەبووڵ کەرۆ جە باتی پێشکەش مەعلوومەن زەڕێ ناڕەوای شار بۆ تا قبووڵ تەبع ئەهل بازاڕ بۆ کەس جە خاس و عام نمەگنۆش نەوەند جە هەر دیارێ مەبۆ وە ڕیشخەند بەڵ جەو کەمینەم جە زاڵ یۆسوف پەی قەڵبی مایەم کێشۆ تەئەسوف وەس نییەن جە بەین بەزمەکەی یاران ماچان ئێدیچ یۆن جە خەریداران ++++++++++++++++++++++ سەرناو: جە قەهقەهەی ڕەعد مینای هەور تار جە قەهقەهەی ڕەعد مینای هەور تار نە مابەین بەزم ڕۆح ئەفزای وەهار فەڵەک لەب ڕێزەن پیاڵەش جە مەی خەم کەردەن قامەت مەواچۆ ها دەی نەرگس سەر نە جام لالە نیانش مەسەن وە مەی عەکس خەمزەی نیانش وەنەوشە ئەو خاڵ پێشانیش دیەن سەر نە یەخەی فیکر هەم شانیش شیەن مەششاتەی قودرەت جە هوون عاشق سووراو دا وە ڕووی چووزەی شەقایق سۆسەن سەد زوان ئاواش سەد تەرزەن نەوای هەی شادی، هەی شادیش بەرزەن سونبوڵ بە وێنەی دەس زەدەی تڵفەن تاتا جە هەمتا هەمتایی کڵفەن سەمەن غەنی نەقد شێوەی ئەو ڕووپۆش جەو پەی جورعەی نۆش، نەسیم پەی سەرخۆش بەڵام دڵ جە ئێش خەم هەر مەدۆ چڵ دیدەش سیوای خەم کەی وینۆ نەو گوڵ؟ نەرگس ئەو بیمار پەردەی دڵ ڕێشەن چەنی دەرد عیشق دایم خدێشەن غوسسەی دووریی خاڵ ئەو گۆنای گوڵ بێز خەم کەردەن گەردەن وەنەوشەی پەڵ دێز شەقایق نە هوون بەرگش کێشاوە چون دڵ وە نێش موژەش ئێشاوە جەم جەم سۆسەنان جە لانساران نە مەسئەلەی خەم گفتگۆ داران تەوق تەوق سونبوڵان نە جام ڕاخان پەخش و پەشێوەن، پەخشەن پەی داخان جوق جوق سەمەنان تەن سپی بێگەرد عوریان وێنەی قەیس مەگێڵان نە هەرد موتریب وە میزراب ڕیشەش پەی کەردەن نەی وە نەوایێ مایەش وەی کەردەن جە ئاواز بەرز بەخت بەد تاڵەش وەی حوزوورەوە شەرارەی ناڵەش گەردوون بەزم خەم کەردەن پەرێش ساز یە ڕەقس، یە ئاواز، یە نەیچی، یە ساز شیشە و قەهقەهە و شیشەی خەم پەیکەر ساقی بە جامێ ڕیشەی خەم پەی کەر بەزم خەم سازاش بدەر وە هەمدا مەیل بیناییش باوەر وە چەمدا بەڵ دڵەی لێڵاو، چەم چڵ کەردەی خەم گوڵ وە گوڵی وێش بوینۆ وە چەم ++++++++++++++++++++++ سەرناو: جەمین ڕەشک جام جەم نمای جەمشێد جەمین ڕەشک جام جەم نمای جەمشید ڕەوش سەنجەکەی قورس ما و خۆرشید جەو ساوە خەدەنگ موژەت دڵ کاوان کوورەی فیراقت کۆی سەبرم تاوان زایفیم گرەو جە هەوا بەردەن دیدەم ماچی حەب بید ئەنجیر وەردەن یاوەرم نامان نە کەمەر یەک چەم جە تاو ڕادار سوڵتانەکەی غەم نە تەقویم چەرخ شەوان تا سەحەر پەی زایچەی وەسڵ مەشماروو ئەختەر نە هیچ بورجێدا نییەن ڕای نەجات غەیر جە نیشانەی فەنا و هەم مەمات جە خەوف هیجران مەلەرزوون چون وی هەر کاتێت زانا ئەجەل پەیدا وی جڵەو وست پەی تاخت ئیقلیم بەدەن گیان بە ئەسیر بەرد پەی ئەسڵ وەتەن جێ مەیچ هاڵی بۆ گۆشەی مزگی و دەیر هانا موغەننی یادت بۆ بە خەیر جە کۆن چریکەی جەلای زەنگ ڕووح؟ سەماعش پێمان مەدۆ سەد فتووح بۆ لابەر وەسواس شەحنەکەی حەواس وە کزەی گیان سۆز مەقامەکەی ڕاس بەڵکم عەکس نوور زات بێ سیفات خەدەنگێ هەنیم بکەرۆ خەڵات بێ نامە و عەمەل نەشوون وە مەحشەر پێم بۆ نیشانەی بێڕەحمیی دڵبەر ++++++++++++++++++++++ سەرناو: حوققەی خەزێنەی تەجەللای زاتی حوققەی خەزێنەی تەجەللای زاتی مەکتووب تەفسیر شەئنی و سیفاتی مەوج مەدۆ زهوور نوور حەق تێدا هەر وەک مەشعەلێ مەویەرۆ پێدا هەر عوزو ئەعزام ئیسبات فیکرێن هەر عوزوێم