شاعیر: عەبدوڵڵا پەشێو
کتێب: ڕۆژ نییە لێتان تووڕە نەبم
سەرناو: شپرزەیی
سەبارەت: (١٩٧٩/١١/٢٢ - مۆسکۆ) - نووسین: ناشناس - سەرچاوە: https: //t. me/abdulla_pashew

ئەو ڕۆژەی ژوانمان هەیە، 
هەرچی دەستی بۆ دەبەم: 
پیاڵەی چا، کتێب، قەڵەم... 
هەموو گوڵاو دەردەدەن. 

ئەو ڕۆژەی ژوانمان هەیە، 
هێشتا زووە و تۆ دووری، 
ئەندامەکانی لەشم
نۆبەتبڕی لێک دەکەن: 
چاو - ڕەزی لەشت دەڕنێ، 
دەست - بە دەنگتا هەڵدەزنێ، 
گوێ - نوقمی بۆنت دەبێ و  
مەودای دووریت دەپێوێ... 

بریا دەتزانی، گیانە، 
ئەو ڕۆژەی ژوانمان هەیە، 
چۆن سەرم لێ دەشێوێ...

++++++++++++++++++++++