شاعیر: عەبدوڵڵا پەشێو
کتێب: ڕۆژ نییە لێتان تووڕە نەبم
سەرناو: چەند وشەیەک دەربارەی دڵی خۆم
سەبارەت: (١٩٧٤/١١/٢٢ - مۆسکۆ) - نووسین: ناشناس - سەرچاوە: https: //t. me/abdulla_pashew

ئەم دڵەی من
وەک واگۆنی قیتارێکە
هەزار و یەک وێستگەی هەیە. 
لە هەر یەکێک لەو وێستگانە ڕابوەستێ، 
ڕێبوارێک بەجێی دەهێڵێ، 
ڕێبوارێک خۆی تێدەپەستێ. 

بەڵام وەتی ئەم دڵەی من بۆتە واگۆن
ڕێبوارێکی پەستی تیایە، 
دانابەزێ، 
دانابەزێ
له سووچێکی ئەم دنیایە. 

ئەو ڕێبوارە بەدوای ناوی خۆیدا وێڵە... 
ئەو ڕێبوارە بەدوای چاوی خۆیدا وێڵە
ئەو ڕێبوارە برینمە. 
ئەو ڕێبواره زەردەخەنە و گرینمە. 
ئەو ڕێبوارە کوردستانە، 
لانەی یەکەم ئەڤینمە.

++++++++++++++++++++++