شاعیر: سامان سەنگاوی
کتێب: تەنیام لێرە
سەرناو: خەیاڵ

من وام دەزانی گەر لێرە بڕۆی 
وەک وەرزی بەهار ڕۆژێک دێیتەوە 
گەڵای وەریوی پایزی عومرم 
بەگوڵی نەرگز ڕەنگ ئەکەیتەوە 

سنوری نێوان من و ساڵی خەم 
بۆ هەمیشەیی بە کۆتا دێنی 
پەپولە ئاسا لە دەورم دەبی و 
خەندەی سەر لێوان قەت ناتۆرێنێ 

چەندە رەنگینە خەیاڵی جوانم 
بە وێنەی پەری ناوت ئەهێنێ 
شیوەی ڕوخسارت لەسەر دیوان و 
پەڕەی شیعریمدا وا دەنەخشێنێ 

چەندم پێ خۆشە گەر ڕۆژێ دابێ 
شیعرێیک بە ڕەنگی خۆت میوانت بێ 
لەسەر لاپەڕەی ڕۆژنامەیەکی 
ئەم کوردستانە بۆ ناو ماڵت بێ 

++++++++++++++++++++++