شاعیر: کاکەی فەلاح
کتێب: دیوانی کاکەی فەلاح
سەرناو: کلوە بەفرەکان

ئەی کلوی بەفری سپی! 
چەن بێ دەنگ و چەن کپی


کە لەو ئاسمانە بەرزە
ڕوو ئەکەیتە ئەم ئەرزە


چین چین زەوی داپۆشە
دڵی من بەوە خۆشە


زۆر حەز ئەکەم تاماوم
هەتا بڕ ئەکا چاوم


دەشت و دەر و شار و دێ
بەرگی بەفری سپی بێ


سپی ڕەنگێکی چاکە
بەفربێ گەرد و پاکە


ئای چەندە بێزارم من
لە پەڵەی ڕەش و چڵکن


خۆزگە دەروون و هەناو
وەکوو بەفری بەرهەتاو


بێ گەرد و ڕووناک ئەبوو
سپی و جوان و پاک ئەبوو


ئەوسا ئەتدی ئەم ژینە: 
چەن دڵگیر و شیرینە

++++++++++++++++++++++