شاعیر: خانی کتێب: دیوانی ئەحمەدی خانی سەرناو: ئەی ئایینەیێ دل ب جەمالا تە موجەللا ئەی ئاینەیێ دل ب جەمالا تە موجەللا سەد سەفحە ب یەک زەررە ژ نوورا تە موتەللا ئینسان، تە ژ بۆ عالەمێ کوبرا کرە نوسخە لەو موزغەیەکی ژێ تو دکی عەرشێ موعەللا وەحدەت ب حەسەب کسرەتێ ئەعیانێ مەزاهر هەر سوو ب سفاتان دکەتن کەشفێ تەجەللا لەو مُختَلف القول و عَمَل بوونە خەلائق کافر، ژ سەنەم بوونە ب ناڤێ تە تەسەللا سررا خوە نیهانی کو تە دا ئەحمەدێ خانی از غیر بری شد، بە تو ئاورد تولّا ++++++++++++++++++++++ سەرناو: ئەی واحدێ پەنهان کو ژ زاتێ تەیە پەیدا ئەی واحدێ پەنهان کو ژ زاتێ تەیە پەیدا ئەڤ کەون و مەکان ئەرز و سەما گونبەدێ خەزرا ئەرواح و عوقوول ئەنفوس و ئەعراز و جەواهر خالن د موسەووەر نە مەحەلل و نە هەیوولا لەوح و قەلەم و کورسی و عەرش ئەنجوم و ئەفلاک هەم ئاگر و ئاخ ئاڤ و هەوا جوملەئێ ئەشیا سەد قافلە مەوجوود پەیاپەی موتەواتر هەر لەحزە ژ سەحرایێ عەدەم تێن ب تەمەننا هن نەقدێ فەنائێ دگوهۆڕن ب بەقائێ هن نەقدێ وجوودا خوە دکن بێ بەدل ئەفنا هەر یەک ب وجوودا خوە وجوودا تە دخوازت بالجمله خەریدارێ جەمالا تەنە حەققا لەو شوبهەتی پیرا ب هەوەس تالبێ یووسف دۆر هاتییە خانی کەلەفا ڕیسی د دەست دا ئەو ژی ب مەتاعێ خوە قوماشێ تە دخوازت سبحانک لن تۆیس من روحک عبدا ئەحمەد ژ سەنایا تە ندا کەت قە چو وەسفا ما أعجزنی حمدک أن أحمد حمدا ++++++++++++++++++++++ سەرناو: نەققاشێ ئەزەل ڕۆژا سەرلەوحەیێ ڕەنگین دا نەققاشێ ئەزەل ڕۆژا سەرلەوحەیێ ڕەنگین دا پەرگار ژ دەستان بوو سەرسەفحە کو تەزیین دا تەزهیب و زەرەفشان کر سەرلەوحێ کیتابا عشق رەسما ئەزەلی کێشا نەقشێ خوە نوو ئایین دا دیباچە کو ئینشا کر فهرەستە کو ئملا کر جلدەک ژ عەناسر بەست نەفخەک ب سوفالین دا ئەتفال و مەلەک هاتن وەستانە دبستانێ لا علم لنا گۆتن «ئەبجەد» ب خوە تەلقین دا وان سادە روخان مەشقێ عشقێ کو تەمەننا کر خەتتاتێ ژ حوسنێ خەت سەرمەشقەکی زەررین دا ئەز چوومە دەرێ دێرێ من دیت کو روح الله تەکراری موسەووەر بوو حەتتا د نهالین دا وان جوملە «أنا الحق» گۆت من واحدێ موتلەق گۆت ساقی ب خوە ئەز گرتم جامەک مەیێ نۆشین دا من نۆشی و سەرخوەش بووم فی الحال مشەووەش بووم ئەز چار و نەه و شەش بووم من تەکیە ب بالین دا هەرچی کو مە بەر پێ کر هندی مە نەزەر لێ کر من سەیر ل ئێکی کر لەورا مە دل و دین دا من دی هەمی یەک پەرتەو ساری د مەزاهر دا مومکن هەمی ژێ پڕ بوون ئەمما نە د تەمکین دا ئەو بوو کو زولەیخایێ ئێ دیتی د یووسف دا مەجنوونی د لەیلائێ فەرهادی د شێرین دا جانا ژ جەمالا تە ئەز دێ کو ببم سابر شەیخان و ئولوعەزمان جانێ خوە د کابین دا مسباحێ ئەبەد من دی ئیرۆهە د فندێ دا گەنجا ئەزەلی مەرکووز من دی د گل و تین دا مەعزوورە ئەگەر سووفی بت مونکرێ مەحبووبان گەر تێ کو تەسەوور کت سررا کو د دووربین دا ما سەجدە تەنێ من بر بەر سوورەتێ مەحبووبان ئبلیسی نەبر سەجدە لەو مایە د نەفرین دا شاهد بی تو ئەی زاهد مەحبووب پەرەستم ئەز بێ شاهد و مەی نابم شەیخێ مە ئەڤ ئایین دا جانی ژ تە ئەی خانی جانان کو بخوازیتن ها نوقتە ل بەر دانی فی الحال د مزگین دا ++++++++++++++++++++++ سەرناو: ژ لەعلێ د یارێ ئەمن مەی ڤەخوارا ژ لەعلێ د یارێ ئەمن مەی ڤەخوارا ب دل من دبەخشی بەدەخشان بوخارا مودامێ د دەستێ غەمان دا زەبوونم مودامی دخۆم مەی بکم ئەز مودارا دەما کر مە عوزرا ئەوێ گولعزارێ دبن بێ تەکەللوف دلێ من غەدا ڕا هنارن ژ بۆ من دەراغووش پەروەر هنارەک د تازە حەبیبا دلارا نە یارا تە ئیرۆ نەزەر دا تە خانی نە یاران تە مانە نە راحەت نە یارا ++++++++++++++++++++++ سەرناو: سەروا مە ب زەرزەنگ و هەزار عشوە و مەش هات سەروا مە ب زەرزەنگ و هەزار عشوە و مەش هات عاشق کرن ئەحیا ل رەقیبان کو نەخوەش هات سونبول کەملاندن گول و لالە خەملاندن رەیحان شەتلاندن ل روخان تازە بنەفش هات تەن دەرڤە نەبوو قەت نەددا بەختی گوشادەک ڕوو دا مە شوکر کەعبەئێ تالع کو دوو شەش هات تیپێ د فڕەنگان ب غلوو هاتنە رۆمێ شوکرانە نیهانە ژ عەرەب هەم ژ حەبەش هات ڕەشتۆزێ خوە نووبارە مە گەر گۆشە دخوازن تیرا گۆشەئێ دا تە هەدەف گرت و ب کەش هات یان هات و ب نیڤا دلی کەت قەت نە دوەستا لەورا کو ژ بەر قەوسێ مە دی زێدە ب وەش هات خانی بەسە بێ عاری چڕا زێدەئێ سالان ئیسالە ژ خوە تالع و بەختێ نە ب ڕەش هات ++++++++++++++++++++++ سەرناو: عشوەیەک دا مە سەحەر وێ پەرییا حووری سرشت عشوەیەک دا مە سەحەر وێ پەرییا حووری سرشت شەفەقا بەرقێ جەمالێ دل و جان سوهت و برشت مە نەزانی کو مەلەک یا نە بەشەر یا پەری بوو یەدێ بەیزا وەکو مووسایی ل قەتلێ ڤەدمشت ب تەمەننایا