شاعیر: عەبدوڵڵا پەشێو
کتێب: شەونامەی شاعیرێکی تینوو
سەرناو: هۆنراوەم ئاوزینگ دەدا
سەبارەت: (١٩٧٢ - کوردستان) - نووسین: ناشناس - سەرچاوە: https: //t. me/abdulla_pashew

گەر حەز دەکەن
سەرینی مناڵەکانتان
گوڵمێخەکی لەسەر شین بێ، 
دەوروپشتی بێشکەکانیان
پڕ لە خەونی بەفرڕەنگی ئارمووشین بێ، 
دەسرازەیان-
پەلکەزێڕینەی ئاسمان بێ، 
دڵی مەسیح-
بووکەشووشەی یارییان بێ، 

گەر حەز دەکەن
ڕەزەکانتان پڕ مێوە بن، 
خۆر لە لافاوی خەندەتان بخواتەوە، 
هەوری گران
نامە لە کێڵگەکانتان نەبڕێ و 
پێڵووی خاوی کانییەکانتان هەڵداتەوە
بەرەڵڵا کەن، بەرەڵڵا کەن
ئەو باڵندەیەی... هێلانەی
لەسەر زمانم کردووە
بەرەڵڵا کەن!

++++++++++++++++++++++