شاعیر: قانع
کتێب: دەشتی گەرمیان
سەرناو: وەسیەتی دایک بۆ کچ
سەبارەت: خاتوو خورشید (دایکی قانع) ئامۆژگاریی عەدلەی کچی ئەکات

کچم! ڕۆڵەی کزۆڵەی بەردەباریم! 
چرای ڕووناکی بێ دەستی و هەژاریم


کچم! پارچەی نەژاکاوی زەمانەم! 
نەتیجەی ئیهتیمامی خوێندەواریم! 


وەرە، گوێ ڕاگرە بۆ پەندی دایکت
فەرەح بەخشی دەروونی بێ قەراریم! 


کچم، هۆشی حەیا و نامووسی خۆت بێ
نەکەی کارێ! زیاد کەی دەردی کاریم


نەخۆی هەرگیز فریوی سادەڕوویان
نەبیتە هۆی زیادی شین و زاریم


کچم، هۆشیاری خۆت بە تاکوو مردن
وەکوو من بە، بە زرنگی و هۆشیاریم


کچم، وەڵڵا هەمووی داخی کچانە
نەخۆشین و کزی و بێ ئیختیاریم


نە تەنها وەسیەتم بۆ تۆیە ڕۆڵە
فیداکاری کچانی کوردەواریم

++++++++++++++++++++++