شاعیر: عەبدوڵڵا پەشێو
کتێب: بەرەو زەردەپەڕ
سەرناو: دوودڵی
سەبارەت: (‌١٩٩٣/١٠/١٣ - مۆسکۆ) - نووسین: ناشناس - سەرچاوە: https: //t. me/abdulla_pashew

نیوەشەوێ
لەبن ڕێژنەی 
هەوای تەزوو و برووسکەدا ژوانم هەیە. 

کە دەیگەمێ؛ 
لەپی دەستێک بۆ ناو تۆفان گەمیەم دەبێ، 
بەژنێک شیعر و تریفە و بۆن تێم دەئاڵێ
کۆشێک داڵدەی هەنیەم دەبێ. 

بۆ دوودڵم؟ 
ئەگەر نەچم، 
کێ دەزانێ، 
لەم عومرە کورتەی کە ماوە، 
کەنگی دیسان ژوانم دەبێ؟ ! 
کێ دەزانێ
کەی شێتی باڵم پێ دەگرێ و
جارێکی تر دەرفەتی سووتانم دەبێ؟ !

++++++++++++++++++++++