شاعیر: عەبدوڵڵا پەشێو
کتێب: دیوانی برووسکەچاندن
سەرناو: کۆنگرەی شووشان
سەبارەت: نووسین: ناشناس - سەرچاوە: https: //t. me/abdulla_pashew

دوێنێ کۆنگرە بوو... 
کۆنگرەی شووشان بوو
هەر وڵاتێک و شووشەیەکی نارد
هەر شووشەیەک و
بەسەرهاتی خۆی پوختە گێڕاوە: 

چەند قاوەخانە و چەند ماڵ گەڕاوە، 
لەسەر چەند مێزان تاج لەسەر بووە، 
چەند دەمی دیوە و چی تێ کراوە! 

پێش ئەوەی کۆنگرە کۆتایی پێ بێ
بوتڵێکی ڕەشی
لە سپێدەوە کڕ و کپ و مۆن
قوت بۆوە و هاتە بەردەم میکرۆفۆن: 

'خوشکان، برایان! 
من وەکوو ئێوە سەربردەم نییە، 
نە مێزم دیوە، نە کۆڕی یاران
نە گەشتی لادێ، نە باڕی شاران

ڕاستیتان دەوێ؟ ! 
ئەو ڕێیە دوورەم بۆیە بڕیوە
تا پێتان بڵێم: 
من شووشەی بەعسم
لە پاش و پێشی مرۆڤ بترازێ، 
هیچم نەدیوە! '


(١٩٨٦/١/٣٠ - تەرابلوس)

++++++++++++++++++++++