شاعیر: خانی
کتێب: مەم و زین
سەرناو: مەخاتەبەیا مەمێیە دگەل شەتێ جزیرێ، موجاوەبەیا ژ عشقا بێ نەزیرێ

کای شوبهەتی ئەشکێ من رەوانە
بێ سەبر و سوکوونێ عاشقانە


بێ سەبر و قەرار و بێ سوکوونی
یان شوبهەتی من تو ژی جونوونی


قەت نینە ژ بۆ تە ڕا قەرارەک
غالب د دلێ تە دانە یارەک


هەر لەحزەتە ژی چ تێتە بیرێ
سەرگەشتە دبی ل رەخ جزیرێ


ئەڤ شەهرەیە گەر ژ بۆ تە مەحبووب
حاسل گەڕیایە بۆ تە مەتلووب


دائم د دلێ تە دانە مەنزل
دەستێ تە ل گەردەنێ حەمائل


هێژا ژ خودێ تو فکرێ ناکی
هەر ڕۆ ژ هەزار شوکرێ ناکی


ئەڤ چەندە دکەی هەوار و گازی
ئێدی چ مورادەکێ دخوازی


بێهوودە چڕا دکی تو فەریاد
ئاوارە دچی دیارێ بەغداد


گەر ئەز بگریم و گەر بنالم
وەر ئەز بمرم و گەر بکالم


هەر چی وەکوو ئەز بکم رەوایە
مەعقوولە ژ بۆ مە ڕا فەنایە


جارەک ل دلێ م ژی گوزەر کە
سەرچەشمەئێ چەشمێ من نەزەر کە


دەردێ دلێ من کو بێ دەوایە
چەشمێ تەڕێ من چ ماجەرایە


دیوانەمە من پەری ب دەردا
ئەز دجلەمە زەنبەری م بەردا


وەستانی و نێرگزی و سەقلان
دەروازە و عوممەری و مەیدان


ڤان سەیرگەهان تو لێ دکی گەشت
ئەز مامە ژ بۆ م ڕا دەر و دەشت

++++++++++++++++++++++