شاعیر: مەولەوی کتێب: دیوانی مەولەوی سەرناو: ئاخ پەی خەڵوەتێ ئاخ پەی خەڵوەتێ بدیام وە بێخەم سیوای تۆ دیدەم، کەس نەدیام وەچەم دڵ پەی دیدەنت کام خەڵوەت سازۆ تۆی دیدەیچم بی، مەردم نمازۆ ++++++++++++++++++++++ سەرناو: ئاخ چراخ چ ئاخ ئاخ، چراخ! چ ئاخ؟ ئاخ پەی ئاخدارێ چون من خاتر خار، خەمبار داخدارێ بشیامێ وە سەیر سەر سەراو چەمەن چ ئەو چراخم نەو چەمەن، چ مەن ناڵەمان کەردا چەنی بوڵبوڵان چەنی ناڵەیێ؟ چون سفتە دڵان تا نە قەفەسدا مانمان نەفەسێ ئەوان پەی گوڵان، ئێمە پەی کەسێ ++++++++++++++++++++++ سەرناو: ئارەزوومەندیم ئارەزوومەندیم جە حەد ویەردەن فراوان خەیلێ تاسەی تۆم کەردەن قیبلەم بەو ئەحەد بێهەمتای فەردەن سەوگەند یەکێوەن چەنی تۆم وەردەن فکر و خەیاڵان وەسواسەی وەفات دایم نە دڵەن نە ڕووی سەر بەسات شەوان تا وە ڕۆ فکرم جە لاتەن ڕۆحی ڕەوانم نە خاکی پاتەن قاڵبم بێڕۆح، ئەڕوام نەمەندەن من دانی حەیات زیندەگیم کەندەن نامت چوون ئەوراد سوبح و ئێواران موانووش وە گەرم نە پای دیواران چەمم چوون شاباز وێڵی شکار بۆ دایم باڵ پەرواز نە سەر دیار بۆ جە سەرقەڵاوە مەگێڵوون پەی تۆ دەک دیدەم هەر دوو سەد جار فدێت بۆ ئامان، هەی ئازیز بینایی چاوان! گلەم هەن جە تۆ خەیلێ فراوان یانێ چێش مەیلت فەرامۆش کەردەن مەر بادەت نە جام بێشەرتی وەردەن؟ وەرنە یانێ چێش نە جاران جارێ خەبەر نەپەرسی جە ڕاویارێ؟ ئومێدم ئێدەن، ئامانەن ئامان! جەی فێشتەر ناسۆر نەوزی زامان ئەحواڵی حاڵات شەرت و وەفاکەت بکیانە پەرێم تۆبی خوداکەت! نە ساڵ و نە ماه، نە هەفتە نە شەو نە ساتێ ئارام، نە دەقیقە خەو نمەشۆم نە چەم، دیدەم، نە دووریت هەر ئێد موانوون: ئاخ جە مەهجووریت! ئیسە کێ تاقەت دووری تۆ دارۆ؟ دەک بەرقی غەزەب وە جەسەم وارۆ! بە سەرگەردت بام، ئەڕواحەکەی وێم! جوابی سەریح بکیانە پەرێم... ++++++++++++++++++++++ سەرناو: ئارەزووی ئازیز ئارەزووی ئازیز وەنەم سەر داوە نە هەردەی دەروون ئایر وەرداوە تاقەت بی وە هوون جە سەختیی زامان تکتک چەنی هەرس ڕێزا وە دامان خەم نە سەرجۆی هوون سارای دڵ جەم جەم بارچنی چون فەوج قافڵەکەی عەجەم هەر وە زۆر مەندەن نیم نەفەس باقی وادەی دەورتەن، هانا هەی ساقی! دەورێدەر وە ناز وە پیاڵەوە ژەنگی دڵ وە جام مەی بماڵەوە بۆی گوڵاڵەی دەرد دڵبەر عەزیزەن مەزەی تامی خەم یاران لەزیزەن فەریادڕەسیم کەر، نە جای گشت کەسم! مازە ئەو لەزەت بەرشۆ نە دەسم ئیحیام کەر وە جام سافی یەک مەنی بەڵکوو بمانوون، پەی غەمێ هەنی ++++++++++++++++++++++ سەرناو: ئارەزووی ئامای مەرگ ئارەزووی ئامای مەرگی وێت کەردەن گۆیا خەلاسیت وە دڵ ئاوەردەن ئەی پەی تۆ نەبۆ دۆسەکەی گیانی چەند بۆ پڕووز بۆ تۆ هەر بمانی ++++++++++++++++++++++ سەرناو: ئازارم جە وێم ئازارم جە وێم، بێزارم کەردەن ڕەویەی ڕەمەزان جە یادم بەردەن جەوساوە نییەت ڕۆزەم ئاوەردەن هیچ ئازام جە هیچ زۆرش نەوەردەن نە چەم نە دیدەن ئازیزی بێگەرد نە گۆش نە سەدای یارانی هامفەرد شیرینیی ئیفتار دڵم تاڵییەن جام نە جەماعەت دۆسان خاڵییەن نەوای مەرحەبا نامان نە گۆشم چەنی ئەلوەداش هەر نە خرۆشم زایفیم هەر یەند جە حەد بەرشییەن نەسیم ئەر بارۆم عەجایب نییەن ++++++++++++++++++++++ سەرناو: ئازیز تەن وە نێش ئازیز! تەن وە نێش زامانت خەستەن مەینەت پای ئامام وە زنجیر بەستەن قاسدێیچ واچوون پەی سەفەر خاسەن ڕەوان بۆ تێزڕەو، هەرس و هەناسەن هێزی پای ڕەفت و ئاماشان نییەن ئەو سەرچەمەش وشک، ئێد کۆتا بییەن سا تۆ بۆ وە ڕەغم بەختی بەرگەشتەم جاگێر نە دیدەی وە هووناو ڕشتەم با ساتێچ ڕەقیب دووریت بکێشۆ شەوێ وێنەی من وەی ڕۆوە نیشۆ وەرنە، سا چونکە ئاسانەت دوورەن ڕا نمەزانوو، بەڵەد زەروورەن دڵ وەلاتەوەن، ئامان سەد ئامان ئامۆشۆش کەردەن، فرە جار ئامان چون وە تامی زام دووری سەرشارەن ویانە مارۆ، بەدەن بێزارەن هیچ مەوەر وە تەنگ ویانەشەوە پەرێ بەڵەدیم، بکیانەشەوە ++++++++++++++++++++++ سەرناو: ئازیز دیارەن ئازیز! دیارەن، وادەی لوامەن ئەلوەدای ئاخر ئەوەنامامەن دەوڵەتەکەی وەسڵ پا نە زەواڵەن جارێوتەر دیدەن باڵات مەحاڵەن سا دڵم وەش کەر وە ئیلتیفاتێ بدیە وە لاوە، بوینووت ساتێ با بەیۆ شنۆی شیرین ڕازەکەت گۆش دەرۆ لادێ مەینەت گازەکەت ئاخر سەفەرەن، ڕا خەیلێ دوورەن مەنزڵ بێ پایان تۆشە زەروورەن دینت تۆشەی چەم، مەیلت تۆشەی دڵ ڕازت تۆشەی گۆش، مەنزڵ وە مەنزڵ کێ زانۆ چۆن بۆ ئەی دنیای فانی؟ با ببۆ نە بەین گەردن ئازادی! من شەوێ ناڵەم جۆش ئاوەردەبۆ سەگی ئاسانەت بێدار کەردە بۆ یا ناستەبۆ سەیل دیدەم، نەفەسێ نەسیم گەرد پات بەرۆ پەی کەسێ جەمینت زەحمەت نیگام کێشابۆ کەفی پات وە خار دیدەم ئێشابۆ یا کەردەبۆ دڵ دێوانەی دڵ تەنگ وەختی نیشانەی دڵان پەی خەدەنگ پەلەپەل پەی زەوق زامێ وە تیرت ئازار دابۆ تای زوڵفی زنجیرت یا خۆ تۆ دابۆت وە دڵ مەزەی مەرگ تیری خەدەنگت دابۆ نەتۆی جەرگ یا مەڕدەبۆت دڵ دێوانەی دڵگیر جە تیرئەندازی کەردەبۆت تەقسیر یا نەدابۆت تۆز گەردی پاڵاکەت پەرێ سورمەی چەم سفتەی باڵاکەت تۆ بویەر جە من، من زوو ویەردم هیممەت بۆ، ها ژار مەحروومیت وەردم چەپگەرد پەی دووریت شانا مۆرەی نەرد وە زاهر «بانە»ش وە بەهانە کەرد تا فەڵەک پەیمان نە بەهانە بۆ ئەر سەد بانە بۆ، باز شوکرانە بۆ ئەر فرسەتش دا پەی دڵ خەمینت عومرێ دووبارەن جارێوتەر دینت وەر ناستش، ئازیز! تۆ وە سڵامەت دیدەنی دیدار کەوت ئەو قیامەت! ++++++++++++++++++++++ سەرناو: ئازیز! تای ڕشتەی ئازیز! تای ڕشتەی دڵەی خەم بێشۆ ئەزەڵیا نە بەند تای ڕشتەکەی تۆ هەردوو چەنی هەم پێچ وەردەن وە هەم جیایی نە بەین مەحاڵەن ستەم سەر مەودای ناخوون یەکسەر تێدا شی هەرچەند سەعیم کەرد جیایی نەوی ئیسە خاس پاسەن تۆ نەی سەردەمدا هەر دوو چەنی هەم پێچ دەی وە هەمدا تا یاران زانان ڕیشەی جەرگمەن پاچیان، ئاوێزان وە ڕووی بەرگمەن هەنی مداران دەم وە سەناوە ئافەرین واچان جە گردین لاوە ++++++++++++++++++++++ سەرناو: ئازیز! وە مەرگت ئازیز! وە مەرگت دڵ نە خرۆشەن ئارەزووی خەدەنگ پەنجەکەی تۆشەن خەیلێوەن نامان تیرەکەت، ئامان نامان وە سەر وەخت بیمار زامان وەختەن ساکن بۆ، قوربان سا تیرێ دەماخش بەرزەن، دەخیل زنجیرێ نەوا جە حیکمەت بەربشۆ وە بەر جارجار وە تیرێ دڵنەواییش کەر وەشوەش تای توغرای وێت بنمانە پێش با هەر ناسۆر بۆ، زوو نەبۆ ساڕێش ++++++++++++++++++++++ سەرناو: ئازیز! وەس بووزەم ئازیز! وەس بووزەم نە گێجاوی خەم وەس چون بینایی پەنهان بەر نە چەم وەختێ جە وەسڵیچ هەر دڵم ڕێش بۆ مشیۆ وەسڵ و فەسڵ فەرقشان چێش بۆ؟ ++++++++++++++++++++++ سەرناو: ئازیزم! ئاهیر ئازیزم! ئاهیر دووریی باڵای تۆ جەستەم کەرد وە بووڵ، شەماڵ بەرد پەی کۆ ورشەی پرشەی تاو کوورەکەی جەستەم شەرارەی لوولەی پێشەی شکەستەم گرمە و پزیسکەی چەخماخەی پارە بەرقی بریسکەی شوعلەی شەرارە شاخەی شریخەی برووسکەی دەروون نە چەم شەتاوان جاری کەرد چوون هوون مەوج مدۆ لافاو هوونی دەجلەی دڵ نە فوارەی چەم هورمشانۆ گڵ کای دڵم نە گێج مەوجی فەنادا مۆڵەقەن نە بەین خۆف و ڕجادا تۆیچ ئینسافت بۆ هەنی وەسەن وەس بیللا جە دووریت، ها بیم وە قەقنەس تاکەی چوون مەجنوون ویڵی هەردان بم؟ تاکەی خەمزەدەی باری هیجران بم؟ هەر ساتێ دووریت سەد ساڵەن جە لام دەردم کارییەن وە سەرگەردت بام! بەزەییت بەیۆ وە جەستە و حاڵم ڕیشەم بەراما، هەرەس وە ماڵم ++++++++++++++++++++++ سەرناو: ئازیزم، ئامای ئازیزم، ئامای ئای بێقەرار وێم! ئای ئای چەمەڕا ئای ئینتیزار وێم! مەوتەنەکەی چەم دیدەش ها نەڕێت غەریبی تاکەی، بۆ وە ماوای وێت های ساقی! بازاڕ جیلوەی دڵدارەن سەودای خڕیدار، دانەی دیدارەن یەکێ وە مایەی گەنجی کەیەوە چون منیچ وە تای فەرتووت «نەی»ەوە ئەر سەد هەر کەسێ پەی وێش وە ڕاوەن وە قیمەت نییەن، ئیخلاس حەساوەن مایل کەر باڵا وەی لادا چون نەی دەسێوت دەف بۆ، ئەو دەس جامی مەی با بێدار کەرۆ تاکەی بۆ غافڵ دەف وە سەدا گیان، جام وە ڕەشحەی دڵ با کڵافە بۆ، ئاخر لەوانم خاکی پای حەزرەت پیری موغانم چون دەف، بەرگ پۆس ئیرادەت پۆشم غوڵامی بەر دەس حەڵقە نە گۆشم خوم ئاسا خەیلێن وەتەن مەیخانەم چون پیاڵەی واق شیشەی پەیمانەم ++++++++++++++++++++++ سەرناو: ئازیزم، گەردەن... ئازیزم، گەردەن بلووری بێگەرد! ئەمانەتی تۆو دڵەی پڕ جە دەرد چون جە زێد وێش بییەن ئاوارە غەریبەن، قەدرش نیگا بدارە فەرامۆش نەبۆ لادێ، درەنگێ سوبحێ وە تیرێ، شامێ خەدەنگێ ++++++++++++++++++++++ سەرناو: ئاماوە وەهار ئاماوە وەهار، وەهاری شادی بۆی عەتری نەسیم غۆنچەی ئازادی خێڵخانەی خەفەت باربەنیش کەردەن مەینەت ڕوو نیان وە ماوای مەردەن خەم وێنەی کەمان قامەت خەم بییەن هەوارگەی قەدیم نە دەسش شییەن بەزمی شەوق و عەیش نە دەروون جەمەن ئانە هیچ نەبۆ نە دەروون، خەمەن ئینە نەتیجەی دیای باڵای تۆن نیشانەی ویساڵ خاڵی ئاڵای تۆن سرووری نەشئەی بادەی وەسڵی تۆن تەئسیری بۆی عەتر موشکی زوڵفی تۆن سا پێم دەر، دەی دەی پەی پەی، نەو مەی مەی لەتایف مەردەم یەکسەر بکەر حەی تا پەی یارانیچ وە ئیتمینان بۆ سەرمایەی نیشات دڵحەزینان بۆ ++++++++++++++++++++++ سەرناو: ئای چەنە سەرچەنگ ئای چەنە سەرچەنگ چەرخ چەپ وەردم! چەرخ چەن چەرخاو من مام نەمەردم! ++++++++++++++++++++++ سەرناو: ئای کێ بی هەواڵ ئای کێ بی هەواڵ لوای تۆ ئاوەرد؟ بەختش بەرگەشت بۆ، هۆشم وەحشی کەرد مدیا ئەو شۆنت دڵ نە پەنهاندا چون ئیسمی ڕەحیم وە شۆن ڕەحماندا کۆترەکەی ئازاد حەریمی دڵ بیت دانەی مۆبەتچین پەی وێت غافڵ بیت سەیادی چەپگەرد ئاخر فرسەت سەند ناکاو دوور ئەنداز دووریت وە دڵ شەند هاڵای کزەی زام جگەرگۆشەی وێم موو ئاسا و ئایر هەر پێچ مەدا پێم ئێشی زامی سەخت تۆیچ ئاما پێشدا هەر ئێشەن مدیەی کەفتەن وە ئێشدا وێت تەنیا ئەیاز مەحموود نەزانی من شەیداتەر بیم پەرێت پەنهانی بەڵام با جە تیر بەڵای قەزاوە پاڵ دەیم وە قوللەی قەڵای ڕەزاوە تا بدۆ سەفای بێگانە و خوێشەن هەر وەختێ بەرۆ باز ماڵی وێشەن ++++++++++++++++++++++ سەرناو: ئایینەی کامڵ ئایینەی کامڵ! ئازیزەکەی فەرد! فیدای ئامات بم، سەفاییت ئاوەرد خەیلێن گەردی پات نە دیدەم دوور بێ یانەی چەم وێران تەمام خاپوور بێ خاس بی تەشریفت هەم ئاوەردەوە گەردی پات، وەتەن ئاوا کەردەوە ساقی، ئینە بەزم وەسڵی یارانەن چەرخیچ هەر ئەو چەرخ هەردە جارانەن دەورێدەر وە بەزم وە پیاڵەوە ژەنگی دڵ وە زاخ مەی بماڵەوە جامێمان جە دەس تۆ هەم سەندەبۆ فرسەتەن، نسیو نەک نەماندەبۆ ++++++++++++++++++++++ سەرناو: ئیحیا نەبوون ئیحیا نەبوون، سا نەشوون مەردەن نامەکەش ئامان، گلەییش کەردەن قاسد! شۆ وە لای ئەو نەونەمامە چون یاوای، پێشدەر ئەی جواو نامە جەو ئەسکەنجەبین دەس سوروشتەکەت یانێ: نامەکەی زێبا و زوشتەکەت بە بادەکەی وێت جام جام وەردەوە تاڵی سەفرای دەرد دووریش بەردەوە فەرمابێت بەو لەفز شەکەر ڕازەوە گا جە ڕووی عیتاب، گا وە نازەوە: نە وەختی هیجران ویداعت فاما نە وە شەماڵدا پەیامت ئاما دەیسا هورێزە، خەمیارەکەی وێم بۆ شاد بەر وە دین دیدارەکەی وێم تۆ تیرەکەی وێت، وە زامداریی وێم تۆ بێباکیی وێت، بوردەباریی وێم ئەو وەخت پایی کاو هەردی دڵ تەم بۆ ئەساسەی دووریی ئازیزان جەم بۆ چۆن نەبڕیۆ تای ڕشتەی سەبووری؟ گۆش چۆن وێش مدۆ وە قسەی دووری؟ زوان چۆن تاقەت هیممەت وازیشەن؟ دیدە چۆن تاقەت شۆن دیاییشەن؟ گێج مدۆ دەروون چەنی نێش، ئامان! بەڵام هەی سەرخێڵ نەو تووڵ نەمامان چۆن یارای نەفەس بەراوەردەمەن؟ سۆزش وە شەماڵ ڕەوانکەردەمەن؟ مەتەرسوو جە حیفز تەقریری ئەحواڵ، سۆچۆ خەزانەی خەیاڵی شەماڵ من خۆ شەو و ڕۆ ئارەزووی تۆمەن پەرێ دیدەنت نەزر و فتۆمەن بەڵام، یەن وە یاد باڵاکەی تۆوە دەورم دان وە دەور سارا و سەرکۆوە بۆی باڵات هەرزان وە دەشت و دەردان نمەز ڕای لای تۆم وەکام گوزەردان گلەی تۆ وەی تەور، حاڵەت وەی نەسەق دووریچت وەی ڕەنگ، خودا تۆ وە حەق! ++++++++++++++++++++++ سەرناو: ئیمساڵ نەو وەهار ئیمساڵ نەو وەهار چون خەزانی سەرد بەرگی وەردی باغ مەعدووم بەرد پەی هەرد مشیۆ تاڵەی من خیلاف ئەنگێز بۆ وەرنە، کەی؟ کێ دی؟ وەهار گوڵڕێز بۆ دڵ وە گێجبازیی چەپگەرد بازیش وەرد جفت ئارەزوو کەرد، چەپگەرد تاق ئاوەرد بۆی «عەنبەر» نە تۆی دەماخم دوور کەرد فرسەتش ئاوەرد هەوای وەبای دەرد نەیچی! وە بێ بەزم یارانی جانی کام سەفا مەندەن پەی زیندەگانی؟ چون مەزاق تاڵەن جە گردین لاوە بۆ وە شیرینی یەک دوو نەواوە یەکێ یەکجاری تاونۆمەوە ئەو یەک لاونۆم، یاونۆمەوە ++++++++++++++++++++++ سەرناو: ئیمشەو تەنیا بێ ئیمشەو تەنیا بێ جەستەی زەبوونم دیسان سەرواز کەرد دڵەی پڕ هوونم خەیاڵانی خام هاوردم بەردم هاوار جە دەمەی هەناسەی سەردم! زووخاو گێج مەدا دیگی دەرووندا هووناو هورشاناش جەستەی زەبووندا ڕەنگا ڕەنگ ڕەنگ، ڕەنگ گوڵگوون هوونم قرچەی برێشتەی کوورەی دەروونم چون دانەی سەر ساج هور ئامام جارجار جە تاوی دووکەڵ، جە شەرارەی نار سۆزیام هەی سۆزیام، وێنەی شوعلەی نوور بیم سورمەی سوبحان ئاوەردەی کۆی توور من قەقنەس نەویم، ها بیم وە قەقنەس یەکجاریچ ئیمشەو، ها بەرشیم جە دەس ئەوەند خەیاڵان بەردم وە دەروون پەی دووریی یاران بەتەر بیم زەبوون ڕۆ جە شەو فێشتەر، زار و زەلیلم ساقی! سا جامێ، ئەمجار دەخیلم بدەر پێم نۆش کەم چون هەردەجاران وە ڕەغمی گردین گرۆی مەیخاران شیعری وێم تەنخوای سەمتوور سازێ لێدەر، سا نەیچی! هەر تارێش گازێ چنگ پێکۆ نە جەرگ نەغمەی سازەکەت بەرارۆ تۆتۆ میقراز گازەکەت سا دەروێش! کەفێ بدە نە ڕووی دەف گیان مونتەزێرەن پەرێ ڕێزەی دەف موغەننی! لێدەر یەک ئیمشەو سازان بەشقی ئەو کەسە تۆش ئاوات وازان بەڵکە خەمانم تۆ دەری وە باد هەیهای جوانم، فرێم هەن مراد ساقی! سا دەخیل وە فریادم ڕەس بە ڕووی نازەوە جام گێرە وە دەس دەور دەرە وە ناز چون هەردەجاران پێمدەر یەک مەنێ سەبا و ئێواران با وەس باڵینم سێڵاوی هوون بۆ ئامێتەی زوخاو دیگی دەروون بۆ وەختەن سەر تا پام ببۆ وە زوخاڵ بۆیی سفتەکەم هورگێرۆ شەماڵ ساقی! ئامانەن، نەشوو جە ویرت وە فریادم ڕەس تۆ بەشقی پیرت بەڵ ئیمشەو خەمان نەدەرۆم وە باد ساقی گیان! قوربان، خاتر کەرە شاد بووە وە باعس ئەی نیم گیانی سەخت سا بەڵکە نەمرۆ مەعدوومیی بەدبەخت ++++++++++++++++++++++ سەرناو: ئیمشەو دیارەن ئیمشەو دیارەن بانگم بێشەرمەن زایەڵەی سەمتوور کەللەم وە گەرمەن سەدای زیل و بەم مەینەت سەد تەرزەن خەفەت شادیشەن، خەم دەماخ بەرزەن هۆشم بێهۆشەن، فامم قامەت قاخ بۆی دووریی ئازیز مەیۆم نە دەماخ نەیچی! درەنگەن سا مەکەر درەنگ فیدای پەنجەت بام، نەی باوەر وە دەنگ هەر تەرزێ پەی وێش بکەرۆ ڕازێ گێرۆ نە دەروون هەر سازێ گازێ بجۆشۆ هەر کەس وە قەد ناڵەی وێش بنۆشۆ هەر کەس وە پیاڵەی وێش جەلای هەر گەردێ وە سەدایێوەن دەوای هەر دەردێ وە نەوایێوەن هەر مەقامێوەت جگەر تاون بۆ تفڵی بێچارەی دڵان لاون بۆ ئەو سەدای دەردە خەیلێ دڵکەش بۆ دڵ تفڵان ئاسا بەڵکم دڵوەش بۆ هەی پەشێویی هۆش، هەی شێویای فام هەی عەقڵی عەبەس، هەی خەیاڵی خام من و دڵوەشی و سەفایی کەردەن هوونی یەکتەرین تا وە ڕۆی مەردەن سا دەی، ساحیب نەی! ڕیشەی دڵ کەر پەی تالیمدەر، ئەیفەرد وە نەزمەکەی نەی: ئیمشەو وە هەر حاڵ شەو وە ڕۆ بەروون ئەی خوا سا مەرگێ، سەحەر چێش کەروون ++++++++++++++++++++++ سەرناو: ئیمشەو مەینەتان ئیمشەو مەینەتان نە دەروون جەمەن خێڵخانەی کەیفم پڕ جە ماتەمەن دیارەن دووەی دووری زۆر کەردەن سوپای خەم و هەم هجووم ئاوەردەن شنۆی ئارەزووی وەسڵت زهوور کەرد لافاوی مەینەت کۆگای شادی بەرد هووناوی دەروون ڕیشەی گیان کەندەن سەرمایەی تاقەت نە دەسم سەندەن مەحاڵەن ئیمشەو گیان وە ڕۆ بەردەن جارێوتەر تەواف ئاسانەش کەردەن یا خوا سەبووری وە دڵ باوەری خەزانەی ئارام پێم عەتا کەری بەڵ وە ڕۆ بەروون وە هەر حاڵ ئیمشەو کەروون زیارەت دەرگانەکەی ئەو سەر بنیەو وە خاک ئاسانەی دڵبەر بەو ئارەزووی دڵ گیان بەرشۆ وە بەر ++++++++++++++++++++++ سەرناو: ئیمشەو هەر خەمەن ئیمشەو هەر خەمەن ها نە کەمیندا هەر دەردەن مدۆم وە ڕووی زەمیندا دڵ نە گەردەلوول بێپەرداخییەن دەماخم نە گێج بێدەماخییەن سا، دەروێش! وە عیشق مەلاوی دەروێشان وە یا هووی وە سۆز ڕیازەتکێشان هەر پاسە مەبۆ زەلیلی، دەخیل چینەی زیاتەر مازەم وە زەلیل پەی دیگی دەروون جۆشی کوڵ و کەف تەسکینی نمەک کزەی کەف و دەف با بەیۆ وەش وەش سۆزەی سەداکەت لەرەی نەوای تەرز شیرین ئەداکەت بەو نائیرەوە، بەو دائیرەوە خاس بنیەر هەستیم وە ئایرەوە بەڵ ئیمشەو خەمان شێونان کەڵەک تا سەحەر چوون بۆ گەردشی فەڵەک ++++++++++++++++++++++ سەرناو: ئیمشەو هەم خەمان ئیمشەو هەم خەمان وەنەم سەرداوە سەر تا پای تەنم ئایر وەرداوە جەستەی زەعیفم، ئیستیخوانی ڕێش هەر ئازای ڕێشم مەگریا پەی وێش گۆشت و پۆستەکەم نەفت پێدا ڕژیا مەغز و ئیستیخوان وە هەمدا پژیا کەس نەبی ئاوێش بکەرۆ سەردا بڵێسەش بەرز بی وە هەر تەرەفدا زاهیرەن دڵم هەم کۆسش کەفتەن داخۆم جە دۆسان هەم کێ دوور کەفتەن؟ جە تاوی ئایر تەنوورەی دەروون دیسان سەرواز کەرد زوخاو چەنی هوون ساقی باوەرە ئەو مەی دوو ساڵە پێمدەر یەک جامێ حاڵم بەد حاڵە موغەننی ! کۆککەر سازانت وە هەم سەمتوورێ، تارێ، وە هەم کەرە جەم نەیچی! سا لێدەر، قەزات وە ماڵم دەمێ دەر جە نەی، دەروون زوخاڵم هۆشێکەر هامفەرد! سازان بسازە باڵات وەکاڵای خەمان بوورازە باوەرە بسات تەمام تەیار کە شەوخەفتەنی شووم بە ژاری مار کە قەزای پەنجەکەت دەک لە من کەفێ خەیلێ عاجزم، سا لێدەر دەفێ باوەرە کوورەی دڵ نە جەهد و جەخت ڕووی تەوبیخ وەلای مەعدوومیی بەدبەخت ++++++++++++++++++++++ سەرناو: ئیمشەو هەم دیسان ئیمشەو هەم دیسان دەروون پڕ خەمەن ئەساسەی ماتەم جە لامان جەمەن نە تاوی دووری دڵ بێقەرارەن بینایی دیدەم جە خەفەت تارەن شریخە و گرمەی هەوری دووریی دۆس وە فەنا بەردەن مەغز و ڕەگ و پۆس شەرارەی گرپەی ناری مەهجووری کەردەن وە غوبار کۆگای سەبووری نە تاقەت مەندەن نە تۆی دەرووندا نە لەیلێ مدیۆ وە لای مەجنووندا یاخوا مەردەنی بۆ وە میهمانم ئیتر نەوینوون دووریی یارانم بەڵکم خەلاسیم نە دەس دووریم بۆ بەو زووخی زامان نەشوون وە گڵکۆ ++++++++++++++++++++++ سەرناو: ئێمە گشت فانی ئێمە گشت فانی، هەر ئەوەن باقی نازوون وە بازووی پڕ نەیرووی ساقی خەڵاسیش دا پێت وە یەک پەیمانە ئازاد بیت جە بەند بەستەی پەیمانە عارفان چ خاس پەی وە حەق بەردەن وەسیەتی حافیز وە جا ئاوەردەن دەفنت نە پەهلووی مەیخانە کەردەن وە سەر خاکتدا سەبووی مەی مەڕدەن قەڵەم یاد کردار یار و ئەغیاردا ڕەقەم کەرد تەئریخ وە ڕووی مەزاردا: جامێش نۆشاوە چون مەردان ویەرد گۆشەی مەیخانە وە زاویەکەرد ++++++++++++++++++++++ سەرناو: ئەدای پەشێوی ئەدای پەشێویی حاڵاتی جەستەم دوورەن جە تەحریر خامەی شکستەم بەڵام مەعدووم هەرس دیدەش جۆش وەردەن ناعیلاج خامەش وە دەسگیر کەردەن پەلەپەل پێکان پەل وە خامەدا یەک فەرد ڕەقەم کەرد وە ڕووی نامەدا: ئیسە دیدەی دڵ دێوانەکەی وێت نە بێخی ئاودا مەگێڵۆ پەرێت ++++++++++++++++++++++ سەرناو: ئەمجار سەختتەرەن ئەمجار سەختتەرەن زامم جە جاران چڵ مدۆ دایم چون گەستەی ماران هەر وە زۆر مەندەن ڕای ئامای نەفەس تای ڕیشەی تاقەت شییەنم جە دەس بڵێسەی فیراق سۆچنان جەستەم ناسۆرەن زامان گازی خەم بەستەم دووی کەواوی دڵ پۆشان سەر هەردان زەرد کەردەن ڕوخسار پاییزی دەردان سەرسامەن عاڵەم یەکسەر جە ناڵەم فەڵەک مۆرەی بەد شانا وە تاڵەم مەینەت سەر بەرزەن، شادیم زگارەن ساقی! جامەکەت ئەمجار وەکارەن بۆرێ وە مەجلیس لا بەر پەردەی شەرم وە دەورێ دیسان بەزمێ کەرمێ گەرم تا موتریب وە ساز حەنجەرەی بێگەرد هوردۆ مەقامێ دەوا کەرۆ دەرد بەڵ ناکا نەیچی بەیۆ جە لاوە وە مەقامەکەی قەقنەس ئاساوە بەزمێمان جەم بۆ چون هەردە جاران بنۆشین جامێ وە یادی یاران هەر وە زۆر مەندەن نیم نەفەس باقی پڕ کەر جامەکت، دەخیلم ساقی! ئەر ئازیز وەی تەور لێم کەرۆ ستەم خەلاسیم نییەن ئەمجار خاتر جەم عەرەق چون شەونم نیشتەن نە ڕووی گوڵ تەڕ کەردەن تاتای توغراکەی سونبوڵ جە قازانی خەم، دڵ کەردەن وە ئاو وە درۆ ماچۆ مەگێروو گوڵاو ئازیزم! گوڵاو بۆی خۆی کوڵمی تۆن ئەر بۆی تۆ نەبۆ بۆی گوڵاو جەکۆن؟ زەڕەی بۆی زوڵفت کەفتەن نە بەرزان بۆی گوڵان کەردەن جە بەرزان هەرزان ئازیز، وە مەرگت گەر ئینسافت بۆ هەنی کافییەن بۆی زوڵفت پەی تۆ ئیتر چ حاجەت وێت مەدەی عەزاو قەبووڵ کەری جەور مەگێری گوڵاو؟ ++++++++++++++++++++++ سەرناو: ئەنیسی خەیاڵ ئەنیسی خەیاڵ دەردانی پڕ زام! مەرهەمی جەستەی خەستەکەی ناکام! خەیلێن نە گێجاو بەحری مەهجووری نە دەوری دووەی تەنوورەی دووری پووشەکەی جەستەم وە پەنا کەفتەن سامیعەم خەبەر یاران نەشنەفتەن ئینشەڵڵا، چەنی خۆشحاڵی، شادی نە شاخەی شۆخیی گەردوون، ئازادی چەنی وەشبەختی دوو دەس نە گەردەن عومرتان وە عەیش عوشرەت ویەردەن نەک چون من جە دەس بێمەیلی دڵبەر مەکێشوو هەر سات هەزار دەردیسەر دایم دڵ ڕەنجوور هیجرانی یارم زەنجیری جەفای زوڵفی نیگارم خوسووس شەرارەی دووری زۆر کەردەن مەزرەعەی هەستیم وای سەبوون بەردەن کەس بە وێنەی من پڕ مەینەت نەبۆ گوروفتاری دۆس بێبەینەت نەبۆ هیچ کەس موبتەلای دووریی یار نەبۆ چون من سەرگەردان بێقەرار نەبۆ کەس نەبۆ چون من یاری بەدکاران زامداری موژەی دیدە خوماران جە هاژەی هووناو دەروونی پڕ دەرد نە گەردشی چەرخ گەردوونی چەپگەرد تا جە تۆ بڕیام وە مەرگت قەسەم ساتێ ئاسایش نەدیەنم وە چەم نەکەری خەیاڵ گلەیی کەردەن نەواچی بادەی بێشەرتیش وەردەن ئەر زەلیلی دەس بێشەرتان نەبوون کەی مەبۆ مەیلت فەرامۆش کەروون؟ ++++++++++++++++++++++ سەرناو: ئەو جا بەزمگەی ئەو جا بەزمگەی کەس جێ نەڕەستە مەنزڵگەی سەیاد هەزاران خەستە من نەچیرەکەی هەزار زام وەردە هەر زامێ پەی وێش زوخاو سەر کەردە ترسیای سەدای ماردم هۆش بەردە ڕەمیای بۆی بارووت هەردە وە هەردە کەی تەوانای سەبر دیارانمەن، یا پەروای تاقەت بێیارانمەن؟ ڕووم کەرد وە سارای هەرد و بەردەوە وە سەد ترس و لەرز جەستەم شەردەوە چ داوایێوەن مەکەردێم چەنی؟ بازدێم، نیم ڕەمەق پەی جارێو هەنی ++++++++++++++++++++++ سەرناو: ئەو ساتە زانام ئەو ساتە زانام بەختەکەم شەڕ بی عێلەکەم هامڕای عێلی سەگوەڕ بی ++++++++++++++++++++++ سەرناو: ئەی دڵ مزگانی ئەی دڵ، مزگانی، ئاما کۆچی یار شای شادی سەر دا، خەمان کەرد فیرار ها گەرد و غوبار مەحمەل دیارەن دەک لێڵاویت بۆ چۆنت قەرارەن؟ چون بەدەن جە تاو هیجرانی باڵاش ئەسڵەن هازو هێز نەمەندەن جەلاش فیراقش بەو تەور تەوانا سەندەن پا قووەی ڕەفتار جەلاش نەمەندەن فرسەتەن ئەڕواح بشۆ وە پێشواز پەردەی بینایی تۆ پەی پایەنداز دیدە فەرش بووزۆ وە سەتحی ڕێشدا تاکە سەمەندش پا بنیۆ پێشدا عەینەین! وە ئەسرین ئاوپاشی ڕاش کەر نەک گەرد بنیشۆ وە گۆنای دڵبەر با شای خاڵخاسان جەمین پەڕەی گوڵ وەی ئەساسەوە یاوۆ وە مەنزڵ ++++++++++++++++++++++ سەرناو: ئەی ڕۆشنیی چەم ئەی ڕۆشنیی چەم! تاکەی؟ تەشریف بەر لێڵاوی، سا دەی! هووناوەی هوون کەر پەی چێش، قیبلەکەم عەزمی سەفەر کەرد؟ سێڵاوی دووریش ڕیشەی هەستیم بەرد بینایی وە ڕاست دڵەی پڕ دەردم! ئای چەند سەرسەخت بیم لوای نەمەردم! بڵێسەی کوورەی هیجرانی باڵات گەرمیی مەحروومیی تۆزەکەی پاڵات ئایر دان بەی تەور مۆبەت سەرای دڵ یادەکەت مەندەن پەی مەسکەن خەجڵ دڵە! وە بادەی وەسڵش بادی بی دەماخت نە ئەوج برجی شادی بی هیجرانی باڵاش وە هیچ مەزانای وێت وە ساحیب سەبر تاقەت مەوانای سا ئیسە، ها دەرد دووریش ئاوەرد جۆش سەبرت ئەر ئازان بمانۆ شنۆش ++++++++++++++++++++++ سەرناو: ئەی گرد مەوجوودێ ئەی گرد مەوجوودێ جە تۆ گرت مایە مەوجوود هەر تۆنی، ماسیوا سایە پەنهان بی تەنها، وەحدەتت مەوج وەرد پەی شناسایی زوهوورێوەت کەرد بە وێت، جەی عالەم بێبەقای ناسووت ئەر وەی گرد جیلوەی وەرین نەشناسووت بە سەد جیلوەیتەر بێچوون و چەنی شناسایی تۆم نمەبۆ، هەنی سەروەشم بەی وەسف جەمالیتەوە باز هەم بەی جیلوەی جەلالیتەوە ئەر هەر بەو عادەت سەروەش نیگاران پەی فەنای یەکسەر خاتر پڕ خاران چار نییەن جە دەس جیلوە نەکەردەن بسم اللّە ئەو تێخ، ئێد کەچیی گەردەن یاگێوتەر نییەن دادی وێم کەروون جە دەس تۆ بێداد وە لای کێ بەروون واوەیلام بێحەد، زاریم بێشۆمەن جە لای تۆ فەریاد، جە دەسی تۆمەن ++++++++++++++++++++++ سەرناو: ئەیازی هەمڕاز ئەیازی هەمڕاز ناڵە و ئاخ و دوود عەرزش هەن وە خاک ئاسانەی مەحموود یاوا، وات، نامەی شیرین ئینشادت: نەی ڕەمەزاندا نەشوون جە یادت نەکەردەن ئیفتار، دۆسەکەی کامڵ! سیوای وە مەیکووس خەیاڵەکەت، دڵ «فاتحەی کتاب» دوعام، شەو ئەر ڕۆن ئیلتیماسی حوسن خاتمەکەی تۆن حەق وە لوتفی وێش باوەرۆ ئەوڕێت سوودی سەرمایەی عەقیدەکەی وێت وەرنە من لافاو تاوانان بەردەم دوعا ڕای دەرگای قەبووڵ گوم کەردەم نەیچی! من پەنجەی پای ناڵەم سفتەن تۆ دەی چون تەئسیر وە ناڵەت جفتەن چەند فەردی مەعدووم دەروون نە وەیدا باوەر جە تەنخوای ناڵە وە نەیدا: من وێم مزانوو کام تۆمم کاڵان یاران پەی هیممەت وەنەم مەلاڵان کەرەم دەر نە دەس ڕجای ئەوگاران بۆ بەخشەم وە عەشق مەزننەی یاران وەختێ گۆشەی شار خامۆشان بۆ جێم نەبوون وە تەسدیع هامسایانی وێم ++++++++++++++++++++++ سەرناو: باعیسی وجوود باعیسی وجوود جە ماه تا ماهی دەلیلی ئیسبات سونعی ئیلاهی زیای بیناییم، نووری چەمانم سەرمایەی حەیات دین و ئیمانم! من وێم مزانوو بێئەمریم کەردەن ئیتاعەی فەرمان عەبدیم نەبەردەن عومرم سەراپا غەرقی غەفڵەتەن زادی ئاخرم باری خەجڵەتەن بەڵام مشیۆ تۆ وە فەزڵەکەی وێت کردەی من نەبۆ بەهانە پەرێت ئیغماز کەی جە گرد نابەکاریی من جە ڕوو سیایی و بەد کرداریی من پەی من کافییەن ئەی گرد ئینفیعال بۆ بە ڕەحمی وێت بکەرەم پاماڵ مەدیە وە تۆمار کردەی ویەردەم بدیە وە زەردیی ڕوخسار ئاوەردەم هەرچەند شایستەی عەفوت نەداروون ڕووی شەرمەندەگی وە دەرگات ماروون جە بەحری کەرەم بێبەشم مەکەر شەڕی نەفسانی جە ڕاگەم لابەر تا بە فەزڵی وێت بوانیمەوە جە دەس هەوای نەفس بسانیمەوە بەڵکم جەی ئاخر پەی وێم فکرێ کەم تەدارەک پەی چەند تەزبێح زکرێ کەم بەڵام بەو شەرتە چەنیم قبووڵ کەی بەهانەی ئەسباب عەفوم وسووڵ کەی نەفسی بەد کردار، بێدینی بەدبەخت شوومی سەرگەردان خەیاڵانی سەخت! پەی چێش عادەتت وە گوناه کەردەن؟ ژاری مەحروومیی ڕەحمەتت وەردەن ڕاگەی حەقیقەت جە ویرت شییەن یادت پەی مەحبووب حەقیقی نییەن مووتنی ئەسڵیت نە خاتر لوان مێخی مۆبەتت نە ڕووی خاک کوان دایم گورفتار ئارەزووی خامی یەکسانەن پەرێت نیکی و بەد نامی گا خەریکی دەرد هەوای مەجازی گا مەشغووڵی کەسب کیبر و نیازی گا غەرقی هەوای وەسڵی نازاری گا حیرەتزەدەی ڕوخساری یاری هیچ هۆشت نییەن حەق خەبەردارەن فەردا ڕۆی حیساب میزانی کارەن فکرێ کەرەوە، وادەی لواتەن وەختی شێویای شەوقی سەوداتەن باوەرە وە دەس زادێ پەی سەفەر وێت نەو سەفەردا بێتۆشە مەکەر وە دەرگای حەق بەر، ڕووی پەشیمانی عوزر ئاوەریکەر کردەی نادانی بەڵ لیباسی عەفو بکەرۆت خەڵات جە وەختی مەردەن بدەرۆت نەجات وە نسیوت بۆ سەرمایەی ئیمان نەوی وە ڕیشخەند سوخرییەی شەیتان وە ڕۆی مەحشەردا بگێڵی دڵشاد جە قەیدی عیسیان دڵت بۆ ئازاد ++++++++++++++++++++++ سەرناو: باڵای ئاڵای... باڵای ئاڵای شەنگ سەد بەڵا پێوەن دووکانچەی شادی دەردینان شێوەن دڵ مدۆ وە دەم نێشی ئێشەوە بی وە قەزای سەخت دیدەی وێشەوە ++++++++++++++++++++++ سەرناو: بنچینەی شادیت بنچینەی شادیت جە دڵ بەر ئاوەرد جە ڕای مۆڵەت دوور هەر چێوەت کەرد، کەرد ئیسە ئەی تاڵی و قین گرتەت پەی چێش؟ ئەی تۆ بەستەی زام لابەردەت پەی چێش؟ باری ئەی مەینەت گرد نەوۆ کافی تەمات زیاد کەرد جە بێئینسافی تەرسی بێسامان زەحمەت جە لای من جەوری دڵبەرەن مەنیەی نە ڕای من هەڵای هەی ماچی گیرت نەوەردەن بۆی شەمامەی ئێش عەشقت نەکەردەن من دەردم پەیکار نازی دڵگیرەن دەوای زامانم زامداریی تیرەن بێشەرتیش دۆسی، قارش وەفامەن مەزەی قین لەزەت، جەفاش سەفامەن ئەر هەر سات دەردێ دەردێوتەر چەنی بەیۆ، ماچوون ئاخ پەی دەردێو هەنی ئامانەن، ئەر دیت باڵا عەرعەر تەرز عەرز کەر نەک جارێ، وە سەد سۆزی بەرز بەڵ دڵوەش کەرۆ مەینەت گازەکەش زۆر دۆ وە بازووی غەمزە و نازەکەش پەیاپەی پەیپەی نە دڵەی تەنگدا هەر خەدەنگ بەرۆ وە جای خەدەنگدا ++++++++++++++++++++++ سەرناو: بوڵبوڵی گوڵشەن بوڵبوڵی گوڵشەن بێنام و نەنگی تەزەروی سەر سەرو باغچەی بێڕەنگی نوختەی ئینتیهای دائیرە تەمام نەی دەسی نەیچی تووتیی دیای جام یانەی دڵ وە فەیز ڕای مەولا ناوا تەواری تەڕلان لان مەولان ئاوا پایەت بوڵەند بۆ، سایەت فراوان پەی پەی کەردەی ڕەم دیدە سیاوان ئاهووی توونی دڵ وە بۆی ناف ئاوا تار بی نە جەڵەو گەرمەسێر ماوا ڕەم کەرد، مدراوە، دیاوە مەس مەس پەی هەردی بارگەی تۆ گومەتەش بەس پەرێش کەر سای وەڵگ هیممەت وە یاتاخ نەکەرۆش سەردیی ئێڵاخ بێدەماخ چووزەی سەوزەی هەرد فەیزی تۆ وەرۆ گەردش نەپای کاو لوتفی تۆ کەرۆ نەواچی من پیر ئیفتادەی دڵ ڕێش ئیسە چەنی مەیل ئازیزانم چێش تا یاران نیگای نیهانیشان بۆ... پیران مشیۆ تاف جوانیشان بۆ پەی چێش مەیلی لەیل پیریش مەحاڵەن؟ سەنەی باڵغیش سەد هەزار ساڵەن ++++++++++++++++++++++ سەرناو: بکیانە پەیکێ بکیانە پەیکێ وە پاڕانەوە پەی کێ؟ پەی مەجنوون بیارانەوە مایەی بێمەیلیت بشارانەوە با باست نەشۆ بە شارانەوە ++++++++++++++++++++++ سەرناو: بینایی دیدەم بینایی دیدەم تۆ وە سڵامەت دیدەنی دیدار کەوت ئەو قیامەت ئەر بینش نییەن، هەی ئاواتوازم باز هەر تەسکینەن گۆش وە ئاوازم وە دڵدا تەفسیل زەلیلی ویەرد چێش جە ئەوەڵدا ئاخرش ئاوەرد باز بێتاقەتیم نە ڕووی پەردەوە دەرگای گوزەرگای چەند فەرد کەردەوە هورێزا و پێچ وەرد دووی کوورەی دەروون ئاو ئاوەرد، بەڵ هوون، نە دیدەی گەردوون ڕێزا جە سەردا بڵێسەم کەم بی ئەسباب تەحریر ئەی چەند فەرد جەم بی باز چێش بۆ یاران دەروون پڕ داخەن ئەغیاران دەماخ دڵ وە پەرداخەن سەرد بییەن گەرمیی شەوقی هامفەردان گەرمەن سەردیی زەوق جەرگەی هامدەردان ڕێزان سەوزەی گوڵ مەعاریف وە گڵ چۆڵ بییەن چەمەن جە سۆزەی بڵبڵ نیگای ئیلتیفات گۆشەی چەم کەمەن ڕووی دەشتی سەفای ئەهلی دڵ تەمەن حەڵقەی خەفیەی زیکر ناڵەی هەزار ڕەنگ چوون حەڵقەی دەرگای وێرانان دڵتەنگ مشێو جە گرد لا زاری و شیوەن بۆ جە کام لا؟ لای دۆس، کام دۆس؟ وێنەی تۆ کەی؟ ئێستە، پەی کێ؟ پەی دیدەی مەعدووم چێش بییەن؟ بییەن جە دیدە مەحرووم یانێ های ڕاسەن، یا قسەی ناسەن دیارەن کردەی چەپگەرد هەر پاسەن ++++++++++++++++++++++ سەرناو: بێشەرت و شۆنیت بێشەرت و شۆنیت جە حەد ئەودەرەن ڕەحمەت ئەو یادت، وەفادار تەرەن دیدەم، چون میقراز بێشەرتیت تێژ کەرد دات جە تانتەی وەسڵ جەو پەڕش ویەرد شەرت بۆ تا جەستەی خەستەی مەهجووریت پاکتاوش کەرۆ مەردەن جە دووریت جە شووم پڕ شووم ئەڵحەد سەرای خەم جە سەروازەی هوون جۆی سەر چەمەی چەم وە بۆی ئەو باڵا و خەت و کوڵم و فەم سەرو و سەوزە و گوڵ غونچە بدۆ دەم دڵەی مەینەت گاز سفتەی کۆی قەقنەس نەبۆ وە نیشان تیری موژەی کەس ++++++++++++++++++++++ سەرناو: بێنازەن بێنازەن ئەسباب ئەسپ و سواریت بێکەیفەن ئەساس خاسەی شکاریت یاوەران جەمەن، وادەی شکارەن ئای لاڵ بام سەدای تۆ نادیارەن پەنهانەن سیمای سیمین وارەکەت شێوەی کۆتەڵەن یادگارەکەت خەیاڵی باڵات نە ئایینەی چەم سەبتەن چون یادت نە دڵەی پڕ خەم دڵ گوم بۆ یاگەش مەنزڵگەی چەمەن چەم گوم بۆ یاگەش دڵەی پڕ خەمەن دڵ دایم وە ویر ئەو خەیاڵ شادەن چەم قایم مەشغووڵ نیگای ئەو یادەن ++++++++++++++++++++++ سەرناو: بەتیەی کارخانەی بەتیەی کارخانەی ئۆسای بەغدایی دروومان وە تای نەی ئاشنایی سفیدتەر جە مەرگ مەینەت گازەکەم نازکتەر جە ناز جای نیازەکەم چون لۆنگی مەجنوون بدەوش وەکۆڵدا بگێڵوو وە دەشت پای سارای چۆڵدا جارجار بەو گشت دەرد نەدامەتەوە بەو قامەتی وشک پڕ زامەتەوە شنۆی هەناسان نە سەر دیاران شانۆش چون بەیداخ نە سەر مەزاران ++++++++++++++++++++++ سەرناو: بەرزان هیلال بەرزان هیلالتار وەروان قەرار دا غوڕەی شاری شۆر دڵان دیار دا نەسیم وە بۆی چین چنووری ڕووی هەرد سوب سەباحولخێر دەماخی دڵ کەرد جە پرژەی شەونم نە تۆی پەردەوە نەرگس مەسمەس چەم وڵاو کەردەوە سەوزە وستەن فەرش ئەو چەمەن دەس دەس گوڵان جام وە دەس بوڵبوڵان سەرمەس مەنعم مەکەردێ گرانەن دەردم ئەر شێویا بۆ قافیەی فەردم فەریاد جە شۆرەی ئەرزی چارەی من هەر سەوزەی موراد من نا دیارەن داد جە هەوای شووم بەد ستارەی من هەر نەو گوڵاڵەی من نە پێوارەن یا وەلوەلەی دەف شا دەروێش، جۆشێ بەو سەدای ڕیشەی دڵ ئاشناوە یا جۆشی سەمتوور موتریب، خرۆشێ چەنی ئەی دوو فەرد حەسرەت مەعناوە بەڵ سەوز ببۆ تۆم ئارەزوەکەی دڵ های چەمە دەخیل شەوێ شەونمێ بەڵ ڕوو بنمانۆ ئەو نازک نەو گوڵ دەمە نەسیمێ وادەی سوب دەمێ ++++++++++++++++++++++ سەرناو: بەزمی هامفەردان بەزمی هامفەردان یاری مۆبەت کێش یەک ئیمشەو دەفێ دەروێش، های دەروێش باوەر نەکۆڕەی وەلوەلەی دەفدا ڕووی پەند و تەوبێخ وە هەر تەرەفدا ڕووی پەند ئەو یاران دڵ وە جەهد و جەخت ڕووی تەوبێخ، ئەو لای مەعدوومیی بەدبەخت واچە هەی دڵەی ئەبلەی بێخەبەر هورێز ساتێ تەرک خاوی شیرین کەر «شەوەن، خەڵوەتەن، ماڵ بێئەغیارەن ئاڵەم گرد وتەن، دۆس خەبەردارەن» نەوا میهمان بۆ تۆ نەوینی کەس خەفەت بۆ پەرێت تا ئاخر نەفەس دیدەت تۆزی غەیر نیشتەنش وەنە جە جۆی سەوزەی دڵ ئاوێش دەر پەنە وەر تۆ بیناییت پەردەش ها نە سەر ئەو تۆ موینۆ جە تۆ زەریفتەر ئەمجار یاد کەر عومر عەبەس ویەردەت باوەر وە خاتر ناپاکیی کەردەت سەر ئەفگەندە بەر چوون شەرمەساران چەمەی چەم هورکەر چوون سەیلی واران بەڵ شۆرۆ بەو ئاو کەرەم فراوان بابەت وە بابەت سیاهەی تاوان ++++++++++++++++++++++ سەرناو: بەڵێ خاڵۆکەم بەڵێ، خاڵۆکەم، قەدیم دەستوورەن: پەی مەیزەدەی مەی کەباب زەروورەن نامە و کەبابت وە مەعدووم یاوا ئەوش نە ڕووی چەم، ئێد وە دەم ساوا گەردی دەردی ئێش دەروون بەردەوە عەشقەکەی قەدیم تازە کەردەوە سێرت جە ئێشای زام نەوەردەبێ ئیزهارت پەرێ نمەک کەردەبێ جە من نمەک دای، جە قاسد کێشان جە تۆ زامەت دای، جە زامەت ئێشان ++++++++++++++++++++++ سەرناو: تا تەوانام بی تا تەوانام بی شەو بێداریم کەرد پەرێ نۆشای جام بێقەراریم کەرد وێت واتەن هەر کەس شەوان بێداربۆ مشیۆ مەستی زەوق بادەی مەی خار بۆ ++++++++++++++++++++++ سەرناو: تا جە داخی تاق تا جە «داخی» تاق، جفتی خەمەنان ڕاس باڵا چون چۆی چەوگان چەمەنان شەماڵ وە خزمەت ئەو زامان خەتەر بشۆ، ئەر پەرساش ئێدش جواو دەر: گیرۆدەی ئازار سەختی فیراقەن هەر چەند موشتاقی ئێندە موشتاقەن بەڵام تاوی سەیل دەردەکەی دووریت لافاوی هووناو ڕەنجی مەهجووریت تانجەرۆی ئەی چەم، سیروانی ئەو چەم جۆشاوێ وە هەم ئەی چەم تا ئەو چەم کەڵەک هورمدا نمازا دەو لێش ڕای ئامام نەوی پا بنیەو ئەو پێش ++++++++++++++++++++++ سەرناو: تۆ نەی کۆچدا تۆ نەی کۆچدا کار وێت مەحکەم کەردەن بەڵام ڕیشەی من جە بێخ ئاوەردەن تۆ مەردەی شەهید زیندەی بێباکی من زیندەی مەردەی دەشتی خەمناکی تۆ ئازاد پەی سەیر جای جاویدانی من پا بەستەی بەند ئەی دنیای فانی تۆ لوای بەو ئەجر سەختیی زامەوە من پەرێ حەسرەت دووریت مامەوە پەی تۆ ڕاحەت بۆ، پەرێ من زامەت هەر شەو ڕۆڕۆ بۆ تا ڕۆی قیامەت ++++++++++++++++++++++ سەرناو: تۆپڵاخەی دووکەڵ تۆپڵاخەی دووکەڵ هیجرانی دڵبەر جەم بووگە وەک هەور نە ڕووی سەقفی سەر حاشا خۆ ڕەنگم هیچ نەماگە پێ سەرم وەکوو تاس دەنگی لێوە تێ کەی کەم ئێستەکەم خوێناو ئەکا شەست لە دوو پلووسکەی چاو شۆڕاوگەی بەست لافاوی کووچەی جەستەی زوخاڵی هەڕگاوی هەستی هەرچی بوو ماڵی ++++++++++++++++++++++ سەرناو: تەئسیری خەیاڵ تەئسیری خەیاڵ کردەی من سەردا سستی شەرمندەن سەرشی وە وەردا سەنگیی سەنگیبار تاوان زۆر کەردەن پیری بەدنامەن قامەت خەم کەردەن تەن کە] خەمیاوە، یانێ دەستوورەن وادەی هورێزنای گیان ئەو حوزوورەن تاوان ڕای نەفەس ڕجا گرتەن لێم کردە یاگەی دەس تەما ناستەن پێم پای هەوەس تەزان، ئارەزوو مۆڵەق مەندەن وە ڕەحمەت بێپایانی حەق دامنەکەی ئاییر دەروونم تۆنی وەی دوو فەردەوە موغەننی کۆنی؟ یاڕەببی نەو شەو تاریکەی فانی هەر تۆ وەکردەی بەدیم مزانی ئای سوبحی مەحشەر سەر ئەفگەندە وێم شەرمەندەی حوزوور خودا و بەندە وێم ++++++++++++++++++++++ سەرناو: تەختەی مۆبەت تاش تەختەی مۆبەت تاش، نەجاڕی دڵتەنگ گیری گێجی دام کڵافەی شەوڕەنگ! نامەی ئایرین گەرمی ئەنگێزت دووی پووشی جەستەی دەردینان خێزت یاوا و حاڵیم بی یەک یەک ئیشاران خەندەم کەرد، هەیهای، دەردەکەن یاران ئەر ڕاسەن دۆسیت دۆسەکەی گیانی من وە دار کۆڵەک خەمان مزانی هوونی بێپایان دەردم وەردەبۆ تەجرەبەی تۆڕدام عەشقم کەردەبۆ هاڵای گرپەی دەرد ئەو باڵای ئاڵا نەکوورەی دەروون نەگرتەن باڵا دامی دووبادەی سەیادی قاتڵ نەپێچیان نە دەور پای شکستەی دڵ فرسەت نەکەوتەن بەو ڕەنگ قادر بۆ جەفاش فراوان، وەفاش نادر بۆ دەخیل زووتەر کێش پات ئەو دماوە نەگنی نەی تۆڕدام وە هەردوو پاوە جەو دما وە دەس پای ئیستیغناوە لەرزی وە سەر تەڵ داری فەناوە سەر وەنەت ببۆ وە باری گەردەن بوازی هەر سات ئاوات وە مەردەن نە پەی ئەو ڕەویەی بەینەتداری بۆ نە پەی تۆیچ وە مەرگ ڕستگاری بۆ ئەو سەبر، ئەو تاقەت، ئەو تەوانای دەرد نەدیت خەرجم کەرد فائیدەش نەکەرد ئیسە سۆچیای گەرمیی دڵسەردیم سەودایی سارای دەردی بێدەردیم ئەر مژنەوی خاس، وەرنە مزانوو مەرگ پەرێ تۆیچ مدۆ نە زانوو ++++++++++++++++++++++ سەرناو: تەدریس و تەقدیس تەدریس و تەقدیس، تەمجید بێدەنگەن حەسارەی تەقریر تەوحید بێڕەنگەن پارچەی تەئلیفات شێخی موهاجر گرانەن، نییەن مشتەری و تاجر کشف الغطای سەدر موحەممەد جەسیم غونچەی نەشکوفتەن بێشنۆی نەسیم بێنازەن کیتاب عەتای دەولەتەین یەند ڕێزان قەترەی خوم جە عەینی عەین تەفاوت نییەن تێشدا جە مابەین شوبهەی شین و سین میسلی عەین و غەین باڵ نمەدۆ تەیر تەحریر وە هەمدا گا وە ڕووی ڕۆمدا، گا وە عەجەمدا ئومەنای دەوڵەت جە گردین لاوە نە ئینتیزارەن چەم نە ڕووی ڕاوە تەوانای وانای فەرمان نەمەندەن چەپەر بێ جواو، خەبەر پا بەندەن سەهلەن بینایی دیدەی مەعدووم سەند داخم هەر ئیدەن ئاخ پەی یاران مەند بەڵام کێن بدۆ نەی ڕاگوزەردا شان وە شانی شێر قەزاو قەدەردا مەحبووبەن هەرچی موقتەزای قەزان مەرغووبەن جەلای هەر کەس پێش ڕەزان هەر شێرێ جە شیر شێران شیر وەردەن گەردەن پەی زنجیر تەقدیر کەچ کەردەن بارێ ئەگەر هەور ئەلتافی باری پەی مەدەدکاری وە دڵدا باری دیدەی سەر ئەر شی دیدەی سڕ کافین ئێد دای مونافین ئەو دەوای شافین ئێد وەزیفەی گڵ، ئەو لەتیفەی دڵ ئەو چوون مەنزڵەن، ئێد بێچوون مەنزڵ ئەو بەقاش نییەن، فەناش تاقییەن ئێد عەتای تاقی و باقی و لاقییەن ++++++++++++++++++++++ سەرناو: تەرسوون ئەر بەدەن تەرسوون ئەر بەدەن ڕەقیبی دڵسەرد بکەرۆش وە خاک گەردشی چەپگەرد وەختی تەماشای ئەو بەرگوزیدەم شەماڵ بشانۆ گەردش ئەو دیدەم ++++++++++++++++++++++ سەرناو: تەرکی ئینتیزار تەرکی ئینتیزار حەیات کەردەنم یانێ ژاری مار دووری وەردەنم شنۆی ڕەشەبای زووسانی هیجران سەرچڵەی عەیشم کەردەن وە بوریان کڵێڵەی خەفەت نە سەرکاوەی دڵ مەزرەعەی شادیم کەردەن بێحاسڵ من جە خێڵخانەی مەینەت پاماڵم کۆن بەینەتدارێ پەرسۆ ئەحواڵم؟ مەر ئازیز وە خەیر تەشریف باوەرۆ نەی گێجاوی خەم دەسگیریم کەرۆ بنۆشنۆ وە دڵ سەهبای مەیلی وێش پەی وەختی مەردەن حەسرەت نەبۆ پێش ++++++++++++++++++++++ سەرناو: تەن وە ئێشی دەرد تەن وە ئێشی دەرد زامەتان خەستەن فەڵەک پای ئامام وە زنجیر بەستەن خەمزەدەی خەمکێش خەفەتبارەنان بەری جە یاوەر، دوور جە یارەنان چەپگەرد هەر ساتێ دەردێ مدۆ پێم ڕای ئامای قاسید ئازیز بەستەن لێم وەشڵە هەر پەی تۆن هەی شادمانی پەیکی لەیل ئاما وە تۆ مزگانی ++++++++++++++++++++++ سەرناو: تەژنەی گیان تەژنەی گیان وە لەب سەودای سەبووری کەفتەبێم نە گێج دەریاکەی دووری دیم نەشئەی فێنک سێراوی سەردا شنۆی زیندەگیم ئاما وە بەردا چێش خزر نامەی تۆش ئاوەردەوە دەک ڕستگار بۆ ئیحیام کەردەوە یاوا پێم پەرێم زایەڵەی زاریت زگاریی زامەت بێ دەوای کاریت مزانوو، هامفەرد، پڕ شەرت و شۆنی یارم، دڵدارم، غەمخوارم تۆنی بەڵام تۆیچ ئاخر ڕەنجت بەردەبێ چەند جار ژاری مار دووریت وەردەبێ پەی چێش وستانێت ئەی مەهلەکەی سەخت فتوای لوات دا، لوا وە بێ وەخت زوانت، وەختێ ئیزنش تەڵەب کەرد لاڵ کەی نمەبۆ چەنی «ئا»ش ئاوەرد چەم بێ پەی دینش بیناییش کەم بی گۆش بێ شنەفتش سەداش ماتەم بی تەن بێ بارکێشیش خەستەی هیجران بی دڵ بێ مەنزڵگەی مەیلش وێران بی چ دادێ مدۆ خاکم وە سەر بۆ ئیسە تەمای من یا زایەڵەی تۆ مەعلووم بی وەنەم حەسرەتت کێشان پەی سەیر و سوحبەت سەفای دڵڕێشان هامڕەفێقم دەرد، هامسوحبەتم کۆس وێم جە وێم خاڵی، مەوج مدەو جە دۆس تا ئەو بەو جەماڵ دڵ دەسە پاڵەن من سەیرم مەحاڵ، سەفام بەتاڵەن جەو بۆنۆ فەردم ئیستیفا بێزەن دامەنەش لایق ئەی پەراوێزەن: شێوە ئەر ئێدەن من کەردەنم سەیر فام، خودا حافز! دین، بنیش وە خەیر! تۆ سەروەش وەی سەیر سەفا و بەختەوە من وێڵ وێڵ وەی زام سزای سەختەوە تۆ هەر سات شادیت بێئەندازە بۆ من هەر لاد دەردێ پەرێم تازە بۆ تۆ وێنەی بوڵبوڵ مەستی هەوای گوڵ من چون بایەقوش چۆڵی نەوای دڵ پەرێ تۆ ڕاحەت، پەرێ من زامەت هەردوو سڵامەت، تا ڕۆی قیامەت ++++++++++++++++++++++ سەرناو: جۆراب چون منی زامان جۆراب چون منی زامان نەسرەفتە وە سەر پەنجەی پای ئیستیغنا کەفتە بەدبەختێ چون من تەن کەفتەی کۆیێ یا خەیاڵ خامێ ئەبلەه چون تۆیێ ئەو ڕوتبەی نازک تۆ وە دەروون بەرد جە ڕووی گوستاخی تۆ ئارەزووت کەرد لەب وە تەمای دڵ چەند حەسرەتش بەرد پێش ئاوڵە کەرد فرسەتش ناوەرد ++++++++++++++++++++++ سەرناو: جیلوەی جەلای جام جیلوەی جەلای جام دڵەی پڕ جە گەرد فەرمات پەی تەزبێح ها ڕەوانەم کەرد پەرێ تۆ خاسەن هەر شام تا سەحەر هەر ژمارەی وەسڵ باڵای دڵبەر کەر نەک چون من وضو وە هووناو ئەستە خەم سیواک، نمای مەینەتان بەستە نیشتەی گۆشەی تار نمازخانەی دەرد ڕوو نە پای میحراو هەناسانی سەرد وەی وضو و نما و وەی سیواکەوە جەی گۆشەی میحراو مزگی پاکەوە دانەی مەرجانی هەرسی مەهجووری هۆنیای تای کرژ ڕشتەکەی دووری پەی ژمارەی زیکر کزەی ئێش و نێش کافییەن دەیدەم تەزبێحم پەی چێش؟ ++++++++++++++++++++++ سەرناو: جە بێکەسی جە بێکەسیی وێم تۆم کەردەن وەکەس نە بەکەس شیای، نە بە نیمەکەس سەر جە ڕاستی کەردەنم توفەیل من مەجنوونی تۆم، تۆم کەردەن وە لەیل ++++++++++++++++++++++ سەرناو: جە دووریت جە دووریت دەروون مەوجی دەریای هوون مدۆ وە چەمدا، بەڵام چێش کەروون پاتەختی مەحموود دارالسلامەن منیچ کەمێ فام ئەیاز جەلامەن ئەیازت فاماش تەفائول کەردەن سڵامەتی تۆش وە یاد ئاوەردەن وە خار و خاشاک موژەی چەسپیدە سەد بەستەن نە دەور سەرچەمەی دیدە وەرنە دەجلەی غەم توغیان کەردەبێ تا ئیسە چەند جار بەغداش بەردەبێ ++++++++++++++++++++++ سەرناو: جە سەردیی مۆبەت جە سەردیی مۆبەت ئازیزی بێگەرد جۆی هووناوی دڵ جە دیدەم یەخ کەرد دەستی بێڕەحمیش دا نە سینەی شەوق گڕ وەردان نە جەرگ جەستەی هەستیی زەوق زەهری خەم شییەن نە کامی شادیم هەر دەردەن مەیۆ موبارەک بادیم هەناسەم ڕێزەی دڵ مارۆ ئەو بەر سەر کەردەن زوخاو جە زامی خەتەر مەینەت چون توجار وە مەتای سەد تەرز کەردەن نە دەروون نەوای شادی بەرز دڵ وڵوڵ کەردەن خەدەنگی دووری سۆچنان جەستەم دەردی مەهجووری هانا هامدەردان تاقەت نەمەندەن جەورەکەی ئازیز ڕیشەی دڵ کەندەن بەیدێ وە لای من حاڵم بەدحاڵەن جە دووری ئازیز تەن کۆی زوخاڵەن بزاندێ خەم چۆن کەردەنم پاماڵ دەخیلم ساقی گەردەن سیمی قاڵ جامێ جە مەعجوون دەردی ئەوگاران دوردی وامەندەی بەزمەکەی یاران پێمدەر تا ڕیشەی هەستی کەرۆ پەی قوربان تۆیچ، نەیچی، دەستێ بەر پەی نەی وە تەرزەکەی وێت من لاونەوە وە مەقامێ وەش خەم تاونەوە با خاس خاس هۆشم هیچ نەمەنۆ پێم بەڵ ئازیز وە خەیر ڕەحمێ کەرۆ پێم ++++++++++++++++++++++ سەرناو: جە من تا دووری جەمن تا دووری ئەر سەد فرسەنگ بۆ ئەر بۆ ڕازی بوو زوانم لەنگ بۆ بەڵام چێش کەروو بەڵام هەمڕازەن فەڵەک کەڵەک چین چەنیم کەچبازەن کاردی مەینەتش ئیستیخوان کاوان زیای دیدە و دڵ مەگێرەم تاوان قەڵای ویرم سەیل هووناو بەردەبێ بورجی ئاگاییم وێران کەردەبێ کێشکچیی خەیاڵ خەم فام سەندەبێ دووکانچەی بەدەن بێکەس مەندەبێ فرسەت زانابێ تەریدەی قاتڵ یەکسەر بەردەبێ کاڵای گیان و دڵ خەبەر بیم هۆشم ئاما وە بەردا ئەم لا گیان، ئەو لا دڵ، دام وە سەردا لادێ ئێشی سەخت، ساتێ وەی ڕۆ وەی واتم چار نییەن مەر بشوون وە پەی دیم ناڵچەکەی داخ دڵەی پڕ جە هوون شەقڵش ها نە ڕووی گەردی ڕای دەروون ڕەوانتەر جە هەرس وە سەد قەترە و دەو تا وە مەکۆگەی ئاسەنەکەی ئەو لاڵام و ناڵام حاشات موشکڵەن گیان فیدای تۆ بۆ یە بەڵگەی دڵەن سیوای تۆ ئازیز نەی زەمانەدا کێن گوزەر کەرۆ بەی وێرانەدا؟ نە نیم نیگایێ، نەکەرد تەماشا چێدیش وێنەی ماڵ یاران کەرد حاشا ++++++++++++++++++++++ سەرناو: جە گیان سێر وەردەی جە گیان سێر وەردەی، جە تەن هەراسان خاڵۆی خەمیای خەم خاڵی خاڵخاسان نامەم چون یاوا مولاحەزەت کەرد بشۆ وە پابۆس عەرزکەر جە ڕووی دەرد واچە هەی سەد جار مەعدوومی توفەیل پەرسابێت جە ڕووی گەرمیی کوورەی مەیل کۆ جە دووریی من چ تەورەن حاڵش کێ بەرمەکەرۆ خەم نە خەیاڵش چون ئەوێ جە دین چون تۆیێ دوور بۆ چەم لێڵاو، دڵ تەنگ، تەن سفتەی توور بۆ هەر سات وە نەوعێ دەردش خەتەر بۆ حاڵش چ تەورەن خاکش وە سەر بۆ هامفەرد ناڵەی دڵ، سەیرانگە ستەم هامدەرد دووی دەروون، خەم بەرکەر کۆی خەم تۆ خاسەن نەوتووڵ سەروی سەراوان خەم مدەی وە باد شنۆی سەرکاوان گا چون بۆی نەسیم وە ڕووی شەتاودا گا چون گوڵ نەپای چۆڕەی وەفراودا سەیری لەرزەی نەرم سەوزەی سەر بەرزان سەفای گوڵاڵان سەد تەرزان لەرزان سوب نە سەر ملان سەیادان هامدەم شریخەی «ماردم» کڵافەی کەڵڕەم نەک چون ئەو پابەند قەڵای شاری دەرد جەی وەهار چون وەڵگ پاییزان ڕەنگ زەرد ئاخ نە جەهد و جەخت، داخ زامەتی سەخت بەرگی ماتەم ڕەخت، ناڕەسایی بەخت کزەی خەم چون موو خەم پەنەش وەردەن دووریت خۆ یەکجار تەمامش کەردەن وەختی جۆشی دەرد کزەی ناڵەی سەرد گوم بۆ نە گێجاو گەردەلوولی دەرد ئەو خەندەی بێوەخت مەیۆش وە دەمدا مەگێڵۆ ماچۆ نەو گێج و تەمدا ئەر هەر ئەو بەختەن، هەر ئەو تاڵەمەن دیدەم دیدەنیت ئەڵڵاو ئاڵەمەن ++++++++++++++++++++++ سەرناو: جەرگت لەت لەت بۆ جەرگت لەتلەت بۆ چەواشەی چەپگەرد خاڵۆت جیا کەرد، یەکار بێ تۆ کەرد دیدە، وادەی سەیل هۆنەی هووناوەن دڵە، وەختی بەزم نۆشای زوخاوەن وەش ڕەنگی بازەم، سادەی بێڕەنگی شادی با وەس بۆ، وەختەن دڵ تەنگی وەشی، وادەت شی وەش ئامای وە خەیر شەوقە، وە تەوق بای تاکەی هەوای سەیر مانیایی مەینەت سەرەوکۆی ستەم مەعدوومیی بەرکۆی سەرەوچێرەی خەم چ وەختەن دڵەت جە شادی کەیلەن دەک لێڵاویت بۆ یە وەفا و مەیلەن؟ ئەو چەم بە سورمەی خەمناکی ڕەشتە چەنی گەشتی دەشت پای ڕەشت سەرگەشتە هامڕاز ئاخ و داخ، ناڵە نەوای نەی دڵ کەباب، چەم جام، خەم ساقی، هوون مەی تۆ ئالوودەی بەزم جەرگەی هامفەردان کەیفی مەی، سوحبەت گرۆی هامدەردان ئەو سەبوون سفتەی پڕ داخ بێ پەرداخ تۆ بۆی شنۆی بای ئێڵاخ نە دەماخ ئەو تەشنەی ڕای چۆڵ سای گەردەن پڕ گەرد تۆ سێراو نە پای وەفراوانی سەرد ملان، سەربەرزان، کۆساران، هەردان بێشەرتان، جە داخ وەفاتان مەردان چێشەن ئارایش سەر تا وە دامان مەر خاڵۆم وە عەزم سەیرتان ئامان؟ مەشنیە چینچین چنوور نەکاوان توخوا ماتەم بە، هاژەی وەفراوان چنوور نەکاوان ئەو نەبۆ پەی چێش هاژەی وەفراوان ئەو نەبۆ پەی چێش نەسیم وەس بویەر وە کۆساراندا وەسەن شانای وەڵگ وە دیاراندا شنۆی ئەو بەرزە، ئەو نەبۆ پەی چێش لەرزەی سەد تەرزە، ئەو نەبۆ پەی چێش وە سەدای سەروەش دڵوەش مەزاقان هەنی نەلەرزۆ کەڵڕەم نە تاقان سەدای ماردومان ئەو نەبۆ پەی چێش سەفای کەڵڕەمان ئەو نەبۆ پەی چێش خاڵخاسان بێئان هەر بار وە لێو بان هێلانەی دڵان با هەر پەشێو بان ئەو ئانە پەی دڵ ئەو نەبۆ پەی چێش ئەو لانە پەی دڵ ئەو نەبۆ پەی چێش دەخیل هەی دەخیل خاڵۆکەی گیانی وێت نەی سەفەردا تەنها نەزانی مەرگی تۆم هەرچەند تەشریف بەردەنی تەرکی خەڵتە و خاک جەستەم کەردەنی گیان، دۆسی گیانی، ڕەفێقی ڕاتەن سورمەی بیناییش تۆزەکەی پاتەن هەی ڕۆ نەواچی خودا نەکەردە خەم وەفا و بەینەت نە ویرم بەردە بادەی بێوادەی فەنام وەردەبۆ شەرت بۆ، کامین شەرت، یاران کەردەبۆ تا دڵ جە لەزەت دینت ناکام بۆ ئەو زەوقە تۆ دیت وەنەم حەرام بۆ جەستەی خەستەی خار سەودایی خەجڵ با بەس بۆ، تاکەی، ئەی دڵ وەشیی دڵ؟ چەپگەرد بێفرسەت شانا مۆرەی نەرد عومرێ بی ئاما، ویەرد، گوزەر کەرد زەحمەتەن خەلاس جە دووری وەردە بە هووناو بەیۆ عومری ویەردە ++++++++++++++++++++++ سەرناو: خامەی سەراوێز خامەی سەراوێز نە چای سیایی مەڕێزۆ ئەسرین شەکوای جیایی نامەی سەد شکەنج وە هەم پێچ وەردەن چون من سەر تا پاش شکستەی دەردەن دەوات دووی سیاش جە دەم مەخێزۆ نامە سیا خاک وە سەر مەڕێزۆ دەوات دووی دەروون گێج دان وە هەمدا لیقە وێش کێشان وە لیتەی خەمدا خامە شەق وەردەن دەم مەکەردەوە زار زار مەناڵۆ وە دەم دەردەوە مەوات هەی ئاوات واستەکەی جەستەم هەی مۆمیایی پێشەی شکەستەم کام زام بی جە تۆ من نەویم نەسیب جەفا هەر وە من، وەفا پەی ڕەقیب زامان تاونان هووناوان جۆجۆ دەرد وە بانی دەرد یە جە دووری تۆ بڕیان تای ڕوباب قافیە خوانیم نەمەندەن تاقەت عیبارەت زانیم دەمەی هەناسەی گەرمی تارەکەم نەکوورەی دەروون پڕ جە خارەکەم ئایر دان حوجرەی دڵەی پڕ دەردم سۆچنان کتاو مەجمووعەی فەردم ++++++++++++++++++++++ سەرناو: خاک وە دەسی خاک وە دەسی زۆر زنجیرم کەردەن یادی هەمڕازان جە یادم بەردەن هاو قەد خاک و سەنگ وە جەسەم بارەن نە ڕاگەی جواب، نە جای گوفتارەن ++++++++++++++++++++++ سەرناو: خاڵۆ خاڵۆتەن خاڵۆ خاڵۆتەن، کەم واچە خاڵۆ خاڵۆ دەم وە بان خاڵانت ماڵۆ شەرت بۆ من جە داخ خاڵۆ خاڵۆی تۆ وێم کەروو وە کوڕ چواردە ساڵەی نۆ ++++++++++++++++++++++ سەرناو: خاڵۆ چون تەدبیر خاڵۆ چون تەدبیر دەرد زانات نەوی هانام کەرد ئەو تۆ تەوانات نەوی نەتاوات وێت دەی وە مەودای وەیدا گێجی بدەی نە گێج دەریای بێپەیدا ها خودام، وە حەق شادەتم ئاوەرد خاڵۆت گێج مەوج دەریای هەواش کەرد جە کەنارەوە سەعی کەردەت بۆ هەوڵ پل و پووش ئاو ئاوەردەت بۆ پەی چێش خاڵۆکەی دەروون جە هوون کەیل خەیلێن ئەجزای مەیل لەیلەکەی پڕ مەیل ئامێتەن وە جزو ڕێزەی مەجنووندا حەیفەن ئاو بەرۆش وە توونای تووندا ++++++++++++++++++++++ سەرناو: خاڵۆی مەنزڵچی خاڵۆی مەنزڵچی، سەرکردەکەی دەرد تەمام بە تۆ بێ، ئای یە چێشت کەرد وەختێ بەو گەردەن سیمی سافەوە چون وەش غەزاڵان وە بۆی نافەوە دەور مدا وە پێچ ئەو کاو و بەردە بۆ بەخشانیش بێ ئەی هەرد بەو هەردە ئەو بۆ جەو تەرەف سوب نەسیم ماوەرد هەر جە دوورەوە زام ساڕێش مەکەرد خەیلێ دێرت کەرد، ئافەرین چەپگەرد بەو بۆ دڵشاد بیم ئەویشت لابەرد ئیسە ئەو گەنجە، بەو لار و لەنجە ڕەنجەکەرد پەنجە، شی پەرێ «پەنجە» ئیسە تەن وەی زام دڵ وەی خەریکی دیدار وەی دووری، مەرگ، وەی نزیکی ئەولاو کێ بەروون ئەی ڕا و تەدبیرە ئاخ جەی تەدبیرە، داخ جەی تەقدیرە خەیر، مەینەتزەدەی جەگیان هەراسان بەختە سیاکەی وێش زووتەر ناسان پەی فەنای ئەو هەم جە دووریی دڵبەر نەک جارێ، چوار جار، اللهُ اَکبر ++++++++++++++++++++++ سەرناو: خورشیدی سەمای خورشیدی سەمای شیرین جەماڵان ڕەشک ئەفزای گرۆی دیدە غەزاڵان دانەی شەو چراغ خەزانەی هەستی مەزەی نەشئەی عەشق بادە پەرەستی دەرگای مەدینەی حوسنی مەحبووبی نوور ئەفزای دیدەی جەرگەی یەعقووبی خودا وە تۆش دان باڵای عەرعەری هەر لایق وە تۆن شێوەی دڵبەری کاڵای شیرینی وە باڵات بڕیان تاسی مەحبووبیت نە عاڵەم زڕیان نیگای خوماریت خەمبارم کەردەن ژاری ماری دەرد وە دڵدا بەردەن بە وێنەی نەچیر زامان ئاوەردەم نێشی گولوولەی خەمباری وەردەم پەلەپەل پەی گیان نە دەس تۆ بەردەن پەنام وە پەنای فیراقت کەردەن ئیسە بێئامان خەستەی هیجرانم سەر کەردەن هووناو نە تۆی زامانم نە سەبرم چەنی دووریت مەسازۆ نە وەسڵت وە مەیل دڵم نەوازۆ نە یارای خەیاڵ وەساڵی تۆمەن نە تابی دووری خەیاڵی تۆمەن دڵ مەندەن نە بەین خۆف و ڕجادا مەزانۆ ڕاش کام یاوۆ ئەو لادا مەرتۆ وەکەرەم تەشریف باوەری یا وە لای وەسڵت ڕابەریش کەری وەر نە، ئازیزم، قەسەم وە نامەت سەرگەردان مەبۆ تا ڕۆی قیامەت ++++++++++++++++++++++ سەرناو: خەرامان ئاما خەرامان ئاما نە تۆی پەردەوە نیقاب جە سەفحەی جەمین کەردەوە چیهرەی دڵەی زار خووی گەرمی پێدا عەکسش هوەیدا منمانا تێدا باوەشێن مەکەرد ئەو سەفحەی بێگەرد نازکیش جە باد ئیحتیات مەکەرد نە تۆی ئایینەی جەمینی چون گوڵ کەم مەکەرد نمنم خووی ڕوخساری دڵ ++++++++++++++++++++++ سەرناو: خەمە فرسەتێ خەمە فرسەتێ ساتێ، وە بێخەم گەردی پاڵاکەش بگێروون وە چەم چەرخی چەپ چەنیم ڕاس بەستەن کەڵەک مەر من سەنگم دان وە مینای فەڵەک چەپگەرد نمازۆ ساتێ فەراغەت ئەی خوا یا وەسڵ، یا مەرگ، یا تاقەت خەیر بۆ هەم فەڵەک کام خەیاڵ کەردەن دیسان من پەی شەڕ وە یاد ئاوەردەن دیارەن ئەساس دووری مەسازۆ وە باڵام کاڵای خەمان مەورازۆ داخۆم دووی دووریی کێش هانە سەردا دیسان من مدۆ وە ڕووی چەمەردا ++++++++++++++++++++++ سەرناو: خەیاڵانی شەو خەیاڵانی شەو، هیجرانانی ڕۆ قامەت خەم کەردەن چون چەمیلەی چۆ دڵ بییەن وە دار سەر کەلی لای وەشت چەمەڕای وایێن ڕیشەش بێ وە دەشت ++++++++++++++++++++++ سەرناو: خەیلێوەن خەریک خەیلێوەن خەریک زاکەی زەحمەتم بەڵکوو وە ڕا بۆ بەرشۆ عوسرەتم فەڵەک وە بەختم مەگەس مکیانۆ وە ڕاکەی ڕەحمەت هەمدیس مڕیانۆ ++++++++++++++++++++++ سەرناو: داخۆ چەند داخۆ چەند وە دەس نازک نەوهاڵان ئامۆشۆت کەردەن پەی دلێ ماڵان ئیسە ها چون من پەشێوت بی حاڵ کەفتەنی نە خاک مەکەرات پاماڵ ++++++++++++++++++++++ سەرناو: دنیا نە گێجاو دنیا نە گێجاو تاریکە شەو بی جەلاو ڕۆشنیش جە لا چون خەو بی ناگا شۆڵەی خۆر سوب فەردا، فەڕ دا وە سەر بەرزی هەرد وە دەشت و دەردا تەک دا تاریکی ئەو لای تەریکی ئاڵەم چەنی نوور کەرد هامشەریکی دنیایێ مەویەرد وە عەیشی شیرین ساحیب دین دیدەش بی وە ساحیب دین ئەو شۆڵە دیسان مەیل ئاوەردەوە ئەو لای پەردەوە تەشریف بەردەوە دڵ پەی تەئریخ وات وە دەم دەردەوە: ئەی وای وەی دنیاش تاریک کەردەوە ++++++++++++++++++++++ سەرناو: دووریت دیارەن دووریت دیارەن چەند ساحیب نێشەن تۆی دەروون وە خار نێشێوتەر ڕێشەن هەرچی بوینوون شێوەی تۆ پێشەن دڵ وە هەتیتەی حەسرەتدا کێشەن هەر ماهێ نەو بۆ حاڵم پەشێوەن چون هیلال شێوەی ئەبرۆی تۆش پێوەن نە شەو ڕاحەتم، نە ڕۆ دڵشادم شەو زوڵف و ڕۆ ڕووت مەوزۆ ئەو یادم شمشاد و نەرگس وەنەوشەی چەمەن سەیرشان ئازار بینایی چەمەن ئاد مارۆ بە ویر تەرزەکەی باڵات ئەو دیدەی مەستت، ئێد خاڵی ئاڵات سۆچنۆم حەسرەت دەردی جیاییت نەک چون بڵێسەی یادی تەنیاییت وە مەرگت، دیدەم، هام نە گوزەردا منیچ لام لای تۆن ئارۆ یا فەردا موتریب مەقامێ دەردم ناچارەن ساقیا جامێ دۆس ئینتیزارەن ++++++++++++++++++++++ سەرناو: دڵ بییەن وە دار دڵ بییەن وە دار سەرکەلی لای وەشت لافاوان ئامان ڕیشەش وست وە دەشت چەمەڕای وایێن نەسیم بدۆ لێش ڕیشەکەنش کۆ ساکن بۆ پەی وێش ++++++++++++++++++++++ سەرناو: دڵ تەم کەردەوە دڵ تەم کەردەوە گرتەوە کاوان دیسان دووی نامەی تۆش وەلا یاوان مەزموون: هەوای مەرگ، زامداری تیرت پەنهانی قاتیل، دەوا و تەدبیرت لاڵ بوون پەی مەینەت جەستەی خەستەکەت بمروون پەرێ زام جێ نەڕەستەکەت من و تۆ بەڵاو زاممان ئاوەردەن نە چەشمەی حەیات ئاومان وەردەن خەیاڵی خامەن ئینە تۆ کەردەن پەیما نمەبۆ جیایی وە مەردەن ها چەند هەوات دا وە گێجی بێپەی بمری و بناڵی گیان تەسلیم نەکەی تازە وارگەی عەشق مەنزڵ کەردەنی هەوەسیای هاژەی باڵی دەردەنی خوسووس بەو جەستەی خەستەی مەهجووری کەفتەنی نە پێچ ڕای دوەی دووری هۆشت نە تۆی کاخ دەماخ فیرارەن وەرنە چ خێرەن قاتیل دیارەن کێ بۆ چون خەدەنگ ناز هەوا دەرۆ هەریەند بزانی جەوپەڕ بویەرۆ؟ کێ بۆ بەو جەمین نەزاکەت چون گوڵ خەیمەش هوربدا نە پای دەشتی دڵ؟ کێ بۆ پێکۆ دڵ زامی نەسرەفتەش یەکێو کوشتەش ئێد ئەو زەمین کەفتەش؟ ئەر ڕستگاریت جەو دەرد ئومێدەن دەوای خەلاسی و تەدبیرت ئێدەن مەبۆ وەختی سەخت زامان ئاوەردەت ڕەما و پەلەپەل هەردەو هەرد کەردەت پەی چێش تا ئیسە لێت مەعلووم نییەن سەیاد جە واکوژ درێغش نییەن بەڵام یە ڕەویەی ئیبتیدای مەشقەن خیلافی شێوەی تاویای عەشقەن دەخیل سەر سەخت بەر هەر بکەر بازی نازی دڵ سەرد بۆ جە تیرئەندازی نە دڵەی پڕ زەوق کۆنە نەچیردا های لەزەت دارۆ تیر وە شۆن تیردا ++++++++++++++++++++++ سەرناو: دڵ دیار نییەن دڵ دیار نییەن های نەکەردەبۆ وە خزمەت ئازیز تەشریف بەردەبۆ جەو دما من داد وە لای کێ بەروون نا بەڵەد تەنیا ڕا چۆن دەر کەروون پای دڵ سفتەی دەرد سەر هەردان سەختەن وێت یاونەوە های نەسیم وەختەن بکیان پەرێ من دڵ ئەو دماوە وێت، وێت ئاسایی بشۆ وە ڕاوە مسپارووت وە دەس کزەی تاسەی وێم وە دووی گێجەلوول سوب هەناسەی وێم چون یاوای وە لای باڵا عەرعەر تەرز پەرساش جواو دەر وە زایەڵەی بەرز گلاراوش بێ چەنی ئێشی چەم مەوات و مەوەرد خەم وەکووزەی خەم چەم جە ئێشی دەرد مەحروومیی پاڵات نمەنمانۆ عەکس خەیاڵی باڵات پەردەی لێڵایی گرتەن دوو دیدە خەڵوەتەن سا بۆ هەی بەرگوزیدە دیدەم تاوی سەیل هووناوان وەردا ها ئاو بە دەردا ئاما جە سەردا دڵ یەند جۆشی گەرم خەمان دان پێدا سەمەندەر لانەش مەگێرۆ تێدا فیدات بوون ئازیز جەمین پەڕەی گوڵ دووریت کارێ کەرد ئانە چەم، ئێد دڵ حاڵ چینە تەنگتەر نییەن پێم ئامان قەدەم ڕەنجە کەر ئامان سەد ئامان چون جەستەی خەستەی مەینەتان مایە بەڵکم دیدە و دڵ نەشان وە زایە دیدە سورمەی تۆز پاڵاکەت ناسەن دڵ جای دەردتەن مەندەیشا خاسەن ++++++++++++++++++++++ سەرناو: دڵ یەند وە ئایر دڵ یەند وە ئایر دووریی تۆ تاوان سا ڕاسەن کزەش وە لات نەیاوان وەی من پەی سەفای یارانی هامدەم ئای پەی ئەو سەیران ماردم و کەڵڕەم یاران گردین شین وە توونای تووندا هەر خەیاڵ مەندەن نە تۆی دەرووندا ++++++++++++++++++++++ سەرناو: دڵ، ئەرچی دڵ، ئەرچی شەماڵ قەدیمی یارەن پەی شنۆی زلان یار جە نزارەن بەڵام کۆن تاقەت دینی دڵدارم ئەو مەه چیهرەسان، من کەتان وارم ++++++++++++++++++++++ سەرناو: دڵە تەبخاڵەت دڵە تەبخاڵەت وە لێو مەوینوون حاڵاتت یەکجار پەشێو مەوینوون کەردەنیش وە تەیر هەڵۆ هۆش بەردە ناکەردە کەردە، کەردە نا کەردە ڕجات، گا بەیدیم، گا بەودیمەدا ها نە گەردەلوول بادی بیمەدا ها نەکەردەبۆت تۆ یەت کەردەبۆ پێچی عەقیدەت وە دڵ بەردەبۆ پەی چێش هەرکۆ وەسف وەش نیگارانەن چەنی عەقیدەی دڵ ئەوگارانەن تۆ زەننت چێشەن ئەویچ بەو تەورەن ئەر مەیلەن، مەیلەن وەر جەورەن، جەورەن ستارەی ڕجات هەر دەم دارۆ سوو دەماخ شاد، وە بۆی وَ لا تَیْأَسُوا ویەردە ویەرد، هەوڵێ پەی باقی ئەمجار یە دەروێش، یە نەیچی و ساقی هۆش وە سەدای دەف، گۆش وە نەوای نەی دەس وە شیشەوە، لێو وە جامی مەی سەفات جەفا دۆ وە قەفای هەستی نۆشا نۆشت بۆ دەواچەی مەستی وە کردە وە فام ئەر گا ناوەردەن باک نییەن وەفام وە باوەڕ کەردەن ++++++++++++++++++++++ سەرناو: دڵە پڕ چینەن دڵە پڕ چینەن پێشانیی شەوقت پۆس مەردەن وە بان ڕوخساری زەوقت شادیت مواچی ئازیزش مەردەن کەیفەکەت ماچی لەیلش گوم کەردەن گومانم وەی ڕەنگ زامت نەسرەوتەن کۆچی خێڵخانەی ئەحمەد دوور کەوتەن نەواتم دەخیل ئامان سەد ئامان وێت مەدەر وە مەیل نەو تووڵ نەمامان وەس وە تەمای وەسڵ مەزاقت شاد بۆ ژاری ماری دەرد دووریت وە یاد بۆ نەژنەفتی چەنەم سەد جار دادم کەرد ئیسە های گەردش گەردوونی چەپگەرد وە تای قەڵماسک تنیای سەردیی مەیل ئەو هوردا پەی حەی، تۆ پەی کۆی دوجەیل سا خاسەن ئەمجار شوومی سیا بەخت تۆ ئالوودەی دەرد، من زامانی سەخت ساقی گەردی کۆچ یاران دیارەن هاوماڵان پەرێم نە ئینتیزارەن من خۆ تەنیا ماڵ، وامەندەی دڵتەنگ بێکەس، بار سەنگی، پای بارەبەر لەنگ مەرتۆ وە هەی هەی نەشئەی جامی مەی نەی ڕای پلەی سەخت فەریادڕەسیم کەی سا پێم دەر جامێ منیچ چون یاران هەی کەروون ئەو کۆچ تا سەر هەواران ++++++++++++++++++++++ سەرناو: دڵە چەند مەستیت دڵە چەند مەستیت جەم بی نە سەردا چەند کاری ئارۆت وستەو ڕۆی فەردا شەرتێوم نییەن جە بێشەرتیی تۆ ڕوو سیای تۆبەی سەد فەردا نەبۆ نەکەفتی ئەو ڕا پەی حەق پەرستی تا بی وە هەمتای مەستی پای سستی پیری حەڵقەسان خەم پەنەم وەردەن پەی دەرگای عەدەم ئامادەم کەردەن سەروەختی ئەدای ئەمانەتمەن نەشری سیاهەی خیانەتمەن موغەننی، تەنخوای من وە نەوایێ وەی چەند فەردەوە هوردەر سەدایێ یا ڕەبی نەی شەو تاریکەی فانی هەر تۆ وە کردەی بەدیم مزانی ئای سوبحی مەحشەر سەر ئەفگەندە وێم شەرمندەی حوزوور خودا و بەندە وێم بە ڕەحمەکەی وێت فەردی تەنیای تاک بەشقی مەشقی عەشق دڵپاکانی پاک بەو فەسڵی فیراق خاتر پڕ خاران بەو دیای دمای یەکتری یاران ئەر سەد تاوانم جە حەد ئەودەرەن دەفتەرم جە ڕووی وێم سیاتەرەن تۆ بویەر جە من جە پڕ ئینسافی من ڕوو زەردی وێم کافییەن کافی ++++++++++++++++++++++ سەرناو: دڵە، وەردەی نەفس دڵە، وەردەی نەفس گوناه ئاوەردە سیفەت نەڕووی زات وە پەردە کەردە جە ڕووی بێشەرمی پەردەت دڕدەوە هیچ نەویت وە تەنگ ئەودیم پەردەوە «سەتار»ی لاو دا وە یانەتەدا «کەریم»ی شوومی وە شانەتەدا کردم وە عامیی ڕەحمەتەکەی وێش وادەی بەزمی گەرم خزمەتەکەی وێش ویەرد، نەزاناش سیوای ئەو هەنی ئاخ زانایی ئەو چێش کەری چەنی نەو دەمدا جە یاد کردەی ویەردەم جە حاڵەتی سەخت وە دۆزەخ بەردەم هەر دەلالەتێش مەلالەتێوەن هەر لوتفێش پەرێم خەجاڵەتێوەن هەوای وەش نەسیم وەسڵ و حوزووری سەموومەن پەرێم چون شنۆی دووری های نایی نایێ، موتریب مەقامێ موغەننی تەرزێ، ساقییا جامێ تا دەماخ نەی بەزم نەشئەیێ سانۆ مانۆ، تا ئەبەد وە جیا مانۆ شنۆش نەی دەمدا، نەی دڵەی تەنگدا ڕێشەی ویری غەیر بدۆ وە هەمدا بەڵ دڵەی چەند ساڵ ئینتیزارەکەش لەزەتێ بەرۆ جە دیدارەکەش ++++++++++++++++++++++ سەرناو: دڵە، ڕاگەکەت دڵە، ڕاگەکەت خەیلێ تاریکەن پردەکە سەختەن، خەیلێ باریکەن سارای هیدایەت تاریک مەوینوون رای نەجات یەکجار باریک مەوینوون چۆڵە چراوێ پەرێ وێت ساز دەر وە قەد توانای وێت باربەندی کەر ئەر گونا ڕای ڕاس بەردەنی جەویر شۆنی پای کردار هامفەردان هورگیر بەڵ لەو دیواندا دێوانەی سەرشێت خەجاڵەتی بەزم یاران نەیۆ پێت بارێ ئەر غەفڵەت دام تەندەن نە ڕێت نییەنی وە تەنگ شەرمەساریی وێت یادی ئەو سەروەر وە دەروون باوەر ئەر واچان پەنەش نەو بەزمی مەحشەر یە مەنسووبی تۆن ئینە کردەشەن چەنی توانای سەر هوردەردەشەن ئەو بە شەرمەوە مدیۆ بە وەردا من مشیۆ کام خاک کەروون وە سەردا ئیسە موینی چێش پەنەم ئامان هانا هاوارەن های نەیچی ئامان جفتی مەعسیەت، جە تاعەت تاقم ڕوو سیای مەجلیس جەرگەی عوشاقم بینای وجوودم خەجڵەت ئەساسەن بەختم موخالیف، نامەدیم ڕاسەن سەبای هەناسەم نە دەروون سەد تەرز کەردەن کڵپەی نار ئیبراهیمی بەرز پەنجەت بەو نەغمەی بین وە تینەوە باوەرە ئەی بەیت وە حەزینەوە: سەهلەن من ڕوو زەرد سەر نە وەرەنان ئای مایەی تەسدیع پەیغەممەرەنان ++++++++++++++++++++++ سەرناو: دڵەی خەم خەیاڵ دڵەی خەم خەیاڵ جۆش ئاوەردەوە مەعدووم هەم هەوای زەهاو کەردەوە زرنگەی سەدای ساز جە ڕیشەی ئەعزام کەمانچە دەستوور ماوەرۆ مەقام بانگی ڕسواییم جە عاڵەم بەرزەن زیندەگیم زیاد، مەردەنم فەرزەن لەت لەتی جەرگم عومانی عەینەین پڕ کەردەن، بڕیان بوخاری بەحرەین بەو تەور تەن غەرقەن نە گێجی هووندا ماچی موورێوەن هانە جەیحووندا ئیمشەو وە هەر حاڵ شەو وە ڕۆ بەروون ئەی خودا سا مەرگ سەحەر چێش کەروون ++++++++++++++++++++++ سەرناو: دڵەی دڵ... دڵەی دڵ وە مەی مەیلی لەیلێ کەیل مەحرەم وە ڕازان خەڵوەتخانەی لەیل لانە حەڵقەی زوڵف عەنبەر بۆی شەو ڕەنگ هامدەمی جای تەنگ ئەڵحەدسەرای سەنگ پەروانەی مەزار ئەو ئاوات واستەم تەرجەمەی حاڵات پەشێویی جەستەم عەرز کەر وە لەیلا وە سەد خەمەوە چەم وە نمەوە، دڵ وە تەمەوە: دێوانەکەت دیم بڵێسەش بەرز بی بەرزی بڵێسەش هەر سات سەد تەرز بی وە هەر تەرزێ لەیل ملاوناوە دڵەی سەنگی سەخت متاوناوە گا گۆیا مەویەرد ئیند مەویەردەوە گا مەوات وە دەم ئێشی دەردەوە: ئای جە ئێشی تەن جە گیان جیای من ئای جە لوای تۆ و ئەو شۆن دیای من سەختی ئێش دەرد بەدحاڵیم لایێ وای بێتۆ مەنزڵ گشت خاڵیم لایێ وە هەر مەنزڵدا و هەر ڕاگوزەردا هەر دەستی حەسرەت مدا وە سەردا چێشەن موینوون مەنزڵ بێتۆ بۆ بێهۆشم، خەو بۆ، ڕاس بۆ، درۆ بۆ گا تێکەڵ مەکەرد چەنی دەردی وێش فەردی هامفەردش چەنی فەردی وێش موات: فیداش بام یە جای شیرینەن گوزەرگای ئەو شۆخ زوڵف عەنبەرینەن جە باڵای ئەی سەنگ پا ئاوەردەوە بەرقەی ناز جە ڕووی ئەو شەنگ کەردەوە جەو جاسووسگاوە، بەو خەدەنگەوە دڵ تلنا وە زام هەزار ڕەنگەوە جەو سەردەشتەوە گوڵاو ڕێزان کەرد سارا بۆی عەنبەر سارا هەرزان کەرد چۆگە جەلای جام جەبهەی جەماڵ دا بەرگەشتی وە بەخت بەدری کەماڵ دا چێگە حوقەی ڕاز شیرین کەردەوە تامی تاڵیی دەرد دووری بەردەوە گوزەرگەی جیلوەی لەیل بێحەد بەو تەرز زایەڵەی مەجنوون جە عەد ڕەد بەو تەرز چۆن کەروون تەقدیر پەی سەر کاری تۆ نە تۆ بژنەوی نە دۆسداری تۆ مەعدووم چون قەزا ئاما جە ناکاو دانا چون نادان وزۆ وە گەرداو عیرفانەکەت کۆن، فامت کۆ شییەن ئای پەی جیلوەی دۆس نیهایەت نییەن ئارۆ یەک جیلوەش ها نە ڕووی کاردا فەردا چێش ئەو یەک جیلوەش دیار دا لا، بەڵ ئەو جیلوەی ڕوو نە پەنهانی نەوعە زوهوورێن، زاناش ویجدانی چ ماتەمێوەن پات بییەن پێوە دانا و مەخشووشی کێ دیەن پێوە ئەو جیلوەکەردەن ئەر شی وە تاقی ئێد جیلوە کەردەن سوراحی و ساقی ++++++++++++++++++++++ سەرناو: دیارەن دیدەم دیارەن دیدەم هەم دەرد نۆمەن ئەمجاریش جە نۆ ئارەزووی تۆمەن جە گۆشەی مزگیی تەنیایی پڕ دەرد نیشتەبێم خەیاڵ دەرمانم مەکەرد ناگا مەیلەکەت عەودش کەردەوە دیسان نێشی دەرد دا وە دەردەوە هیجرانت دەردان جە لام جەم کەردەن هەر جوزوێم پەی وێش خەریکی دەردەن دەردی کۆنەو نۆ یەکسەر جەم بییەن سەر تاپام جە دەرد هیچ خاڵی نییەن ++++++++++++++++++++++ سەرناو: دیاکەی وە شەرم دیاکەی وە شەرم جە پەنجەرەی ناز تاتا ڕیشەی جەرگ بەراوەرد وە گاز پەترۆی زامەکەم هەم لابەردەوە وەخت بی ساڕێش بێ تازەش کەردەوە تیرێ هەوادا وە پەنجەی بێگەرد دا نە پەڕەی دڵ تا سۆفار ویەرد لاوی هوون گۆلاو دەروونم کەرد کەیل سەرواز کەرد جۆشا نە دیدەم چون سەیل خاشاکی هەستیم هورگرت جە ناو بەرد وستش نە گێجاو تەنوورەکەی دەرد ئیسە ها نە تۆی بەحرەکەی بێپەی ساقی جەو جامە، یا، ها دات بە کەی وە قەترەی منیچ ئاویاری کەر مەست بوو تا مەحشەر سەر باروو ئەو بەر ++++++++++++++++++++++ سەرناو: دیدەم نەو نەمام دیدەم نەو نەمام نەوتووڵی ساوا نامەت پەی خەرجی وە لا من یاوا ئەمرت دڵگیرەن، فەرموودەت خاسەن بێشک ماهەنی ماهانەت ڕاسەن بەڵام جە دووریت هۆشم ڕەم کەردەن ئاگاهیم نییەن چەن ڕۆ ویەردەن هەر ئێد مزانوون ئازیز گیانی تۆ نەدیەنم وە چەم هەڵای ماهی نۆ شیرین ڕایەتم، خاسەی سەر کارم بێوادە زوڵمەن بدەی ئازارم هەرگا دیم هیلال ئەو ئەبرۆی سێوەنگ یە سیمی ئەسرین، یە ئەشرەفی ڕەنگ ++++++++++++++++++++++ سەرناو: دیدەم وە دیدەت دیدەم وە دیدەت شای شیرین چەمان فیراقت قامەت کەردەن وە کەمان مەزاق یەند تاڵی دووری تۆ چەشتەن هووناوەکەی چەم سەرزەمین ڕەشتەن سەر پەیکانەکەت بڕیەن ڕشتەی دڵ وە ناسۆر کەفتەن دایم مدۆ چڵ سەمتووری سینەم وە زایەڵەی بەرز مەژەنۆ نەوای دووریت وە سەد تەرز بڵێسەی کوورەی دەروون گرتەن تاو نە بۆتەی خەمدا دەروون کەرد وە ئاو گلاراوەکەی جە تۆ جیامەن وەختی لواکەی ئەوە نامامەن پووشەکەی هەستیم، گیاکەی پای چەم وای نیستیی فەنا بەردش پەی عەدەم ++++++++++++++++++++++ سەرناو: دەخیلم خاڵۆ دەخیلم خاڵۆ زەدەی زامی سەخت حاڵ شێوێنەکەی مەعدوومیی بەدبەخت ڕاز ڕێزەی شەکەر، شای شەکەر ڕازان فتێڵە پەی زام کەسێ مسازان وەختێ دڵ وە تیر مەینەتان ڕێش بۆ جەو دما تەمای ساڕێشی پێش بۆ خۆ جای پەیکانان ژار وەردەکەی تۆ تا بەر پەڕەی دڵ پەی کەردەکەی تۆ وەختێ فوارەی هووناوان پێشەن زوخاو جۆش بدۆ، ئانە ساڕێشەن دەرگای مەینەتان جای نەدامەتەن ناسۆریش یادئار ڕۆی قیامەتەن فتێڵە پەی چێش ڕۆ وە یانەم ڕۆ یەک جار داد نە دەس ئیستیغناکەی تۆ تۆ پیرت بازەم دڵ وەشیی دڵەن غەمزەدەی زامان وەشیش موشکڵەن ++++++++++++++++++++++ سەرناو: دەرد وە بانی دەرد دەرد وە بانی دەرد زامانی کاری گرد جە لام جەم بی، یە تەشریف ماری ئای یە چێشت کەرد تەشریفت ناوەرد دەردت دا وە دەرد، منت ماتەم کەرد ئیسەیچە دیدەم چەم ها وە ڕاوە هەڵای سەروەشم بەو تەمەنناوە ئەمرت موتاعەن أَطَعْنا وەندم دوعای چەمەزەخم جە پیران سەندم تەعویزبەند ڕیشەی دڵەی سەد پارەم بەرگش پەڕەی جەرگ وە دەرد ئاوارەم حافیز بۆ وە عەشق مەستانی یاهوو بپێچەش نە دەور باهووی بێئاهوو ئینە عادەتێن وە زاهیر ئامان وەرنە هەی سەرخێڵ نازک ئەندامان تۆ ئیند نازکیت جە حەد ویەردەن بینایی خەیاڵ ڕاگەش گوم کەردەن سەفات خەجاڵەت دان وە جامی جەم دیدەی بەد مەر عەکس وێش بدیۆ وە چەم دیدەی بەد دەردش نا دیاری بۆ جە کۆ موینۆت تالێت کاری بۆ؟ ++++++++++++++++++++++ سەرناو: دەرمانی زامان دەرمانی زامان دەردەکەی کاریم هامڕازی ناڵەی شەوان بێداریم ڕاحەتیی جەستەی مەینەت بارەکەم تەسکینیی دڵەی پڕ جە خارەکەم نامە و هەدییەی دۆسانەت یاوا تەسدیعت کێشا خەیلێ ماڵئاوا ڕەویەی بوزورگیت وەجا ئاوەردەن غەریب نەوازیت وە پیشە کەردەن بەڵام بیناییم، من دۆسی گیانیم نەک چوون بێشەرتان نانی و زوبانیم دڵم وە مۆبەت مەیلی تۆ شادەن ئەی تەعاروفە جە لام زیادەن خوسووس من سەرعی و لێوە و وێڵی تۆم سەودایی خەمبار ئەڕاگێڵی تۆم پەی تۆ خاترم پڕ نێش و خارەن پەی تۆ زیندەگیم چون ژاری مارەن دەروونم دایم جە هوون کەیلی تۆن حەیاتم وە شەوق هەوای مەیلی تۆن هەرگا دیم وە چەم شێوەی باڵاکەت بۆسام خاکی پا و گەردی پاڵاکەت ئانە گرد مایەی کامەرانیمەن ئانە گرد وەشی و شادمانیمەن وەرنە ئیسە من هوونی دڵ وەردە قامەت سەنگیبار خەمان خەم کەردە دەروون وە مەودای دووریت بییەن ڕێش هەی خاکم وە سەر سەوقاتم پەی چێش ++++++++++++++++++++++ سەرناو: دەروێش دەروێش ئەهلی خەم هەر یەند جەم مەبۆ پای کاوی دەروون هەر یەند تەم مەبۆ کام زامەت مەندەن دڵ پێش نەئێشۆ کام خەفەت مەندەن جەسەم نەکێشۆ هەنی چێش واچوون چۆن مەکەرۆ چوون گەردی ئاردەشان ئاسیای گەردوون یەند تۆزی مەینەت جە دڵ جا کەردەن بینایی خەیاڵ باڵاش گوم کەردەن سا دەی سەر پەنجەت پەی دەف بەرەوە ڕووی یادی باڵاش مەخسەڵ دەرەوە ++++++++++++++++++++++ سەرناو: دەلیلی وادەی دەلیلی وادەی سەر سەراوەکەم بینایی دیدەی شەو بێخاوەکەم ڕەفێقی سەرحەد ئەقلیمی دەردان ناخودای کەشتیی بەحرەکەی هیجران ئوستادی تەعلیم دەرسی مەجنوونیم دەسگیری ڕاگەی سەختی و زەبوونیم شەمعی بەزمگەی مەهجووری و دووری میعماری ئەساس پایەی سەبووری مەسقەڵچی سەواد ئایینەکەی دڵ غەواسی دانەی دەریاچەی موشکڵ خەم نە وەختی بەزم فەرمانفەرماشەن شادیم ئەلوەدای جە لەیل جیاشەن من خۆ پای خەمان سامانسام کەردەن دەک بمرم هانات بەمن ئاوەردەن وە مەرگت دایم زامم هەر بەسۆن دەردی وێم کەمەن ئەمجار نۆبەی تۆن پێسە مزانی هیچم کەم نییەن وێران یانەکەم وێت وە چەم دیەن ++++++++++++++++++++++ سەرناو: دەورێ دەر ساقی دەورێ دەر ساقی وە لای مەحزووندا لەیل ئاسا بویەر وە لای مەجنووندا جامێ جە سەهبای دیای باڵاکەت ئالوودەی غوبار تۆزی پاڵاکەت بەو ناز و عیشوە وێت پێمدەرەوە جەستەی پەژموردەم ئیحیا کەرەوە جەی قلب الأسد تاوسانی دووری فێنک کەرەوە جەستەی مەهجووری بەڵکەم شەرارەی نائیرەی فیراق نەسۆچنۆ تەمام سەوزەی ئیشتیاق بەڵام بەو شەرتە مەیلت مودام بۆ منیچ بەو مەیلە دنیام وەکام بۆ نەک غەزاڵ ئاسا دیا و ڕەمت بۆ گا مەیلی شادی، گا ماتەمت بۆ ئیتر کافی بۆ جەور و جەفاکەت بەڵ تا وە سەر بۆ مەیل و وەفاکەت ئەر چەند هەفتەیێ عومرم مەندەبۆ بەڵکەم دووریی تۆ لێم نەسەندەبۆ ++++++++++++++++++++++ سەرناو: دەک فەڵەک دەک فەڵەک چون من دەردت کاری بۆ زامت پڕ نە ئێش نادیاری بۆ جەفای نەونەمام سەفات هورکێشۆ خاترت وە نێش حەسرەتان بێشۆ ساتێ بێخەم بی جەستەی جەفاکێش ویارا وە شاد چەنی یاری وێش وەخت بی لێڵاویت بگێرۆ چەمان تا ئاخر دووریت وست نە بەینمان ++++++++++++++++++++++ سەرناو: زووسانەن زووسانەن وەی ڕەنگ وە گەردوون یاوان گێجیایی لوولگێج کڵێڵەی کاوان بەناباشیی بورج بەرزە دیاران سفیدکاری کەرد تاقچەی موغاران چ شیرین زەڕگەر تۆفی هەوای سەرد گۆشوارە نە گۆش نەونەمامان کەرد پەی نیگای باڵای مەحبووبی بێگەرد یەخ ئاینە گرت، تەم چارشێو ئاوەرد ئەی مەحبووبی خاس، وەی بینای تەمام مناڵۆ پەی بەزم ساقی و شیشە و جام ساقی، باک نییەن جە سەردیی دەی، دەی هەوا وەش کەردەن نەشئەی نۆشای مەی ئاخر سەر مەشقەن پەرێ مەیخاران واردەی ویەردەی ویاردەی یاران چون نە دڵ شنۆی مەزەی مەی داران بدیە چۆن وە تۆی لۆنگێ مەویاران زوانەکەی سۆز، دەسەکەی ناڵە بکیانۆ، ڕێزۆ، ڕەحمەت پیاڵە ڕەحمەت وە ڕووی خاک ڕستگاراندا پیاڵە وە دەم ئینتیزاراندا دێرەن با ئێمەیچ نەی گوزەرەوە جامێ وە دەس نێین، دەس وە سەرەوە ++++++++++++++++++++++ سەرناو: زیای دڵ زیای دڵ نامەت وە لای دڵڕێشان یاوا و ڕەنگین کەرد بەزمی دەروێشان شنەفتم پەرێت ڕاس گێڵا چەپگەرد بە وەسڵی لەیلا شادمانت کەرد دڵ وە نزیکی هەر یەند مەسروور بی جە سزای مەینەت ڕای دووری دوور بی پەرێ تۆ ڕاحەت، پەرێ من زامەت وەردەبێم هەردوو تا ڕۆی قیامەت تۆ نە تۆی باخچەی وەسڵی دڵبەردا من نە پێچی گێج دەریای خەتەردا ++++++++++++++++++++++ سەرناو: زیلەی تەڵمیتبار زیلەی تەڵمیتبار کۆچی نەوهاڵان تەئسیرش نییەن ئیمساڵ چون ساڵان یەقینەن سەرخێڵ نازک نەمامان