شاعیر: عەبدوڵڵا پەشێو
کتێب: شەونامەی شاعیرێکی تینوو
سەرناو: بۆ کچێکی کاڵ
سەبارەت: (١٩٦٨/١٠/٢٨ - هەولێر) - نووسین: ناشناس - سەرچاوە: https: //t. me/abdulla_pashew

لە دوورەوە ناوت بیستووم
ناشارەزا خۆشت ویستووم
گوایە لەگەڵ شیعرەکانما زۆر ژیاوی
شەوەهای شەو؛ 
تەزووی شیرینیان پێ داوی... .

نەتناسیوم؛ 
بڕوا بکە نەتناسیوم... 
ئەو جیهانەی تۆ دەتەوێ
هەرگیز لای من دەست ناکەوێ. 
جیهانی من هەمووی خەمە
زەردەخەنەی یەکجار کەمە
تەلاری من کەلاوەیە
جێی پەڕتووک و هۆنراوەیه. 
ئەوەی ڕووگەی دڵ و چاوە
تەنیا بتێکی شکاوە... .

دوور بە لە من
لە ژینی من
لە چاوانی بەدبینی من
دوور بە لە من، لە هەڵبەستم، 
لەو چەپکانەی ١
بۆ شاچەپکێک دەیانبەستم... 


١. چەپک: دەستێک لە گوڵ و گیا

++++++++++++++++++++++