شاعیر: ڕێوار ئاودانان کتێب: ئیکارۆس، ئەڵۊەکەێ بێ‌تاشا سەرناو: نەڤیین دووس سەبارەت: نووسین: ئاوات ــ نەڤیین دووس منێ ڤە چە؟ ــ گوڵەفتاوێ دەناو کەڕەپیی خەس. ++++++++++++++++++++++ سەرناو: پێشکەش ڤە ئەۊ کەسە ک ئەژ زۆن داڵکیی خوەێ ڤای! سەبارەت: نووسین: ئاوات ئاخ دۆن‌کیشۆت! سووارخاس ڕاسەکییش ئەگەر بوویی ئەڵ کووڵ ئی ئەسپ چوویینە بڕ شوونێک نەێکەری. نەچوو! نەژنەفتینە هەر کەسێ ئەژ خوەێ بوواێ دووە ئەۊ باێ هەمیشە ئەڕاگێڵە ک چارەنڤیسە گەنەکەێ گومەۊ ‌بیین دەناو پێچەڵپێچ لاڕێیەلە؟ ! ++++++++++++++++++++++ سەرناو: دە وڵام شارانگەردێ ک ناو و نیشان وڵاتەکەم پرسی سەبارەت: نووسین: ئاوات خوەرهڵات ناوڕاس شوونەزاێ خوداژنەیل دڵنەرم چیا و خودایل گرژ و تووڕەێ چووڵگەس؛ شوونەزاێ فریشتەیل باڵ‌شکیاێ و 'پرۆمتە'ـیلێگە ک پەڕە وە پەڕەێ پرتووک چارەنۊسێیان خاچ و ئەشکەنجە و شاروەدەرییە. خوەرهڵات ناوڕاس مەڵوەن هزارەیل دۊرتر زەردەخەنە و هەڵپەڕکە و ئاواز ئوو هزارەیل نزیک‌تر ئرمس و پەژارە و ئاهـ مەڵوەن نەفت و ئاگر و گڕەتینگی ئوو گوڵە مزگانییەیل ک لە وهاران بێ‌وارانیش ژە خۊن ئێمە ڕووڵەیلێ سەر ئەڵارن. ئێمە فرەێمن و ناو گردمان 'ئینانا' و 'ئیشتار' و 'ئافرۆدیت'ـە ئێمە فرەێمن و ناو گشتمان 'دومووزی' و 'تەمووز' و 'ئادۆنیس'ـە وەێرە ک وراز جەنگ هەمیشە هەڕەشە و گوڕەشە ئەڵ ئەوین کەێ و ڕەنگینییەگان باخ کوشێ! وەێرە ک 'ئازادی' دار ژیانە و دجارە لە خوڵەکووان دڵەیلمان چۊزە دەێ و پەل کیشێ! ++++++++++++++++++++++ سەرناو: کێیم؟ سەبارەت: نووسین: ئاوات کوتێ ژە م، چیاێ سەهۆڵە سەردسڕ و کوتێ تر، خوەرەتاوێگ ک دۆکوت شەوارانیش ئاوا نیەود! ++++++++++++++++++++++ سەرناو: پەژارەێ ئازادی سەبارەت: نووسین: ئاوات لەێرە دە نیشتمانەگەم کوردستان ئەڵ سەر و پرچ دارەل و بێ‌دەنگیی دیوارەل ئەڵ ئاماژەێ دیار پێڵەل و شەو قیرتاو ڕێیەل ئەڵ ناوچاوان بەرز چیا و بێ‌گەردیی گڵاڵەل ئەڵ کراس وەفر و لەش وا ئەڵ پەڕەیل ئاگر و دیرووک خاک خۊن ئەڵپشیاگە؛ لەێرە دە نیشتمانەگەم کوردستان سێ‌هزار ساڵە ک ئازادی وە بێ‌هچان ئەڕا گیانەیل زامدارمان ئاهـ ئەڵکێشیاگە! ++++++++++++++++++++++ سەرناو: ئیسفا سەبارەت: نووسین: ئاوات م ئەژ ئیسفاگرتن بەرد، کۊ گل‌ئاوردم ئەژ ئیسفاگرتن بەڵگ، دارسۆن. م ئەژ ئیسفاگرتن ئەۊر، ڤارۆن گل‌ئاوردم ئەژ ئیسفاگرتن ئاسمۆن، ئاسارە. ئەژ ئیسفاگرتن تۆ ئەمانێ هەرگز گل‌ناوردم؛ ڤە ڤێنەێ سێ‌پریسک کووچەرێ ک دە بێیازیی دەشتەل گەرمەسێر گرد ڕێیەلەێ گل‌ئاوردن ئەژ ڤیر بردۊیی! ++++++++++++++++++++++ سەرناو: بێ‌سەر و شوونی سەبارەت: نووسین: ئاوات چراخ دەنگت ها کوو؟ یە چەنێگە وەناو تیەریکیی جەهان ناوەگەم، گومم کردگە! ++++++++++++++++++++++ سەرناو: مەڵهەم سەبارەت: نووسین: ئاوات من و تۆ چڵەیل دار لیمووێگیمن ک لە ڕووشناێ مانگەشەو خەوزڕ بۊمنە! وەو دووکەڕسە ک دە بان سەرپەنجەگان سەوزت نیشتگە، بۊش ئەڕا گوڵوەچێ بچریکنێ ک ئەڵ بان شان بریندار و شەکەت م گوشکیاێە. ++++++++++++++++++++++ سەرناو: بەرفێ ک دیر ئەژ ساگەت، تاوێ سەبارەت: نووسین: ئاوات بەێانی زی ڤەرەژ پەنجرەلەێ ماڵەکە ئەڵسیامە. ئێنکە ها ڤە چرچ لەرز و ناوکوتە ئیسفاێ ناو ئاێنە دگرم: دەی هەنساێ گورگ مێشە چەنێ کەمترەۊ بیمە! هەێ چی دۊنە و پێرنە و پەسپێرنە ئەڵڕوویامە! 'نەڤیینت'، لەتێ ترەک ئەژ بیینم لەفەۊ داێە. ++++++++++++++++++++++ سەرناو: خەون زامدار سەبارەت: نووسین: ئاوات لە ڕۊ زەمین لەسەر مانگ لەناو گەلە‌ئاسارەێ ڕێگاێ شیری لە گەردوون و جەهانەیل نەناسریاێ ترەکیش هۊچ چشتێگ، مەترسیدارتر ئەژ 'خەون زامدارێگ ک ژە پشتەو چەقوو دریاسە لێ' نییە. دماێ ئەڤە: گولە تەش‌بریق ڤەزەن لافاو هەرەس‌بردن ڤە گژ یەێ شێت بۆگدەڤەدەس چیین شێرپەنجە زەمی‌ڕکە ئاگرەپەخشان خنکیان تژنەی دە هەردە و هەڵەتەیل تەشەنەێ ناخوەشیی مەژناسێگ دەوا و دەرمان هەڵە دڵەکوتە و هووڵ فرەوان وسیان دڵ ئوو پێڕست بێ‌بنێ ژە هامکارەیل مەرگ تێ ک هەرسەێ ئڕا گڵەنگ‌بیین همێد و لە یەک چۊچیان جەهان لەشەیل لەڕ و کزمان بەسن جارجارێ وە تووزکاڵێگ ڕەژەن و بەختخاسی لە وەرانوەرمان شکەس خوەن. ئەمانێ ئەو 'خەون زامدارە' هەردەم تەنانەت وەرجە ئەوە ک فریشتەێ مەرگ، ئازڵدە باێد کارەگەێ خوەێ سەرکەفتێیانە ڤە بندرس بردێیە هەر وە ئەو چەقوو خۊناویی چکیاێە دەناو مازەێ! ++++++++++++++++++++++ سەرناو: سەرگە سەبارەت: نووسین: ئاوات ــ سەرچەۊەێ ئی گڵاڵ خین بێ‌بنە ها کوو؟ ــ دڕک چکیاێە دە پاێ ئاوەختێک. ++++++++++++++++++++++ سەرناو: بندرس سەبارەت: نووسین: ئاوات سەرئەنجام مەرگ، پاشخوانەگەێ دورس ئەڵوژنێ ئوو ئیمە وە پرسیار ڕەسیمن؛ پرسیارێگ لەبە کەڵێن ک دی لەناو ئێ جەهانە نیەگونجیمن. ++++++++++++++++++++++ سەرناو: بەرزەفڕی سەبارەت: نووسین: ئاوات ئیکارۆس! ئەێ ئەڵۊەکەێ زەڕین بێ‌تاشا! نەکەرێ ئەژ خەون باڵگرتن دەس بشووری؛ ک چمەێت‌ئاسا کەفتن دەناو دەلیاێ تەریکی و بێ‌نوون و بێ‌گڵکوو مەننیش تۊنێ فرە شکوومەن بوو؛ هەێک دە ئی سەردەم سەرد و سڕە ڤەسنگەێ ماچ‌کردن چەۊ ئەفتاو ئەژ چکەڵیی 'بیین خوەت' ئەۊ بۆن‌تر چۊیین و باڵەلت دە بێ‌بنیی ئاسمۆن ڤەر گڕێ ئەژ یەک ئەۊکریاوین ڤە بێ هۊچ زەنجیر و بەنێ... ++++++++++++++++++++++ سەرناو: کەۊگ زەمدار سەبارەت: نووسین: ئاوات نە! ئی شاقەشاقە ک نەێژنەۊینەێ بێ‌دەنگی نییە قولاو گیرکردەێکە دەناو گەلی؛ پرس‌نشۆنەێ ئەڵ ڤەراوەر تفەنگ ++++++++++++++++++++++ سەرناو: قووڕەێ مەرگ سەبارەت: نووسین: ئاوات دەسەیلت