شاعیر: مەولەوی
کتێب: دیوانی مەولەوی
سەرناو: ئارەزووی ئازیز

ئارەزووی ئازیز وەنەم سەر داوە
نە هەردەی دەروون ئایر وەرداوە


تاقەت بی وە هوون جە سەختیی زامان
تکتک چەنی هەرس ڕێزا وە دامان


خەم نە سەرجۆی هوون سارای دڵ جەم جەم
بارچنی چون فەوج قافڵەکەی عەجەم


هەر وە زۆر مەندەن نیم نەفەس باقی
وادەی دەورتەن، هانا هەی ساقی! 


دەورێدەر وە ناز وە پیاڵەوە
ژەنگی دڵ وە جام مەی بماڵەوە


بۆی گوڵاڵەی دەرد دڵبەر عەزیزەن
مەزەی تامی خەم یاران لەزیزەن


فەریادڕەسیم کەر، نە جای گشت کەسم! 
مازە ئەو لەزەت بەرشۆ نە دەسم


ئیحیام کەر وە جام سافی یەک مەنی
بەڵکوو بمانوون، پەی غەمێ هەنی

++++++++++++++++++++++