شاعیر: عەبدوڵڵا پەشێو
کتێب: ڕۆژ نییە لێتان تووڕە نەبم
سەرناو: ناونیشان
سەبارەت: (١٩٧٩/١١/٩ - مۆسکۆ) - نووسین: ناشناس - سەرچاوە: https: //t. me/abdulla_pashew

تا هەڵبەستێک تەواو دەبێ، 
من ڕۆحی خۆم پەڕە دەکەم
وەکوو هەلاج. 
کە تەواو بوو، 
خاڵێک دەکەم بە عەرش بۆی، 
ناونیشانێک دەکەم بە تاج. 
*
هەر قورینگێک 
جارێک باڵی لە دەریاچەی
ئەڤینی من هەڵکێشابێ، 
بۆتە وشه بۆ هەڵبەستێک، 
کە عومرێکە دەینووسم و تەواو نابێ! 
*
هاوڕێم، ماندووم! 
وا هەست دەکەم، 
هەڵبەستەکەم هێندە درێژدادەڕ بووە، 
دیوانی بوون لێی پڕ بووە... 
ئاگام لێیە، لە یادمدا
جێگۆڕکێ دەکەن پەیڤەکان. 
ڕێگەم بدە خاڵێک دانێم، 
تۆی بۆ بکەم بە ناونیشان!

++++++++++++++++++++++