شاعیر: عەبدوڵڵا پەشێو کتێب: ڕۆژ نییە لێتان تووڕە نەبم سەرناو: ئەمشەو تا بەری بەیانی سەبارەت: (زستانی ١٩٧٩ - مۆسکۆ) - نووسین: ناشناس - سەرچاوە: https: //t. me/abdulla_pashew ئەمشەو، تا بەری بەیانی، نەنووستم و سەرنجم دای. چەند جارێک دیتم ڕاچەنیت. چەند جارێکیش دیتم گریای. خەونت بە چییەوە دەدی؟ چیبوو؟ بۆچی ڕادەچەنیت؟ لە حیلەی ئەسپی خەمی من؟ لە ئاورینگی قەڵەمی من؟ لە هەڵبوون و کوژانەوەم؟ لە فڕین و نیشتنەوەی بێ بڕانەوەم؟ چیبوو، گیانە؟ لە خەونتدا کچێکی دیم لەگەڵدا بوو؟ یا بۆ وڵات بارگەوبنەی خۆم تێکنابوو؟ *** من لە خەمی تۆ ناترسم! من دەزانم، خەمەکانت وردن، قشتن، ژیکەلانەن... من دەزانم، خەمەکانت وەکوو خەمی هیچ کەسێک نین: دە چاوەکەم، دیسان گیانم تژی کەوە لە مناڵی و تاسەی یاری... . پرێسکەکەت بکەرەوە، بۆم هەڵڕێژە دەنکەزەنگیانە و مرواری! ++++++++++++++++++++++