نە عەین ڕابیتەی زیکرێن تەمام بەدەن، مەغز و ڕەگ و پۆس مەشغووڵەن بە زیکر ئیسبات یادۆس وجوودم یەکسەر خاڵی جە غەیرەن تەنیا عەکس یار تێدا نە سەیرەن هەستی و نیستی بەبێ تەوفیرەن نەیچی هەر تەرزێ یا ها دڵ گیرەن لێدەر با جەم بۆ پەشێوی هۆشم ناڵەی حەزینت بەیۆ نە گۆشم تەئسیرش چون مۆم تاونۆمەوە وە ئەسڵ مەتڵەب یاونۆمەوە ++++++++++++++++++++++ سەرناو: خاڵۆی تەسکین بەخش دڵەی پڕ دەردم خاڵۆی تەسکین بەخش دڵەی پڕ دەردم نەسیم ملەی مانییای سەردم یەک ڕۆ تاو هەرەس دیدەم سۆڵش بی باد هەناسەم گەردەلوولش بی پیران بەر وە حاڵ سێرەی منداڵی نەتیجەی کڵپەی خاڵۆی زووخاڵی ئەو ڕۆ نامەی ئێش، شەوان نەسرەفتم یەکسەر وانامۆ وەرەهەن کەفتم پەی چێش دەروونت وە جۆش ئاما بێ جە نامەی وەڵین پێسەت فامابێ: گۆیا وەتاقی تۆم بێ مەیل وانان یاخۆ تۆم وەدڵ وە دڵسەرد زانان هەی ڕۆ مەر ئاگات جە دۆستی نییەن؟ ڕەویەی یارانت جە خاتر شییەن چون یارێ کوورەی دەروون جۆش دەرۆ یاد یار وێش وە دڵ باوەرۆ ئارەزوومەند بۆ پەی ڕێزەی ڕازش تەژ نەبۆ پەی ڕاز دۆستی نەوازش ناعیلاج مەشیۆ وێش بێدەنگ نازۆ پەی تەقریب یەک چێو بەهانە سازۆ یا مەواچۆ گیان، یا ماچۆ زووخاو چی بکەرۆ دۆس بەیۆ وە جەواو؟ من فامم یەکسەر نە دەس وەردابی شەوق بێ سامان تۆ لێم سەر دابی ئارەزووم ئامای نامەکەی تۆ بی تەمەننام ڕەشحەی خامەکەی تۆ بی پەوکە وە خدمەت بێئەدەبیم کەرد تا نامەت بەیۆ پەی ساکنیی دەرد وەرنە سا ڵاڵ بوون بێمەیلت زانوون وە بەرد سەرد بوون، ئەر سەردت وانوون من میعیار دڵ هەڕ کەفتەم تۆنی من خووی فێنکی تۆی سفتەم تۆنی دارەکەی سەرکەن حاڵ پەشێو من وە بادەی مەینەت دیواو دیو من ڕیشەم ئەر وە مەیل تۆ نەبەستەبێ وە مەرگت سەد جار هاژەم بەستە بێ ++++++++++++++++++++++ سەرناو: خاڵۆی سەردەفتەر نازک خەیاڵات سەبارەت: مەولەوی ئەم نامەیەی بۆ خەلیفە کەیخەسرەوی ئیمامی نووسیوە خاڵۆی سەردەفتەر، نازک خەیاڵات دیباچەی کتاو، ساحیب کەماڵات سەواد نامەی سورمەسات یاوا دڵ وە مێڵ مەی وە دیدە ساوا بیناییم وە چەم باز ئاوەردەوە مەردەبیم دیسان ئیحیام کەردەوە تەن زەلیل، دڵ دیل، بەدەن عەلیلەن چەمەڕای ڕاگەی ڕای ئیزرائیلەن ڕا تاریک و دوور، مەنزڵ خار و سەنگ بێ تۆشە و چرا بێ ڕەفیق دڵتەنگ مەر وە بۆی نەفەس خاڵۆی گیانیوە یا بە سۆز پیر «تاڵەبانی» وە بویەروون وەرنە ڕای گوزەر تەنگەن قافڵەم تا قام قیامەت لەنگەن ++++++++++++++++++++++ سەرناو: خوەرشێدەکەی بورج مەلاحەت سپیهر خۆرشیدەکەی بورج مەلاحەت سپیهر دوور کەفتەن جە خەت ئیستیواکەی میهر گەرمەسێر دڵ کەردەن وە لەیلاخ کڵێڵەش هۆردان دەمەی ئاخ و داخ تۆف زەمهەریر زەلان ناڵەم کەردەن وە بریان پای سەعی تاڵەم فورات دیدەم تەمام یەخ کەردەن گردین ئارەزووم وە سەرما بەردەن تای ڕشتەی موژەم وە قەترەی ئەسرین پڕ بیەن جە دوڕ چون خۆشەی پەروین ساعیقەی دووریت هۆر تکنا ئازام دەخیلم ساقی جەمین ئاهیر فام جەو سەرجۆش خۆم جامێ نار تەڕ با گرەو بەرۆ گەرمیش جە ئەخگەر پێم دەر تا پەردەی یەخ کەردەم بۆ گەرم موتریب وە پەردەی ڕوبابت بێ شەرم واچە مەهڕوویان وەفاشان نییەن کێ جە عەهد گوڵ دەوامش دییەن؟ ئەووەڵ منمانان وێشان وە بوڵبوڵ سەد پەیکان خار مەپێکان نە دڵ جەو دما پای شەرت مەکێشان وە پەس بوڵبوڵ جە گوڵشەن مەمانۆ بێکەس فیدات بام نەیچی کەسم هەر تۆنی حەکیم زامان کۆنە و هەم نۆمی لێدەر مەقامێ دڵ باوەرۆ دەرد ئازیز سڵامەت، من ها کۆچم کەرد ++++++++++++++++++++++ سەرناو: دانا وە ئەسرار عیجز و نیازم دانا وە ئەسرار عیجز و نیازم مەجلیس ئارای بەزم، شای شەکەرڕازم ئەنیس مەجلیس عەیش و نەشاتم دەسگیر ڕاگەی هات و نەهاتم دەلیل وێڵی بیابانەکەم قاسید پەیام دیدە و گیانەکەم ئاوییارەکەی سەوزەی ئارەزۆم دانا وە گردین ڕاز کۆنە و نۆم تۆ وێنەی بوڵبوڵ مەست هەوای گوڵ من چون بادە مەس چەنی سەودای دڵ نییەن حەکیمێ دەوایێ کەرۆ یا وە نەوایێ خەمان لابەرۆ ئومێدم بە تۆن فەریادڕەسیم کەر بۆ نە گێج غەم باوەڕم وە بەر ئەر ناری تەشریف ئینە ها مەردم داخ باڵای تۆ وە گڵکۆ بەردم ++++++++++++++++++++++ سەرناو: دووکەڵ قلیان وەش نەفەسێوەن دووکەڵ قلیان وەش نەفەسێوەن ئەڵقەش بە وێنەی زوڵف کەسێوەن وەختێ هورمزۆ، مەمەدرۆ خەیلێ ئەڵقە مەپێکۆ، چون زوڵف لەیلێ ++++++++++++++++++++++ سەرناو: دڵە دیارەن بێقەرارەنی دڵە دیارەن بێقەرارەنی خەیاڵ سوحبەت ڕاگەی یارەنی ئەر سەد دەوڵەتمەند جە خەدەنگەنی بشێ گیان نە دوڕ دڵ جە سەنگەنی بەڵام پەی کەسێ دڵ پڕ جە تاسەن هەمسایەی یانەی دەوڵەتمەند خاسەن منیش سەروەشم وە ڕەفیقی تۆ وەر ملی چەنیش خودات چەنی بۆ من بازە وە دەرد هیجران باڵاش ئانە تۆ و سوحبەت گەرد پا و پاڵاش بەڵام ویرت بۆ وەی فەقیرەوە چون تلیای وە زام مەودای تیرەوە ++++++++++++++++++++++ سەرناو: دیدەم ئینتیزار پا و پاڵای تۆشەن دیدەم ئینتیزار پا و پاڵای تۆشەن وە گەرد پاڵای تۆ مەبۆ ڕەوشەن پات وە پاڵاوە با ناڵچەدار بۆ بنیەر وە ڕوومدا داخش دیار بۆ ++++++++++++++++++++++ سەرناو: سا چۆن دڵ وە شاد دڵشاد نەبۆ شاد سا چۆن دڵ وە شاد، دڵشاد نەبۆ شاد گیان جە زەمانەی ئەلەست نارۆ یاد؟ ڕۆح چەنی جە تەن ڕەهایی نەبۆ؟ تەن چەنی جە ڕۆح جودایی نەبۆ؟ ئازیز وە کەرەم نام من بەردەن گوڵ پەرێم بەدڵ ڕەوانە کەردەن نەمەندەن جە لام ئەسڵەن غوسە و دەرد جە قەڕنێ یەک ساڵ ڕاس گێڵا چەپگەرد فەڵەک، تا ئازیز خەیمەی خەمان بۆ وەهار عومرش وە بێ خەزان بۆ من کێنان وە مەیل وە یادم باری؟ ئومێدم ئێدەن جە دەرگای باری تا قاف پەی دنیا چون شیرازە بۆ سەرمایەی عومرت هەردەم تازە بۆ ++++++++++++++++++++++ سەرناو: ساقی سا وە یاد ئێمە و هام فەردان ساقی سا وە یاد ئێمە و هام فەردان وە عیشق مەستی گەردەن بێگەردان بدیە یە وادەی بادەنۆشانەن دڵ پڕ جە خەیاڵ مەی فرۆشانەن یاران وە دڵواز مەجلیس بەستەوە دیدەنی ئازیز ها وە دەستەوە ++++++++++++++++++++++ سەرناو: سەدای های هیلال ڕۆزەدارانەن سەدای های هیلال ڕۆزەدارانەن مانگ دڵتەنگی بادەخارانەن کوورەی تەراوێح سۆفیان گەرمەن سەدای چەنگ و نەی ڕەندان وە نەرمەن مزگیان مەعموور وازەن دەروازان زاهیدان وە زیکر وێشان مەنازان مەیخانە وێران دەرگا نەبەستەن مەستان جام ساف مەیشان وە دەستەن هاوارمەن، مانگم لێ نادیارەن نە ژێر پەردەی تاردا پێوارەن یەک سیا هەورێ ڕووش گرتەن وە تەم برج ئەو برجمەن نمە گنۆم وە چەم ساقی سا جە قین پەرهێزگاران پیاڵەت پڕ کە جە مەی چون جاران تۆ بەیۆ پیاڵەی مەست دوو دیدەت بنمانە هیلال ئەبرۆی خەمیدەت نیگا دەر وە ناز وە یارانەوە بڕێزە وە دەم مەی خوارانەوە مورید و سۆفی خەرقەی ڕیا پۆش من و دامنەی پاک پیر مەی فرۆش هەرکات چەنی دۆس وێمان نە مەحشەر وە سەد ئارەزوو سەر بارین ئەو بەر بزانین کێمان ڕاگە گوم کەردین کێمان مایە پووچ کێمان سوود بەردین ++++++++++++++++++++++ سەرناو: سەراپای ئازام ئێسک و مەغز و پۆس سەراپای ئازام ئێسک و مەغز و پۆس دایم مەیۆ لێش زایەڵەی یا دۆس دۆسەن نە تۆی پۆس مەواچۆ یا دۆس وەرنە کێ دیدەن سەدا بدۆ پۆس؟ ++++++++++++++++++++++ سەرناو: سەرمەودای قەڵەم حەکاکەکەی عەشق سەرمەودای قەڵەم حەکاکەکەی عەشق نەقست نە عەقیق دڵدا کەردەن مەشق زهوورت کەردەن نە مەغز و پەیدا چون قووەی نەشئە جە عەین مەیدا تەمام ئازام مەملووی مەیل تۆن لێم حاڵی نییەن هەستی وێم جە کۆن زمان تەوبێخ نمەکەرۆش پاک ئەر سەد تیغ بەیۆ سینەم کەرۆ چاک کائینات جە لام گرد تەسویر تۆن ئەر بانەن، ئەر دەشت، ئەر شاخەن، ئەر کۆن مەر سەرسمان و جەورەکەی قەزا عەکست نە بینای جەستەم کەرۆ جیا وەرنە تا حەیات عاریەتم مەندەن ئەجەل بنچینەی نەسیب نەکەندەن هۆش و خەیاڵم دایم جە لای تۆن ویردم زیکر تۆن ئەر شەوەن، ئەر ڕۆن تاقەت نە کانوون عەسیق جگەر کەردەن وە ئەکسیر دەرد پر خەتەر نە قابلەی دڵ سعوودش کەردەن مەنفەز دیدەم نیگاش نە دەردەن کەردش وە تەڵا مس ڕوخسارم بیەن وە باعیس گەرمی بازاڕم هەر کەس مەوینۆ مەشناسووم دەردم مەزانۆ نە عیلم وەفادا مەردەم خاکم نەم داوەی مەوتەن جە ئەزەڵ سەبتەن نە کەللەم یەک ڕەنگی ئەوەڵ پایەداری عەهد خاسەی زاتمەن سەربازی پەی دۆس نە سیفاتمەن سەرف ڕای یاران تا گیان بۆ باقی ئومێدەواریم دەورەی تۆن ساقی پێم دەر نا فالج قەڵع تەن بەرۆ ناسەرەی قەڵبم وە خالس کەرۆ ڕەواج بازاڕ سەهبا نۆشان بۆ داخڵ وە مەجلیس خەرقە پۆشان بۆ ++++++++++++++++++++++ سەرناو: شەوق شادی نۆ شەوق شادی نۆ شەوق شادی نۆ، شەوق شادی نۆ بینای کار خەیر، شەوق شادی نۆ عەجەب ئاهەنگێ تۆ وە پا کەردی عەجەب ئەساسێ وە هەم ئاوەردی هەی هەی جەی شۆڕش ڕۆح ئەفزای خاسە بەخ بەخ جە شادی شیرین ئەساسە فەڵەک نەشێونۆ ئەی بەزم تازە ئەی بازاڕ عەشق ناز وە ئەندازە یاران، هامسەران، ئەی دەردەداران هەی گرۆی مەینەت، دەخیل غەمباران هەر کەس ئارەزووش نەزەربازی بۆ مەیلش وە مەیدان تیرئەندازی بۆ بەیان، بوینان، بزانۆن ڕاسەن یاخۆ من سەرسام هۆشم وەسواسەن یا غەوغای مەحشەر هجوم عامەن یا زەلزەلەی گەرم «یوم القیام» ەن بەزمەن، بساتەن، نەزمەن، ئاهەنگەن ڕەقسەن، ڕەققاسەن، چەقانەن، چەنگەن وادەی ئیحیای مەوت مەردەی سەد ساڵەن نۆشانۆش جام بادە و پیاڵەن شەهدەن، شەربەتەن، شوربەن، شەرابەن کەمانچە و مووکەش، ڕەوق و ڕوبابەن تەپڵەن، دەهۆڵەن، سەنتوورەن، تارەن ساز عادەتی، هەم مۆسیقارەن گازەن، دڵوازەن، سازەن، ئاوازەن ڕازەن، دەمسازەن، نازەن، نیازەن عەیشەن، عوشرەتەن، کەیفەن، دەماخەن زەوقەن، زینەتەن، بەرگەن، پەرداخەن سەدای لەرزانەی شەدەلارانەن سەیر سەرتاپای خاتر دارانەن قەتارەی قەیتوول نازک ئەندامەن سەما و ڕەمای خاس جەمین چون جامەن «سەوزە سەوزەڵێ» ی ساززەنان گەرمەن ناڵەی موتریبان بێ وادە و شەرمەن جە سەدای «جەیران» عالەم حەیرانەن دوو شاخەی «جەیران» شاخ جەیرانەن زومرەی خەوانین بزورگان یەکسەر ئاشوفتەی «سەنەم» حەیران دڵبەر قاپی هیدایەت، ڕای نەجات بەستەن تەمام عاڵەم «سەنەم» پەرەستەن شای سەنەم سوورەت غەمزە و