شاعیر: نالی
کتێب: دیوانی نالی
سەرناو: لە دوگمەی سوخمە دوێنێ نوێژی شێوان

لە دوگمەی سوخمە دوێنێ نوێژی شێوان
بەیانی دا سفیدەی باخی سێوان


لە خەوفی تەلعەتی ڕۆژ هەروەکوو شێت
بە ڕووزەردی هەڵات و کەوتە کێوان


دو چاوی من کەوا کەیلی سوروشکن، 
دەپێون ئاوی بەحری خوێ بە پێوان


مەکەن لۆمەی پەشێوی دڵ کە ئەمشەو
پەشێواوە لەبەر پەرچەم پەشێوان


شەرابی لەعلی ڕوممانی لە نالی
حەرامە بێ مەزەی ماچێکی لێوان

++++++++++++++++++++++