شاعیر: سوما
کتێب: م ته‌رم هه‌ر شانێ نییم
سەرناو: سوومای گوڵ سوو
سەبارەت: نووسین: فه‌رزاد که‌ڵهۆر

یێ ژان گوم بۊ له سه‌رم
له شوون خوه‌م ده‌روه‌ده‌رم
دڵخوه‌شی که‌سێ نییم
کڕێ دعای بێ ئه‌سه‌رم
دڵم توای باڵ بگرم
سه‌رینێگم پڕ له په‌ڕم
نه قالی سڵێمانم
نه نه‌قش قه‌ێ نه‌و ته‌ڕم
هه‌ قرچه قرچه گیانمه
چوارچوو شکیاگ ده‌رم
ها ئمڕووه یا گه‌ر سووه
خوه‌میش خڵاس بووم له شه‌ڕم
مردن باوش کوتاسه لیم
هناس سه‌رد ئاخه‌رم
نیه‌زانم که‌ی به‌ختم ئه‌ڵای
سوومای گوڵ سوو بێ خوه‌رم


( ئڕا ئوستاد موحه‌مه‌د مورادی نساری )

++++++++++++++++++++++
سەرناو: دار نه‌زه‌ر که‌رده
سەبارەت: نووسین: فه‌رزاد که‌ڵهۆر

دار نه‌زه‌ر که‌رده بۊم تا وه‌چ دام ئه‌ڵکه‌نینه‌م
ماس نه‌مای وه‌هار بۊم هه‌ڵه‌په‌ڵه ژه‌نینه‌م
داس تێژ ده‌س کی قاپ گه‌نمم بڕی
نه‌زر ئمامێ گه‌وراۊم، وه نه‌وه‌دڵ سه‌نینه‌م
له لای ئۊه گه‌نێگم نیم مه‌ن نیم، مه‌نێگم
گه‌نگیر سه‌رکه‌شێ بۊم له ناوه‌ختا به‌سینه‌م
له ته‌خت سینگ زه‌ۊ خوه‌رێ ته‌توو کردمه
هناس شێعرم گه‌رمه ئه‌ر وه زقم بڕینه‌م
دڵته‌نگێ دڵم فره‌س نووڕێ گیژ خوه‌ی له‌ی ناوه
کام دعای بێ ئه‌سه‌رۊم نه‌نۊسیا دڕینه‌م؟
به‌یت ڕه‌نگای ڕه‌نگێ بۊم سه‌د مه‌ن وه‌زن وشه‌م بۊ
گوورانی خوه‌شێ بۊم وه ده‌نگ کزێ خوه‌نینه‌م
سه‌وڵ کریسمه‌سێ بۊم پڕ له‌شم چراخ بۊ
له یه‌ێ تیه‌ریکه شه‌وێ له ڕیشگا که‌نینه‌م


( ئڕا ئوستاد سه‌عید عباده‌تیان - بانان - )

++++++++++++++++++++++