شاعیر: عەبدوڵڵا پەشێو
کتێب: بەرەو زەردەپەڕ
سەرناو: پایز
سەبارەت: (هاوینی ١٩٩٥ - کۆرسۆ) - نووسین: ناشناس - سەرچاوە: https: //t. me/abdulla_pashew

پێش ئەوەی وەکوو دەنکێک زەردەلووی تەنیاجێماوی
چڵۆپکی دارێ، 
بای پایز لێم دا، 
لەپڕ ترپەم بێ و بکەومە خوارێ

ڕەخشی خەیاڵی مەودابەزێنم، 
وەک با، تاو دەدەم، 
سەر لە لانەی باز، 
لە لووتکەی قیتی بەر هەتاو دەدەم، 
ڕێ لە زریان و برووسکە دەگرم، 
دەچمە بەر ڕێژنە و
شۆڕابەی نەوی

لێیان دەپرسم: 
ئاخۆ لە کوێ بم، 
کاتێ ترپەم دێ و 
دەکەومە زەوی! 


فەرهەنگۆک: 
زەردەلوو: قەیسی
چڵۆپک: ترۆپک، چڵەپۆپە، بڵندترین چڵی دار
ڕەخش: هەسپە بەناوبانگەکەی ڕۆستەمی زاڵ
ڕێژنە: لێشاوی باران، ڕەگباری باران
شۆڕابە: ئاوی باران کە لە بانی ماڵ و بەرزاییەکانەوە دەڕژێتە خوار

++++++++++++++++++++++