شاعیر: هێمن تەنیا
کتێب: نەسیحەت
سەرناو: بۆ پووشپەڕ
سەبارەت: نووسین: هێمن نیک بین

بای ئەجەل هات و لەناکاو
دەفتەری شێعری دڕیم
تاکوو دوێنێ غونچە بووم
ئەوڕۆ بە ناحەق هەڵوەریم

دەستی تەقدیرم لەسەر
ژین وا بە لاڕێ داچووە
بۆنی خەردەل چووە هەناسەم
سینگ و سیپەلکی بڕیم

گێژەڵوکەی ئەو ژیانە
بێ بەهانە هات و چوو
لەتکە دەسمالێکی هێنا
فرمێسکی چاوی سڕیم

زامەکانی ئەو وڵاتە
تۆ بلێ کەی بێنە سوێ
بێ بەها بوو ئەو ژیانە
ئەو بە مفت لێ کڕیم

گیانی ئێمە بوو بە پوش و
مانگی پووشپەڕ هاتە دەر
دەنگی هاوارم لە ئاسمان
من بە شێوەی پووش فڕیم

خەڵک ڕژان و هەڵوەرین
هەر وەکوو چێشکە و گەڵا
باسی دارستانی هەست بکەم
یاخۆ مۆنیم یا گڕیم

بیر و مێشکم هەر لەسەر
سەوداسەری ئاسودیەیم
گێژ و مەنگی یێک هەواڵم
چی بو هۆی هێڕ و وڕیم

وا ڕژاوە بۆمبی گەل کووژ
بەسەر بێ گوناحی گەل
کارەسات بوو کە بەسەرهات
بەسەر تێر و پڕیم

دەستی بێزارکەر هات و
ساویلکەییمی هەندراند
کەس نەگەیشت بە فریام
لە کاتی شڕ و دڕیم

نێو ناخی گەرمی بوو
جوان وەبیرمە گەرمیەکەی
سۆزی ساردی وا لە ناکاو
بۆیە هۆی شەختەی سڕیم

نیشتیمان ماڵی سوتا
بە ئاوری نەفرەت و قین
بۆ منە کە وابەجێ ما
نەهامەت، سەر بەقوڕیم

بێکەسە ئامانج و ئاوات
و نەزۆکیان کرد ئەوین
پێی سەرکەوتنیان شکاندم
سوتاندیان بەرزەفڕیم

خوێن مژی دەورانە زەحاک
خوێنی ویست بە بۆنی سیر
تام و چێژی بو بە دووکەڵ
ئالودە بو مرچ و مڕیم

دەنگی زرمبەی بۆردومان
کپی و بێدەنگی شکاند
بە بێدەنگی گشت وڵاتان
گەشەی کرد کەڕ و کڕیم

سی و شەش ساڵ تێپەڕیوە
زامەکەم هەر تازەیە
چۆن لەبیر کەم درد و حەسرەت
چۆن بەسەر بەرم چڕیم

لە شاری تەنیای بێ تاوان
سەد کەس قوربانی کران
پووشپەڕ بووە مانگی غەمان
لە ئاسوودەیی زڕیم

++++++++++++++++++++++