شاعیر: سامان سەنگاوی
کتێب: تەنیام لێرە
سەرناو: توڕەبونت

ئەو دەم و ڕۆژەی تۆ لێم بێزاری 
من زیاتر تاسەی ماچێكت دەكەم 
ئارەزووی سەیری ڕەنگ و ڕوخسار و 
باڵای ناسك و لەبارت دەكەم 

هەر ڕۆژێ ڕەنگ و ڕوخسارت تاڵ بێ
تامی ماچەكەت شیرین تر ئەبێ 
چەن ڕوت گرژ بێ لە باوەش نانت
زیاتر بە جۆش و گەرم تر ئەبێ 

من وام پێ خۆشە هەردەم توڕەبی
چونكە چێژی تۆ زۆر زیاتر ئەبێ 
چەندە لێم دور بی دڵم سەد هێندە
تامەزرۆی ماچ و دیدارت دەبێ 

ئێستا حەز ناكەم هەروەكو جاران
زو زو ڕۆژانە بێیتە پێش چاوم 
بەڵام ژوانت وەك جاران نیە و 
هەر بەخەیاڵ وەختی کۆن ماوم

++++++++++++++++++++++