شاعیر: عەبدوڵڵا پەشێو
کتێب: ڕۆژ نییە لێتان تووڕە نەبم
سەرناو: ئەگەر ئەمجارە بێمەوە (٢)
سەبارەت: (١٩٧٥/١٢/١٧ - مۆسکۆ) - نووسین: ناشناس - سەرچاوە: https: //t. me/abdulla_pashew

ئەی دایە گیان! 
لە یادمە، کە مناڵ بووم، 
ئەشقی تامی تفت و تاڵ بووم
گڵم دەخوارد، 
قوڕم دەجوی
تۆش زللـەیەکت لێ دەدام، 
هەمووت پێ تووڕ فڕێ دەدام

ئەی دایە گیان! 
ئێستا گەورەم و مناڵ نیم، 
ئەشقی تامی تفت و تاڵ نیم

کەچی ئەگەر ئەمجارەشیان
ڕێم بکەوێتەوە بێرکۆت*
لێشم بدەی، 
لێشم حەرام کەی شیری خۆت، 
من بە تەشییەکەی مناڵی دەڕێسمەوە، 
دار، بەرد، گڵ، قوڕ... 
چیم بێتە ڕێ دەیلێسمەوە! 


* بێرکۆت: جاران گوند و ئێستا گەڕەکێکی شاری هەولێرە، زێدی شاعیرە.

++++++++++++++++++++++