شاعیر: عەبدوڵڵا پەشێو
کتێب: ڕۆژ نییە لێتان تووڕە نەبم
سەرناو: ژیانەوە
سەبارەت: (١٩٧٩/٥/٩ - مۆسکۆ) - نووسین: ناشناس - سەرچاوە: https: //t. me/abdulla_pashew

جارجارە خەم تا هەوکم ١ دێ
ئازار دەگاتە ڕادەیەک، 
ژینم بدەم بە بەردێکدا، 
وردی بکەم وەک بادەیەک! 

کەچی، لەپڕ: 
ورشەی هەودای هزرێکی نوێ، 
سەرەتاتکەی کەڵکەڵەیێ، 
ژیانەوەی پنجەگیایێ، 
زەردەخەنەی کۆرپەڵەیێ، 
بەژن و باڵای شۆڕەژنێ، 
سنگی سەرکێشی خرپنێ

وام لێ دەکەن
لە خۆشییان لێم بڕوێ باڵ، 
لە ئاسمان بپاڕێمەوە
پردی ژینم وا درێژکا
نەپەڕمەوە بە هەزار ساڵ! 


١. هەوک: قوڕگ، گەروو، حەفک

++++++++++++++++++++++