شاعیر: سامان سەنگاوی
کتێب: تەنیام لێرە
سەرناو: هەواڵیان هاورد

هەواڵیان هاورد لای یاری جوانۆ 
‎خەیاڵ و دڵی نەماوە لەلام 
‎لە بەرچاوی ئەو وەكو ئەو خەڵكە 
‎بەندەیەكی خوام لە شێوەی زەلام 

‎نەبیستی ڕاز و هاوار و گریەم 
‎نە گوێی داوەتە بێداری شەوم 
‎وەك ڕۆژی ڕوناك مەعلوم بوە لای
‎كە وەلی ئاسا دێوانەی ئەوم 

‎ئەم بێ منەتی و بێ باكیەی یار 
‎تەنها ئەوەیە جوانێ بەناوە 
‎بێ ئاگا لەوەی هەزار جوان هەیە 
‎ئێستا لە خاكدا خەوێنراوە

‎هۆشت بێتەوە بەر خۆت كچۆڵە 
‎نە بۆ تۆ و نەكەس دنیا نامێنێ 
‎ڕاكردن بە دوای شتی چێژ بەخشا 
‎بەختەوەری زۆر بۆ كەس ناهێنێ 

‎هێندە دڵی لاو مەخەرە ژێر پات
‎هەتاكو خۆتیان ژێر پێ نەناوە 
‎دوای لە دەست دانی كەسانی بەنرخ
‎پەشێوی دادی كەسی نەداوە

++++++++++++++++++++++