شاعیر: قانع
کتێب: سروەی بەربەیان
سەرناو: ئەم عەسرە
سەبارەت: دیوانی قانع، سروەی بەربەیان، خەلیفە شوکڕوڵڵا دووهاڕووت، لاپەڕە ٤٢١ـ٤٢٢. - نووسین و ئامادەکردن: کەماڵ ڕەحمانی

ئەم عەسرە چ عەسرێکە کە هەر شامە بەیانی؟ 
ئەم قەڕنە چ قەڕنێکە کە هەر کوردە قڕانی؟ 

ئەم شینە چ شینێکە کە سەد شینی سیاوەحش؟ 
بێزارە لە هەر زەلزەلە و شین و فغانی؟ 

ئەم زەنگە چ زەنگێکە لە مل کوردی فەقیرا؟ 
هەر لەحزە بە سەد ڕەنگە ئەڵێن دەنگی زڕانی؟ 

ئەم بەزمە چ بەزمێکە لە شاران و لە دێهات؟ 
ڕۆڕۆیە لە هەر ماڵێ کەوا کوردە زمانی؟ 

(مەنسوور)ە لە سەر داری فەنا حەزرەتی ناجی
ئەم (ڕانە) چلۆن ژینی ئەبێ مەنعە شوانی

چون بێ هونەر و سەرسەرییە(... ) وەتەنمان
بڕوانە چلۆن گەییە حەڵەب گەورە کچانی

سەی حەیفە کەوا (قانع)ی تەنها وو ئەسیرە
غەمخۆری وەتەن تەنها ئەوە و جووتە کوڕانی

++++++++++++++++++++++