شاعیر: نالی
کتێب: دیوانی نالی
سەرناو: شەوی یەلدایە یا دەیجورە ئەمشەو
سەبارەت: پێداچوونەوە: ئومید سڵێمانی

شەوی یەلدایە، یا دەیجوورە ئەمشەو
کە دیدەم دوور لە تۆ بێ نوورە ئەمشەو؟ ! 


دڵم وەک حاکمی مەعزوولە، قوربان! 
خەڵاتی وەسڵی تۆی مەنزوورە ئەمشەو


دڵیش مایل بە دیدەی تۆیە، بۆیە
لە من وەحشی و ڕەمیدە و دوورە ئەمشەو


کە تۆی شای کەچ کولاهی دیدە مەستان، 
چ باکم قەیسەر و فەغفوورە ئەمشەو؟ ! 


لە خەو هەڵساوە، یا ئاڵۆزە چاوت؟ 
هەمیشە وایە، یا مەخموورە، ئەمشەو؟ 


سوروشکم نەقشی چاوی تۆ دەکێشێ
جێگەم سەر دارەکەی مەنسوورە ئەمشەو


موسوڵمانان دەپرسن حاڵی نالی
لە کونجی بێکەسی مەهجوورە ئەمشەو

++++++++++++++++++++++