شاعیر: حیلمی
کتێب: دیوانی شێخ محەممەدی حیلمی
سەرناو: ئای لە کزەی زام ناسۆری سەختم

ئای لە کزەی زام ناسۆری سەختم
لە ناڵە و فەریاد دڵەی بەدبەختم


دەمە و بڵێسەی بەرزی دەروونم
نەڕەستەکەی دەرد دەستی گەردوونم


لە جەستەی زامدار تیری بەدکارم
لە دەردی کاری لاشەی دوچارم


چۆن نەهات بۆم هات هاتی نەهاتم
گیرۆدە و بەندم هەتا مەماتم


ئەناڵم دائیم وەک ماران گەستە
سەر تا پێم هەمووی یەکسەر شکستە


دائیم هام لە گێج خەیاڵاتی خاو
ئەزەل پێی نۆشام لە پیاڵەی زوخاو


گاه شێت و بێهۆش شێوەی مەیخوارم
گاه گیرۆدەی ژار کوشندەی مارم


ئازیز سا ڕەحمێ بە حاڵی زارم
هەتا کەی ناڵە و داد و هاوارم

++++++++++++++++++++++