شاعیر: عەبدوڵڵا پەشێو
کتێب: دیوانی براکوژی
سەرناو: سێ کورتە پامفلێت
سەبارەت: یەکەمجار، ڕۆژی ١٩٩٢/٤/١٣ لە گۆڕەپانی گڵکەند، لە شاری هەولێر بۆ جەماوەر خوێندرانەوە. - نووسین: ناشناس - سەرچاوە: https: //t. me/abdulla_pashew

(١)
جووتێک پێڵاوی ڕەشم لە پێیە؛ 
پینەدار، هەرزان، گەمار، سووک، گڵاو
هەزار جار ئەم پێ و ئەو پێ پێکراو
چەند جاری کەوا سەرنجیان دەدەم، 
بە دەست خۆم نییە، لمۆزی پێڵاو
قەپۆزی هەندێ
سەرکردەی کوردم دێنێتە بەرچاو

١٩٨٢/٥/١ مۆسکۆ


(٢)
لە غەیبەوە هاتوومەوە
هاتوومەوە پێتان بڵێم؛ 
ئەم وڵاتە
قەت بێ خرمەخرمی ناڵ و
زرمەزرمی پۆستاڵ نابێ
تاکوو ئێوە ئەو پردە بن... .
هەر دیل بوون و هەر دیل دەبن، 
تا چەرچی و دز سەرکردە بن! 

١٩٨٤/٦/٢٣ مۆسکۆ


(٣)
نەگبەتی بەرۆکی گرتووین
لەملاوە دێ
گێژەڵووکەی لمی ئاران
لەولاوە دێ
تەرزه و برووسک، بەفر و باران

دانەوەختێک باڕۆڤەیە... ڕەشەبایە
دانەوەختێک گەرداوی تەڕی دەریایە
کەچی ئێمەی سڕ هەتا ناخ
ئێمەی ڕووتتر لە تیشەشاخ
خوێنی یەکتر دەخۆینەوە
لەسەر کورتی و درێژی مووی کلکی وڵاخ

١٩٨٧/٦/٣٠ تەرابلۆس

++++++++++++++++++++++