شاعیر: عەبدوڵڵا پەشێو
کتێب: دیوانی برووسکەچاندن
سەرناو: مەزاد
سەبارەت: (١٩٨٠/١٢/١٩ - مۆسکۆ) - نووسین: ناشناس - سەرچاوە: https: //t. me/abdulla_pashew

کێ کڕیارە؟ 
هەرچیم هەیە
هەمووی تاڵانفرۆش دەکەم. 
کێ کڕیارە؟ 

دەی، وەرنە پێش! 
فەرموون: ئەمە کالانەی چاو، 
بڕبڕەی پشت و کاسەسەر، 
کڵاوی کەریم خانی زەند، 
شیر و زرێی سەلاحەددین، 
مێژووی لنگەوقووچی بێبەر، 

یەکە یەکە، 
بەندەکانی پەیمانی مۆرفینی سیڤەر، 
دەندەکانی نیاندرتاڵی
پیرەئەشکەوتی شانەدەر! 

***
کێ کڕیارە؟ 
هەرچیم هەیە، 
هەمووی تاڵانفرۆش دەکەم: 

سواڵەت و ئاتەشکەدە، 
دیوانسەرای شاهەکانمان
بە بنچینە و بنادیەوە، 
بەردەنووس و نەخش و نیگار
بە تەخت و تاجی مادەوە... 

مەزاد... مەزاد... 
هەرچیم هەیە، هەمووی مەزاد... 
بە پارچەیەک پەڕۆی سادە، 
کە هەڵبکرێ و بشنێتەوە
لەسەر بستێک زەویی ئازاد! 
مەزاد... مەزاد... 
هەرچیم هەیە... هەمووی مەزاد! 


فەرهەنگۆک: 
* مەزاد: (مەزات)، هەڕاج
* کالانە: چاڵاییەک کە گلێنەی چاوی تێدایە
* بڕبڕە: ئێسکی زنجیرەدانی داری موورغەی پشت
*  پەیمانی سیڤەر: ٩٦ ساڵ لەمەوبەر، پەیماننامەی “سیڤەر” لەنێوان براوەكانی جەنگی جیهانی یەكەم‌ و دەوڵەتی عوسمانیدا واژۆكرا، ئەم پەیمانە هەلی بۆ گەلی كورد ڕەخساند، داوای مافی خۆی‌ و دروستكردنی قەوارەیەكی سەربەخۆ بكات، بەڵام پێش ئەوی جێبەجێ‌ بكرێت، پەیماننامەكە لەباربرا. 
* شانەدەر: ئەشکەوتێکی گەورەی نێزیک مێرگەسووری سەر بە هەولێرە. لە ١٩٥١دا هێسکوپرووسکی نیاندرتاڵی تێدا دۆزرایەوە. 
(پیرەئەشکەوتی شانەدەر): ئەشکەوتە کۆنەکەی شانەدەر
* سواڵەت: ئەشکەلک، پارچەی دیزە و گۆزەی شکاو

++++++++++++++++++++++