شاعیر: عەبدوڵڵا پەشێو
کتێب: بەرەو زەردەپەڕ
سەرناو: پیری
سەبارەت: (١٩٩٩/٥/٣ - هێلسنکی) - نووسین: ناشناس - سەرچاوە: https: //t. me/abdulla_pashew

کاتێ، جاران
تەمی خەمێک، 
لە سەد پێچ و کەنارەوە، 
شەپۆل‌ شەپۆل، 
قەف قەف دەهات، 
دایدەگرتم بە ترۆپک و بنارەوە

بیرم لەوە دەکردەوە
کە سەودایەک، عیشقێکی نوێ..
سبەی بە داری عومرەوە
گۆپگە دەکا و دەپشکوێ

کەچی ئێستا، 
کە دڵتەنگی قانگم دەدا، 
کە دەبینم ئێجگار ماتم
بیر لە جوانێک دەکەمەوە، 
کە فڵان ساڵ، 
لە فیسار جێ تووشی هاتم! 


ترۆپک: قوللە، کۆپ، کمت، لووتکە، تۆقەڵە
گۆپکە: پشکۆ، چرۆ؛ گۆی مەمک
قانگدان: دەرپەڕاندنی گیاندار بە دووکەڵ

++++++++++++++++++++++