شەهادەت عاشقان جان برە پێش ئەللاه ئەللاه چ غەرەزدارە کو یەک فەردە نەکوشت کعبه اللهی جەمالێ مە دکر چینە تەواف خەیبەری هاتنە من خال و خەت و چەنبەر و قشت علمێ ئەسما مە ژبەر کر د دبستانێ سفات تالبێ زاتیمە لەو من شەممراند باغێ بهشت ئادەمێ کامل ئەزم بوویمە مەسجوودێ مەلەک موددەعی گەر نەبتن سەجدە ب من ها سەرێ خشت خانیا دێ هەبتن بێ هونەران لاف و گەزاف ئافەرین بەر تە کو ئەڤ شیوە ژ بۆ کەس تە نەهشت ++++++++++++++++++++++ سەرناو: میرێ مەجلس نەکەنت موتربێ گۆیا چ بکەت میرێ مەجلس نەکەنت موتربێ گۆیا چ بکەت غونچە خەندان نەبتن بولبلێ شەیدا چ بکەت نەینکا حوسنێ بوتان لازمە ساحب نەزەرەک کەسێ بینا کو نەبت دلبەرێ زیبا چ بکەت بێ کەرەم ناچتە تیپا عەدوان مەردێ شەجیع تیغێ ئاهیختە بێ دەستێ توانا چ بکەت تالبێ علم و کەمالێ نەبتن قابلێ فەیز حکمەت و تەربیەتا عالمێ دانا چ بکەت تەبعێ خانی سەدەفا گەوهەرێ عرفانە وەلێ مەتنخوانەک کو نەبت ساحبێ مەعنا چ بکەت ++++++++++++++++++++++ سەرناو: ئەز چوومە دەرێ مەیکەدەئێ سوبحەیەکێ زوو ئەز چوومە دەرێ مەیکەدەئێ سوبحەیەکێ زوو من دی یەکی ئەسمەر قامەت ب مسالێ دارێ شمشادێ دو گیسوو مانەندی دو ئەژدەر چین چین کربوو بسک ل سەر گەردەنێ روخسار مانەندی دو شەهمار کەرکەر دخوەشین زولفێ ل سەر قەوسێ دو ئەبروو مانەندی دو شەهپەڕ ماییم موتەرەققب مەگەر ئەو مەزەهرێ ئعجاز جارەک ب دوسەد ناز حالێ مە تەفەححوس بکە بێژە کو ئەسیرۆ ئەز بۆ تەمە خەمخوەر من گۆتی: د وەقتێ سەحەرێ ئەو چ تە دا من ئەی سەرو قەدا من گۆتی: تو نزانی چیە من دا تە فەقیرۆ أعطیتک کوثر حەتتا ڤەکە لەوحێ سەدەف و خامەئێ یاقووت نێزیکی ب لاهووت من سەیرکرن سدرە و تووبا قەد و دلجوو نینن چو بەرابەر هندی مەلەک و حوور و پەری بێنە تەماشا حاشا ثم حاشا کەنگی دبن ئەو لائقی نەززارەئێ ئەبروو ئەی دل مەکە باوەر یارێ ژ دەرێ مەیکەدەئێ من مەکە بێ بار ئەی سەییدێ موختار ساقی کو تووی أشهد باللهی کو ئیرۆ خانی بوویە مەیخوەر ++++++++++++++++++++++ سەرناو: ئەی دلا گەر تە دڤێتن ببی دائم مەسروور ئەی دلا گەر تە دڤێتن ببی دائم مەسروور د تەرەبخانەئێ دونیا ڤەخوە ئاڤا ئەنگوور پێ نەبە غەفلەتێ غەوغائێ جەهانێ بدڕین ژ مەقامێ کو ب هش تێ ژ سەدایێ تەنبوور زمزما زەمزەمەیا راهێ حوسەینی ژ حجاز ڤەخوونت کەعبەیێ دل تا بتە بیت المعمور پەردەئێ زولمەتێ عشقا ل جەهانێ بدڕین ژ نەزەرگاهێ جەمالێ تو حجابێ بکە دوور مەنزەرێ دیدەئێ جانێ تە مونەووەر نەبتن نەسلێ ما زاغ نەکێشی تو ژ خال و خەتێ هوور گونەهان گەر نەبویان لەززەت و زەوقەک حاشا فاعل ئاسم نەدبوو، تارک و تائب مەئجوور مەی و مەعشووق و هەوەسبازی و دونیایێ زوهوور نەبوو وانا نەدبوو ئسمەکێ ئەللاهی غەفوور من گونەه تێ ب گوناهان کو د نیڤ باغێ جەهان سەمەرێ خوەشتر ئەڤن، بوون ب حەرامی مەشهوور هنگی دەورێ فەلەکێ ساغەرێ مە دەور دکەت مەه و سالان دگرت هەروە ژ عومرێ مە قوسوور ڕابە ئەی ساقییێ مەهوەش تو ژ رەغما فەلەکێ بدە من بادەئێ لەعلێ تو ژ جاما فەغفوور شەیخێ جام ئەر نەفەسێ هەمدەمێ دل کەت بێ موراد ل مورادێ دلێ موردە دبتن کەشفێ قوبوور یەعنی ئەو خانەئێ گل نابتە قابل قەتعا نە ب چەشمێ دلێ نازر نە ب ڕوویێ مەنزوور عشقبازی دو تەریقن چ حەقیقەت چ مەجاز شەمعێ جان دێ بسوژیتن چ ب نار و چ ب نوور شەبێ زولماتێ ب ئمکانێ دبت سوبحێ نوما ئافتابێ ئەحەدییەت ژ فەلەق تێتە زوهوور سەر و مال و دل و جانێ مە فدایێ تە بتن بکە قەلبێ مە تو ساقی ژ شەرابا خوە تەهوور دا بکەم کەسبێ مەقامات و عولووێ دەرەجات یا بکەم کەشفێ کەراماتێ ژ دارا مەنسوور زاهدا گەر تە دڤێتن تو خودێ ناس بکی وەرە بەر سایەئێ شەمشاد قەدان قەت مەچە دوور ب زیارێ وەرە قەیدا شەجەرا وادیێ قودس کو بزانی ببهی سیتێ أنا الله ژ توور ئەز لەما شیفتە و والهێ مەحبووبانم کو د نیڤ ئایینەئێ جەبهەتێ وان من دییە نوور هەر دەما نەترکێ خلخالێ بنێ تێنە خورووش هەر دەما توررە ژ بەر تایێ قەسەب تێتە سودوور یانە کاکول ژ کنارێ کولەهێ کەچ بدەرین یا خەتێ مسکێ بڕێژ کەت ژ کنارێ کافوور کافرێ عشقم ئەگەر ئەز نەدەمێ ئیمانێ یا ب محرابێ بروویان نەبرم سەجدە ژ دوور واعزا گوه بدە من دا ببهی نەقلێ سەحیح موسحەفا چەهرەئێ خووبانە کتێبا مەستوور دەفتەرێ عشقێ نەدا دەست تە موعەللم ژ ئەزەل مەعنەیا ئایەتێ حوسنێ ل تە لەوما مەستوور بێ تەکەللوف دخورم سووندێ ب قورئانێ شەریف خانیا سوورەتێ جانانە ب من سوورەئێ نوور ++++++++++++++++++++++ سەرناو: دیسان دلێ شەیدا ژ نوو بێ ئختیار پەرواز کر دیسان دلێ شەیدا ژ نوو، بێ ئختیار پەرواز کر سەیدەک دییە و بەردایە دوو، مەیل و فڕا شەهباز کر مەیلا وی مەحزا حکمەتە، سەیدا وی