نادیار چەوەیلت نادیار زەردەخەنەت نادیار ئوو یە، چنەو بێ‌پاراستن و ئازبڕم کەێ ک کەڵەگاێ 'پەژارە' وە بیچگ‌ترین لرەێ ویرمانەیل شاخەیل تێژ خوەێ دە ناخ دڵم چقنێ. دەسەیلت نادیار چەوەیلت نادیار زەردەخەنەت نادیار ئوو ئەوەێگ لە مەوداێگ نزیک‌تر ژە من وە من قووڕنێ مەرگە. ++++++++++++++++++++++ سەرناو: پاوەمووری سەبارەت: نووسین: ئاوات واران لووبڕ و وەڵەکەت وەت: داربەڕۊەیل زاگرۆس، ژنن ژیان وەخشن و لەناو بڵازەیل نامێرەوانییا سزن! ++++++++++++++++++++++ سەرناو: دەمتەقە ئەگەرد نەچیرڤان سەبارەت: نووسین: ئاوات ژۆنەلم ماڵی نێیەون؛ ئەژ 'ستارگرتن دەناو قەفەس' ڤەرم نەڤەش ـــ بپووقن! ++++++++++++++++++++++ سەرناو: پەڵپ سەبارەت: نووسین: ئاوات ــ ئمڕووژ چەن شەمەس؟ ــ وە بێ ئەۊ ناو ڕووژەیل هەفتە گشت، 'دڵتەنگی'ـیە! ++++++++++++++++++++++ سەرناو: زاڕوو زاگرۆس سەبارەت: نووسین: ئاوات بنچینەت، ژە داربەلییەلەێ زاگرۆسە! ئێ ڕازە تەنیا م زۆنمەێ ک تا بن نادیار تەڵەنەل تەنیاییم ڕەگ و ڕیشە شەنینە و مریژەل و شێرکەدارەلێ ک هەر ساڵ، زاد و تووشەێ زمسۆنیی خوەێیۆن ئەژ ناوتوو چرچ‌لووچەل کراسە سەۊز و دڕەکەێ تاوسۆنییت ڤە چنگ خسنە. بنچینەت، ژە گڵاڵەیلەێ سەرکەش زاگرۆسە! ئێ ڕازە تەنیا خڕکەبەردەلێ زۆننەێ ک ئەژ بەرزیی کەش‌کۊ بێ‌دەنگی ڤیر همارییەل بێیاز دەمتەقە بردینەسۆن ‌ئۊ م، تەنیا ماسیی ئازادێ ک دە ناوگەر کڕەیل دەسەلت ڕێی هەۊگل‌کردن ڤەر جاماڵگەم، گوم کردمە. ++++++++++++++++++++++ سەرناو: خوتوورە سەبارەت: نووسین: ئاوات بۊچگە ڕووشێگم ژە دڕگ بنجگە سوورەگوڵێگ ئەڵ قەێ بلەمرک ئێ جەهانە ـــ چ ئاسان لە ویرەو دچم! ++++++++++++++++++++++ سەرناو: تـ ... سەبارەت: نووسین: ئاوات تەنیایی قیل ـــ دەس دسام ئەڵ قەێ هەرچی تونی ++++++++++++++++++++++ سەرناو: شیرین عەلەم هولی، دۊەتە سەرهەڵدێرەگەێ چیا سەبارەت: نووسین: ئاوات یە منم، شیرین دۊەتە سەرهەڵدێرەگەێ چیا لەورا ک لە قوڕن وێشەیل چڕ و پڕێ پەڵنگەیل جەوان تۊڕەیی لە دەورگرد گوڵەمە دڵڕفنەگەێ مانگەشەو نەرامدار و زاڵ و سەرکەفتێیانە نەڕنن. ئوو ئێوە ئەی زندانوانەیل پیر و داماو 'ئڤین'! ــ ک چووڵیی لێڵ چرچێگ لەناو نووڕین سەردوسڕتان دەم داچەقانێیە ــ میلە و دیوار و بەندتان فەن و فێڵ بێ‌وەلیفەتێگە. پەڵنگەیل جەوان وێشەیل چەوم هەرگز وەتان ڕام و ملکەچ نیەون. ئەهاو ئەشکەنجەدەرەیل نک ناهمێ و ڤڵەکەت 'ئڤین'! م ژە لانەماێ دارستانەیل سەوزبییە لە هناز وام ئوو لە ژێر تەوەرگ شمڕەیلەتان تەنیا پرتەێ ورووژێنەر سەرئەڵدانە ک دەناو لەش بریندارم گورجانەترەو دبێ. ڤەرچە گەرەک ئەژ بەرفە قورسەگەێ پێشهات بترسم؟ ! هەێک بتەۊترین سەنگەر دڵنیا بیین ئەژ حەقیقەت ئەو ڕاگەسا ک چیمە. ئەڕاچە لە زەلان سەرد تیەریکی باێس بترسم؟ ! هەناێ لە بان چوارپاێەگەێ سێدارەیش بەژنڕێکی و باڵابەرزی، مزگاناێگە ئەڕا کلگەیل پڕتاسە و ئاوەخت‌خوازم ک ماچەیل خوەرەتاو فەرە نزیکن. یە منم، شیرین دۊەتە سەرهەڵدێرەگەێ چیا چەوەیلم، بەڕۊەگان ناسیار زاگرۆسن ک ڕیشە لەناو زڵاڵیی وەفراو سەرکاوان دێرن دەسەیلم، لێوارەگان سەوز و بێیاز ڕووبار ئاراسن دڵم، چیاێ ئاگرییە و خۊن گەرم فرات دەناو وەنەوشەزارەگان ڕەگەیلم لە جمیانە. ئەهاو گاوشەنەرەیل وە هۊچ جی ــ نەڕەسیی 'ئڤین' ک ژە لانەماێ پاێەبەرز و دیاریی چڵکاوخوەرەیل 'دەربار'ـین! ئوو بێ‌دەنگییم لە وەراوەر چەپاڵەێ هەر پرسیار برنگ‌دان کوچگێگە دەناو مرداوەگەێ بێ‌پەێ و وەڕەزکەر ناهمێدیتان هماوری ئەودماێ کووشین گیانتەزن فرەێگ چەن پیاڵە خۊن و گومەیلێ سقان شکیاێ لەشم بووە بەش ئێوە سەربڕەیل هنجەهنجەکەر ئەمانگ وەگەرد بێ‌دۊایی خومین ئەرواێ سەرکەشم چە کەین؟ ! مەگەر بوود وە کەشتییەیل گەوراێ سەرکەفتن ک لە سروەێ ئاواخت م، باێەوان ئەوکردنە تا وەرەو گشت بەندەرەگان چەوەڕێی جەهان سەفەر بکەن فەرمان وسیان و بێ‌جۊلە بیین بدەی! مەگەر پووڕێ گەورایی و فەڕ زاگرۆس و سەردەنەیل [بەرزبییە] تا بڵنگای ئەور کووت و بەند بکەی! مەگەر دووێ کەلەپچە ئەڵ [دەسەیل ڕووبار] ئاراس بدەی و بووەیدەێ ئەڕا ژوور تاکەکەسی! مەگەر پووڕێ چیاێ ئاگری ملکەچ و سەرسپاردێیەو بکەی! مەگەر بوودن چەمەگەێ فرات وە باڵبەستەی لە وەراوەر جووخەیل مەرگ بەیدە وەر دەسڕێژ گولە! یە منم، شیرین دۊەتە سەرهەڵدێرەگەێ چیا ئوو ئێوە ئەی دادوەرەیل پلەبەرز! ک بەن ترازییەگەێ دادپەروەری ژە گێسەیل بڕیاێ داڵگ نیشتمانم چنینە گیرام ک لە ماوەێ فرە کوڵ چەن گڕ بڕیار مردن م دەربکەین بڵەم وەگەرد ئەسپە تۆسنەگەێ تێژپا و بێ‌ستار خەونەلم چە کەین؟ ! ک وە یاڵەیل پەخشانێ ئەو نوواێ گش کات و زەمانەیل، نەرمە خارێیە. وەگەرد بەژن و باڵای کەورئاساێ باوەڕم چە کەین؟ ! ک بەرزترین دارەیل سێدارەتانیش لە وەراوەرێ فریە نزمن. م، گوڵووک سۊەر بەرهەڵستییم و گورمێچەێ ئاگر. تۊش سیسی و گەڵاڕێزان نیەوم وە دەم واێەو، ژە کیس نیەچم دانامرکم تا ئێ دڕکستان کۊەنەساڵ ستەم و بێدادە بچەڵکەن و بنبڕ بکەم. یە منم، شیرین دۊەتە سەرهەڵدێرەگەێ چیا ئوو بەردەوامم لە خەبات و شەڕ ئەڕا ڕزگاربیین ژە پیلە ڕەشەگەێ چارەنڤیس تا هەڵفڕین، بکەم وە ساڕێژ باڵەیل شکیاێ ژن خوەرهەڵاتی من ک ڕزگاری ژە واێ ساکاری ژە ئاو گەشی و تازەی ژە پۊنگەیل کۊەی ئوو بەخشێنەری ژە خوەر چاشیامە. یە منم، شیرین دۊەتە سەرهەڵدێرەگەێ چیا و بەردەوامیی بێ‌پەرتخ درەوشیان و زەقینە ئوو یە، حەقیقەتە ک لە وەرئەێوانەگەێ دڵم تەمۊرەێ بێ‌هچان ئەڤین ژەنێدن. بێهوودە م ئەڕا ئەونیشتن ژە هەڵپەڕگە قەقنەسییەگەم نەچڕن