شاعیر: عەبدوڵڵا پەشێو
کتێب: بەرەو زەردەپەڕ
سەرناو: داگەڕان
سەبارەت: (١٩٩٦/١٠/١٤ - هێلسنکی) - نووسین: ناشناس - سەرچاوە: https: //t. me/abdulla_pashew

ئێوارەوەختە، 
تا چاو بڕ دەکا دەورم ڕووتە
لەم دنیایەدا
من تەنیا خەونی ژوانی تۆم ماوە... 

خەونی ژوانی تۆ
بۆ من سەرابی شینکە و قۆپەنە، 
گڵۆڵەتیشکی سەربەرەوخوارە، 
بەری ئاوداری بڕکی تەمەنە

لێ گەڕێ، گیانە! 
دەبا ئەم خەونە
هەر بجریوێنێ و بچریسکێتەوە
دەستی لێ مەدە، مەیشڵەقێنە، 
با هەر درێژ بێ، 
با هەر درێژ بێ و قەت نەبڕێتەوە
***

مەرگی ئەم خەونە
ڕەنگان ناهێڵێ و
دنیا پڕ لوورە و شەختە و
ڕم دەکا
خۆر لە گۆی زەوی دەشارێتەوە، 
ئەستێران نوقمی تەپونم دەکا
***

ئەدرەسی خۆمت دەدەمێ
بەڵام ڕچە قەت نەشکێنیت
ڕێگەی جێژوان گوڵڕێژ دەکەم
بەڵام نەکەی بێیتە ژوانم
بەیداخی سپی هەڵدەکەم! 

دڵت بەرد بێ! 
گوێ نەدەیتە چۆکدادانم
گرمەم دێ و چەخماخە دەدەم
خۆت نەبان کە... 
لە ڕهێڵەم... 
لە زریانم
ئەگەر زۆر زۆر بیرت کردم، 
جار جار وەرە بن ساباتی خەونەکانم!

++++++++++++++++++++++