شاعیر: نالی
کتێب: دیوانی نالی
سەرناو: دەروونم پڕ کەباب و دەردە بێ تۆ

دەروونم پڕ کەباب و دەردە بێ تۆ
دڵم گەرمە و هەناسەم سەردە بێ تۆ


خەریکی شەش دەری هات و نەهاتم
خەلاسیم قەت نییە لەم نەردە بێ تۆ


لیباسم ماتەمە، شینە، لە شیندام
سوروشکم سوورە، ڕەنگم زەردە بێ تۆ


عەزیزم! دڵ ڕەقە و، خۆم فەرد و تەنهام
دەترسم بمکوژێ ئەم دەردە بێ تۆ


بە بێ دیداری تۆ خۆ لاڵە نالی
عەجەب هەستاوە ئەم چەن فەردە بێ تۆ!

++++++++++++++++++++++