چۊن ک کەس نیەتۊەنێ ئاگر هەڵاتن لەناو سەنگەر گیان مەردمان بوێر و سەرئازا بنکەفتەێ قڵ و خوڵەکوو شەوگار بکەێ. م ئێرنگە نە کانیلەێ شیرینێگ بەڵکوو زەریاێگم تا ماسی سییە بۊچکەڵەگان وەرەو شازەریاێ مەزن ڕووناهی ڕێنمای بکەم. ئوو ئێوە ئەی فەرمانبەرەیل لەرزووک ئەوڕێبەر بڕیار سێدارە بێهوودە، ڕێ وەرەو پەرتخ نیشانم نەێەن م ناونازار پرچ و پاکێ ژە لانەماێ قەتارقوڵنگەیل کووچەرم هەر ئاسمان، سەفەر ئەڕا م دەسپێک خەسپەن و ئەرکێگە دچم تا وەگەرد وەهاران گل بێیارم ... ئوو وەگەرد وەهاران گلەو دێیارم. ++++++++++++++++++++++ سەرناو: سروود شەهید زیلان و سەما سەبارەت: نووسین: ئاوات ژنێگ ئاواز خوەنێ وە هەزاران گوڵووک سێف لەناو قوڕگێ ئوو خوەرگەلێ ک ژە زڵفانێ نەرمەنەرم تیەنەو بان تا لە گشت ئاسووەیل، هەڵان. خوداژنێگ ک دەسەیلێ ڕێگەێ وێیەردن گشت چەمەیل جەهانە و نگاێ ڕێژنگەێ پەپوولەیل و ئاینە ئەڵ زامەیل خاک. ئاگر ــ ئاوازێگ لەناو باخ و سروەێ ک تا وە هەێ بوو ژنانەێ سێف دەێد! ++++++++++++++++++++++ سەرناو: هەێک نەڤییەت سەبارەت: نووسین: ئاوات گڵاڵ مەرگ گەردی ئەۊ نڤام. ئیسفاێ ڕوخسار خوەم دەناو گلارەلێ گرتم: بێجەژ «نەڤیینت» شێڤەێ کەس نەێدام! ++++++++++++++++++++++ سەرناو: دڵنۊسەیل دڵووپ سەبارەت: نووسین: ئاوات هەر دڵووپێ، وشەێگە هەر وشە، دەسپێکێ ئەگەرچە مرۆڤ، دڵووپێگ تەنیاس دۊاهمین دەمساڵ دڵنۊسەیل دڵووپ، دەریاس! ++++++++++++++++++++++ سەرناو: دۊاێ واران سەبارەت: نووسین: ئاوات دۊاێ واران گشت چشتێ ساناترەو دووگ؛ تەنانەت واتاێ ئاسمان لە چەو چاڵاوێگ بۊچگ. ++++++++++++++++++++++ سەرناو: شەۊە سەبارەت: نووسین: ئاوات ساڵ مەڵ بێ‌دەنگی و کووچ باڵنەیل گوورانی و نارینە 'قاڕ... قاڕ... قاڕ' ئۊ بێ‌دەنگییەکە سێ‌تر دکەرێ ئی قڵاێ ناو مەتەڵەیل داپیرە ک ئەژ گڵاڕێژان باخ مناڵی مەنێیە جا و ئاوەختەیل ڤەدەم ڤا چییەمان دقاڕنێ. ++++++++++++++++++++++ سەرناو: هەڵگەردیان سەبارەت: نووسین: ئاوات وە پێچەوانە گیرە بکە! بیلا ئەڕا یەێجاریش ک بۊە واران، هەڵگەردێدەو وە ئاسمان ئەور، وە دەریا دەریاێ پڕشەپووڵ و شێواو، وە ستار ستار، وە دڵەگەێ من ئوو دڵەگەێ من، وە ناوەێن دەسەیل ت ـــ چۊ ماسی سۊەرە بۊچگڵانەێگ ک لە قەپ قولاپ مەرگ هەڵگەردیاۊدەو وە ئاوان ژیان. ++++++++++++++++++++++ سەرناو: نزاکە سەبارەت: نووسین: ئاوات ئاهـ ئەڵکێشم... دار ناژێک سەر چەمنێ وە ژێر تریفەێ مانگ ++++++++++++++++++++++ سەرناو: بچڕەم سەبارەت: نووسین: ئاوات سەێر کە، شوون‌پاگان ژیان چۊ گوما هاتنە! وەتۊمە پێد: 'هەناێ بێ‌دەنگید لە بان ناوەگەم، پەێەڵپەێ وەفر وارێدن... ' ++++++++++++++++++++++ سەرناو: ژیین د ناوجاێ بێ‌دەنگی سەبارەت: نووسین: ئاوات