شاعیر: عەبدوڵڵا پەشێو
کتێب: دوانزە وانە بۆ مناڵان و چەند شیعرێکی قەدەغە
سەرناو: بۆردومان
سەبارەت: نووسین: ناشناس - سەرچاوە: https: //t. me/abdulla_pashew

دوا ئەستێرە
نوقورچێکی
لە کەلەکەی گوندەکەم دا
خۆر، وەک جووچکە، 
هێلکەی ئاسۆی ترووکاند و
گەسکی تووکی خۆی لە تەم دا

لەو کاتەدا پۆستە گەیشت... 
پۆستەی ڕەشی بەغدا گەیشت
نامەی گڕ و ساچمەی هێنا
بۆ ئەو گوندەی خونچەکانی
هەڵنەسابوون لەناو نوێنا... 
لەودیو هەوران
تۆزێک خڵتەی ویژدان مابوو، 
تا ئەوەشی لەبن پێ نا! 

ئێستاش دەگێڕنەوە و دەڵێن: 
بێشکەیەکی لاسووتاوی... تەنیا جێماو، 
بە کوڵ دایە پڕمەی گریان
بۆ کانییەک گڕوگاڵی
تا هەتایێ خەفەکراو

ئێستاش دەگێڕنەوە و دەڵێن: 
لەو کاتەدا
زەوی گریا، 
ئاسمان گریا، 
ئینجیل گریا، 
قورئان گریا، 
گریا... گریا... 
هەموو شتێک، بێدەنگ گریا

تەنیا لەناو مناڵدانی ئافرەتێکا
گیانێکی نوێ چاوی پشکووت، 
نیگای گێڕا و لەپڕێکا
لەناو مشکیی دوای دۆزەخا
ترووسکایی ڕابوونێکی تازەی پێکا


(١٩٧٣ - ١٩٧٢، کوردستان)

++++++++++++++++++++++