عەنقا سیرەتە تەیرێ وی بالا هممەتە، لەورا تەلەب ئەڤراز کر عەنقا ب دەست کەس ناکەڤت، دامەک دڤێ ئەو دا کەڤت نابت کو غافل ڕاکەڤت، ئێ قەسدێ سەیدا باز کر سەییادییا من بوو عەبەس، دائم ل من تەنگ بوو قەفەس راحەت نەبووم ئەز یەک نەفەس، من لەو ب ئەفغان ساز کر ساز و سەمایا سوحبەتێ، گۆڤەند و چەرخا دەعوەتێ فکریمە شەکل و قامەتێ، بیر تێیە من ب ئاواز کر شەکلێ مەجازی چەندەکە، سەیدا حەقیقی وەردەکە تەیغوونێ قەیدا لێ ڤەکە، بەحری مە بەر ئەنداز کر نێچیر د بێ تەیغوون بتن، چەندەک ل پێشبەر خوون بتن شونقار نە دێ مەجنوون بتن، ئەسکۆف ژ چاڤان باز کر شونقارە چاڤ تەیغوونە دل، بەردانە دوو چاڤێت ب کل خانی ئەوان گێڕا خەجل، لەورا مەجاز ئاغاز کر ++++++++++++++++++++++ سەرناو: سەیدێ چەنگالا سەرێ زولفا شەها شەهبازم ئەز سەیدێ چەنگالا سەرێ زولفا شەها شەهبازم ئەز مەستێ جاما عشوەیا شەهنازێ نازک نازم ئەز رەمز و ئعجازێ دخووبان بێ عبارەت مەدح دکەم مورشدێ کامل ئەزم ئیرۆهە ساحب ڕازم ئەز بەیزەیا ئەز تێ عەبەس بوو ئاشیانا من قەفەس گەر چ دل تێ پڕ هەوەس بوو بێ پەڕ و پەروازم ئەز ڤێ حەیاتا حیرەتێ چ بکەم بەقا نینە ژ بۆ لەو شەهیدێ غەمزەیا وێ دلبەرا تەننازم ئەز دەردەمەندەک من دڤێتن هەمنەفەس بت خانییا گەر مە هەمدەستەک هەبیتن سازێ خوەش ئاوازم ئەز ++++++++++++++++++++++ سەرناو: هێدی ل ئەبریشەم بدە ئەی موتربێ دەمساز هێدی ل ئەبریشەم بدە ئەی موتربێ دەمساز سەد دل بۆ ڤەبن بەستنە هەر یەک ب دوسەد ناز ئەی بادێ سەبا پڕ مەهەژین توررەئێ دلدار عوششاقێ ب نالینە ژ بەر غوللە و شەهناز ساقی بگەڕین بادەئێ ئەنگوور ب تەنبوور جانا بدە من بووسەیەکێ هەروە ب دلخواز رووحا من و سررا د روخێ یارێ ب یەک ڕا ڕۆژا ئەزەلی بوونە ب دل هەمدەم و هەمڕاز خانی تە غەلەت زانییە ئەو هەر ژ خوە یەک بوون خەللاقی تەعەددود ب مەزاهر کرە ئعجاز ++++++++++++++++++++++ سەرناو: هەر دنالم شەڤ و ڕۆژان مەگەر ئەییوبم ئەز هەر دنالم شەڤ و ڕۆژان مەگەر ئەییوبم ئەز هێستران هەر ڤەدمالم مەگەر یەعقووبم ئەز ب کەرەم دەست ژ مە بەردن گول و وەردان بکن وەر بپێچین ب جەفایێ خوە نە مەکتووبم ئەز هندەکێ غەم هەیە دائم ل من ئەو ڤێک دکەڤن ئەز نزانم کو ب چاڤ وان خوەیی مەحبووبم ئەز غەم تەلەبکارێ مەیە ئەم خوە تەلەبکارێ دیار وە تلسمێ تەلەبێ تالب و مەتلووبم ئەز عەجەب ئقبالێ ژ من نهە خانی کو ل بال پادشاهێ غەم و دەردان وەهە مەرغووبم ئەز ++++++++++++++++++++++ سەرناو: ئەز چوومە باغێ سۆرگولان وەقتێ سەحەرگاهێ ب خەف ئەز چوومە باغێ سۆرگولان، وەقتێ سەحەرگاهێ ب خەف من دی سەدایا بولبولان داگرتبوون هەر چار تەرەف سەوتا هەزار و قومریان، دەنگێ رەباب و موغنیان تەشبیهی بەزما بەنگیان، هەڤدەنگی هەڤ بوون چەنگ و دەف مانەندی مەست و سەرخوەشان، ئەز چوومە بەزما مەهوەشان ئەبروو کەمان و چاڤ ڕەشان، جەرگ و دلێ من کر هەدەف پەیگان د جەرگی دل پەڕی، سنگ بوویە سندووقا بەری سەددەق ژ حوسنا تە پەری، هێژا ل من کر کەرب و گەف هێژا ل من بوو کەرب و کین، زاهر غەزەب باتن کەنین لێ غەمزەیەک دا من نهین، عەقلێ مە دیسان بر تەلەف دیسان حەبیبا چاڤ بەلەک، ئحسان د گەل مە بوون گەلەک لەورا د گەل زولفێن هەلەک، ئالۆز مە دیتین قشت و لەف شتری و قشت و زولف و خال، هەمیان ل سەر روخسارێ ئال ڤێکرا هەبوون جەنگ و جدال، لێک ئالیا بوون سەف ب سەف سەف سەف مە دی وێ کریە جەنگ، هندەک حەبەش هندەک فەرەنگ ڤێکڕا براندن وەک خەدەنگ، ڤێکرا هەبوون وان لاف و لەف ڤێکرا هەبوون دەعوا و شەر، دەربوون ل من تیپا تەتەر ژێک ڕاکرن قەلب و جەگەر، رهتن ژ دل خوونا ب کەف رهتن ژ دل خوونا دلان، شەهمار و زولفێ سەرملان بێ رەحم و مەست و قاتلان، مەی خوار ژ فنجانا سەدەف وان مەیخوران ئەبتەر کرین، بێ قووەت و ڕەنگ زەر کرین وەللاه ژ دل کەرکەر کرین، خانی بەسە ئاه و ئەسەف ++++++++++++++++++++++ سەرناو: ئەی دل ئەگەر ب نەقدێ جان جنسێ گران بهایێ زولف ئەی دل ئەگەر ب نەقدێ جان، جنسێ گران بهایێ زولف دێ بکڕی بزان مەجان، جەوهەرێ جانفدایێ زولف غونچەئێ تەنگ حەوسلە، دل ژ ڕکان بگرتبی سوبحەگەهان کو سەر دکەت، لەخلەخەئێ هەوایێ زولف مەشقێ دکەت ت مەکتەبان، ڕویێ نگار و حوسنێ خەت بەندە هەزار و تفلێ دل، هاتنە بەر مەلایێ زولف عاشقێ بێ جەگەر مەگەر، سەبرێ ژ جان و دل دکەت مانعێ گەنج مەقسەدە، هەیبەتێ ئەژدەهایێ زولف هەر سەرێ موو ب سازەکی، جلوە دکەت ب نازەکی عاشقێ عشقبازەکی، بەندە دکەت ب لایێ زولف رۆم و فەرەنگ و هندییان، خال و نشان و خەمرییان خەنجەر و شیر و مسرییان، جەنگە ل بەر لوایێ زولف تاج و تۆمار و بن پەڕان، لەعل و گوهار و گەوهەران سەرخوەش و دین و ئەبتەران، زەوقە د گەل سەمایێ زولف