شاعیر: عەبدوڵڵا پەشێو
کتێب: دیوانی برووسکەچاندن
سەرناو: دووبەرەکی
سەبارەت: (١٩٨٧/١٢/٢٠ - تەرابلوس) - نووسین: ناشناس - سەرچاوە: https: //t. me/abdulla_pashew

شەو لە خەوما
ئارامگەی حاجیم١ دیتەوە. 
چۆکم دادا، سوژدەم برد بۆی. 
گوتم: 'حاجی، پەرێشانین! '
سەری کز کرد، 
دەستی دانا سەر دڵی خۆی. 
گوتی: 'مەرد بە، زیندووم کەوە! '

گوتم: 'گەورەم، 
من عیسا نیم، 
چۆن زیندووت کەمەوە، بێژە'؟ 
گوتی: 'لێرە دەرم بێنە، 
دووبەرەکی
لە شوێنەکەی من بنێژە! '


١. حاجی قادری کۆیی، شاعیری نەتەوەییی کورد

++++++++++++++++++++++