ناز فرۆش هون دڵداران ئاوەردەن وە جۆش ڕیشمە و گریشمەی «زیبا» ی نازەنین بەتاڵ کەرد بازاڕ سەمەنخانەی چین باقی بێگلەران لاقەید جە تانە سەرمەست و مەدهۆش مەیل وە مەیخانە خسووس ئارەزووی مەجنوون دەماخان تەمەننای دیدەی لەیلێ پەرداخان عەتر گوڵ عەرەق شیرین جەماڵان شین وست وەیانەی کۆکەن خەیاڵان شەرارەی ئاهیر بۆتەی وەفا و مەیل ئیشارەی ئەبرۆی یار مۆبەت کەیل بن دەسی فرسەت چفە و چەم بازی وادە دان وە لەیل ڕەزا و ناڕازی ناڵەی زگاران، زڕەی کۆسەڵکۆس قاعیدەی قەدیم «هەی شاباش، هەی دۆس» کاڵای بازاڕان، ئاڵای نازاران لاڵای دڵداران، ناڵای ئەوگاران کەمانچە دڵگیر، دوکانچە عەبیر دەوانچە زەمیر، قەوانچە زنجیر پەنجەی بێ ئەندێش، لەنجەی چۆپی کێش قەنجەی شێوەی وێش، لەنجەی دڵەی ڕێش دیای ڕەوێڵان، خەمیای سەرخێڵان ڕەمیای کامێڵان، چەمیای جاهێڵان «دابۆ» ی سەرسامان، «لاچۆ» ی نەمامان وەشبۆی شەمامان، ڕۆڕۆی کەم فامان لفەی سەر دەسماڵ، خفەی لیمۆی کاڵ قفەی سۆسەن خاڵ، چفەی پەری باڵ ساقی مەی هەی مەی، باقی دەی بابەی تاقی دنیای دون (لیس الا حی) نیگای دیدەی دۆس، دیای پەنهانی دڵ وەشی مابەین یاران گیانی سەدای «لاو هەی لاو» نەزم دڵ لاوان هوون ڕیشەی جەرگ ئادەمی تاوان نمانای قوماش قوتن هەزار ڕەنگ واڵای ئاڵای خاس باڵای شۆخ و شەنگ بۆی عەتر گەردەن، شووشەی تەڵای تەڕ برقەبرق تاس فەرق «کڵاوزەڕ» هاڕەی لاچناخ لاڕیشەی یاران خاستەر جە زیڵەی زەنگ زواران حەڵقەی حەی تاران، دەستەی زوڵف شۆڕ سەر نە سای گەردەن ئاهوان تۆڕ گرمەی گەرم جۆش لیتە ڕەشبەڵەک لارە و قەتارە، ئیشارە و کەڵەک هەوەسیا، بۆسا، تەواسا، تاسا سەرگۆش وە خەڵوەت هزم و هەناسا نە تۆی تای کەتان لۆنگ بەغدایی یار وە ئیشارەی پەنجەی حەنایی شەوق و زەوق زەنەخ، خاڵان ماوی وەشە و پرشەی گوڵ گۆنای گوڵاوی هاڕەی کەڵەوێم ئاڵای سەر وە هەم خشەی مێخەکبەند لەسەر سینە و مەم زیڵەی زایەڵەی زرنگەی زەڕ زەنگۆڵ زڕەی زەڕ زنجیر کۆڵوانە وە کۆڵ تەقەی پەنجەی کەوش، گێڵای بازی باز خڕەی خرخاڵان، فڕەی «سەروەناز» خڕەی خرخاڵان، چریکەی وە سۆز پریکەی دڵبەر پەردەی دەروون دۆز ڕەقس و سەمای خاس نازەنین نازان فەسڵ وەسڵ مەیل ئاواتە وازان قورتاسە مەفتوول شۆڕاوە گوڵەنگ گێسوی سەرازێر، پاوانەی پاچەنگ سا ئەجەل بۆرێ قەبز گیانم کەر نەدەی نەجاتم ئەمشەو تا سەحەر «مەعدوم» چون بازاڕ بەزمەش کەساسەن جە دووری یاران پەی مەردەن خاسەن ++++++++++++++++++++++ سەرناو: فیدای دیدەت بام وە بێ مەی مەستەن فیدای دیدەت بام وە بێ مەی مەستەن نیگای دیدەی تۆ بادەی ئەلەستەن بەهای نیگای تۆ گیان ئاڵەمەن زەڕەی مەیلەکەت شەفای ناڵەمەن ++++++++++++++++++++++ سەرناو: قوربان چەم چەمش وە تۆ نە کەفتەن قوربان چەم چەمش وە تۆ نەکەفتەن بەڵام نەو ساوە نامت شنەفتەن ئارەزووی وە گەرم دیدار تۆشەن پەی فەردای خدمەت نەزرولفتۆشەن تا ئێستە چەند جار تەدبیرش کەردەن تەقدیر ڕیشەی ئەو جە بێخ ئاوەردەن بەند وە ئیحرام بەند کەعبەی حزوورەن ڕا نمەزانۆ بەڵەد زەروورەن مەواچان هیممەت پەی بەڵەد خاسەن ڕاسشان فەرمان، ئەڵبەت هەر پاسەن هیممەت تا سەر بۆ چەم بەیۆ وە لات سەر سەربڵند بۆ، چەم وە خاک پات ئەر سەد واوەیلان هیجران باڵات مەینەتەن دووری تۆزەکەی پاڵات بەڵام چون کەردەی گەردش چەپگەرد گەردەلوول چەرخ هیجرانت هۆر کەرد ڕەزام وە تەقدیر، دڵ دام وە ڕەزات تەن کەردم سپەر تیرەکەی قەزات ویەردەن فەسڵ وەسڵەکەی جاران ئاما و لواکەی سەبا و ئێواران ئێستە پێچ وەردەم چون مار کوشتە مەقرچوو وێنەی دانەی بریشتە سەڕسەڕ هیجران هۆر کەردەن پەی دڵ هەر تۆزم بەردەن مەنزڵ وە مەنزڵ جە دووری باڵات ناڵە ناڵەمەن ئاما و ناماکەم ئەڵڵاو ئاڵەمەن ++++++++++++++++++++++ سەرناو: لاونامەوە لاونامەوە، لاونامەوە دیت چەنی فەڵەک لاونامەوە؟ نە بۆتەی فیراق تاونامەوە چوون مەجنون وە نەجد یاونامەوە ئایر کەرد وە سەر پووش جەستەمدا نمەک کەرد وە بان پەترۆ بەستەمدا دڵ لەت لەت کەردەن ئەڵماسەکەی دەرد کوت کوت مەڕفانۆش وای هەناسەی سەرد هەور چەم هەر یەند هووناوان مەتەن سەبتم جە لوح المحفوظدا شەتەن تەنوورەی دەروون جۆشش ئاوەردەن لاو هەرەس گرەو جە تۆفان بەردەن کەشتیی وجوودم هانە تەلاتوم هاو وەختەن هەستیم نە چەم کەرۆ گوم هاڵی بۆ گۆشەی بەزم مەینۆشان بشوون وە حەڵقەی جەرگەی خامۆشان ++++++++++++++++++++++ سەرناو: لەب وە خەندەوە چەم وە نیگاوە لەب وە خەندەوە چەم وە نیگاوە وەختێ جە ڕووی ناز دیا وە لاوە قەزا و قەدەر وات وە بانگ بێ حەد «غزای یوم البدر العود احمد» ++++++++++++++++++++++ سەرناو: ما زرنگەی زەنگ سەرقەتار مەیۆ ها زرنگەی زەنگ سەرقەتار مەیۆ وێنەی دڵەی من ناڵەش زار مەیۆ سەداش ڕێی کاروان گێرتەن پەی بەردەن ماچی شاگردی دڵەی من کەردەن هەی توجارباشی خەیر بەیۆ نە ڕێت بێ ڕەنج وینی گەنج نە سەرمایەی وێت من خۆ کەفتەکار، خەریک دەردم خەستەی زامەتدار وێڵ ڕووی هەردم دڵم یەند جە تاو زامان نەسرەفتەن یەکسەر جە ناڵەی هەرجاران کەفتەن لەیلێ وە مۆبەت وەرین نەمەندەن هەوای بێ باکیش ڕیشەی دڵ کەندەن جە سیاهی بەخت، شوومی تاڵەی من نمازۆ وە گۆش ناڵە و لاڵەی من سا تۆ بۆ وە عیشق شای سەرتجاران بەشق مایە بەخش مەتای بازاڕان دڵەی من بەند کەر وە پای زەنگەوە وە پای زەنگ قەدەر نازک دەنگەوە گەر مەکەرۆ لوتف بۆ وە سەر مەیلدا بویەر نە کووچەی پای قەسر لەیلدا تا جە تەنخوای من دڵ خەستەی تەنگ بەیۆ وە فەریاد چەنی زاری زەنگ لەیل گۆش دۆ وە دەنگ، دڵ بەو زیلەوە بەیۆ وە شکات وە زەلیلەوە عەرز کەرۆ: قیبلەی دنیا و دینەکەم کەعبەکەی وە ڕاس مایەی ژینەکەم هەی داد هەی بێداد سەختەن فەریادم سەدها زام پێکان نامای وە یادم ئەر سەد خەشم و قین ڕەویەی شاهانەن کەرەمشان چەنی بێ گوناهانەن ئازیز یە ڕەویەی عەداڵەت نییەن تۆ ڕەحمت یەکسەر جە خاتر شییەن ناوەری وە یاد خەشم زەبوونیم ئاخ، هەر جەفات کەرد، داخ، بیت وە هوونیم ++++++++++++++++++++++ سەرناو: من خۆ خەفەت جفت چەفتەن قامەتم من خۆ خەفەت جفت، چەفتەن قامەتم تاقم جە تاقەت وە سۆن زامەتم یەکجار گەرمی جۆش ناڵەی بەد حاڵیم گڕ وستەن وە پووش جەستەی زوخاڵیم یە لافاو هەرس، هەرەس ماڵە وێم یە سەدای مینا مەزاق تاڵە وێم دەک مینات وە سەنگ پارە پارە بۆ جەرگت هەم لەت لەت پای قەنارە بۆ گلاراو دەرد دووری نازداران کەرۆت وە سەرمەشق جەرگەی خەمباران ++++++++++++++++++++++ سەرناو: مەیۆم جە دەروون مەیۆم جە دەروون مەیۆم جە دەروون بۆی بۆپڕووزێ مەیۆم جە دەروون تاریک کەردەن نەجد، پۆشان بێستوون گوم کەردەن ناڵەی فەرهاد و مەجنوون حەوز دەروونم کەیلەن جە هووناو مەیۆ، مەویەرۆ نە چەم چون