شاعیر: نالی
کتێب: دیوانی نالی
سەرناو: مەکە ئیخلافی ئەو وەعدەی کە فەرمووت

مەکە ئیخلافی ئەو وەعدەی کە فەرمووت
دەخیلت بم کە خانەی سەبرەکەم سووت


لە ڕووت و قووتی وەک من ڕوو[ت] مەپۆشە
کە وەسڵی تۆیە قووتی عاشقی ڕووت


موژەت قوللابییە هەم تیر و هەم شیر
برۆت میحرابییە هەم تاق و هەم جووت


لە سندووقی پڕی سینەم بترسە
کە ئاگر بەر بداتە تەخت و تابووت


لەبەر خەندەی لەبی لەعلی ئەتۆ بوو
کەوا شەککەر دەباری، گوڵ دەپشکووت


دەکەی نەخچیری سەد دڵ هەر بە تیرێ
ئیلاهی هەر بمێنێ دەست و بازووت! 


چ شیرینە خوتووتی دەوری لێوت
بەڵێ مەعلوومە خۆشە خەتتی یاقووت


هە نالی! بەڵکوو بیکێشی بە ناڵین
بناڵە، دامەنیشە مات و مەبهووت

++++++++++++++++++++++