تا هنا ئڵەیم نەکەری د ژێر سان سەرد فەرامووشی بێ کش و جم مینم. لەفاو ڤڵات بگرێ د ڤەر، هەر هشکەگڵاڵێکم ڕێڤار ڕێ گومکردەێ ک شێڤەێ ناوەکەێ نەێرێ دەێ! ++++++++++++++++++++++ سەرناو: شێتانە سەبارەت: نووسین: ئاوات تا ئەڵسم هرچە جەمسەرییەلەێ ناخم بووڵنن و مەلیچکەلەێ پشت پەنجرەکە دتاڕنن. م ئەڵسەر لەتکە یەخ سەرگەردانێ دەناون گەورەدەریاێ تەنیایی ژوورەکەم دووسیامە ها سەێل دیمەنێ کەرم ک تا چەۊ بڕ کەرێ تەنیا بەرف پەتییە و دەێ هیچ... ڕچکیامە ڕچکیامە تا کەپووڵ و گەردن و هناسەلم ئۊ یە، تازە بنیاێ ڤەسەرهات دیرییەکەێ تنە! ++++++++++++++++++++++ سەرناو: کوتەهەڕ سەبارەت: نووسین: ئاوات دڵم گنێ زق بی زەردەخەنەێ کردی و ئێمکە دەێ هەم ئەڵ کەم کوتەهەڕێ! ++++++++++++++++++++++ سەرناو: چڕێمنەت سەبارەت: نووسین: ئاوات لە بێ‌دەنگی ناوەگەت ژیلەمووێگە. لەی تیەریکستان سەردوسڕە وە ئەوینەو ژە قوڕن دڵ چڕێمنەت تا بڵووزە بکیشی: ئازادی! ئازادی! ئازادی! ++++++++++++++++++++++ سەرناو: خێیاڵ چا؟ سەبارەت: نووسین: ئاوات خێیاڵ، ماڵ‌هاڵووبارکەرێکە نیشتێیە ئەڵسەر بنجک گوڵێ ک نییەسەێ! ++++++++++++++++++++++ سەرناو: زووان داڵگیی ئەوین، ئازادییە سەبارەت: نووسین: ئاوات ئاسمان وە باڵنەیلەێ ئاسمانە؛ تفەنگ وەرەو چریکەێ هەر پەلەوەرێگ بگری کوتێ لە کەویی ئاسمان دشکێ. زەمین وە دارەیلەێ زەمینە؛ تەور لە قەشەنگیی باڵاێ هەر دارێگ بوەشنی یەکێگ لە هۊرەوەرییەگان شیرین زەمین، تێدە گوما. ڕووبار وە گێشت ماسییەگانێ ڕووبارە؛ خەون هەر ماسی بۊچکەڵەێگ وەناو تونگ شیشەیی، دیل و گرفتار بکەی چووڕێگ لە ئارزووە گەوراگەێ زەریابۊن وشکەو دبێ. ئەوین وە زووان داڵگیی خوەێ، 'ئازادی' وەگەرد ئیمەیا قسیە دکەێ؛ تەنانەت ئەگەر یەک پیت لە پیتەگان ئازادی کەمەو بکەی ئەوین، زووانێ دچوو دە بڕ. ++++++++++++++++++++++ سەرناو: میلکان سەبارەت: نووسین: ئاوات چەشن سەوڵ هەمۊشە سەوزە زام میلکانم ++++++++++++++++++++++ سەرناو: خوداژن ڕەنگینی سەبارەت: نووسین: ئاوات 'چروو، خوداژن ڕەنگینێکە' ئەژ ئی ڤتە زەمین سووزیاێە ئەۊڕەسێ نە قاقەز ئسپێ ک یاێهووشێ ئەژ دیرووک سەۊز دارسان بڕینە. ++++++++++++++++++++++ سەرناو: کڵکڵە سەبارەت: نووسین: ئاوات خەیلێگە واشنەت ئەڵنەکردگە گیسەیل نیشتمانەگەم بریندارن، ئازادی! ++++++++++++++++++++++ سەرناو: دەی تاریکسانە، ڤیرم چریسکنێ سەبارەت: نووسین: ئاوات ئاخ چریسکیا دە ئاسووەل دەسمەڕەس ـــ ئاسارە نە، یاێت! ++++++++++++++++++++++ سەرناو: بەرد تیەریکی سەبارەت: نووسین: ئاوات دی جیاوازی نەێرێد ک تووف تووف، واران بووارێد یا بەرد تیەریکی! گوڵ‌بەرەفتاوێ ک شەوەکیان هەتاوەگەێ گوما کردۊد پەژارەێ چاوانێ وەرەو هەر هنازێ گل بەێد ئەوردا، دەسپێک وێرانییە. ++++++++++++++++++++++ سەرناو: سەفەرێگ وە هەراێهەری سەبارەت: نووسین: ئاوات 'دڵووپە' ئاشناوە بی وەل کڵپەێ ئەوینا بی وە کانی! بی وە ڕووبار پڕ تافەتاف و وەگوڕ! شەپوولاوی، چی و چی... 