لاو و رەوال و ڕیسپییان، میر و وەزیر و جندییان سەرخوەش و مەست و بەنگییان، دەردە ژ ماجەرایێ زولف شەیخ و مورید و سالکان، شاه و فەقیر و مالکان چوست و چەلەنگ و چاپوکان دل کەتە بەندە پایێ زولف ئەفعی و مار و ئەژدەرا، مسک و زوباد و عەنبەرا نەفخەئێ رووحپەروەرا، رائحەئێ هەوایێ زولف بێ مەی و بێ دەوایەکی، بێ دەف و چەنگ و نایەکی دین دکەتن مەلایەکی، جەزبەئێ دلروبایێ زولف میر و مەلا و ماهران، چەندی بەلیغ و شاعران خانی و هندی حازران، دەردە ژ دەستێ تایێ زولف ++++++++++++++++++++++ سەرناو: ئەی دلێ قەلب ناهەژی یەک سەرێ موو ژ تایێ زولف ئەی دلێ قەلب ناهەژی یەک سەرێ موو ژ تایێ زولف گەر نە هەژی تو پێلەکێ شوبهەتی من ل بایێ زولف خوون و دل و جەگەر دخوون نافە فرۆش هەر سەحەر بادێ سەبا کو تێک بدەت سونبولێ مشکسایێ زولف غونجەئێ تەنگ حەوسەلە دل ژ رکان بکر دبت سوبحەگەهان سەه دکەت لەخلەخەئێ هەوایێ زولف مەشقێ دکەن د مەکتەبان ڕوویێ نگارێ حوسنێ خەت هندە هەزارێ تفلێ دل هاتنە بەر مەلایێ زولف عاشقێ بێ جەگەر مەگەر سەبرێ ژ جان و دل دکەت مانعێ گەنج مەقسەدە هەیبەتێ ئەژدەهایێ زولف تالبێ نوورێ غەیبم ئەز مامە د قەید و زولمەتە هیڤی خودا و هممەتە حازرێ ئەولیایێ زولف بەحرێ جەمالێ یار ئەگەر کەشتیێ تێ سەبرێ بکت دەستێ من و تەعەللوقا دامەنێ با خودایێ زولف تالع و بەخت گەر مە دی دەولەتێ سەرمەدی مە دی دل کو خوە دایە بەر سها چەنک و پەڕێ هەوایێ زولف خانییێ ژار و بێ نەوا لێ دجڤن وها ستەم لەو دڕەڤی ژ دەرگەها شێر و شەها نەوایێ زولف ++++++++++++++++++++++ سەرناو: فات عمری فی هواک یا حبیبی کل حال فات عمری فی هواک یا حبیبی کل حال ئاه و نالم همدمم شد در فراقت ماه و سال گر بنم قانم دیلرسن چوق دن أولموشتر حلال مەست و سەرخۆشم ژ عشقێ من نەما عەقل و کەمال أنت فکری فی فۆدای أنت روحی فی الجسد لشکر غمهای تو ملک دلم ویرانه کرد داده گلدم عشق ألندن أیسترم سندن مدد ڤان تەتاران کرنە تالان عەقل و دین و ملک و مال طال غمی، زاد همی، شاع سری فی الملا تشنهٔ جام وصالم چون شهید کربلا یوقسه سن دیوانه أولدن نیجه حالن أی دلا یان ژ نووڤە عشوەیەک دا من حەبیبا چاڤ غەزال بت هجرانا حبیبی لست منی عالماً مُردم از درد فراقت غافلی از حال من جان و دل دن عرض قلدم حالمی جانانه بن عەرزێ حالا من تو غافل قەت نەپرسی عەرزحال هل لنا من نعمة الوصل حبیبی من نصیب اوفتادم بر درت بی چاره سرگردان غریب درد من چوق الیک سندن اونه یوق هیچ طبیب ئەی تەبیبێ من دەوایێ دەردێ خانی هەر وسال ++++++++++++++++++++++ سەرناو: دا زەن نەبرن کو ئەم خەمۆشین دا زەن نەبرن کو ئەم خەمۆشین ئەم بەستە دەهان و پوڕ خورۆشین گەنجا مە د دل گوهەر تژینە هەر چەندە عەیان خەزەف فرۆشین شاهین و ب خەف مە لبسە دیبا زاهر ژ خوە ئەم پەلاسی پۆشین مجمەر سفەتە مە جسم و جان عوود دل ئاتەشە دائما ب جۆشین مەیخانە بهشتە حوورە ساقی کەوسەر مەیە لەو ڤە بادە نۆشین بیهۆدەیە لافە لەو کو خانی دونیاگەر و ئاخرەت فرۆشین ++++++++++++++++++++++ سەرناو: دوڕدانە ژ دەڤ دا مە دبارن دەم و ساتان دوڕدانە ژ دەڤ دا مە دبارن دەم و ساتان کەس نینە ببەت وان بفرۆشت ل وەلاتان سەوداگەرێ عشقێ پەریان جوملە دڕێتن قەتعا و سەعالیکێ زەمانێ فەتەراتان قەت گەوهەرەکی جەوهەریەک نینە بها کەت بازارێ جیهان مایە ب ڤان تورکمەن و تاتان عەبدێ زەهەبن هندەک و هند عابدێ فززە عاشق دەریانییە ژ عید و عەرەفاتان مەعشووقە جەمالا تە و عاشق ب خوە حەیوان ئینسان برییانە چ خەبەر دەم ژ نەباتان کوففاری بوو دەم دایە حسارێ و مە خوندکار هێژ وێ ل شکارێ دگەڕیتن ل فەلاتان تێن ڕ بەگلەربەگی و میر و وەزیر جوملەئێ پ کوففاری و خوندکاری غەزەب کر ل فوراتان ئیسلامی ل جەنگێ ت مە بی بۆچی زەبوونە لەورا کو کەرەم نینە حوماتا کەلیماتان ڕوودایە عماراتێ مولووکان ب ئسراف میرێ پسەبان نادەتە خەلقێ خوە خەلاتان میرێت مەهمەدانی خوە دوبەندینە د خائن عیسێنە ل مووسایی دخوونن سەلەواتان خەلقێ مە هەکاری وە دبیتن کو ژ بۆ شاه حینا سەفەران ئەو دشەهینن ئەدەواتان میرێ نەمەران وێ دمریتن ژ فەقیری شێروان و موکس بوویینە موحتاجی زەکاتان یا رەب تو بپارێزە د ڤێ عەسرێ قزلباش توغیان و خورووجێ نەکەن ئەو بێنە وەلاتان کی دێ ل ڤێ سەرحەددێ ژ پێش وان ڤە بوەستت کەس نینە کو تێر نانی بدەت پێنج غوزاتان یا رەب ب دوعایێ نەبیی ئو وەلییان کەی ب ئنجیل و زەبوور و فوروقان و تەوراتان یا رەب ب مەکێ کەی ب مەدینێ ب تەوافێ یا رەب ب حەقێ سەعی و ووقووف و عەرەفاتان یا رەببی ب لەوح و قەلەم و کورسی و عەرشان یا رەب تو ب مولک و مەلەکووت و سەمەواتان یا رەب تو ب تەوحید و ب تەسبیح و ب زکران یا رەب ب دوعا