نەکەردەن هەوای هەوارگەی دامان بەڵێ یە نامەی دڵ پێ ئێشاکەش یەکزەی دەروون حەسرەت کێشاکەش ئەو سینە سیم وەنگ، ئاینەی جەم ڕەنگ منمانۆ هەوەس نە دڵ دای خەدەنگ حەسرەتا حەسرەت، های یە چێش کەردی چون جێ ویەردی پێشدا ویەردی نم مدۆ مادەی نامش ئەو نامە ئاو دندان ئاسا، دندانی خامە نەمەندەن قووەت سەرمایە تێشدا هەرسێ بێ نە ڕا هورمەگنۆ پێشدا پووش ئایریچم جای نەسیم نییەن هورکەردە و بەردەیم تا وە لاش شییەن پاییز زەڕ، یەخ جام، چارشێوێ هەی تەم دێرەن سوارەن نەوعەرووسی خەم موتریب، یەکارەن، مەر سیا سەنگی من بەی حاڵەوە، تۆ وەی بێدەنگی جە تەنخوای نەی بەزم خەم وەیلانەوە هوردەر ئەی چەند فەرد وە دیلانەوە: بە وەردەی زامدا دڵ تاقەت بێزا هەرچی بی یەکسەر وە چەمدا ڕێزا ئەر هەڵای ڕەمەق مەندەن وە تەنش بێمەیلیت لیباس کەردەن بەدەنش چون خەیاڵ وە ماچ پات خۆش حاڵ مەبی کاش جەکۆن ئەو بەخت لەب تەبخاڵ مەبی یەند دیان وەو ڕا تۆ مەی نەپێشدا دیدەی دڵ نیگا نەمەندەن تێشدا مەعدووم خەم مایەی فیکرەکەت بەردەن یا پەی دڵوەشی وێت غەڵەت کەردەن تۆو ئێستە تەشریف ئازیزی گیانی سفتەن و تەئسیر ئاوی حەیوانی ++++++++++++++++++++++ سەرناو: سازش نە مابەین سازش نە مابەین ئار و پووش کەمەن وەرنە هانامەن نەفەس یەک دەمەن سەنگیی سەنگ و خاک نە سەر دۆشم بۆ مەر ئەوسا مەیلت فەرامۆشم بۆ ++++++++++++++++++++++ سەرناو: ساقی ئاوەردە ساقی ئاوەردە و گرد کیاستێنین وریا بەردێن و کردە ئاستێنین حاڵ ماضی ئاسا ها نەگوزەردا موقیم موسافر ڕەنگ نەسەفەردا کاروانسەرای کۆن دەوری دنیای دوون جە بارگەی یاران وە چۆڵ مەوینوون قافڵە کۆچ کەردەن، بەرزەن دەنگی زەنگ وڕان حوجرەی خان وجوود سەنگ بە سەنگ هۆسای تای شاوڵ دانش وە مشتی بەناباشیی بورج دیواران گشتی قەدەم ڕەنجەکەر وە لای کارەوە بنچینەم وە تەرح مەی هوردارەوە عەمارەتێوەن بیناش باقی بۆ ئاو مەی، خاک دوردی، بەناش ساقی بۆ ++++++++++++++++++++++ سەرناو: سفیدیم ئاوەرد سفیدیم ئاوەرد، سیاییم پێ ڕەشت هەفتم کەردەوە ڕوو نیام لە هەشت ++++++++++++++++++++++ سەرناو: سوبحەن سوبحەن، بۆی گوڵان میاونۆم نەسیم وێنەی وای ڕەحمەت خەزانەی کەریم سەحرا و دەشت و دەر بەهەشت منمانۆ مۆرەی هەوای وەش وە شەشدەر شانۆ جە هەر تەرەفدا موینوون گوڵزار ڕەنگ ڕەنگ مەدرەوشۆ بە وێنەی دڵدار لالە گەردەن کەچ تۆی دیدە ڕەشتەن گۆیا عەکسی یار وە ڕووشدا وەشتەن چەمەن هام لیباس سەوز ڕەنگ پۆشان وەفراو چون ئەسرین دیدەی من جۆشان جەماد و نەبات گرد شادیشانەن جەماڵ ڕۆژی عید ئازادیشانەن تەمام ڕووی دنیا جە شادی کەیلەن دڵ نەبۆ پەشێو فیراقی لەیلەن سەهلەن بەهارم دۆزەخئاسا بۆ بەهەشتم بێدۆس دۆزەخنما بۆ وەر نەدۆزەخدا یارم دڵبەر بۆ پەی من ئار نە تۆی گوڵشەن وەشتەر بۆ دڵ دوو زنجیرەی زوڵفی نیگارەن وە سەیری سەوزە و سەحراش چ کارەن ++++++++++++++++++++++ سەرناو: سیاییم ئاوەرد سیاییم ئاوەرد، سفیدیم پێ ڕەشت هەفتم کەردەوە گرێم دا لە هەشت ++++++++++++++++++++++ سەرناو: سەد دووری سەد دووری چون دڵ مەعدوومیی دڵتەنگ مارۆ ئەو فریاد دڵەی سەختی سەنگ سزان ئەر گێرۆ تەم دڵەی کاوان هەور نەو وە جان ڕێزۆ هووناوان بەڵام، تاقەتێ، های هەورە ئامان ها نە سەفەردا شای نەونەمامان نازکیش چون ناز جە حەد بەرشییەن خاترداریش کەر وێنەی کەس نییەن وێش چۆن حەوسەڵەی وەشت و تەم دارۆ یادش نە دڵدا زەحمەت مویارۆ پەی باری خاتر ئەو شیرین شێوە چ حاجەت وەی تەم، وەی سەیلی ئێوە وەسەن دووی بەدەن جە گیان جیای من وەسەن سەیلی چەم بەختی سیای من ++++++++++++++++++++++ سەرناو: سەد پەرێم سەد پەرێم دایم خەم بەستەن کەڵەک ئاخ هەر یەکجار داخ تۆ سەوزەن فەڵەک مەپێکی ناکاو جە نیمەڕادا نیگای ئارەزوو وە تەمەننادا کام سەر، شام تەمای تاجی کەیت نەکەرد سوبحدەم وە تاج سەر «نەی»ت نەکەرد کێ بی کێ مەجلیس شادی نیاوە؟ پۆس کەللەش وە دەف تۆ دەنگ نەداوە؟ مەعدووم، ئەر زەڕەی شێوەی فاماتەن بە فام قەرینەی لوات ئاماتەن ئەی ڕا ڕای خەتەر ڕاویارانەن سفیدیش غوبار کەللەی یارانەن برکەش چای دیدەی پڕ هووناوی دڵ میل، باڵای بێگیان وامەندەی خجڵ ها سەف پێکان پۆس کەللەی هامدەمان کەللەبڕ پەی پۆس کەللەمان تەمان هوردەر چەنی سۆز دەروونی پڕ نێش فەریاد ئەو ساقی و ئەو نەیچی و دەروێش سەدای دەف و نەی بەیۆ نە گۆشت نەشئەی مەی بەخشۆ حەیات وە هۆشت بویەر جە سای تەرز دەف و نەیەوە وە زاتی مەستیی نەشئەی مەیەوە تاکەی کەنۆ دەست چەرخی چەپئەندێش پۆس کەللەت ناکاو پەی پۆس کەللەی وێش ++++++++++++++++++++++ سەرناو: سەدای های هیلال سەدای های هیلال هام فەردان مەیۆ زەمزەمەی تەکبیر هام دەردان مەیۆ یەکێ هام ڕەفێق دۆسی دڵدۆزەن یەکێ مەست کەیف جەژنی پیرۆزەن من نەبوون شادیم جێ بێزار بییەن گەرد وە سەری من، کەس دیار نییەن شەوم تاڵەی شووم، هیلالم قامەت شەفەق هوونی دڵ، مەنزڵگە زامەت تەکبیرم نەوای زامی مەهجووری دەسم هەمئاغۆش زامی ڕەنجووری جەژن و جەژنانەم هەر یەک جەردەیێ بەردەوە پەی هەرد، موتریب پەردەیێ لەرزەی ڕیشەی دڵ، سەمتووری دەستوور وەزنی تەبعی تار پڕ سۆزەی سەمتوور واچە بەو مەقام ئەڵواناتەوە: هەی داد.. هەی بێداد مەعدووم واتەوە خەستەی خاری خەم، خەم خەیاڵی وێم وەکزەی دەروون تەن زوخاڵی وێم بێ ئەبرۆی هیلال نەو نیهاڵی وێم نییەت نا دروست، عید بەتاڵی وێم ++++++++++++++++++++++ سەرناو: سەر حەڵقەی سەر حەڵقەی فیرقەی نازک خەیاڵان دیباچەی کیتاب ساحێب کەماڵان جیلوەی جەلای دۆس تەدریج پەی یاران مبۆ، تا وە قەدر تاقەت بویاران گا وە تەبەسسوم بَیْضا بێزەوە گا وە تەکەللوم شەهد ئامێزەوە تەبەسسوم وە ناز زوڵمەت زەداوە تەکەللوم وە ڕاز وەحشەت فزاوە ئەر دەس پەی نیقاب تەمام بەردەوە جە ڕوخسارەی وێش پەردەش دڕدەوە فەنا پەی عاڵەم پا منیۆ ئەو پێش باقی ئەو مبۆ، وێش ممانۆ، وێش ++++++++++++++++++++++ سەرناو: سەر وە بانی عەین سەر وە بانی عەین عەینم خەم وەردەن هوون چون چەشمەی عەین نە عەین سەرکەردەن یەند دەرد و ئاهم عەین کەردەن بێنوور وەختەن هەشت کەم بۆ نە پەنجەی مەشهوور ++++++++++++++++++++++ سەرناو: سەرداری زومڕەی سەرداری زومڕەی موسیبەت کێشان فەرمانفەرمای موڵک دەروون پڕ ئێشان بادەی خەم وەردەی مەرگی ناکامان زام ناسۆر کەفتەی دەروون پڕ زامان پەردەی دڵ وە نێش مەودای خەم پارە چار نەبەردەی دەرد دڵەی بێچارە وەختێ سەیلی چەم دەروون پڕ خاران تاو مەوەست چون تاو ئەوەڵ بەهاران بۆی کزەی کەواو جەرگم چون جاران هەم، وەی، تەم مەوست ئەو ڕووی ستاران بۆ پڕووزی جەرگ قرچەی پارچەی دڵ بۆی هوونی جۆشیای دەروونی پڕ چڵ ئێد چون تۆفی سەخت تەم وست ئەو کوان ئەو وێنەی لافاو باڵای تۆ ڕەوان هەناسەی سیای سەردی دڵسۆزی بەرد مدا وە بەرد برد العجوزی یانێ نامەکەی خەم ئینشا کەردە مەرقوومی قەڵەم وە خەم شەق وەردە شۆڵە دا وە گڕ شەرارەی نارم دەمیا و جۆش دا دڵەی خەمبارم من وەر جە ئامای نامەی زگاریت زووتەر جە خەبەر کۆسی دیاریت خاترم چەند ڕۆ خەستەی خەمان بی چەمانم چون تاف سافی چەمان بی جە ئامای نامەت چەمەریم بەرز بی شادیم شێویا، شینم سەد تەرز بی شەمعی شامی شووم ماتەم هورگڕیا تای تەلی سەمتوور شادی و زەوق بڕیا شای شادیم شکیا، سوپای خەم جەم بی بەیداخی دەماخ شێوەی ماتەم بی دەخیل بیم وە نوتق خەمان لاڵ کەردەم لاڵام جە خەیاڵ خەم غارەت بەردەم نامەرد، یە وادەی شینی بێشۆمەن هیچ کۆسم نییەن، یە کۆسی نۆمەن سا دەی، هەی پەی کەی هەر یەک جە لایێ باوەرین ئەو ساز شیوەن سەدایێ خەیاڵ غەمگین بی، نوتق ئاما وە دەنگ ئێد موات وە سۆز زایڵەی سەد ڕەنگ: ناکامی ئەییام کامەرانیم ڕۆ بەر نەوەردەی باغ نەوجوانیم ڕۆ شابی شێخی عەشق یەکتای فەردم ڕۆ وە ناکام مەردەی دڵ پڕ دەردم ڕۆ کەنگەرەی ئەیوان کاخی دینم ڕۆ توڕەی لای تەڵای ڕای یەقینم ڕۆ حەللالی عوقدەی ڕاگەی شەرعم ڕۆ ڕەهنومای تەریق جادەی وەرعم ڕۆ کێ نە تەفاسیر قورئان بدۆ دەم کێ بۆ ئەحادیس ڕەسوول کەرۆ جەم کێ وە صرف و نحو خاتر کەرۆ مەحو کێ وادەی تاعەت دەم بدۆ نە صَحو هەنی کێ ئاداب وە ئاداب وانۆ کێ عیلمی مَنطِق جە مەنتق زانۆ مُطَوَّل پەی کێ توول دۆ عیبارەت با مُختَصَر بۆ وە بێئیشارەت کێ وە قووەی عیلم زەکای حەق بینی دەم بدۆ نە «کونە» عیلمی «چەقمینی» فەقێ بێتەدریس، مەدرەسە بێزەوق مزگی بێئیمام، جەماعەت بێشەوق عالمان بێفکر، شاعیران ماتەم نازک خەیاڵان غەرقی دەریای خەم میرزام چون بێوەخت وە ناکامی دڵ وەر جە من تەشریف بەردی وە تۆی گڵ شاد بی وە حووران خاسەی جینانی تەمەننای وێت بی لەقای سوبحانی مەنزڵ موبارەک، بێهەمتات یار بۆ شەفاخوات ڕەسوول خاسەی موختار بۆ بێزەحمەت جە هەوڵ مەحشەر ئازد بی وە لوتفی ئیزەد ڕەحمانی شاد بی ++++++++++++++++++++++ سەرناو: سەرشاری سەهبای سەرشاری سەهبای بەزمی موناجات مەلجەی ئیلتیجای ئەربابی حاجات جای ڕجای جەرگەی پادشا و دەروێش بارەگا و پەنا، پەی بێگانە و خوێش ئاهووی خوتەنی فەیزی ئیلاهی نافەی ناف ڕاهی جە مەه تا ماهی شکۆفەی وەشبۆی ڕەیحانەی ڕەسوول نەوباوەی نەمام طَیّبەی بەتوول سەروی سایەدار نیشاندەی وەلی یەعنی یادگار مورتەزا عەلی وە ڕەوزەتانا هەر نوور واران بۆ تا دەفعی زوڵمەت دیدەی یاران بۆ هەوای سایەتان هەر مەمدوود مانۆ سەبوون بوردەی جورم نەک زەرەر سانۆ ناپوختەکاری و شەرمەساریی من خەجڵەتی غەفڵەت گوناهکاریی من کەفتەن وە هەمدا یەند زۆر ئاوەردەن ڕووی ڕجام وە پای بارەگات کەردەن تۆ چون جە ئەولاد ئەمجادی مەولای پەی ڕجا وە جا، پەی هیممەت ئەولای زاری و زگاری و زوێری کەردم وە بارگەی پاکت پەنا ئاوەردم ئامام سەر نیام وە بارەگاوە غەریو، موو سفید، وە ڕووی سیاوە تەن مەعسیەتبار، دەروون پڕ جە دەرد دیدە تەڕ، لەب خوشک، دڵ گەرم، نەفەس سەرد های چەند پلەی سەخت هانە ڕێمەدا جە ڕووی ئیلتیفات بدیە پێمەدا بەڵکم جە ڕووی ئەو ئیلتیفاتەوە مەولام حازر بۆ وە نەجاتەوە دەسی شای مەردان مەدەدکارم بۆ پلە ئەو پلە ئەو دەسوارم بۆ مەعسیەت نییەن چون هیچ سەدمەتێ خەیلێ مەلوولم، یا پیر هیممەتێ هیممەتت باعیس ڕستگاری بۆ یار بۆ، دیار بۆ، یادگاری بۆ ++++++++++++++++++++++ سەرناو: سەرلەتەرەی خەم سەرلەتەرەی خەم خول ئاوەردەوە تای کرژ یمەینەت دووباد کەردەوە موقەددیمەی خەم تاڵیی مەزاقەن دەک وە خەیر نەیۆ وادەی فیراقەن ++++++++++++++++++++++ سەرناو: شادی گەردی خەم شادی گەردی خەم چۆن نەدۆ وە باد خەم چۆن وە یاگەی شادی نەبۆ شاد ئازیز، وە کەرەم من تەڵەب کەردەن من دەردی دووری تەوانام بەردەن دڵ چۆن وەش نەبۆ، گیان چۆن نەتاوۆ لەیل ئینتیزار بۆ، مەجنوون نەیاوۆ بێئەمری فەرمان ئازیز تا وەکەی های دەروێش، نەیچی، مەیچی، دەف، مەی، نەی بەڵ باڵی بەیداخ تاقەت ئەو پا بۆ بۆی تەئسیری بەزم بەدرەقەی ڕا بۆ دەف ئاسا بەو سۆز ناڵە و سەداوە ڕوو ئەو یاران بوو، پشت ئەو دماوە دەس گێروو نە سەر سەدای نەی پەی پەی تا وە ئینتیهای ئەو سەر سەدای نەی چون پیاڵەی ساف دەروون جە مەی کەیل بنمانوو خاس خاس عەکسی چیهرەی لەیل ++++++++++++++++++++++ سەرناو: شنەفتم دووربا شنەفتم دووربا لەیل زوکامشەن دیشواری باڵای نەونەمامشەن هەنارەکەی دڵ پڕ جە دانەی ئێش پیشیایی کوورەی ناری عەشقی وێش بە مەودای موژگان سوراخش کەرۆ وە گەرمی نیشان دەماخش دەرۆ ++++++++++++++++++++++ سەرناو: شنەفتم گیانم شنەفتم گیانم باڵا تووڵی نەی ئیرادەت کەردەن چەنی خەستەت بەی مەگەر پای تەدبیر بەدبەختی ڕێش بۆ گیان هەوای سوحبەت جەستەکەم پێش بۆ وەرنە شێتە وێم، دڵ وەشیی دڵەن گیان جە تەن بەرشی ئاماش موشکڵەن ++++++++++++++++++++++ سەرناو: شوورای عاشوران شوورای عاشووران دیسان بەزمش بەست موحەڕڕەم ئاما «مەحرەم» شی نە دەست ئەو خەریک نە چۆڵ شاری عەدەمدا من نە کەربەلای سارای ماتەمدا ئەو یەزیدی مەرگ وە ئەسیر بەردە من زادەی زیاد خەم یەقیر کەردە بازاڕەن، وادەی مامەڵەن، ساقی هەی بگرە فانی، وەی بدەر باقی ڕۆ، حوسەینئاسا فەردا کە ڕۆ بۆ داخۆم سەر جە کۆ، لاشەم جە کۆ بۆ ++++++++++++++++++++++ سەرناو: شی ئەو سەفا و سەیر شی ئەو سەفا و سەیر دیدەنی یاران لوا ئەو دووری و ئەو وەسڵی یاران ئێد نە ئەو دەورەن هەر ماما و مەویەرد ئەمجار وە ڕاسی چەپگەرد شانا نەرد وەختی تەماشای سەوزەی شەتاوان سەیری شکۆفەی پای لارە کاوان مەدارە نەو بەزم شکۆفان جەم جەم هەنی شکۆفە دیدەنی وە چەم مەوجی دەجلەی چەم توغیان کەردەوە گێجی هوونی دڵ جۆش ئاوەردەوە ئەو سارای بەغداش ئاوەردەن وە تەنگ ئێد کەردەن سارای کەربەلا ڕەنگ ڕەنگ ئەو جە ئەندازەی کەشتی بەرشییەن ئێد بۆی هوون مدۆ، ڕای گوزەر نییەن ئەر نامە نامان قاسید نەیاوان بینایی دیدەم مەگێرە تاوان ڕاویار ماتەم، گرد دەروون تەنگەن قافڵەم تا قام قیامەت لەنگەن ++++++++++++++++++++++ سەرناو: شیفای ئێش و نێش شیفای ئێش و نێش ئەی زامانی سەخت زیای دیدە و دڵ مەعدوومیی بەدبەخت دەستەی وەنەوشەی پەلدێزت یاوا بۆش بۆی وەفای لەیل نە دەماخ ساوا گەردی دەردی ڕێش دەروون بەردەوە عەشقەکەی قەدیم تازە کەردەوە سەودای وەنەوشەی پەلدێزی باخان هەوای گوڵاڵان سەر کاوان زاخان پەی کەسێ خاسەن ئەوەڵ دەردش بۆ ئیبتیدای خێزیای دوودی سەردش بۆ کەرۆ مەشقی عەشق وێنەی مناڵان گا سەیری کاوان، گا بۆی گوڵاڵان نەک چون من سەرعی ساداری مەردە لافاوی دەردان دڵ وێران کەردە کوورەی عەشقی دڵ هەر یەند جۆش وەردەن گوڵاڵەم چون وێم فەرامۆش کەردەن ++++++++++++++++++++++ سەرناو: شێخی دەوڵەمەند شێخی دەوڵەمەند بەهرەی سەرمەدی یاگەی حەقیقەت جیلوەی ئەحمەدی جە شەو هەوارگەی فەنا ویەردە پای هەردەی بەقا یاتاغگە کەردە موتتەسیف بە وەسف شەئنی و سیفاتی موشەڕڕەف بە فەیز تەجەللای زاتی خەلیفەی سەدای أَدْنِ شنەفتە بەڵەد نە سارای ئەتوار هەفتە واسیتەی ڕاگەی بەین عیلم و عەین ساحیب جەناحەین یەعنی ذیالنّورَین پیری پاک جە گەرد خاکی ناسووتی مەنزڵگەی سەر بەرز سەر مەلەکووتی دڵ وە نەوای بەزم جەبەرووت ئاوا سێراوی سەراو لاهووتی ماوا جِسْماً لَدَیْنا، رُوْحا لَدَیْهِ دائیرەی تەمام مِنْهُ إِلَیْهِ بێتەلوین نە سای تەمکیندا مەکین رَوَّحَ اللّهُ رُوحَهُ، ئامین نامەی ڕۆح ئەفزای شیرینت یاوا دڵ وە مەردومەک دوو دیدەش ساوا تۆی دەروون وە نوور سەفا دا پەرداخ بۆی ئاشناییم دا نە ڕووی دەماخ دەرگای حوقەی لاڵ دانەت شکاوان جە ڕووی لوتفەوە ئینەت فەرماوان: «یا کاغەز بڕیان، یا مەڵا مەردەن یا خۆ عارتەن دۆس وە یاد کەردەن غەمگین مەنیشە غەم بدەر وە باد فەڵەک نمازۆ کەس وە خاتر شاد» ئەوەڵ من کێنان، وجوودم جەکۆن واچوون دۆسەنان شەرت قەبووڵی تۆن ئەر وە بێگانە، وەر خوێشم زانی تۆ حەساوەنی وە هەر چیم وانی دووەم چون کەسێ گەدایی کێش بۆ یادی تەوازوع خەسڵەتی وێش بۆ ئەر بارۆ نە دڵ تەوازوع کەردەن هەر عادەتی وێش وە جا ئاوەردەن بەڵام هەر کەسێ شێخی میسالەن عادەت ئیستیغنا و شێوەش جەلالەن ئەر جار جارێ نام چون منێ بەرۆ خَرقُ العادَةێ زاهێر مەکەرۆ ئەر ڕازیت وە یاد خەستەی دڵگیری یا شێخ تۆ دایم نەقشی زەمیری چ حاجەتەن دەس پەی قەڵەم بەروون یادم نمەشی چەنیت یاد کەروون پەی کەسێ خاسەن نامەی جە حوب کەیل تازە بسانۆ وُضو جە جۆی مەیل خۆ من هەر جە زوو وە مەیلت مەستم هەر جانفیداکەی ڕۆکەی ئەلەستم سێیەم، خەمگینیم جە دەس خەجڵەتەن خەجڵەتم جە دەس سەختی غەفڵەتەن یاران وێنەی ساف مەی وەکامەوە ویەردەن، چون دورد هەر من مامەوە گیای پەژموردەی تەژنەکەی بێشۆم چەمەڕای وارای هەوری لوتفی تۆم تۆ دەس وە ڕەشحەی ڕەحمت پەیاپەی من وەی پڕخاوی حەیفەن یە تاکەی تەنیای حەقیقی نەردێ بشانۆ من و تۆ جە دەس من و تۆ سانۆ تۆ بێتۆ لوتفت پەی من زیاد بۆ من بێمن ڕۆحم وە خزمەت شاد بۆ ++++++++++++++++++++++ سەرناو: شەرارەی کوورەی شەرارەی کوورەی دەروونی پڕ جۆش دیگی چەمەی چەم ئاوەرد وە خرۆش سەر کەردەن هووناو نە ڕووی ڕوخسارم کەردەن وە شەتاو جەستەی خەمبارم وەلوەلەی لوولەی پێشەی ئازای چاک یاوا وە سەرین نۆ پەردەی ئەفلاک پەرێم مەگرەوان ئینس و جینن و حوور ناڵە مەکاران جە دەرگای غەفوور مەلاڵان یەکیەک پەرێ ڕزگاریم پەرێ ساڕێشی زامانی کاریم تۆ نە تۆی حیجاب ئیستیغنا مەدهۆش نە حەجلەی خاوگای ڕاحەتی خامۆش نەیاوان هێمان وە لات فەریادم نەزانات وە دەرد داد و بێدادم سا گۆش دەر ساتێ وەی زیر و بەمدا بویەر وە باڵین ئەهلی ماتەمدا تا لێت مەعلووم بۆ سەختیی هیجرانت بزانی وە دەرد خەستەی زامانت بەڵکم ڕەحمی خەیر باوەری وە دڵ ساتێ پەی دەروون تەسکین بۆ حاسڵ چینە زیاتەر، شای نەو نەمامان بێئینسافییەن جەفای بێسامان ++++++++++++++++++++++ سەرناو: شەریکی ناڵەی شەریکی ناڵەی شەوان بێداریم مەڵهەمەکەی ئێش زامانی کاریم مەحرەمی حەرەم کەعبەی مەقسوودم ڕەهنومای تەریق یاگەی سجوودم بە مەرگت دایم خدێم زارییەن ڕەفێقم ناڵەی شەو بێدارییەن خەریکم نە گێج بەحری موشکڵدا هەر دەردەن مەیۆ مشۆ وە دڵدا ++++++++++++++++++++++ سەرناو: شەماڵ ئەڕجووم شەماڵ ئەڕجووم هەن هەی وە فیدات بام وە سەرگەردی باڵ شانای هەوات بام جەستە خەستەی خار خەم خەڵاتەنان بەیدا پێوی گێڵ دوور وڵاتەنان شاخ و داخ و زاخ چۆڵ و هۆڵ و کاو سەر بەرد و سەر هەرد سارا و سەر سەراو تەی کەر وە پڕتاو مدرانت نەبۆ چون دووی هەناسەم شەوان تا بە ڕۆ سەر بەر کەر نە سەر کۆی ئاتەشگاوە بدیە وە مەسکەن خانەگا و پاوە زار زار و خاس خاس وە زار بناڵە جا گێر نە سەر ئەوج قوللەی قەزاڵە تا جە هەر کۆ بۆ تەمان موان جەم نەو جەمدا زاری مەکاران وە چەم سا ماچان یاران ئینە چێش بییەن قەزاڵە ناڵاش چون جاران نییەن یەکسان دڵ بەی ڕەنگ پەرێشان جەستەن هەرکۆ هەن نەشئەی مەعدوومیی خەستەن ئانا جە گرۆی جەرگەی هامسەران «خەیاڵ»ی گرۆی دانەی دڵبەران چ خێرەن نامەرد مەر نمەزانی؟ وەلای وێتەوە تۆی دۆسی گیانی! مەعدوومیی خەمکێش خەمزەدەی خەمبار زەردی دەردی سەخت دووری باڵای یار یەن دەردی بێحەد جەلاش جەم بەستەن تەسدیع جە گەردەن ئەزرائیل وستەن عەلاوە ئەو بار وێش وەنەش بارەن خوسووس جە یاگێش جاکەش دیارەن بەو دەردانی سەخت گرد کارییەوە هەر ئێد مواچۆن وە زارییەوە: دڵ سفتەی بریان زوخاڵییە وێم خەم وە خەم خەیاڵ خەیاڵییە وێم مەتەرسوون بمروون جە داخی یاران هەر بتلوون وە دەرد چون دەردەداران ++++++++++++++++++++++ سەرناو: شەماڵ، دارانەن شەماڵ، دارانەن.. شەماڵ، دارانەن.. زەردی ڕەنگ نە ڕووی وەڵگی دارانەن تەمەن، گەردەلوول، بادەن، بارانەن بێزیای وارگەی سەر کۆسارانەن هەوای سیاماڵ وێنەی جارانەن پەی سەمتی زەهاو زەردە و یارانەن هەو هەو و بەو بەو تەڵمیتبارانەن گەرمی بەزمی نەزم سەر هەوارانەن نەززارەی ڕای ڕاز شەکەر وارانەن فەسڵی سەیری سەید میرشکارانەن چ خێرەن نامەرد مەر جە خاوەنی بێخۆف جە لوای ڕای زەهاوەنی شۆ وە لای ئەو شۆخ جەمین پەڕەی گوڵ دەوای دەردی سەخت پەی دەرمانی دڵ مدیۆ وە فیرقەی زەلیلانی خێڵ دیار نییەن مەعدووم لۆنگی خەم وە پێڵ مەپەرسۆ حاڵم، ئێدش دەر جواو واچە ئەو فەقیر سفتەی دڵ کەواو ئانا دەور مدۆ وە شاهۆ کۆوە وە سزای دووریی دیداری تۆوە هەریەک چەنی یەک وادەشا کەردەن وادەشان ڕاسەن تا وە ڕۆی مەردەن ئەو تا سایەی بەرد، ئەو تا بۆ وە گەرد ئەو تەم و ئەو خەم، ئەو سەردی، ئەو دەرد خۆلاسەی کەلام نووری دیدەی دڵ شیفای ئێش و نێش زامان پێ حاسڵ سەوزەی حەیاتم ڕستەی وەفای تۆن ئەر وەفات نەبۆ زیندەگیم جە کۆن؟ ++++++++++++++++++++++ سەرناو: شەماڵی داخان شەماڵی داخان.. شەماڵی داخان.. شەماڵ، یا کۆگەرد، گرد یاگە داخان.. شانە شانای تای توڕەی وەر زاخان مڵەمای باڵای نەوتووڵی باخان هانام تۆ خودا، پەنام ئاوردەن ها، نام خودام سا پەوکە بەردەن جە وێ بەرگی گشت، کشت هەوادەرنی هەوای زامەت کەر، زام دەواکەرنی بدیە وە مدرای سەیلی ئەسری چەم فیدای باڵات بام هەی شەماڵ تۆ هەم ئەر نیمەشەو بۆ، وەر نیمەشەو بۆ نیمەخەو، پڕخەو نە نیمە خەو بۆ وێت دەر وە نەرمی نە تۆی یەمانی نەو توڕەی مانی ئاوی حەیوانی سا ئەوسا نە خاو چون بێدار مەبۆ جە ئەو سات ئەو سات ئاشکار مەبۆ مدیۆ، مدیەی چێش، شەماڵ چێش مدیۆ مەپەرسۆ چێشەن های شەماڵ جەنۆ؟ بدیە وە سەختیی سزای ئێش و نێش هەنی واچوون چێش، شەماڵ واچی چێش ئەر هەر مواچی، واچە: چێش واچوون واچوون ئێد واچە: وە سەرگەردت بوون ڕام گنا ناکام وە ناکام دارێ چەنی؟ چەنی خار، چەنی خار؟ خارێ ئیبتیدا مەعرووز پەی نەزەر، وە خەو ئەر وینۆ گەردێ دەردی سەختی ئەو ئەر سەد جارێ بۆ نەو نەمام، نەو دەشت فەرقێ نمەبۆ پەی لوای بەهەشت تەمام دەوایی جە دەستت پێتەن هەنی نەوەشی بە دەستی وێتەن ++++++++++++++++++++++ سەرناو: فەریادم وە تۆن فەریادم وە تۆن.. فەریادم وە تۆن هانا هەی ئازیز فەریادم وە تۆن دەردم گرانەن، ئەڵوەدام بێشۆن شیفام ئینتیزار مەیلی باڵای تۆن رەحمێکەر وە دڵ خەستەی زارەکەت بدیە وە ڕوخسار بێقەرارەکەت زەردم، زاییفم، بێخورد و خوابم سەرگەردان و] وێڵ بێسەبر و تابم خۆراکم خەفەت، ژینم مەینەتەن وە مەرگت حەیات وە لام زەحمەتەن مەر تۆ وە ڕەحمەت بێپایانی وێت وە لوتف و کەرەم نومایانی وێت جامێ جەو بادەی وەسڵی دیدارت جەو قەهقەهەی مەی شیشەی ڕوخسارت بە وێنەی جاران سا پێم دەرەوە عیسەوی ئاسا ئیحیام کەرەوە ++++++++++++++++++++++ سەرناو: فەسڵی نەو پاییز فەسڵی نەو پاییز تازە کەردەن مەیل شەماڵ هەرزان کەرد ڕشتەی نەو سوەیل گێجی سەرکاوان جە سەردی بین کەیل بۆ مدان چون بۆی بێوەفایی لەیل ئازیز تاقەت شی ئاخر نەفەسەن رەحمێ کەر ئامان، ئیستیغنا وەسەن بەر کەنار کزەی دەروون پڕ داخان پەی تۆ تەسدیعەن سەردیی لەیلاخان جە قەتارەی خێڵ دیدە سیاوان باقی هەوارگەی گەرمیان ئاوان گەرمەسێری دڵ مەعدوومی نەبۆ وارگەش خاڵییەن قیبلەم دوور جەتۆ کۆچێ کەر وە خەیر مەنزڵ وە مەنزڵ تا قەدیم وارگەی گەرمیانی دڵ نەیاوایی، های ساقی زۆر ئاوەرد تەفاوت نە بەین وەسفی ئازیز کەرد نمەدۆ نە چەم تاری دڵەی تەنگ بێوەفایی دۆس سەفا و وەفا ڕەنگ چون تەمام نە تەم غەفڵەتەنان گوم سا مەی، نەک وە جام، های وە خوم وە خوم تا یەکسەر مایەی خامیم بسانۆ چون جەماڵ جەلال جەلام بنمانۆ ++++++++++++++++++++++ سەرناو: فەڵەک فەڵەک، کام تیر بی نەدات نە دەروون جە کام زامانت شکایەت کەروون چون بێحەدەن زام دەسی تۆ کەردە روو کەروون ئەو لای دۆسی ویەردە ئازیز، تۆ هەرچەند بێمەیلی کەردی وە بێ من تەشریف ئەو حوزوور بەردی من تەنیایی تۆ مدۆ ئازارم جە نامایی وێم خەجاڵەتبارم ئای بێوەفا وێم من ڕاحەت وەش ڕەنگ تۆ دڵتەنگ، بێڕەنگ، نەسای سەردی سەنگ ئەی جەستەی خەستەم ڕەویەش نەفاما دڵ وە زیارەت مەزارت ئاما دەروون وە سۆزش ئایر نماوە زوان پەی تەئریخ پڕ جە دوعاوە بە ئامین جە شەڕ دۆزەخ ئازاد بی وە سەیری ڕەحمەت ئەبەدی شاد بی ++++++++++++++++++++++ سەرناو: فەڵەک بێفرسەت فەڵەک بێفرسەت.. فەڵەک بێفرسەت ئەی چەرخی چەپگەرد، بێسەبر و فرسەت غەدداری بەدکار، بێوادە و بەینەت پڕ جەور و ستەم بێمیهر و مۆبەت فەڵەک، وە بەختم چ نەردێ شانای نامەی حەیاتم وە هیچ نەوانای مەزرەعەی شادیم دای وە فەنادا پووشەکەی جەستەم وە سۆزەی با دا ئازیزم جە من بێگانە کەردی شەرتی دۆسیمان جە بەین لابەردی عەهد و مۆبەتت نە ویرش بەردەن نە مەرهەمی زام، نە دەوای دەردەن فیراقش فەرقم تا وە پەنجەی پام ڕەگ و ڕیشە و پۆس جیا کەرد تەمام لافاوی ئەسرین نە چەم هۆرێزا وەڵگەکەی سەر تەڵ حەیاتم ڕێزا هەر ئازام پەی وێش شین و زاریشەن لاڵە و ناڵەی سەخت زامی کاریشەن تۆ بێوەفاییت جە حەد بەرشییەن باکت جە فەریاد مەزڵوومان نییەن یەند ئازارم دای بێ ئەڕوام کەردی وەسەن جەفا و جەور بێمەیلی و سەردی شوهرەی مەجنوونیم لوان وە عاڵەم کافر مەگرەوۆ پەی شوومیی تاڵەم رەحمێ کەر ئازیز جە هیجری حاڵت مانوو پەی تەواف ئاسانەی ماڵت ++++++++++++++++++++++ سەرناو: فەڵەک مشناسووت فەڵەک مشناسووت کارت چەپگەردەن دەست درازەن پەی زامان کەردەن چێش مبۆ ئەی زام نە دڵ نەدەری مەحروومی وڵات قیبلەم نەکەری؟ پەی تۆ دیدەنی شەم دیدارەکەش پەی تۆ گۆشدای ڕاز شەکەر وارەکەش بەڵام با وەس بۆ ئەی تاڵەی شوومە بازەم دڵوەشم وەی بەرو بوومە پەی فێنکیی دڵ هەراسانەکەش کافییەن تەواف ڕای ئاسانەکەش ئازیز، کام هوون بی دیدەم پێ نەڕەشت؟ یا کام زووخاو بی دەروونم نەچەشت؟ یا دڵ کام مەینەت زامت نەکێشا؟ وە کام قیمەی دەرد جەرگم نەئێشا؟ وەسەن کۆن تاقەت، بڕیان سەبووری مەتاوون کەروون گفتوگۆی دووری ئاخر ئازیزم تەوانام چۆنەن تەوەن نییەنان، دڵ گۆشت و هوونەن ئایر دان بەو تەور مۆبەت سەرای دڵ مەیلەکەت مەندەن بێمەسکەن خجڵ ++++++++++++++++++++++ سەرناو: قوربان! قوربانەن قوربان! قوربانەن، جەژنەن، شادییەن دەس نە گەردەنەن، ڕۆی ئازادییەن هەی دەس بۆس دەس بۆس وەش نیگارانەن خەیر پا بۆس پا بۆس خاتر دارانەن کۆن کوشتێ و باردێی گوڵ جەمینانەن هەی سەر، هەی ئەڕواح دڵ خەمینانەن هەرکەس گیان وە کەف پەی نیگارێوەن هەریەک قوربانیی وەفادارێوەن سیوای سەودایی هەراسانەکەت مەحرووم جە کەفتەی پای ئاسانەکەت نە پەی چەم سورمەی گەردی پاڵاتەن نە پەی گیان قوربان بەژنی باڵاتەن مەرد پەی ئۆسا دەی بێدرێغەکەت بسم الله تەکبیر دەس بە تێغەکەت پەی قوربانکەردەی ناڵە نەی ڕەنگ بەی چێش مبۆ ئەر بەی؟ وەی پەی من ئەر نەی! سا تۆیچ من وەرە، وە قوربانی کە من وە قوربانی ڕای ڕەببانی کە ئەوسا تۆیچ پەی وێت خەیرێت کەردەبۆ منیچ کەمتەر زووخ دەردم وەردەبۆ مەعدوومیی بەدبەخت ناتەمامەنی راسەن بێدەوڵەت خەیاڵ خامەنی قوربانی مشیۆ جە عەیب بەری بۆ فیدایی پەسەند ڕای دڵبەری بۆ تۆ پا شکستەی بەردی هەردەی دەرد چەم کۆری مەینەت، تەن زایف، ڕەنگ زەرد خەیاڵێت کەردەن جە ڕووی نادانی چ لایق وە تۆن ڕوتبەی قوربانی ++++++++++++++++++++++ سەرناو: قوربان، ئەر چەندێ قوربان، ئەر چەندێ نامام وە لاتان چەم ڕۆشن نەوی وە گەردی پاتان هەی ڕۆ نەواچان ئەو غەم پەروەردە ئەڵبەت مەیلمان نە دڵ بەر کەردە خەیر وەڵڵا تا گیان نە تۆی قەفەس بۆ کەمکەم ئامۆشۆی ئامای نەفەس بۆ حەیاتم وە مەیل باڵای یارانەن مەیلم هەر ئەو مەیل هەردە جارانەن ++++++++++++++++++++++ سەرناو: قیبلەم تۆم نە دڵ قیبلەم تۆم نە دڵ.. قیبلەم تۆم نە دڵ تا ڕۆی قیامەت هەر تۆم ها نە دڵ فیدای شێوەت بام جەمین پەڕەی گوڵ دڵ جە تاسەی تۆ دایم مدۆ چڵ ماتم وێنەی سەنگ، زەردم چون خەزان دایم پێچ مدەو چون ماران گەزان گەستەی مار خاسەن ساتێ دوو ساتەن ئەر نەمرۆ زیندەی ڕووی سەر بساتەن ئەما من دەردم چون دەردەداران دایم هەر وە سۆن چون گەستەی ماران جە هیجرانی تۆ هەر سات مەرگمەن قەترە قەترەی زووخ نە ڕووی جەرگمەن کاشکی هەر ڕۆ یەک سیا مارێ هەردوو پام مەگەست چەند جار نەک جارێ سەر منیام وە سای گڵکۆی تازەوە چەنی حەسرەتان بێئەندازەوە نەک بەی تەور دیدەم مەردەی زیندە ڕەنگ هەر ساتێ سەد جار سەر مدۆم وە سەنگ پەشێو و مەلوول ئیمان هەردەنان روێ تا سەد جار پەی تۆ مەردەنان فیدای وەفات بام یا وەفات نییەن یا خود بەدکاران مانیعت بییەن قیبلەم تۆ خودا و گشت پەیغەمەران ئەگەر مەیلت هەن وێنەی دڵبەران بکیانە پەرێم گاهێ پەیامێ بنویسە وە لام دوعا و سەلامێ با وەس بنیشوو مات و پەشێو حاڵ با وەس بکێشوو هەناسانی کاڵ پەی چێش بێمەیلیت کەردەن وە پیشە گاهێ تۆیچ پەی من ئاهێ بکێشە باقی والسّلام، قیبلەی میحرابم بڵێسەش بەرزەن جەرگی کەبابم ++++++++++++++++++++++ سەرناو: قیبلەم کەردەنی قیبلەم کەردەنی... قیبلەم کەردەنی جە نامەت بەی تەور ئیزهار کەردەنی نویسیابێ لێش تۆ دڵسەردەنی دڵ هەر یەکێوەن تۆ وێت بەردەنی دوو حاڵەن جە لات زنجیرت کەردەن ئەر گەرمی گەرمەن، وەر سەردی سەردەن ئیتر تۆ جە کەس مەپەرسە خەبەر بیناییم، نەزەر وە حاڵی وێت کەر راستش هەر ئێدەن ئیزهارم کەردەن قەسەم بەو کەسە نەزا و نەمەرگەن شەرتم شەرتێوەن مەجنوون شەرت کەردەن لەیلی من تۆنی تا وە ڕۆی مەردەن تۆ خواجەمەنی، من کەمتەر غوڵام پەی تۆ غوڵامم، باقی والسّلام ++++++++++++++++++++++ سەرناو: لوای بینایی لوای بینایی دیدەی دەروێشان ئاسان کەرد جە لام موسیبەت کێشان خەم، خەفەت، مەینەت، هەناسانی سەرد هەر کام مەیۆ، بۆ، سەفاییش ئاوەرد ئەر کەفتەو مەحشەر دینی جەماڵت وەرنمەدۆ دڵ دامنەی خەیاڵت ناپەیدای تەوەن دوور بێسەفەرەن سەفەر بێ لەشکر، لەشکر بێسەرەن مەیدان نە دیدەی سوپایی تارەن شۆڵەی تاسکڵاو تۆ نە پێوارەن تا فەڵەک مەودای نەی تۆ شاردەوە داوودی ڕەواج پەیدا کەردەوە تا شێری بەیداخ تۆ ئاما وە بەر نە گۆشەی بێشەی نەی فەوجی لەشکەر دلێران «یا شێر ئامان» موانان شێران وێنەی شێر بەیداخ منمانان ئیسە عام کەردەن مەرگت دلێری شێری بەیداخان منمانان شێری وەهار نەوگوڵان نە تۆی خاک بەر کەرد جە بەدبەختی من تۆ وە تۆی خاک بەرد وادەی خاو نییەن، وادەی شکارەن دەشتەکەی پای هەرد شاکەل دیارەن بەو هیلالی ناڵ کومەیتی خۆشدەو مانگی شادی و زەوق هەردان بکەر نەو حەلقی جەیرانان تەشنەگی بێشۆن ئینتیزاری ئاو سافی تێغی تۆن تاریک بی شەوگار شەو زیندەداران گیریا تەمام بەدری ڕوخساران شێویا یانەی دەروون پڕ خاران کنیا دەستەی زوڵف شیرین نیگاران سیاماڵ ماتەم، سەرکۆمار دڵتەنگ تەڵەبە پەشێو، مەدرەسە بێدەنگ هیچ دیار نییەن کەست جەویر بۆ مشێو گەرمیان خاکش دڵگیر بۆ هەر ساڵێ چەند وەخت سەر هەردی لەیلاخ وە بۆی هامدەمیت دەماخ مەکەرد چاخ دڵەی گەرمیان نەو چەند وەختەدا مەسۆچیا وە جۆش دووریی سەختەدا ئاخر گەرمیان ساڕێش کەرد زامت بی وە هامدەمت تا ڕۆی قیامت دەردی گەرمیان وە ئێڵاخ یاوا گەرمیان وە حاڵ ئێڵاخ دڵ تاوا مەرگی بێوادەت عەجەب ڕەنگێ ڕەشت شین وست ئەو دنیا، شادی ئەو بەهەشت دنیا شینشەن نییەنی تێشدا بەهەشت شادیشەن مەگێڵی پێشدا نازاران پڕ داخ تۆ تەشریفت بەرد حووران وە پەرداخ تۆ تەشریفت بەرد هەر یەند ڕۆ ڕۆم کەرد ڕۆم نەبڕیاوە ئای ڕۆم بڕیاوە، ڕۆم نەبڕیاوە تاکەی چەنی شین ڕۆ وە سەر بەروون با وە سۆزی دڵ دوعایێ کەروون ئەر ئێمە مەحرووم دینت بیم یەکسەر تۆ شاد بی وە دین خوداو پەیغەمبەر ++++++++++++++++++++++ سەرناو: لوقمەکەی ماساو لوقمەکەی ماساو قووڵی دەریای مەیل لوختی سای کۆڵەی سارای دەردی لەیل یاوا پێم نامەی وەش تەحریرەکەت ئینشای دەروون سۆز پڕ تەئسیرەکەت حاسڵش نەبۆ فەرامۆشیمان وادەی بەزمی گەرم بادە نۆشیمان چەنی هامفەرد گەرد جیایی شییەن من و تۆ جە بەین من و تۆ نییەن ساقی جام وە دەم ئەی یەک مەڕێزۆ نەشئەی مەی نە دڵ ئەو یەک مەخێزۆ بەڵ نەی تەن ئەی گیان تۆنی کەری عەزم مەی نۆشی و، جەستەی من زەمینی بەزم چون کەوت ئەو دەورەی پیاڵەی بێگەرد نە ڕووی ئەی زەمین نەقشی ئەی چەند فەرد: بەزمەن، یاران مەست، بادەی باقییەن مەعدووم ئەرزەکەی بەزمی ساقییەن یا باڵای ساقی وەی لادا خەمێ یا جام جەو باقی پەی زەمین نمێ ++++++++++++++++++++++ سەرناو: ماتەمی و وەهار ماتەمی و وەهار؟ بێشەوقی و نەوگوڵ؟ مەلوولی و گوڵزار؟ بێزەوقی و بوڵبوڵ؟ سوب بۆی وەش نەسیم چون هەردەجاران نمەدۆ نە کاخ دەروونی یاران داخۆ نەی سەروەخت فەزای وەهاردا کام تەم نە سەر هەرد قەزا دیاردا سەدای «های دێبای خەمان» هەرزانەن سەڵای واوەیلای بادام تەرزانەن مەر گوڵشەنی حوسن شای گوڵئەندامان جە وەیشوومەی مەرگ خەزانش ئامان ئەو باڵای ئاڵای تەرزی سەهی سەرو پێوە هێلانەی دڵان چون تەزەرو کنیا و خەمیاوە وە دەم ڕێشەوە تەزەرو ئاسا نیشت وە سای وێشەوە تای بەڕەزای شەنگ عەنبەر بۆی شەو ڕەنگ پەخش بی نە ڕووی تاش ئەڵحەد سەرای سەنگ ئەو کۆی نەزاکەت وە ناز پەروەردە لەتافەت جە بەرگ حەریر ڕەم کەردە نە تۆی جامەی خاک حاڵاتش چۆن بۆ دەک چەرخە بەختت هەر نیلگوون بۆ باڵی چەم هوردا نەرگس نەی دەمدا چ خێر بی تۆ چەم نیای وە هەمدا چێش بی خێڵخانەی وێت جە یاد بەردی رووی تەڵمیت ئەو خێڵ حۆرییان کەردی راسەن هەمڕازی حۆرییان وەشەن پەی عەشرەت دووریت دەردێ سەرکەشەن بارێ تۆ و سەفا و سەیران و گوڵگەشت هەمسایەی حۆری و سەردەشتی بەهەشت عەشرەت وە پێچش وە زامەتەوە وەو زامی تا قام قیامەتەوە ++++++++++++++++++++++ سەرناو: مامۆسای سەر ئێڵ مامۆسای سەر ئێڵ شیرین کەلامان تەشریفی خەیرت باوەر وە لامان نە شنۆی بەدکار، نە بۆی بەدوازەن وەحشییان هەمراز، تەیران دەم سازەن شەتاوان چون سەیل دیدەمەن جاری پێچ مدان چەنی زامانی کاری تۆ نە سەرگوزەشت سزای دەردی لەیل من نە حیکایەت ئازیزی بێمەیل ساتێ پەی وێما بنیشمێ وە شاد بەو ڕازانەوە خەم بدەین وە باد تا فەڵەک دیسان نەی ڕاگوزەردا بوینمێ چێشش ها نە ژێر سەردا ++++++++++++++++++++++ سەرناو: مامۆستای شیرین مامۆستای شیرین، شۆخی دیدە مەست جە مەکتەبخانەی مەدرەسەی ألست دیدەش مەکتەبی قەدەر سزادا نیمنیگاش تالیم تفڵی قەزادا سەرنووکی موژەش مەکەردش تەقریر راستی پەی تیر تەدبیر تەقدیر تۆ پەی تەعلیمش نە ڕای جەختەنی ئەڵبەت یا سەرسەخت یا بەدبەختەنی ++++++++++++++++++++++ سەرناو: مایەی ئێش و نێش مایەی ئێش و نێش گشت زامانی سەخت بازووی تەوانای بەرگەشتەگیی بەخت ڕاسەن خۆ فەڵەک چەواشەی چەپگەرد پەی دووری باڵات شانا مۆرەی نەرد بەڵام گیانەکەم حەیفەن پەرێ تۆ بێشەرتیت بەی تەور نە عام مەشهوور بۆ من بیم خڕیدار کاڵای باڵاکەت من بیم وە سەرگەرد گەردی پاڵاکەت باعیسی گەرمیی بازاڕت من بیم جەلای ئایینەی ڕوخسارت من بیم من سکەم وە نام مەحبووبیت لێدا من ڕەواجم دا وە شار و دێدا ئاخر پەی ئەغیار جە من ویەردی ئای بێ بەڵا بی، ئانە چێش کەردی؟ مسپارووت وە سۆز هەناسانی سەرد وە جۆش و خرۆش دڵەی پڕ جە دەرد تەپ و دووی دووکەڵ هەناسەت بەرز بۆ ناڵەت چون ناڵەم جە هەزار تەرز بۆ هەر شەو سەیلی هەرس وە ڕووی ڕوخساردا تۆف تۆفانش بۆ وە هەر دیاردا خەدەنگی چلچەنگ شۆت وە جگەردا پەنجەی بەدبەختیت بدەی وە سەردا تا بەڵ نەو سەردەم بەیۆ وە یادت رەنجی بێسامان بەردەی فەرهادت ++++++++++++++++++++++ سەرناو: من خەریکی ئێش من خەریکی ئێش زامی جیایی نیشتەی گۆشەی تار مزگیی تەنیایی گا مەشغووڵی زام، گا خەریکی دەرد گا ڕەفێقی خەم، گا هەناسەی سەرد گا سەر مەکەرۆ هوون نە چەمەی چەم گاگا مەویەرۆ سێڵاو نە دیدەم گا زامی ناسۆر هیجران مدۆ چڵ گا یاوۆ وە عەرش ئاه و ناڵەی دڵ گا نێشی دووری مدۆم ژاری مار گا تیری فیراق مەکەرۆم لەتار نە هاوزوانێ دڵداریم کەرۆ نە هاوقەتارێ دەسباریم دەرۆ نە حەکیمێوەن کەرۆ دەوای دەرد نە تەبیبێوەن جە دڵ لادۆ دەرد سا ئیسە ساقی جەمین جامی جەم وادەی ئاماتەن وە بانی دیدەم دەورێ دەر وە جام بادەی پڕ جە مەیل بەڵ دەروون جە مەیل باڵات ببۆ کەیل جە ماسیوای تۆ فارغ بۆ حاڵم بەڵ نەدۆم ئازار شوومی خەیاڵم یەک دڵ بوو چەنی عەشقی دیدارت گیان کەروو فیدای دیدەی خومارت ++++++++++++++++++++++ سەرناو: من پێسەم زانا من پێسەم زانا تۆ پڕ مەیلەنی دەروون جە بادەی مۆبەت کەیلەنی دووی کوورەی دووریت مشۆ وە تووندا بەردت دان وە پای وەفای مەجنووندا ئیسە دیدەکەم ئێد دیارییەن ئەر چیوێت کەم بۆ وەفادارییەن ئامۆشۆی وە گەرم یارانی گیانی وە باری خاتر نازک مزانی بۆی بێوەفاییت چون بۆی وەر زاخان مدۆ نە دەماخ بەختان قوڵاخان شەرت بۆ تا وەی دەرد دڵەی تەنگەوە سەر بنیەو وە سای سیا سەنگەوە هەنی پێشانی ڕەنگ وە خەزان دەر پای ئاسانەکەت نەگێرۆ نە زەڕ دیدەی کۆری هیجر باڵای بێخەوشت نەوینۆ سورمەی گەردەکەی کەوشت جە شنۆی ناڵەی شەو سۆزی زاری سەگی ئاسانەت نە بۆش بێداری چەم نم نەدۆ تۆز حەریم چون جاران هەرزان کەرۆ باد دەوا پەی یاران جە سای دووی دەروون سەودایی بێشۆ نەڕەنجۆ سەفحەی لای سەوزەی وەش بۆ دایم هەوای یار پڕ بەینەتت بۆ نەوینی کەسێ جای مەینەتت بۆ بڵێسەت بەرزان بگێرۆ پەرێم هەر بواچی ئاخ پەی داخداریی وێم من وێڵ وێڵ گێڵوو هەردە و هەردەوە هەر دەرد بۆ بدۆم وە دەم دەردەوە تا ڕێزۆ وە خاک دڵ چون پڕ داخان چەند داخ شین وە خاک، ئێدیش بان داخان ++++++++++++++++++++++ سەرناو: من کە دڵ دایم... من کە دڵ دایم نە واوەیلمەن غەرقی موتاڵای خاڵی لەیلمەن چ باکی تانەی تەوەنتاومەن شەوقی موتاڵای ڕووی کتاومەن؟ ! ++++++++++++++++++++++ سەرناو: منارە سەدای سەڵاش سەد تەرزەن منارە، سەدای سەڵاش سەد تەرزەن مزگی، جە شادی دەماخش بەرزەن مەی نە خوم چون من نە خەم ئەسیرەن مەیخانە سەفاش خەیلێ دڵگیرەن لوولەی تەراویح وەشوەش مدۆ دەنگ بێئاهەنگەن تار تەموورەی ئاهەنەگ مەرحەبای لیباس تاعەت پۆشانەن ئەلوەدای کاسکاس بادە نۆشانەن ساقی، سا سەد جار وە نازت نازوو هوردەر وە گوڵبانگ سەدای وَامْتازُوا توڕڕەت نە ڕووی خاڵ جەبین سەراوێز پیاڵەت چون جام «کەچ دار و مەرێز» ستارەت نە شەو توڕڕەی قەترانی هوەیدا و پەنهان شەمس پێشانی هیلال نە پای شەو نەسیم بۆی نافدا بنمان نەو شەفەق بادەکەی سافدا هەی هیلال، هەی عید، خێزۆ جە یاران وە ڕەغمی گرۆی پەرهێزگاران شادی دەر وە دڵ لای مەیخاراندا خەفەت دەر وە جەرگ ڕۆزەداراندا ++++++++++++++++++++++ سەرناو: موبارەکت بۆ موبارەکت بۆ بەزمی نەو وە خەیر توخوا تەنخوای من خاسخاس بکەر سەیر سێر کەر تەماشای ئەو جەمین جامان وە خوسووس ئازیز شای نەونەمامان وەختی ئامۆشۆی ئاما و لواشەن تەرزەکەی وە بەرز دەورەی سەماشەن گرمەی نقارە و لرفەی شەرواڵان خشپەی پاموورە و زرنگەی خرخاڵان چریکەی سڕنا و پریکەی خەندە پەشێوی زوڵفان ڕیشەی دڵ کەندە ئیشارەی وە ناز لەب خەندەی وە نەرم نمانای خاڵان نە تۆی پەردەی شەرم سەرچۆپی وە ناز قۆڵ هوردای دەسماڵ بریقەی شیشە و لەرەی لیمۆی کاڵ ورشەی ستارە نەو زوڵفی بووم زەڕ چون قەوسوقەزەح گرتەن دەوری وەر جەو بەزمی شیرین منیش کەر وە یاد بەزمتان جەم بۆ دایم وە دڵشاد من وێم زووم زانان تاڵەم پەشێوەن رەفێقم مەینەت، ئەنیسم دێوەن خودا وە تۆش دان سەیری نەمامان وە من ڕەنگ زەردی و ناڵەی بێسامان ++++++++++++++++++++++ سەرناو: مەجنوونەکەی وێڵ مەجنوونەکەی وێڵ شەیدای باڵای تۆ سەلام کیانا وە خاکی پای تۆ وێش جە تاوی دەرد باری خەمان بەرد جادەی مەینەت گرت، وێڵبی هەرد ئەو هەرد دڵ ئەمیرشەن جە لات ئەسیرەن چون تاوانکاران بەندی زنجیرەن ئامان سەد ئامان خاس نیگاش دارە وەرنە ئاروفتەن زوو مبۆ پارە ++++++++++++++++++++++ سەرناو: مەرگت دێوەلوول مەرگت دێوەلوول خەمان دێونان بونیادی خەرمان عیرفان شێونان جە دیدە و دەماخ، جە گۆش و گەردەن دووریت نمەز کام زامدارتەر کەردەن دیدە پەی ڕوخسار خورشید وارەکەت یا دەماخ پەی بۆی عەنبەر بارەکەت گۆش پەی شنۆی ڕاز ڕێزەی شەکەر ڕێز یا گەردەن پەی بەند حەڵقەی زوڵفی دێز خێڵخانەی مەینەت یەند ئاما و شییەن وە سەفحەی دڵدا سۆهان ساو بییەن هیچ بەند نمەبۆ پای بەڵاش پێوە وەرنە هەی شاباز شۆخی شەم شێوە جە کۆ مەعدوومی ئەو تاقەت دارۆ ساتێ وە بێ دین باڵات بویارۆ قەزا وە سەد تەرز بەڵا باریشەن دڵ هەم هەر دەمێ تەرزێ زاریشەن چێش بی، هامدەردان دەروون جە خەم کەیل؟ ئەو باڵا و چیهرە و خاڵ و زوڵفی لەیل تۆمەی سەروی گوڵ وەنەوشە و سونبوڵ شاناش باخەوان ئەجەل وە تۆی گڵ تا دیسان ئەر قەیس وە مودارا بۆ نە کام وەهارا چەمەن ئارا بۆ ++++++++++++++++++++++ سەرناو: مەنزڵگەی دیدەم مەنزڵگەی دیدەم ئاوپاشی کەردەن چەشمەندازی بەرز بێتۆز و گەردەن شێوەت با بەیۆ ئەر مەیلش بارۆ بەڵام بویەرۆ ئەر بەد بویارۆ ++++++++++++++++++++++ سەرناو: مەیلت ئارەزووی مەیلت ئارەزووی ئەغیار کەردەبێ چێش خامەکەت نام مەعدووم بەردەبێ بێمنەت جە مەیل ئامای نامەتم مەمنوونی جە وەفای ڕەشحەی خامەتم پەرسابێت چۆنی؟ وێت غەڵەت کەردەن مەر نمەزانی دووریت چ دەردەن گەرمیی بڵێسەی دەروونی دەماخ دێوەلوولی ئاخ دڵەی پڕ جە داخ ئەو بەرد نم نە چەم دیدەی پڕ جە دەرد ئێد ماڵا ڕووی حەرف خەیاڵی بێگەرد نە قەترەی ئەسرین مەندەن نە چەمدا نە نوختە نە حەرف ئینشای ماتەمدا عەرزە شاهیدەن خاس بدیە پێشدا حەرفی نوختەدار نەمەندەن تێشدا ++++++++++++++++++++++ سەرناو: نازک تەدارەک نازک تەدارەک فەسڵی وەهاران شیرین ئارایش هەردە و کۆساران گوڵ چون ڕووی ئازیز نەزاکەت پۆشان وەفراوان چون سەیل دیدەی من جۆشان مدیان گوڵاڵان نە پای دەربەندان ئەو یەکتەر وێنەی ئارەزوومەندان چ خاس خاس شنیۆ نە ئێواراندا سەوزە وە ڕووی خاک جەرگەی یاراندا بوین ڕەعشەی وەجد دڵەی پاکشان عەیان نە شنیای سەوزەی خاکشان جەی گۆشەی خاستەر نییەن مەسکەنێ ساقی گیان ئامان خومار ئەشکەنێ هورێزە، سوبحەن، دڵ تازە خاوەن شنۆی پای کاوەن، گۆشەی سەراوەن سەوزەی خاکی پاک یارانی هامفەرد فرەمان وە فەرش بەزمی وێمان کەرد کەو سەوزەی ئێمەیچ نە کام هەردێ بۆ؟ وە فەرشی مەجلیس کام هامفەردێ بۆ ++++++++++++++++++++++ سەرناو: نامەکەت پەی چێش نامەکەت پەی چێش؟ پەرێ دەوای دەرد یاوا خاس وانام موتاڵەعەم کەرد ئاخ، داخان نیشات جە بێخ کەندە وێم رای تەدبیری کەس پێ نەمەندە وێم سەرەتای زوخاو نە جەرگم سەردان بەیدێ پێمەوە یاران، هام فەردان هاوار یانێ های خاڵۆم نەشنەفتەن جە نۆ کۆسێتەر خاستەرم کەفتەن دیدەکەم ماچان بێوەفاییش کەرد شەرت و عەهدی بەین وەرین جە یاد بەرد زیاد بی سەردیی پەی غەم کەیلەکەش کەم بی گەرمیی تاو کوورەی مەیلەکەش هەوای دۆسی نۆش وە دەروون ئاوەرد سفتەکەی کۆنەش یەکجار جە ویر بەرد دیدەکەم تۆ مەیل خەستەت زەروور بێ ئەی بێشەرتییە فرە چێت دوور بێ خەیلێ واتم خەیچ ئێشی زامم مەرد ئای کولناتەوە ئینە چێشت کەرد بەزەییت ناما بەی زاریمەدا وەی ناڵەی شەوان بێداریمەدا وەی دڵەی پڕ ئێش پڕ زوخاومەدا وەی هەناسەی گەرم تەوەنتاومەدا من دڵم وە تیر تۆ ئێشا، یا ئەو من جەفا و مەینەت تۆ کێشام، یا ئەو من وێم وە سەرگەرد باڵات کەرد، یا ئەو من وێم فیدای خاک پاڵات کەرد، یا ئەو جە بەدبەختی وێم وەنەش وارۆ سەنگ زانام بێمەیلی ئەمما نەک وەی ڕەنگ من هیچ بەر کەنار، ئەحواڵم مەپەرس خۆ قیامەت هەن جە خودا بتەرس خاڵۆ دەردی دڵ بێنیهایەتەن شکایەت نییەن، یە حیکایەتەن ئاوایی پەی غەیر، وێران ماڵە وێم عاڵەم شیرینکام، مەزاق تاڵە وێم ناوەش پێ حەڵاڵ، وەش حەرامە وێم شادی پێ نوقسان، غەم تەمامە وێم هەڵۆ زەدەکەی ترسیاگە وێم درۆ بۆ یا ڕاس هەوەسیاگە وێم چ وەختی ئامای ئینشای فەردت بێ چ وادەی داوای دەوای دەردت بێ گلاراوی مەرگ چێگە و چۆگەمەن دەخیل تەدبیرێ جارێ نۆگەمەن ++++++++++++++++++++++ سەرناو: نامەکەت یاوا نامەکەت یاوا کۆسم کەفتەوە دڵەی ئاهیرین دا وە نەفتەوە تاکەی تۆ بەو زام، من وەی دەردەوە تۆ بەو کاوەوە، من بەی هەردەوە تەشریف باوەرە جەرگەمان جەم بۆ بەڵ وەی جەم خەمێ جە لامان کەم بۆ بێسارانییەن نە تۆی فەردی من: «خەم چەنی خەمان زوو مەبۆ ساکن» هەناسەی سەردم نە دڵ خێزاوە خێڵخانەی کەیفم هەوار بێزاوە وەیشوومەی مەینەت تەم ئەنگێزاوە وەڵگەکەی شادی سەر تەڵ ڕێزاوە جۆی چەمەی شەوقم هەم یەخ کەردەوە مەزرەعەی هەستیم شەڵتە بەردەوە نەشئەی وەختی سەخت ئامای پاییزەن یا شنۆی دووریی باڵای ئازیزەن ++++++++++++++++++++++ سەرناو: نامەی بێمەیلیم نامەی بێمەیلیم خامەت ڕەقەم کەرد دوودیم جە دیدەی فەڵەک ئاو ئاوەرد من و بێمەیلی، چون واچی شەو ڕۆن مەیلت نە دڵدا، دڵ هەر جە لای تۆن بێچارە وە تای زوڵفت گیر بییەن ها نە پای تەلدا جواوش نییەن ++++++++++++++++++++++ سەرناو: نامەی عەنبەربۆت نامەی عەنبەربۆت باد سوبح ئاوەرد عەترش زامەکەی کۆنەم تازە کەرد موتاڵەعەم کەرد وە دەم دەردەوە جەفاکەی وەرین جە یاد بەردەوە مەفهووم بی تەحریر وەش تەقریرەکەش مەعلووم بی جە لای خەستەی تیرەکەش فیدای خامەت بام وە یادم کەردەن یادم نمەشی تا وە ڕۆی مەردەن بەڵام جە دووریت شای ساحیب شەرتان دوودی دڵ وە چەرخ هەفتەمین یاوان دووریت چون ئەڵماس نیشتەن نە جەرگم ها وەختەن بەیۆ وادەکەی مەرگم داخی باڵاکەت بەروون وە گڵکۆ وە هامباڵای وێم خاکم وە سەر بۆ ++++++++++++++++++++++ سەرناو: نامەی نەفتینت نامەی نەفتینت یەک ڕۆ باد ئاوەرد کڵپەی بڵێسەی کوورەم زیاد کەرد دەڵاڵەت جۆشۆ چون ڕۆی ئازادی گەرمەی گەرمی نەزم بەزمی پڕ شادی سەدای «لاو هەی لاو»، زڕەی زەڕزنجیر سڵسڵە و بانیسەر، بەندزرێ و لاگیر زیلەی گوارە و زرنگەی زەنگڵەی زەڕ لەرزەی نەونەمام، لەرەی لیمۆی تەڕ شەوقی زەرق و بەرق، فەرقی زەڕ کڵاو ورشە و پرشەی خووی کوڵمی بۆ گوڵاو شەقە و تەقەی گەرم، چەپڵە و چیڵەی نەرم چریکەی وە ناز، تریکەی وە شەرم سەمای دەسماڵان، ڕەمای نەوهاڵان نەمای مەلالان، نمای وەشحاڵان چفەی گەردەن کەچ، مەرگی من چێش واچ خاین وە خەفەت، نەزان جگەر پاچ لارەی قەتارەی لاو شەدەلاران ئیشارەی کەمکەم پەنجە وشاران شاخەی شریخەی خشڵی نیمە ڕەنگ فڕەی فۆتەی شۆر، پاژنۆی گوڵەنگ چەنگ خشە و خشپەی خاس، ترپەی پەنجەی کەوش عیشوە و نەزاکەت، کریشمەی بێخەوش وە لیمۆی ئاڵای کاڵای باڵای شەنگ قرچە و چۆقەی جەرگ، دڵ وە خەمان تەنگ خەمیا و چەمیای ناز نیمچە کناچان دەنگی هەی شاباش نەوجوان واچان شاباشی شادیی شەیدای شاباشان خاسخاس کزەی سۆز دەروون خاشخاشان یاران، یاوەران، های دەردەداران بەیدێ بکەردێ من سەنگەباران جە نەحسیی تاڵە و جە بەدئیقباڵیم هەر کۆ فرسەتەن من یاگە خاڵیم ڕوو ئەو شیوەنان دەی ئەجەل بۆرێ نەو بەزمی شیرین مایەی هەر شۆرێ تا وەی ڕەنگی زەرد چون خەزانەوە سیمی سافی هەرس کەس نەزانەوە هەرلایێ بادەی شەوقێوەم وەردا یەکسەر سەر چون گیان شاباشم کەردا خاڵۆ گیان نامان پەی نەو نەمامان گیان دان وە مۆبەت، پەی مەعدووم ئامان ++++++++++++++++++++++ سەرناو: ناوەری وە دڵ ناوەری وە دڵ ماوەروو نە دڵ: من جە مەیلی تۆ لادێ بوو غافڵ وە دیدەی مەخموور شیرین تەرزی تۆ وە نەشئەی شێوەی باڵای بەرزی تۆ نە شێخ، نە مەڵڵا، نە قازی ڕووی شەرع نە سۆفی و عابید ئەهلی تەقوا و وەرع نییەن داخی تۆش نەبۆ نە تۆی دڵ موشکوڵەن ئازیز جەمین پەڕەی گوڵ وە تیری تانەی ڕەقیبی دڵسەنگ بینایی دیدەم خاتر مەکەر تەنگ ئارێ واجبەن تانەی بەدکاران پەی گەرمیی بازاڕ عەشقی دڵداران نسیوی هەرکەس موبتەلای یارەن زۆلانەی زنجیر، قەتڵی سێدارەن ++++++++++++++++++++++ سەرناو: نزوول کێشا نزوول کێشا دەس بەختم نە ڕای بەد پای ئەدەب نە ڕای عەدەد کەردم رەد ناگا وە فریب پشتیپا دا لێم من وست وە گێجاو قەلەندەریی وێم ++++++++++++++++++++++ سەرناو: نمانای بەهەشت نمانای بەهەشت پێشانیی نووری ئازیز وەی سفتەی دۆزەخی دووری دووریت عەزابێ ساز دابێ پەرێم عەزابێوتەر دا، ئاماو لوات پێم ئای هەنی جەی دەرد کێ دەرمان سازۆ وە هەمسایە سەگ کام دەرماڵ نازۆ چەم وە گەردی ڕای کێ ڕۆشنا بۆ لەب وە یاگە پای کێ ئاشنا بۆ ڕۆی وەسڵت ئەر سەد زەروور نەفامەن مزانام فەڵەک چەپگەردش نامەن فەڵەک داد جە دەرد بێدەواکەی تۆ موغەننی فەریاد ئەو نەواکەی تۆ بوڵەند کەر مەقام «دڵسۆز» وە ڕاسی تەنزیلەش فەرد گەل خاڵۆی کۆماسی: «ڕۆی وەسڵت هەر بیم ئەی ڕووە پێم بێ جەو بۆنە هەرڕۆ ڕۆڕۆ خدێم بێ» «ئیسە ها فەڵەک نیشان دادەن پێم ئاخ ترسیاگەکەی گیر ئاوەردە وێم» «ئەمجار کێ تاقەت دووری تۆ دارۆ دەک بەرقی غەزەب وە جەسەم وارۆ» ++++++++++++++++++++++ سەرناو: نوورئەفشانیش... نوورئەفشانیش کەرد وە دەشت و دەردا مدرا وەراوەر وە ڕاگوزەردا وات نما وەختەن شای جەمین جامان واتم بەڵێ خۆر وە قیبلە ئامان ++++++++++++++++++++++ سەرناو: نە ئاهینگەرێ نە ئاهینگەرێ، نە ئاهینگەرێ ئارۆ ڕاگەم کەفت نە ئاهینگەرێ دیم کە نیشتە بێ کانی گەوهەرێ پادەم مەدەمنا زوڵف عەنبەرێ فیدات بام ئۆسای پادەمە دەمەن دەست وە دەم بۆ، دەم بدەر وە مەن هەی موسوڵمانان ئینە چ دەردەن دەمە دەمانش دەم دەمین کەردەن دەمە و کوورە و نار هەر سێ بین نوورە نۆبەی مەعدوومەن وزاش نە کوورە ++++++++++++++++++++++ سەرناو: نە تۆی حەڵقەی نە تۆی حەڵقەی زوڵف دڵەی شێت و وێت شەرتش کەرد هەنی دڵ نەدەرۆ پێت وەختێ شۆڵەی ڕووت ناگا دا دیار ئەو قسەی شەو بێ، ئێد شۆڵەی نەهار ++++++++++++++++++++++ سەرناو: نە تەن یادەکەی نە تەن یادەکەی ئەو سیمین گەردەن خەیلێوەن هەر گیان خزمەتش کەردەن بەڵام نەی حەسرەت دووی جیاییدا گومانم کەفتەن وە تەنیاییدا ++++++++++++++++++++++ سەرناو: نە نازک خەیاڵ نە نازک خەیاڵ ئیسە، نە مونشیم پەردەی مابەین بیم، ویەردم، من شیم تەن وە دڵ، دڵ جان، جان بی وە جانان مەندەن وە جیلوەی جەرگەی جوانان ++++++++++++++++++++++ سەرناو: نە نەیخانەی تەن نە نەیخانەی تەن ئایر هۆرێزان بزیسکەی چەخماخ کام شەشخان خێزان کام دوودەن ڕووی دڵ باز هەم پۆشاوە کام هوونەن دەروون دیسان نۆشاوە مەسرەف خەزانەی دەردی پەنهانی خەم هۆشت بەردەن مەر نمەزانی شەرارەی تفەنگ بەختی چارەی تۆن دوودی هوونی زام جگەر پارەی تۆن جەستەت سۆچنا دڵ هانە تەمدا نە دەروون جام جام هوون دان وە هەمدا کوورەی دڵ گەرمەی جۆشی سەختشەن پەی فێنکی دڵ شیوەن وەختشەن ++++++++++++++++++++++ سەرناو: نە هات و نەهات نە هات و نەهات دڵ ماتەن ئیمشەو ئەڵبەت شنۆی شەو بەراتەن ئیمشەو سیاهەی دەفتەر میرزای ئەزەلەن زیادی و نوقسان ڕزق و ئەجەلەن ئەو ها وە بەرات بێئەندازەوە ئێد وە تەعلیقەی عومر تازەوە کەسێ قووتش نوقڵ ڕازی یاوەرەن یەکێ زیندەگیش وەسڵی دڵبەرەن هانا هامدەردان چێش مەکەردێ پێم من دیام نە ڕووی تەقسیم نامەی وێم ژاری دووری دۆس ئازیزەن نۆشم نمەیۆ ڕازان شیرین نە گۆشم یانێ جە شووومیی بەختی سیای من ئیمشەو لەرزان تووڵ تووڵی تاڵای من وەڵگی زیندەگیم ها وە هەواوە دیمادیمشەن وە بای فەناوە ئەلوەدای تەئریخ کامەرانیمەن نیشانەی ئاخر زیندەگانیمەن یاران ویەردن نۆبەمەن دەی دەی ئیسە وەکارەن ساقی نەشئەی مەی سا دەی تای دوگمەی یەخەی دڵ پەسەند ئازاد کەر چون دڵ بێدەردان جە بەند پەشێو کەر لانەی دڵان جە سەردا گۆشەی عەرەقچین باوەر وە بەردا مایل بۆ کەمێ ئەو ئەو گۆشەی چەم گۆشەی چەم ئەو جام، جام ئەو ئەهلی خەم دەورت گەردی جەور دەوران دۆ وە باد ناز واچۆ بنۆش، غەمزەکەت نۆش باد تا فوارەی وشک لوولەی پێشەی ڕێش هەر یەک پرشەی زووخ هورشانۆ پەی وێش وە شنۆی نەشئەی مەستیم وانۆوە یەک ئەمجار جە دەس هەستیم سانۆوە ++++++++++++++++++++++ سەرناو: نەتیجەی پاک دین نەتیجەی پاک دین شێخی سازانی خاس وەتەن نە دڵ مەعدووم سازانی پەرسام حَسْبَ الْاَمْر گوزەشتەی ئەحواڵ جواو دا ڕێزەی شیشەی قەدیم ساڵ زەرفێ بیم نە تۆی وەختی شامەوە چون ستارەی سوبح مەدرەوشامەوە پەی گوڵاو پاشی و نەشئەی بەزمی کەی گا پڕ گوڵاو بیم، گا سەرشاری مەی گا وە سەر ڕەفەی زەڕین تاقەوە گا وە دەس ساقیی سیمین ساقەوە گا نە سەر پەنجەی بانووی بێنیقاب چون سوەیل ڕەونەق پەنجەی ئافتاب نە بەزمی شیرین خوسرەوانی دەور مامام نە گەردش هەر ساتێ سەد تەور گوڵاو مەپاشام وە ڕووی یاراندا بادە مەبەخشام وە مەیخاراندا گا گەردەن نە دەس نازک ئەندامان گا دەس نە گەردەن ژەرەژ خەرامان گاهێ ڕوو وە ڕووی لەیلێ ئەندازان گاهێ لەب وە لەب شای شیرین ڕازان هەستیم بێشومار مەستیم وە کۆ بی توغیانم چون تاف جوانیی تۆ بی جە ڕووی نادانی ئەو بەزم و ئەو جەم وە جاویدانم منمانا وە چەم فەڵەک شی وە قین جەور و ستەمدا ئەو بەزم و ئەو زەوق گشت دا وە هەمدا منیچ وەی تەرزە وە سەد پارە کەرد هەر پارە پەرێم سەد پەژارە کەرد مەعدوومی عامەن بەڵا و دەرد و بیم ئەوەڵ قاروورەی شکستە من نیم هۆشیار بەر میوەی مەستی غەفڵەتەن غەفڵەت سەرمایەی هەزار خەجڵەتەن هاکا دەستی چەرخ هەم ستێزە کەرد چون من شیشەی تۆیچ ڕێزە ڕێزە کەرد ++++++++++++++++++++++ سەرناو: نەتیجەی پاکان نەتیجەی پاکان، نەتیجەی پاکان شێخی خاسخەیاڵ نەتیجەی پاکان فەرەح بەخشی حاڵ خاتر غەمناکان دەرمانی زامان خەڵتان نە خاکان مەعدووم ئانا ها جە گیان تەواسان کەیلەن جە خەیاڵ خاڵی خاڵخاسان گرمەی کوورەی دڵ سەد هەزار تەرزەن گرمەی بڵێسەش نە عاڵەم بەرزەن تۆ پەی چێش ئامان ئیمانت هەردەن ئەسپابی فەوتت ئامادە کەردەن وەی دەمەی نەفەس بەد حاڵییەوە وەی دڵەی پارەی زوخاڵییەوە کوورەی دەروونت وە جۆش ئاوەردەن دووکەڵ جە گۆشەی فەڵەک سەرکەردەن پەی کێ ئەی جەستەی وێت مەتاونی زامەکەی مەعدووم هەم مەکاونی من ئێشی پڕ نێش دەروونم وەسەن بۆ خەلاسم کەر حەسەن هەی حەسەن! ++++++++++++++++++++++ سەرناو: نەسیم دووی نەسیم دووی دەروون چون هەردە جاران ئیمجار دەر نە کاخ دەماخ یاران واچە دیم وە چەم دێوانەکەی تۆ رووش کەردەن نە ڕووی ئاسانەکەی تۆ نامەی ئایرین دڵسۆزیت یاوا بڵێسەم وە سای گەردوون سەر ساوا سۆچنا جەستەی زامەتان خەستە لابەرد تۆی دەروون دڵەی دەرد گەستە وەشی و شادی و زەوق پەی ئێمە نییەن جە دەسمان ڕشتەی ڕاحەتی شییەن دوژمنیی فەڵەک پێمان قەدیمەن چەنیمان مەینەت قەدیم نەدیمەن مەستی بادەی کەف ڕۆزگارانیم بێهۆشی هیجران قەدیم یارانیم نە دڵ ئەو دڵەن، نە هۆش ئەو هۆشەن نە فام ئەو فامەن، نە گۆش ئەو گۆشەن هەر کاتێ زانای فەڵەک نەردێ شەند وێنەی هام جامان، جامان وە جا مەند ++++++++++++++++++++++ سەرناو: نەسیمی مەحرەم نەسیمی مەحرەم مابەینی یاران ماچان وەهارەن سەوزەن دیاران گیان وە بێتاقەت موینوون ئارۆ زاهیرەن هەوای لای ئازیز دارۆ ئامێتەی خەیاڵ ئەو دڵ پەسەندەن ئێڵاخیچ هەڵای کەمێ یەخ بەندەن زەحمەت وە خەیاڵ ئەو ئازیز مەدەر وەر نەیۆ گیان، هیچ، بە وێت تەشریف بەر چون یاوای پەرساش بەناڵە عەرز کەر: دیم تەن سفتەکەی خەستەی زام خەتەر دڵ دەروون هەر یەک وە دەس خامەیێ ئینشا کەردەبێ توغرا نامەیێ دڵش کەردەبێ وە دوو هو مەرقووم دەروونش وە هوون مُحِبُّکْ مَعْدُومْ ئەر تەسدیع نەبۆ وە جان فیدای وێت گۆشدەر سەوادش بوانوون پەرێت: وە نامی دەرمان زامانی موشکوڵ جە نەوای بوڵبوڵ جە ئیستیغنای گوڵ «بەعد» وە دیدەت شای نەو نەمامان هەر ئێد مژنەوو وەهارێ ئامان ناستەنش هەوای نەو وەهاران پێم تەماشای وەهار حاڵەتەکەی وێم شەتاوم هووناو دیدەی پڕ دەردەن نەسیمم شنۆی هەناسەی سەردەن غونچەی نەشکوفتەم زامی کارییەن بوڵبوڵم ناڵەی دڵ ئەوگارییەن والحاصل سەمووم بای تاڵەی سستیم پەژموردە کەردەن وەهاری هەستیم تا واچی خەرمان خەم وەکۆنانێ وە کەیفی دەماخ دووری تۆنانێ خوسووس چون خەبەر میاونانێ گوڵان، بوڵبوڵان، ملاونانێ من وێم موینوون خاتر زیزەنان مەحروومی بۆی گوڵ ڕووی ئازیزەنان مکیانۆ ڕەحمەت حەسرەت وە کۆ کۆ ڕەحمەت پەی جەناب دەردی دووری تۆ کوورەی ئارەزوو جۆشی سەختشەن ئای بێمەیل، ئاوێ، دەخیل وەختشەن ئاخر نەک ئێمەیچ داخ نە دڵێنمێ سۆچیای ئایر چون تۆکڵێنمێ تۆ پەی نیشتمان، من پەی سەودای تۆ هەردوو بناڵین وە گریە و ڕۆ ڕۆ ++++++++++++++++++++++ سەرناو: نەمەندەن خەیاڵ نەمەندەن خەیاڵ فەردان کەردەنم فەرد ها بی وە تەوق شی نە گەردەنم ئەر فەڵەک گەردش نەدا نە ڕووی بەخت نەوستاش ئەو گێج گەردەلوولی سەخت ئارەزووی دیدار یارانم کەردەن هەوای سەیرانم وە دڵ ئاوەردەن بگێڵوون چەنی هامفەردان وە شاد وە سەر بەرزاندا خەم بدەون وە باد وەر کوشتاش جە داخ نەدیەنی یاران چەندجار کوشتانێش، ئێدیش چون جاران ++++++++++++++++++++++ سەرناو: نەواتم عەرعەر نەواتم عەرعەر سەهەند پەروەردە باخەوانان داخ وە تۆی گڵ بەردە خودنومایی لای باڵا نەمامان وێت لادەر ئامان، پەرێ تۆ نامان دیت شنۆی غیرەت دیدەکەم خێزا وەڵگەکەی سەر شاخ زیندەگیم ڕێزا خاس بی دەرگای خەم پەی وێت کەردەوە دوولەتیمان بۆ هەرچیت بەردەوە ++++++++++++++++++++++ سەرناو: نەوای ناڵەی دڵ نەوای ناڵەی دڵ وێنەی سەدای نەی پیاڵەی زووخاو مەنۆشوو چون مەی کەواو پارچەی جەرگ سینەی برێشتاو رەحمت بۆ یە نەی، یە مەی، یە کەواو هەر ئەساسێ هەن جە لام جەم بییەن گەرمیی کزەی بەزم هیچش کەم نییەن تەسدیعت کێشان، ساحیب شەرت و شۆن چ ئیحتیاجێ وەی کەواوی تۆن؟ ++++++++++++++++++++++ سەرناو: نەوای کەژاوەی لەیلێ نازانەن نەوای کەژاوەی لەیلێ نازانەن سەرەتای تەڵمیت شیرین ڕازانەن وەی ڕۆی دمای کۆچ مەجنوون بەختانەن ناڵەی فەرهادی زامەت سەختانەن چون شێویا لانەی دڵان پڕ داخان جۆق جۆق سیاماڵ شین پەی لەیلاخان سەرعێڵ عەرزم هەن لا بکەرەوە خێڵخانەی دڵان ها لە بەرەوە ماڵاتش سەرجەم وە دەرد ئەوگارەن هەرد و هەوارگەش مافەتەدارەن دەوڵەتمەندەنی لا بدەر چەنەش ماڵات و حەشام وێت مەدەر وەنەش کۆچی خێرت بۆ ئیمساڵ چون ساڵان تا لای ئێلبەگی ئێلی نەوهاڵان وەختێ چون ساڵان وە دەروون ئاوەرد پووشانەی دڵان لەوەڕیای ئەو هەرد پرسان کۆن؟ چێشەن؟ پووشانەش نامان چون تاڵان بەردان جواو دەر ئامان نە دیدەی شادی دیدەنیش خار بی جە ئاشناییش تاقەت بێزار بی گێج مەدا سەبوون شارەزووری دڵ سیروانی هووناو دەروونش گوڵگوڵ واژاوش مەویەرد نە دەماخ دەم دەم تاف مەوەست سەراو چەرخی زەڵم چەم عەدەمش نە پووش هەستی مەکەرد ساف منمانا چون خەس هەستیش نە ڕووی تاف هەوای هاژەی تاف بەردەبێ هۆشم بەڵام ئەی چەند بەیت ئاما نە گۆشم: ئای بەختم توغیان وێران ماڵیشەن گەرمەسێری دڵ سیا ساڵیشەن کۆزی سۆچیای دەروونی پڕ دەرد ماڵاتی شادیم یەکسەر قڕان کەرد کزەی ڕەشەبای هەناسانی سەرد سیاماڵی عەیش تەختە تەختە کەرد هاوماڵان یاوان بە وارگەی جاران من بێبارەبەر مەندەی هەواران جەورەکەی سەرئێل خەم بێشومارەن خێڵخانەم بەرپێچ تا خێڵ ئەو خوارەن ++++++++++++++++++++++ سەرناو: نەوباوەی خەیاڵ نەوباوەی خەیاڵ «مەحرووم»ی دانا رەدیفی لەتیف زەریفی خانا یاوا وە دیدەی کەم بینام ساوا جە نەو بینایی پەی دیدەم یاوا پەیڕەوی خانات یاد ئاوەردەبێ ئەو ئەسڵ و وێت فەرع حەساو کەردەبێ لاکین زادەی تەبع بۆ عەنبەرینت دەس ڕێسەکەی فکر بیکری شیرینت پەسەندیدەی فام عەقڵی دانا بێ خاستەر جە خەیاڵ خاسەی خانا بێ زیادە پەی فەرع وە سەر ئەسڵەدا خاسەی واتەی تۆن جەی سەر فەسڵەدا ++++++++++++++++++++++ سەرناو: نەی گەهوارەی نەی گەهوارەی دەور تای دەسرازە خەم تاکەی سەر ئەنگوشت غەفڵەت نە تۆی دەم بازیت پێ وەردەن هەر یەک وە لایێ سەدای دایەنان وە لایەلایێ های نە فەرقش هەن ئەو سەدا و تەئسیر تا ئەو لاوناو ئەو مەزە و ئەو شیر هەر تفڵێ بێشک نەی بێشک خەفتەن جەی دایە بڕیان بەو دایە جفتەن وەس خاکبازی کەر بێدار بەر ئامان بڕیانەوەی تۆیچ سەروەختش ئامان ها وە قەفاوە یەند شی بە وێدا چەم بێ بینایی مدیۆ وە ڕێدا قەزا وە قومار نە پای باختمەن قامەت حەڵقە بەست وەختی تاختمەن موتریب، سازەکەت ئۆف چ وەش تەرز بێ ئەمجاریش وەک دەنگ مەجلیس هەر بەرز بێ تا کوورەی زاریم بڵێسە سانۆ داخی لوای وێم جە دڵ نەمانۆ داد نمەدۆ داد شین، مالوومەن لێم دمای وێم پەرێم هیچکەس وێنەی وێم ++++++++++++++++++++++ سەرناو: وادەی سفیدی وادەی سفیدی شکۆفەی پیرین شکۆفەی باخچەی پیری دڵگیرین شکۆفەی باخچەی پیری سفیدەن سەرمایەی میوەی عیرفان هەر ئێدەن نە باخچەی سونبوڵ تاری مووی تاردا سپی شکۆفەی پیریم دیار دا باقەی زوێری و زاری و دڵگیریم پەیپەی زیاد کەرد پەژارەی پیریم ئاخرڕۆی وەهار نەوجوانیمەن ئەوەڵڕۆی پاییز زیندەگانیمەن هەناسەم چون بای خەزان مەخێزۆ پەیپەی بەرگی شاخ شادیم مەڕێزۆ خەدەنگی باڵام چەمان کەمان وەرد ڕاست وە نیشانەی فەنا ڕوو ئاوەرد کەمکەم پیری خەم وە قامەت مدۆ دەمدەم وەعدەی ڕۆی قیامەت مدۆ پیری یەکسەر زۆر جە زانووم سەندەن سەر وە گەردندا هەر وە زۆر مەندەن ساقی، پام بەستەی زنجیری پیرین دەسم دامانت وادەی دەسگیرین چابوک بەو ڕەفتار بێدرەنگەوە خەرامان بەو ناز باڵای شەنگەوە جامت جەم ئاسا لەبڕێز کەر جە مەی پێم نۆشکەر وە یاد بەزمئارای کەی مەستی وە پیران جوانی مدۆ هێزی دووبارەی زرانی مدۆ پێمدەر تا پەیپەی پێوە هەی کەروون رای سەختی سارای مەحشەر تەی کەروون زرنگەی گۆشی وێم پێم ماچۆ وە تاو: گاهێ خەبەردار، گاهێ سەرحەساو من پەمەی غەفڵەت کەڕ کەردەن گۆشم هیچ وەکەس نییەن نە گۆش نە هۆشم نەی گوزەرگای تەنگ بازاری چەپگەرد هەر کاتێ زانای ئەجەل سمکۆ کەرد موتریب بەو نەغمەی «شانازی»تەوە یا بەو پەردەی پاک حیجازیتەوە بوڵەندکەر دڵسۆز سەدای دڵتەنگی بەڵکەم بێدار بوو جەی خاوی سەنگی های غەفڵەت تاکەی هام سەفەر ویەرد بێدار بەر جە خاو کاروان ویەرد ++++++++++++++++++++++ سەرناو: وادەی سەفەرەن وادەی سەفەرەن، های نەسیم ئامان وە لای ئازیزا بویەر چوون جاران تەقریر کەر ئەوەڵ بەو زوانی حاڵ سەلام و دوعای ئەو دوڕدانەی لاڵ دووەم جە حاڵات پەشێوی حاڵم جە شۆریی بەخت و وێرانیی ماڵم جە بێقەراری، جە دەسی دووری جە بێئارامی، جە نا سەبووری جە سۆزەی شەرار نائیرەی هیجران جە ناسۆریی زام تیرەکەی موژگان جە قرچەی قاوەی جەرگی جەفاکێش جە وەلوەلەی دەرد دەروونی پڕ ئێش جە کزەی هووناو نە چەم سەرکەردەم جە سەنگینیی بار قامەت خەم وەردەم جە بێخاویی شەو ئەلوەدای سەحەر جە ناڵەی ئەعزا، جە سۆزەی جگەر جە هاواری تەن، جە ئەلوەدای گیان جە یاوای فەڵەک ناڵەی «ئەلئەمان» یەکیەک بە حوزوور ئەو ڕۆحی ڕەوان عەرز کەر وە سەد شیرینیی زوان واچە یەند زوخاو دەروونش وەردەن ئەسپابی مەردەن ئامادە کەردەن بەڵ یاوۆ وە لام تەبیبی دەردم مەرهەم دۆ نە ڕووی زامانی سەردم جەو مەعجوون ئەجزای لوتف و مەیلی وێش دەوا دۆ پەی زام خەستەکەی دڵ ڕێش ++++++++++++++++++++++ سەرناو: وێش نمەوینۆ وێش نمەوینۆ، ئازیز، خەمینت دیارەن لێڵەن جامی جەمینت تاڵەن کامی دڵ مەینەت گازەکەت تامی دووریشەن ڕێزەی ڕازەکەت بەدبەختیی منەن وە یانەم هەرەس ئازیزێ چون تۆ نمەگنۆم وە دەس وەرنە شەم هەزار پەروانە دارۆ ئەر یۆشا کەم بۆ پەروا نەدارۆ ساقی، دەسی چەرخ هەر ها نەکاردا تای تانتەی دووریش بەستەن وە داردا سەروەختی هەستی جە دەس وەردامەن تەدارەکی خەیر ئارۆ و فەردامەن تەمامەن بەرات قەبز و حەواڵەم دێرەن کەرەم کەر بدەر پیاڵەم تا هیممەت وازوو وە یەک پەیمانە خاڵی بۆ چێمەیچ گۆشەی مەیخانە ++++++++++++++++++++++ سەرناو: وە خیلافەوەن وە خیلافەوەن یارانی سەرمەس تەقازای زاتیی تەبعم هەرچی هەس جەزبەی ئاهینم دەماخ دان پەرداخ میقناتیز تۆی جام کەردەن وە یاتاخ کارەبا نە دەور کام مدەرۆ دەور نە دەورەی موورەی کارەبا کا تەور ئەر گێروو وەکام کافوورم کەمکەم ئاو قەفاڵی وێش مەپێکۆ دەردەم أَنفِیەکەی گەرد ڕای دەردم هەوا مەکەرۆ دەماخ ئەفلاتوون دەوا گەرمیم تافی ساف وە سەر ئەندەردا بەستەن وە ڕووی تاش نیمە کەمەردا ئازیز یەقین عەکس وەش نامەکەی تۆن سایەکەی سیفەت کەلامەکەی تۆن نازوون وەی مەزهەر، های های یە چێشەن نەشئەی ئەو سیفەت زاتی تۆ پێشەن جە نامای جواو، جە بێوەفاییم هەرچیت فەرماوان ڕاسەن، بیناییم ئەر وەفام مەبی پەی تۆ مەمەردم خەیر مەبڕیابێ پەنجەی پای فەردم ئازیزم نامە پێچ مدۆ چون مار خامەی چەم یەکێ، ئەسرینان هەزار وێش دان نە سەر کەف کووپەی سیایی پەی شەکوای عەرزەی دەردی جیایی وەخوا نە دووریت کۆتاییش ئاوەرد نە گیان ئیختیار ماوای بەدەن کەرد بەڵام یادەکەت ناستەنش وێم پێم وێم بەرکەرد، نیشتەن وێش جە یاگەی وێم ئەجزای تەن یەکسەر جە شادمانی نمەیۆش وە خاو سەد زیندەگانی هەر جزوێم پەی وێش یەند سەرشار بییەن ئەی جزوم جەی جزو خەبەردار نییەن نە دڵ یادی ڕاز سەفحەی نامەشەن نە سەرپەنجە هۆش گرتەی خامەشەن یەند نە تۆی زەلکاو دەواتی پڕ وەی مدران مونتەزر وەڵگ ئاوەردەن نەی نەی مدۆ سەدای دڵان پێ خەستە وەڵگ مارۆشەوە بەستە وە بەستە ئیسە یادتەن سزای خیتابەن ئەر سزا وە ناز، وەر وە عیتابەن نە نە، سفتەی هیجر خاڵی ئاڵاتم دۆزەخیی دۆزەخ دوریی باڵاتم بویەر جە مەنەیم شای نەو نەمامان مەردەن پەی گرۆی دۆزەخی نامان ++++++++++++++++++++++ سەرناو: وەختی چەم نە چەم وەختی چەم نە چەم شێوەت دیار بی جە لام فەسڵی وەسڵ بەزمی ئەغیار بی ئیسە لێڵایی گرتەن دوو دیدە خەڵوەتەن، سا بۆ ئەی بەرگوزیدە ++++++++++++++++++++++ سەرناو: وەختەن پیاڵەی دڵەی... وەختەن پیاڵەی دڵەی پڕ جە دەرد پڕکەی جە بادەی هەوای گەردن زەرد چەنی گەرمیی نەزم بەزمی پڕ شادی بویاری وە ڕەغم ئەی دنیای بادی دایم سەدای ناز سەودای گۆشت بۆ سەد چون مەعدوومی فەرامۆشت بۆ ++++++++++++++++++++++ سەرناو: وەسەن ئەی مەخسەڵ وەسەن ئەی مەخسەڵ دەوری دیدەی مەست ئەی ئاماو لوا سەد قەزا پێشەن ئارەزووت دڵ بی ئەوەڵ جارت بەرد هەنی گیانەکەم مەتڵەبت چێشەن ++++++++++++++++++++++ سەرناو: وەش ئامای وەش ئامای هەی پەیک لای قەبیلەی لەیل جەیبی دڵ وە عەتر مەیلی لەیلێ کەیل وەختێ دووی دەردان مەویەرد نە هەردان جە کوورەی ئایر دەردی بێدەردان نامەی وێرانەی دڵان پێ ئاوا جە ناکام یاوا، بەڵام کام یاوا های وە فەرقی دین زامداران تاج دای شەریعەتی مەیل لەیلێ ڕەواج دای قات بی جە کەسرەت یارانی هامدەم گەردی کۆی دڵبەر خەبەر بەر پەی چەم مەخموور کەر دەروون جە بادەی باقی یانێ نەی جواو خاتیمەی ساقی بەڵێ چون لەزەت تیری نازاران تام نەدان ئەو دڵ بازیت شوماران نازوون وەو غیرەت چ خاس پێت زانان ماشەڵات وە حاڵ یاران پێ وانان هەوای کۆتایی ناڵەی وێت بییەن وە تیرێ هەنی ئاگاهیت نییەن دڵ ناڵان بییەن ناڵان پەی تیرەن تیر سەرمایەی گیان ئاڵەمی پیرەن کۆتایی نییەن دۆس وە ناڵەی دڵ چون وەردۆ جە گیان دەس دڵەی خەجڵ نیشان ئەو بۆ دڵ نە جای خەدەنگ هوون پەی وضو حەوز حەوز بدۆ وە بیروون حەوزێ حەنەفی خاس پێش ڕەزا بۆ نەک جەی شەرعەدا نمات قەزا بۆ چون تازە زامی هۆشت ویەردەن وێت ئاسا خەیاڵ ئازیزت کەردەن ئەو جە کۆن، دووری و نزیکی جە کۆن دووری و نزیکی وەسفی من و تۆن مەنزڵش نییەن ئەو قەوس ئەو خەدەنگ کێ پەرساش یەکێ و سەد هەزار فەرسەنگ یەکێوەن هەروەخت نیشان ئامادەن کێشا و بەرشییە و ئەو نیشان دادەن ساقی زیادەی مەی زۆر ئاوەردەن سڕی سەر بەردەن وەرنە سەر بەردەن تەنگەزەرفەنان هیلاکم مەکەر ویسعەت مەشرەبی، یا جام نیمپەڕ دەر ++++++++++++++++++++++ سەرناو: وەش ئامای وە خەیر وەش ئامای وە خەیر هەی بەرگوزیدە بۆ نە جای مەردوم جا گر نە دیدە خەیلێن بینایی جە دیدەم ڕەمان بەڵ سوڵحشا بۆ بینایی و چەمان ساقی، ترسی دەرد دووریی جەمینگوڵ وەسڵم جێ کەردەن وە ژاری قاتڵ هەر کاتێت زانا فەڵەک کەڵەک بەست دامنەکەی وەسڵم بەرداوە جە دەست سا دەی وە جامێ دڵم بکەر شاد بەڵکوو بویاروو بەزمێ وە ئازاد جە دەس بێگانان یاوون ڕەهایی مەس بوون وە شنۆی مەی ئاشنایی ++++++++++++++++++++++ سەرناو: وەفای چەرخی چەپ وەفای چەرخی چەپ، ڕاس بێتان و پۆن جەفا بێپایان، دەردیسەر بێشۆن بەدی نیکییەن، نیکی بەدنامی فامای شێتییەن، شێتی پڕفامی سارای هیدایەت تاریک مەوینوون ڕای نەجات یەکجار باریک مەوینوون ناڵەم نەی ئاسا ئاڵەم گرت نە وەر شیشەی مەی پەمەت نە گۆش بەراوەر جە تۆ قەهقەهە، جە پیاڵە مەی جە ساقی ها دەی، جە ئێمە با بەی مەڵڵا جە کەسرەت لەوحش بۆ سادە مەنسووخ نەزانۆ حەڵاڵیی بادە زاهید مایەی هۆش هیچ نەمانۆ پێش پەشێو بۆ تەقواش چون مێزەرەی وێش من نەوون وە تەنگ نەفامییەوە وێم بدەون وە دەس بەدنامییەوە دێوانان ئاسا بجۆشوونەوە بەڵاگەل چون مەی بنۆشوونەوە شەرارەی مەستیی مەی بەرشۆم نە دڵ وەو چراخەوە یاوون وە مەنزڵ ++++++++++++++++++++++ سەرناو: وەهارەن وەهارەن، تەشریف خاڵخاسان پەی هەرد کەمکەم جوانیش ئاوەرد، پیریش بەرد جەمجەم سۆسەنان جە تاق تەوق وەردان سەردان نە هەردان پەرێ هامفەردان وە ڕووی زاخاندا جنوور لوول وەردەن پەی پای گیان تۆڕدام ئامادە کەردەن بەڕەزا بەو چین توغرای تاتاوە شەماڵ مشانۆش، یانی: وەی لاوە نەرگس وە مەسمەس مدیۆ کێن ئەوکەس گۆشەی چاکی دڵ وەرنەدۆ جە دەس مەعدوومی، غەفڵەت تا چەند و پەی چی گۆشدەر وە ناڵەی سەحەری نەیچی دڵە وادەی سوبح نەووەهارانەن وەختی ئاگاهیی دەردەدارانەن هەر کەسێ دانش نەفامش نەبۆ بینیی عیرفانشن زوکامش نەبۆ گوروفتیی دەماخ نەدابۆ پەرداخ پەیپەی بۆی ئازیز مەیۆش وە دەماخ جەی بۆی گیانبەخشە بێبەش مەمانە ئەی سوبحە خاسە وە فرسەت زانە تۆ دیای وە شۆن چەند سوبحی نۆدا کەو چەند سوبح بدیۆ وە شۆنی تۆدا ++++++++++++++++++++++ سەرناو: وەهارەن، سەوزەن وەهارەن، سەوزەن، ئاوەن، سەرکاوەن هاژەی وەفراوەن، شاخەی شەتاوەن ساقییەن، بادەن، نەسیمەن، بادەن بوڵبوڵ جە دەورەی گوڵان ئازادەن بەزمەن، شادییەن، عەیشەن، نیشاتەن کەیفەن، شۆخییەن، شەوقەن حەیاتەن سەنگەن، کۆسارەن، سەرکووەن، هەردەن خەمەن، مەینەتەن، زوخاوەن، دەردەن هیجرەن، دوورییەن، عیجزەن، فیراقەن واوەیلا و شینەن، ناڵەی عوشاقەن سەبزەن، سۆسەنەن، نەورۆزگوڵانەن کەمەرەن، هەردەن، ملەن، کەڵانەن سەرعییەن، شەیدان، نەجدەن، مەجنوونەن مەزاقەن، جامەن، پیاڵەی هوونەن ++++++++++++++++++++++ سەرناو: وەهارەن، سەیرەن وەهارەن، سەیرەن، سەوزەی دیاران نم کەوت نە دیدەش چون شەو بێداران پەی دڵەی مانیای دەروون مەلالان سایە بەستەوە خەیمەی گوڵاڵان بۆی یەخەی سەحەر پەی دەماخی دڵ مانۆ وە نەسیم جێبی جەمینگوڵ چون دێوانەی شۆر ئازیز نە سەردا شەتاو سەر هۆر گرت وە دەشت و دەردا توولانی چون هیجر خاتر پڕ دەردان ڕەوان وێنەی وەسڵ گەردن بێگەردان های جە شنۆی وەش ڕۆح ئەفزای کاوان ئای جە شاخەی تاف سافی سەراوان نەک چون تافی چەم پڕ ئەسرینی چەرخ بارَکَ اللّە چەرخ، هەی ئافەرین چەرخ چەنی جە هەستیی وێت تەواساییت چەنی جۆشی عەشق مەجنوون ئاساییت بدیە چۆن هوردان وە نام و نەنگدا بێپەروا مدۆ وێش وە ڕووی سەنگدا های ساقی هەڵای سەرمایەی خامی نمەدۆم وە دەس ڕای نێکنامی باوەرە وەشوەش سا دەی هەی پەی کەی تافی قەڵوەزەی سافی شیشەی مەی مەوجش بنچینەم بدۆ وە هەمدا هەستیم دۆ وە بەرد هەردی عەدەمدا ++++++++++++++++++++++ سەرناو: وەی من دیارەن وەی من دیارەن پەنجەی تارمەن سەروەختی هامن نەووەهارمەن سوبحم نە تۆی شەو مەخەنۆ وەکەردەم وەکەردەکەی بەد عومری ویەردەم پۆسی کووسی گۆش نم کێشان کەمکەم ئەمسەرەو سەرەن دووربینەکەی چەم خەم بیم یانێهای پێم مدۆ خەبەر: نە دەرگای هەستی تەشریف بەر ئەو بەر جە حەد بەرشییەن هەر یەند نزاریم نەمەندەن تاقەت ڕای پەردەداریم ++++++++++++++++++++++ سەرناو: وەی من پەی سەفای وەی من پەی سەفای یارانی هامدەم ئای پەی ئەو سەیران ماردم و کەڵڕەم یاران گردین شین وە توونای تووندا هەر خەیاڵ مەندەن نە تۆی دەرووندا ++++++++++++++++++++++ سەرناو: پای شادیم پای شادیم دیسان ماران گەستەوە نە پیاڵەی چەم ژار تۆ بەستەوە سەنەم پەرەست نیم سەمەد ناسەنان دووی کوورەی دەروون شیوەن ڕاسەنان ساقی، مەی هەی داد، موغەننی، چەنگێ نەیچی، های فەریاد، موتریب، ئاهەنگێ گەرمیی مەی، نەوا و کزەی دەف و نەی تێکەڵ بۆ چەنی زایەڵەی وەی وەی واچدێ چ وادەی نشینگەی تەنگەن یاران چەمەڕا برا درەنگەن گردین تەدارەک بەغداشان جەمەن وادەی زیارەت غەوسولئەعزەمەن بێ تۆ بەو خشووع دەس وە دوعاوە کێ گەردەن کەچ بۆ نەو بارەگاوە؟ دەخیل جەماعەت بێ ئیمامەتەن ئیمامەت ماتەم وە بێ قامەتەن گۆشەی تای هیندی مەندیلی بێگەرد مایل کەر ئەو لای سایی گەردەن زەرد قیام دەر وە بەژن ئەو قەد و قامەت قیامەت قام دەر پەرێ قدْ قامتْ هامدەردان پەی بەزم شادی جەم بییەن چ خەیرەن سەدای کاری خەیر نییەن مەیلت چەنیمان یەکجاری سەردەن یا دووربا زامان مار کار لێت کەردەن؟ ڕۆ پەرێ ئەو مەیل ڕای خوداییت، ڕۆ! ڕۆ پەی وەفا و شەرت ئاشناییت، ڕۆ! ڕۆ پەی ئێشی سەخت مارگەستەی کاریت! ڕۆ پەی دەردیسەر کەس نادیاریت! ئەی تۆ کام نەدیت جە عەرووسی نۆ تا عەرووسی خاک پەشتان بی وە تۆ جەی خاری دندان ژار ئاوردەی مار خاتر نازک وێت مەدەر ئازار تۆ نەوگوڵی باغ موستەفەوی بی گەنجی خەزانەی مورتەزەوی بی گوڵ عادەتشەن بێ خار نمەبۆ گەنج ڕەویەشەن بێ مار نمەبۆ غەریبیت زیاد نە شەهادەت بی شەهادەت هەم دەم وە سەیادەت بی ئەی ڕەسوول ئارۆ شەوقش پەرواز دا وە ناز و ئیعزاز کاری تۆ ساز دا ڕجام هەن فەردا نەو گەردەلوولدا بویەری نە ژێر سای ئەو ڕەسوولدا ++++++++++++++++++++++ سەرناو: پزیسکەی چەخماخ پزیسکەی چەخماخ کافیی کارمەن چ وەخت و وادەی ئەی گوفتارمەن دڵەی کۆس کەفتەم هەم تەم کەردەوە پەردەی سەبووریش تەمام دڕدەوە ناڵا و گرەوا و خولیاوە و خول وەرد جەو بووڵی دەردا وێش سامان سا کەرد ئیسە بووڵی دەرد کەرۆ وە سەردا دەک سڵامەت بی چیت ئی خەبەر دا دڵە پۆشابێ پەردەی سەبووری سازابێ چەنی دەردەکەی دووری پەردەی سەبووریم دڕیا، ڕۆڵە ڕۆ ڕیشەی جەرگەکەم بڕیا، ڕۆڵە ڕۆ وە ناکام هیجرەت کەردەم، ڕۆڵە ڕۆ داخان گشت وە خاک بەردەم، ڕۆڵە ڕۆ خان و مان خامۆش بێتۆ، ڕۆڵە ڕۆ ئەتفالان مەدهۆش بێتۆ، ڕۆڵە ڕۆ تەڵمیت سیا پۆش بێتۆ، ڕۆڵە ڕۆ خاتوونان بێهۆش بێتۆ، ڕۆڵە ڕۆ کام وەسفت خەیاڵ، کام شێوەت یاد کەم پەی کام خەسڵەتت داد و فەریاد کەم! پەی عەقیدە و دین موسڵمانیت، داد! پەی شێوەی شیرین نەوجوانیت، داد! پەی ئەو عەقڵ و فام هۆشیاریت، داد! پەی خۆش نیگاری و خۆش ڕەفتاریت، داد! فەریاد پەی ئیخلاس، ئاخ پەی ئایینت پەی ئاغەی دنیا و پەی ئاغەی دینت هەر کەس دیم، دیدەم، مەیلی تۆ پێش بی کێ بی؟ کێ جە تۆ خاترش ڕێش بی؟ فەڵەک جەرگش دەن وە مەودای چڵدا کام خاتر ڕێشیش بی نە تۆی دڵدا دەورش وەی تەورە، ئەی جەورە ئاوەرد من حەسرەتمەند کەرد، تۆ بەو دەردە بەرد ++++++++++++++++++++++ سەرناو: پۆی خەیاتەی فەرد پۆی خەیاتەی فەرد بۆ عەنبەرینت دەسڕێسەکەی فیکر بیکری شیرینت چون ئارەزووی وەسڵ نە تۆی مەحروومی تەندەبێت وە تان فەردی مەعدوومی چون شەبەندەڕۆژ سەد تەرزە ڕەنگ دا تەوەن دان وە تاڵ دێبای فەرەنگدا پەی دەفعی سەودای دەردی نەمامان بەرگێ بی پەی دڵ، سەرتا وە دامان دڵ ئەو بەرگ و بۆی جارانش نەبێ ڕووی لوای مەجلیس یارانش نەبێ پۆشتەت کەردەوە ئیحسانت یاوا دەک هەی دەوڵەمەند یانەت هەر ئاوا بێباکیم عیللەت دڵ سەردی نییەن بێمەیلیم جە تەرک هامفەردی نییەن بەڵام مەسئەلەی فتوای قەزای حەق نە مەحکەمەی شەرع حاکمی موتڵەق نەو عەرووسی سۆز وە دڵ پەروەردە خەرجی گیان وە گیان وە کابین کەردە وە هەر سێ تەڵاق بایینە کەردەن یادی ڕجعەتش وە دڵ ناوەردەن کەم بی شنۆی وەش ئاهی سوب دەمی وشکاوش ئاما جۆی چەمەی چەمی بێ سۆزی مەنزڵ دڵ کەرد وە یاتاخ پەی ئاو و هەواش ئاو ئاه و ئەو داخ وە بێ من تۆ وێت زیهنت پێ یاوان خاست فەرماوان دانەت شکاوان: بێبەدەڵەن عومر خاسش هەر پاسەن باختش پەی مەعشووق بێبەدەڵ خاسەن ++++++++++++++++++++++ سەرناو: پێشانیم پێشانیم هەوەس زانووش جازمەن تەعزیمی جەناب پیری لازمەن باڵا کەردەوە مەیل ئەو لای پەستی وردیکڵانەن دەروازەی هەستی مەعدوومی! کردەی بەدی هەزار تەرز زانووی ئومێدت ناوەرۆ ئەو لەرز ئەو کەس مزانوو سەتارەن ئارۆ جەو بوزورگتەرەن شەو ئەو ڕۆت نارۆ سفیدیت قەڵغان پەی ڕووی سیات بۆ کەمانیت شەفیع تیری دیات بۆ نمەبۆ پیری و تەن ناتەوانیت وەی دوو فەردەوۆ ئاو دەس جوانیت: عەزابم ئەر سەد جە حەد بەرشییەن جە ڕووسیاییم گرانتەر نییەن من کە خەجاڵەت خزمت ئاما پێم جەهەننم سەد ساڵ دۆزەخ بۆ وە جێم موتریب، بۆ وە داد دڵگیریمەوە پیری ها ئاما وە پیریمەوە نەوات وێرانەی دڵ کەرۆ ئاوا چەنی بەستەی فەرد بێساران ماوا: «ئینە گرد جە وە خت نادانیم بییەن فەسڵی سەرمەستیی جوانیم بییەن» «ئیسە ها جە گشت پەشیمانیم بەرد وادەی پیریمەن جوانیم ویەرد» «کۆچی دواییمەن، یاوانم نۆبە نۆبەی تۆبەمەن، کەرەمدار، تۆبە!» ++++++++++++++++++++++ سەرناو: پەشێو وێنەی وێم پەشێو وێنەی وێم نیشتەبێم خەجڵ دیم شادی دەس دا نە دەروازەی دڵ واتم: نامانی هەرگیز های چێشەن؟ لەب بەردەوە چێش نامەیێ پێشەن نە تاریکیی خەت مەعناش مەجۆشا چون ئاوی حەیات دڵ خاسخاس نۆشا ئاخ، قووەی زەمین دەروونم کەم بی بووڵەکەی سفتەم سەرەڕای خەم بی وەرنە ئەو شەونم جە سەردا مەوەشت مەشیا کەردایێش وە ڕەوزەی بەهەشت فەرمابێت ئیسا جەمین جامی جەم پاسەیچە نییەن تۆ دینت وە چەم نرخی کاڵاکەش ئاڵاتەر بییەن سەد گیان وە پووڵێ باڵاتەر نییەن ئارێ تا پەی ئەو من ڕۆمەن چون شەو شەوقەن پەی خەندەی سوبحی جەبهەی ئەو تا وە ئەڕەی دەرد دڵەی من شانەن زەریفتەر توڕڕەی ئەو دانە دانەن تا من دووی سفتەی جەستەم فێشتەرەن جەلای ئاوێنەی ئەو زیادتەرەن تا سفتەی قامەت من وسمە وەشەن ئەبرۆی ئەو وە ڕووی دڵ کەمان کەشەن های چێشت واتەن، وە ڕەحمەت شاد بی مەر زووتەر کەم بی، ئیسە زیاد بی؟ ئەر جە زامی دڵ من نیگات مەکەرد مەزانات ئەو زات ئەو وەسفی بێگەرد ئەو ڕاز، ئەو ناز، ئەو قەوس، ئەو خەدەنگ بییەن، هەن، مەبۆ، مەگێڵان جە ڕەنگ حاڵش دەستە مل وە ئیستیقباڵەن ئیستیقباڵ چەنی مازیش یەک حاڵەن بارێ، دڵ وە خشت وێرانی ئاوان حەقت وە دەسەن نەداری تاوان دڵ تفڵ و ئازیز هەر ڕۆ نە شانێ هەر لادێ تەرزێ، هەر سات نیشانێ گا چون ستارەی تاریکەی سەحەر گا قەمەر، گا خۆر مەیۆ وە نەزەر گا وە بێستوون هەستیی بیناوە حوسنش وە گوڵگوون وەش ئیستیغناوە دەستی شیرینش ماوەرۆ وە یاد فەرهادی نە تاق فەرقەکەی فەرهاد گا چەرخی دیدەی سەد لەیلا فرۆش کوورەی ناری ناز ماوەرۆ وە جۆش تا بۆی حەرارەت مەوجی دەریای دەرد مەجنوون وێنەی تەم بەرۆ هەردە و هەرد خاڵۆ پەی جەلال ئەر کار سازیشەن وادەی تەجەللای تیر ئەندازیشەن بسم اللە ئەو تیر پەڕ تێدا بەستەش ئێد نیشانەی تەن سەد جار شکستەش چون ڕەنگ کەرۆ زام تازە زامانم ئاو مزۆ ئەو دەم کۆنە زامانم زامی تەن وە تیر بەڵاش زیاتەر ڕای ئامۆشۆی دڵ وە لاش زیاتەر ++++++++++++++++++++++ سەرناو: پەشێوی پەشێوی وە نەزم لوولووی ئەسریندا پەروین دائیرەی خورشید تەزییندا جای ناخوون وە خوون ئەو گۆنای بێگەرد ئیشارەت وە مانگ مەینەتی دڵ کەرد شیرینیی قامەت قیامەت نەوەرد سەڵای فەرزی بەرگ ئازیەتی ئاوەرد هەنی فتوای شەرع بادە نۆشان بۆ حەڵاڵیی کاڵای ماتەم پۆشان بۆ وەشەن ئەو باڵا چون بەو کاڵاوە بازش ئەو کاڵا هەر بەو باڵاوە حەیات جە زوڵمات جیا نمەبۆ کاوە وە بێ بەرگ سیا نمەبۆ ++++++++++++++++++++++ سەرناو: پەژارەت شادیم پەژارەت شادیم جە بێخ ئاوەردەن دووریت ڕیشەی دڵ خەیمەکەن کەردەن فیراقت فەرقم وە تووتیا کەرد جیاییت ئازام جە هەم جیا کەرد وەسواسەت وەی تەور ئێش دان وە جەرگم وە مەرگت قەسەم ڕازیم وە مەرگم وێت بدەر ئینساف نەو نەمامی نۆ مەردەن خاستەرەن یا خۆ دووریی تۆ؟ مەردەن یەک ساتەن ئەڕواحەکەی وێم دووریت هەر ساتێ سەد مەرگەن پەرێم مەر جەستەی خەستەی من جە فۆلادەن یەند دووریت وینۆ هێمان دڵ شادەن دەک ڕەحمەت ئەو قەبر گشت وەفاداران خوسوسەن ئەو کەس شای وەفاداران ++++++++++++++++++++++ سەرناو: پەی کەسێ پەی کەسێ خاسەن هەوای سەیری باخ ماسیوای مەعشووق نە بۆش ئاخ و داخ من جفتی مەعشووق دەرد هەمڕازمەن چون بازی سەرچڵ وادەی بازمەن ++++++++++++++++++++++ سەرناو: پەیغامی باڵای پەیغامی باڵای خەمبارەکەی تۆ خەمیایی حەڵقەی گۆشوارەکەی تۆ چەند وە سەرگۆشی وە گۆشت ئاوەرد چون بەدبەخت بیم تۆ گۆشت نەکەرد ++++++++++++++++++++++ سەرناو: چون وەڵگ شادی چون وەڵگ شادیی من وای دووریی لەیل وەیشووم بەرد ئەو هەرد نەو ڕشتەی سوەیل گێجی سەر کاوان جە سەردی بین کەیل بۆ مەدان چون بۆی بێوەفایی لەیل بێدەس بی چنار زیز و] خاتر ڕێش بەڵ خاکێش کەرۆ وە سەردا پەی وێش ویکۆڵ وەی وەکۆڵ پەی زەردانی دەرد ماساو نە سەراو ڕێزان هەرزان کەرد کۆچ کەردەن خاسان، چیهرەی ئێڵاخان داوۆ وە هەمدا دیسان نە داخان رۆی حەشر دووریی گەردەن بێگەردان بێوادە پیر کەرد کاوان سەر هەردان هەور نەو زار زار کڵاو ئەو کڵاو مەگێڵۆ، ئەسرین مەڕێزۆ وە تاو ماچی ئەویش دەرد هیجرانش وەردەن یا چون من باڵای ئازیز گوم کەردەن وێنەی عوقدەی پێچ ڕیشەی ئەروا و دڵ بەستە بۆ جە نم خووی مۆبەت زەنگڵ سیلسیلەی پێچ پێچ زوڵفی نازاران زەنگڵە بەستەوە جە دانەی واران قازان چون یاران ئاواتەخوازان قەتارە بەستەن مەکەران ڕازان بێ لەیل، ئاخ ئامێ، جە ئێڵاخەوە پەی ئاخ داخ تەکدان بە «ئاخ داخ»ەوە جەیرانان گەل گەل تازە کەردەن مەیل فەڕ وستەن ئەو زێد پای هەردەی دوجەیل چەم سیاوەکەی وە ناز دیاکەم سەر ڕەوێڵەکەی جە ڕەم جیا کەم هاڵای سەرمەستەن وە شنۆی لەیلاخ بۆی نەو پاییزش نامان وە دەماخ شەماڵ شۆ هورکەر بدەر بێدرەنگ سەیل و تەم زەردیی دیدە و دڵ و ڕەنگ هوونەی سەیلی چەم وە شەتاواندا تەمی دڵ وە ڕووی زاخان کاواندا زەردیی ڕەنگ نە وەڵگ نەوتووڵ نەمامان تا لێش مالووم بۆ نەوپاییز ئامان مەپەرسۆ بەو مەیل بێسامانەوە های چ خەبەرەن جە دامانەوە واچە پڕ جە تۆ جە وێ فەرامۆش من دیم، تۆ حاڵش نەژنەوی وە گۆش دیدەش یەند خەیاڵ باڵات بی تێشدا ڕاگەی خاو نەبی بویەرۆ پێشدا یەند گێڵان بەو دەرد سەر نە دەرووندا با بۆی دەرد مارۆ وە ڕووی هامووندا زاییفیش گرەو جە کا بەردەبێ بای هەناسەی سەرد گێج پێش وەردەبێ گێج مەوەرد پووشش بەو هەناسەوە سروەی پووش مەوات جەرووی تاسەوە: ئازیز شۆخی شەنگ شیرین تارەنی ئاهووی بێئاهووی وەش ڕەفتارەنی جەڵەو جەڵەو گەل سپی تەتاران دینی دیدەکەت وە چەم مداران ئێڵاخان سەردەن بازشان، ئامان گەرمەسێر وەشەن بۆرێ وە دامان تا گێران یاران ئاهوان ڕەم ڕەم باجت وە گەردن، خەراجت وە چەم ++++++++++++++++++++++ سەرناو: چون چیهرەی خەیاڵ چون چیهرەی خەیاڵ ڕوخسارەکەی وێش نە تۆی پەردەی دڵ مەعدوومیی دڵڕێش نمانا جەمین شای سۆسەن خاڵان کەمکەم جە گۆشەی لای سیاماڵان زەمین منەتبار پا منیا و مەویەرد جارجار وە ڕووی ناز باوەشێن مەکەرد باوەشێن مەکەرد ئەو سەفحەی بێگەرد نازکیش جە باد ئیحتیات مەکەرد نە تۆی تاریکی تای شەدەی بێگەرد لەتافەت چون ئاو حەیات مەوج مەوەرد غەریب بیم چەنیم کەرەم نمانا: وە سەوقات پەرێم خەدەنگێ شانا ئەر سەد چون یاران گیان تەسلیم کەردم خاس بی پەی یادگار خەدەنگێ بەردم ++++++++++++++++++++++ سەرناو: چێش واچۆ مەعدووم چێش واچۆ مەعدووم خەستەی مەهجووریت حاڵی دیدە و دڵ جە دەردی دووریت بدیە بەو دەجلەی بێ کەنارەدا ڕەوانەن وە بەین بەغدا شارەدا سەیر کەر ئەو گەرما و شەرارەی تاوە هوەیدان هامن جەلای بەغداوە ئەو ئاخر وشکاو ئەسرینی دیدەم ئێد دما نەفەس دڵەی خەم دیدەم جەو گەرما و جەو ئاو بەرگوزیدەکەم تەفتیش کەر حاڵات دڵە و دیدەکەم ++++++++++++++++++++++ سەرناو: چێشەن پەشێویم چێشەن پەشێویم: ماتەمی دڵەن یا کزەی ئامای نامەی بوڵبوڵەن شاهیدی دانای گردین ئەحواڵان وەسەن پەی ڕاسیی عەرزەی مەلالان ئێشی هامفەردم، ئێشی وێم زانان دەردی هامدەردم، دەردی وێم زانان بەڵام تۆ قەزاو بێتەدبیری وێت کەردەن پێت ئانا هەرچی کەردەن پێت کەی تۆ خەیاڵێت وە دەروون ئاوەرد هانات کەرد ئەو من، من بێمەیلیم کەرد تا تەئسیرێ بۆ پەرێ شەو ناڵەت یا پەی هەناسەی سوب دوعا و لاڵەت گۆیا جە لاوێت دەروونت ئێشان بەد دوعاییت کەرد تەسدیعت کێشان من ڕۆی مامەڵەی گردین خاس و کەس جەو ڕاسە بازاڕ شارەکەی ئەلەس جە سەر دووکانچەی شای سەر توجاران هورگرتم کاڵای بەڵای نازاران نامان نە گۆشت مەر فەردەکەی من فەردی وەش مەزموون بێگەردەکەی من: ئەر هەر سات دەردێ دەردێوتەر چەنی بەیۆ ماچوو ئاخ پەی دەردێ هەنی یەکێوەن جە لام شادی و ڕەنجووری کەیفی و بێکەیفی نزیکی و دووری مەر چون تۆ هەڵوای مەحەببەت خامێ قەبای عەشقی دڵ پشت ناتەمامێ وەشی و ناوەشی تەفاوت زانۆ مەلێ نەزانۆ هەر پەلێ شانۆ مەیل و قین هەردوو هەر جە شەخسێوەن جەریمە و خەڵات شێوەی کەسێوەن لا هورکەردە جەو، پەی ئێد تەماشا بەو شاد، پێد ناشاد کَلاّ و حاشا سا هەر دوعا کەر با چەرخی چەپگەرد تا تاقەتش هەن هەر بشانۆ نەرد من وزۆ ئەو دەرد، ئەو ئەو سەردی مەیل ئەو ئەو قەبایل، من ئەو کۆی دوجەیل خوسووسەن، بوڵبوڵ جە لای زامداران دووری خاستەرەن نە وەسڵی یاران نزیکی یاگەی تەریدەی فەسڵەن دووری ڕای خەیاڵ قافڵەی وەسڵەن پەوکە خوو گرتەی بەڵاو کۆسەنان نزیکی بێزار، دووری دۆسەنان نەکۆی نزیکی شادی وە بادم نە دەورەی دووری وە یادش شادم ++++++++++++++++++++++ سەرناو: چەرخ هەر ئەو چەرخەن چەرخ هەر ئەو چەرخەن تا ئاوەرد و بەرد دەس ئەو دەس نگین تا خاتەم ئاوەرد دا بەزمی خوسرەو شیرین وە هەمدا جام دا وە سەر جەم، جەم وە سەر جەمدا شۆرەتنامەی نام حاتەمش کەرد تەی کەرد وەکاسەکەل کاسەی کەلەی کەی ساقی، گەردی ئارد یارانی هامفەرد مدۆم نە دەماخ ئاسیای چەپگەرد سەدای ئاسیاوچی مەیۆ پەیاپەی ئاساو خاڵییەن نەوبەتەن سا دەی هەر کاتێت زانا چەرخێ وەردەوە چون یاران دانەی ئێمەیچ هەڕدەوە نە هەر سەردەشتێ کشتێ کریابۆ وە جۆی چەمەی چەم ئاو نەدریابۆ نەیاوابۆ خاس دانەش بەو ئاوە لایق نین بەردێش بەو ئاسیاوە فیدات بوون ئامان سا هورکەر با بەی وە سەر کشتمدا پەیپەی جەو جۆی مەی ئەر سەد کشتەکەم ئاخر کارشەن هەفتەکەی ئاخر نەو وەهارشەن بەڵام بەڵ تەڵ تەڵ کەشێوە کەرۆ جەی ئاخرەوە داناوێ وەرۆ حەیفەن تۆ میراو سەرجۆی بادە بی وە هەر کەس بە قەد کەفاف دادە بی من کشتم ڕووزەرد هامفەردانش بۆ دانەم ڕوو سیای هامدەردانش بۆ ++++++++++++++++++++++ سەرناو: چەرخە یە تۆنی چەرخە یە تۆنی ئەی مەیلە کەردی؟ ! بەختە یە تۆنی شادی ئاوەردی؟ ! خەمە فرسەتێ، ئامانەن زامان دەردە مۆڵەتێ نامەی لەیل ئامان تەحریری خوردەی ڕێحان بێزەکەت تەقریری شیرین شەکەر ڕێزەکەت یاوا وە سەروەخت خەستەی دەردەکەت مەڵهەم دا نە زام دووری کەردەکەت من کێنان خامەت وە یادم کەردەن حوسنت زیاد بۆ پەی دڵان بەردەن جەمینت هەر سات نە جەلایێ بۆ هەر جەلا پەی من وە بەڵایێ بۆ نیم نیگات ڕەفێق تیر ئەندازی بۆ دڵەی من نیشان نە جانبازی بۆ واتم مەیلی دڵ، پەی کەسێ کەسەن جە تەنخوای سوحبەت زاهیری وەسەن خەیاڵم کەفتەی ئاسانەکەی تۆن چ حاجەت زاهیر ئاما و ئاموشۆن دیام خەیر دووریت زۆرش ئاوەردەن ئامانێ بەڵکم ئینە چەپگەردەن هەر پاسە شادیش نییەن بەینەتش بەڵ بێبەقا بۆ سزا و مەینەتش سێر ساوون وە چەم ئەو پاڵای بێگەرد چێش هەر زیاد کەرد دەرد وە بانی دەرد وەشڵە وە مەینەت وەختی مەهجووری سەد ڕەحمەت ئەو قەبر دووری و ڕەنجووری ئەر سەد تۆی دەروون پەرێت قەقنەس بی، یانەی دڵ وە یاد ئاوا بی بەس بی ئیسە حەسرەتان، بیمی بەد ئەندێش هەر یەک جە لایێ مەکێشۆم پەی وێش خوسووس تۆ وەی ڕەنگ مەوینوون دڵگیر چمان دەروونم مەپێکان وە تیر دڵ خەریکی مەوج گێجاوی دەردەن زوانم دایم ویردش ئەی فەردەن: من نەبوون ئازیز گەردەن بلووری کێن ڕەحمەت کەرۆ وەسڵش نە دووری خاس بی ئەر سەد جار شادی وە باد بیم دوورا و دوور وە دین ئاسانەش شاد بیم ئیسە ها فەڵەک کەڵەک بەستەوە تۆڕداوی دووریش ها وە دەستەوە خەفەت وادەتەن، مەینەتان سا دەی وەختی بارانەن ئەسرین دەی پەی کەی ئازیزت ئاستەن ها وە دماوە تەنە بۆ بێگیان سا شۆ وە ڕاوە ++++++++++++++++++++++ سەرناو: چەم پەی فەرشی پات چەم پەی فەرشی پات موژەش چون خارەن بەڵام چێش کەرۆ چارش ناچارەن چەنی تاوۆ تەرک پا بۆست کەردەن سەوگەندش وە زوڵف سیای تۆ وەردەن ++++++++++++++++++++++ سەرناو: چەمان هەم قامەت چەمان هەم قامەت کەیفم، خەمبارەن زەردی نە ڕووی دڵ زەوقم دیارەن تەوقی خەم گەردەن شەوقەکەم بەستەن کەفی پای شادیم خار تێ شکەستەن ساقی، سا دەخیل جامی مەی وەکەف دەروێش، ئامانەن کەفێ نە ڕووی دەف خۆ نەوی فرسەت جارێ نەجاران هەر پۆس وە مشت بیم پەی دینی یاران چەپگەرد جە خاتر وێش هەرگیز نەویەرد کەی بی جامێمان پڕ جە بادە کەرد ئێمەیچ با ساتێ بە زمێمان جەم بۆ لادێ هەر خاسەن ئەر سەد کە کەم بۆ من ناڵە، تۆ دەف، ئەو سافی یا دورد هەنی فەردی دەرد مەینەت گەردەن ورد ++++++++++++++++++++++ سەرناو: ڕا جەعفەرئاباد ڕا جەعفەرئاباد سارای گەرمی مەیل مەنزڵ شیراز شار سەودای عەشقی لەیل دەسودیم وە ئاو ڕوکنئابادی شەوق ئیمامی میحراب سەر مُصَلاّی زەوق خواجەی سەر حەڵقەی بەزمەکەی ئەلەست دەماخ وە نەشئەی بادەی فەنا مەست خەیلێوەن ئازیز، شای نەونەمامان پەی شیفای زامان نامەش نەیامان هیچ نەبەردەن نام خەستەی دەردەکەش نەکەردەن خەیاڵ مەینەت وەردەکەش یادش گوزەرگای دڵ جە ویر بەردەن مەیلش ڕای خاتر فەرامۆش کەردەن ساتێ وە ساڵێ جە لام ویەردەن هەرەس وە ماڵم ماچی دڵسەردەن دڵ بێئارامەن دایم مدۆ چڵ من هەر مواچوون پەی دڵ وەشیی دڵ من تاڵەم وە تام تاڵی تاڵ وەردە گەردی بەدبەختیم وە ڕوودا مەردە نام نە سەر زوان شیرینش تاڵم نام پەی خاترش گەردەن خەیاڵم نەدارۆ تاقەت تەحریرم خامەش مەپێچۆ وە هەم جە دەردم نامەش ماوای دڵگەرمیش جە حەد بەرشییەن لایق وە مەنزڵ یادی ئەو نییەن خاترم یەند خار مەینەت ها تێشدا پای مەیلش زەحمەت بویەرۆ پێشدا سەد دەلیل ماروون نییەن فەراقەت جە من های تامڵ، جە ئەو کۆن تاقەت؟ بۆ بەشقی ئەو جام، ئەو بەزم، ئەو جەم بێمەیلیی ئازیز نەوینی وە چەم مزانی چەنیم چەم ها وە ڕاوە ئەر وەی زوو مەیۆ پەیکێ جە لاوە ماوەرۆ نامەی جام جەمینەکەم دیدەی دنیا و دین، دنیا و دینەکەم یەک غەزەڵ مەتڵەع «مژدە ئەی دڵ» بۆ باوەر، بەڵ پەی دڵ تەسکین حاسڵ بۆ وەر بۆ نەیشەڵڵا لمێش تێکەڵ بۆ خواجە تۆ پیرت با هەر موجمەڵ بۆ چ حاجەت سەریح تۆ بواچی پێم من زووم شناسا بەختی سیای وێم ++++++++++++++++++++++ سەرناو: ڕوێ فکری بەخت ڕوێ فکری بەخت سیای وێم مەکەرد: پەی چێش هەر پەستی پەرێ من ئاوەرد یاران گشت کەیفوەش سەفا فراوان یەک یەک وە ئەعەلای مەقامان یاوان گرد سەرشاری مەی لەقا نماوە هەر من بەستەی خاک چەم ئەو دماوە جەو فکرەدا بیم یەک هامدەردی وێم ڕێزە بلوورێ قەدیمش داپێم ئاما وە جواو ڕێزەی قەدیم ساڵ بە زوبانی حاڵ فەسیحتەر جە قاڵ وات: من سەنگێ بیم کەفتەی هەواران بێقەدر و قیمەت ناڕەوای شاران گرتم نە گەردەن بێباک و شادان بەڵای پیکی سەخت کوورەی ئوستادان ورد بیم جۆشم وەرد تاویامەوە تا وە ڕوتبەی بەرز سەر نیامەوە عاڵەمێ تازە دیم هوەیدا بی شەخسێ عەجیوتەر جەمن پەیدا بی بیم وە بلوورێ پڕ جە سەفا و نوور لایق وە سوحبەت بەزمی سەلم و توور گا جای ماء الورد عەتری عەبیر بیم بۆ بەخشی دەماخ شا تا وەزیر بیم گا ماوای سەهبای کۆنەی پڕ تەئسیر نەشئە بەخشی حاڵ پەی بوڕنا و پەی پیر نە جەرگەی یاران شۆخی دیدە مەس مەکەردم گەردش مەشیم دەس وە دەس جەو بێقیمەتی وە قیمەت یاوام وە پایەی ڕوتبەی عالی سەر ساوام دەورەی دووبارەی ڕای حەق هەر کەس دیش بۆی باخچەی ئەبەد مەیۆ نە بینیش جەو بۆنۆ ئەو نوور هەڵای تاقییەن نە ڕێزەی مندا بەرقش باقییەن مەعدوومیی سەرشار بەزمی دڵڕێشی تا تۆیچ چون یاران تەسدیع نەکێشی نەگری وە گەردەن چی ها نە ڕێتدا پا نەنیەی وە سەر وجوودی وێتدا کەی مەشی نە سیلک یارانی هەمدەم کەی ڕوتبەی عالی مەوینی وە چەم هەرکەس تەوەللود دووبارەش نییەن ئەڵبەت سەعادەت ستارەش نییەن ها نە ئەشکەنجەی پەستیی نەنگەدا تا مەنزڵ گێرۆ نە سای سەنگەدا ++++++++++++++++++++++ سەرناو: ڕۆشنی دیدەم ڕۆشنی دیدەم، سەرمایەی ژینم مەزەی بەزمی کەیف دڵەی خەمینم سا کە من بێتۆ نەسپەردم ئەڕوا سەر نەنیام نە سای ئەڵحەد بێپەروا چۆن واچوون وەفام هانە تۆی دڵدا وەفام هەم جەرگم بدەن وە چڵدا تاقیق من جە سەنگ سەرسەختیم باڵان مەزرەعەی خارج ئینسانیم کاڵان وەرنە من وەی تەور کێشام سزا و دەرد ئەگەر سەنگ بیا مەکەردش وە گەرد دەک ئەجەل وە دام هیجران بەستەبۆ سەرتاپاش وە نێش زامان خەستەبۆ پێم نە نۆشا مەی پیاڵەی مەردەن ئیسە من سەر ژان، دڵ سەردان کەردەن ++++++++++++++++++++++ سەرناو: ڕیازەتکێشان ڕیازەتکێشان.. ڕیازەتکێشان سەییدانی خاس ڕیازەتکێشان جەماعەت، قەومان ڕای خەیر ئەندێشان جەرگەی هامسەران، دڵرێشان، خوێشان ها هەوای تەحسیل دڵ وە جۆش ئاوەرد نسیو عەزمی سەیر وڵاتانش کەرد ئەر جارێ ڕاگەم غەڵەت کەردەبۆ ڕام وە سەر ئاداب هیچ نە بەردەبۆ کەسێ خاترش جە من ئێشا بۆ یا خود ڕەنجێوەش پەرێم کێشا بۆ گەردەنم ئازاد بکەران ئارۆ گرد وە دڵ ڕوخسەت بدەران ئارۆ عەزمم پەرێ سەیر عێراقەن ئارۆ بنیشدێ وە خەیر فیراقەن ئارۆ دنیا فانییەن هەر مبۆ مەردەن لازمەن گەردەن ئازادی کەردەن ++++++++++++++++++++++ سەرناو: ڕەفیقی مەحرەم ڕەفیقی مەحرەم عیجز و سروورم حەکیمەکەی ئێش زامی ناسۆرم ئاویارەکەی سەوزەی ئارەزووم دانا بە گردین ڕازی کۆنە و نۆم دەماخ وە نەشئەی سەر بەرزان کەیل موڕشیدی میراو سەر جۆی بادەی لەیل ئەنیسی مەجلیس عەیش و نیشاتم دەسگیری ڕاگەی هات و نەهاتم جڵەو کێشی زەوق ئاهووی ڕەوێڵم بەزمئارای مەجلیس کەمەن وە پێڵم وە مەرگت یەند خەم جە لام بییەن جەم لاوی هوون گرتەن پای شەرم مەحکەم زنجیری مەینەت پای گوریز بەستەن مارەکەی دووریت ڕیشەی دڵ گەستەن سامانسام کەردەن دەردەکەی فیراق بۆی تاڵی دووریم مەیۆ نە مەزاق جەو ساوە ئازیز لێم نادیارەن سەیری کائینات نە دیدەم خارەن ئامۆشۆی یانەم کەردەن ویانە یەکسانەن جە لام قەوم و بێگانە ئیلتیجام بە تۆن جای هانامەنی نە بەیدای هیجران ڕەهنومامەنی یەکجار تەن خەستەی زار و ڕەنجووریم دڵ ڕێزە ڕێزەی کاردی مەهجووریم گرمەی کوورەی دەرد کۆی تاقەت تاوان بۆی سفتەی جەرگم وە گەردوون یاوان هەر ڕۆ جەیحوونێ مەڕێزۆ نە چەم سارای دڵ بییەن وە هووناوی چەم هەر ساتێ دەردێ سزا مدۆ پێم یەک ئان زیندەگیم حەرام بییەن لێم دەخیل تا هاڵا تەن نەویەن وە گەرد سفتەش نەبەردەن وە ناڵەکەی دەرد ڕجا کەر ئەحمەد لوتفش بۆ چەنیم خەجاڵەتی بەرز «کەریم» نەیۆ پێم وەرنە ها مردم، تۆ بای سڵامەت با هەر بمانۆ تا ڕۆی قیامەت ++++++++++++++++++++++ سەرناو: ڕەمەزان تلۆع ڕەمەزان تلۆع سوبحی شادیشەن شەوال شامی شووم نا مرادیشەن دەردینە شەوال، ئای زام سەختە من تاڵە شووم شەوال، ئای بەد بەختە من غوڕە، غوڕەی ئەو سەفاش پەی غەیری ئازیز قیبلەی من، وەفاش پەی غەیری های موغەننی تار حەنجەرەی وەش تەرز وە سەر پەنجەی ناز باوەرە ئەو لەرز من ئاسا یاد کەر جەرگەی ویەردە یارانی مەرحووم دەردی دڵ وەردە بەو لەرەی دڵسۆز وە جگەرەوە مەزموونی ئەوان تەکرار کەرەوە ئاخ، من و شەوال هەردوو هامفەردیم هەر دوو گرفتار ئێشی یەک دەردیم غوڕەی ئەو قیبلەی من وە یەک تارەن وە نامی ئێمە و کامی ئەغیارەن ++++++++++++++++++++++ سەرناو: کام حاڵەت کام حاڵەت باروون وە سەر خامەدا تەن چون تای نەیەن نە تۆی جامەدا پێچیان بێجان ڕەمەق ڕەمیدەم سەرگەردان نە گێج بەحرەینی دیدەم ئەر ڕەقیب چون خەس نەیۆ وە دیدەم پێم وەشەن گێجا و گێجی دەریای خەم ++++++++++++++++++++++ سەرناو: کام سارا؟ کام سارا سەدڕەنگ نوور پێدا وەشتەن؟ کشتش کشتی دەشت هەر هەشت بەهەشتەن فەزای سایەی عەرش دانای جەلیلەن یا بارەگای پاک سەیید خەلیلەن؟ ئەسراری پەردەی غەیبی مەحرەم پەیک سایەی خودایی، سلام علیک کردەم نالایق ئەر وە سڵاوەن روو زەردیم موحتاج وە یەک جواوەن هەر یەک شەفیعێش پەی وێش ئاوەردەن من خەجاڵەتیی وێم شەفیع کەردەن یەکێ جە دۆسان بەو زامی نۆوە سەر نیان وە خاک ئاسانەی تۆوە میهمانی غەریو کەرەمسەرای تۆن موحتاج وە ڕێزەی سفرەی ڕجای تۆن درێغی مەکەر، ئامان سەد ئامان مەفەرما میهمان بێتۆشە ئامان یا خەلیل، دەخیل کێ عادەت کەردەن تۆشە وە دەرگای کەریمان بەردەن؟ ++++++++++++++++++++++ سەرناو: کزەی چزەی کزەی چزەی زام گرپەی گڕەی دڵ داخی دووری دۆس دوور کەفتە مەنزڵ شەرارەی ئاهیر دڵەی پڕ دەردم تەپ و دووی دووکەڵ هەناسەی سەردم جە شەرارەی نار دڵەی پڕ جە خەم سۆچیا تەمام هەر هەفت پەردەی چەم بۆی کزەی کەباب سۆزی سینەی ڕێش قرچەی برێشتەی جەرگی جەفاکێش جۆشی سەماوەر دیگی دڵەی تەنگ لوولەی فوارەی فرمێسک سەد ڕەنگ واژاوش چون تاف ڕیشەی هەستیم بەرد ریشەی کۆتەرەی جەرگم بەراوەرد دڵ جە دەرووندا کەردەن وە بریان وە مەرگت قەسەم تاسەی تۆم کریان ++++++++++++++++++++++ سەرناو: کۆرپە ئەگریجان کۆرپە ئەگریجان تووکی تاوس تار سەوزە کڵافان چون ڕشتەی زەنار پەخش بییەن وە بان قورسی قەمەردا گا وە ڕووی میحراو، گا وە حەجەردا هەر لادێ سەد جار دڵەی پر جە دەرد بەو زەنارەوە تەوافش مەکەرد ++++++++++++++++++++++ سەرناو: کۆن ئەو دڵ کۆن ئەو دڵ دیدەش بەرایی بدۆ وە گەرمیاندا بدیۆ وە بێتۆ کۆن ئەو چەم بێتۆ بەو ڕەنگ دڵشاد بۆ سەیری مەنزڵگەی ئێڵاخش یاد بۆ داخ پەی تۆ چ تەور بێڕەحمی کریان ئێڵات پەی ئێڵاخ باز ئیزنش دریان هەوای وەرکاوان چەنی تۆ وەش بێ سەدای شەتاوان چەنی تۆ وەش بێ تای چینی چنوور پای تافی بەفراو هەر وە تۆ مەکەفت نە دەورەی کڵاو هەر گوڵ پەی دەماخ بۆ عەنبەرین بێ دەستش هەر وە دەس تۆوە شیرین بێ ئیسە کێن پەی سەیر دڵ نە ئاهەنگ بۆ وە بێتۆ دیدەم مەر دڵ جە سەنگ بۆ کاڵای ماتەمیت پەی ئاڵەم سەندەن دەشتان گشت زیندان هەربەندان بەندەن هەوارگە ماتەم، گوزەرگە بێڕەنگ شۆنەکەم پڕخەم، سەیرانگە دڵ تەنگ خوێشان پەرێشان پەڵاس نە گەردەن تو خوا بازەشان چون تۆشا مەردەن بێتۆ کاروبار بەرتەرەف مەندەن سەرکاری پاشا بێمەسرەف مەندەن بەزمی هامفەردان بێزەوقەن بێتۆ نەزمی هامدەردان بێشەوقەن بێتۆ پات وە تۆی پەردەی پێواری کێشان جەکام هامدەمێ خاترت ئێشان؟ ++++++++++++++++++++++ سەرناو: گوم بی گوم بی چون خورشید ئەو نە پڕتەودا گوم بی ئەهلی عیلم نە شۆڵەی ئەودا نار مەکەرد وە سەر دڵ سازانەدا نادر بی جە ناو هامڕازانەدا بنویس وە هووناو دڵ نە پەڕەی جەرگ: نادر شێخ علی پەی تەئریخی مەرگ ++++++++++++++++++++++ سەرناو: گۆشەی ئاتەشخان گۆشەی ئاتەشخان دڵەی پڕ جە ئێش پزیسکەی داخان ئایر وەردا تێش دوودی ماردومان دوود نە فەرقم بەرد هەوای کەڵڕەمان خۆ پاماڵم کەرد پێچ مدەو چەنی زامانی کاری نە پای ئامام هەن نە ڕستگاری فەڵەک کەی بەرشوون بێخەم نە دەستت چێشم کەرد، کەی بیم وە باوە کوشتت ئەر چون غەمزەی دۆس پڕ جە ئێش و دەرد چون فرسەتبازان پێش دەستییەش کەرد ساڕێش مبۆ زام دووری تۆ کەردە مەکەرمێ سەیران چەن وەخت ویەردە وەر فرسەت نەدا فەڵەک وێنەی وێش تۆ سڵامەت بی ئەر من نەبوو چێش ++++++++++++++++++++++ سەرناو: گۆشەی سیاماڵ گۆشەی سیاماڵ هوردا و دیاوە چون مانگ نە گۆشەی هەوری سیاوە بە خودا قەسەم پاسەم ئومێدەن حُورٌ مَقْصُوراتْ فِی الْخِیام ئێدەن ++++++++++++++++++++++ سەرناو: گێجی ئاڵانی گێجی ئاڵانیی ها بە دۆشەوە وە قولابی چەنگ ئاهێر نۆشەوە دوو ئەبرۆی سیای موژان چڕیدە نە ڕای بەندەگیش قەترانی دیدە ++++++++++++++++++++++ سەرناو: گەرد ئالوودەن گەردئالوودەن دەور مەزاری لەیلێ ئاوپاشی و ماڵاش لازمەن خەیلێ خادمیی توربەت نازک ئەندامان پەی دیدە و موژگان مەعدوومی ئامان ئاوپاشی، ڕەویەی دیدەی نم دیدەم ماڵاش، وەزیفەی موژەی نمیدەم گەردێ نێ وە ڕووی یانەی نۆشەدا یا خەوشێ وە حەوش عەنبەر بۆشەدا پاسی نازکیی لەیل یاگەی وێشەن جای موشاهەدەی قەیسی دڵڕێشەن بەڵ باڵای ئاڵاش وە سەد خەم و چەم باز وینوون بێخەم وەی چەم یا ئەو چەم مەعدووم تاوی یاو دووری زۆر ئاوەرد تاویا و بینای قسەی پەشێو کەرد ماخۆلیایی یاو ئینە خدێشەن وەرنە ئەی خەیاڵ پەرێشان چێشەن فەسڵی وەسڵی بەزم خاسەی نەدیمان خاوێ بی ویەرد، دیمان نەدیمان بەتاڵەن هەوای دۆسی کۆچ کەردە مەحاڵەن ئامای عومری ویەردە بنیش نە گێجاو دەریای بێ پەیدا نە گۆشەی حوجرەی سەفینەی مەیدا ڕووت ڕووت ئەو جیلوەی ستارە کەر ڕاس با خودا وە ئیخلاس، ناخودا مەناس تا بادی مراد نە پێوارەوە کەی بدۆت ئاخر ئەو کەنارەوە ++++++++++++++++++++++ سەرناو: گەرمیی کوورەی گەرمیی کوورەی مەیل قەیسی چۆڵ گەردەن تەئسیر نە تۆی دڵ لەیلێ ئاوەردەن بەڵ نە تاو ڕەقیب وە دەرد مەشهوورەن وەرنە دەرد و لەیل هەی نە یەک دوورەن ++++++++++++++++++++++ سەرناو: ها تەن ئەلوەدای ها تەن ئەلوەدای زیندەگانیش کەرد قەدەم ڕەنجەکەر هامفەردەکەی فەرد لابەر تەختەی سەنگ ئەڵحەد سەرای ڕێش جەم کەر گەردی خاک جەستە خەستەی وێش ئامێتەن وە باد باڵای تورکی تەڕ یانێ نمناکەن زوو مەبۆ وە هەڕ درووسکەر نەو هەڕ شێوەی بوڵبوڵێ بنیەش نە سەر شاخ گوڵێ یا چڵێ بەڵکم ئەو سەیاد جە ناکاو جارێ بویەرۆ پەی گەشت کوشتی شکارێ نەچیرگای وێشەن وە پارێز کەمکەم بەڵەدەن، مدیۆ، مەکەرۆش وە چەم خەدەنگێ هەنی هەوا دەرۆوە پەرێ مەرگێوتەر ئیحیام کەرۆوە هەر ساتێ سەدجار بەو تیر نەو تەرکەش زیندەگی و مەردەن ئامان وەشەن وەش ++++++++++++++++++++++ سەرناو: هامدەردان ئامان هامدەردان ئامان ئەر مەندەن هۆشم سەدایێ وەشەن مەیۆ نە گۆشم چمان زیڵەی زەنگ زەواری مەیۆ زرنگەی قافڵەکەی وەهاری مەیۆ قافڵەچی ئامان، دادەن دەخیلم بنەکداری خەم خەیلێ زەلیلم نە ڕای تیجارەت ئەمیری وەلی تۆ مایەی ڕەواج عەباس و عەلی ساتێ قافڵەکەت ساکن نە سەیر بۆ یەک عەرزێ دێرم: ئۆغرت خەیر بۆ گێجی زرێوار هەرسم مەوج وەردەن سارای مەریوان تەمام هەڕ کەردەن بازەش هەناسەم سوب وەنەش دەرۆ یەخ کەرۆ قەتار ئاسان بویەرۆ ئەمجار وە سۆزەن موژەی جۆش وەردەم سەر نووکی قەڵەم ئاخ سۆراخ کەردەم وە بەندی دووباد مەینەتی جگەر بوورازە تاتای جەواڵان یەکسەر قەیاسەی قایش پۆسەکەی جەستەم حەڵقەی چەڵەمە پێشەی شکەستەم ڕەگی تەن تاڵی تاڵوەردەی سێوەنگ بفەرمان یاران باران بدان تەنگ زەنگی دڵەی تەنگ زایەڵەی سەدڕەنگ پێکیای تای دەرد ڕیشەی خەم گوڵەنگ وزان نە گەردەن بەرزی پێشاهەنگ بشۆ بدۆ دەنگ فرسەنگ وە فرسەنگ مەدەد یا عەلی پەی سەفەر کەر مەیل مەنزڵ وە مەنزڵ تا مەنزڵگەی لەیل بەڵام هەر خاکێ جەو ئاسانەکەن گەردی سفتەی گیان هەراسانەکەن ڕەحمت بۆ وادەی وستەی بارەکەت نەبۆ وە پاشێل پای قەتارەکەت جە زیڵەی ئەو زەنگ چون خەبەردارەن مەیۆ مشناسۆش ئاخر دیارەن مەپەرسۆ ئازیز پڕ وەفا و بەینەت کۆن تیجار باشیی سەرقافڵەی مەینەت واچە مەر نەدیەت نەمامی بێگەرد چێگە پارچەی گیان پایەندازت کەرد یادی پایەنداز سەودای سەرش بێ مامەڵەی پارچەی گیانێوتەرش بێ بەڵام جە تەئسیر جۆشی بۆتەی دڵ دەمەی هەناسەی دەروونی پڕ چڵ سیمی قاڵی هەرس شەوان بێداریش ئەشرەفیی پاکتاو ڕەنگی ڕوخساریش ڕووکەش بی وە کفت هوونی گوڵناری وە مس منمانا جە لای بازاری بازاڕش کەساس، ڕای بەندەرش بەند کەس نمەواچۆ سەرمایەش وە چەند وە بازاڕەدا وە بانگی بێشەرم مەگێڵاو مەوات وە زایەڵەی گەرم: مایەم ناڕەواج، دەروونم تەنگەن قافڵەم تا قام قیامەت لەنگەن ++++++++++++++++++++++ سەرناو: هامدەردان ئێشێ هامدەردان ئێشێ... هامدەردان ئێشێ پێمەوەن ئێشێ، چ تەرزە ئێشێ ئێشێ پێچ چون ئێش وە ماران ڕێشێ ئێشێ پڕ نێشێ، ڕیشەی گیان کێشێ چ ڕێشێ، ئەسەر مەودای خەدەنگێ ڕەهای شەستی تیر، شەنگێ، قەشەنگێ ڕەعنا غەزاڵێ، باڵا شمشاڵێ ساحیب کەماڵێ، گەردی دڵ ماڵێ لەیل ئاسا نازێ، شیرین جەماڵێ مەجنوون نیازێ، فەرهاد ئەحواڵێ پەروانە سازش، شەمسا سۆزشێ گوڵئەندام نازش، بەهرام شۆڕشێ خورشید ئەتوارێ، نیلووفەڕ زەوقێ عەزرا عوزارێ، وامیقی شەوقێ پەری پەیکەرێ، پای دڵ پەی کەرێ خەمدەر، خەمبەرێ، دڵدەر، دڵبەرێ عەرەقچین نە تۆی سورمەدا غەرقێ وە فەرقی فەرقێ با زەرق و بەرقێ سەر وە دەسماڵێ، گەردن پڕ خاڵێ دەس بازنە لاڵێ، پا وە خڕخاڵێ پێشانی ماهێ، ئاهوو نیگاهێ گێسوو سیاهێ، دڵ مەنزڵگاهێ ڕوخسار و زوڵفێ سوبح و ڕەواحێ دیدە و نیگا هێ] پیاڵە و ڕاحێ ئەبرۆ و] موژگانێ، تیر و کەوانێ سەد پەری نیشان پەرێ نیشانێ نەشئەدەر دەمێ، بەزمئارای جەمێ عەنبەر پەرچەمێ، پەرچەم وە خەمێ شەکەر زوبانێ، غونچە دەهانێ لوولوو ددانێ، لەب لەعل کانێ پەنجە خامەیێ، دڵان نامەیێ ڕەقەم ڕەویەی سەیر، عەشق عەلامەیێ تینەت نەزیفێ، زینەت زەریفێ خەڵقی لەتیفێ، خوڵقی شەریفێ میهری بەهارێ، قەهری خەریفێ بەشیر ڕەدیفێ، نەزیر حەریفێ شاهین کردارێ، تەرلان تەوارێ ژەرەژ ڕەفتارێ، تووتی گوفتارێ شابازێ، شازێ، شاهان مومتازێ شاهیدێ، شۆرێ، شۆڕ و شەڕ سازێ پەنهانی گەنجێ، عەیانی ڕەنجێ سەد عیشوە سەنجێ، پڕ لارە و لەنجێ ئاشنا بۆیێ، بێگانە خۆیێ بەهانە جۆیێ، بەها نەجۆیێ نزیکی ڕایێ، نووری سەفایێ دەیجووری وەحشێ، دووری جەفایێ سەروی تەزەروێ، گوڵی بوڵبوڵێ خوتەن وەتەنێ، لە سایە سڵێ شیرینێ، تەڵخێ، خوشکێ، پڕ نمێ غوڕڕەیێ، سەلخێ سروورێ، خەمێ حۆری سروشتێ، قەسری بەهەشتێ زوڵف زەننارێ، دەیری کەنشتێ خەیاڵ پەشێوێ، عاقڵان شێوێ شێوە باگردچێو، پاک جە گردچێوێ هەر ئێشێ جە نێش تیری ئەو کەسەن نە جای نەشئەی نۆش نَشْأَتَیْن وەسەن سەردا وە هەمدا تان و پۆی جەرگم نمانا مەحشەر غەرغەرەی مەرگم بازدێم وەی زامەت، وەی ئەندامەوە بەڵ بەیان وە شۆن باز بێزامەوە ++++++++++++++++++++++ سەرناو: هامدەردان! بەردەن هامدەردان! بەردەن... هامدەردان! بەردەن ڕۆح و دڵ و دین وە تاڵان بەردەن دەروون وە مەودای خەدەنگ ڕێش کەردەن ڕیشەی سەبووریم تاتا کێش کەردەن وە نێشی پڕ ئێش ژاری ماری دەرد سەراپای ئەعزام لەتار لەتار کەرد وە نووکی نەشتەر پۆڵایی فیراق پڕ جە زام کەردەن دەروونی موشتاق جەمین قەمەرێ، سیمین سیم بەرێ موویی کەمەرێ، شیرین دڵبەرێ مشکینە خاڵێ، یۆسف جەماڵێ مەحبووب جەلالێ، لەیلئاسا حاڵێ سەرو باڵایێ، حۆری نومایێ خورشید جەلایێ، غیلمان ئاسایێ دیدە غەزاڵێ، نازک خەیاڵێ دوڕدانە لاڵێ، ساحیب کەماڵێ قومری سەڵایێ، بوڵبوڵ نەوایێ لالە لیوایێ، ئاهوو نیگایێ کەبک خەرامێ، شابازی ڕامێ تەزەروی نامێ، هوما مەقامێ داوودی دەنگێ، گوڵاڵە ڕەنگێ شەدە قەشەنگێ، قوماش فەرەنگێ وەنەوشە بۆیێ، گوڵغونچە جۆیێ بەهانە جۆیێ، کەعبەسا کۆیێ سولەیمان جاهێ، جام جەم نیگاهێ سکەندەر شاهێ، دارا دەرگاهێ ڕەعنا سادەیێ، نیگا بادەیێ سەهبا نەشئەیێ، پەری زادەیێ شۆخ و شەنگ تەرزێ، قەد قامەت بەرزێ سنەوبەر لەرزێ، ئیتاعەت فەرزێ هیجران دۆزەخێ، ویسال بەهەشتێ نازک گوڵڕوخێ، کەعبە کەنەشتێ عیشوە و ناز دارێ، یەکتا نیگارێ حیلە و فەن کارێ، گەرم بازاڕێ غونچە دەهانێ، تووتی زوبانێ ساحیب زەمانێ شەکەرئەفشانێ ڕەقیب دەمسازێ، غەریب نەوازێ نازەنین گازێ، عاشق گودازێ ئەبرۆ کەمانێ، پەیکان موژانێ سەوڵ خەرامانی، مەولان نیشانێ یەند تیری نیگای بێمەیلیش دا لێم یەند ژاری «سجە»ی هیجران وەردەن پێم ئەو کەردەن تەمام سەراپام چڵچڵ ئێد فەتار فەتار کەردەن جەرگ و دڵ خوسووس شەرارەی خورشیدی دووری ماران گاز کەردەن زەخمی مەهجووری مەر لابەرۆ ژار وە دارووی ویساڵ یا وە مەرهەم سێڵ زام کەرۆ پاماڵ وەرنە ئارەزووی ژیان مەحاڵەن خەیاڵی حەیات فکرێ بەتاڵەن ++++++++++++++++++++++ سەرناو: هامن ها منوار هامن، ها، منوار، گەرمیش جۆش ئاوەرد فەزای نەزمی بەزم نەوگوڵاڵان بەرد بووڵ وە یانەی جەم نەو گوڵاڵان شەند چەمەن بێنەوای ناڵەی بوڵبوڵ مەند تای بەڕزاەی شەنگ نە سای موغاران شێونا چون زوڵف تەعزییەداران ها، کاوان، کاوان دڵ چون دڵڕێشان هەڕ دان وە سەردا هەردان پەی وێشان دوریت ئایر وست وە یانەکەی من یانێ یانەی دڵ وێرانەکەی من هەوا ئایرین، سەروەخت ئایرین دڵە ئایرین، بەدبەخت ئایرین وەی گشت ئایرەوە خەیاڵم خامەن بەختم ناپوختەن فامم نەفامەن وەی بڵێسەوە گەردێم باقییەن وادەی ئایرین بادەی ساقییەن بەشقی پیاڵەی مەستی چاوەکەت بەو پەشێوی چین پای کڵاوەکەت با بەی مەی بەڵکم ئایری مەستی سۆچنۆ یەکسەر خاشاکی هەستی ++++++++++++++++++++++ سەرناو: هانا ها ویەرد هانا ها ویەرد.. هانا ها ویەرد خاڵۆکەم زمسان هانا ها ویەرد وەهار هەوای بەرد جە سەرزەمین بەرد تۆمەی گوڵاڵان وە چێو بەراوەرد سۆزەی با وە خەت نەو نیهالاندا سەڵای بەڵای هاڵ دڵ مەلالاندا سوب شنۆی نەسیم دەس جە وێ وەردا بۆی وەرکەمەر شەند وە وەرکەمەردا چون دوو نە ڕووی دڵ پەرێ خاوێران تەم جەم بی نە ڕووی ئاوان تاوێران سەفای سەیرانگای سارا و سەرهەردان مناڵۆ پەی بەزم جەرگەی هامفەردان نەک چون فەزای کەیف بەرگ سیاوان سمکۆی سەر زاخڕ نە پای وەفراوان من خۆ دور جە تۆ چون مەردە مەردە هەر هام نە خیاڵ ساڵی ویەردە ئەساسەی نەچیر ماوەردم پەرێت وێت تەیار مەکەرد، چون کێ، هەر چون وێت مەوینای ڕەزن مادەنیی کانی مانی وە سەنعەت سەلیقەی مانی سوب نە جاسووسگەی ملان سەرهەردان چون سۆمای خورشید شۆڵە کەرد هەرزان مشانای وە پێڵ لوولەی دوور مەنزڵ مووسەویی سەرتەڵ کارخانەی مووسڵ خارای خانان تاق قووڵی لوول وەردە چون نیگای دڵبەر هەزارە کەردە دروستی و هەڵمەت قەزا و خەیاڵ تەور ناڵە و نار و دوود ڕەعد و بەرق و هەور وەشدەماخ دڵشاد بەو شکڵ و شێوە پێوە وەو جەستەی سەد سەودا پێوە خاوخاو پەی نەچیر چەم وە نیگاوە تەک مەداین وە لای کۆی ئاتەشگاوە من مات و بێدەنگ بێسەدا و ناڵە یەکێ بیم چون سەنگ قولەی قەزاڵە تۆ کەڵ گەل، گەل گەل وە چەم مەکەردی پارێز وە پای ڕێز ئەستەم مەبەردی مەگرتی شنۆی هەناسەت بێدەنگ دووهاچەی چەتاڵ مەنیای نە ڕووی سەنگ مشتگرتە و دیا و ئیشارەی ماشەک تەقیا و پێکیا و کڵافەی کەڵ یەک هەر لا هۆش مدای گۆش وە سەداوە هەر سەنگێ پەی وێش دەنگێ مەداوە بازرە پڕتاو، کۆ چون تل مەوەرد هەر بەرد بێ نەو هەرد مەهەڕد وێنەی گەرد دمای ئێد دڵ کەرد جە نەچیر حاشا هەر سات مەکەردم نەوعێ تماشا لەرزەی سەد تەرزەی سەوزەی دیاران خەندەی شکۆفەی نەمامان داران شنیای هەڵاڵان وە کۆهی نووردا پەخش بی چینچین وە ڕووی چنووردا شادی و وەشی و عەیش چەم و خەم جەم بێ چێوێ جە لامان کەم بی هەر خەم بێ ئیسە وە ئەڵماس دووری دڵ کاوام مەلال و بەدحاڵ ئەردەڵان ماوام تۆ مەستی بادەی دەرد ئەفگەنی مەیل من حەیرانی دەس نیگای باڵای لەیل نە ئەو سەیرانە و نە تۆ دیاری سا بۆ بمانە و زام نەبۆ کاری ++++++++++++++++++++++ سەرناو: هاڵ بەدهاڵ هاڵ بەدهاڵ، بەدەن، هاڵی و هەواڵە یانێهای چون سەنگ قوللەی قەزاڵە موارۆ واران خەمان پێشەدا هاڵای سەدای دەنگ تۆ ها تێشەدا ++++++++++++++++++++++ سەرناو: های شەماڵ های شەماڵ چەند جار ڕا تەی کەردەنی چەند تەشریف وە لای یاران بەردەنی نە ئەم جارەی من چون ئەو جارانەن نە ئازیز وێنەی ئیفتەر یارانەن دەی سا شۆ بویەر نەو سوب سەحەردا چون دووی هەناسەم وە ئاوێدەردا ساتێ تامڵ کەر، بدیە درەنگێ ئانا موینی ئاسمان ڕەنگێ بووڵ کەردەن وە سەر هەر هەفت تارمدا خوسووس وە سەر بەخت چەرخی چارمدا بورجش یەند بەرزەن سەعدی ئەکبەرەن جە گردین بورجان شەرەفناک تەرەن ستارەی تاڵەی مەینەت گازەکەم خورشیدەکەی ئەوج بورجی نازەکەم هانە گۆشەی ئەوج خانەی شەرەفدا نوورئەفشانیشەن وە هەر تەرەفدا تلووع و غرووب سوب ئێوارانەن مەعاش و سەبات دەردەداران بەڵام من جەستەم خەیلێ بەدحاڵەن لاڵ بوون مالوومەن ئەو نە وەباڵەن یانێ ئەو باڵای تووڵی عەرعەر تەرز مەشنیۆ وە باد سوب سەحەری لەرز چین کەفتەن نە ڕووی پێشانیش چون سیم چون زنجیرەی ئاو وە شنۆی نەسیم نیم نیگاش هەوەس دڵدۆزیش نییەن نازش دڵبەریش جە خاتر شییەن ئاوڵەش هوردان لاڵی یەمانی وێنەی گۆی «حوباب» ئاوی حەیوانی باغی مەحبووبیش جە سەر تا دامان جە وەیشوومەی دەرد خەزانش ئامان دەخیلم شەماڵ وەی گشت دەردەوە شۆ وە خزمەتش وەی دووی سەردەوە دڵ جە دەماوەند گرەو بەردەبێ دیدە دانەی ڕوب ڕیوەند وەردەبێ واچە کەفارەت بەژن باڵات بۆ نەسیبی ڕەقیب خاڵی ئاڵات بۆ بدیە نەرگسان جە شەونم بین کەیل پەرسا: کۆن؟ عەرزکەر: قەیسەکەی دوجەیل! هانە بانەدا بێکەس کەفتەبێ دیار بێ ئازار تۆ شنەفتەبێ ئایر سەندەبێ جە گردین لاوە پووشەکەی جەستەش وە ئاربەباوە مدیای گا پێچ وەرد، گا منامیاوە جارجار جە ناڵەش مفامیاوە: فەڵەک داخ وە دڵ خەستەمدا بەردی ژاری دووریی گیان ئازیز پێموەردی واتم سا ئەڵبەت تەمامت کەردەن گیانڕستگارم جە دمای مەردەن چێش دمای مەرگیش یەند بەدبەختەنان گیان هەر نە ئازار دەردی سەختەنان بە سفتەی وە باد هەرد ئەو هەردمەن بە گیانی ئازیز زیزی دەردمەن سەروەختی بەندیی ڕای فەریادمەن ئینسافەن وەسەن، فەڵەک دادمەن تەئسیرش نییەن فەریاد جە لای تۆ تا دەستی قودرەت چەرخت نەشکنۆ ++++++++++++++++++++++ سەرناو: های ڕەقیب ئەو شۆن های ڕەقیب ئەو شۆن دیدەم هیجرەت کەرد عومری کێ وەی ڕەنگ وە تاڵی ویەرد عومرەنی ئازیز، هەر عادەت بییەن کەس جە عومری وێش وەفاش نەدییەن بەڵام ئاخر گیان شیرینی دڵبەر چون ملی وە سەبر ئازارم مەدەر وەر نییەی وە تەنگ ئەی بەدبەختەوە گل بدۆ وە دەم زامی سەختەوە چمان دڵ جمان چەنیت پەی سەفەر زامارەن کەفتەن پا وەپاییش کەر ++++++++++++++++++++++ سەرناو: هیجرانت جە تەرح هیجرانت جە تەرح بادی وەیشوومی یەکایەک ئەوراق جەسەی مەعدوومی کەرد وە فەرشی ڕای گوزەرگای یاران بەرد پەی پای هەردان سارا و کۆساران ++++++++++++++++++++++ سەرناو: هیچ کەس نەواچۆ هیچ کەس نەواچۆ وە فەرهاد ڕەندەن نەقشی شیرینش نە ڕووی سەنگ کەندەن دەک ڕێزان دەس با وەر جە گیان سەندەن کێ ئەڵماس نە ڕووی دیدەی وێش شەندەن ++++++++++++++++++++++ سەرناو: هەرچی دیت وە چەم هەرچی دیت وە چەم شی وە سەفەردا هەرچی موینی ها نە گوزەردا کەس حاڵی نەبی وە هیچ نەفاما ئەو پەی چێش ویەرد، ئێد پەی چێش ئاما ++++++++++++++++++++++ سەرناو: هەرچەند وێم هەرچەند وێم زەدەی بادەی فیراقم وە دینی دیدەت خەیلێ موشتاقم بەڵام شیرنی جەلام تاڵییەن جات خاڵی نەبۆ جاگەت خاڵییەن ئەر وەسڵەن دادم پەرێ فیراقەن وەر هیجرەن پەی وەسڵ تاقەتم تاقەن ++++++++++++++++++++++ سەرناو: هەرچەند هجرانت هەرچەند هیجرانت یەند زۆر ئاوەردەن عەزرائیل جە ڕەنج سەر ئازاد کەردەن بەڵام دەردێوتەر جا گرتەن نە دڵ نەک چون ئیفتەر دەرد دڵ پێش مدۆ چڵ داخۆم جە تەنخوای دووی سفتەکەی وێت چێش بۆ وە سەیوان شەو تا ڕۆ پەرێت جیاتی موژەی سفتەی باڵاکەت چێش بۆ وە جاڕووی گەردی پاڵاکەت پا چون مەنیای، دیدەم نە دیدەم ئازار بی پەرێش موژەی نم دیدەم دەک عومرم چون وەسڵ باڵات تەمام بۆ چێو بێئازار بۆ بشۆ پێش کام بۆ ڕوویێ چون سەر چەم نازش مەوج مەوەرد جە سای دیای چەم دڵ مەگرتش گەرد هەی ڕۆ سا ئیسە چەنی مەویارۆ چێش بۆ گەرد نەدۆ و نیگاش بدارۆ ئاخ مەیلی تازەن پاسە کەردەن پێت وەرنە کزەی دڵ سا نەشنەفتەبێت منت شی جە ویر خاست کەرد دیدەم بە وێت خاتر شاد خاست کەرد دیدەم سا هەر سۆزەی جۆش ئاهی سەردی من هەر کوورەی پڕ تاو گەرمی دەردی من هەر وەفای دەمدەم ئاشنایی ئەو هەر ئەو عەهد و شەرت ڕووبەڕایی ئەو های ڕەحمەت ئەو قەبر سەودایی کامڵ سەرمەشقی مەینەت بێساران مەنزڵ: «یانە وێرانی هەر وە من ئامان مەتاوو گرتەی کەسێوی دامان» ++++++++++++++++++++++ سەرناو: هەرچەنی ناکاو هەرچەنی ناکاو دەماخم تەم بی سیاهەوری دوود نەکەللەم جەم بی بەرق و برووسکە و تەم داش وە هەمدا پلووسکەی سێڵاو ئامام وە چەمدا خاشاکی هەستیم لافاو بەردەوە دەروون پێچش دا و دڵ ویەردەوە زانام هەمدیسان دڵ کۆسی نۆشەن گەردەلوولشەن ئارەزووی تۆشەن جۆشش وەردەبێ چاری وێم نەکەرد وە هەرحاڵ نە بەین شەرتێمان ویەرد نەک چەنی خەیاڵ قیبلەم بسازی دەخیل تەن خەستەن وە جیاش نازی سەرهەردە و سەرهەرد، مەنزڵ ئەو مەنزڵ دڵ ئەو شۆنی تۆ، من ئەو شۆنی دڵ دیم بەد عەهدیش کەرد هەوا سەندەوە تەن حەسرەتمەند بی جیا مەندەوە جە بێشەرتیی دڵ زامەتم سەختەن وێت یاونەوە های نەسیم وەختەن ڕەحمێ کەر وە حاڵ خەمان هەرزاندا تەشریف بەر بدیە وە سەر بەرزاندا هەر جایێ چون بەخت دووری نەوهاڵان سیا بۆ تاریک جە سیاماڵان گێجی دوودی ئاخ هەواش پەڕ کەردەن ئانە یاتاخگەی خاڵۆی هامفەردەن گا گێجی سەرسام نە گەرداوەدا گا خەفتەن نە تۆی خەفەت خاوەدا جە نەشئەی گەرمیی هەوای کوورەی مەیل جای تینیش کەمکەم جە نم بییەن کەیل وێتئاسا وە نەرم وێت نە ڕووی نم دەر بەو شنۆی فێنک دڵش بێدار کەر بەڵام شنیای تای سەر سورمەی بێگەرد ئازار نەدۆ هیچ وە سای گەردەن زەرد مەپەرسۆ، سێڵاو ئەسرینان تاوتاو بڕێز وە ڕوودا، ئێدش دەر جواو سفتەکەی سەرسام تەن ناتەوانا دیم خەستەن کەفتەن هەر ئێد موانا: یە سەختیی زامەت، یە دەردی موشکڵ یە دووریی خاڵۆم، یە بێشەرتیی دڵ ئەجەل نیم ڕەمەق باقییەن سا دەی جەودما بەختان مەوینانت پەی ++++++++++++++++++++++ سەرناو: هەقت بە دەسەن هەقت بە دەسەن کار بەدەس ئاسان نەکێشانت جەور موژەی خاڵخاسان «ئەو دۆزەخ چێشەن عەزابش جە کۆن دۆزەخ هەر دۆزەخ دووریی باڵای تۆن» ++++++++++++++++++++++ سەرناو: هەوای زمستان هەوای زمستان خەمان بەتاڵەن وەروی هەردی دەرد دەروون خاڵخاڵەن هاژەی تافی ساف شەتاوگەی شادی سوب مەیۆ نە گۆش هۆشی ئازادی بۆی شنۆی شنیای تای چنووری شەوق مدۆ نە دەماخ پڕ پەرداخی زەوق کەیفم دا وەشوەش دەستە وەستەی گوڵ نە گۆشەی کڵاو، نە پای دەشتی دڵ نیشانەی نەوزۆز وادەی وەهارەن یا نەشئەی ئامای نامەی نیگارەن یانێ: ئازیزم یە نامەی تۆ بۆ یە ڕەشحەی حەیات سەر خامەی تۆ بۆ ئەی ئەسرینی گەرم تاوتاوە ڕاسەن ئەی دڵەی پەی من هووناوە ڕاسەن بییەن ئەی وەفا، وەی ئیستیغناییت ئەی گەرمیی مۆبەت، وەی ئاشناییت تاقییەن یاران، یا خاوم دییەن جە بەدبەختیی وێم یاوەرم نییەن ڕوخسارێ، وەختێ مەسقەڵ مدا وێش وە شنۆی پارێز خەیاڵ مەبی ڕێش ئەسرین جەرگش دەن وە سەر نێشەدا چەنیش دڵ ئامان، ئامان پێشەدا ئەو دڵەی وێنەی پەڕەی گوڵ بێگەرد هەی خەم، هەی نامەرد، چەنیت مەلوول کەرد ئەوسا ئیستیغنا و قین وە هەم ماوەرد ئینسان بێپەروا گیان تەسلیم مەکەرد ئیسە بۆ ئەی تاو هەرس چون سەیلە ئەی ئیلتیفاتە و ئەی وەفا و مەیلە ئەی دڵەی نازک خەستەی خەمانە گۆشدەر و بژنەو، ئەمجار بمانە ++++++++++++++++++++++ سەرناو: هەوای سەر ساراڵ هەوای سەر ساراڵ وە خوسووس وەتەن بۆ ئەرچی سەفای ڕۆح، ڕاحەتیی تەن بۆ بەڵام دووری تۆ یەند زۆر ئاوەردەن دەردێ وە دەروون هامدەردان بەردەن وە هەرجا تەشریف تۆ ئەرزانییەن هەر دیدە پەی تۆ هەزار کانییەن ++++++++++++++++++++++ سەرناو: هەی نیزام نە زام هەی «نیزام» نە زام نامەت تۆ لابەرد ئای ئای سزاش دا و قیامەتش کەرد چەنی کزەی گەرم زایەڵەی موشکڵ ئیزهار کەردەبێت پەرێ ئامای دڵ زۆر ئاوەردەن پێش ناسۆری زامان گۆیا جە لای تۆ وە لای من ئامان مزانۆ هەر کەس جە عیرفان کەیلەن هەر جنسێ چەنی جنسی وێش مەیلەن بێدەرد ئەو بێدەرد، خەجڵ ئەو خەجڵ گیان ئارەزووش گیان، دڵ تەمەنناش دڵ نەدیەنم وە چەم، ئاگاهیم نییەن دڵەکەی منیچ خەیلێن بەرشییەن ئەو نە ئاخ و داخ، ئێد هەناسەی سەرد ئەو ئالوودەی خەم، ئێد خەریکی دەرد ئەو هووناو وە تاو، ئێد ئەسرین چون سەیل ئەو نە واوەیلا، ئێد کۆ لەیل، کۆ لەیل مولاقاتشان کەو جە کام هەردەن کام وێرانەشان ئاوەدان کەردەن ++++++++++++++++++++++ سەرناو: هەی هوو های چەندەن هەیهوو.. های چەندەن نامان خەبەرێ تای تاقەت بڕیان، نەسیم سەفەرێ تا وە سەربەرزان هەردی لەیلاخان وە خزمەت سەرئیڵی بڵند دەماخان تام ئەی زامی سەخت جە تاڵی وارا وە نەرم ئار وە لەفز شیرین ویارا واچە دیم مەویەرد ساتێ وە ساڵێ مەواڕا هەر دەم حاڵێ وە حاڵێ گا مەویەرد نە سەر هوونی چەمەی چەم تەکرار مەکەرد فەرد دێوانەکەی شەم: سەیری سەربەرزان لەیلاخان کەردی ئەی شەم حەیفت کەرد من جە یاد بەردی گا مەوات دووریت درێغش نەکەرد گەرمای گەرمیان کۆتاییش ناوەرد بەڵام ئەلحەق دڵ وە فریام یاوا های یانەی سەردی هەناسەش ئاوا شەوان هامڕازەن، ڕوان هاوماڵەن قَلْبُ الْأَسَدم قەوسی ساراڵەن گا مەوات ئازیز ئای جە ئەوگاریم ئای سُبْحانَ اللّە جە ئینتیزاریم مژدەم بەڵ بەیۆ ناگا جە دەردا نیگام وراستەن وە ڕاگوزەردا دڵ وە تەمامی نییەن نە جادا خەریکەن نە بەین خۆف و ڕجادا داخۆم بە وەسڵێ لاونیمەوە یا هەر وە هیجران تاونیمەوە یە کزەی دەروون گرفتاریی ئەو یە حاڵەتی دەرد ئینتیزاریی ئەو تەفسیلش وە سۆز حاڵی کەردم پێت هەنی تۆ زانی چەنی ڕەحمی وێت ++++++++++++++++++++++ سەرناو: یا شێخ هەڕگاوان یا شێخ، هەڕگاوان مەیلەکەی لەیلێ سەر بە سەر وە گیان هەرزانەن خەیلێ جۆشی کورەی مەیل دڵستانییەن دەواش هەوای فەرد زمستانییەن ئۆسای بلووربەند پەنجەرەی کاوان ئاینە سازیش وست ئەو شەتاوان وەروێ بەرد ئەوبەست گرد گوزەرگایێ دووی ئازیزشەن دڵ ئاهەڕایێ های نە، دڵ لوا و ئاماش پەی نییەن مەکیانەش پەی چێش نەسیم کۆ شییەن نەسیم پەنجەی پات ئەر سەردی کێشان بدارەش نە تۆی دڵ دەروون ڕێشان شۆن هەن نەی سەروەخت. سازان پەی دەلیل جە هەر سەر بەرزێ هەرسی دیدەم میل بشۆ چون یاوای وەی دووی سەردەوە بێپرسا بناڵ وەی دوو فەردەوە: باڵاخانەی چەم دیوانەکەی تۆ بانەناو وە گڵ ئاسانەکەی تۆ تکەش عاجز کەرد خەیاڵت تێشدا ئازیز بۆ جارێ پا بنیە پێشدا ++++++++++++++++++++++ سەرناو: یادی زوڵفی لوول یادی زوڵفی لوول شیرین نیگاران خەیاڵی ئەبرۆی نازک نازاران ئەو بییەن وە چین سەفحەی پێشانیم ئێد خەم چەمەکەی باڵای کەمانیم فکری دانەی خاڵ ژەرەژ خەرامان ئەندێشەی باڵای نەوڕەس نەمامان ئەو تانەی دیدەی سۆما بێزمەن ئێد دانەی ئەسرین وە تاو ڕێزمەن موتریب یە کەمان باڵای خەم وەردەم یە تاری ئەسرین خەم کۆک ئاوەردەم سا دەی تەنخوای من وەی دەم دەردەوە لێدەر نەوایێ وەی چەند فەردەوە یا جە گونای من کەرەم ئاوانتەر ڕەحمەت جە تاوان من فەراوانتەر هەر تۆنی وە تاق دانا و تەوانا تۆم هەنی، هەنی ئەو کێم بۆ هانا خەریکی کردەی وێم و فەزڵی تۆم ئێد متاونۆم، ئەو ملاونۆم بۆ بێعەداڵەت فەزڵت چەنیم بۆ وەسێمەن خەجڵەت خزمەتەکەی تۆ پەردە جە ڕوخسار کەردەم لامە بەر جە لای هامسەران ڕووسیام مەکەر یەند بەرۆم خەجڵەت کەردەم بە وێدا سەراپام تفڵێ دەس مارۆ پێدا چون فکری فەزڵت پەردە نەوازۆ جوانیم پیری ئاوات مەوازۆ ++++++++++++++++++++++ سەرناو: یاران بەرشییەن یاران بەرشییەن جە زێد وە زامن گرد تەفرەقە بین چون خەیاڵی من گەردی کۆچشان ئانا دیارەن دەک لێڵاویت بۆ چۆنت قەرارەن سەنگیی باری هۆش، پێش باری فامت دەواری شادی، چیخی ئارامت لوان چەنی کۆچ خاڵۆکەی هامفەرد ئێستە بار وستەن نە هەوارگەی دەرد تۆ چێش مەکەری کەم هۆشی کەم فام پەرێ عەیب وعار مەندەنی جە لام سا چەنی ئەڕواح یاوە وە یاران با تەن بۆ وە سەنگ مەندەی هەواران ++++++++++++++++++++++ سەرناو: یاری وەفادار یاری وەفادار شەرت و بەین بێشۆ چون نووری دیدەی مەعدوومی مەبۆ وەختێ بەندەی وێش بێحاڵ وە چەم دی ئەسرین وە چەمدا ڕێزا و پەشێو بی ++++++++++++++++++++++ سەرناو: یاوا پێم نامەی یاوا پێم نامەی شیرین خیتامەت دەک دەک نەڕێزۆ سەرپەنجەی خامەت سیای سورمەی خەت نە دیدەم شانا بادرەوشەی وەرەق خەمان ڕفانا مەرهەم بی پەی زام ئەفعییان گەستەم دەوا بی پەی دەرد جەستەکەی خەستەم تەسکین دا وە ئێش نێشەکەی دووری وە دڵەی سۆچیای ناری مەهجووری مەگەر خوداوەند کەرەم کەردەوە تەفرەقەی یاران جەم ئاوەردەوە ++++++++++++++++++++++ سەرناو: ئازیز! جە دووریت ئازیز! جە دووریت تەن بی کڵافە ڕۆح بی وە تەنوین حاڵی ئیزافە ++++++++++++++++++++++ سەرناو: بڕیا وە باڵای بڕیا وە باڵای کاڵای ڕەئیسی رجال الغیبە ئەحمەد پریسی ++++++++++++++++++++++ سەرناو: تا دڵ تا دڵ وە تەمای ئەو ترفە ترفەن نحوم هەر مەحوەن صرفم بێ سەرفەن ++++++++++++++++++++++ سەرناو: تا وە زوڵف و ڕووی تۆ تەماشامەن تا وە زوڵف و ڕووی تۆ تەماشامەن ئەدای نمای فەرز سوبح و عیشامەن ++++++++++++++++++++++ سەرناو: خاست فەرماوان خاست فەرماوان ئەربابەکەی خەم ساکن نە گۆشەی باڵەخانەی چەم ++++++++++++++++++++++ سەرناو: خەرمانی خەمان خەرمانی خەمان ها وەکەل باوە شەنکەر یەکێکە دوو شەن وە لاوە ++++++++++++++++++++++ سەرناو: دزەکەی زەهاو دزەکەی زەهاو زاوزۆ کەردەن هەر دزێ حەو دز پەی وێش ئاوەردەن ++++++++++++++++++++++ سەرناو: دیدەم دیدەم رێژاوە ڕوخسارم زەردەن جە داخی «یاران»، «پیران»م کەردەن ++++++++++++++++++++++ سەرناو: دیدەنی دیدار دیدەنی دیدار غەزاڵەی وەرمن چیدما یاران وەرمەن پەرێ من ++++++++++++++++++++++ سەرناو: دیسان دەسی چەرخ هەم هانە کاردا دیسان دەسی چەرخ هەم هانە کاردا تای تانتەی دووریش وستەن وە داردا ++++++++++++++++++++++ سەرناو: دەفتەری قەزات دەفتەری لەوحی قەزات لە بەرە خەفەتت جەهلی خاوەن دەفتەرە ++++++++++++++++++++++ سەرناو: قسەیێ ئەکەم قسەیێ ئەکەم بە ڕێو جێ وێ کە لەیلێ نەوو، با بەییجێ وێ ++++++++++++++++++++++ سەرناو: قوولەی بایەقوش قوولەی بایەقوش سوب وە هەردەوە زامی کۆنە و نۆم تازە کەردەوە ++++++++++++++++++++++ سەرناو: لە سەدای نەبات لە سەدای «نەبات» لە چریکەی «فەرەج» لەسەر مەلا و شێخ نەماوە حەرەج ++++++++++++++++++++++ سەرناو: نە ڕۆ ئارامەن نە ڕۆ ئارامەن، نە شەو خاومەن چون چەم گل کەران گلاراومەن ++++++++++++++++++++++ سەرناو: پیری و فەقیری پیری و فەقیری و کەسیفی، هەر سێ نەبۆ وە هیجرانباری هیچ کەسێ ++++++++++++++++++++++ سەرناو: پەنج بییەن وە شەش پەنج بییەن وە شەش، شەش ڕوو کەرد نە پەنج حەریر نە مابەین بییەن گەوهەر سەنج ++++++++++++++++++++++ سەرناو: چون شەماڵەی نوور چون شەماڵەی نوور گڕ گڕانمە پەی پاسی ماران زەنگ زڕانمە ++++++++++++++++++++++ سەرناو: ڕیشێ چەنی من ڕیشێ چەنی من نەیۆ وە حوزوور مبۆ بتاشووش تا وە نەفخی سوور ++++++++++++++++++++++ سەرناو: گەر زەڕەی گەر زەڕەی شعوور هەیە پێتەوە کە وتیان خودا ئەبڕێتەوە ++++++++++++++++++++++ سەرناو: هەر کاتێ هەر کاتێ زانای «کا»م وە دانەوە شەو شەیتان ماڵا وە خەرمانەوە ++++++++++++++++++++++ سەرناو: هەر یەند هەر یەند دڵ لەبڕێز خەیاڵی خاڵەن جە خەیاڵی خاڵ ماچی خاڵخاڵەن ++++++++++++++++++++++ سەرناو: هەرچیت دابوو پێم هەر چیت دابوو پێم یەکیەک دامەوە حیسابی حەشرت وا وەلامەوە ++++++++++++++++++++++ سەرناو: یاران، دڵداران یاران، دڵداران نە تۆی دڵ داران بێیادی یاران، یاران مەویاران ++++++++++++++++++++++