شاعیر: عەبدوڵڵا پەشێو
کتێب: دیوانی برووسکەچاندن
سەرناو: گومان
سەبارەت: (١٩٨٣/١٢/٢٦ - پراگ) - نووسین: ناشناس - سەرچاوە: https: //t. me/abdulla_pashew

بۆچی هێندە لە هاتنەوەم بە تالووکەی؟ 
بۆچی دیسان لە دەروازەی گومان دەدەی؟ 
کێ دێ گلم بداتەوە؟ 
کێ دێ لە تۆم بڕفێنێ؟ 
تۆ نەبیت، لەم دنیایەدا، 
بێپەنایەکی وەکوو من، 
چ خەمخۆرێک داڵدەی دەدا؟ 

بۆچی هێندە لە هاتنەوەم بە تالووکەی؟ 
پەلەی چیتە؟ 
هەتا لێت دوور بم باشترە. 
وا نامۆیی دەرسی ئەشقم پێ دەخوێنێ. 
سۆزی دووریت
پەڕ و باڵی برووسکەییم لێ دەڕوێنێ! 


فەرهەنگۆک: 
تالووکە: پەلە، لەزوبەز، هەشتاو، دەستوبرد، جەخت
گلدانەوە: هێشتنەوەی شتێک لەلای خۆت
داڵدە: پەنا و پشتیوان

++++++++++++++++++++++