شاعیر: نالی
کتێب: دیوانی نالی
سەرناو: دڵ دەڵێ سەیری چەمەن خۆشە جەوابی نادەم

دڵ دەڵێ سەیری چەمەن خۆشە، جەوابی نادەم
موددەتێکە لە قەفەسدایە، عەزابی نادەم


مەجلیسێکی چەمەن و بولبول و بەزمی گول و مول
بە دوسەد مەدرەسە و دەرس و کیتابی نادەم


گوتم: ئەی ماه، دڵی من بە دڵی خۆت بکڕە! 
گوتی: من بەردی بەقیمەت بە کەبابی نادەم


گۆشەگیرم لە برۆت و، موتەوەححیش لە موژەت
ڕۆحی شیرینم ئەبەر شیر و قولابی نادەم


تەڵەبی سینەیی چاکم مەکە بەو چاوانە
سینەکەم چاکە بە ئینسانی خەرابی نادەم


نالیا ئەم غەزەلەت تازە بە تازە وتووە
بە دووسەد «مەسنەوی» و «لوببی لوباب»ی نادەم

++++++++++++++++++++++