شاعیر: عەبدوڵڵا پەشێو
کتێب: دوانزە وانە بۆ مناڵان و چەند شیعرێکی قەدەغە
سەرناو: وانەی دووەم
سەبارەت: نووسین: ناشناس - سەرچاوە: https: //t. me/abdulla_pashew

مناڵەکان
ئێمە تووشی سەد کوێڕەڕێین... 
چرای بیرمان گەلێک کزە
هەنگاوی کوێرانە دەنێین! 

مناڵەکان! 
ئەفسانەکان دەگێڕنەوە: 
هەبوو.. نەبوو
هۆزێک هەبوو لە خاکێکا
پاڵەوانیان چاوی کوێر بوو
هەوای دەورەی خۆی دەپێکا. 

فەیلەسووفیان
فاڵچییەک بوو
شەوان فاڵی دەگرتەوە
تا بزانێ کەی دوژمن بۆی
پەت دەخاتە گەردنی خۆی. 
پیاوماقووڵیان
کەڕ و ڵاڵ بوو
ماوەی کورتی ئارامیشی هەزار ساڵ بوو! 

هۆزی نەگبەت
شەوی دەژمارد
ڕۆژی دەژمارد
سێ ژەم نان و چەپڵەی دەخوارد
چاوەڕێ بوو کە دوژمن بۆی
پەت بخاتە گەردنی خۆی! 


* یەکەم جارە چاپ دەکرێ، پایزی ١٩٨٠، لە ڤیەننا، هاوڕێم د. کوردۆ عەلی وەبیری هێنامەوە.

++++++++++++++++++++++