'وردیلە' هاودەنگەو بی وەرد ئەوینا بی وە نۊر! پا تا وە سەر، بییە بەوش و تلیلی! وە ئەڵپەڕین، چی و چی... دڵووپەێ ک خوەێ ئاگر دا، ڕەسی وە زەریا. وردیلەێ ک دەناو ئەوین تاویا، ڕەسی وە واتا. بنووڕە پانتاییەگەێ سامدار زەریا! ... دڵووپە ها کوو؟ ! بنووڕە دیمەنە پڕ واتاگەێ گەردوون! ... وردیلە ها کوو؟ ! ++++++++++++++++++++++ سەرناو: چەرخ چەپگەرد سەبارەت: نووسین: ئاوات ئاخ! چ ئازاردەر و گیانتەزنە: هەرئەوانە وە 'تیەریکی' تاوانبارت کەن ک چەنە گۊهەسارەێگیش ڕووژنا نەبۊەسە بەش دڵەیلێیان ئوو وە چمەتەگەێ هەمۊشە هەڵگیرسیاێ گیان ت ویشن 'هەسارەێ مردگ! ' ++++++++++++++++++++++ سەرناو: دەسڵاتخوازی سەبارەت: نووسین: ئاوات چ مەێدان جەنگ گەورەێکە جەهان! هەرچێ لڕ دێیارێمن، گل نەێخوەرێمن! ++++++++++++++++++++++ سەرناو: کاولستان سەبارەت: نووسین: ئاوات جگێ مەنێیە تا ئاو، بووە ویرەوەری خاک، بووە ویرەوەری هەوا، بووە ویرەوەری هادەێ تەنیا ئاگر وە جی بمینێ دە ژێر بیلەکوو سەرد. لەناو گەنم‌جاڕەکەێ سزیاێ جەهان وە قوتەێل داوڵەکەێ شڕپووش گووش دەیمن ئوو ئاسمان نەتەنیا ژە پەپووسڵێمانی و واران ک ژە کل‌بیین یەێ قڵاژیلەێ لاڵیش چووڵ و پەتییە. ++++++++++++++++++++++ سەرناو: بپووڕ و نەپووڕ سەبارەت: نووسین: ئاوات خەون، گەردوون وەچاونادیار بێ‌پەرتەخێگە یا هادەیش گەردوون، خەون وەچاودیار بێ‌پەرتەخێگ بوو! ئەمانگ هەرچێ هەس لە نەۊین ترسێنەر 'ئازادی' نە خەون تۊەنێ گەردوونێگ بزاێ و نە گەردوون، شوون و کاتێگ خەوناوییە. وە بێ ئازادی ئەڵسەنگانن 'شانۆ ژین'، ئاو دە وێژنگ کردنە! ++++++++++++++++++++++ سەرناو: لێژایی سەبارەت: نووسین: ئاوات ئاونگێ ڤە پەڕەێ گوڵێ ڤت: 'بێ‌بەزەی! نەسڕەم ژە گووشەێ دیدەت مەگەر چەنێ ژییێ تکێ ئەسر؟ ! ' ++++++++++++++++++++++ سەرناو: لێڤە، جەهان جوورێ ترەک ڤینێ سەبارەت: نووسین: ئاوات چنەۊ چەۊەڕێیم ک ئەۊ نەرمەڤەن دووسیاێە ئەڵ ئاسوویش ئەژ دیر، خوەتە! ++++++++++++++++++++++ سەرناو: * پەڕە قاقەز چەرمگ سەبارەت: نووسین: ئاوات هەر لەتێگ ژە خوەم لەناو نۊسمانێگ وە جی هیلم وە وێنەێ ئەور ڕەشێگ ک وشە وە وشە وەگەرد وەفرێ ک وارێدن خوەێ ژە گەشت‌نامەێ دەلیا سڕێدەو. نۊسم نۊسم ئوو زانم ک ڕووژێگ وە بندرس ڕەسم لە ئاسمانێگ ساێ لرک وە وێنەێ قاقەزێگ چەرمگ ک وا نۊسمانەیلەێ وەگەرد خوەێیا بردگە. ++++++++++++++++++++++ سەرناو: چووڵاچووڵ سەبارەت: نووسین: ئاوات هەر شوونێک نەڤووەت پەژارەم ها ئوورە ++++++++++++++++++++++ سەرناو: وشەێلەم کرێکارن! سەبارەت: نووسین: ئاوات وشەێلەم کارکەرەێل ڕەنجدەر و ڤەکارێکن ک ئەژ گوڵ بەێان تا سەرئێڤارە کار دکەرن و ئەرەخ دڕژنن تا دیڤارەلێ ئەژ ئاێنەێ پەتی دە ڤراوەر ڕەنگینییت ئەڵارن. ئاونی، شەۊەل شەل و شەکەت دخەون و خەو زەردەخەنەت دڤینن شەۊەکی ک ئەڵسن و ڤە دڵێ پڕ ئەژ همێ دچنە سەر کار ڕووژانە دڤینن گرد دیڤارەلەێ ڤە ئاێنە ئەڵڕازەنەێ دۊنە ڕمیانە و داڵ ئەژ نوو، ماڵ ئەژ نوو! دووارە مێیا بنیا بنن... ++++++++++++++++++++++ سەرناو: ئامووژیارانە سەبارەت: نووسین: ئاوات ــ پشت ئێ سەردەنە چە هەس؟ ــ یەێ جەهان 'نازانم' ++++++++++++++++++++++ سەرناو: داخین سەبارەت: نووسین: ئاوات ئەسپێ گرێڤێ ئەژ سووارەکەێ تەنیا چەن دڵووپە خین ئەڵ یاڵ ++++++++++++++++++++++ سەرناو: لێخناو سەبارەت: نووسین: ئاوات بێ‌دەنگ دووسی نقمەۊ دووێ مۆنگ چواردە دەناو گڵاڵ لێخن ++++++++++++++++++++++ سەرناو: پەێام سەبارەت: نووسین: ئاوات هەزار هەزار کەپوو پایزان وە دەس واوە هەڵوەدا و وەیلان؛ پەێامەگەێ ت ها وە کامێیان؟ ! ++++++++++++++++++++++ سەرناو: پاتشاێ بێ‌جنک سەبارەت: نووسین: ئاوات کڵکڵەباێ سەرداوە... نە کڵاو مەن و نە پرتاڵ شڕە 'داووڵ' مەتەڵ دروویینێک بی؟ ! ++++++++++++++++++++++ سەرناو: ئاگرەواڕەبۊن سەبارەت: نووسین: ئاوات هەر ژە هاتنێ دیار بی ک ئەوینە؛ ژە ئاگرێ ک وە گیان ئاو خس ++++++++++++++++++++++ سەرناو: ژاری سەبارەت: نووسین: ئاوات هۊر وە 'هۊچ' ئەکەم وە 'خوەم دە بێ تنی' ++++++++++++++++++++++ سەرناو: سەنگەلا سەبارەت: نووسین: ئاوات دیر ک دووم تو نەێڤینم نزیک ک دووم خوەم! ڤەی ژۆنە ژیان، تاهەێ سەنگەلاو. ++++++++++++++++++++++ سەرناو: سەراوەنۊن سەبارەت: نووسین: ئاوات ــ نوقم کام دەریای؟ ! ــ نەبۊن ئەۊ ++++++++++++++++++++++ سەرناو: نەرمەخوناو سەبارەت: نووسین: ئاوات ڤتم ئێس تنی... تمەرز نەرمەڤاران بی و ددا ئەڵ پەنجرە ++++++++++++++++++++++ سەرناو: ئەژ ڤیر خوەم چیمە سەبارەت: نووسین: ئاوات چنەۊ دە گڵاڵەکەێ بێ‌پەێ دیرییت نوقمم ک دەێ دەسمێیەت هۊچ کەسێ نەێتۊنێ م ڤە ڤیر من بێیارێ. ئەژ ڤیر خوەم چیمە ئچەڤە ک خڕەبەردێ ئگەرد گڵاڵ چۊیی یا بەڵگ زەردێ ئگەرد باێ. هنا ئڵەت کەرم هنا ئڵەت کەرم تا ڤە هاناێ 'نەڤیین'ـەلم بڕەسی! ++++++++++++++++++++++ سەرناو: دار بەێچەڵ سەبارەت: نووسین: ئاوات چی گواریین مۆنگ ئەژ تەریکیی بێ‌بن دارسۆن ئەژ م گوار... ئەژ م گوار... ئەژ م... پەڕ جۆمەکەێ دڕت گیر کردێیە ئەڵ پەل دارە بەێچەڵەکەێ هەڵڤەسم؛ بمین! ++++++++++++++++++++++ سەرناو: یهەتم تا بچم! سەبارەت: نووسین: ئاوات ــ چە کەری ڕێڤارەکە؟ ــ ڤچۆنێ دم، دەناون دۊ نەڤیین ++++++++++++++++++++++