و ب سەلات و سەلەواتان خوندکاری ل کوففاری موزەففەر بکە دیسا دا شاه ژ ترسان ل عومەر دەت سەلەواتان ناقووس و سەلیبێ د فەرەنگان چ رەوانە ئەو بێن بگرن جوملە جهێ بانگ و سەلاتان چەندین د رجالان بشەهینە تو ژ غەیبێ ئیسالە سەفەرکێش بدە خەلقێ خەلەواتان یا مالێ زەلال بێتە د ناڤ خۆزەئێ ئیسلام قەت لائقە ئەی خالقێ نوور و زولوماتان خەلقێ بەدەوان گەر چ مرن چوونە بەحەشتێ حەیفا مە ل ئبنان و خەواتین و بەناتان مورتەد ببن ئەو جوملە بمینن د گرفتار تەرکا تە بدەن ئەو بپەرستن بوت و لاتان ئەڤ چەندە تەفاسیر و مەساحف ب تەلف چوون حورمەت چو نەما ئایەت و حەرف و کەلیماتان ئەی مەعشەرێ ئیسلامێ هەمی سالح و تالح وەی عادل و فاسق ژی بخوازن دەعەواتان هەر کەس ب قەدەر حالی بکەن کەسب و تەقەرروب ب ئسلاحێ نوفووسان دبتن وەسل و لقاتان دا مونتەقمێ قادرێ قەییووم ڤەخوازت دادا مە ژ کوففار و ژ فوججار و بوغاتان هندی دکەتن خانییێ بێچارە گوناهان یا رەب تو بەدەل وان بنڤیسە حەسەناتان ++++++++++++++++++++++ سەرناو: شیوە و عشوە و نازێد کو دلدار دکن شیوە و عشوە و نازێد کو دلدار دکن عاشقان بۆ چ گەلۆ هندە قەدەر هار دکن گول د گەل بولبولی خوەش تەبعە و خەندانە وەلێ بێ وەفایی و جەفایا کو دکن خار دکن هوون مەکن لەومە ژ ساحب کەرەمان چەندینو کو چرانە ئەم و ئەو بێ زەرە و بێ زار دکن وان دڤێ هەمی کەس زێدە ژ وان رازی بن لێ رووز ب تەلەس هندەکان سار دکن دلبەران گەر نەڤیا عاشق و شەیدا پوڕ بن بۆ چرا زینەت و خەملێ ل خوە ئەو بار دکن روحێ عاشق ڕوویێ مەعشووق ب سەر موتتەحدن موتەعەدد ئەرزێ جەوهەر ئنکار دکن عززەت و ڕوومەتی دان جوملە ژ بال باخوێینە دا بزانی تو کو نە شاه و نە خوندکار دکن واجب و لازمە دائم ل مە کەتما ئەمەلێ عارف و عاقل و دانا ژ خوە ئنکار دکن نە وەکی خانییە نادان نەگهشتی ئاڤێ پەلەکا هلددت یا د دل ئزهار دکن ++++++++++++++++++++++ سەرناو: م دی شەیخەک ژ شەیخێ نەقشەبەندان م دی شەیخەک ژ شەیخێ نەقشەبەندان ڤەبوون بەندێ ت من یەک یەک ژ بەندان گوشادا دل ژ بۆ من ڕا مویەسسەر نەبوو بێ سوحبەتا سوورەت لەوەندان دلێ مە بوو د گەل غەوغایەئێ دەرد هەژاند شوور و ل سەر مە هات ب ڕندان ل من کورت بوو ڕیا کەعبا وسالێ ژ شەکل و قامەتا بالا بلندان ئەز ئیرۆ سەرخوەشم وەللاهی واعز ل من زایع مەکە ڤان وەعز و پەندان کەسێ گریا ببت بەلکی ب عشقێ دبیتن عاقبەت ئەلبەت ب خەندان مە سەد هیڤی هەیە دیسان ژ سەییاد مە ئازا کەت ژ قەیدێ قەید و بەندان ژ ئاهۆیان مە یاهۆ خوەست ئەمما دلێ من ما د نیڤ موشکین کەمەندان هەچی پیلەک د عشقێ دا عەمەل کر دبیتن عاقبەت شادان و خەندان دلێ خانی ئەگەر بوو گەنج خانە بەلێ قەت کەس نە گۆ خانی ب چەندان ++++++++++++++++++++++ سەرناو: کانێ موحەممەد بەگ گەلۆ کان پادشاهێ سەرحەدان کانێ موحەممەد بەگ گەلۆ، کان پادشاهێ سەرحەدان؟ ئیرۆ ژ دل بگرین دە لۆ، کان پادشاهێ سەرحەدان؟ ئیرۆ ببینن عیبرەتێ، ئاغا و خەلقێ هێشەتێ کانێ خودانێ غیرەتێ، کان پادشاهێ سەرحەدان؟ میرێ د نێڤ میران ب ناڤ، ئەشهەب سوارێ ڕم زراڤ بالا بلندێ پەڕ بەلاڤ، کان پادشاهێ سەرحەدان؟ کێ دی وە ڕەنگ زاتەک شەریف، ئەرکان و ئەزمانەک لەتیف عالەم د دەست وی بوو زەعیف، کان پادشاهێ سەرحەدان؟ کۆما دمل بوو سێ هەزار، سەد میرەکان ڤێکڕا دو جار ژێک ڕاکرن کر تار و مار، کان پادشاهێ سەرحەدان؟ سەنجەق ژ سەر قەرسێ بڕی، بدلیسییان وان ژێ کڕی خانێ دمل کربوو چڕی، کان پادشاهێ سەرحەدان؟ کانێ عەزیزێ مسرییان، کانێ عەدووێ وانییان کان هەڤڕ کێ مەحموودییان، کان پادشاهێ سەرحەدان؟ کانێ ئەمیرێ نامدار، سەرحەد نشینێ خوندکار پاشان ژ بۆ پێشکێش هنار، کان پادشاهێ سەرحەدان؟ کانێ ئەمیرێ ذو الفنون، کان عاقلێ تبعەت جونوون عالەم ل بەر وی بوون زەبوون، کان پادشاهێ سەرحەدان؟ د علمێ خوە ئەو عەللامە بوو، بەهرامێ گولگوون جامە بوو قەتتالێ پڕ هنگامە بوو، کان پادشاهێ سەرحەدان؟ چەند میر و حاکم ڕاکرن، چەند خان و سولتان داکرن کۆم و حەشەم بەرباکرن، کان پادشاهێ سەرحەدان؟ ئەو حاکمێ پڕ ناڤ و دەنگ، هەمتەبعەتێ تەیموورێ لەنگ دەعوە دکر بچمە فەڕەنگ، کان پادشاهێ سەرحەدان؟ پێلا کو وی دیوان دگرت، خەلقێ ئەدەب ئەرکان دگرت هەیبەت ژ وان دیوان دگرت، کان پادشاهێ سەرحەدان؟ وەقتێ ب سەر هەسپی دکەت، شەش جانبان ڕەڤ پێ دکەت هەیبەت ب سەر خەلقێ دکەت، کان پادشاهێ سەرحەدان؟ دائم عەدالەت پیشە بوو، غایەت دەقیق ئەندیشە بوو نازک تەبیعەت شیشە بوو، کان پادشاهێ سەرحەدان؟ دیوان و عەدل و دادگیر، ئزعان پڕ و ڕەوشەن زەمیر حەتتا خوەشین ناکن ژ بیر، کان پادشاهێ سەرحەدان؟ دیوان و ئەیوان شانشین، ئەو سەدر و حەوزێد نازەنین مان شوبهی فردەوسێ بەرین، کان پادشاهێ سەرحەدان؟ فەرشێ د دیبا و حەریر، ئستەبرەقێت وی بێ نەزیر بێ ئختیار مایین ژ میر، کان پادشاهێ سەرحەدان؟ ئەڤ غالیەت ئەرمووش و قەز، وەرناگرت کەس شوبهی خەز خالی بوویین مەیدان و ڕەز، کان پادشاهێ سەرحەدان؟ ڕەز بوو میسالا جەننەتێ، ئەیوان ژ سونعێ قودرەتێ کەس نینە تێ کەت شوبهەتێ، کان پادشاهێ سەرحەدان؟ ئەلماس و لەعل و گەوهەران، تۆمار و تاج و بن پەڕان حەد نینە بێخمە دەفتەران، کان پادشاهێ سەرحەدان؟ سەد مەعنەک و هەسپێد بەدەو، سافی حودوود زێڕێن جەلەو کەس نینە وان ڕاکەت ژ خەو، کان پادشاهێ سەرحەدان؟ ئەو شەهنشین و حەوز و ئاڤ، نێچیرگەهێ پڕ سەید و ڕاڤ نابت ببێژم ئەز ب ناڤ، کان پادشاهێ سەرحەدان؟ شاهینشەهێ گەردەن فراز، ئازاکرن تەیهوون و قاز تەرخان کرن تەیغوون و باز، کان پادشاهێ سەرحەدان؟ میرێ مە وێ نابت سوار، تێربوویە ئەو ناچت شکار تەیغوون و تەرلان مان ل خوار، کان پادشاهێ سەرحەدان؟ سەرداریا کۆما گەلەک، ناکت سوارێ چاڤ بەلەک چاڤەت سپی بن ئەی فەلەک! کان پادشاهێ سەرحەدان؟ تاق و ڕەواق و مەنزەران، کۆشک و خەلات و خەیبەران وان جوملە نیشان حەیدەران، کان پادشاهێ سەرحەدان؟ ئەو جوملە وی ئیجادکرن، هەر چەند قەوی بنیادکرن چەرخی هەژاند بەربادکرن، کان پادشاهێ سەرحەدان؟ خواهێ کەلاتان ب زەفەر، دوژمن ژ بەر وی بێ مەفەر وێ چوویە نیڤا ئاخ و بەر، کان پادشاهێ سەرحەدان؟ دونیا دبۆریتن ب دۆر، عومرێ عەزیز نادن ب زۆر دەولەت دبێن ناچیتە گۆر، کان پادشاهێ سەرحەدان؟ یا رەب هەبت ئۆچاخ قەدیم، عەممێ د وی خوەش بن عەمیم بالخاصه ئەو دوڕا یەتیم، کان پادشاهێ سەرحەدان؟ دوڕدانەئێ گەوهەر سەدەف، ئەو ما ژ وی نەسلی خەلەف یا رەب نەکی وان زوو تەلەف، کان پادشاهێ سەرحەدان؟ خەلقێ خودانێ دەولەتێ، وێ چوویە مالا زولمەتێ ب وی ڕا بخوونن رەحمەتێ، کان پادشاهێ سەرحەدان؟ خانی تو ژی دەستان هلین، هەر چەند کو زێدە دلکولین ئیرۆ ژ بۆ میر سائلین، کان پادشاهێ سەرحەدان؟ ++++++++++++++++++++++ سەرناو: گەر گونەهکارین ژ بۆ ئسمێ غەفوور ئەم مەزهەرین گەر گونەهکارین ژ بۆ ئسمێ غەفوور ئەم مەزهەرین وەر ستەمکارین تەماشاگاهێ ئەهلێ مەحشەرین پڕ گوناهان گەر تو دێ مەهدەر بکی یوم الحساب ئەی شفیع المذنبین ئەم بۆ تە ڕا سەردەفتەرین گەر غەفووری ئەم نەبەخشین و شەفیعی ئەم نەدین کار و بارێ مە کە مالک بۆ تە ڕا سەرعەسکەرین دۆزەخ و جەننەت ل نک مە هەردو یەکسانن ب حال عاشقێ دیدارێ یارین پەروەرێ پێغەمبەرین گەر جەمالا بێ زەوال ئەم دێ نەبینین بێ حجاب دار و دیوارێد رزوان خانی ئەم پێ کوو بکەرین؟ ++++++++++++++++++++++ سەرناو: ژ دەردێ عشقێ بەدحالم عەجەب بەربوویە من نارەک ژ دەردێ عشقێ بەدحالم، عەجەب بەربوویە من نارەک وەرە جانا ببین حالم، نە من دل ما نە دلدارەک نە دلدار و نە من دل مان، نە ئالئال و نە سۆرگول مان نە رەیحان و نە سونبول مان، د دل دا من خەلی خارەک د دل دا من خەلی پەیکان، وەرە سەر من بکە ئحسان ل گۆراهی رەقیبی مان، ببین خوەش بوو بریندارەک ڤەدە دەستان حەبیبا من، بکە دەرمان تەبیبا من بکە دەرمان برینا من ب دەست و تللێ موبارەک برینداران برین خوەش بوون، رەقیبان هەردو ڕووڕەش بوون د باغێ حوسنێ گول گەش بوون نەکێشت بولبول ئازارەک سەحەر بولبول ب هاوارە، د دل دا ئەو بریندارە کول و نالین ژ بۆ عارە، نە گول مانە نە گولنارەک نەکێشت بولبول ئازارێ، ل رەغما موحبەتا خارێ ل فەسلا ماهێ ئازارێ، نەمینت قەت ل دل بارەک ل دل بارێ غەمان بارە، نە نیسانە نە ئازارە هەڕۆ خانی ب هاوارە، د دەستی مایە گوفتارەک ++++++++++++++++++++++ سەرناو: دلا قەت نینە مەحبووبەک ژ تە جوزئەک نەبت لالی دلا قەت نینە مەحبووبەک، ژ تە جوزئەک نەبت لالی دلاراما نە مەجزووبەک، هەیە سررا تە ژێ خالی ئەگەر سررا د قەلبانە، وە گەر نوورا د وەجهانە ب من یەک ڕەنگ و یەک تانە، د گەل یەک بوون ل وی ئالی ژ غەیبێ ئەو ب یەک هاتن، هەمی جۆتن نە تەک هاتن وەکی چاڤێت بەلەک هاتن ب هەڤ کەت شاهی و تالی ئەگەر حوسنە ئەگەر نوورە، ئەگەر نێزیک ئەگەر دوورە برینا عاشقان کوورە، ژ سەرتیرا کوڕێ زالی ژ سەرتیرا موجەوهەر بوو، چ ئاور بوو چ خەنجەر بوو ژ بۆ من ڕا موقەددەر بوو، دەما پفکرنە سەلسالی وە گەر سەلسال و فەخخارم، تژی نوورم تژی نارم د باتن شوبهی خونکارم، ب زاهر کەتمە وی شالی گەلەک شال جەوهەر و زیبا، گەلەک ئەتلەس گەلەک دیبا گەلەک سیم و گەلەک شیبا، مە هاڤێتن بکر نالی بکر نالی مە هاڤێتن، هەمی یەک یەک هلاڤێتن گەلۆ کی بت کو ناڤێتن، حەبیبەک چاردە سالی مەگەر هەر من دڤێ دلبەر، دوسەد علمان بکەم ئەزبەر ژ خلخالان دبت ئەبتەر، مەلا مەقسوودێ خلخالی مەلا مەقسوودێ من خالە، نە ملک و مەنزل و مالە نە علمێ قالە ئەو حالە، مە حاسل