شاعیر: شەهلا نوری
کتێب: شیعرەکان
سەرناو: غەزەل شوعلەی سەرکێش
سەبارەت: نووسین: کۆچەر

وەرگێڕانی لە فارسییەوە شەهلا نوری
شاعیر ڕەهی معیری
غەزەل شوعلەی سەرکێش


لالەم دی و ڕووی گەشی جوانی تۆم هاتەوە یاد،
شوعلەم دی و نازی سەرکێشیی تۆم هاتەوە یاد

سووسەن و گوڵ ئاسمانی کۆڕیان دەڕازاندەوە،
ڕوو و زوڵفی مەجلیس‌ئارای شەنگی تۆم هاتەوە یاد

شەم لە باوەشی شەماڵا بڵێسەی لێ دەلەرزی،
لەرزینی بسکی عەنبەرسای خاوی تۆم هاتەوە یاد

لە باخا پەپوولەیەک هات، فڕی، نەنیشت و چوو،
تۆران و زیزبوونی بێهۆی نازی تۆم هاتەوە یاد

مامزی سەرمەست هەڵات و ڕووی کردە کۆسار،
خۆدزینەوەی دڵبەرانەی پڕ تابی تۆم هاتەوە یاد

جۆگەیەک لە بن سەرووێ زاری و گریانی بوو،
ئاهـ و ناڵەی گریانم لەبەر پێی تۆم هاتەوە یاد

شار پڕ بوو لە هەرای دێوانەیەک، ئەی ڕەهی!
دێوانەیی دڵ و سەودای سەری تۆم هاتەوە یاد

++++++++++++++++++++++