شاعیر: مەولەوی
کتێب: دیوانی مەولەوی
سەرناو: نەتیجەی پاک دین

نەتیجەی پاک دین شێخی سازانی
خاس وەتەن نە دڵ مەعدووم سازانی


پەرسام حَسْبَ الْاَمْر گوزەشتەی ئەحواڵ
جواو دا ڕێزەی شیشەی قەدیم ساڵ


زەرفێ بیم نە تۆی وەختی شامەوە
چون ستارەی سوبح مەدرەوشامەوە


پەی گوڵاو پاشی و نەشئەی بەزمی کەی
گا پڕ گوڵاو بیم، گا سەرشاری مەی


گا وە سەر ڕەفەی زەڕین تاقەوە
گا وە دەس ساقیی سیمین ساقەوە


گا نە سەر پەنجەی بانووی بێنیقاب
چون سوەیل ڕەونەق پەنجەی ئافتاب


نە بەزمی شیرین خوسرەوانی دەور
مامام نە گەردش هەر ساتێ سەد تەور


گوڵاو مەپاشام وە ڕووی یاراندا
بادە مەبەخشام وە مەیخاراندا


گا گەردەن نە دەس نازک ئەندامان
گا دەس نە گەردەن ژەرەژ خەرامان


گاهێ ڕوو وە ڕووی لەیلێ ئەندازان
گاهێ لەب وە لەب شای شیرین ڕازان


هەستیم بێشومار مەستیم وە کۆ بی
توغیانم چون تاف جوانیی تۆ بی


جە ڕووی نادانی ئەو بەزم و ئەو جەم
وە جاویدانم منمانا وە چەم


فەڵەک شی وە قین جەور و ستەمدا
ئەو بەزم و ئەو زەوق گشت دا وە هەمدا


منیچ وەی تەرزە وە سەد پارە کەرد
هەر پارە پەرێم سەد پەژارە کەرد


مەعدوومی عامەن بەڵا و دەرد و بیم
ئەوەڵ قاروورەی شکستە من نیم


هۆشیار بەر میوەی مەستی غەفڵەتەن
غەفڵەت سەرمایەی هەزار خەجڵەتەن


هاکا دەستی چەرخ هەم ستێزە کەرد
چون من شیشەی تۆیچ ڕێزە ڕێزە کەرد

++++++++++++++++++++++