کر ب ئەبدالی مە حاسل کر ب خیزانی، ب موشتاقی و حەیرانی وەکی گەنجا د وێرانی مە پەیدا کر ب رەممالی ب رەممالی مە پەیدا کر، دلێ غەمگین مە پێ شا کر نقی الخد مە ئازا کر، وەکی پیرا دوسەد سالی نقی الخد و لحیانن، بەرات و ئەمر و فەرمانن ب توغراء و ب نیشانن، د دەست عوششاقێ دەللالی د دەست دەللالی دا من دی، روخێ کاغد سەمەرقەندی خەتێ کووفی نوقەت هندی، کتابا حوسن و ئەشکالی کتابا حوسن و دلبەر بوو، خەتێ الله أکبر بوو مەلایی گۆ ژ ئەزبەر بوو، ل تەختێ دل دبت والی ل تەختێ قەلبی سولتانە، دلێ وی عەرشێ ڕەحمانە وەکی خانی نە نادانە، دزانت ئەو ب ئەحوالی ب ئەحوالی خەبەردارە، ب سوورەت شەکلێ دلدارە د باتن عەینی دیدارە، تعالى شأنه العالی ++++++++++++++++++++++ سەرناو: ئەی دەریغا مامە تەنها ئەز ژ شەمسا خاوەرێ ئەی دەریغا مامە تەنها ئەز ژ شەمسا خاوەرێ خان و مان تێک بوونە زولمەت پاشی وێ دێم ئەنوەرێ بێ قەرارم شوبهی زیبەق بێ ئەوێ سیمەنبەرێ پاشی لێڤێت وێ ڤەناخۆم موتلەق ئاڤا کەوسەرێ گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ سەد مخابن چوو ژ بال من ئەو حەبیبا چاڤ بەلەک ئاه و ئەفغانم شەڤ و ڕۆژان تچن حەتتا فەلەک وێ ژ فەریادێ د من عاجز دبن ئنس و مەلەک مام د قەیدا داغ و دەردان پاشی وان زولفێت هەلەک گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ هجرەتا یارێ بهاتم شوبهی فندا شوعلەدار کەتمە حالێ ئفتراقێ ژ ئحتراقێ بوومە نار ئەو ووجوودا بێ ووجوودە سوهت و تێکدا بوو غوبار من نەڤێ دونیا ب جارەک پاشی وان چاڤێت خومار گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ گەر د حینا ئەز وەفابم بێتە سەر من عزرەئیل موژدەیا خولدێ د وێ گاڤێ بدەت من جبرەئیل خزرێ فەرروخ بێ ژ من ڕا ئەو د وێ ڕێ دا دەلیل دێ ببێژم من نەڤێتن خولد و کەوسەر سەلسەبیل گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ چەرخێ کەچ رەفتارە وا وەیلا! کو ئەز حەیران کرم سەر ب گەردان بووم وەلێکن زێدە سەرگەردان کرم بێ دل و عەقل و هەوەس جارەک کو بێ ئزعان کرم زێدە ڤێ بێ مروەتێ ئەڤ ڕەنگ کو ئەز تالان کرم گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ زینهار ئەی دۆستان وەقتێ بکم ئەز هجرەتێ ڤان دو مسراعان کتابەت کن ل پەرکێ کاغەتێ دا د دەست من دا سەنەد بت ئەو د بەیتا ئاخرەتێ عەرزوحالێ من ببت مەزموون ژ حینا حەزرەتێ گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ خانییا ئەڤ هەرزە گۆیی وە خەتاء و نە سەواب خێر ژ تە سادر ببن ئەی بێ ئەدەب ئەی بێ حجاب ئەڤ قەزایا بارییە رازی ببە ئەی مال خراب بەلکی بیتە مووجبێ ناری ژ بۆ تە ئەڤ جەواب گەر بزانم ئەز د حەشرێ دا نەبینم دلبەرێ دێ چ لێ کەم جەننەتێ پێ وەر بکەم خاکستەرێ ++++++++++++++++++++++ سەرناو: دلۆ ڕابە خوە دلخوەش کە هلۆ دا بچینە سەیرانێ دلۆ ڕابە خوە دلخوەش کە، هلۆ دا بچینە سەیرانێ وەرە جارەک تو خوە ب وەش کە، بچین سەیرا گولستانێ گولستانا کو سۆرگول تێ، سەمەن نەسرین و سونبول تێ هەزار بولبول ب غولغول تێ، د فەسلا ماهێ نیسانێ د فەسلا جادوی نیسان، مە دی بوو دلبەرەک دیسان ب دل مەشعەل چرا ئیسان، مە جان دا شوبهی پەروانێ مە جان دا دلبەرەک سادە، لەتیف و شۆخ و بەگزادە ژ قەیدان کرمە ئازادە، نهان خوەندیمە دیوانێ نهانی خەلوەتەک دا من، ژ لەعلان شەربەتەک دا من ب وەسلێ سوحبەتەک دا من، کرم بەندە د فەرمانێ د فەرمانێ کی سادق بت، ئو ناخوازی مونافق بت دڤێ هەردەم موافق بت، وەکی شەیخێ د سەنعانێ وەکی شەیخی د هادر بت، د فەرمانێ دە نازر بت ب ئەمرێ دۆستێ کافر بت، بسۆژی سوحفێ قورئانێ دسۆژم سوحفێ مەکتووبە، ب ئەمرێ یار و مەحبووبە دەما دل دەم ب مەتلووبە، ددەم ئەز دین و ئیمانێ ئەگەر دلبەر مەجازی بت، ژ ڕەنگێ لبسێ غازی بت بلا سووفی نەرازی بت، بمینە ئەو د حرمانێ بنێ سووفی قەوی دینە، وەکی خەففاشێ مسکینە ل نک وی ڕۆژ تو ڕەنگ نینە، چو نابینت ژ عومیانێ دلێ وی کۆرە ئەعمایە، ژ وەسلێ دوورێ دامایە ل بەر وی دەرگە دادایە نەهشتە بێتە دیوانێ د دیوانا کو قەرقەف تێ، ب بەزما هەر نەی و دەف تێ مەلائک سەد هەزار سەف تێ، ئەزم یێ هاتی مەیدانێ ئەزم سەرخوەش ژ وێ جامێ، ئەزم سەودا د نێڤ عامێ ئەزم عەنقا کەتی دامێ، ب زولفا سەر ل خال دانی ب زولفا هاتی سەر خالان، بنەفشا تیتک و ئالان دل و جانێ مە عەبدالان، دبت دیسا ب تالانێ د تالانا کو سەد سەر چوون، هەزاران گەنج و گەوهەر چوون دلێ سەد پارە کەرکەر چوون، تو خانی بەس کە ئەفغانێ ++++++++++++++++++++++ سەرناو: هەڕۆ سەد جار ژ ئولفا وێ دبم کەیفێ ل مەیخانێ هەڕۆ سەد جار ژ ئولفا وێ، دبم کەیفێ ل مەیخانێ ڤەبیر من تێت زولفا وێ، دنالم ئەز ژ هجرانێ ژ سەهما عەقرەب