شەتاو ئارام و تاقەت جە لام کۆچ کەردەن سپای خەم هۆشم وە تاراج بەردەن فامم زەلیلەن، دەروون زامدارەن نەیچی ناڵەی نەی ئەمجار وە کارەن فیدای پەنجەت بوون مەقامێ وەش تەرز لێدەر تا ڕیشەی دڵ باوەرۆ لەرز گۆش دەو بە نەوای دڵ نەدیرەکەت هۆش دەو وە نەغمەی وەش تەحریرەکەت هیچ خەمێ نازۆ نە دڵ بۆ باقی بەڵ شۆرۆ وە مەی جای زامان، ساقی یەکسەر خەیاڵان بڕێشان جە لام دەس چەرخ چەپ وەس بدۆ سزام ++++++++++++++++++++++ سەرناو: وادەی ئارەزووی دیدەن جەمین گوڵ وادەی ئارەزووی دیدەن جەمین گوڵ چون واز مەکەرد قوڵف سندوقخانەی دڵ ئەی لۆلۆی ناسوفت پەسەند خاسان پەیدا کەردەی سۆی بێ شۆی غەواسان مەوست ئەو سارا پەرێ حەکاکان تا بۆ وە زینەت جەرگەی دڵپاکان ++++++++++++++++++++++ سەرناو: وە نیم نیگای عەین جە پێوارەوە وە نیم نیگای عەین جە پێوارەوە یانی های پەنهان جە ئەغیارەوە پەی «اظهارالمیل» مەدا باڵ چەم بەند بەند ئیسخانم ڕێزنا وە هەم ++++++++++++++++++++++ سەرناو: چون بەندە بەو بەند ئیخلاسی بەندەن چون بەندە بەو بەند ئیخلاسی بەندەن هەر پاسە بەندەن تا حەیات مەندەن تەمام مەتڵەب ئەشعارم وانان خاسی و خراپی یارۆیچم زانان عەفیفەن بێ عەیب، خاڵییەن جە شەین ئۆجاغزادەی خاس، نەجیب تەرەفەین ئادابش زەریف، خولقش چون حوورەن باڵا میانە خەیرول ئوموورەن بەڵێ واتەی من پووچ و عەبەسەن گردین درۆ بۆ سەییدیش وەسەن وەلحاسڵ واتەم بێ درۆ، ڕاسەن یارۆ پەی یارۆ پەی یاری خاسەن ++++++++++++++++++++++ سەرناو: چەخ چەپ چەنیم ڕاس بەستەن کەڵەک چەخ چەپ چەنیم ڕاس بەستەن کەڵەک مەر من سەنگم دان وە مینای فەڵەک دایم پەرێو من ها نە بەهانە گاهێ «ئەسفەهان» گاهێ جە «بانە» نمەدۆم فرسەت ساتێ وەبێ خەم گەرد پاڵاکەت بماڵوون وە چەم یا شەوێ شین کەم جە شەو ناڵینت یا ڕۆیێ ڕۆ کەم وە زاری و شینت یا ناڵەم چەنی ناڵەت بخێزۆ یا دیدەم ئەسرین پەرێت بڕێزۆ یا شەمەی جە شەرح دووری دووبارە داخ و هیجر و وەسڵ دڵەی سەدپارە عیشوە و کریشمەی حۆری جەمین گوڵ عەرز کەم وە پابۆس پەی تەسکین دڵ چەپگەرد نمازۆم دەمێ فەراقەت سا خوا یا وەسڵ، یا مەرگ، یا تاقەت ++++++++++++++++++++++ سەرناو: کورەی دڵ چمان جۆشش وەردەوە کوورەی دڵ چمان جۆشش وەردەوە کەم کەم بێهۆشی هۆشش بەردەوە ئەسرین هەر تاف بەست وە ڕووی ڕوومدا تیفڵ ئاسا مەدۆ وێش وە بوومدا بەختم سیاپۆش، یەخە پارەشەن شەرارەی ناڵەم شووم ستارەشەن زاهیرەن فەڵەک کەڵەک بەستە بۆ دیسان دڵ وە تیر دووری خەستە بۆ ++++++++++++++++++++++ سەرناو: گۆیا جەلای وێت ئینە خاست کەرد گۆیا جە لای وێت ئینە خاست کەرد جیاییت چەنی من وە بەین ئاوەرد هەی پەی وێت نەبۆ شۆخ دیدە مەست یاریۆ تەر وێنەی من بگنۆت وە دەست بکێشۆ نە ڕای جەور و جەفای تۆ بزانۆ وە حاڵ غەمزەی ئیمای تۆ سا چونکە وەی تەور قیبلەم پێم کەردی وەفای عەهد و شەرت وە سەر نەبەردی مەسپارووت وە دەس بێوەفایی وێت تویچ سەرگەردانی من بەیۆ نە ڕێت ++++++++++++++++++++++ سەرناو: گەرمی دەرد قامەت کەردەن وە کاهێ گەرمی دەرد قامەت کەردەن وە کاهێ هەر ڕۆ نە هەردێن وە شنۆی ئاهێ وجوودم بەو تەور ناموعلووم بییەن بە غەیر جە ئیسمێ موسەمماش نییەن ئەر ناڵە جە هیچ نەکەرۆش جیا تەوفیرش نییەن چەنی نەقش پا نەسیم ئەر بارۆ وە ڕوومدا جارێ نمازووم وە جەم دوو ساڵێ جارێ مەینەت ئەر گێڵۆ سەر وە موویێ خەم مەر وە ڕۆی مەحشەر بوینۆم وە چەم بووڵ سفتەی تەن ها وە دەس باوە فیدات بوون ساقی خەمێ بەی لاوە نەمین کەر پەردەی وجوودم وە مەی بەڵ وە جام مەی دیسان ببون حەی مەینەت خەم پەی پەی پەرێش بکیانۆ نەی مەنزڵ نەوا ماتڵ بمانۆ ++++++++++++++++++++++ سەرناو: هەتینەی فیراق تەن کەردەن وە سیم هەتیتەی فیراق تەن کەردەن وە سیم باریکتەر جە تای تەحریر تەقویم زایفیم قووەت جە دەستم سەندەن تاپۆی وجوودم هەر وە زۆر مەندەن بێتینی زانووم کەردەن وە تاڵێ مەسافەی شەوێ مەبڕوون وە ساڵێ حەیات و مەمات هەر دوو ها نە خەو لێم مەعلووم نییەن ئێد مەیۆ یا ئەو جۆش دیجلەی هەرەس یەکجار بێ پەیەن ساقی وەش تەرزیت ئیتر پەی کەیەن؟ جەو جورعەی مەیەت وە حاڵ کەی دا غەرقت کەرد نە گێج بەحر بێپەیدا منیچ بەو جورعە، بەو جامە، بەو مەی تای ڕیشەی نیشات زیندەگیم کەر پەی خەلاس بوون جە دەس دنیای بێ پڕ جەفا پەی کێ وەفاش بی، پەی من بۆش وەفا؟ ++++++++++++++++++++++ سەرناو: یادم نمەشی جە گەردین حاڵدا یادم نمەشی جە گەردین حاڵدا چەنی باڵ تەیر یا وە شەماڵدا ئیزهار ئایر گڕ بەستەی دەروون دیدەم وە دیدەت فرسەت مەزانوون دڵ دایم پەرێت پڕ ئێش و نێشەن دنیام پەی ئیدەن باڵای تۆ تێشەن بە غەیر جە دووری ئەو باڵا نەمام هەنی هیچ غەمێ نەمەندەن جە لام بەڵام چێش کەروون گەردش چەپگەرد دووریش وە مابەین من و تۆ ئاوەرد کار گەردوونەن نەو نەمام نۆ وەرنە من جە کۆ، دووری تۆ جە کۆ؟ ++++++++++++++++++++++ سەرناو: یەئجووج خەیاڵ گێرتەن قەڵای هۆش یەئجووج خەیاڵ گێرتەن قەڵای هۆش ئەسکەندەر شەوق کەردەن فەرامۆش چەنگیز مەینەت موسللەت بییەن بووعەلی فیکرم وێش جە یاد شییەن خەم لاو دان وە تەبع بادی و ئاویم دا خاک کەردەن وەسەر سەوزەی شادیم دا حەواسم قووەی جارانش نییەن زایقە و شامەم بێ تەئسیر بییەن حەرەکەی زاتیم بێ ئیختیارەن ڕۆح نە تەدارەک ماوای مەزارەن کۆچ نامەدەن، ئاخر سەفەرەن تۆشە زەروورەن ڕا پڕ خەتەرەن خەسڵەتێم نییەن دڵ پێش وەش کەروون چەنی وێم سەوقات وە مەحشەر بەروون مەر کەریم وە مەیل ڕەحمێ کەرۆ لێم نەنویسۆ نە پام خەسڵەتەکەی وێم وەرنە نە جوملەی گوناکارانم ڕووسیای مەجلیس جەرگەی یارانم ++++++++++++++++++++++ سەرناو: خەیاڵ شادی ڕۆی بەزم ڕەمەزان خەیاڵ شادی ڕۆی بەزم ڕەمەزان بووم ڕوخسارم کەردەن وە خەزان ++++++++++++++++++++++ سەرناو: دیسان دەس چەرخ هەم ها نە کاردا دیسان دەس چەرخ هەم ها نە کاردا تای تانتەی دووریش وستەن وە داردا ++++++++++++++++++++++ سەرناو: زرنگەی سەرپارچەی بەرمورد چناخ زرنگەی سەر پارچەی بەرمورد چناخ دڵ سفتەن، پەڕەی جەرگم کەردەن داخ ++++++++++++++++++++++ سەرناو: سیم قەڵب قەلب جۆش کوورەی حاڵ سیم قەڵب قەلب جۆش کوورەی «حاڵ» نە بۆتەی پاکتاو ئیخلاس کەردەن قاڵ ++++++++++++++++++++++ سەرناو: لەرزەی دڵ جە شەوق پێکان پەیکان لەرزەی دڵ جە شەوق پێکان پەیکان دڵ خاس بە پەیکان نەپێکان پەیکان ++++++++++++++++++++++ سەرناو: کوولەکەی کەللەم پەی شکار خەم کوولەکەی کەللەم پەی شکار خەم پڕەن نە دەرمان شۆرەی ئەسر چەم ++++++++++++++++++++++ سەرناو: گردکار چەرخەن چەرخش چەمەر بۆ گرد کار چەرخەن، چەرخش چەمەر بۆ وەرنە من جە کۆ دووری تۆ جە کۆ ++++++++++++++++++++++