شاعیر: عەبدوڵڵا پەشێو
کتێب: دیوانی فرمێسک و زام
سەرناو: شەوەزەنگ
سەبارەت: (١٩٦٦ - هەولێر) - نووسین: ناشناس - سەرچاوە: https: //t. me/abdulla_pashew

گیانە، وا شەو درەنگە
زەمین کپ و بێدەنگە
بەرپەنجەرەی ڕووناکت
بەرنادەم، شەوەزەنگە

تاکوو نەتگرمە باوەش، 
ئەی گوڵی ئاواتی گەش! 
* * *
زۆر بە ئازارم ئەمشەو
لە چاوانم دوورە خەو
بۆ خەوی باوەش هاتووم
بۆیە، گرەو بێ... گرەو

واز نەهێنم، دیدەگەش، 
تا تێر نەتگرمە باوەش! 
* * *
وەرە دڵ پڕ نەوا١ بین، 
لەژێر پەردەی شەوا بین، 
لە چۆڵی خەم هەڵفڕین، 
مەستی جوانیی دنیا بین

تەنیا دەمێ، دیدەگەش، 
یەکتر بگرینە باوەش! 
* * *
ڤینۆسم، خواوەندەکەم، 
بژیێنەوە خەندەکەم! 
ژینم فیدای ئەو ساتەی
دەشکێنی پێوەندەکەم

بە سکاڵای دیدەی گەش، 
بە چرپەچرپی باوەش! 
* * *
شەوقی نزمی ئەستێرە
سەما دەکا بۆ ئێرە، 
بە خەندەی پڕ بەزەیی
چاو هەڵناگرێ لێرە

تا من و تۆی دیدەگەش، 
یەکتر نەگرینە باوەش! 


١. نەوا: ئاواز، پەنا، داڵدە، ئارامگە، جێی حەوانەوە

++++++++++++++++++++++