و ماران، دنالم ئەز گەلی یاران ژ چەهڤان خوون دچیت باران، وەکی ئەو تێنە لێکدانێ وەکی ئەو تێنە سەر بالان، ببینن نوقتە و خالان بنەفش و تەرحێ ئالالان، د سەر دا ماهێ تابانی د سەر دا ئەو مەها ئەنوەر، ژ رەیحان سونبولان دا سەر کرم سەودا و هەم ئەبتەر، ژ من دل بر ب تالانی ژ من دل بر ئەڤێ جارێ، کو من دی قامەتا یارێ وەکی سەلوێ ل جۆبارێ، ڤەمەشیا هاتە ئەیوانێ ڤەمەشیا یا سفەت حووری، ژ ڕەنگێ سۆرگولا ژۆری رحێ شێرین دکەم گۆری، ژ بۆ خالێ و نیشانێ ژ وان خالان تەجەللێ دا، عەتارود بوو د بورجێ دا دلێ من کێزمەیەک لێدا، ب شیر ئەو هاتە مەیدانێ ب شیر هات ئەو پەری پەیکەر، شەڤی ماها تژی ئەنوەر ل من دا باتنی خەنجەر، دنالم ئەز ژ ئێشانێ ژ وی دەربی یێ گێژم ئەز، شوبی بلبل دبێژم ئەز ژ چەهڤان خوون دڕێژم ئەز، وەکی تاڤێ ت بارانێ ژ چەهڤان خوین دبارینم، ژ عشقا تە ئەزێ دینم شوبی فەرهاد و مەجنوینم، دبێم: لەیلا گەلۆ کانێ خەریبم ئەز ژ لەیلایێ، نەهن وەک تە ل دونیایێ بچیتە بیتە زیبایێ، کو عاشق وێ د زیندانێ کو عاشق وێ دنالیتن، شەڤ و ڕۆژان دکالیتن ژ چەهڤان خوون دمالیتن، مەجالە بێتە زۆزانێ مەجالە مە نەکر کارەک، ل سورمە وێ هەبوو مارەک ڤەڕێکەم ئایەتێ جارەک، د گەل بایێ شەبستانێ د گەل بایێ سەحەرخێزێ، ببێژە عەنبەر ئامێزێ تە عاشق کوشت ب ڤێ ڕێزێ، بکە لوتفێ و ئحسانێ کو من دی بوو ل سەر بانی، دبێژت: ئەحمەدێ خانی بدە رووحێ د گەل جانی، دبێژم ئەز: بگر.. هانێ! ++++++++++++++++++++++ سەرناو: ئیرۆ ل تەختێ دلبەرێ یا رەب چ شێرین ئەسمەرە ئیرۆ ل تەختێ دلبەرێ، یا رەب چ شێرین ئەسمەرە ژێ نابتن من دلبەرێ، ئەو دلبەرە یا دل بەرە دل بوو کو بریا جانە ئەو، دین بوو وە یا ئیمانە ئەو هەم لوتفە هەم ئحسانە ئەو، هەم لاڤە هەم گەردەن زەرە کاکول ژ بەر تاجێ ب زەر، تا تا وەکی پڕ بێنە دەر سەرعەسکەرێ تیپا تەتەر، سەردارە یانە سەروەرە یا رەب حەبیبا ڕەنگ فەلەق، جۆرێ تەتەق داگرت شەفەق یا بەلگێ نوورە یا وەرەق، یا قشتە یانە چەنبەرە زولفن گەلۆ پوڕ پێچ و خەم، یا سونبولا باغێ ئرەم زنجیرە یا سەر تا قەدەم ڕەشمارە یانە ئەژدەرە ئەو توررە یا گیسۆنە ئەو، زەنجینە یان هندۆنە ئەو شوترینە یا شەببۆنە ئەو، یان تۆغ و شاهێ سەنجەرە ئەبروونە یا مەه بوو هلال، هندۆنە یا نیشان و خال گیسۆنە یا حەزرەت بلال، مەشغوولێ ئەللاه ئەکبەرە چاڤن گەلۆ یا سەرخوەشن، ەشن ڕ یا کافرن یا دل بیمارن ئەو یا نەخوەشن، یا نەرگسە جادووگەرە روخسارە یا رەب یا قەمەر، گوفتارە یا رەب یا گوهەر ئەو قەیدە یا رەب یا خەبەر ئەو شەهدە یانە شەککەرە ڕوونە گەلۆ یا وەردێ ئال، ئالالە یان دێما ب خال قندیلێ نوورا ذو الجلال، مرئاتە یانا مەزهەرە دێم شووشە نوورا حەق د ناڤ، دەو غونچەیا شێرین گولاڤ روخ وەردێ گول ڕەنگین خوناڤ، خال بسک و نیشان عەنبەرە لێڤن گەلۆ یا قووتێ جان، یاقووتە یا قووتێ رەوان یان قۆتییا دورجا دوڕان، یان حەوزە یانە کەوسەرە یا رەب خەتێ رەیحانییە، سەر سوورەئێ قورئانییە یان خاتەما سولتانییە، فەرمانە یانە دەفتەرە خالن گەلۆ یا فولفلن، ئەو عارزن یان سۆرگولن ئەم عاشقن یان بولبولن، زکرێ مە وەردا ئەحمەرە ئەو گەردەنا شوبهی شەمال، سەرچەشمەیا ئاڤا زەلال قاروورە یا خەمرا حەلال یا شووشەیە یا شەککەرە یا رەب قەدا زیبایە ئەڤ، یان کەعبەیا عولیایە ئەڤ یان مسجد الأقصىیە ئەڤ، یان سدرە یانە عەرعەرە یا رەب دلێ دیوانەیە، یا عاقلێ فەرزانەیە یان بولبولێ وێرانەیە، یان عوودە یانە مەجمەرە ئەو خانییێ دل دادەیە، مەشرەب ژ بەنگ و بادەیە دەردێ وی یارەک سادەیە، لەو هەر زەعیف و ڕەنگ زەرە ++++++++++++++++++++++ سەرناو: زاهدێ خەلوەت نشین پابەستێ کردارێ خوەیە زاهدێ خەلوەت نشین پابەستێ کردارێ خوەیە تاجرێ رحلەت گوزین دلدارێ دینارێ خوەیە عاشقێ دلبەر حەبین دلدایێ دلدارێ خوەیە دا بزانی هەر کەسەک بێ شوبهە غەمخوارێ خوەیە بێ عەمەل تو ژ کەس مەکە هیڤی عەتاء و هممەتێ بێ غەرەز ناکێشتن قەت کەس ژ بۆ کەس زەحمەتێ کەس نەهن قەت هلگرت بارێ تە ئەو بێ ئوجرەتێ گەر چ عیسا بت ئەوی فکرا کەر و بارێ خوەیە هۆشیار بی! دا نەکی عومرێ خوە بێ حاسل تەلەف لەو کو نادەت فایدە مال و گەنج و ئەولاد و خەلەف ماجەرایا خزر و دیوارێ یەتیمی بوو سەلەف ڤی زەمانی هەر کەسەک معمارێ دیوارێ خوەیە جا نەزەر کە تو ب پێلا کو وە واقع بت سواش گەر نەبیتن ئلتفات و مۆچە و دەبر و مەعاش جندییێ رمبازێ فارس نادەتن جانی بەلاش ساعەتا سەربازییێ هیڤی ژ سەردارێ خوەیە خانیا زایع نەکەی عومرێ خوە ئەی نادان عەبەس بێ تەلەب نابی ژ وەسلێ بەهرەمەند ئەی بوولهەوەس سانعێ موتلەق کو نینە ئحتیاجەک وی ب کەس لوتف و ئحسان ژی ئەوی دەرحەق تەلەبکارێ خوەیە ++++++++++++++++++++++